TBP Balochi

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ بازیں ھند ءَ دمگاں وانگجاہ نہ بوگ ءِ سوب ءَ بازیں زھگے چہ وانگ ءُ زانگ ءَ زبھر اَنت –

روکپتی بلوچستان ءِ وانگی ادارھانی سروک حمید رضا رخشانی ءَ گوشتگ کہ روکپتی بلوچستان ءَ اے وھد ءَ یک لَک ءُ چِل ءُ یک ھزار زھگ چہ وانگ جاھاں زبھر اَنت کہ آ وانیگ نہ بیگ ءَ اَنت-

آئی ءَ گُشت کہ ھپت سال اِنت وانگ جاھاں اے کساس ءَ زھگ چہ وانگ جاھاں زبھر اَنت ءَ اے کساس ءَ پنچاہ درسد زھگ وانیگ نہ بیگ ءَ اَنت یا وت وانگ جاھاں روگ ءَ نہ اَنت –

اھوالکار ءِ رد ءَ سرجمیں اُستان ءَ وانگی جاور پہ نوک رُستگیں زھگاں زبھری ءِ بروبری ءَ اَنت بازیں جاھاں وانگ جاہ ءِ جند نیست ءُ ھنچیں جاھاں وانگ جاہ ھست اود ءَ اَستاد نگواھیت –

اھوالکار ءِ رد ءَ روکپتی بلوچستان ءِ کُچگی دمگاں گیشتر وانگی جاور زبھری ءَ اَنت کہ اود ءَ سرکاری واک دلگوش دیگ ءَ نہ اَنت –

دی بلوچستان پوسٹ

سر بیتگیں ھالانی رد ءَ گوستگیں روچ ءَ ایرانی آمید گس ءَ دُزاپ “زاھدان ” ءَ یک بندیگیں بلوچے پاھو داتگ –

پاھو داتگیں مردم ءِ پجار مجید ریگی ء ھدا بکش کہ نُھ جنوری ءَ پاھو دیگ بیتگ –

اھوالکار ءِ رد ءَ مجید ریگی ءَ دَہ سال بیت کہ ایران ءِ زنداناں بندیگ بیتگ ءُ ھمے زُوت ءَ آئی ءِ سر ءَ ایرانی آمید گس ءَ نشہ باپاری ءِ بھتام لڈ اِتگ ءُ آ گوستگیں روچ ءَ روکپتی بلوچستان ءِ بنجاھی شھر دُزاپ ءَ پاھو داتگ –

اھوالکار ءِ رد ءَ روکپتی بلوچستان ءَ ھمے زوتاں بازیں بلوچ پاھو دیگ بیتگ اَنت کہ آیانی تہ ءَ لھتے ءِ سر ءَ ایران ءِ بگیری ءَ برانز گپتگیں زرمبشت ءِ نام ءَ داتگ ءُ لھتے ءِ سر ءَ نشہ باپاری ءِ بھتام لَڈ اِتگ اَنت –

گوستگیں سال ءِ گڈی ماہ ءَ بہ گر داں انیگ ءَ دَہ ءَ گیش بلوچ ایرانی آمیدگس ءَ پاھو ءِ دار ءَ درتکگ ءُ پاھو داتگ اَنت –

کہ آیانی تہ ءَ شئیب ریگی، عبدلباسط، حمید میر بلوچ زئی، مھربان براھوئی ء ھداداد نھتانی، الیاس قلندرزئی، حسن دھواری ء امیت مھمود زئی دُزاپ ءَ پاھو دیگ بیتگ اَنت –

روکپتی بلوچستان ءَ انسانی ھکانی واستا کار کنوکیں مردمانی گوش اِنت کہ ایران ءِ آمید گس لس مردماں پاھو دیگ ءُ کُشگ ءَ اِنت کہ اشانی تہ ءَ نیزگاریں مردم ھم ھوار اَنت کہ آ پہ چُنڈے نگن ءَ مھتاج اَنت –

آئی ءِ گوشگ اِنت کہ تنی وھدی بازیں بلوچے روکپتی بلوچستان ءَ گار ءُ بیگواہ کنگ بیتگ اَنت ءُ آیانی ھچ ھال نیست بلے انسانی ھک اے نیمگ ءَ دلگوش دیگ ءَ نہ اَنت –

ٹی بی پی اھوال

سَے جنوری دو ھزار ءُ بیست ءُ یک ءَ بلوچستان ءِ دمگ مچھ ءَ “کوئلہ فیلڈ “ ءَ سلاہ بندیں مردمانی اُرش ءَ یازدہ کاریزکار بیران ءُ دَہ ءَ گیش زدگ بیگ ءِ ھال شنگ اِتگ اَت۔ کُشگ بیتگیں مردمانی سیادی گوں ھزارہ برادری ءَ اَت ۔ پولیس ءَ وتی اولی درشان ءِ تہ ءَ گوشتگ اَت کہ سلاہ بندیں مردماں مچھ ءَ “کوئلہ فیلڈ ” ءَ کار کنوکیں کاریزکار آوار جتگ ءُ نزیکیں کوھاں برتگ اَنت ءُ آ تیرگواری کُتگ ءُ کُشتگ اَنت۔ پولیس ءِ درشان ءِ رد ءَ تیرگواری ءِ آسر ءَ دَہ مردم زدگ ھم بیتگ اَت۔

اے ھال کسانیں وھدے تہ ءَ سرجمیں جھان ءَ سربیت ءُ ھزارہ راج ءَ گوں سیادی داروکیں مردماں وتی کُشگ بیتگیں جونانی پجیگ ءَ زھرشانی بندات کُت، دومی نیمگ ءَ سرجمیں بلوچستان ءَ ھوار پاکستان ءُ جھان ءِ جتائیں جاھاں ھزارہ راج ءِ کوش ایر جنگ بیت ءُ لوٹ کنگ بیت کہ اے کاریزکارانی کوشکار الم دزگیر کنگ ءُ سزا دیگ بہ بنت، بلوچ آجوئی لوٹوکیں رھشوناں پاکستانی اُستانانی آئی ءِ پوج ءُ چیریں گلاں بھتام جنان ءَ گُشت کہ بولان ءَ گوستگیں یک ھپتگے ءَ چہ آپریشن بندات اِنت پد ءَ ھم ھزارہ کاریزکارانی پجار کنگ ءُ نشانگ کنگ چون ارزانی ءَ ممکن بیت کنت ؟

ھزارہ رھشون طاھر خان ھزارہ ءَ ھم سرکاری واکداراں گوں گپ تران کنان ءَ گُشت کہ مازانیں مئے کوشکار کے اِنت شما ھم زان اِت بلے شما ھچ کُت نہ کن اِت مئے گور ءَ پوج ءِ سروک اتکگ ما گوں آئی ءَ گپ جتگ ءُ گوشتگ کہ مئے کشوک شما اِت، مارا بلوچ جنگ ءَ نہ اَنت مئے جنوک پوج ءِ داشتگیں نیکراھی ناشرکار اَنت۔

چوناھا اے اولی رند نہ اَت کہ بلوچستان ءَ ھزارہ برادری ءِ مردم پجار کنگ ءَ پد نشانگ کنگ بیتگ اَنت چد ءُ پیسر ھم ھمے پیمیں وئیلانی آماچی ھزارہ راجے بھت ءَ کپتگ، بلے چد ءُ پیسر ھزارہ راج ءَ گوں وتی زھرشانیاں اسلام آباد ءُ جی ایچ کیو ءَ نشتگیں تاکتوریں ءُ نام لاچار کُتگ ءُ وتی زھرشانیاں آیگ ءَ پرماتگ اَنت، بلے اے رند ءَ ھزارہ راجے دیمپانی گوں یک انچیں سروکی ءَ بیتگ کہ آئی مول ءُ مراد چَٹ دگر اَنت۔

یک نیمگے ھزارہ برادری گوں وتی دوستیگیں مردمانی جونانی پجیگ ءَ ھون بدینوکیں سارتی ءَ زھرشانی کنگ ءَ اَت دومی نیمگ ءَ پاکستان ءِ سروزیر یوٹیوب ءِ سرءَ پی ٹی آئی ءُ عمران خان ءِ ستاہ ءُ توسیپ کنوکیں یوٹیوبرز ءُ ترکش ڈرامہ ارتغل ءِ سوجکار ءُ ایندگہ ھواریں ازمکار ءُ پاکستانی ازمکاراں نیاد کنگ ءَ بیتگ اَنت۔

دومی نیمگ ءَ ھزارہ برادری ءِ بلوچستان کابینہ ءُ بنجاھی کابینہ ءِ وزیراں گوں بازیں نیاد بے سوب بیتگ اِت اَنت ءُ شش رمس ءَ یک ھشت ٹِکی لوٹانی لڑے چہ ھزارہ راج ءِ نیمگ ءَ دیم ءَ آرگ بیتگ اَت آ لوٹ چُش اے وڑ اَت اَنت۔

داں شش رمس ءَ زھرشانی نندانک ءَ نشتگیں مردمانی ءُ سرکار ءِ میان ءَ گپ ءُ تران بے سوب بیتگ اَنت ءُ نندانک ءَ نشتگیں مردماں ھشت شرت ایر کرتگ –

اولی کوشکار گِرگ بہ بنت ءُ آیانی ھنڈال بلوچستان ءَ کشگ بہ بنت –

دومی لوٹ مچھ، زیارت، تفتان ءُ کراچی ءِ دراھیں راہ ءُ دگاں پھریزکاری ءُ پھزداری سر ءُ مانسرانی سر ءَ –

سیمی لوٹ: شھیدانی کھول سرجم ءَ کمک کنگ بہ بنت –

چارومی لوٹ: اُستان ءِ پتر ءِ وزرا دزکش بہ بنت –

پنچمی لوٹ: آمیدگسی پَٹ ءُ پولی کمیٹی ءِ جوڑ کنگ بہ بیت ءُ پوج ءُ ادارہ آئی ءِ چاروکی ءَ بہ کن اَنت ءُ سستیانی سر ءَ گامگیج بہ زور اَنت –

ششمی لوٹ: مچھ ءَ ھواریں پھزدار کشگ بہ بنت ءُ آیانی پَٹ ءُ پولی ءَ بہ کنت –

ھپتمی لوٹ: وانگ جاہ، بازار، باپاری بنجلاں ھوار شیعہ ٹک ءَ پھریزی ءُ ایمنی دیگ بہ بیت –

ھشتمی لوٹ: بیگواھیں مردمانی یلہ کنگ ءُ اگاں آ جرمکار آمید گس ءَ پیش کنگ بہ بنت –

اے کوشانی ھلاپ ءَ بلوچستان ءَ ھوار کراچی ءَ ھم مزنیں زھرشانیانی درچ برجاہ دارگ بیتگ اَنت ءُ ھزارہ کاریزکارانی کوش کارانی دزگیر کنگ ءُ زھرشانی کنوکیں کھولانی لوٹانی پیلو کنگ ءِ لوٹ کنگ بیتگ اَت۔

ھپت جنوری ءَ مچھ ءِ وئیل ءِ ھلاپ ءَ بلوچستان ءِ بنجاھی شھر شال ءَ دربندیں ھرتال ءَ ھوار کھول ءُ ھزارہ برادری ءِ نیمگ ءَ پنچمی روچ ءَ جونانی ھمراھی ءَ نندانکی زھرشانی برجاہ اَت –

ھرتال ءِ جارھمسنتیں تاجران بلوچستان ءِ نیمگ ءَ جنگ بیتگ اَت آئی ءِ سوب بنجاھی شھر شال ءِ بازار ءُ روگ آیگ نہ بیگ ءِ ھساب ءَ اَت۔

ھپت رمس ءَ داں سر بیتگیں ھالانی رد ءَ پاکستان ءِ تھ ئِے کارانی وزیر شیخ رشید ءَ دگہ وزیرانی دوچاری ءُ گپ ءُ ترانی ءِ بے سوبی ءَ پد سروزیر بلوچستان جام کمال ءِ گپ ءُ تران بے سوب بیتگ – زھرشانی کنوکاں سروزیر پاکستان عمران ھان ءِ آیگ ءَ داں جونانی کَل ءُ کسارات نہ منّ اِتگ اَت –

دومی نیمگ ءَ پاکستان ءِ اپوزیشن ءَ نشتگیں دو مستریں گل پی پی پی ءُ مسلم لیگ نواز ءِ رھشون بلاول بھٹو زرداری ءُ مریم نواز ءَ زھرشانی ءَ نشتگیں مردمانی گورا وت ءَ سرکُتگ ءُ یکجاھی درشان اِتگ۔

ھمے پیماں بلوچستان ءِ تہ ءَ نودربر سیاست ءِ رھشونی کنوکیں ڈاکٹر ماھرنگ بلوچ ءَ ھم زھرشانی کنوکاں گوں پدردی درشان اِتگ ءُ زھرشانی نندانک ءَ ھوار بیتگ ءُ اے کوش اِیر جتگ اَنت۔دومی نیمگ ءَ بلوچ یکجھتی کمیٹی ءَ بازیں شھراں زھرشانی کُتگ ءُ ھزارہ براردی ءَ یکجاھی ءِ درشان اِتگ۔

ھشت جنوری دوھزار ءُ بیست ءُ یک ءَ پاکستان ءِ سر وزیر ءَ وتی درشان ءِ تہ ءَ ھزارہ راجے لوٹ نہ آ بائد اِنت شال ءَ بئیت نا تھنا مکن کُتگ بلکیں زھرشانی کنوکیں کھولان گُشتگ ات ئِے کہ شما من ءَ بلیک میل کُت نہ کن ئے۔ جھان ءَ کجا ھم یک سروزیر ءِ چُش بلیک میل کنگ نہ بیت۔ شما دانکہ جون ءَ کل ءُ کسارت نہ کن اِت من شمئے گندگ ءَ سر نہ باں۔

دومی نیمگ ءَ چاگردی رسانکدر ءِ تندجاہ ٹوئیٹر ءَ عمران خان ءِ درشان جتائیں پِڑاں گوں سیادی داروکیں مردماں ایر جتگ ءُ عمران خان گوں یزید ءَ ھوار لیکیتگ، پاکستانی اھوالکار غریدہ فاروقی ءَ نبشتہ کُتگ اَت “من گُشگ نہ لوٹ اِتگ بلے اسلام آباد ءَ ترندیں ھال ھست کہ سروزیر ءَ لھتیں روچاں چہ سوج دیگ بیتگ کہ ھرجاہ کہ جون ایر بیت اود ءَ رؤگ ءَ پھریز بہ کن اِت پرچا کہ مزنیں وبال ءِ اتک کنت اے پہ سرکار ءَ شُمی اِنت۔ ھمے پیم ءَ مروچی سرکار ءِ وڑ ءُ پیم اِنت نی گمان بیت اے گپانی رہ ءَ راستی اَست۔

چہ عمران خان ءِ ترندیں درشان ءَ پد ھزارہ ورنایاں شُدکشیں ھڑتال ءَ نندگ ءِ جار جتگ ءُ چہ پاکستان ءِ سروزیر ءَ لوٹ کُتگ کہ آ ھزارہ راج ءَ چہ پھلی بہ لوٹ ایت ءُ وتی گشتگیں گپاں پد ءَ بہ زیر اِت۔ ھمے رد ءَ یک کمپین ءِ #PMShouldApologise ءِ ھیش ٹیگ ءَ جنزینگ بیتگ۔

دومی نیمگ ءَ دوشی شپ ءَ سر بیتگیں ھالانی رد ءَ ھزارہ برادرہ ءِ دگہ لوٹ منگ بیتگ اَنت ءُ آھانی گوں سرکار ءَ نیاد سوبمند بیتگ ءُ آیاں جار جتگ کہ جون مروچی کل ءُ کسارت بنت۔ ھمے ھالانی پجیگ ءَ مروچی عمران خان ءِ بلوچستان ءَ سربیگ ءِ ھال ھم دیم ءَ اتکگ ءُ بازیں مردماں عمران خان ءِ سر ءَ ایراد گپتگ ءُ گُشتگ عمران خان ءَ باج بُرت چہ یازدہ کُشگ بیتگیں جوناں۔

دومی نیمگ ءَ دی بلوچستان پوسٹ ءَ سربیتگیں ھالانی رد ءَ بولان ءَ پوجی آپریشن کہ بیست ءُ ھپت دسمبر ءَ چہ بندات بیتگ اَت داں انگت ءَ ھم برجاہ اِنت ءُ آپریشن ءِ تہ ءَ ترندی ھم آرگ بیتگ۔

تامر مروچی بلوچستان ءَ مگرب ءِ وھد ءَ ریڈیو زرگوات ءِ یوٹیوب چینل ءَ شنگ بیتگ ءُ اے داں وھد ءَ یک ھزار ءِ کچ ءَ مردماں چار اِتگ۔

دی بلوچستان پوسٹ

بلوچی زبان ءِ نامی ئیں ازمکار شاہ ابن شین ءَ چاگردی ترامجاہ پیس بک ءَ شنگ کرتگیں جارے ءَ گُشتگ کہ تامر ءِ شنگ کنگ ءَ ازمکاراں مارا اوشت آماچ کرتگ –

شاہ ابن شین ءَ شنگ کرتگیں درشان ءِ تہ ءَ گْوشتگ کہ تامر دُژمان ما ھما واھگ ءَ جوڑ کرتگ کہ آ تامر شنگجاھاں شنگ کنگ ءُ چارگ بہ بیت بلے چریشی ءَ ازمکارانی گپ ءُ تراناں مئے لُکیں تامر اوشت ءِ آماچ کنگ بیتگ –

آئی ء) وتی ءِ پیس بک ترامجاہ ءَ نام پدر نہ کرتگ ءُ گُشتگ کہ گوادر ءِ لھتے نامی ئیں ازمکاراں تامر ءِ زالبولیں ازمکار زانگشود کرتگ کہ اے تامر ءَ ھچ وڑ ءَ شنگ بیگ ءَ میل اَنت –

شاہ ابن شین ءَ گُشتگ کہ ھمے میان ءَ بازیں سروکانی رھوت ءُ بیھاری کلوہ سر بیتگ اَنت کہ اے تامر ءَ تو ھچ رنگ ءَ شنگ کُت نہ کن ئے –

آیاں گُشت کہ اے تامر مروچی مگرب ءِ وھد ءَ ریڈیو زرگوات ءَ شنگ کنگ بیت اِنت –

زانگ بہ بیت شاہ ابن شین ءَ ٹی بی پی ءِ اھوالکار ءَ گوستگیں ھال ءِ تہ ءَ گوشتگ اَت کہ اے تامر ءَ ھما مردم کار گرگ بیتگ اَنت کہ چِد ءُ پیسر اے مردماں تامرکاری نہ کرتگ –

نمدی یے بانُک تئی نام ءَ

نبشتہ کار: نودان بلوچ

دی بلوچستان پوسٹ

دروت ءُ پُرمڑاہ ایں سلام

اُمیت انت وش ءُ سلامت ئے گوں یاگی ایں سنگتاں، بانُک تو گپّے زان ئے من ءَ تئی دْرستیں سفر دوست بنت ھمے سفراں گشاں کہ تو ھمے سفرانی تہ ءَ سفر کتگ بلے تئی گڈی سفر من ءَ ھچ دوست نہ بیت، پہ تو بہ گندئے تئی گڈی سفر چہ درستیں سفراں گیش زیبدار بہ بیت، بلے پمّن ناں۔

بلے اے گڈی سفر تو چہ ھما روچ ءَ بنا کتگ اَت کہ تو زانتگ اَت بلوچستان ءُ بلوچ ھردو تھاری ءَ زند گوازینگ ءَ اَنت۔ ہمے تھاری ءِ تہ ءَ تر ءَ چراگے دست ءَ اَت کہ بلان اَت، ملک پہ ملک شھر پہ شھر میتگ پہ میتگ دمک پہ دمک تو روان اِت ئے۔ من نوں زاناں تو ھمے جیڑگ ءَ بئے کہ تئی گڈی سفر من ءَ چی ءَ دوست نہ بیت، من ءَ ھمے واستا دوست نہ بیت کہ چہ تو پد من نہ زاناں چے بہ کناں، من ھیراناں، من وتئی راہ شمشتگ، وانگ یلہ داتگ، تو انگت پشت کپتگ ئے بانُک۔

پہل کن کہ تئی سر ءَ چیزے نبیسّگ منی وڑیں نابود ءُ ناچیزئے ءِ بستار ءَ چہ در اِنت بلئے من چے کناں کہ تو وت من ءَ پرمایگ ءَ ئے ۔ بانُک تو راست گشتگ اَت کہ ما موکہ پرست ایں، بلئے من ترا دگے چیزے گشگ لوٹاں تو کہ شُت ئے،لگوریں دژمن ءَ مارا موکہ پرستی ءَ ھم نئشت دانکہ تئی میتگے مردمے ھم نئیشت اَنت ءُ پد ءَ نوں بزگیں ھزارہ اش کُشت اَنت کہ موکہ پرست دگہ نیمگے دلگوش بہ بنت انچو مئے دژمن ءُ انچو ما بانُک پھل کن مارا، ما تئی وڑیں سرمچار نہ اِنت کہ تئی کوپگانی بار ءَ زُرت بہ کنیں، ءُ دژمن ءَ چم سُہرے پیش بدار ایں بلے کام ناکام چیزے وَ کنگ ءَ ایں۔

بانُک تو گپے زان ئے تو چہ بلوچ ءَ گیش بلوچستان ءِ رنگ اِت ئے تئی چم چو تیاب ءِ رنگ ءَ اِت اَنت، ءُ دائم پہ بلوچ ءَ چول جنگ ءَ اِت اَنت ءُ تئی کندگ چو دشت ءِ شانتلانی توار ءَ وش الھان اِت اَنت۔

بانُک ترا چیزے ھال دیگ لوٹاں، پتو سرجمیں بلوچستان پاد اتکگ ، شال ءَ بِگر داں جیونی، جیونی ءَ بِگر داں کراچی، ءُ بلوچستان ءِ کوہ ءُ کھچراں پتو موتک آرتگ، بانُک باتیل پتو پُرسیگ اِنت ، چلتن دائم تئی نام ءَ گپت، ساھجی گوں تیراں پتو نازینک جنت، سُرمگیں بولان ناز کنت تئی سر ءَ ءُ گوں وتی چُکاں کسّہ کار ایت۔

بانُک اے ساھت ءَ من تھنائی ءَ نشتگاں ءُ گوں تو گپ ءَ آں، دیگر ءِ وھد اِنت مُرگاں آزمان جلواہناک کتگ ءُ روچ دمانے بیت کہ زِر ءَ وتئی باتن ءَ جاگہ داتگ ءُ ملک نوں سارت اِنت منی دست ھم لرزگ ءَ اَنت من اے نِمدی ءَ گوں گوات ءَ گون کنگ ءَ آں دانکہ بلوچستان ءَ سر بہ بیت بلوچستان ءَ کہ سر بیت ترا لازُم سر بیت۔ بانُک دائم بلوچستان ءَ بات ئے، پرچا کہ ترا بلوچستان چہ بہشت ءَ گیش دوست بوتگ وشیں گڑا، بکول شہید سنگت ثناء ءِ، ”ھوارُن ھوارُن آزادی اسکان نن ھوارُن”
سنگتاں منی سلاماں سر کن۔

تئ ھم وتن: نودان بلوچ

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: رَد نبیسّگ ءِ نُشکان

ندکار: ابدلّتیپ ءُ مھمد امران بلوچ

دی بلوچستان پوسٹ

ما تچک بہ زان ایں کہ زِندگیں راجانی زبان ھما وھد ءَ دیمروی کن اَنت وھدے کہ آیانی راجی زُبان ماں وانگجاھاں وانینگ بیگ ءَ انت پد ءَ ماں یک وتواجھیں استانے ءِ رِد ءُ رھبندانی آسر ءَ ھما زُباناں سرکاری درجگ دیگ بیت گُڑا توری ھالتاک، روتاک، ماھتاک ءُ میتگانی دُکان، نادْرھجاہ ءُ پولیس ایسٹیشن بزاں توری ھر وڑیں جاھے بہ بیت اود ءِ آیانی زُبان نبشتہ بیت۔ چہ ایشی ءِ ابید تامُر، کارٹون ءُ گِندگُش وڑیں دگہ بازیں آسراتی ھم پہ زُبان ءِ دیمروی ءَ بلاھیں کُمک اَنت۔ بلے بہ گِند ئے بلوچ یک گلام ءُ زیردستیں راجے پمیشکا مئے بلوچ راج ءِ راجی زُبان براھوی ءُ بلوچی مارا ماں وانگجاھاں وانینگ نہ بنت چریشی ءَ مئے راج ءِ پدریچ یکشل ءَ چہ وتی راجی زُبانانی وانگ ءُ زانگ ءِ لِزت ءَ زبھر انت چمیشکا مرچاں ما ھر وانِندگیں بلوچے بہ گند ایں کہ ماں وتی بلوچی گُپتاری ءَ درآمدیگیں زبانانی گالاں گیشتر کارمرز کنت۔ سَک بژن انت کہ بلوچی تامُرانی ازمکار ھم راجی زُبان ءِ زگریں گالاں ڈالچار کن اَنت ءُ بلوچی ٹَوکانی لاپ ءَ ھندی ءِ گالاں ماں تامُراں توار کش کن اَنت۔

چوناھیگا منی نبشتانک ءِ بُنگپّ وَ رَد نبیسّگ ءُ آئی ءِ نُشکان ءُ تاوانانی سر ءَ اِنت پمیشکا نی من بُنگپ ءِ سر ءِ کایان ءُ وتی وس ءُ واک ءِ ھساب ءَ راج ءَ سرپدی دیگ ءُ جُھد کن آں کہ بلوچ سرجمیں دگنیا ءِ اولی راج اِنت کہ زورگریں زوراک ءِ ءُ دگہ درآمدیگیں زبانی دربرگ ءَ پنج یا شش سال زیان کنت بلے وتی جِند ءِ زبانانی نبشتہ دربرگ ءَ یک ماھے نہ دنت بزاں بلوچ راج پہ پارسی، ھندی، سندی ءُ سرائیکی ءِ نبشتہ دربرگ ءَ ھمے زبانانی کتاباں بھا زُور ایت ءُ آیانی درونتاں تا شش سال ءَ وان ایت بلے راج ءِ ورنائیں نودربر وتی جِند ءِ راجی زبان ءِ نبشتہ دربرگ ءَ بے درونتانی وانگ ءَ دربرگ ءِ سرجت جن اَنت ءُ بے درونتانی وانگ ءَ بلوچی نبیسّگ ءَ بُنگیج کن اَنت چمیشکا راجی زبان رد نبشتہ بوگ ءَ انت ءُ رَد نبیسّگ ءَ راجی زبان ءَ بے کساس تاوان ھم رسگ ءَ انت۔ ما تچک بہ زان ایں کہ دانکہ ما راجی زبان ءِ درونتاں مہ وان ایں ما ھجبر راست نبشتہ کت نہ کن آں بلکیں ما یکشل ءَ رد نبیسّ ایں ءُ مئے رَد نبشتگیں پوسٹ، نبشتانک ءُ آزمانک مئے وانوکاں ھم رد دے اَنت چریشی ءَ مئے منّوگِریں وانوک ھم بلوچی رد نبیسّگ ءَ ھیل گِر اَنت ءُ ایشی ءِ آسر ءَ راجی زبان بلاھیں اڑ ءُ اڑانداں دُچارکپ ایت۔
البت بلوچی مئے وتی جِند ءِ ماتی ءُ راجی زبان اِنت پمیشکا ما ابرمی وتی راجی زبان ءَ ٹوک ءُ توار کت کن ایں ءُ بلوچی وانگ ءَ ھم سرپد بہ ایں بس ما اشتاپ مہ کن ایں بلکیں ما پیسر بلوچی زبان ءِ درونتاں ھورتیں چمشانکے بہ دے این ءُ پد ءَ پہ بلوچی لبزانک ءِ زانگ ءَ بلوچی نبشتانک ءُ آزمانکاں وان ایں۔ بزاں باید اِنت مارا پہ راجی زبان ءِ راست نبیسّگ ءَ بلوچی ءِ دھیں درونت وانگی اَنت کہ مارا پہ راست نبیسّگ ءَ آسانی بہ بیت۔
چہ ایشی ءَ ابید مئے ھرکس ءِ راجی زمہ واری انت کہ ما وتی کِر ءُ کش ءِ بلوچ راج ورناھاں راجی زبان ءِ وانگ ءُ نبشتہ کنگ ءِ سکین بہ دے ایں ءُ آیاں ھمے دزبندی بہ کن ایں کہ وتی چاگِردی رسانکدر بلوچی ءَ گپ ءُ رپ بہ کن ایں۔ راج ءَ ماں وتی گْوانکواں بلوچی آبینکدار(کیبورڈ) ءُ بلوچی بزانبلد(ڈکشنری) ایرگیج کنگ ءِ سرپدی ھم بہ دے ایں کہ مرچیگیں دامگ ءِ زمانگ ءَ بلوچی لبزانک ءِ ٹوھیں آسراتی ھمیش اَنت۔ ھر کسے کہ بلوچی وانینگ ءَ زبر انت باید انت آ بلوچی وٹس ایپی گلاں ٹھین ایت ءُ وتی سْیاد ءُ وارساں ماں وٹس ایپی گل ءَ راجی زباناں بہ وانین ایت۔ دومی ما مُدام بلوچی جْوانیں نبشتانک، درونت ءُ آزمانکاں وٹس ایپی وانگجاہ ءُ پیسبُکی گلاں شِنگ کنائین ایں کہ بلوچی زبان ءِ لبزانک البار بہ بیت ءُ ھر بلوچ ءَ سرپدی بہ بیت کہ بلوچی زبان ھم یک نبشتہ رھبند ءُ لبزانک ءِ واھندے انت ءُ ماں وٹس ایپ ءُ پیسبُک ءِ بلوچی لبزانکی گلاں وتی سْیاد ءُ سنگتاں ھم ھوار کن ایں کہ بلوچی وانگ ءُ نبشتہ البار بہ بیت۔
بلوچ شالا وتی ڈیھ ءِ وتواجہ بہ بات اَنت، راج ماں وانگجاھاں وتی راجی زباناں وانات اَنت ءُ بلوچی دیمروی کنات۔ شالا انچوش بات۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت

پھزداری ءِ واستا سرکار پراموش نہ اِنت، مچھ ءِ وئیل ءَ پد چیریں واکانی نیمگ ءَ لشکر کشی ءِ چِن ءُ لانچ بیگ اِنت- وزیر داخلہ میر ضیاء لانگو

دی بلوچستان پوسٹ

بلوچستان ءِ بنجاھی شھر شال ءَ بازیں گاڑیانی ھواریں پوجی کاروان بولان ءِ نیمگ ءَ پیش گامی کنگ ءَ اَنت – بولان ءُ کش ءُ گوری دمگاں ٹوھیں لشکر کشی ءِ گمان کنگ بیگ ءَ اِنت –

دمگی مردمانی رد ءَ سِی ءِ کَچ ھَ پوجی ٹرک ءُ سدانی کچ ءَ پاکستانی پوج ءِ کارندہ بولان ءِ نیمگ ءَ روگ ءَ گندگ بیتگ اَنت –

دمگی مردمانی رد ءَ دمگ ءَ ٹوھیں کچے ءَ لشکر کشیانی گمان کنگ بیگ ءَ اِنت – زانگ بہ بیت گوستگیں سال ءِ گڈی ماہ ءَ بولان ءُ ھرنائی ءِ کش ءُ گوری دمگاں ٹوھیں رنگے ءَ لشکر کشی کنگ بیتگ اَنت کہ داں ھپت روچاں برجاہ بیتگ اَنت، لشکر کشی ءَ بمبگواریں بالگرد ءُ چیریں بالیگاں بھر زرتگ –

لشکر کشی ءِ وھد ءَ پانزدہ ءِ کچ ءَ مردم شاھرگ ءَ دزگیر کنگ ءُ ناشناسیں جاھاں برگ بیتگ اَنت ءُ جنگل ءُ لوگانی سوچگ ءِ ھال ھم سر بیتگ اَنت –

جنگ زدگیں دمگ ِ جتا جتائیں جاھاں پوجی چیک پوسٹ ھم جوڑ کنگ بیتگ اَنت –

دومی نیمگ ءَ بلوچستان ءِ وزیر داخلہ میر ضاء لانگو ءَ رسانکدراں گپ کنان ءَ گوشتگ کہ سرکار پھزداری ءِ واستا بے دلگوش نہ اِنت ءُ مچھ ءِ وئیل ءِ پژدر ءَ چیریں ترامگیج لشکر کشی ءِ چِن ءُ لانچ کنگ ءَ اَنت –

اے گپانی درشانی میر ضاء لانگو ءَ ھزارہ ٹاؤن ءَ امام بارگاہ ولی عصر ءَ رسانکدراں گوں تران کنان ءَ گوشتگ کہ ناوشیں وئیل ءَ بیران بیتگیں کاریزکارانی کھولانی گپ منّگ بیتگ اَنت – آئی ءَ گوشت کہ آیانی ھونانی دیگ، دمگ ءَ پھزداری، پجار کاڈ ءُ پاسپورٹ ھوار دگہ ھوار بیتگ اَنت کہ اولی روچ ءَ منّگ بیتگ اَنت بلے وئیل ءَ پد اے مزنیں نندانک بیتگ کہ درسان گر ءُ دار کنگ ءَ مشکل بیتگ –

زانگ بہ بیت کھولاں ھشت شرت سرکار ءِ دیم ءَ ایر کرتگ کہ آیانی تہ ءَ گار ءُ بیگواھیں ھزارہ بردری ءِ مردمانی یلہ کنگ ءِ لوٹ ھم ھوار بیتگ اَنت –

دی بلوچستان پوسٹ

سر بیتگیں ھالانی رد ءَ پاکستان ءِ سروزیر عمران شال ءَ سر بیتگ ءُ مچھ ءِ وئیل ءَ کُشگ بیتگیں مردمانی کھولاں پدردی ءِ واستا دوچار کپ ایت –

پاکستان ءِ سروزیر عمران نورخان ائیر بیس ءِ سر ءَ شال ءَ اتکگ ءُ آئی ءِ ھمراہ تھ ئِے کارانی وزیر شیخ رشید ھم گون اِنت –

عمران خان ءِ آیگ ءَ پد سروزیر بلوچستان سیکرٹریٹ سر بیتگ ءُ پولیس ءِ کارمنداں سلامی پیش کرتگ –

ھالانی تہ ءَ گوشگ بیتگ کہ پاکستان ءِ سر وزیر عمران بلوچستان ءِ امن ءُ ایمنی ءِ جاورھالانی گپ ءُ تران کنت ءُ مچھ ءِ وئیل ءِ درگت ءَ ھم گپ کنت –

ھالانی تہ ءَ گوشگ بیتگ کہ عمران خان مچھ وئیل ءَ اسرمند بیتگیں مردمانی گون ءَ پدردی درشان کنت ءُ اشی ءَ ابید ھزارہ ٹک ءِ سروکاں ھم نیادی دیوان کنت –

زانگ بہ بیت شال ءِ ٹنٹیں سارتی ءَ شش روچ ءَ داں ھزارہ برادری ءِ کاریزکارانی کھولاں نندانک جتگ ءُ پاکستان ءِ سروزیر ءِ ودار ءَ نشتگ اَنت بلے گوستگیں شپ ءَ ھزارہ ایکشن کمیٹی ءُ سرکاری واکدارانی میان ءَ گپ ءُ تران سوبمند بیتگ ءُ مچھ وئیل ءَ کُشگ بیتگیں مردمانی جون مروچی کَل ءُ کسارت کنگ بیتگ اَنت –

دی بلوچستان پوسٹ

شال ءَ ھزارہ ٹاؤن ءَ علامہ ھاشم موسوی ءَ بیران بیتگیں کاریزکارانی نماز جنازہ وانینتگ اَنت کہ چریشی ءَ بازیں کَچے ءَ مردماں بھر زرتگ –

چریشی ءَ ابید ڈپٹی اسپیکر راجمانی پتر ءِ باسک قاسم سوری، گچینی ءِ ھمراہ ذلفی بخاری، بنجاھی پتر ءِ وزیر علی زیدی ءُ دگہ مردماں نماز جنازہ ءَ بھر زرتگ –

ایم ڈبلیو ایم ءِ رھشون علامہ ناصر عباس شیرازی ءَ گْوشت: ھزارہ ٹاؤن ءِ مانشجاہ ءَ دَہ ادیرہ جوڑ کرتگ اَنت ءُ دراھیں جونانی کَل ءُ کسارت ھمد ءَ بیت اِنت کہ دراھیں جونانی وارس ھمد ءَ کَل اَنت –

زانگ بہ بیت سَے جنوری ءِ روچ ءَ بلوچستان ءِ دمگ مچھ ءَ یازدہ کاریزکار کوئلہ فیلڈ ءَ سلاہ بندیں مردماں کُشتگ اَنت چریشی ءَ پد پشتپداں جونانج ھمراھی ءَ شال ءَ شش روچ ءَ نندانک ءَ نشتگ ءُ سروزیر پاکستان ءِ آیگ ءِ لوٹ کرتگ –

وئیل ءِ ھلاپ ءَ نصیر آباد ءِ بنجاھی شھر اوستہ مھمد ءُ دگہ جاھاں ھوار مستونگ ءُ شال ءَ بلوچ یکجھتی کمیٹی، بی ایس او ءُ دگرانی نیمگ ءَ پدردی ءِ درشان بیتگ اَنت، بیران بیتگیں کاریزکارانی یات ءَ ڈیوا روک کنگ – بلوچ سیاسی ءُ چاگردی پھناتاں وئیل ءِ سر ءَ پدردی درشان بیتگ اَنت –

کراچی ءُ لاھور ءَ ھوار شھراں نندانک بیتگ اَنت، کراچی ءَ سِی جاھاں گیش دگ بند کنگ ءُ نندانک جنگ بیتگ اَنت ءُ ٹریفک ءِ روگ ءُ آیگ مھتل بیتگ اَنت ءُ بالی گرابانی بال ھم مھتلی ءِ آماچ بیتگ اَنت –

سرکاری گپ ءُ تران ءَ گوستگیں شپ ءَ نندوکیں مردم گپ ءُ تران ءَ رازیگ بیتگ اَنت ءُ کھول جونانی کَل ءُ کسارت کنگ ءَ رازیگ بیتگ اَنت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ بنجاھی شھر دُزاپ “زاھدان ” ءَ ایرانی چیریں ادارھاں یک مردمے دزگیر کرتگ ءُ گوں وت برتگ –

گپتگیں مردم ءِ پجار خلیل اللہ جھمنند سرباز ءِ نام ءَ زانگ بیتگ –

دمگی مردمانی رد ءَ خلیل اللہ پشمبے ءِ روچ ءَ ایران ءِ چیریں ادارھاں لوٹائینتگ ءُ برتگ کہ چریشی ءَ پد آئی ءِ ھال نیست اِنت –

اھوالکار ءِ رد ءَ خلیل اللہ روکپتی بلوچستان ءَ انسانی ھکانی لگتمالی ءِ سر ءَ چارگردی رسانکجاہ توار چِست کنوکیں مردمے بیتگ ءُ گمان ھمے کنگ ءَ بیگ ءَ اِنت کہ ھمے پُرکاری ءِ سوب ءَ برگ بیتگ –

دمگی مردمانی رد ءَ خلیل اللہ ءِ برات مولوی امان اللہ بازیں سالے بیت کہ ایرانی زنداناں بندیگ اِنت ءُ گوست ءَ آئی ءِ برات ءِ سر ءَ ایرانی آمیدگساں پاھو دیگ ءِ پرمان کرتگ-

اھوالکار ءِ رد ءَ امان اللہ ءِ وکیل ءَ وئیلانی پژدر ءَ ایران ءِ آمیدگساں امان اللہ مُزداری ءِ واستا توار چِست کرتگ ءُ پاھو دارگ بیتگ ءُ تنی وھدی آئی ءِ پاھو دیگ سرجم نہ بیتگ –

زانگ بہ بیت روکپتی بلوچستان ءَ گوست ءَ بازیں مردم گرگ ءُ پاھو دیگانی ھال چاگردی رسانکجاھاں شنگ بیگ ءَ اَنت –

ایرانی آمید گسانی بھتام اِنت کہ اے مردمانی دست ایران ءِ ھلاپ ءَ برانز کنوکیں زرمبشتانی اِنت ءُ ایران ءِ ھلاپ ءَ کار کنگ ءَ اَنت –

بلے روکپتی بلوچستان ءَ بندوکیں چاگردی مردم ءُ چاگردی رسانکدراں کار کنوکیں مردم مردمانی سر ءَ گوشتگیں بھتاماں رد کنگ ءُ گوشگ ءَ اَنت کہ ایرانی آمید گس زورانسری بلوچستان ءِ بلوچاں پاھو دیگ اِنت –