راج ءِ نودربر
نبشتہ کار: ڈاکٹر ھانی
دی بلوچستان پوسٹ
اے گپ ءَ ھچ شک نیست کہ بلوچ راج ءِ کالج ءُ یونیورساٹیانی نودربر، اُستاد ءُ لس وانِندہ چہ دنیا ءِ دِگہ وانِندھاں ناپوہ اَنت، یا گْوش ئے اگل ءَ کم کارمرز کن اَنت۔ مرچاں یونیورسٹیاں سر بوتگیں بلوچ راج ءِ نودربراں اے سرپدی نیست کہ نبشتہ چی ءَ گْوش اَنت؟ نبشتہ ءِ چُنت کاریچ(Process) اَنت؟ یا نبشتہ ءِ تہ ءَ لبزانکی نشان ءُ بھرگانی چے بِستار اِنت۔
چہ ایشی ءَ ھوار بلوچ راج ءِ اُستاد، نودربر ءُ دِگہ وانِندھاں اگل ءُ راجدوستی ءِ کمی ھم ھست۔ بلوچ راج ءِ وانِندھانی اے دْراھیں وانگ ءُ لبزانکی نزوریاں ما ھمروچ گِندگ ءَ ایں۔ انی یک کَسانیں درورے دے آں چیزے روچ پیسر من گوں یک بلوچ ڈاکٹرے ءَ گپءُرپ(Chatting) ءَ بوتگ آں کہ آئی ءَ چہ بلوچستان ءِ نامداریں بولان میڈیل کالج (بی ایم سی) ءَ ایم بی بی ایس کُتگ اَت ءُ انی ھلیج ءَ کار ءَ اِنت۔ بانُک بلوچی نبشتہ ءَ نزور اَت ءُ بلوچی نبیسگ ءَ سک باز رَدی کنگ ءَ اَت۔ گُڑا من جُست کُت “بانُک، چہ تئی شوشل میڈیا ءِ پوسٹاں زانگ بیت کہ تو بلاھیں راجدوستے ئے، ترا موبائل ھم ھست گُڑا تو وتی راجی زبان ءَ پرچا رَد نبیسگ ءَ ئے؟“
گْوشت ئِے “من ھلیج ءَ آں، من بلوچی نہ ونتگ، بلوچی نبیسگ ءَ نزور آں پمیشکا بلوچی ءَ رد نبیسگ ءَ آں“
گُڑا من ھبکہ بوت آں کہ انی اے وڑیں وانِندھیں ناسرپداں کے سرپد بہ کنت کہ بلوچی زاناں لگتمال ءُ گلامیں بلوچستان ءِ کُجام وانگجاھاں وانینگ بوگ ءَ اِنت؟ شُمئے وڑ ءَ پیسر ما ھم بلوچی وانگ ءُ راست نبیسگ ءَ نزور ات ایں، شُمئے وڑ ءَ ما ھم رَد نبیسگ ءَ ات ایں پمیشکا اے گپ ءَ کَس مہ گْوش ایت کہ من بلوچی نہ ونتگ۔ راستی ءَ ما دْراہ چہ ھمے موبائلاں وتی راجی زبان ءَ وانگ ءُ دربرگ ءَ ایں۔ اگاں تو ھلیج ءَ شُتگ ئے گُڑا ایشی ءِ متلب اے وَ نہ اِنت کہ تو چہ بلوچی ءَ دور بوتگ ئے۔ زاناں اد ءَ ایران ءُ پاکستان ءِ ایردستی ءَ بلوچ راج وتی راجی زبان ءَ وانگ ءَ اِنت کہ تو چہ بلوچی ءَ زبھر بوتگ ئے!
گِند ئے وانگ ءِ مول ءُ مُراد تھنا اے وَ نہ اِنت کہ تو میڈیکل سائنس ءَ بِہ وان ئے ءُ ڈاکٹرے بَہ ئے، یا انجینئرنگ ٹیکنولوجی بِہ وان ئے ءُ انجینئرے جوڑ بِہ بَہ ئے شریں پوریاگِر ءُ کارسرے(An officer) بِہ بَہ ئے بلکیں بنی آدم ءَ وانان ءُ زانان ءَ وت ءَ یک زانتکارے ھم جوڑ کنگی اِنت، وانان ءَ وتی اگل ئِے ھم پچ کنگی اِنت پمیشکا تو بے زانگ ءَ زانتکارے جوڑ نہ بَہ ئے۔ بے زانگ ءَ یونیورسٹی ءِ ڈگری دست ءَ کنگ ءَ ھچ پائدگ نیست پمیشکا گْوش اَنت وانگ ءُ زانگ وت ماں وت ھمگرنچ اَنت۔ چہ وانگ ءُ دربرگ ءَ پد اگاں تو وتی پائدگ ءُ تاوان ءَ سرپد نہ ئے گُڑا تو زانتکارے گْوشگ نہ بَہ ئے بلکیں جاھلے ئے۔
چوناھا تو وت بلوچے ئے پمیشکا تو وتی ماتی ءُ راجی زُبان ءَ وت ونت کن ئے، سرپد ھم بہ ئے گُڑا اِے ھم پہ ما گنج اِنت۔ اگاں ما پارسی، ھِندی ءُ انگریزی ءِ وڑیں دری زُبانانی وانگ ءُ دربرگ ءَ دہ سال جن ایں گُڑا باید اِنت کہ ما یک ماھے ءَ وتی زُبان ءِ وانگ ءُ دربرگ ءِ جُھد ھم بہ کن ایں کہ بلوچی راجی پجّار اِنت۔ گِند ئے شما وتی راجی زبان ءِ وانگ ءُ دربرگ ءِ جُھد ءَ پْروش مہ ور اِت۔ شُمئے وڑ ءَ پیسر ما ھم بلوچی نبیسگ ءَ نزور ات ایں ءُ ما ھم بلوچی دَرونتاں وانان ءَ وتی راجی زبان ءِ راست نبیسگ ھیل کُتگ۔ شما وت بلوچ اِت، اگاں وانان کن اِت گُڑا کم کم ءَ وتی راجی زبان ءَ ھیل ھم کن اِت پمیشکا ھچبر پریشان مہ بَہ اِت کہ ما بلوچی نہ ونتگ۔ یک روچے ءِ تہ ءَ پکیر مُلا وَ نہ بیت پمیشکا بِل اِت یک ماھے بہ لگ ایت یا دو ماہ بہ لگ ایت۔ شما پہ وتی راجی زبان ءِ دربرگ ءَ وتی جُھد ءَ یک راجی سرمچارے ءِ وڑ ءَ مھکم ءُ برجاہ بہ دار اِت، ھر روچ بلوچی درونت ءُ زبان دوستی نبشتانکاں بہ وانان بہ کن اِت گُڑا بچار کہ سے روچ ءِ تہ ءَ شما وت بلوچی نبشتہ زبر بَہ اِت۔ مارا سرپد بوگ لوٹ ایت کہ بلوچی وانگ ءُ نبیسگ آجوئی جنگ ءِ بھرے پرچا کہ چہ زبان ءِ وانگ ءَ راجانی تہ ءَ زبان دوستی ءُ راجدوستی ودی بیت۔
گُڑا باید اِنت ما اول بلوچی دَرونت، زُبان دوستی ءُ راجدوستی نبشتانکاں وانان کن ایں کہ گوں وانگ ءَ سرپدی رس ایت۔ وھدیکہ ما وتی اے نزوری شر کُتگ اَنت گُڑا ما وتی راجی زُبان ءِ راست نبیسّگ ءَ وت زبر بَہ ایں ءُ دُنیا ءِ دِگہ راجانی وڑ ءَ ما بلوچ ھم دیمروی کن ایں۔ گوں راج ءِ اُستاد، نودربر ءُ لس وانِندھاں دزبندی کن ایں کہ پیسر بلوچی درونتاں بہ وان اِت ءُ پد ءَ زُبان دوستی ءُ راجدوستی نبشتانکاں وانان ءَ ، بلوچی نبشتہ ھیل کنگ ءِ جُھد کنان ءَ زوت راجی زبان ءِ سرمچار ءُ شریں جُھدکارے جوڑ بِہ بَہ اِت۔
سلامت بات اِت، بلوچ راج شالا یکمُشت ءُ ھمدست بات، بلوچ ءُ بلوچی شالا دیمروی بکنات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
