TBP Balochi

چہ بلوچ اسٹوڈنٹس ایکشن کمیٹی ءِ نیمگ ءَ بلوچستان کتاب کاروان ءِ نام ءَ برجم داشتگیں کتاب میڑہ مند ءَ برجاہ اِنت، مرچی اولی روچ ءَ مند ءِ دمگ سورو بُنجاھی بازار ءَ برجم دارگ بیتگ۔

چار روچی کتاب میڑہ ءِ اولی روچ ءَ نودربر، استاد، ادیب ءُ شائراں ھوار میتگ ءِ ایدگہ لس مردماں بھر زُرتگ ءُ پہ وت گچینی ئیں کتاب پہ وانگ ءَ زُرتگ انت-

آئی ءَ گوشتگ کتاب مراگہ ءِ دومی روچ دو شمبے بزاں باندا گورنمنٹ بوائز ھائی اسکول سورو ءَ برجم دارگ بیت انت۔

زانگ بہ بیت بلوچ اسٹوڈنٹس ایکشن کمیٹی ءِ نیمگ ءَ مند ءَ بلوچستان کتاب کاروان ءِ نام ءَ چہ جتاجتائیں جاھاں ایر کنگ بیتگ اَنت مروچیگیں سورو بازار بیتگ باندا گورنمنٹ بوائز ھائی وانگجاہ سورو ءَ برجم دارگ بیت انت بیست ءُ چار ستمبر سے شمبے ءِ روچ ءَ زبیدہ جلال سیکنڈری وانگجاہ سورو ءَ بیت انت بیست ءُ پنچ ستمبر چارشمبے ءَ گورنمنٹ گرلز ھائی وانگجاہ سورو ءَ برجم دارگ بیت انت-

بارکھان ءُ ڈیرہ بگٹی ءِ سیمسر دمگ اوچھڑی ءَ سلاہ بندیں مردماں ءُ پوج ءِ میان ءَ تیرگواری ءِ سوب ءَ دو کارندہ بیران وھدے پنچ ٹپی بیتگ اَنت-

شپ وھد ءَ تاں دو نیمگی تیرگواری برجاہ بیگ ھال اِنت، سروزیر بلوچستان سرفراز بگٹی ءِ ناکوزتک برات خان محمد مسوری بگٹی ءِ رِد ءَ ڈیرہ بگٹی ءُ بارکھان ءِ سیمسری دمگ اوچھڑی ءَ سلاہ بندیں مردمانی نیمگ ءَ موباھل ٹاور تراکناکیں شورواں گوں تراکینگ پد دمگ ءَ سلاہ بندانی ساڑی بیگ ھال ءَ امن فورس ءِ کمکاراں سلاہ بندیں مردمانی رندگیری کتگ سلاہ بندیں مردماں تیرگواری کتگ، تیرگواری ءِ نشانگ ءَ آیگ ءَ امن فورس ءِ دو کارمند بیران وھدے کہ پنچ ٹپی بیتگ اَنت-

ڈسٹرکٹ جانسلامتی ءِ آفیسر ڈیرہ بگٹی ڈاکٹر اعظم بگٹی ءِ رِد ءَ ٹپی سرکاری فورس ءِ کارمند ھیلی کاپٹر سر ءَ رکھنی نادُراھجاہ ءَ سر کنگ بیتگ اَنت-

گُڈی ھالاں تاں تیرگواری رد برجاہ بیتگ-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں ھاران شھر ءَ ایف سی ءِ گاڑی ءِ سر ءَ دستی بمب اُرشے کُرتگ کہ چہ ایشی ءَ ایف سی ءِ دو کارمند ٹپی بیتگ۔

جارکش ءَ گْوشتگ کہ بیست ءُ دو ستمبر ءَ یکشمبے ءِ روچ ءِ دوزدہ ءَ اے سوبمندیں کار کنگ بیتگ۔

جارکش ءَ گْوشتگ کہ دژمن گوں نوکیں ٹیکنالوجی،نوکیں کیمرہ ءُ نوکیں مشیناں ابید ناگیگیں دمگاں سرمچارانی سوبمندیں کار آیانی گھتریں جنگی کارشونیانی منّانک اِنت، چہ ایشی ءَ نہ ایوک ءَ دُژمن تُرس ءِ آماچ اِنت بلکیں سَسّائی بنیاد ءَ آ لس مردماں دیم ءَ دارگ ءِ جُھد ءَ کنگ ءَ اِنت۔

میجر گْوھرام ءَ گوشتگ بی ایل ایف ءِ سوبمندیں کارشونیاں دژمن ھنچوش پروش داتگ کہ آ وتی پروش ءُ شرمندی ءِ چیر دیگ ءَ ما چاگردی رسانکدر ءَ گوں وتی باڑھی چریکاں بلوچ راجی زْرمبشت ءِ بگیری ءَ دروگ بندیت ءُ گْواچن ءِ چیر دیگ ءِ بے سوبیں جُھدے کنگ ءَ اِنت۔

جارکش ءَ گوشتگ ما اے اُرش ءَ لس مردمانی تاوان ءَ بژنیگیں ءُ چہ مردماں دزبندی کن ایں کہ چہ دژمنیں لشکر ءُ چہ آئی ءِ شوربندیاں وت ءَ گستا بہ دار اَنت مئےسرمچار کجام ھم وھد ءَ آیاں نشانگ کن اَنت۔

جارکش ءَ گوشتگ بلوچستان لبریشن فرنٹ ھاران اُرش ءِ زمک واری ءَ منّ ایت ءُ داں بلوچستان ءِ آجوئی ءَ جُھد ءِ برجاہ دارگ ءِ کول ءَ کنت۔

سرجمیں دنیا ءَ نندوکیں سیاسی باسکاں 19 جولائی2024 ءَ چہ ایران ءَ زورانسری بیگواہ کنگ بیتگیں کماشیں بلوچ رھشون واھد کمبر بلوچ ءِ سلامتی ءَ یل کنگ ءِ ھاتر ءَ آن لائن مھمے بندات کنگ بیتگ-

واھد کمبر ءِ لوگبانک ءُ زھگاں ھوار ھزارانی کچ ءَ بلوچ باسک، کلانین رھشون، کواس ءُ انسانی ھکانی زمہ واراں چاگردی ترامجاہ ایکس ءَ #ReleaseWahidKambetBaloch ھیش ٹیگ ءِ درچ ءَ یک مھمے بندات کتگ ءُ آئی ءِ یل کنگ ءِ لوٹ ءَ کنگ ءَ اَنت-

واھد کمبر گمانی ءَ ایران ءِ شھر کرمان ءَ آوار جنگ بیتگ- اود ءَ آ وتی جاندراھی ءَ کنگ ءَ بیتگ- آئی ءِ بیگواھی ءِ پژدر ءَ انسانی ھکانی گل بازیں کچے ءَ دردیگی درشان کنگ ءَ اَنت-

بلوچ نیشنل مومنٹ ءِ ڈپٹی کوآرڈینیٹر نیاز بلوچ ءَ آدینگ بیست ستمبر ءَ جنیوا ءَ میان اُستمان ءِ پنجاہ ءُ ھپتمی انسانی ھکانی کونسل ءَ جنرل ڈیبیٹ ءَ وتی تران ءَ بلوچستان ءَ زورانسری بیگواھیانی درگت ءَ وتی لیکہ درشان کتگ اَنت-

نیاز بلوچ ءَ وتی تران ءَ واھد کمبر ءِ آوار جنگ ءِ درگت ءَ گپ کنان ءَ گوشتگ نوزدہ جولائی دوھزار ءُ بیست ءُ چار ءَ یک گچینی ءِ بلوچ رھشون واھد بکش پنام ءِ واھد کمبر بلوچ اُمر ھپتاد ءُ چار سال پاکستانی پوج ءَ یک ھمساھیگیں ڈیھے ءَ آوار جتگ – آئی ءِ دزگیری ءَ بلوچ برادری ءُ انسانی ھکانی گلاں جھلانکیں دردمانی ءِ درشانی پدر کنت اِنت- یک کلانیں رھشون ءُ نی یک سیاسی پرکای ءِ دھشت ءَ آئی ءِ دزگیری سیاسی رنگ ءَ پرکاری ءَ گندگ بیت اِنت- کہ آئی ءِ بنکی انسانی ھکانی لگتمالی اِنت-

یک دگہ بلوچ راجدوست میر عبدالنبی بنگلزئی ءَ ایکس ءَ یک کلوھے ءَ گوشتگ “ استاد واھد کمبر، آجوئی ءِ چکار داریں بلوچ رھشون کہ دل ءِ نادراہ بیتگ ءُ کرمان ءَ الاج ءَ بیتگ، نوزدہ جولائی دوھزار ءُ بیست ءُ چار ءَ پاکستانی چیریں ادارھاں آوار جتگ – ما آئی ءِ سلامتی ءِ واستا پکرمند اِنت ءُ آئی ءَ آمیدگس ءَ پیش کنگ بہ بنت –

بی این ایم ءِ انسانی ھکانی پتر ءِ تک پانک ءَ واھد کمبر ءِ لوگبانک ءُ زھگ ءِ تامر بند شنگ کتگ ءُ چریشی ءَ آئی ءِ یل کنگ ءِ لوٹ کتگ آئی ءَ اے پدر کتگ کہ اے اولی رند نہ اِنت بیگواہ کنگ بیتگ ءُ چریشی ءَ پیش ھم آ آوار جنگ ءُ بیگواہ کنگ بیتگ-

نامی ئیں کواس ءُ بلوچ زرمبشت ءِ کلان تِریں رھشون میر مھمد علی تالپور ءَ یک ایکس ءَ وتی دردیگیں لیکہ درشان کتگ ءُ گوشتگ“ استاد واھد کمبر ءِ زندگی ھترہ ءِ توک ءَ پرچاکہ آ ریاستی ادارھاں آوار جتگ”-

واھد کمبر ءِ بیگواھی بلوچستان ءَ زورانسری بیگواھیانی گیش بوگ ءِ درچانی میان ءَ پیش اتکگ کہ اود ءَ پاکستانی پوج ءِ دستاں ھزاراں بلوچ باسک، زانتکار ءُ لس شھریانی بیگواھیانی ھال یکشل ءَ پیداک اَنت ءُ انسانی ھکانی گل اے جیڑھاں تچک ءُ انساپ ءِ لوٹ ءَ کنگ ءَ اَنت-

کیچ ءِ دمگ دشت ءَ ناشناسیں سلاہ بندیں مردماں زونگ ٹاور سر ءَ اُرش کتگ ءُ مانداشتگ-

گیشیں ھالانی رِد ءَ دشت ءِ دمگ بلنگور ءِ ھند کاشاپ ءَ مروچی مگرب وھد ءَ ناشناسیں سلاہ بندیں مردماں زونگ ٹاور سر ءَ اُرش کتگ ءُ سولر سسٹم تیر جتگ ءُ تباہ کتگ اَنت ءُ مشینری مانداشتگ اَنت-

زانگ بہ بیت اشی ءَ ساری ھم بلوچستان ءِ جتاجتائیں دمگاں ٹاورانی سر ءَ اُرش بیتگ ءُ اُرشانی زمہ واری بلوچ آجوئی لوٹوکیں سلاہ بندیں گلاں زرتگ اَنت بلے اے اُرش زمہ واری انگت ھچ گل ءَ نہ زرتگ-

زوانسری نور عالم مری ءَ ھوار دگہ بیگواھیں مردمانی یل نہ کنگ ءِ ھلاپ ءَ یکشمبے ءِ روچ ءَ شال ءَ زھرشانی کنگ بیتگ-

زورانسری آوار جنگ بیتگیں نور عالم ءِ یل کنگ ءِ واستا وائس فار مسنگ پرسنز ءِ بنجل ءَ زھرشانی روانکے داں آمیدگس دگ ،سرکلر دگ، جناح دگ، منان چوک ءَ گوزان بیتگ ءُ آمیدگس دگ ءَ ھلاس بیتگ-

روانک ءِ مھلوک ءَ نور عالم ءَ ھوار دگہ بیگواھیں.مردمانی یل کنگ ءِ واستا اوگام جتگ-

زھرشانی کنوکاں گوشتگ نور عالم مری ھپت سال ءَ پیش بیگواہ کنگ بیتگ کہ انگت آئی ءِ درگت ءَ ھچ ھال نیست اِنت-

آئی ءَ گوشت کہ نور عالم مری ء دلشاد مری ءِ ھپت سال پیسر فوجی آپریشن ءِ وھد ءَ چہ وتی لوگ ءَ زوراکی ءَ بیگواہ کنگ بوتگ کہ تاں روچ ء مرچی دیم ءَ آرگ نہ بوتگ، آئی ءِ پیریں مات آئی ءِ وش بوھگ ءِ اُمیت ءَ دار ایت-

زھرشانی کنوکاں گْوشتگ: اگاں مئے بیگواھیں دوستیں مردمانی ھلاپ ءَ ھرچ وڑیں بھتامے ھست گُڑا آ آمیدگساں پیش کنگ بہ بنت دانکہ آیانی ھلاپ ءَ کانود ءِ رد ءَ کارروائی کنگ بہ بیت۔ اگاں آیاں ھچ وڑیں جرمے نہ کتگ گڑا زوت یلہ کنگ بہ بنت دانکہ آیانی نزیکیں مردم چہ ھما درد ءَ رکّگ بہ بنت ءُ ھما ودار ءَ بہ کن اَنت کہ آیانی نزیکیں مردماں چہ اے درداں درگوزگی انت۔

گوادر ءِ دمگدار ءَ یک نوٹیپکشنے شنگ کنان ءَ گوشتگ پھزداری ءِ ترس ءَ دو بیست ءُ پنجاہ ءِ سیمسر بند کتگ-

مکران کوسٹل ھائی وے ءِ بندش ءُ سیکورٹی ءِ سبب ءَ ڈپٹی کمشنر گوادر ءَ بارڈر ٹریڈز ءِ بارو ءَ نوٹپکیشن ءَ گوشتگ پاک ایران بارڈر 250 ھرچ وڑیں ٹریڈز ءُ ٹریڈز ءَ ھواریں گاڑیابی واستا سر ءُ پری ءَ اداروکی ءِ واستا بندش جتگ-

زانگ بہ بیت گوادر ءَ پاکستانی کوسٹ گارڈ ءِ نارو سلوک ءُ گیشیانی ھلاپ ءَ پیک اپ واھند اتھاد ءِ نیمگ ءَ کوسٹل ھائی وے نیلنٹ زیروپوائنٹ ءَ نندانک داتگ ءُ سیل کتگ-

زھرشانی ءِ سبب ءَ دمگی مساپراں ھوار ھوار ایران ءَ پاکستان ءَ ھواریں شھراں ھوار کنوکیں سیمسر دو بیست ءُ پنجاہ زیارتی ھم مھتل اَنت-

اے درگت ءَ دمگدار ءَ پھزداری ءِ درور دیان ءَ سیمسر بند کرتگ ءُ چریشی ءِ سبب ءَ سیمسری واپار ءَ مشکلانی دیمپانی ءِ گیش بوگ ءِ گمان اِنت-

پاکستانی واکدار بلوچ فدائینانی لاشاں کھولانی دست ءَ دیگ ءَ انکاری اِنت-

بلوچ فدائینانی کھولانی نیمگ ءَ پاکستان ءِ واکدارانی گور ءَ روگ ءَ پد ھم واکدار آیانی دوستین مردمانی لاشاں دیگ ءَ نہ اِنت-

کھولانی رد ءَ سرکاری مردمانی گون ءَ رھوت ءُ پد ءَ گند ءُ نند ءَ پد ھم آیانی لاشاں دیگ ءَ نہ اِنت-

آیانی گوشگ اِنت واکدارانی گور ءَ لاشانی ایر کنگ ءِ ھچ جواز ءُ پائدگ نیست اِنت ءُ کانونی ڈول ءَ ھم لاش پجار بوگ ءَ پد کھولانی دست ءَ دیگ بہ بنت-

زانگ بہ بیت 25-26 اگست ءِ شپ ءَ بلوچ لبریشن آرمی ءَ آپریشن ھیروپ ءِ درچ ءَ ٹوھیں اُرشے کتگ بیتگ-

آپریشن ھیروپ ءِ ٹوھیں اُرش ءَ پاکستانی پوج ءِ بیلہ ھیڈکوارٹرز ءِ سر ءَ مجید برگیڈ ءِ ھپت فدائیناں بھر زرتگ کہ چریشی ءِ آسر ءَ کساس بیست کلاکاں داں بیلہ ھیڈ کوارٹرز مجید برگیڈ ءِ فدائینانی دست ءَ بیتگ-

یک ماھے ءِ نزیک بوگ ءَ پد ھم اُرش ءَ نمیران بیتگینانی لاشاں پاکستان ءِ واکدار دیگ ءَ نہ اِنت-

اے اُرش ءَ بھر زیروکیں زالبول فدائین ماھل بلوچ پنام ءِ زیلان کرد ءُ رضوان بلوچ پنام ءِ ھمل ءِ ناساڑی ئیں نماز جنازہ آیانی بنکی ھنکین ءَ وانگ بیتگ اَنت کہ ھردوکاں پُریں گاڑی ءَ شورو گوں بیلہ ءِ بنجل ءِ دو نیمگ ءَ ٹکر جتگ ءُ اُرش ءِ بندات کتگ بیتگ-

زانگ بہ بیت گوست ءَ ھم بلوچ جنگول ءُ دروگیں میڑاں کشگ بیتگیں مردمانی لاش کھولانی دیگ ءَ بازیں جنجالانی دیمپانی بیتگ اَنت-

ھمے سال ءِ مارچ ءَ تربت ءَ پاکستانی پوج ءِ دومی مزنیں نیول ایئربیس ءَ نشانگ کنوکیں بی ایل اے مجید برگیڈ ءِ اُرشکارانی لاش کم چہ کم پنچ روچ ءَ پوج ءِ گور ءَ بیتگ اَنت-

تربت بلوچستان ءِ گرم تریں.جاھاں یکے کہ اود ءَ مردگ جاہ ءَ آسراتی ءِ نہ بوگ ءَ لاش ھراب بوتگ اَنت-

سیاسی ءُ چاگردی پھناتانی گوشگ اِنت کہ لاشانی کمشرپی ءُ کھولاں ترسینگ گیر کانونی پارومانی دیم ءَ آرگ ءَ لاشانی دیگ نپرتاں گیش کنت اِنت-

تمپ ءِ جتا جتائیں جاھاں پوجی آپریشن دومی روچ ءَ برجاہ انت، کلبر، ناصر آباد ءِ کش ءُ گوری دمگ آپریشن ءِ زد ءَ اَنت، شوانگے دزگیر کنگ بیتگ –

بلوچستان ءِ دمگ کیچ تمپ، کلبر ءَ مروچی دومی روچ ءَ ھم پاکستانی پوج ءِ آپریشن برجاہ اِنت-

دمگی مردماں ٹی بی پی ءَ گوں گوشتگ گوستگیں روچ ءَ ھیلی کاپٹراں کمانڈوز ایرگپتگ اَنت-

آئی ءَ گوشتگ ناصر آباد ءِ ھند ءَ پیدل ءَ کارمند تر ءُ گرد ءَ کنگ ءَ اَنت – تمپ ءِ جنگل ءُ نالے ءَ پوجی کارمند ترگ ءَ گندگ بیتگ اَنت-

دمگی اھوالانی گوشگ اِنت ناصر آباد ءَ یک شوانگے پوجی کارمنداں گوستگیں دزگیر کتگ ءُ تنی وھدی آئی ءِ بارو ءَ ھچ ھال نیست اِنت-

پاکستانی واکداراں اے درگت ءَ ھچ اھوال دیم ءَ نیاؤرتگ اَنت-

زانگ بہ بیت بلوچستان ءِ جتا جتائیں جاھاں یکشل ءَ پوجی آپریشن برجاہ اَنت ءُ واکدار اے درگت ءَ ھچ وڑیں اھوال دیم ءَ آرگ ءَ نہ اِنت-

گوست ءَ پوجی آپریشناں لس آبادی نشانگ ءِ وئیل رپورٹ بوگ ءَ اَنت-