TBP Balochi

روکپتی بلوچستان ءَ ھواریں دمگ سِب ءُ سوران ءَ ناشناسیں مردماں تیرگوار کرتگ ءُ یک مردمے کُشتگ-

وئیل گوستگیں روچ ءَ پیش اتکگ کہ اود ءَ سِب ءُ سوران ءِ ھند دولت آباد ءَ ناشناساں تیرگواری کرتگ ءُ یک ورنایے کُشتگ-

کُشگ بیتگیں مردم ءِ پجار بیست ءُ دو سالی ئیں علی شھدادزئی ء سعید جھمنند دولت آباد سِب ءُ سوران ءِ نام ءَ زانگ بیتگ-

اھوالانی رد ءَ علی اَچ وتی لوگ ءِ نزیک ءَ ناشناسیں مردماں تیرانی نشانگ کتگ ءُ کشتگ-

وئیل ءِ سبب زانگ نہ بیتگ ءُ ناکہ کوشکار زانگ بیتگ اَنت-

گوادر دورو کنڈگ چیک پوسٹ ءَ پاکستانی پوج ءَ دو مردم آوار جنگ ءَ پد بیگواہ کتگ-

گیشیں ھالانی رِد ءَ بلوچستان ءِ دمگ چہ گوادر ءَ پاکستانی پوج ءَ دورو کنڈگ چیک پوسٹ ءَ چہ دو مردم محبوب ء ابولحسن ءُ وھاب ء مجید جھمنند دشت ھور شولیگ آوار جنگ ءَ پد ناشناسیں جاھے ءَ برتگ اَنت-

پاکستانی پوج ءِ دست ءَ دزگیری ءَ پد دوئیں ورنا تاں انگت دیم ءَ آرگ نہ بیتگ اَنت-

26 اگست ءِ شپ ءَ بلوچستان ءِ دمگ بیلہ ءَ پاکستانی پوج ءِ ھیڈکوارٹرز ءَ شورواں پُریں گاڑی ءَ ڈک دیوکیں بلوچ لبریشن آرمی ءِ مجید برگیڈ ءِ فدائی رضوان بلوچ پنام ءِ ھمل ءِ گڈی تامر بندی کلوہ شنگ بیتگ –

اے تامر بندی بی ایل اے ءِ آفیشل میڈیا چینل ھکّل ءَ شنگ کنگ بیتگ- تامر ءِ ھواری ءَ رضوان بلوچ ءِ اکس ھم ھوارینتگ اَنت – آیانی توک ءَ آ کوھانی دامن ءَ سلاہ بندی ءَ گندگ بیت اِنت-

آپریشن ھیروپ ءِ درگت ءَ یک سرجمیں درشانے شنگ کنان ءَ بی ایل اے جارکش جیئند بلوچ ءَ سرجمیں درشان ءِ شنگ کنان ءَ گوشتگ شھید فدائی سنگت رضوان بلوچ پنام ءِ ھمل ء مولا بخش ءِ سیادی گوادر ءِ ھند پانوان ءَ بیتگ – بیست ءُ دو سالی ئیں رضوان بلوچ ءَ سال دوھزار ءُ بیست ءُ دو ءَ بلوچ لبریشن آرمی ءَ ھوار بیتگ ھما سال ءَ بی ایل اے مجید برگیڈ ءَ کمکاری ءَ وتی کاراں کنگ ءَ پیش کتگ اَنت – آئی ءَ اے آپریشن ءَ شورواں پریں دومی گاڑی دشمن پوج ءِ بیلہ ھیڈکوارٹرز ءِ دومی نیمگ ءَ ٹکر جتگ دشمن ءِ ھوش برتگ ءُ بھادری ءِ مزن جوانیں مسال داران ءَ شھیدی پہ وتی نام ءَ کتگ-

تامر بند ءَ فدائی رضوان بلوچ گوش ایت درستاں پیش وتی شھیداں سھریں سلام پیش کن آں کہ آیاں وتی جان سرڈگار ءِ ھاتر ءَ کربان کتگ ءُ ھما سنگتاں سلام کہ کوھانی توک ءَ گژن ءُ تن ءِ اوپار ءَ کنگ ءَ اَنت، پہ کے ءَ؟ بلوچ راج ءِ واستا، مئے واستا ءُ ھمایانی واستا دگانی سر ءَ لٹ ءُ کٹ کنگ بوگ ءَ اَنت کہ آیانی سر ءَ پنجاپی لٹ شاپی کنگ ءَ اِنت، زاہ دیگ ءَ اِنت پرچاکہ ما گلام اِنت-

آئی ءَ گوشتگ مئے گور ءَ توپک ءَ ابید دگی ھچ راہ نیست کہ پنجاپی ءِ ھلاپ ءَ توپک چِست نہ کن ئے ھچ کت نہ کن ئے بلوچستان ءِ مھکم کنگ ءِ ھاتر ءَ ھرچ رنگ ءَ مارا توپک چِست کنگی اِنت مارا وتی مات ءُ گوھارانی ازت دوست اِنت ما وتی مات ءُ گوھارانی رکینوک اِنت- مروچی ما گندگ ءَ ایں مئے مات ءُ گوھاراں کجام رنگ ءَ بے وس اَنت ما وتی مات، گوھار، براتاں وتی وشی، دراھیں واھشت یل داتگ اَنت کے ھاتر ءَ، ھمایانی ھاتر ءَ کہ مروچی دگانی سر ءَ بے وسی ءَ کپتگ اَنت- ھما جنک کہ آئی ءِ وانگ ءِ اُمر اِنت، مروچی آئی ءِ بے وسی ءِ دنیا ءَ وتی برات یا وتی پت ءِ اکس ءِ گون ءَ دگانی سر ءَ اِنت ءُ پنجاپی برے آیانی گوداں دِر ات ءُ برے گشان چِک ایت ءُ برے آیانی سر ءَ لٹ شاپی کنت ھمے سبب ءَ من اے راہ پہ وت ءَ گچین کتگ –

رضوان گوش ایت مروچی من بی ایل اے مجید برگیڈ ءَ ھوار بیتگ اَنت پنجاپی ءَ گوشگ لوٹ آں منی سرڈگار ءَ چہ درکپ، منی مات ءُ گوھاراں لٹ شاپ کنگ ءَ بند بہ کن، منی براتاں چِست مہ کن ءُ زنداناں مہ کن پرچاکہ ھمے ماتانی ھاتر ءَ ما وتی گڈی ساہ ءَ ندر کن ایں ءُ ھما براتانی ھاتر ءَ وتی گڈی تیر ءَ وتی سینگ ءَ جت کن ایں بلے ترا زوگری ءَ نیل اِنت-

تامربند ءِ دومی بھر ءَ رضوان بلوچ یک گاڑی ءِ توک ءَ نندگ ءَ گندگ بیت اِنت کہ وتی کلوہ ءَ گوش ایت ما وتی مشن ءِ نیمگ ءَ روگ ءَ ایں مئے ھمراھی ءَ یک گوھارے( ماھل) انت کہ آ ھم اے مشن ءِ بھر اِنت ءُ اے راج ءِ واستا یک کلوھء کہ یک گوھارے کربان بوگ ءُ وتی براتانی راہ ءَ پچ کنگ انت ءُ وتی براتانی ھمراہ اِنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گوشتگ دو جتاجتائیں اُرشاں مئے سرمچاراں موسی خیل ءَ یوپون موبائل ٹاور مانداشتگ ءُ مستونگ ءَ پولیس کارگس ءِ سر ءَ دستی بمب اُرشے کُرتگ۔

جارکش ءَ گْوشتگ کہ مئے سرمچاراں 18 ستمبر ءِ بیگاہ ءِ شش ءَ موسا ھیل ءِ ھند تیراک میھتر ءَ پاکستان ءِ ٹیلی کمیونیکیشن یوپون موبائل ٹاور ءِ مشین ءُ سامان مانداشتگ اَنت۔

آئی ءَ گْوشتگ مئے سرمچاراں 19 ستمبر ءِ سُھب ءِ ھشت ءَ کلات ءِ ھند مستونگ کڈ کوچگ ءَ پسانی پِڑی ءِ نزیک ءَ موٹر وے پولیس ءِ کارگس ءِ سر ءَ دستی بمب اُرشے کُرتگ ءُ پولیس ءَ جانی ءُ مالی تاوان داتگ۔

جارکش ءَ گْوشتگ کہ پاکستان آرمی،ایپ سی ءُ ریاستی ادارہ بلوچ سرڈگار ءِ سر ءَ زورگِر اَنت ءُ زورگریں دژمن ھرکجا نشانگ کنگ بیگ ءَ اِنت۔ما مدام لیویز ءُ پولیس ءَ کڈن کُرتگ کہ ھرچ مردم بلوچ چکچینی ءُ سرمچارانی رنگیری ءَ ھوار اِنت گوں آئی ءَ ھما وڑ کنگ بیت کہ گوں دژمن ءَ کنگ بیگ ءَ اِنت۔

میجر گْوھرام ءَ گوشتگ بلوچستان لبریشن فرنٹ دوئیں اُرشانی زمہ واری ءَ منّ ایت ءُ داں بلوچستان ءِ آجوئی ءَ اُرشانی برجاہ دارگ ءِ کول ءَ کنت۔

زاکر دشتی ءِ یل نہ کنگ ءِ ھلاپ ءَ کھول ءَ سی پیک ءِ دگ بند کتگ-

گیشیں اھوالانی رد ءَ بلوچستان ءِ دمگ پنجگور ءَ بیگواھیں زاکر دشتی ءِ کھول ءَ آئی ءِ یل نہ کنگ ءِ ھلاپ ءَ سی پیک دگ بند کتگ ءُ روانی مھتل کتگ-

بیگواھیں زاکر دشتی ءِ کھول ءَ سرادک ءِ ھند ءَ سی پیک دگ بند کتگ ءُ روانی مھتل کتگ – کھول ءَ زاکر دشتی ءِ یل کنگ ءِ لوٹ کتگ-

ھمے وھد ءَ زالبول ءُ زھگ ھوار بیتگ اَنت – کھول ءِ رد ءَ زاکر دشتی دو روچ پیش سلاہ بندیں مردماں آوار جتگ انتزامیہ ءَ ھما روچ ءَ چہ بے توار اِنت ءُ ھچ پسو دیگ ءَ نہ اِنت-

کھول ءَ گوشتگ اگاں زاکر دشتی یل نہ بیت گڑا زھرشانی ترند کنگ بیت اِنت-

پولیس ءَ یک اسکولے ءِ پرنسپلے ءَ ھوار اسٹاپ ءِ دو مردم دزگیر کتگ اَنت-

گیشیں اھوالانی رد ءَ سندھ ءِ ھواریں دمگ بلوچستان ءِ زرباری ءُ رودراتکی ھند ڈیرہ اللہ یار ءَ پولیس ءَ یک اسکولے ءِ پرنسپلے ءَ ھوار اسٹاپ ءِ دو مردم دزگیر کتگ اَنت – چریشی ءَ اسکول ءِ زھگانی زوال کنگ ءِ بھتام اِنت-

جعفر آباد ءِ پولیس ءِ ایس ایس پی عطاالرھمان ترین ءَ گوشتگ کہ زھگانی گون ءَ زوالکاری ءِ بھتام ءَ پرنسپل ءَ ھوار اسکول ءِ کارمندیں سَے مردمانی ھلاپ ءَ ارزی نبشتگ کنگ بیتگ-

پولیس ءِ رد ءَ چارشمبے ءِ روچ ءَ دزگیریں جرمکار جوڈیشل مجسٹریٹ ءِ آمیدگس ءَ پیش کتگ ءُ ھپت روچ ءِ ریمانڈ زرتگ-

اسکول ءِ پرنسپل ءُ دگہ جرمکار گمانی رنگ ءَ اسکول ءِ ھاسٹل ءَ جھمنندین پنچ زھگانی سر ءَ زوالکاری ءِ بھتام اِنت- پولیس جرم ءَ ھواریں دگہ یک جرمکارے ءِ شوھاز اِنت ءُ زوالکاری ءِ آماچیں زھگانی میڈیکل بوگ ءَ اَنت-

گمانی رنگ ءَ زوالکاری ءِ آماچیں نودربرانی پتاں واکداراں لوٹ کتگ کہ اے درگت ءَ دراھیں منانکاں دیم ءَ بیار ایت ءُ جرمکاراں ترندیں سزا بہ دنت ءُ اسکول ءِ ھلاپ ءَ کاروائی بہ کنت اِنت-

لسبیلہ ءِ شھر چہ وندر ءَ پاکستانی پوج ءَ یک دکاندارے بیگواہ کتگ-

گیشیں ھالانی رِد ءَ بیگواہ کنگ بیتگیں زاھد بلوچ جھمنند گریشہ ھُزدار چارشمبے ءِ روچ ءَ لسبیلہ ءِ شھر چہ وندر ءَ لوگ ءَ پاکستانی پوج ءَ زورانسری بیگواہ کتگ-

کھول ءَ گوشتگ کہ زاھد بلوچ یک دکاندارے ءُ باپاری ھاتر ءَ گوستگیں بازیں سالاں چہ اود ءَ جھمنند اِنت-

آیاں دزبندی کتگ کہ زاھد بلوچ ءِ یل کنائینگ ھاتر ءَ مئے توار جوڑ بہ بہ اِت-

ایرانی آمیدگس ءِ ھکم ءَ زابل ءِ جھمنندیں بندیگے ماں یزد ءَ پاھو ءِ ھکم داتگ-

سر بیتگیں ھالانی رد ءَ گوستگیں روچ ءَ ایرانی آمیدگس ءَ ایران ءِ شھر یزد ءِ زندان ءَ زابل ءِ جھمنندیں بلوچے پاھو ءِ ھکم داتگ-

پاھو ھکم دیگ بیتگیں مردم ءِ پجار منان براھوئی ء علی بیک جھمنند زابل ءِ نام ءَ زانگ بیتگ-

اھوالانی رد ءَ منان براھوئی ایرانی سال نود ءُ ھشت ءَ نشہ واپاری ءِ بھتام ءَ دزگیر کنگ بیتگ ءُ پد ءَ آئی ءِ سر ءَ پاھو اتکگ بیتگ ءُ گوستگیں روچ ءَ آ جتائیں کوٹی ءَ برگ بیتگ-

اھوالانی رد ءَ منان براھوئی ءِ گڈی گندوگ آئی ءِ مردماں چار شمبے ءِ روچ ءَ کتگ بیتگ-

اھوالانی رد ءَ منان ءِ برات عبدالسلام سال دو ھزار ءُ بیست ءُ یک ءَ نشہ واپاری ءِ بھتام ءَ اسپھان ءَ پاھو داتگ بیتگ-

ایران ءَ پاھو دیگ بیتگیں مردمانی گیشتریں سیستان و بلوچستان ءَ اِنت کہ آیانی سر ءَ ایرانی آمیدگس گیشتر نشہ واپاری ءِ بھتام ءَ لڈگ ءُ پاھو دیگ انت-

روکپتی بلوچستان ءِ ھند ھاش ءَ ایرانی چیریں ادارھاں یک ورنایے آوار جنگ ءَ پد گون وت برتگ-

گیشیں اھوالانی رد ءَ آوار جنگ بیتگین مردم ءِ پجار شانزدہ سالی ئیں امیر مھمد ایرندگانی ء نور مھمد ءِ نام ءَ زانگ بیتگ-

اھوالانی رد ءَ امیر مھمد ایرانی اطلاعات ءَ لشکریانی سر ءَ اُرش ءَ پد بیتگ برتگ ءُ بیگواہ کتگ-

اھوالانی رد ءَ ایشی ءَ پیش آئی ءِ دوسیاد اسمائیل ایرندگان ءُ اسھاک ایرندگان کہ ھردوک ابراھیم ءِ چُک اَنت اے مردم ھم چہ پولیس آپیسر ھسین الی پیری ءِ کوش ءَ پد برگ ءُ بیگواہ کنگ بیتگ اَنت-

اھوالانی رد ءَ ایشانی دگہ یک سیادے نازیلا کہ گوستگیں روچاں ایرانی لشکر ءَ گاڑی یے سر ءَ تیرگواری کتگ ءُ چریشی ءَ آ گوں چک ءُ دگہ دو مردماں بیران بیتگ اَنت-

زانگ بہ بیت ھاش پولیس ءِ سروک کہ گوستگیں روچاں ناشناسیں مردماں تیرگواری کتگ ءُ کشتگ اَت کہ پد ءَ آئی ءِ کوش ءِ زمہ واری جیش العدل ءَ من اتگ ات-