بے تواری ءِ پروشگ
ٹی بی پی شونگال
زورانسری بیگواھیانی ھلاس کنگ ءِ ھاتر ءَ چہ دَہ روچاں سرجمیں بلوچستان ءِ جتا جتائیں کسان ءُ مزنیں شھراں بلوچ یکجھتی کمیٹی ءِ زھرشانیانی درچ “ بے تواری ءِ پروشگ: زورانسری بیگواھیانی ھلاپ ءَ اوشتگ” ءِ سرھال ءَ مھلوک زھرشانی کنگ ءَ اَنت- اے ماہ ءَ بازیں کچے ءَ بلوچستان ءُ کراچی ءَ گچینی بلوچ نودربر فرنٹیر کور ءُ پولیس ءِ کاونٹرٹیررازم ڈپارٹمنٹ ءَ زورانسری بیگواھی ءِ نشانگ کتگ اَنت-
دو ھزار ءُ بیست ءُ چار ءَ درستاں گیش مردم ھمے ماہ (اکتوبر) ءَ زورانسری بیگواھی ءِ نشانگ کنگ بیتگ اَنت، ایشانی کساس ھشتاد ءُ چار اِنت- کراچی ءِ دمگ بشیر ولیج ءَ کراچی یونیورسٹی ءِ ھشت نودربر ءُ ڈیرہ بگٹی ءُ نوشکی ءِ ھنداں سِی مردم ءَ گیش زورانسری بیگواھی ءِ نشانگ کنگ بیتگ اَنت-
بلوچستان ءَ زورانسری بیگواھی ءُ ریاستی زُلمانی ھلاپ ءَ پرکاریں سیاسی باسکاں جد ءُ جھد ءَ دزکش کنگ ءَ پاکستان ءِ سرکار ءِ ادارہ نیشنل کاؤنٹرٹیررازم اتھارٹی ءِ ناشرکاری ءِ تک ءَ سدانی کچ ءَ بلوچ سیاسی باسکانی نام فورتھ شیڈول ءَ ھوار کنگ بیتگ اَنت-
پاکستان ءِ سیکورٹی ادارھانی نیمگ ءَ زورانسری بیگواھی ءُ ریاستی زلمانی ھلاپ ءَ پرکاریں بلوچ یکجھتی کمیٹی ءِ سروک ماہ رنگ بلوچ ءُ صبغت اللہ شاہ جی ناشرکاری ءِ واچ لسٹ فورتھ شیڈول ءَ ھوار کنگ سرکار ءِ گیر سنجیدگی ءِ لیکہ اِنت-
بلوچستان ءَ پیپلز پاٹی ءِ اڑوکی سرکار ءِ پالیسیاں بلوچستان ءِ جاورانی ناگیگی ءَ مھلوک گیش چِست بوان اَنت – اڑوکی سرکار ءِ گیر سنجیدھیں گامگیج ءَ بلوچستان ءَ زوراکی ءِ ھلاپ ءَ سیاسی زرمبشتانی دارگ ناسرجمی انت ءُ “بے تواری ءِ پروشگ: زورانسری بیگواھیانی ھلاپ ءَ اوشتگ ” اے سرھال ءَ ھزاراں مھلوک ءِ زھرشانی تچک کنت اِنت آیوکیں وھداں اے زوراکی ءِ ھلاپ ءَ زرمبشت ترندی ءَ گوں برجاہ بیت اِنت-