چہ کیچ ءَ سر بیتگیں اھوالانی رد ءَ پاکستانی پوج ءَ سَے مردم دزگیر کتگ ءُ گون وت برتگ انت-
گیشیں اھوالانی رد ءَ پاکستانی پوج ءُ چیریں ادارھانی دست ءَ آوار جنگ بیتگیں مردمانی پجار زاکر علی ء مجید ءُ فقیر ء واھد بخش ءِ ناماں زانگ بیتگ انت – کھول ءِ رد ءَ اے ورنا پوج ءِ سَے گاڑیاں ھواریں کاروان ءَ تربت آسکانی بازار ءَ آوار جتگ ءُ برتگ انت –
ھمے ڈول ءَ بلیدہ ءِ دمگ میناز ءِ جھمنند جاوید علی ءِ کھول ءِ رد ءَ آ سِی ءُ یک جولائی دوھزار ءُ بیست ءُ چار ءَ بلیدہ تربت ءَ روگ ءِ وھد ءَ بیگواہ کنگ بیتگ-
بلوچستان ءِ تیابدپی شھر گوادر ءَ میرین ڈرائیو ءَ بلوچی زبان ءِ کواس ءُ زبانزانت سید ھاشمی ءِ مجُسمہ ءِ سر ءَ ناشناسیں مردماں اُرش کتگ ءُ آئی ءِ پروشگ ءِ جھد کتگ-
چہ گوادر ءِ دمگی اھوالکار جمیل قاسم ءِ رد ءَ مجسمہ ءِ سر ءَ مروچی سھب ءَ یک مردمے ءَ تپر ءَ گوں اُرش کتگ ءُ آئی ءِ یک چمے ءُ چشمک تاوان داتگ انت-
آئی ءَ گوشتگ پولیس ءِ جاڑیگی ءَ یک مردے ءَ گوں تپر ءَ سید ھاشمی ءِ اکس ءِ سر ءَ اُرش کتگ ءُ پروشگ ءِ جھد کتگ –
زانگ بہ بیت بلوچستان ءَ اے دابیں وئیل کہ گوستگیں روچ ءَ بنجاھی شھر شال ءَ یونیورسٹی ءِ دیم ءَ ھستیں بلوچ پدریچ کُشی ءِ چیدگ چیریں ادارھاں پروشتگ ءُ دور داتگ ھمے داب ءَ سید ھاشمی ءِ اکس ءِ سر ءَ ناشناساں اُرش کتگ ءُ پروشگ ءِ جھد کتگ-
کیچ ءَ ناشناسیں سلاہ بندیں مردماں پاکستانی پوج ءِ راشن دستیگ کتگ اَنت-
کیچ ءِ دمگ تمپ ءِ ھند شاہ آپ ءَ سلاہ بندیں مردماں پاکستانی پوج ءِ بُنجاھی بُنجل ءِ واستا راشن بروکیں گاڑی گوں راشن ءَ ھوار دستیگ کتگ-
پوج ءِ راشن مرگاں ھوار دگہ ورگی توژگ ھوار اَنت وھدے کہ ڈرائیور سلاہ بندیں مردماں یل داتگ-
واکدار ءَ اے درگت ءَ ھچ وڑیِں درشان شنگ نہ کتگ اے دمگاں بلوچ آجوئی لوٹوکیں سلاہ بندیں گل جاڑیگ اَنت-
تنی وھدے اے وئیل زمہ واری ھچ گل ءَ نہ زرتگ اَنت-
سُرچکیں دُروت
شھید نودی جان ءُ شھید سناہ جان
نبشتہ کار مھراب بلوچ
دی بلوچستان پوسٹ
زمین ءُ ھاک ءِ مھروانیں، تاسپیں بچاں وتی پُرمھریں ھمبازاں اَنچوش زِیر اَنت کہ بَچ وتی اِشک ءَ گنوک ءُ دیوانگ بنت ءُ اِے دیوانگ پہ وتی زمین ءُ ھاک ءَ سرمچار بنت ءُ کوہ ءُگَراں یاگی بنت کہ مارا زمین ءِ پُرمھریں امبازانی ھَک پَیلو کنگی اِنت۔
مرچی یازدَہ اگست اِنت ، بزاں بلوچستان ءِ آجوئی ءُ زمین آشکیں نودی ءُ سناہ ءِ سال روچ اِنت، داں بلوچ ھست اِنت شُما اھست ءُ اَبدمان اِت، اے زمین ءِ اَنچیں مھرے کہ گوں ھر کَسے ءَ نہ بیت بلے شُمئے داتگیں دیمونی پہ اے بزّگیں راج ءَ مُدام یات بنت۔
سنُل من ترا دیریں نہ دیست بس کدی کدی ھال بیتگ زمین جُمب ءُ آزادی ءِ جنگ باریں کَے ءَ کُجا بارت ھچ زانگ نہ بیت مرچی تئی شھیدی ءِ سال سرجم اِنت تو انگت مئے دل ءَ ئے ءُ شُمے داتگیں دیمونی ءَ من وتی پرز ءَ مُجّتی پیلو کناں۔
من ترا 2016 ءَ چہ رند نہ دیستگ بس برے برے ھالے بیتگ سال گْوزان بیتاں من ھم زمین ءِ جنگ ءَ آوار کپتاں سپر روان اَت یک روچے ما سنگتانی نیمگ ءَ شُتیں سال 2022 ءَ ھمود ءَ گُڑا ترا گوں دُچار کپتیں دل سک وش بیت کہ 6 سال ءَ رند ترا دیت من سک گل بیتاں دیوانے بیت داں دو روچ ءَ من شُمے کِر ءَ داشت ھود ءَ ما در کپتیں وتی نیمگ ءَ شُتیں ھال بیان ات۔
من یک روچی گوں ترا کال کُت من جاگہ ءِ سپرے ءِ ارادہ کُرتگ اَت تو من ءَ پسو دات سُھب ءَ کایاں تئی رند ءَ کہ پجّیگ ءَ رویں۔ شپ گْوست سُھب بیت ترا 3۔سنگت ھمراہ اَت تو اتک ئے سپر روان ات من دل ءَ بِھ اے نہ جیڑ اِت کہ تئی اے گُڈّی سپر بیت پد ءَ تو مئے میان ءَ نہ بَہ ئے بس یات بنت۔ سپر سرجم بیت تو وتی کارانی نیمگ ءَ شُت ئے من وتی 9 ساچان ءِ شپ ءَ بس یک کسانیں ھالے بیت من جُست کُت چونے ھالے؟ دمانے ءَ پد پسّہ دات تو من ءَ وشاں تو چونے تئ نیمگ ءِ سنگت چونا؟ من پسّہ دات مئے نیمگ ءَ کُل وش اَنت بس ھُدا شُمارا وش بکنت شُمئے سلامتی ءَ لوٹیں۔۔
ھال باز بیت پد ءَ من وپتاں تو ھم وپت ئے پد ءَ من دو روچ ءَ رند بیگاہ ءَ نیٹّے گپت چاراں نیوز پیداک اَنت مرچی دو ورناھانی لاش پاکستان ءِ لشکر ءَ کیچ نادراہ جاہ ءَ آورتگ دمانی ءَ پد سنگتے ءَ بستاری (اسٹیٹس) ءَ تئی ءُ کامران نودی ءِ اکس جتگ اَت من جُست کُت چون ءُ کُجا؟ سنگت ءَ پسہ دات مزنبند ءَ مرچی پاکستان ءِ لشکر ءَ بُرّ ءُ بین( آپریشن) کُتگ ءُ دیمپانی یے بیتگ لشکر ءَ سنگت وتی انگیر ءَ کُتگ اِت اَنت ءُ شھید بیتگ ات اَنت۔
بس دل ءَ ھمے آتک ھڑے! ھُدا شُمئے جاہ ءَ وش بکنات کُل شھیداں گوں ھم دیوان بات ئے۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-
ریھان
نبشتہ کار: میار دشتی
دی بلوچستان پوسٹ
یک باسما ءُ زانشت ء واھُندیں ورنایے گوں بچکند ءِ ھمراھی ءَ زند ء ھر ھمُک تماہ ءُ لوٹ ءِ تہ ءَ بس مرگ ءَ را گچین بہ کنت ، اِے دنیا ءِ ھر لزّتانی تہ ءَ پَہ وت بس مَرگے بزیریت اِے گام آئی ءِ بامردے ءَ دلیرے ءَ ءُ بلوچیت ءِ تشریھے ءَ کنت راج ءَ واھِشتے یک با ارزشیں ءُ وشّیں بانداتے ءِ رژناھی ءَ سھر ا کنت پَہ راجے ءَ آگاھی ءِ چیدگ بیت-
بنی آدمی گْوستانک ءَ آزمان ءَ بازیں استالے گِندگ ءَ کَیت انت ، ھریکّے پَہ وڑے درپش ایت ھریکّے ءَ جُتا پہ نامے ھاں ٹھینگ بیتگ ءُ ریھان ھمے استالاں چہ یک استالے پہ بلوچ ءَ نامینگ بیتگ چوناھا زندگ بیگ ءَ ھما زانت کہ آ زند ءِ مانا ءَ را بہ زانت زند ءِ شرپ ءَ بہ زانت زند ءِ لوٹ ءَ را سرپد بہ بیت پد ءَ ریھان اے سرجمیں پھنات ءَ آشنا بیتگ چُشکہ یک انقلابی لوگے ءِ تہ ءَ پیداک بیتگ ، آئی ءَ یک راجپرستی ءِ لوگے ءَ وتی چم پچ کُتگ اَنت ،آ لوگ ءَ کہ جنگ ءِدرس دیگ بیت، ءُ راجی باندات ءِ تشریھ کنگ بیتّیں گڑا آ لوگ ءَ زاھریں راجی نمائندگی ءَ پہ با سلاھیت اِنت زھگ پیداک بیت انت-
پہ یک ماتے ءَ اِے روچ سکّ ءَ گران بیتّ انت مئے ھیال ءُ گمان آ جاہ ءَ پَہ ارزانے ءَ شُت نہ بنت، بلے مات یاسمین سرجمیں واھشتاں گٹگیر کنت وتی زھگ ءَ وت سمبھینیت ءُ بیرک ءَ بڈا دنت پہ زمین ندر بیگ ءَ رھادگ کنت ماتی یاسمین اِد ءَ ھمے پدّر کنت کہ زمین ءِ رکّینگ ءِ سسّا ءُ زانت آ دگہ سرجمیں لیکھاں چے بالاتِر اِنت-
مرگ امبازگ ءَ پد زندگ بیتگیں ،نمیران بیتگیں سرانی تہ ءَ ریھان ھما سر اِنت کہ یک بلاھیں دژمنے ءَ ھمے کلوھ ءَ دنت کہ بلوچ وتی سرزمین ءَ کس ءَ تاراج کنگ ءَ نیل ایت ریھان پہ زمین ، پہ راج ءُ باندات وتا ھاک ءِ وشبوہ ءَ ھوار کنت ءُ نمیران بیتّ چوناھا جنگ ھر زمینے ءَ بہ بیت آ وتی مردمانی گچینے ءَ یک شرّیں وڑے ءَ کنت زمین اَچ وتی مردماں آژناہ اِنت ریھان زمین ءِ ھما گچین کُتگیں سراں چے یکّے، ریھان ابدمان انت –
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-
کیچ ءِ دمگ کولواہ ءَ گوستگیں شپ ءَ پاکستانی پوج ءِ تیر گواری ءُ گولہ گواری ءَ چہ پنچ سالی ئیں جنک بیران بیتگ۔
بیران بیتگیں جنک ءِ پجار ستارہ ء بشیر احمد ءِ نام ءَ بوتگ۔
کیچ ءِ دمگ کولواہ ڈنڈار ءَ گولہ گواری ءِ وئیل بوتگ۔
دمگی اِھوالکار ءِ رد ءَ گوستگیں شپ ءَ پاکستانی پوج ءَ میتگانی سر ءَ تیر گواری کتگ کہ ایشی ءَ چہ جنک بیران بوتگ۔
ھالانی رد ءَ جنک ءِ کل کنگ ءَ پد دمگ ءِ نندوکیں مردم ءُ آئی ءِ کھول ءِ زھرشانی کنان ءَ کیچ دگ بند کتگ۔
بلوچستان ءِ دمگ کیچ، مستونگ ءُ زامران ءَ پاکستانی پوج ءِ میجر ءِ گس ءُ لشکری کمپنی ءِ مشینری نشانگ کنگ بیتگ انت-
مستونگ ءِ شھر ءَ آر سی ڈی شھدگ ءَ پاکستانی پوج ءِ میجر ءِ گِس ءَ ناشناسیں مردماں دزبمبے چگل داتگ-
دمگی مردمانی رد ءَ دزبمب اُرش ءَ پد اُرشکاراں پشت مانداتگ ءُ شتگ انت ءُ لشکری بنشون ءِ نیمگ ءَ تنی وھدی دگہ تاوانانی بارو ءَ گپ نہ بیتگ اَنتٹ
گوستگیں شپ ءَ کیچ ءِ دمگ زامران لد ءَ ناشناسیں مردماں لشکری کمپنی ءِ مشینری تباہ کتگ اَنت-
اھوالانی رد ءَ زامران لد ءَ لشکری کمپنی ءِ ٹریکٹر ناشناسیں مردماں شورواں گوں نشانگ کتگ-
ھمے ڈول ءَ گوستگیں شپ ءِ ساھت دوازدہ ءُ نیم ءَ ناشناسیں مردماں کیچ ءِ دمگ ھیرونک ءَ پاکستانی پوج ءِ بنجل نشانگ کتگ-
بیتگیں اُرشانی زمہ واری تنی وھدی ھچ گل ءَ پہ وت نہ زرتگ ءُ اے دمگاں بلوچ آجوئی لوٹوکیں سلاہ بندیں گل پرکاری ءَ گندگ بنت اِنت-
آزاتی (11 ساچان 1947)
نبشتہ کار: شاھد اھمد
دی بلوچستان پوسٹ
اندری ءُ ڈَنّی :آزاتی ءِ بزانت ءَ ھر یک انسانے وتی ھساب ءَ درشان کنت کہ آ وتی زند ءِ آدینک ءَ چے وڑ چار اِت کُت کنت ھما ھساب ءَ آ وتی تب ءُ مئیل ءَ درشان اِش وَ کنت بلے آزاتی چِہ چیز ءَ گْوش اَنت؟
من یک راسبندی یے ترا گُش آں کہ ھر یک چیزے وردن ءُ وراکے بیت یا دگہ اَجبیں چیزے بیت اگاں ھما وھد ءَ کہ کارمرز اِش کنت آ چیز الم آئی ءِ تَب ءِ سر ءَ سان دَور دنت۔ زند ءِ وڑیں درد ءُ وشیانی گوازینگ ءَ پَد من تجربگ الم گپتگ، چِہ وڑ، چون ءُ پرچا! من ترا گُشاں۔
آزاتی ءِ درشان کنگ سک گران اِنت ایشی ءِ واست ءَ سک باز جُھد کنگ لوٹ اِیت، آزاتی چہ ترا چے لوٹ اِیت؟ تو آزاتی ءَ را چے وڑ ءَ زانگ لوٹ ئے؟ وت وتی جند ءَ چِہ وڑ مار اِت کُت کن ئے ؟زاناں زندگیں چاگرد ترا چِہ وڑ چار اِیت؟ تو وت وتی چاگرد ءَ آزاتی یے مار ئے؟
منی جُستانی پَسو جتا جتائیں مارشتانی تہ ءَ بندوک اَنت ھما مارشت کہ تو وت گچین کُرتگ اَنت آ ترا گم ءُ وشیانی تہ ءَ وَ تجربگانی باھوٹ کُتگ۔ گال گچین چے یے؟ بنی آدم پہ وت ھرچی پہ جْوانی ءُ شَرّی گچین کنگ ءِ بود ءُ سنچے ھم دار اِیت بلے گچین چے یے؟ جھل ءَ من گچین ءِ دو بَھر درشان کناں بلکیں تئی مجگ ءَ بہ نند اَنت:
۱- تَھی گچین :بنی آدم وتی اندر ءَ مار اِیت اے آئی ءِ تب ءَ گوں سیادی دار اِیت کہ آ چے مار اِیت، چون مار اِیت ءُ پرچا مار اِیت؟ سیاسی ءُ چاگردی جاور ترا ھر ھما چیز ءِ گچین کنگ ءَ پرما اَنت کہ تو آ چیز ءُ ساھت ءِ بارو ءَ سرپد بہ بَہ ئے اے یک ابرمی کانودے کہ ھر ھما چیز کہ پہ آئی ءَ جْوانی یے بہ بیت۔
آ الم گچین اِش کنت، گچین کنگ بنی آدم ءِ بُندری لوٹ اِنت اگاں ھما چیز کہ ترا دوست بیت ترا تئی سر ءَ پابندی جوڑ کنگ بہ بیت گڑا آ گچین پہ تو پریشانی یے کار اِیت ءُ پد ءَ تئی سوڑگ آئی ءِ گچین کنگ ءَ جار جنت، مارشت ودی کنت مونجا مونجائی ءَ زِد ءُ کینگ ءَ ودین اِیت دگہ باز انچیں سکین اَنت کہ پہ ترا سرجم بوگ ءَ نئیل اِیت۔
۲- ڈَنّی گچین :انچُوش کہ من اندری گچین درشان کُت اے گچین چہ اندری گچین ءَ سک باز ناپَھمی ءِ نیمگ ءَ دَور دنت پد ءَ ھم اے دَور ءَ سک باز گران اِنت کہ یک بے زانتیں بنی آدمے کہ ڈنی گچین ءَ کہ کنت آ آئی ءِ واھگاں ڈالچار کنت، بزاں ھما واھگ کہ آئی ءَ کنگی بوتگ اَنت ھمے ڈنّی گچین آئی ءِ اندری گچیناں ھم تباہ کنت۔
ڈنّی گچین ءِ متلب ءَ من چو اے وڑ درشان کناں کہ بنی آدم ءِ ھما اندری واھشت اَنت آئی ءَ چہ ھمے ڈَنّی گچیناں چِہ پَیلو کنگی اَنت بزاں من ءَ وھد ءِ درکار اِنت، منی گچین وھد اِنت کہ من ءَ گستا بوان اِنت پرچا؟ ھر ھما چیز کہ بازار ءَ رس اَنت ، ھر کس کارمرز اِشکنت آ آئی ءِ گچین اِنت بلے من ءَ پرچا آئی ءِ وڑ ءَ گچین کنگ ءِ ھُب ءُ واھگ چہ اندر ءَ ودی بوھان کنت؟
پرچا من ءَ گْوانکو یے ءِ زلورت اِنت کہ من کارمرز اِش کناں اے وَ منی گچین نہ بوت من ءَ زلورت اَت بلے اے گچین پمن کَے ءَ گچین ءِ سوڑگ کُرتگ؟ زاناں من ءَ اے گچین ءِ پَکّار بوتگ؟ اِنّا اے منی آزاتی ءِ جار اِنت کہ یکشل ءَ جَنگ ءَ آں من ءَ منی مات ءِ سوگند ءِ گچین اِنت کہ پمن من ءَ ھما کار کہ کنگی اِنت اے ڈنی گچین اِنت کہ من ءَ چہ اندر ءَ پاد کنت۔ من ءَ ھر ھما گپ، کار یا کرد ءِ اَمل دوست مہ بنت منی اندری آزاتی ءَ سان وَ الم دَور دنت۔ ھر ھما کار کہ من ءَ دوست اِنت، منی مِھر اِنت منی آزاتی اِنت۔ آزاتی ھر ھما کار ءِ گچین کنگ ءِ مستری بہ بیت بزاں سوڑگ منی بہ بیت گڑا آ کار ءِ زمہ واری منی سر ءَ اِنت کہ منی گچین ءَ گوں بندوک اِنت۔ وتی کار ءِ گچین کنگ ءِ زمہ واری ءَ زور اِیت گڑا آ تئی آزاتی اِنت۔
” پنت ھر ھما آزاتی کہ زمین ءَ بندوک اِنت آ تئی مِھر اِنت بلے مِھر پیسر ءَ راج ءِ بیت پد ءَ زمین کَیت پرچا کہ ابید راج ءِپجّار ءَ زمین بے مانا اِنت، اِشک تَھنا زمین ءِ مہ بیت بلکیں راج ءِ ھر ھما بزگیں مردم کہ آئی ءِ دلی واھشتانی گچین کنگ ءِ سوڑگ پَچ گپتگ اَنت آئی ءِ گوم ءَ گیشتر مِھر ءِ آزاتی ءَ درشان کنگ اِنت“۔
مولے ءِ گچین کنگ ءِ آزاتی ھما مول کہ زند ءِ براھدار کنگ ءَ کارمرز بیت۔ بازیں سنگت زمہ واری ءَ شری ءِ سر ءَ سرپد نہ بیت کہ آ زمہ ومہ واری ءَ آزاتی نہ لیک اَنت بلے زمہ واری زند ءِ مستریں گچین اِنت کہ ھما کس کہ چیزے ءَ پہ وت گچین کنگ ءِ سنچ ءَ دار اِیت آ ایشی ءِ پَیلو کنگ ءَ ساڑی اوں نہ بیت، دوست وَ دار اِیت بلے آئی ءِ ڈُبّھاں یک کِر کنت بلے زاناں چیزے ءِ گچین کنگ ءِ وھد ءَ سرپد ءُ پوہ نہ بوتگ کہ وھدیکہ آئی ءَ آ کار کہ گچین کُرتگ آ ھما کار ءِ زمہ واری ءَ نہ زور اِیت؟ آزاتی گوں زندگی ءَ بندوک اِنت ھر ھما ساھدار کہ آزات اَنت کہ زندگ اَنت آیاں زندگ بوگ ءِ آزاتی ھست، آیاں گپ کنگ ءِ آزاتی ھست، آیاں کار کنگ ءِ آزاتی ھست ءُ آیاں گچین کنگ ءِ آزاتی ھست۔
من یک آزات انسانے آں من ءَ منی زند ءِ گوازینگ ءَ آزاتی ھست، من ءَ اگاں کَسے ءِ پابندی دوست مہ بیت گڑا من ءَ اے گپ ءِ آزاتی ھست کہ من آ پابندی ءَ مہ مَنّ آں۔ آزاتی منی زند ءِ مستریں بَھر اِنت اگاں آزات مہ باں گڑا من یکشل ءَ آئی ءَ ءُ آئی کُتگیں کاراں مہ کن بکناں۔ من ءَ وتی ھیالانی درشان کنگ ءِ آزاتی ھست، من کَسی پِت ءِ میراس نہ آں کہ آ وتی دل ءِ تَب ءَ من ءَ کارمرز بکن، ءُ یکشل ءَ گلام جوڑ بکنت۔ ”آزاتی منی ھَکّ اِنت ءُ من وتی آزاتی ءَ کسّ ءَ نہ دے آں“
انچُوشکہ گچینکاریانی تہ ءَ تو وتی آزاتی ءَ چِہ وڑ کارمرز کن ئے؟ ووٹ ءِ دیگ ھم یک آزاتی ءِ گچینے، تو چِہ وڑ وتی آزاتی ءَ شگالی یا جْوان کن ئے اے تئی جند ءِ سوڑگ اِنت کہ تو پہ زَر ءُ لب ءِ زورگ ءَ وتی آزاتی ءَ بَھا کن ئے یا ءُ چوں وتی سنچ ءُ بود ءَ کارمرز کن ئے؟ آزاتی تئی گچین ءَ گوں بندوک اِنت کہ چِہ وڑ ءُ چوں وتی آزاتی ءَ پَھریز کُت کن ئے؟
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی اِنت
بلوچ راجی مچی ءِ کاروان ءَ ھواریں مردم ڈاکٹر ماہ رنگ بلوچ ءِ سروکی ءَ شمبے ءِ روچ ءَ پنجگور ءَ سر بوتگ کہ اود ءَ راجی مچی ءَ آ جوانیں وڑے ءَ وش آتک کت اَنت کہ اشانی تہ ءَ زالبولانی مزنیں کساسے ءَ بھر زرتگ-
اے درگت ءَ بلوچ راجی مُچی ءِ شھیدانی یات ءَ یک دیوانے برجم داشتگ ءُ بلوچ شھید سھرچکیں دروت ندر کتگ اَنت-
مُچی ءَ ڈاکٹر ماہ رنگ، صبغت اللہ بلوچ ءُ اے دگہ راھشوناں ترا کتگ، گُڈی ءَ راجی سوگندی دیوان برجم داشتگ۔
مچی ءَ گوں تران کنان ءَ ڈاکٹر مھرنگ بلوچ ءَ گْوشتگ کہ بلوچ راج ءَ اے شون داتگ کہ بلوچ شمئے تیراں گوں دیم پہ دیم بیت کنت بلے نہ اوشت اِیت۔ ھما مردماں کہ گْوشتگ کہ پاکستانی ریاست ءِ بگیری ءَ بلوچانی زرمبشت سوبمند نہ بیت، آیاں گوشتگ کہ سر ءُ سنگ ءِ نیام ءَ جنگ بوت نہ کنت آیاں گوشگ لوٹ آں بلوچ چُشیں ھزرانی سر ودی کنت ءُ آ سر سنگ ءَ پروش اِیت، مئے ایمان ایں اے سنگ ءَ ما ٹُکّر ٹُکّر کن ایں – لبز بلوچ راج ءِ ھوسلہ، جزبگ، دلیری ءُ بھادری ءَ درشان کنگ نہ بنت۔ گْوستگیں دو ھپتگ ءَ چہ ریاست ءَ وتی کُلیں وس ءُ واک کارمرز کُتگ ءُ گوادر ءِ سر ءَ اُرش کتگ ءُ ریڈ زون ءِ جار جتگ۔ پد ءَ ھم شما اے پیشداشتگ کہ گوادر مئے واستا یک ریاستے ءِ بستار ءَ دار اِیت ریاست ءِ واستا ریڈزون بیت کنت بلے مئے ماتیں سرڈگار ایں۔ بلوچ راج ءَ ھمک وڑیں ریاستی زُلم ءُ زوراکی برداشت کنگ ءَ ابید ھم اے گپ پدر کتگ کہ مارا چہ گوادر ءِ سر بیگ ءَ ھچ وڑیں زوروار داشت کُت نہ کنت-
آئی ءَ گوشتگ کہ مئے ڈیھ ءِ کجام ھم ھند… اے بے مٹیں دلیری ءَ دنیا ءِ دیما اے گپ پدر کتگ کہ بلوچ راج وتی ماتیں ڈیھ ءِ تھا ھر وڑیں زُلم ءُ چُکچینی ءِ ھلاس کنگ ءِ بودناکی ءَ دار اِیت۔
ڈاکٹر ماہ رنگ ءَ گوشتگ کہ شھیدانی ھون مئے رھشون اَنت، مارا ھما شھیدانی واب پیلو کنگی اِنت کہ آیاں وتی جان ءِ دیگ ءِ وھد ءَ اے سرڈگار ءُ راج ءِ درگت ءَ جیڑ اِتگ۔
آئی ءَ گوشتگ کہ شمارا اے یکجاھی برجم دارگی انت ءُ لوگ لوگ ءَ برو اِت مردماں سرپد بہ کن اِت-
ریاستی زُلم ءُ زوراکی ءَ پد ھم بلوچ ءَ اے گپ پدر کُتگ کہ آ یک سرپد ءُ مکھمیں راجے ، آئی ءَ گْوشتگ کہ پنجگور ءَ راجی مُچی ءَ گوں ھمگرنچیں مردم مرچی اے اِھد بہ کن اَنت کہ آ وتی شھیدانی دیمونی ءَ بے بیھال نہ کن اَنت۔
آئی ءَ مچی ءِ تہ ءَ ھواریں مردماں گوں تران کنان ءَ گْوشتگ کہ بلوچ راج ریاستی جوڑ کتگیں مردمانی بگیری ءَ سوشل دزکشی بہ کن اَنت ھما کہ پہ کسانیں نپے ءِ ھاتر ءَ راج ءَ تاوان دے اَنت آ چہ مارا نہ اَنت بلے آیاں مدام روایات داشتگ اَنت، بلے بدبھتی ءَ مرچیگیں زمانگ ءَ بلوچ یکے دومی ءَ تاوان بار کنگ ءَ دلگوش اَنت وھد ءُ جاورانی لوٹ کنگ ءَ اِنت کہ بلوچ راج ءَ تپاک بہ کنت ءُ وتی بد نیتی ءَ پجّار بہ کنت، ریاست مارا جتا جتائیں رنگاں بھر ءُ بانگ کنگ لوٹ اِیت آئی ءَ گْوشتگ کہ مئے جُھد پرامن اِنت کہ ایشی ءِ مول ءُ مراد بلوچ ءِ چُکچینی ءِ دارگ اِنت، آئی ءَ گْوشتگ بلوچ سرڈگار ءِ پھریزگ ءَ جنگ ءَ اِنت اے بلوچ راج ءِ ورنا ءُ پیریں مردانی زمہ واری اِنت کہ آ بلوچ ءِ کوڈ ءَ بہ دار اَنت ءُ پہ سرڈگار ءِ ھاتر ءَ یکجاھی ءُ تپاکی ءَ پیش بہ دار اَنت.
بلوچستان لبریشن فرنٹ ءَ وتی شنگ کتگیں دو جتاجتائیں درشانی تہ ءَ شمبین پنّام ءِ شیھک جان ستک شانی ندر کتگ ءُ پوج ءَ سر بیتگیں اُرش زمہ واری منّ اِتگ-
بلوچستان لبریشن فرنٹ ءَ وتی شنگ کتگیں درشان ءِ تہ ءَ گْوشتگ کہ نُھ اگست 2024 ءَ جھل جاو ءِ تدو کور ءَ گوں ھندی کشندہ ٹولی ءِ گون ءَ دیم پہ دیمی میڑے ءَ جنگ داتگ ءُ سرمچار سیکنڈ لیپٹیننٹ شمبین پنام شیھک شھید بیتگ۔
جارکش ءَ گْوشتگ کہ شھید شمبین پنام شیھک جان ء نور محمد آواران ءِ ھند جاو ءِ سوڑ ھیرو گوٹ ءِ جھمنند بیتگ۔ گل ءِ باسک بیگ ءَ پیش داں دو سال ءَ شھر ءَ نشتگ ءُ گل ءِ دوزواھی ءِ بستار ءَ کار کُرتگ، دو سال ءِ بازیں جپاکشیاں پد 15 اگست 2019 ءَ تچکی ءَ گل ءِ باسک جوڑ بیتگ۔
جارکش ءَ گْوشتگ کہ چہ وتی جُھد ءُ جپاکشیانی سْوب ءَ شیھک جان زوت یک منّ اِتگیں جاھے ءَ سر بیتگ، شھیداں بازیں جاھاں گوں بی ایل ایپ ءَ ھمگرنچ بیتگ ءُ وتی کِرد پیلو کُرتگ،جاو، آواران، کولواہ،کیلکور ءُ ھورماڑہ ءِ جنگاں دُژمن ءِ تاوان دیگ ءَ وتی کِرد پیلو کُرتگ۔
میجر گْوھرام ءَ گْوشتگ آ گوں راجی جُھد ءَ مھکمی ءُ کارانی پُشدر ءَ شھید ءِ کھول مدام پاکستانی ءِ زوراکیانی دیمپان بیتگ ءُ ھمے میار ءِ بنیادئےشھید ءِ برات زور بیگواہ کنگ بیتگ داں کہ آ چہ وتی جُھد ءَ دزکش بیتگ بلے آئی ءَ گوں مُھکمی ءَ دژمن پیشداشتگ کہ بلوچ راجی ایردستی یک نادراھی ءُ اے نادراھی ءِ بگیری ءَ بلوچ راج ءِ ھرچ مردم وتی جان ءَ ندر کنت آجوئی ءِ جُھد ءَ برجاہ دار ایت۔
جارکش ءَ گْوشتگ کہ بلوچ سرڈگار ءِ آجوئی ءَ جان ندر کُرتگیں دُرسیں شھےداں ستک شانی ندر کن ایں کہ راج ءِ جوانمردیں پسگاں وتی جان ندر کُرتگ اَنت ءُ وتی راج ءَ آجوئی ءِ راہ نشون داتگ۔
آئی ءَ گْوشتگ کہ بلوچ راج گوں یک سلیں ریاستے ءَ دیم پہ دیم اِنت کہ بلوچ راج ءَ زور ءُ زوراکی ءِ پارست ءَ چہ جُھد ءَ تُرسینگ ءِ جُھد ءَ کنگ ءَ اِنت۔ اے جاوراں ورنایانی زمہ واری اِنت کہ آ آجوئی جُھد ءِ بھر بہ بنت ءُ گوں مھمکی ءَ دیم ءَ بہ جُنز اَنت، چے ءَ کہ آجوئی راج ءِ باندات ءَ وشھال جوڑ کنت۔
جارکش ءَ گْوشتگ کہ شھید شبیمن ریاست ءِ لشکر ءُ کشندہ ٹولی ءِ گون ءَ دیم پہ دیمی میڑے ءَ شھید بیتگ، گل ءِ انٹلیجنس ٹیم ءَ کشندہ ٹولی ءِ مردمانی نشان داتگ اَنت کہ زوت آ وتی آسر ءَ سر کنگ بنت۔
جارکش ءَ گْوشتگ بلوچستان لبریشن فرنٹ شھید شبیمن پنام شیھک ءَ ستک شانی ندر کنت ءُ کول کنت کہ شھیدانی ھونانی بیر آجوئی ءِ دْروشُم ءَ گِر ایں۔
بلوچستان لبریشن فرنٹ ءَ وتی دگہ یک درشانے ءِ تہ ءَ گْوشتگ کہ مئے سرمچاراں شمبے دہ اگست ءِ بیگاہ ءِ پنچ ءَ ھاران ءِ ھند لتاڑ ءُ شیروزھی ءِ میانجی ءَ برجاھیں دژمنیں پاکستانی پوج ءِ پانگس ءِ سر ءَ گوں راکٹاں اُرش کُرتگ، اُرش ءَ لشکر ءَ جانی ءُ مالی تاوان بیتگ۔
جارکش ءَ گْوشتگ بلوچستان لبریشن فرنٹ اے اُرش ءِ زمہ واری ءَ منّ ایت ءُ چہ راج ءَ دزبندی کنت کہ آ دژمن ءِ وتگڑیں چاردہ اگست ءِ مرگشاں وت ءَ گستا بہ دار ایت، بلوچستان یک زورگِپتیں ڈیھے کہ پاکستان ءَ پہ زور گِپتگ، پمشکا دژمن ءَ اِد ءَ وتی وتگڑیں آجوئی ءِ مراگشانی برجم دارگ ءِ موکل نیست ءُ نہ کہ موکل دیگ بیت کہ دژمن ءُ آئی ءِ ھندی چریک وتی وتگڑیں آجوئی ءِ مرگشاں برجم بہ دار اَنت۔چوشیں مراگش سرمچارانی نشانگ ءَ اَنت۔
جارکش ءَ گْوشتگ کہ بلوچ سرمچار ءُ بلوچ راجی آجوئی زْرمبشت ءَ مھکم کنگ ءَ اِنت ءُ بلوچ راج ءِ کمک گون اِنت، کہ زْرمبشت ءَ مھکم کنگ ءَ اِنت ءُ ھرچ باسمائیں بلوچ زورگریں پاکستان ءِ وتگڑیں آجوئی ءِ روچ ءَ نہ منّ ایت ءُ آئی ءِ مراگشاں بھر نہ زور ایت بلے زورگریں پاکستانی پوج بلوچستان ءِ جتائیں دمگاں پہ زور مردماں چہ گِساں در کنت ءُ چاردہ اگست ءِ مراگشاں بارت آیاں پہ وتی مراگشانی سوبمند کنگ ءَ کارمرد کنت داں کہ چہ سرمچارانھ اُرشاں وت ءَ بہ پھریز ایت۔ مردمان ءَ پہ وتی دیمپان کنگ ءَ کارمرد کنگ پاکستانی پوج ءِ سرمچارانی دیم ءَ پروش ءَ پدر کنت۔
