TBP Balochi

کیچ ءِ دمگ تمپ ءَ سلاہ بندیں مردماں تیرگواری کنان ءَ یک مردمے کُشتگ-

بیران بیتگیں مردم ءِ پجار بالاچ ء بشیر ءِ نام ءَ زانگ بیتگ-

تیرگواری ءِ وئیل تمپ ءِ دمگ بالیچہ ءَ پیش اتکگ-

لاش تربت ءِ نادراہ جاہ ءَ برگ بیتگ ءُ داں انگت ءَ وئیل ءِ سبب زانگ نہ بیتگ-

نبشتانک: مرگ ءِ شیرکنی

نبشتہ کار: مھروان کمبر

دی بلوچستان پوسٹ

“اے وھد ءِ تْرند رواجیں سپر ءَ زند الّم یک روچے آسر بیت ءُ انسان مرگ ءَ گْور امباز کنت۔ چی ءَ کہ مرگ ابرمی راستی یے ءُ زند ءَ ھِچ آکبت نیست، یکروچے ھلاسی ءِ سیمسراں سر بیت۔ بلے وش بھتاں ھما کس کہ راج پھازیں بانداتے ءِ ھاتر ءَ گوں ورناھی ءِ سھت ءُ سنجاں ھمے شیرکنیں مرگ ءَ گْور امباز کن اَنت۔ ھمے مرگ ءِ شیرکنی اِنت کہ بلوچ ءَ ھر دور ءُ زمانگ ءَ شکّلیں جنگانی نمیرانیں مارشت ءَ دنت۔” ھمے دُن آتاریں جنگانی وشبو اِنت کہ بلوچ راج ءِ ورنا کنداں کندان ءَ وتی ھیشی سراں بکش اَنت۔ ھمے مرگ ءِ شیرکنی اِنت کہ تیاب دپ ءِ بچ ھمل مومن گوں راج پھازیں مارشتانی ستک ءَ ھمگرنچ بوگ ءِ ھاٹیگ بکش اِت۔

مزن پگریں ھمل مومن سرڈگار ءِ ھما سر متابیں بچّ اَت کہ وتی راجی پجّار، وتی زبان ءُ زمین ءِ ھاتر ءَ وتی لوگ، جاہ، دیار، کھول ءُ وتی وشّی نہ چار اِت اَنت، بلکیں آئی ءَ جنرلیں اسلم ءِ جوزگانی پد ءَ ریھان جان ءِ رھبند گپت ءُ پہ ھمے مات ءُ گْوھارانی شرپ ءِ پھریز ءَ، پہ وتی تیاب ءَ، پہ بلوچ ءِ باندات ءَ ماں ورنائی ءِ بھاراں وتی گِھگیریں سر ندر کرت ءُ ابدمان بوت۔

جند نْدریگیں ھمل مومن وتی گچین کرتگیں مرگ ءِ بارو ءَ جاھے گْوش اِیت کہ “ باز بر ءَ مَرگ ترا پہ ھمے ھاتر ءَ گچین کنگ کپ اِیت داں تئی زمین زندگ بہ مان اِیت۔ زمین ءِ ھست بوگ تئی ھست بوگ ءِ مانزمان اِنت ، بے زمین ءَ تئی ھستانک مانا نہ دار اِیت، ءُ تو تُری ھرچی بہ بہ ئے، زندمان ءِ ھر تک ءَ چہ سیالی بہ دارئے، بلے تئی زندمان ءِ ھر رنگ ءُ دْروشم بے زمین ءَ پولنگ بہ اَنت۔۔۔۔۔۔

اے روچ پہ یک ماتے ءَ سک گران بیت، مئے ھیال ءُ گمان آ جاگاہ ءَ پہ ارزانی ءَ شُت نہ کنت، بلے زمین رکّینگ ءِ پگر اے سرجمیں کسّھاں چہ بالا تِریں شئے یے ءُ اے جتائی ءِ درد ءُ تورشتاں ھما زندگیں زِرد مار اِت کنت کہ گْواچنی بس زمین ءَ جیڑگ ءَ اِنت۔۔۔، بِلّے کہ اے نْیام ءَ جتائی ءِ رنگ ءُ دْروشم اے داب ءَ ھم وت ءَ سھرا بہ کن اَنت، بس زمین جیڑگی اِنت کہ بے زمین ءَ ما ھرچی بہ بہ اِیں ، بلے مئے ھست بوگ ءِ مانزمان گوں زمین ءَ بندوک بوگ اِنت۔ زمین کہ نہ بیت، مئے زندگ بوگ ھِچ مانا نہ دار اِیت۔”

واجہ ویکٹر پرینکل جاھے گْوش اِیت “رنج، درد ، گم ءُ سکّیاں (ازیتاں) چہ ایر دستیں راجے ھچ پیم رک اِت نہ کنت، آئی ءِ ھر پڑ ءِ مردم وڑے نہ وڑے ءَ سکّی سگگ ءَ اِنت۔ مارا بس اے کار کنگی اِنت، آئی ءَ را ھال دیگی اِنت کہ آ پرچا سکّی ورگ ءَ اِنت؟ تاکہ آ بزانت کہ اے درد ءَ پد چونیں زندگی یے ھست ، آ وتی زندگ بوگ ءِ مانا ءَ بہ زانت۔ امینچو گیش آ سرپد بیت کہ آ پرچا زندگ اِنت، اے درد ءُ رنجاں پرچا کشگ ءَ اِنت، امینچو گیش آ درد ءِ سبب ءَ سرپد بہ بیت ءُ بہ زانت کہ منی باندات چینچو زیبا اِنت، آئی ءِ تہ ءَ اے دردانی سگگ ءِ امینچو ھاٹیگ کئیت گڑا آ اے درداں مان نیار اِیت ءُ مھکم بیت۔”

ھمل مومن رنج، درد، گم ءُ بلوچ راج ءِ گلامی ءُ اِیردستی ءَ شر سرپد اَت، پمیشکا آئی ءَ اے شیرکنیں مرگ ءِ تام چَش اِت ءُ مارا یک انچیں راھے ءِ نشان دات کہ اے راہ مئے وشیں باندات ءِ راہ اِنت۔ اے راہ نْدر ءُ کربان بوگ ءِ راہ اِنت۔ اے راہ ءَ سپر کنگ گْران اِنت، بلے کنگی اِنت۔ پرچا کہ وشیں دمان، آجوئیں زند ءُ وشیانی منزل ءَ ھمے راہ ترا بارت ءُ سر کنت۔ ھمل مومن ءِ داتگیں کربانی مارا ھمے کلوہ ءَ دنت کہ بس ھُشک ءَ نندگ ءُ ندارگ چارگ ءَ ناں کہ اے زلم ءُ زوراکی ءِ تھاریں شپ کُٹ اِیت، ناں کہ آجوئی ءِ سُھردپیں بام آسیت، بلکیں گلامی ءِ آس تئی ھر چیز ءَ سوچ اِیت ءُ ھلاس کنت۔

شائر، نبشتہ کار، آپریشن درہ ء بولان ءِ جند نْدریگ ھمل مومن ءَ وتی سپر جت ءُ پش کپتگیں بھر مئے نزوریں کوپگاں ایر کُت ، بائدیں ما ھمل مومن ءِ رند پداں بہ رو اِیں ءُ آئی ءِ پش کپتگیں کاراں سرجم بہ کن اِیں، ءُ پہ گلامی ءِ مُھریں سانکلانی سندگ ءَ مھکمیں توجیل بہ سازیں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ بُنجاھی شھر شال ءَ پاکستانی پوج ءَ بیست چار سالی ئیں ورنایےنل دزگیری ءَ پد بیگواہ کتگ-

گیشیں ھالانی رِد ءَ پاکستانی پوج ءَ ھمے سال ءَ دو فروری ءَ شال ءِ دمگ کلی گورا آباد مستونگ دگ ءِ جھمنندیں اختر ء شمس اللہ آوار جنگ ءَ پد ناشناسیں جاھے ءَ برتگ- چریشی ءِ درگت ءَ تنی وھدے سرپدی دز نہ کپتگ-

زانگ بہ بیت کہ بلوچستان ءَ ھوار پاکستان ءِ آ دگہ دمگاں چہ بلوچ سیاسی باسکاں ءُ نودربر ءِ زورانسری آوار جنی ءِ کیسز ھمکروچ ھساب ءَ رپورٹ بوگ ءَ اِنت- بلوچ سیاسی پارٹی ءُ انسانی ھکانی ءِ گلاں پاکستانی چیریں ادارھانی کارندھاں ءُ پوج سر ءَ اے زورانسری آوار جنی ءِ بھتام جنگ ءَ اَنت آیانی یل کنگ لوٹ کتگ-

پاکستان ءِ نیمگ ءَ پنچ شمبے ءِ سھب ءَ ایران ءِ سوبہ سستان بلوچستان (روکپتی بلوچستان) ءَ لس مھلوک ءِ گسانی نشانگ کنگ ءَ تنی وھدی نھ مردمانی جنگ ءِ ھبر راست بوتگ وھدیکہ بازیں اھوالکارانی رِد ءَ کساس دوازدہ مردم بیران بوتگ انت کہ آیانی تہ ءَ گیشتریں کچ زھگ ءُ زالبولانی انت –

پاکستان درملکی کارگس ءِ نیمگ ءَ شنگ بوتگیں درشانے ءِ تہ ءَ ٹاہ دیگ بوتگ کہ پنچ شمبے ءَ (ھژدہ جنوری) ءِ سھب ءَ پاکستان ءَ ایران ءِ سوبہ ءِ سستان بلوچستان ءَ ناشرکارانی اوتاکانی سر ءَ پوجی اُرشانی بندات کنگ بوتگ، چاریگ ءِ ھال دیگ ءَ اے آپریشن کنگ بوتگ ءُ چریشی ءَ بازیں ناشر کارے جنگ بوتگ انت –

پاکستان ءِ پوج ءِ جارکش ءِ رِد ءَ اے اررشاں بلوچ آجوئی لوٹوکیں گل بی ایل اے ءُ بی ایل ایپ ءِ ناشرکار نشانگ کنگ بوتگ انت –

پاکستان ءِ سوبہ بلوچستان ءُ کش ءُ گوری ھند ءُ دمگاں بازیں بلوچ آجوئی لوٹوکیں گل بازیں دھکے بیت کہ جنگ ءَ انت ءُ گلاں گوست ءَ پاکستان ءِ پھازگی لشکر، پولیس ءُ دگہ جاھاں ٹوھیں اُرش کتگ ءُ آیانی زمہ واری منّ اِتگ انت –

اے گلانی تہ ءَ دو مزنیں نام بلوچستان لبریشن پرنٹ (بی ایل ایپ) بلوچ لبریشن آرمی (بی ایل اے) انت ـ بی ایل ایپ ءِ سروک ھستیں وھد ءَ ڈاکٹر اللہ نزر انت ءُ وھدیکہ بی ایل اے ءِ سروک بشیر زیب ایں –

پاکستان ءِ واکدارانی نیمگ ءَ بازیں وھدے بیت کہ ھمے ٹاہ دیگ بوگ ءَ انت کہ اے آجوئی لوٹوکیں سلاہ بندیں گلانی ناشرکاران ایران ءَ باھوٹی زرتگ ءُ نشتگ انت –

زانگ بہ بیت کہ ایران ءَ پاکستان ءِ اُرش ءَ پد بی ایل ایپ ءِ جارکش ءِ نیمگ ءَ درشان دیگ بوتگ کہ بلوچستان لبریشن پرنٹ ماں ایران ءَ.ھچ وڈیں اوتاک نیست ءُ ناکہ پاکستان ءِ ھنوگیں اُرشاں بلوچستان لبریشن پرنٹ ءِ سرمچار نمیران بوتگ انت –

آپریشن مرگ بر سرمچار چی ئے؟

پاکستانی پوج آئی ایس پی آر ءِ گوشگ انت کہ پاکستان ءَ ھژدہ جنوری ءِ سھب ءَ ایران ءِ تہ ءَ اُرش کنان ءَ بلوچ لبریشن آرمی ءُ بلوچستان لبریشن پرنٹ ءِ اوتاک نشانگ کنگ بوتگ انت ءُ اے اُرش ءِ نشانگ ھما بوتگ انت کہ پاکستان ءِ تہ ءَ ناشرکاریاں دست ءِ مان بوتگ –

آئی ایس پی آر ءِ رِد ءَ اے اُرش ءَ ” آپریشن مرگ بر سرمچار” کوڈ نام دیگ بوتگ ءُ انٹیلیجنس بنیاد ءَ کنگ بوتگ –

مرگ بر سرمچار پارسی گالے کہ آئی لپزی مانا سرمچارانی مرگ ” بلوچ آجوئی لوٹوکیں سلاہ بندیں گلاں ھواریں باسک وتی واست ءَ سرمچار ءِ لپز ءَ کارمرز کن انت کہ آئی ءِ مول براھوئی زبان ءَ دلیر ءُ گوریلہ انت –

آئی ایس پی آر ءِ رِد ءَ اے اُرش ءَ وتکش ڈرون، راکٹ، میزائل ءُ تراکناکیں شورہ کارمرز کنگ بوتگ انت وھدیکہ ٹاہ دیگ بوتگ کولیٹرل ڈیمج ءَ رکگ ءِ پھریز کنگ بوتگ –

ارنا نیوز ءِ رِد ءَ سروان ءِ دمگ ایران سوبہ سستان بلوچستان بنجاھی شھر زاھدان ءَ سَے سد چِل ءُ ھپت کلومیٹر جنوب مشرق انت کہ آئی ءِ سیمسر پاکستان ءَ گوں مل انت –

سروان ایران ءِ سوبہ ءِ سستان بلوچستان ءِ بنجاھی شھر انت کہ ایران ءِ بنجاھی شھر تھران ءَ کساس ھژدہ سد کلومیٹت دور پاکستان ءُ ایران ءِ تپتان بارڈر ءَ چہ دو سد ءُ ھشتاد ءُ سَے کلومیٹر دور انت –

بلوچ لبریشن آرمی ءُ بلوچستان لبریشن پرنٹ کئے انت؟

بی بی سی رپورٹ ءِ رِد ءَ بلوچ لبریشن آرمی آجوئی لوٹوکیں گل 1970 ءِ دھک ءَ ھما وھد ءَ دیم ءَ اتکگ وھدیکہ گوستگیں مزن وزیر زوالفقار علی بھٹو وتی اولی سرکار ءَ بلوچستان ءَ ریاست ءِ پاکستان ءِ بگیری ءَ سلاہ بندیں جنگ ءِ بندات کتگ –

بلے پدا پوجی زوراکی ضیاء الحق ءِ نیمگ ءَ اقتدار ءِ سر ءَ کبزہ ءُ بلوچ راجدوستیں رھشوناں گند ءُ نند سلاہ بندانی چیزے وھد ءَ ھلاس بوگ ءَ پد بلوچ لبریشن آرمی ھم گار بوتگ –

بلے پدا صدر پرویز مشرف ءِ اقتدار وھد ءَ بلوچستان ھائی کورٹ ءِ جج جسٹس نواز مری ءِ کوش ءَ راجدوستیں رھشون نواب خیر بخش مری ءِ دزگیری ءَ پد سال دوھزار ءَ بلوچستان ءِ جتا جتائیں ھند ءُ دمگاں سرکاری جاہ ءُ پھازگی لشکر ءِ سر ءَ اُرشانی درچ ءِ بندات بوتگ ءُ وھدے گوزگ ءِ ھمراھی ءَ اے اُرشانی تہ ءَ ناکہ تھنا گیشی اتکگ بلکنہ آ بلوچستان ءِ جتا جتائیں ھند ءُ دمگاں تالان بوتگ –

اے اُرشانی گیشتر زمہ واری بی ایل اے ءِ نیمگ ءَ کبول کنگ بوتگ انت کہ آئی ءَ پد سال دوھزار ءُ شش ءَ پاکستان سرکار ءَ بی ایل اے ناشر کار ءِ لڑ ءَ ھوار کتگ ءُ واکدارانی نیمگ ءَ نواب حیر بخش مری ءِ زھگ نوبزادہ بالاچ مری بی ایل اے ءِ سروک گوشتگ –

سال دوھزار ءُ ھپت ءِ نومبر ماہ ءَ بالاچ مری جنگ بوھگے ھبر بی ایل اے ءِ نیمگ ءَ شنگ کنگ بوتگ کہ آ اوگانستان ءِ سیمسرانی نزیک ءَ پھازگی لشکر ءِ گوم ءَ دیم پہ دیمی میڑے ءَ جنگ بوتگ –

بالاچ مری ءِ نمیرانی ءَ پد پاکستان ءِ واکدارانی نیمگ ءَ برتانیہ ءَ جھمنند ایں آئی ءِ برات نوابزادہ حیربیار مری بی ایل اے ءِ سروک گوشگ بوتگ بلے پدا ھم نوابزادہ حیربیار مری ءِ نیمگ ءَ اے ٹاہ منگ نہ بوتگ انت کہ آ سلاہ بندیں گلے ءِ سروک انت –

بالاچ مری ءِ جنگ ءَ پد بی ایل اے ءِ سروکی ءَ ھما نام کہ دیم ءَ اتکگ آ اسلم بلوچ بوتگ آئی نام گل ءِ بنجاھی کمانڈرانی لڑ ءَ ھوار بوتگ –

اسلم بلوچ ءِ وھد ءَ بی ایل اے ءِ چیر دستی ءَ آئی ءِ ٹولی ءِ نیمگ ءَ.وتکش تراک اُرش ھم بندات کنگ بوتگ انت کہ آ گل ءِ نیمگ ءَ پدائی اُرش ءِ نام دیگ بوتگ انت – اے گل ءَ سی پیک بگیری داشتگ ءُ اشی ءَ وتی اُرشانی تہ ءَ؛ اکستان ءِ تہ ءَ چینی نشانگ بوتگ انت –

بی ایل اے ءِ نیمگ ءَ سال دوھزار ءُ ھژدہ ءَ اگست ماہ ءَ درساں پیش اولی اُرش کہ کنگ بوت زمہ داری زیرگ بوت آ اُرش اسلم ءِ جند ءِ زھگ ءَ چاگی ءِ ھیڈکوارٹر دلبندین ءِ نزیک ءَ کتگ ات – اے اُرش ءَ سیندک کار کنوکیں بس ءِ مردم نشانگ کنگ بوتگ اِتاں کہ آئی ءَ چینی انجینئر سوار بوتگ انت –

اے اُرش ءَ پد بی ایل اے ءَ سال دوھزار ھژدہ ءَ نومبر ماہ ءَ کراچی چینی کونصل خانہ ءِ سر ءَ بوتگیں زمہ واری منگ بوتگ ات اے اُرش سَے وتکشیں اُرشکاراں کتگ ات –

اے اُرش ءَ پد وتکشیں تراکے ءَ اسلم ءِ کوش ءِ ھبر اتک ءُ اشی ءَ پد بی ایل اے ءِ سروکی بشیر زیب ءَ زرت –

بی ایل ایپ سال دوھزار ءُ چار ءَ ڈاکٹر اللہ نزر بلوچ ءِ سروکی ءَ بلوچستان ءِ مکران بیلٹ ءُ اے ھند ءُ دمگاں دیم ءَ اتکگ اے گل ءَ ھستیں وھد ءَ پاکستان ءِ پھازگی لشکر ءِ سر ءَ بوتگیں اُرشانی زمہ واری منّ اِتگ انت –

اے گل ءَ سال دوھزار ءُ بیست ءُ دو ءَ جنوری ماہ ءَ بلوچستان ءِ شھر گوادر ءَ پاکستانی پوج ءِ یک بنجلے ءِ سر ءَ اُرش کتگ ات کہ اودا دھ پوجی کارمند مرتگ اتاں –

نیشنل ڈیموکریٹک پاٹی ءِ نیمگ ءَ شنگ بوتگیں درشانے ءِ تہ ءَ گوشتگ بوتگ کہ ھمے سال ءِ شانزدہ جنوری ءَ ایران ءِ نیمگ ءَ پنجگور ءَ لس مھلوک ءِ سر ءَ اُرش کنگ بوتگ کہ چریشی ءِ سوب ءَ بے گناھیں زھگ ءُ زالبولاں ھوار بازینے زدگ ءُ نمیران بوتگ انت کہ ھمیشی ءِ پسوی ءَ ھبدہ جنوری ءَ پاکستان ءِ نیمگ ءَ ایران ءِ ایردستیں شھر سراوان ءَ اُرش کنگ بوتگ کہ چریشی ءَ تنی وھدی بازیں زھگ ءُ زالبولے میزائلانی زد ءَ اتکگ ءُ نمیران بوتگ انت –

آئی ءَ گوشتگ کہ پنجگور ءُ سراوان ءَ جھان ءِ نکشہ ءِ تہ ءَ دو جتائیں ریاستانی تہ ءَ انت بلے ادے نندوک دراہ بلوچ انت میزائلانی سر ءَ لس ءُ بے گناھیں مردمانی سر ءَ اُرش کنگ ھردو نیمگاں ریاستی زوراکیاں پدر کنت ـ بلوچ راج کہ پیش ءَ زورانسری آوار جنی ژانگولیں جون ءُ سر عام مردم پپاھو دیگ بوگ ءَ انت ءُ نوں ھمے وڈیں اُرش اسلام آباد ءُ تھران ءِ ھاکمانی رستری ءَ پدر کنت –

درشان ءِ تہ ءَ گوشگ بوتگ میان استمانی ادارھانی بنکی زمہ واری انت کہ آ بلوچ چکچینی ءُ ھمے زوتاں بوتگیں ھردو نیمگانی اُرشانی گر ءُ دار ءَ وتی کرد ءَ پیلو بہ کن انت پرچا کہ اگاں میان استمان ءِ نیمگ ءَ گامگیج زورگ نہ بوت گڈا الم اے دمگاں بیمناکی گندگ ءَ کیت کہ آئی ءِ بنجاہ ھردو نیمگے بلوچ بنت –

بولان ءُ کوھلو ءَ زالبولیں وتکشتراکارے ءِ ھال، واکداراں شیواری کنائینتگ اَنت-

ڈپٹی کمشنر بولان ءُ کوھلو ءِ کارگس ءَ شنگ بیتگیں جتاجتائیں درشانی رِد ءَ سرجمیں سیاسی پارٹی ءُ آزاد قومی اسمبلی ءُ صوبائی اسمبلی ءِ نام داتگیں اُمیت وار گچینکاری ءِ کمپئین برجم دارگ ءِ ھیالداری کنگ گوشتگ اَنت-

ڈی آر او / ڈپٹی کمشنر کچھی کیپٹن ریٹائرڈ جمیل احمد بلوچ ءَ شیواری شنگ کنان ءَ بولان ءِ این اے 254 ءُ پی بی 12 اُمیت وارانی سر ءَ زالبولیں وتکشتراکے ءِ گمان کنگ بیگ ءَ اِنت سرجمیں اُمیت واراں مراگش، گپ رپی دیوان ءُ مچی ھنداں مُچ بوگ ءَ پھریز بکن اَنت-

ھمے وڑ کوھلو ءَ زالبولیں وتکشتراکے ءِ ساڑی بیگ ءِ شیواری شنگ کتگ-

ڈی آر او پی بی 09/ ڈپٹی کمشنر کوھلو نقیب اللہ کاکڑ ءَ شنگ کتگیں درشان ءِ رِد ءَ قومی اسمبلی ھند این اے 253 ءُ صوبائی اسمبلی ھند پی بی 09 ءِ اُمیت وارانی سر ءَ زالبولیں وتکشتراک اُرشے ءِ گمان اِنت سرجمیں اُمیت واراں مراگش، مُچی ، دیوان ءِ مردمانی مچیانی ھند ءَ مُچی ءَ پھریز بکن اَنت-

زانگ بہ بیت کہ بلوچستان ءِ شھر تربت ءُ شال ءَ گوستگیں روچاں پاکستان مسلم لیگ ن، پیپلزپارٹی ءُ جمعیت ءِ اُمیت وارانی سر ءَ تیرگواری ءُ دستی بمباں گوں نشانگ کتگ اَنت-

زانگ بہ بیت کہ بلوچستان ءَ بلوچ آجوئی لوٹوکیں سلاہ بندیں گلانی یکجاھی براس ءَ بلوچ راج ءَ گوں گچینکاری ءَ بھر نہ زورگ ءِ دزبندی کتگ-

ایشی ءَ ساری ھم واکدارانی نیمگ ءَ چہ بلوچستان ءِ جتاجتائیں دمگاں ھمے وڑیں شیواری شنگ کنگ بیتگ، بلے اشی ءَ پد واکدارانی ٹاہ پدر نہ بیتگ اَنت-

پاکستان ءَ ھشت فروری ءَ بؤکیں گچینکاریانی گیش گیواری برجاہ ءَ اِنت- بلے بلوچستان ءَ انگت چست ءُ ایر نیست-

نمدی یے پہ شہید  ساربان

نبشتہ کار : اسلم بلوچ

دی بلوچستان پوسٹ

دْروت ناکو من اُمیت کناں تو وش ئے  ءُ مدام کندگانی توکا بات ئے ۔اے   جُھد ءِ توک ءَ ما ھوار کپتگیں بلے گوں شمئے  یک مزن ھوسلے پشتا ما ھوار ایں مرچی شمئے کُربانیانی بدولت انت کہ ھرکس جھد ءَ گوں  ھوار بوگ ءَ اَنت ھمے کلیں شہیداں وتی ھون رِتگ انت پہ وتی گلزمین واستا مرچی کُلیں شہیداں مارا ھاٹیگ ھوسلہ داتگ اے وھد ءِ تھ ءَ دژمن ھما وتی جندے پنجاب ءِ توک ءَ انت بلے بلوچ پسگانی ترس اش دلا انت۔

ناکو ھمے کے من ننداں گڑا برے برے تی یات کایاں اَنت کہ باریں تو چون ئے ءُ کجا کئی  دلبڈی  ھوارے گوں ناکو ترا گپے گشاں  تئی، بالاچ جان ءُ  دلسرد روگ ءَ پد وپا جان ھم گوں لھتیں سنگتاں تی ءَ آتک اے شپ ءِ دو بجے انت ءُ سال نوکیں بندات انت 2024 جنوری ماھے انت موسم سک سردے ءُ من کُڈکے توک ءَ انت آس روک اِنت بس گوں لھتیں پش کپتگیں  یاتاں شپ جُنزاں اِنت ھمک سال پما گوش ئے یک نا وشیں سال بوگ ءَ انت بلے مارا ھمے شہیدانی شھادت ءَ  مُھکم کتگ برے برے مردم سک جیڑ اِیت اے ھمبلانی سر ءَ ءُ پد ءَ وتارا تسل ءَ دنت۔ جنگ انچیں شیھے کہ  اے راھے توک ءَ جُھدکار  ھمے وڑا کُربان بوان اَنت بس مارا ھمے شھیدانی داتگیں راہ ءُ ھما پکر دیم ءَ بَرگی انت بس انشا اللہ سوب مئے  بیت۔ وش دیوانیں ناکو زئیں  روچ ءَ مشکے دل بند ءَ سالونکیں سر پہ پہ وتن نمیران بوتگ انت بالاچ ءِ ءُ دلسرد ءِ ھالاں بدے باریں چون اَنت  تو ڈِیک وارتگ گوں ناکو مرچاں گوش ئے تنھائی اِنت مردم ءَ چو زومے وڑا ڈنگ جنگ ءَ انت۔ تئی یات گیر کائینت تی گوں ھوار سپرے جت بلے تو ھم من ءَ یل کت شوت ئے وپا جان ءِ وشیں آواز مرچاں ھچ گوشاں نہ کَپ ایت ءَ  کمک جان ھم مرچاں گپے نہ کنت.مھروان برے برے گوں اُشتراں ما سپرا روایں ھما جاھاں من تو مدام داشتگ ءُ دمے بالارت ءَ ھمودا تئی بس یاد پَش کپتگ انت ءُ ھمے کمبے آپ ءَ ھم داراں ءُ چاھے کنا پد ءَ در کپیں بلے کمو ھما دیم ءَ رواں پد ءَ تئی جگر برویں زھیر کایاں من ءَ ھمے کہ مرچی تئی یاد اتکاں من نمدی یے نبشتہ بوتاں ھور ءَ ایر دات تئی یاتاں گوں مرچی ھور انت-

ناکو او ناکو ھاں ابا بسکٹ ءُ چاھی شیر کجا انت من چاھے کن ءُ تو اُشتراں باراں بوجے دانکہ شریں تو چاھے پر کن من اُشتراں یل کن آں کایاں آڑے اے دگہ سنگتے ساربان نہ اِنت ؟ بہ بکش مھروانیں ساربان ھم ءَ اِنت کہ تو رپتگ ئے گنج بے ترا سک بے تاھیر انت گنجا وتی پس یل کتگ اَنت او ھچ ھم وشے نہ بیت بس تئی یاتاں انت۔مدام تئی نام ءَ گپت ءُ گوش ایت ناکو ءَ من ءَ یل دات مھروان ناکو برے برے من ننداں ءُ جیڑاں کہ تو چونیں انسان ئے اَت ئے ھرکسی  کارانی واستا تو ساڑی اَت ئے ءُ دم برگے نام نہ زانت اے دراجیں سپراں تو مدام راھاں انت ئے ھرکس ء ترا کارے گوں اَت تو گوں وشیں دپے پُریں کندگاں گوشت جی واجا منی وڑیں یک نابودیں نا زانتیں ارچی تئی تُوسیپ  بکن کم انت۔شپ روچ بنت 
منی مھروان تئی اَرواہ آسودگ بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ سلاہ بندیں زرمبشت، نوکتری ءُ تُرندی- نگاہ چاری اھوال

نبشتہ کار: باھوٹ بلوچ

دی بلوچستان پوسٹ

24 جون 2023 شمبے ءِ روچ، بلوچستان ءِ شھر تربت ءَ یک مزن ءُ نا گمان رنگیں وئیلے پیش اتکگ ات کہ ایشی ءَ سرجمیں دمگ جکس اتگ ات کہ اود ءَ بلوچ لبریشن آرمی ءَ یک ’فدائی‘ اُرش ءَ پاکستانی پوج نشانگ کتگ ات-

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشانے ءَ گوشتگ کہ گل ءِ فدائی ٹولی ’ مجید بریگیڈ‘ ءَ مروچی ساھت نیمروچ ءِ وھد ءَ تربت ءِ شھر ءَ دشمنیں پوج ءِ چیریں ادارھانی یک’ ھائی ویلیو‘ کاروانے فدائی اُرش ءِ نشانگ کتگ ءُ بازیں کچے ءَ جانی ءُ مالی تاوانانی دیمپان کتگ-

اے اُرش مجید بریگیڈ ءِ زالبولیں فدائی سمعیہ قلندرانی بلوچ ءَ سرجم کتگ – بی ایل اے ءِ جارکش ءَ گوشتگ بیست ءُ پنچ سالی ئیں سمعیہ قلندرانی ءِ سیادی اھوالکاری ءِ کار ءَ بیتگ، آ پنچ سالاں داں بلوچ لبریشن آرمی ءِ میڈیا ونگ (ھکل) سرجم کنگ ءَ بیتگ ءُ اے وھد ءَ بی ایل اے میڈیا ونگ ءِ مھکم کنگ ءُ دیم ءَ برگ ءِ وھد ءَ جوانیں کرد پیلو کتگ-

سمعیہ بلوچ دومی بلوچ فدائی زالبول بیتگ، آئی ءَ بیڑ سرجم کتگ – ایشی ءَ پیش شاری بلوچ ءَ کراچی ءَ فدائی اُرش ءَ کنفیوشس انسٹی ٹیوٹ ءِ چینی باسک نشانگ کتگ ات اَنت – اے تراک ءِ آسر ءَ چینی شھریاں ھوار پاکستانی لشکر ءِ کارمنداں جانی تاوانانی دیمپانی کنگ کپتگ-

تربت ءِ اُرش ءَ دو ماہ ءِ گوزگ ءَ پد 13 اگست 2023 ءَ بلوچستان ءِ گچینی ءِ شھر گوادر ءَ سھب ءِ ساھت 9:18 ءِ نزیک ءَ سلاہ بندیں مردماں چینی شھری نشانگ کتگ اَنت، اُرشکاراں داں دو اداراں گیش کاروان ءِ دارگ ءِ جھد ءَ سوبین بیتگ اَنت ءُ کاروان ءَ ھواریں چینی شھری ءُ پاکستانی پوج ءِ کارمندان تاوان بیتگ اَنت-

اے اُرش ءِ زمہ واری بلوچ لبریشن آرمی ءَ من اتگ – بی ایل اے ءِ جارکش جیئند بلوچ ءَ درشان ءَ گوشتگ کہ اے اُرش بی ایل اے کی آپریشن زرپھازگ کا سیمی بھر بیتگ ھمے وڑ اے آپریشن ءَ بی ایل اے ءِ مجید بریگیڈ ءِ دو بھادریں فدائین نوید بلوچ پنام ءِ اسلم بلوچ ءُ مقبول بلوچ پنام ءِ قائم بلوچ ءَ سرجم کتگ-

بلوچ لبریشن آرمی ءَ ھردوکیں اُرشاں ٹارگٹس گچینی دروشم پدر کتگ اَنت ؛ تربت ءَ پاکستانی چیریں ادارہ آئی ایس آئی ءِ گچینی ءِ آفیسریناں نشانگ کتگ اَنت بنداتی دروشم ءَ پاکستان ءِ پوج ءَ اُرش ءَ تاوانانی چیر دیان ءَ ایشر ءَ را پولیس ءِ سر ءَ اُرش گوشتگ ءُ پد ءَ دمگی اھوال ءُ سی سی ٹی وی فوٹیج ءَ تچک کتگ اَنت اُرش ءَ پاکستانی پوج ءِ گاڑی نشانگ کنگ بیتگ کہ آئی ءَ گچینی آپیسر جاڑیگ بیتگ اَنت-

گوستگیں پنچ سالانی وھد ءَ گوادر ءَ چینی انجینئر ءُ زرکارانی سر ءَ بیتگیں اُرشاں وتکش اُرشاں پد گوادر ءَ سیکورٹی پھریزداری ءَ ترند کنگ بیتگ بلے گوستگیں سال ءَ گوادر ءَ بیتگیں اُرش ءَ گچینداری اُرش ءَ داں سلاھانی گون ءَ سر بیتگ ءُ گوادر پورٹ ءِ نیمگ ءَ روکیں چینی انجیئرانی کاروان ءِ نشانگ کتگ – بی ایل اے ءِ جارکش ءِ رد ءَ اے آپریشن ءَ بی ایل اے ءِ انٹیلیجنس ونگ ءُ ٹیکٹیکل ونگ ءَ ھم بھر زرتگ بیتگ-

اُرشانی سر ءَ یک نگاھے:

گوستگیں سال ءَ بلوچ سلاہ بندیں آجوئی دوستاں کساسی رنگ ءَ 612 اُرش کتگ بیتگ اَنت، اے اُرشانی توک ءَ پاکستانی پوج، تیل ءُ گیس ءِ کمپنی، مڈی بروکیں گاڑی ءُ سائٹس، دامگی رھوتکاری، ریل گاڑی ءُ ٹریکٹس، ڈنی زرکاری ءُ دمگی چیرکاری نشانگ کتگ اَنت- بلوچ لبریشن آرمی ءِ سالگشتی رپورٹ ءِ رد ءَ بی ایل اے ءَ سرجمی ءَ 247 اُرش کتگ اَنت ھمے وڑ ءَ بلوچستان لبریشن فرنٹ ءِ سالگشتی رپورٹ ءَ گوشگ بیتگ کہ گل ءَ سرجمی ءَ 281 اُرش کتگ اَنت دگہ گلاں بی آر جی، بی این اے، بی ایل ٹی، یو بی اے کساسی رنگ ءَ 81 اُرشانی زمہ واری زرتگ اَنت-

تربت ءُ گوادر اُرشاں ھوار بلوچ لبریشن آرمی ءِ گچینی باسک فتح اسکواڈ ءَ 14 ستمبر 2023 ءِ بیگاہ ءَ شال ءِ شھر ءَ کساس 20 کلو میٹر دور ولی تنگی ءِ ھند ءَ پاکستانی پوج ءِ نوک جوڑ کرتگیں پوسٹانی اُرش کتگ ءُ آیانی دستگی کتگ ات اَنت – اُرشکاراں پوج ءِ سلاہ ءُ گولہ بارود دستگی کتگ اَنت-

بی ایل اے ءِ اسپیشل ٹیکٹیکل آپریشنز اسکواڈ (ایس ٹی او ایس) ءَ بولان ءِ ھند مارگٹ ءَ 11 اکتوبر2023 یک کاروائی ءَ پاکستانی پوج ءِ پیرا ملٹری فورس فرنٹیئر کور ءِ دو کارندہ سوبیدار مھمد ھان ءُ سپاھی عبدالرشید دزگیر کتگ – جارکش ءَ گوشتگ اے یک انٹیلی جنس بیسڈ ءِ بیڑ ءَ کتگ-

گل ءِ اُرشانی ھواریں سالگشتی تاک ’دک‘ ءِ رد ءَ بی ایل اے ءِ جنگولاں گوستگیں سال ءِ 9 گچینی آپریشن سرجم کتگ اَنت کہ ایشانی توک ءَ پنچ کاروائی ’ ایس ٹی او ایس ‘ دو کاروائی فتح اسکواڈ ءُ دو کاروائی مجید بریگیڈ ءَ سرجم کرتگ اَنت-

بلوچستان لبریشن فرنٹ ءَ کولواہ ءَ 3 جولائی 2023 ءَ پاکستانی پوج ءَ موٹر سائیکلاں ھواریں کاروان ءِ سر ءَ یک اُرشے ءِ نشانگ، اُرش ءِ آسر ءَ پاکستانی پوج ءِ میجر ثاقب ءَ ھوار شش کارندہ کشتگ اَنت-

سرجمیں بلوچستان ءَ پاکستانی پوج ءِ جوڑ کرتگیں سلاہ بندیں گلاں ڈیتھ اسکواڈ ءِ نام ءَ زانگ بیتگ اِنت اے کارمند پاکستانی پوج ءُ چیریں ادارھانی چیردستی ءَ ھلگ ءَ اِنت ءُ ھمے چم دیستگیں مردم اے مردمانی مالی ھرچ ءُ درچانی سرجم کنگ ءَ پوج آیاں دزی، آوار جنی، نشہ آماچی ءُ دگہ دزپچی داتگ اَنت-

17 اگست 2023 ءَ بی ایل ایف ءِ سرمچاراں بالگتر ءِ ھند نلی ءَ ’ ڈیتھ اسکواڈ ‘ ءِ کارمندانی یک گاڑی ءِ آئی ای ڈی ءِ اُرش ءِ نشانگ کتگ اَنت چریشی ءِ آسر ءَ 6 کارمند ھما جاہ ءَ کُشگ بیتگ اَنت، کشگ بیتگیں کارمندانی پجار ڈیتھ اسکواڈ ءِ سروک مھمد اسحاق ءُ ھمراھاں ھوار ات-

گوستگیں سال ءِ سَے نومبر ءَ بلوچستان لبریشن فرنٹ ءِ سرمچاراں گوادر ءِ دمگ پسنی بدوک ءَ کوسٹل ھائی وے ءِ سر ءَ چہ پیسر ءَ سنگر بستگ ءُ پاکستانی پوج ءِ دو گاڑیانی سر ءَ مزنیں اُرشے کتگ – اُرشکاراں بنداتی ءَ یک گاڑی یے گوں تراک ناکیں شورواں نشانک کتگ ءُ پد ءَ رند ءَ آئی ءِ سر ءَ اُرش کتگ، ھردو گاڑیاں سواریں درسیں چاردہ کارمند مرتگ انت وھدیکہ اُرشکاراں آیانی درسیں سلاہ ھم دستیگ کتگ انت –

ھمے وڑ یک اپریل 2023 ءَ یک دگہ اُرشے ءَ بلوچ لبریشن آرمی ءِ سرمچاراں زامران ءِ دمگ ساہ دیم ءَ پاکستانی پوج ءِ یک گاڑی یے ئِے سر ءَ اُرش کتگ، گاڑی ءَ سواریں چار کارمند ھما دمان ءَ مرتگ انت وھدیکہ اُرش کاراں آیانی سلاہ دستیگ کتگ انت –

براس :

بلوچ سلاہ بندیں گلانی نیمگ ءَ گوستگیں سال ءَ یک جوانیں گامگیجے ھما وھد ءَ گندگ ءَ اتکگ وھدیکہ درسیں رھشوناں بلوچ سلاہ بندیں گلانی ھمسنتیں گل بلوچ راجی آجوئی سنگر (براس) ءَ باندات ءَ مرج کنگ ءِ ھیال درشان اِتگ انت –

براس بلوچ آجوئی لوٹوکیں سلاہ بندیں گلانی یک مھکمیں یکمشتی ءِ دروشم ءَ دیم ءَ اتکگ – کہ آئی ءَ برجم بوگ ءَ پاکستانی پوج ءِ سر ءَ ترندیں اُرش کنگ بوتگ انت مزنیں سلاھاں گوں آ جانی ءُ مالی تاوانانی دیمپان کنگ بیتگ انت، اے اُرشانی تہ ءَ پاکستانی پوج ءِ بنجلانی گرگ ، نیوی کارمندانی پجار کنگ ءَ پد کُشگ، پاکستانی پوج ءِ کارمنداں ھوار ٹیل ءُ گیس ءِ کمپنیانی کارمندانی کوش ھوار انت –

چوش کہ گوستگیں سال ءَ براس ءِ نیمگ ءَ ھچ وڑیں اُرش کنگ نہ بوتگ بلے پد ءَ ھم آئی ءِ تہ ءَ ھواریں آجوئی لوٹوکیں سلاہ بندیں گلانی ھمسنتی یک آرمی ءِ اڈ دیگ شریں نگاھے ءَ چارگ بوگ ءَ انت –

لٹریچر:

بلوچ آجوئی لوٹولیں سلاہ بندیں گلانی گوستگیں لھتے سالانی تہ ءَ بوتگیں کاروایانی تہ ءَ بدلی گندگ ءَ اتکگ اے گلانی نیمگ ءَ لٹریچر ءِ سر ءَ ھم دلگوش دیگ بوگ ءَ انت کہ گوست ءَ اے چیز نہ بوتگ انت –

گوستگیں سال ءَ بلوچ لبریشن آرمی ءِ سینٹرل میڈیا چینل ھکل ءَ ھوار ایندگہ چینلاں کساس بیست ءُ پنچ ھیلکاری تامر ءُ کتاب شنگ کنگ بوتگ انت – کہ آیانی تہ ءَ نوکتریں سلاھانی کارمرز کنگ، بازاری گوریلہ اسنائپر ءِ درگت ءَ کتاب، ڈیجیٹل سیکورٹ ء درگت ءَ کتابک، زالبولیں فدائی شاری بلوچ درگت ءَ کتابک ھوار انت وھدیکہ سلاھانی درگت ءَ ھیلکاری ءِ تامر بلوچستان ءِ دو شاھگانیں زبان بلوچی ءُ براھوئی ءِ تہ ءَ شنگ بوتگ انت –

اے گلانی نیمگ ءَ ھمک ماھی ءُ ھمک سالی کارانی رسالہ ھم شنگ کنگ بوتگ انت –

ھمے وڑ آجوئی لوٹوکیں سروکانی تامری درشان ھم شنگ کنگ بوتگ انت – بلوچ لبریشن آرمی ءِ سروک بشیر زیب بلوچ ءِ گوستگیں سال ءَ دو تامری درشان شنگ کنگ بوتگ انت کہ آیانی تہ ءَ یک تامری کلوھے ءِ آ گندگ بیت کہ بلوچ زرمبشت ءِ سر ءَ شریں وڑے ءَ وتی ھیالاں درشان کنگ ءَ انت وھدیکہ ماں گوادر ءَ چینی انجیئرانی سر ءَ بوتگیں مجید برگیڈ ءِ اُرش ءَ پد آئی دومی کلوہ ھم شنگ بوتگ ات کہ آ چین ءُ ھلیجی ڈیھاں ھوار جھان ءَ دلگوش گور کنائینگ ءَ انت –

اے کلوہ ءِ تہ ءَ آئی ءَ گوشتگ ات کہ چین ءَ ھوار ھلیجی ڈیھ، یورپ، کنیڈا ءُ مئے ھمساھگیں ڈیھ سرپد بہ بنت کہ بلوچ وتی مال ءُ مڈیانی لٹ ءُ پُل ءَ ھچ وڑ اوپار کت نہ کنت – مئے گوں دومی راجاں ھچ وڑیں دژمنی نیست اگاں ھر کس ءَ بلوچ راج ءِ مال ءُ مڈیانی لٹ ءُ پُل کت، بلوچ چکچینی ءَ پنجاپ ءُ پاکستان ءِ ھمراہ داری کت گڑا بلوچ اے نہ چار ایت کہ چنکدر مزنیں تاکتے-

تاوانانی سر ءَ نگاہ:

گوستگیں سال ءَ سرجمی ءَ چِل ءُ نُھ بلوچ سرمچار ( آجوئی لوٹوکیں سلاہ بندیں جھدکار) بلوچستان ءِ جتا جتائیں ھند ءُ دمگاں نمیران بوتگ انت کہ آیانی تہ ءَ سَے فدائیاں ھوار چاردہ باسک بلوچ لبریشن آرمی ءُ سِی ءُ پنچ بلوچستان لبریشن فرنٹ ءِ ھوار انت –

بلوچ آجوئی لوٹوکاں یک مزنیں تاوان ءِ سال ءِ گڈسر ءَ بلوچ نیشنلسٹ آرمی (بی این اے) ءِ درگان درگانی دروشم ءَ ھما وھد ءَ رس اتگ وھدیکہ سرفراز بنگلزئی ءَ وتی سنگتانی ھمراھی ءَ پاکستان ءِ پوج ءِ دیم ءَ سلاہ دور داتگ انت ءُ پاکستان ءِ منگ ءِ جار جتگ – اے جار آئی ءَ ماں شال ءَ بلوچستان ءِ سر وزیر جان اچکزئی ءِ ھمرائی ءَ پریس کانفرنس ءَ جتگ –

واکداراں اھوالکاراں گوں بٹاک جتگ ءُ گوشتگ ات کہ سرفراز بنگلزئی ءَ ھپتاد مردمانی ھمرائی ءَ سلاہ دور داتگ انت بلے اے پریس کانفرنس ءَ بس ھژدہ مردم گندگ بوتگ ات بازیں اھوالکارانی گوشگ انت کہ واکدارانی نیمگ ءَ اے کچ باز کنگ ءُ پیشدارگ بوتگ –

سرفراز بنگلزئی ءِ سلاھانی دور دیگ پاکستان ءِ پوجی واکداری ھاتر ءَ یک سوبمندی ءِ زانگ بیت بلوچ بلوچستان ءَ برجاھیں آجوئی ءِ زرمبشت ءِ سر ءَ سان دور دات نہ کنت بلکیں بنشون ءِ رِد ءَ گلزار امام ءِ دزگیری ءَ پد بی این اے ءِ بازیں جھد کارے یک کر بوتگ دگہ گلاں ھوار بوتگ انت وھدیکہ بنگلزئی ءِ گوم ءَ بس لھتے مردم بوتگ انت ءُ راستی ءَ بی این اے پیش ءَ ھلاس بوتگ –

اشی ءَ ابید بلوچستان ءَ برجاھیں زرمبشت ءَ ورنایانی مزنیں کچے ھست کہ چریشی ءِ سوب ءَ ھر وڑیں کماندارے ءِ بیرانی یا دزگیری ءَ بازیں سان نہ بیت انت –

گڈسر:

بلوچ آجوئی لوٹوکیں سلاہ بندیں گلانیں شوربندیانی تہ ءَ بدلی آرگ ءِ سوب ءَ آیانی اُرش ترندتر بوان انت – گوستگیں سال ءِ ٹوھیں اُرشاں ھمے پدر بیت کہ تربت ءِ وڑیں شھر ءِ بہ بیت یا کوسٹل ھائی وے، گوادر شھر ءِ پھزداریں جاہ بہ بیت یا کولواہ ءِ کوچگی دمگ یا شال ءِ کینٹ ءَ کمو کلومیٹر دور ولی تنگی ءِ دمگ، درسیں جاھاں بلوچ آجوئی لوٹوکیں ھمسنتیں گل ٹوھیں اُرش کنگ ءِ زور ءَ دار انت –

پاکستانی پوج آجوئی لوٹوکانی بگیری ءَ ڈرون اُرش ءَ ھوار مزنیں کچے ءَ تاکت ءُ مڈی کارمرز کنگ ءَ انت بلے پد ءَ ھم آئی ءَ جوانیں رزلٹ نہ رس اتگ –

بلوچ آجوئی لوٹوکانی ارشانی پژدر بہ چارے اے دمگ ءَ باندات ءَ پاکستان ءِ پوجی سِیتاں ھوار ڈنی زرکاراں ترندیں جاورھالانی دیمپانی کنگ کپ ایت – وھدیکہ شاری بلوچ ءُ سمعیہ قلندرانی بلوچ ءِ فدائی اُرش اے زرمبشت ءِ بدلیاں پدر کنت –

بی بی سی اردو ءَ گوں تران کنان ءَ بی ایل اے ءِ سروک بشیر زیب ءِ گوشگ ات کہ فدائی بلوچ راج ءِ منگھیں راجی ھیرو انت ءُ راجی مڈی انت بلوچ راج آیاں وتی رکینگ ءِ امیت لیک ایت ھمے ھاتر ءَ مروچی یک مزنیں کچے ءَ بلوچ جنین ءُ مردین مجید برگیڈ ءِ بھر جوڑ بوتگ انت ءُ فدائی اُرش بلوچستان ءِ آجوئی ءَ تاں ھمے وڑ ترندی ءَ گوں برجاہ مان انت –

پاکستان ءَ ایران ءِ اُرشانی پسو دیان ءَ روکپتی بلوچستان ءِ سر ءَ اُرش کتگ-

سر بیتگین اھوالانی رد ءَ پاکستان ءَ گوستگین روچ ءَ ایرانی اُرشانی پسو دیگ ءَ ایران ءِ زیردستی ءَ بلوچ اُستان ءِ بازیں جاھاں میزائل ءُ ڈرون اُرش کتگ اَنت – اُرشاں بازیں لوگ تباہ بیتگ اَنت ءُ بلے داں انگت ءَ پاکستان ءِ نیمگ ءَ سرکاری درشان داں انگت ءَ دیم ءَ نیتکگ اَنت-

دی بلوچستان پوسٹ ءَ سر بیتگیں اھوالانی رد ءَ پاکستان ءِ نیمگ ءَ پشمبے ءِ سرشپ ءَ ڈرون اُرش کنگ بیتگ اَنت ناسرجمیں اھوالانی رد ءَ پاکستان ءِ نیمگ ءَ اُرش روکپتی بلوچستان ءِ دمگ سراوان ءُ رودراتکی بلوچستان ءِ سیمسری دمگ ایران ءِ زیردستیں ھند حق آباد ءَ کنگ بیتگ اَنت-

اُرشانی بارو ءَ سرکاری تکاں تاوانانی بارو ءَ دگہ گپ دیم ءَ نیتکگ اَنت بلے بازیں اھوالانی رد ءَ لوگانی تاوان ءُ لوگاں جاڑیگیں زالبول ءُ زھگانی بیرانی ءِ اھوالاں دیگ ءَ اَنت-

زانگ بہ بیت گوستگیں روچ ءَ ایران ءَ بلوچستان ءِ ھند پنجگور ءَ سبزکوہ ءِ ھند ءَ ڈرون ءُ میزائل اُرش کتگ اَنت ءُ ایران ءَ اُرش ایران ءِ بگیری کنوکیں گل جیش العدل ءِ بنجلانی نشانگ کنگ ءِ ٹاہ داتگ ات-