TBP Balochi

کیچ ءِ بنجاھی شھر تربت تجابان ءَ سیادی داروکیں نودربر خداداد سراج ءِ بیگواھی ءِ ھلاپ ءَ آئی ءِ کھول ءَ دوبر تجابان کرکی ءِ ھند ءَ سی پیک دگ ءِ سر ءَ زھرشانی نندانک جتگ ءُ دگ بند کتگ-

کھول ءِ گوشگ اِنت گوستگیں روچ ءَ ما ھمے واستا دگ یل داتگ ءُ زھرشانی ھلاس کتگ کہ شمئے مردم یل دیگ بیت اِنت کہ آیانی وھدانی پژدر ءَ داں مئے مردم یل نہ بیتگ کہ چریشی ءِ پژدر ءَ دوبر وتی زھرشانی برجاہ داشتگ-

کھول ءِ گوشگ اِنت خداداد سراج سرگودھا میڈیکل کالج ءِ پیتھالوجی لیب سائنسز ءِ نودربرے کہ آ ھچ مارچ ءِ شپ ءِ ساھت ھشت ءُ نیم ءَ یک اسپیت رنگیں گاڑی ءَ الرشیس ھسپتال سرگودھا ءَ ظفر اللہ چوک ءَ آوار جتگ ءُ برتگ-

نودربر خداداد ءِ کھول ءَ آئی ءِ بیگواھی ءِ ھلاپ ءَ گوستگیں پشمبے ءَ ایم ایٹ تجابان کرکی ءِ ھند ءَ بند کتگ بیتگ ات کہ پد ءَ دمگداد ءِ سدکی ءَ پد کھول ءَ زھرشانی ھلاس کتگ ات-

زھرشانی ءِ سبب ءَ ھردوکیں نیمگاں دگ بند اَنت ءُ روکیں مساپراں جنجالانی دیمپانی اِنت-

دومی نیمگ ءَ گوستگیں شپ ءَ تربت آسکانی بازار ءَ دو ورنایانی آوار جنی ءِ ھلاپ ءَ دگ بند کنگ بیتگ-

اھوالانی رد ءَ گوستگیں شپ ءَ آسکانی بازار آپسر ءَ دو ورنا زورانسری آوار جنگ ءُ برگ بیتگ اَنت-

زورانسری آوار جنی ءِ ھلاپ ءَ مروچی آیانی کھول ءَ ڈاکی بازار آپ درک ءِ ھند ءَ زھرشانی کنان ءَ دگ بند کتگ –

ھمے وڑ ءَ ھوشاپ ءَ ایم ایٹ شھدگ ءَ زالبولاں زھرشانی کنان ءَ دگ بند کتگ-

زالبولانی گوشگ اِنت گوستگیں شپ ءَ سِھری ءِ وھد ءَ پوج ءَ ھوشاپ ءِ سربازی بازار ءَ امیر بخش سربازی ءِ لوگ ءِ سر ءَ بیڑ برتگ ءُ سَے ورنایاں ابید ءِ وارنٹ ءَ دزگیر کنگ ءِ جھد ءَ بیتگ بلے زھگ ءُ زالبولاں گھگیری کنان ءَ ورنا آوار جنگ ءَ نئیشتگ اَنت-

کھول ءِ گوشگ اِنت کہ پوج ءَ مئے سر ءَ زوراکی کتگ ءُ زھگ ءُ زالبول جتگ انت ءُ ابید وارنٹ ءَ مئے لوگ ءِ دود لگمتال کتگ اَنت-

وئیل ءِ ھلاپ ءَ زھگ ءُ زالبولاں بازیں کچے ءَ ھوشاپ سربازی بازار ءِ ھند ےَ دگ بند کتگ ءُ روانی مھتل کتگ اَنت-

مروچی کیچ ءِ جتا جتائیں جاھاں کھولانی زھرشانی نندانک برجاہ اَنت ھمے وڑ تجابان ءُ آپسر آسکانی بازار ءَ ھم زھرشانی بوگ ءَ اَنت-

ھمے وڑ ءَ گوادر ءَ زاکر عبدالرزاق ءُ لالا رفیق بیگواھی ءِ ھلاپ ءَ آیانی کھولاں کوسٹل ھائی وے گوستگیں بیست ءُ چار ساھتانی گوزگ ءَ پد ھم پچ نہ کتگ-

گوادر ءِ جھمنند لالا رفیق ءُ کپر نلینٹ ءِ جھمنند زاکر عبدالرزاق ءِ کھول ءَ وتی مردمانی یل نہ کنگ ءِ ھلاپ ءَ شانزدہ مارچ ءِ سھب ءَ نلینٹ زیروپوائنٹ ءَ مکران کوسٹل ھائی وے بند کتگ –

گوستگیں بیست ءُ چار ادارانی توک ءَ اے شھدگ پچ کنگ نہ بیتگ ءُ چریشی ءِ سبب ءَ کراچی ءُ مکران ءَ روک ءُ آیوکیں گاڑیانی کتار لگ اتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں چادہ مارچ ءِ شپ ءِ نوہ ءَ کیچ ءِ بنجاھی شھر تربت بالی پٹ ءِ ٹوھیں دروازگ ءِ دپ ءَ برجاھیں پوج ءِ پانگس ءِ سر ءَ دستی بمب اُرشے کُرتگ، اُرش ءَ دو کارمند ٹپی بوتگ۔

جارکش ءَ گْوشتگ کہ سرمچاراں ھما وھد ءَ پوج نشانگ کُرتگ کہ دو کارمند پانگس ءِ تہ ءَ ساڑی بوتگ، دستی بمب اُرش ءَ پانگس ءَ تاوان بوتگ۔

میجر گْوھرام بلوچ ءَ گْوشتگ کہ بلوچستان لبریشن فرنٹ اے اُرش ءِ زمہ واری ءَ منّ ایت۔داں بلوچستان ءِ آجوئی ءَ زورگریں پوج ءِ سر ءَ اُرش برجاہ بنت۔

زورانسری آوار جنی ءِ نشانگ کنگ بوتگیں ورنایے آجو بوتگ-

بلوچستان ءِ دمگ کیچ ءِ تھسیل چہ بلیدہ ءَ پاکستانی پوج دست ءَ آوار جنگ ءَ پد بیگواہ کنگ بوتگیں لیاقت بلوچ ء بیام گوستگیں شپ ءَ یل کنگ بوتگ ءُ وتی لوگ ءَ سر بوتگ-

لیاکت بلوچ گوستگیں سال نومبر ءَ چہ بلیدہ میناز ءَ زورانسری آوار جنی ءِ نشانگ کنگ بوتگ اَت آئی ءِ یل کنگ گپ آئی ءِ نزیکیں مردمے ءَ کتگ-

زانگ بہ بیت کہ بلوچستان ءَ زورانسری آوار جنی ءِ وئیلاں نشانگ کنگ بوتگیں لھتے مردم یل کنگ بوتگ اَنت وھدے ھمود ءَ دگہ مردمانی آوار جنگ ھال سر بوتگ اَنت-

بلوچستان ءَ زورانسری آوار جنی ءِ نشانگ کنگ بوتگیں مردمانی یل کنائینگ ھاتر ءَ کارکنوکیں گل وائس فار بلوچ مسنگ پرسنز ءُ بلوچ یکجھتی کمیٹی ءِ رِد ءَ ھمکروچ زورانسری آوار جنی ءِ تہ ءَ گیشی آیگ ءَ اِنت وھدے کہ بازیں زورانسری آوار جنگ بوتگیں مردم دروگیں میڑاں کُشگ بوتگ اَنت-

پاکستانی پوج ءُ سیکورٹی ادارھانی ھلاپ ءَ مھم ءِ ھلائینگ ءِ بھتام ءَ دزگیر بیتگیں پاکستانی اھوالکار اسد طور یل کنگ بیتگ-

اسپیشل جج سینٹرل اسلام آباد ءَ اھوالکار ءُ وی لاگر اسد طور زمانت ءَ پد دزگیری ءِ مننگ ءُ یل کنگ ءِ ھکم داتگ بیتگ-

اسد طور ءِ دزبندی ءِ زمانت ءَ پد دزگیری ءِ بنگپ ءَ اسپیشل جج سینٹرل اسلام آباد ھمایوں دلاور ءَ بیتگ اسد طور ءِ وکیل ایمان مزاری ءُ بادی علی چٹھہ ءَ آمیدگس ءَ پیش بیتگ اَنت کیس ءِ پٹ ءُ پول ءِ آفسر ریکارڈ ءَ ھوار آمیدگس ءَ پیش بیتگ-

آدینگ ءِ روچ ءَ اسلام آباد ءِ ھائی کورٹ ءَ اسپیشل جج سینٹرل ءَ اسد طور ءِ دزبندی ءِ زمانت ءِ سر ءَ بنگپ ءَ پیسلہ کنگ ءِ ھکم داتگ بیتگ مروچی آمیدگس ءَ اسد طور زمانت ءَ پد دزگیری ءِ مننگ ءِ پنچ ھزار دیگ ءُ واتر زورگ ھکم داتگ بیتگ-

ھائی کورٹ ءَ ایف آئی اے ءِ واکدار ھم ریکارڈ ءِ ھواری ءَ اسپیشل جج سینٹرل ءِ آمیدگس ءَ پیش بوگ ءِ ھکم داتگ اھوالکار اسد علی طور ایف آئی اے ءَ ادارھانی ھلاپ ءَ مھم ءِ ھلائینگ ءِ سر ءَ بیست ءُ شش فروری ءَ دزگیر کتگ بیتگ-

گوریچانی وزیرستان ءِ ھند میر علی ءَ سلاہ بندیں مردمانی اُرش ءَ پاکستانی لشکر ءِ لیفٹنٹ کرنل ءُ کیپٹنے ءَ ھوار ھپت کارندہ مرتگ اَنت-

پاکستانی پوج ءِ جارکش (آئی ایس پی آر) ءِ رد ءَ گوریچانی وزیرستان ءِ ھند میر علی ءَ پوج ءِ پوسٹ ءِ سر ءَ اُرش بیتگ کہ چریشی ءَ اُرش کاراں یک گاڑی یے شوروا پر کتگ ءُ پوسٹ ءِ سر ءَ دور کتگ ءُ گاڑی ءِ ٹکر جنگ ءَ بازیں وتکش تراک بیتگ اَنت ءُ اے وتکش تراکانی آسر ءَ ماڑی ءِ یک بھرے لمب اتگ ءُ کپتگ ءُ چریشی ءِ آسر ءَ پنچ کارندہ مرتگ اَنت-

آئی ایس پی آر ءِ رد ءَ وتکش اُرشاں پد لیفٹینٹ کرنل کاشف ءِ چیردستی ءَ کلیئرنس آپریشن بندات کتگ ءُ چریشی ءِ آپریشن ءِ وھد ءَ ترندیں تیرگواری بیتگ ءَ لیفٹینٹ کرنل کاشف ءُ کیپٹن اھمد بدر مرتگ اَنت-

آئی ایس پی آر ءِ رد ءَ بیران بیتگیں سی ءُ نُھ سالی ئیں لیفٹینٹ کرنل کاشف ءِ سیادی کراچی ءَ بیتگ ءُ بیست ءُ سَے سالی ئیں کیپٹن مھمد اھمد بدر ءِ سیادی تلہ گنگ ءَ بیتگ-

آئی ایس پی آر ءِ رد ءَ دگہ بیران بیتگینانی تہ ءَ ھولدار صابر، نائیک خورشید، سپاھی ناصر، سپاھی راجہ ءُ سپاھی سجاد ھوار اَنت-

آئی ایس پی آر ءِ رد ءَ ھولدار سابر ءِ سیادی خیبر، نائیک خورشید ءِ لکی مروت،سپاھی ناصر ءِ پشاور،راجہ ءِ کوھاٹ ءُ سپاسی سجاد ءِ سیادی ایبٹ آباد ءَ اِنت-

دومی نیمگ ءَ دمگی مردمانی رد ءَ اُرش ءَ بازیں کارندہ زدگ بیتگ اَنت ءُ مروکانی گیش بوگ ءِ گمان ھست اِنت ءُ زدگ بیتگیں مردماں ھیلی کاپٹر ءِ سر ءَ سی ایم ایچ ءَ برگ ءَ انت ئے-

روکپتی بلوچستان ءَ آدینگ روچ پانزدہ مارچ ءَ ناشناسیں سلاہ بندیں مردماں پولیس ءِ یک گاڑی یے سر ءَ اُرش کتگ، چریشی ءِ آسر ءَ یک پوجی کارندھے بیران ءُ دو سک ٹپی بوتگ اَنت-

ھالانی رِد ءَ سروان ءَ ناشناسیں سلاہ بندیں مردماں پولیس ءِ گاڑی سر ءَ تیرگواری کتگ، چریشی ءِ آسر ءَ گاڑی ءَ سوار یک مردمے ءَ تیر لگگ ءَ چہ بیران وھدے کہ دگہ دو سک ٹپی بوتگ اَنت کہ آ سراوان ءِ رازی نادُراھجاہ ءَ برتگ اَنت-

ایرانی رسانکدر ءَ گورنر سراوان ءِ شنگ کتگیں درشان ءِ تہ ءَ گْوشتگ کہ آدینگ ءِ بیگاہ ءِ ساھت پنچ ءَ لھتے شکی ئیں مردمانی رندگیری کنگ ءَ پد سراوان ءَ چہ ھپت کلومیٹر دیر آس پیچ چوکی ءِ سروکانی سر ءَ تیرگواری کتگ، چریشی ءَ یک مردمے بیران ءُ دو ٹپی بوتگ اَنت-

بلے اُرش زمہ واری انگت ھچ گل ءَ نہ زرتگ-

راجانی سنت ءِ مردمی اگبالانی پتر ءِ 55 می نیاد ءِ میان ءَ بلوچ نیشنل مومنٹ( بی این ایم ) ءِ دری کارانی تک ءِ جھگیر ھکیم ءَ ماں بلوچستان ءَ پہ پاکستان ءِ چکچینی ءِ شونداتانی گر ءُ دار ءَ میان استمانی دزمانجنی ءِ لوٹ کرتگ۔

آئی ءَ گْوشتگ چہ راجانی سنت ءِ نیمگ ءَ بلوچستان ءِ آجوئی ءِ زْرمبشت ءِ زیتیں پلامرزی المی اِنت۔

گوں پتر ءَ گپ جنان ھکیم ءَ پاکستان ءِ زیردستی ءَ بلوچستان ءِ مردمانی سر ءَ بیوکیں دھکاں برجاھیں زوراکیانی نیمگ ءَ دلگوش گْور کنائینتگ۔ آئی ءَ چہ 1948 ءَ بلوچستان ءِ زور گرگ ءَ پد پاکستان ءِ تْرام اتگیں ناراھی ایر جتگ اَنت، کہ آیانی تہ ءَ سیاسی پدمنتگی، گزرانکی لگتمالی ءُ ربیدگی زوراکی ھوار اَنت۔

آئی ءَ راجانی سنت ءِ سر ءَ زور داتگ کہ آ بلوچ راج ءِ وتواجھی ءِ روائیں واھگاں بہ من ایت پرچا کہ اے اگبال راجانی سنت ءِ مسام ءَ نبشتگ۔آئی ءَ زور داتگ ءُ گْوشتگ بلوچ راج ءَ پرایمنیں رنگے ءَ پہ آجوئی ءَ جھد کرتگ ، آئی ءِ مزد ءَ آ پاکستانی مھترھند ءِ آزار ، بیھار ءُ زوراکیانی دیمپان بیتگ اَنت۔

بلوچ نیشنل ( بی این ایم ) ، بلوچ نودربر گل ۔ آزات ءِ پجیگ ءَ دگہ گلانی سر ءَ پابندی جنگ ءُ بلوچ راج ءِ سیاسی سرگرمیاں اگبال پچ گرگ بوت۔

بی این ایم ءِ جھگیر ءَ زور بیگواھی ، در آمیدگسی کوش ءُ ناراھیں دزگیری ناپتیانی ایرموش کنگ ءُ بلوچ گھگیری ءِ لپاشگ ءَ پاکستان ءِ ھم روچیگی کارپد لیک اتگ اَنت۔

آئی ءَ چہ میان استمان ءَ بلوچ ءِ وتواجھی ءِ زْرمبشت ءِ پلہ مرزی ءِ لوٹ کرتگ ءُ راجانی سنت ءِ سر ءَ زور داتگ کہ آ اے گپ ءَ المی کنائینگ ءَ زیت دزمانجنی بہ کنت داں بلوچستان ءِ مردم بے گر ءُ بند ءَ وتی باندات ءِ شور ءَ کرت بہ کن اَنت۔

گڈ سر ءَ اے آزگیں جیڑہ ءِ نیمگ ءَ دلگوش گْور کنگ ءِ سر ءَ ھکیم ءَ پتر ءِ منت گپتگ۔

ناسرجَمیں واھِشت

نبشتہ کار: نبیل رحیم

دی بلوچستان پوسٹ

“اے وھد ءِ تِیزی ءَ گون زِند ءِ سپر یک روچے الّم آسر بیت ءُ انسان وتی دومی زِند ءِ امبازاں بیت چیا کہ مَرگ یک راستی یے ءُ ھر انسان ءَ اے زانگ ءُ پھمگی اِنت کہ آ ھم ھمے پیم ءَ سپر کنت ءُ وتی زَمین ءُ ھاک ءِ امبازاں بیت ءُ نمیران بیت پہ مُدامی اے شھر ءُ میتگاں چے سپر کنت ءُ مئے میان ءَ نہ بیت بلئے انگت شھابو جان اے گپ مارا پہ تو شات نہ بیت کہ تو مارا یل کتگ ءُ اے کُچَلیں دانک مئے گوناں ایر برگ نہ بیت لھتیں انچیں بچ بنت آیانی روگ مات ءُ پت ءَ چورہ کنت لھتیں انچیں کارست بنت آیانی روگ یک چاگردے ءَ چُورہ کن انت تو چہ ھمائیاں یکے ئے کہ تئی روگ ءَ رند درستیں ندارگ مٹ بوتگ اَنت ابیتکی ءَ مانشانتگ ھرکس گوں وت ءَ مانگِیشّ اِتگ ھمے وس واس ءِ تھ ءَ اے چِتو بیت شھابو جان تئی روگ ءَ یک چاگردے پُرسیگ کُتگ آ روچ ءِ تو زمین ءِ امبازاں واپینگ بوت ئے تئی وشکوشیں ھنکین پہ ترا نالان بوتگ ءُ چشیں چمے نیست اَت کہ پہ ترا ارسیگ نہ اَت چہ دیر ءَ تئی سنگت ءُ ھمراہ تئی چارگ ءَ اتکگ اِتاں دانکہ دیر ءَ تئی سرون ءَ اُشتوک اِت انت بہ گندے تئی شھدیں دپ ءَ پُر مِھریں کندگے در کیت بلئے تو ھِچ سما نہ کُت ءُ دُرستاں گریتگیں چمّے ترا رُکست کُت شھابو جان باور کن ئے تئی ھمسروکیں دار ئے پُرشتگ زِرد منی دردیگ بوتگ ملکمیت ءَ کہ ترا چانپ اِتگ نی گُڑا من کجا زندی بہ آں۔

شھابو جان تئی شوکیں واھگ ناسرجم بوت تو مُدام گُشت کہ من پہ وتی ایردستیں راج ءَ الّم چیزے کناں من ءَ اے ھبر شات نہ بیت کہ منی راج بَزگ ءُ لاچار بہ‌ بیت من کدی وتی مات ءُ گوھاراں پہ بَزگی دیست نہ کناں ءُ اے ھبر من ءَ چہ تھ ءَ وران کنت کہ مئے مات ءُ گُوھار دَگانی سر ءَ بہ بنت ءُ بَزگ بباں ۔تئی مُدام سسا ھَمیش ات کہ من پہ وتی ایردستیں راج ءِ وشین باندات ءِ واستا یک شوکین جُھدے بہ کن آں۔

تئی مُدام گپ ءُ ھَبر ءُ دیوان گوں سنگتاں بس بلوچ ءِ جُھد ءُ بلوچ ءِ باندات ءِ سر ءَ ات انت ۔ھر ھَما سنگت کہ تئی دیوان ءَ نشتگ ءُ تئی گپ ءُ ھبرے گْوش داشتگ اَنت آ الم اے گواھی ءَ دنت شھابو ءِ دل ءَ چونیں واھگ بوتگ پہ وتی ایردستیں راج ءَ بلئے چے کن ئے زند یک بے وپائیں ھمراہ یے ءُ شھابو یے مارا چے پُل اِت ءُ آ شوکیں واھگ نا سرجم ءِ کُت بلئے اے نا سرجمیں واھگ الم یک روچے سرجم بیت۔

شھابو پہ کُلیں راج ءَ یک مھروان ءُ راھشون ئے اَت وتی کچ ءُ کساس ءَ کُجا کہ آئی ءِ دست ءَ بوتگ توار چست کُتگ جُھد کُتگ مَروچی تئی ھَما بیل ءُ ھمبل کہ مُدام تئی دیوان ءَ نندوک بُوتگ آں مَروچی دُرست ابیتک اَنت ،بَزگ اَنت ءُ مُلور اَنت بس ھَمے گَپ ءَ جِیڑگ ءَ اَنت کہ کَدی بیت تو مئے گوماں دیوان کن ئے ءُ راج ءِ ایردستی ءُ وَش ھالیں باندات ءِ سر ءَ گَپ کن ئے۔

من سرپد آں کہ تو گُوں کُلیں نَمیرانیں سنگتاں بلوچ ءُ بلوچ راج ءِ سر ءَ گپ ءَ بۓ۔ (شُمئے جاہ وش بات ءُ باگیں بَھشت ءَ بات ئے)-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نازانی پروم

شوکت اَبرار

دی بلوچستان پوسٹ

نازانی پروم بے نوُر اِنت
پَنجگُور سرجم ءَ بے شھم اِنت
انگور گوارگو ءِ گیمُرتاں
رنگاں یل کُت اَنت موُزاتی
سبزو پونوکیں چَل بُوتاں
شیرّگ بُوت اَنت چو زکوُر ءَ
جوان سُھر کھربا بے تام اَنت
کوش ءَ کولواہ یل داتہ
آپاں زُمزمیں کَلرّ بست
گیمُرتاں کھیر زوُمدان ءِ
نالاں بُوت آواران سرجم
نال ءِ زردَلوُ بے رنگ اَنت
گُلوُنٹیں انار ھُشک بُوتاں
دریا گْوادر ءِ مدھوش اِنت
دشت ءِ کوٹگ اَں تام یل دات
مند ءَ فاضُل ءِ پِریات کُت
تُمپ ءَ بانڑی ءَ زار جَت
تاک رِتک اَنت چِنال ءَ کیچ ءِ
سورآپ ھُشک بُوت گوں گّورم ءَ
بَھِشتیں زامُران بے چاڑ بُوت
مشکے گوں نلاں سر جھل کُت
گِریشگ سارتی ءَ یل داتہ
خُضدار وت سرا ھیران بُوت
رنگاناں شموشت سوُراب ءَ
مستونگ ءُ کلات ءَ گِریتہ
شال ءَ براہ وتی اندیم کُت
بیلہ جلوھاں بے ھال اِنت
گار کُت اوتھل ءَ پجّار ءِ
وِندر ھوناں گوں ھم رنگ اِنت
آھِرّ اِنت بلوچِستان سرجم
کوھاں سرجم ءَ پُرس داشتہ
ورنا شش بَروت نوکشنزیں
مستیں ملکموُت بے رحم ءَ
یکجاہ تُرکِت اَنت بے وھدا
ٹِلَگ کَشِّت اَنت ماتانی
براتاناں سِرین پُروش کُرتَنت
ارمان گار کُت اَنت پِسّانی
گار بُوتاں گُھارُک ماھیں
ارساں شوکت مئے رِد بستہ
پُرسیگ اِنت پروم بے بھتیں
موتک ءَ اِنت بلوچ ءِ ھنکین
موتک ءَ اِنت بلوچِستان سرجم

پسنی ءَ ذاکر عبدالرزاق ءُ لالا رفیق ءِ زورانسری آوار جنی ءِ بگیری ءَ کوسٹل ھائی وے ءُ سی پیک شھدگ سر ءَ نندانک برجاہ-

بلوچستان ءِ تیاب دپی شھر پسنی ءِ دمگ کپر ءِ جھمنند ذاکر ء عبدالرزاق پاکستانی پوج ءِ دست ءَ زورانسری بیگواھی ءِ بگیری ءَ کھول ءَ کارواٹ زیرو پوائنٹ زھرشانی کنان ءَ بند کتگ کہ چریشی ءَ پد اود ءَ دگہ یکے بیگواھیں لالا رفیق ءِ کھول ھم بھر بوتگ کہ آیاں سھب ءَ چہ شھدگ سر ءَ نندانک جتگ-

مکران کوسٹل ھائی وے ءُ سی پیک شھدگ بند بیگ ءِ سبب ءَ شھدگ ءِ دوئیں نیمگاں گاڑیانی لین لگ اِیتگ ءُ درزنانی گاڑی پسّ اِتگ اَنت وھدے کہ انتزامیہ گوں گپ دیوان بے سوب بیتگ-

بیگواھیں مردمانی کھولاں لوٹ کتگ کہ تاں وھدے آیانی دوستناکانی درگت ءَ آیاں ھال دیگ نہ بیت یا کہ آ یل کنگ نہ بنت گُڑا پسنی ءِ ھند سر ءَ سی پیک ءُ دگہ بُنجاھی شھدگانی سر ءَ زھرشانی کن ایں ءُ بند ءِ کن ایں-