TBP Balochi

نیکراھیں ناشرکاری ءِ نام ءِ سر ءَ بلوچاں پوجی لشکریانی سر ءَ نشانگ کنگ ءَ اَنت – ماما قدیر بلوچ

دی بلوچستان پوسٹ

سندھ ءِ بنجاھی شھر کراچی ءَ وائس فار بلوچ مسنگ پرسنز ءِ نیمگ ءَ بیگواھیں مردمانی درگیجگ ءِ ھاتر ءَ پریس کلب ءِ دیم ءَ زھرشانی بنجل ءَ مروچی چار ھزار ءُ یک سد ءُ ھشتاد ءُ نُھ روچ سرجم بیتگ – سندھ یوتھ ایکشن کمیٹی ءِ چیئرپرسن تبسم ملاح، سینگار چانڈیو، اسد مغیری ءُ آیانی بنزہ ءَ ابید سندھ زرمبشت ءِ انور بردی ءَ بنجل ءِ تر ءُ تاب کرتگ ءُ کھولانی گون ءُ پدردی درشان اِتگ –

بیگواھیں انسانی ھکانی باسک راشد ھسین ءِ مات ءُ دَہ سالاں بیگواھیں مھمد فیصل آرائیں ءِ کھول ءَ بنجل ءِ تر ءُ تاب کرتگ ءُ وتی زھرشانی یاداشت کنائینتگ -ھمے وھد ءَ شال ءِ ایڈوکیٹ خالدہ ھم جاڑیگ بیتگ –

وی بی ایم پی ءِ رھشون ءَ اتکگیں مردمانی گون ءَ گپ کنان ءَ گْوشتگ کہ گوست ءِ ھاکمانی رندپداں یک برے پد ءَ نوک کنگ ءَ اَنت پاکستان ءِ پوجی ءُ جمھوری تُری کجام ھم سرکار بلوچستان ءِ نیمگ ءَ رویش نوک آبادیاتی ءُ بلوچ راج ءِ واھشتانی کمتری ءِ ھساب ءَ بیتگ اَنت –

آئی ءَ گوشت کہ گوست ءِ ٹاہ دیوکیں پاٹیانی واکدارانی آیگ ءَ پد بلوچستان ءِ بارہ ھما رویش بیتگ اَنت کہ گوست ءِ سرکارانی بیتگ اَنت – آیانی زھر جتا جتائیں تکاں بندوکیں مردمانی بلوچاں ابید ءِ آمیدگسی آوار جنگ ءُ بیگواہ کرتگیں بلوچانی سر ءَ زورانسری لَٹ ءُ کُٹ ءُ شھید کنگ ءَ پد آیانی جوناں جنگل ءُ گیابان ءَ کَل کنگ ءُ دور دیگ ءِ وڑیں کاروائی گندگ ءَ بیتگ اَنت –

آئی ءَ گْوشت کہ پاکستان ءِ بندر ءَ بنامی ءَ ابید میان اُستمان ءِ زورانی دیمپان کنگ کپگ اِنت ھمے واستا آ بلوچستان ءَ جنگ ءِ مانشان ءَ دگہ کسے ءَ زمہ وار کنگ ءَ اَنت – نِی نیکراھی ءِ ناشرکاری ءِ نام ءِ سر ءَ بلوچانی ھلاپ ءَ لشکر کشی بندات کنگ بیتگ اَنت –

آئی ءَ گْوشت کہ گوستگیں روچاں دست ءُ گوشیں ھزارہ کاریزکارانی کوش یک سوببے ءَ بلوچستان ءَ مزنیں کچے ءَ پوجی لشکر کشیانی جار پِرینگ ءِ راہ پچ کنگ ھوار بیتگ اَنت، سرجمیں بلوچستان ءَ لشکر کشیانی درچ برھاہ اَنت بلے نِی اے جار ءِ پد ءَ نیکراھی ناشرکاری ءِ نام ءِ سر ءَ بلوچانی نشانگ کنگ ءَ اَنت –

دی بلوچستان پوسٹ

سر بیتگیں ھالانی رد ءَ بلوچستان ءِ تیابدپی شھر گوادر ءِ دمگ پیشکان گنز ءَ دریاورداں گیرکانودی ءَ زر ءِ سیمسرانی پروشگ ءِ ھلاپ ءَ زھرشانی کرتگ –

زھرشانی گنز ءِ زر ءِ لمب ءَ بیتگ ءُ زھرشانی کنوکیں دریاوردانی دستاں پلے کارڈ بیتگ اَنت کہ آیانی نبشتگ بیتگ “لیجر نسل کشی بند کنگ بہ بیت “-

دریاورداں گوشت کہ لیجر ءَ مزنیں ماھیگانی واستا کارمرد کنگ ءَ اَنت ءُ لیجر ءِ نسل کشی ءَ کنگ ءَ اَنت –

آیاں گوشت کہ دری ماھیگر گنز ءِ زر ءَ آیگ ءُ گنز ءِ زر ءَ لیجرانی نسل کُشی ءَ کنگ ءَ اَنت کہ چریشی ءَ چہ گنز ءِ دریا ورد لاپ والینگی ءَ زبھر بیگ ءَ اَنت –

آیاں گوشت کہ اگاں لیجرانی نسل کشی بند نہ بیت گڑا گنز ءِ دریاورد چُنڈے نگن ءَ ھم مھتاج بنت –

بہ وان اِت: گوادر ءَ دریا وردانی زھرشانی ءَ

زھرشانی کنوکاں مزن واکداراں ءُ فشریز ءِ مزنیں اگدوداراں لوٹ کرتگ ءُ گوشتگ کہ آ اے درگت ءَ گامگیج بہ زور اَنت ءُ گنز ءِ زر ءَ لیجرانی نسل کُشی ءَ بند بہ کنائین اَنت –

زانگ بہ بیت گوست ءَ ھم گوادر ءَ ھمے وڑ ءَ دریاورداں مزنیں دری ٹرالرانی ھلاپ ءَ زھرشانی کرتگ ءُ واکداراں ھمے لٹ کرتگ کہ دری مزنیں ٹرالر بلوچستان ءِ زر ءَ آیگ ءُ بلوچستان ءِ ماھیگیراں تاوان دیگ ءَ اَنت –

بلے اشانی لوٹ ءُ دزبندیاں پد ھم سرکاری واکدار گامگیج زورگ ءَ گندگ نہ بیتگ اَنت –

نبشتانک: ھانی اگاں تو پہ کوہ ءَ سر گِپتگ ئے

نبشتہ کار: زمین زھگ

دی بلوچستان پوسٹ

ھانُل اُمیت کن آں وش ءُ جوڑئے ، ءُ دائم وش ءُ شادان بات ئے اے نِمدی ءَ کہ من لِکّگ ءَ آں ، منی گْور ءَ ھِچّ نیست ھپتگے ءَ گیش اِنت کہ دُژمن ءِ جنگی گُراب یکشلا مئے سر ءَ تیر ءُ بمبانی آس گْوارگ ءَ اَنت دو روچ بیت کہ مئے وردن ھم ھلاس اَنت۔

منی کشّ ءَ یک سنگتے تچک اِنت کہ دُژمِن ءِ ایس ایس جی کمانڈوزانی تیرگْواری ءَ ماں پاد ءَ تیرے وارتگے، ھون چو کَور ءَ ھار کنان ءُ اَمبریں ھاکاں ھوار بُوھان اَنت۔
سنگت ءِ چمّاں پہ وت زندگی ءِ لوٹ نیست ، بس ماں چنکاں زمین ءِ ھاک اَنت ءُ پہ ھاک ءَ نمیران بُوَگ لوٹ اِیت۔
اے مْیان ءَ دُژمن ءَ چہ ھِچ ڈولیں اُمیت نہ بوتگ کہ دُژمن مئے سر ءَ رھم کنت ، چی ءَ کہ مارا ھم پہ دُژمن ءَ رھم نہ بوتگ۔
بلے ھانُل! مئے چاگرد ءَ لھتے ھما مردُم اَنت کہ چیزوکے زرّ ءِ واستا زمین ءِ سودا ءَ کنگ ءَ اَنت کہ ھما زمین مات گْوشگ بیت ءُ ھمے مات ءِ ھما سرانی سودا ءَ کنگ ءَ اَنت کہ آیاں زند ءِ ھر چھر ءُ رنگ ، وشّی ، سیاد ءُ مردُم ، وتی گِس ءُ کُل پہ ھمے زمین ءِ پھازگ ءُ پہ آزاتیں اِستان ءَ ندْر کُرتگ اَنت ۔

من ونتگ کہ کس چو مات ءِ ڈول ءَ نرم دل نہ اِنت ، بلے وھدے من گوں چاگرد ءِ زندگیں ھما نرمزاریں سراں گوں زندگی کنگ ءَ آں ، اِد ءَ من ءَ مات ءِ کمّی مھسوس نہ بوتگ نہ پہ برات ءُ گْوھارے ءِ مھراں زنزرتگ – اے ھما گُلامیں چاگرد ءَ در کپتگیں ھما آزاتیں سر اَنت کہ آزات اِنت ، اِیشانی پِگر ءُ مارِشت چو چاگرد ءَ گُلام نہ اِنت۔

ھانل! سنگت شھید گلام مھمد گْوش اِیت کہ لیکوی سیادی اِنسان ءَ چہ دُرسیں سیادی ءَ دوستر بیت ، ءُ اے لیکوی ھما سیاد اَنت ، ھما سر اَنت کہ کس ءَ پہ چم سُھری ءِ دَیگ ءَ دل نہ بہ اَنت۔ آیانی دیم ءَ تئی مرگ سک گْران انت ، ءُ پد ءَ گْرانتریں ساھت ھما بَہ اَنت کہ جنگے ءِ مْیان ءَ سنگتے شھید بیت ءُ تو لاش ءَ گوں وت ءَ بُرت نہ کن ئے، ءُ بے دلیں دژمن سوب کنت ءُ لاش ءَ ماندار اِیت تو بے وس ئے۔
اے بے وسی، گرمی، سارتی، لنگڑی، سپر ءُ پند، پمن بِندات ءَ سک گْران بیتگ اَنت ، بلے وھد گْوازان ءُ کوہ منی گِس ءُ ھنکین جوڑ بوھان بوتگ اَنت۔ اے درتہ پُچّی منی مُھکمی ءُ لنگڑی منی توکل، آزاتی منی سِتک ءُ اِیمان ، زمین منی مھر ءُ اے آزمان منی مھکمیں ھمراہ ۔مھرنگ ءِ شال ءِ دمکاں گْوشتگیں گُشتن: چو مہ بیت زالبول ماں راجی جُنز ءَ بے کرد بہ بَہ اَنت ءُ تئی پیسلہ۔
ھانی منی زند ءِ واھگ بیتگ کہ ھرکس چہ وتی نام ءَ زانگ بہ بیت ، اے نہ کہ آ کئی زھگ اِنت ، کئی لوگبانک اِنت ۔ کردار ءَ اَمَل (عمل ) ، مُھکمیں پیسلہ تئی کار جوڑ کن اَنت، ءُ کار ءَ پہ توکلے لوٹ اِیت ۔
ماھر وڑ اِیں ، ھر ڈول اِیں، کسے نہ کسے ءِ سَوَب ءَ مئے نیکی، مئے بدی چاگرد ءَ بگر داں مات ءِ کُٹّ ءَ در بُرتگیں سبک اَنت ۔ ءُ ھانل تو انچیں چاگردے ءَ بغاوت کنگ ءَ ئے کہ اُود ءَ جنین ءَ چہ کسانی ءَ ھمے پنت ءُ سوج دَیگ بیت کہ تو جِنکّ ئِے – آئی ءَ را بار بار ھمے مارِشت دَیگ بیت کہ تو پہ گِس، چلوپگ ءُ پہ سور کنگ ءِ واستا جوڑ بوتگ ئے ، ءُ مردین آئی ءَ وتی مِلکت ءُ میراس سرپد بیت ۔
اے درگت ءَ چیزے ءِ ٹاھینگ گْران اِنت پروشگ اِنّا ، بُنگیج کنگ گْران اِنت آسر کنگ اِنّا ، اگاں تو سرگرے گُڑا بِندات کنگ ءَ بَہ ئے۔ بوت کنت پہ تو سک گْران بہ بیت، بلے من سدّکاں تو بے مُزّ نہ بَہ ئے ، چی ءَ کہ گوں ترا تئی لیکہ ءُ لیکوی بیلی ھمراہ ءُ ھمگام اَنت۔ پہ درور دگانی جوڑ کنوک پہ دگانی جوڑ کنگ ءَ بِلّے ھزاراں تکلیپ ، درد ءُ سکّیانی دیمپان بَہ اَنت ، بلے ھما دگانی سر ءَ ھزاراں مُساپر سپر کن انت ءُ وتی منزل ءَ سر بَہ اَنت۔

اگاں تو در کپ ئے ءُ توپک ءَ وتی کُوپگ ءَ درنج ئے گھگیری ءُ آزمان ءَ درپشُوکیں اِستالے پہ مُدامی شھم اِیت ۔ تو اگاں دژمن ءَ جت کن ئے یا نہ ، بلے تو یک پِگر ءُ مارِشتے جوڑ بَہ ئے ءُ آیوکیں دِگہ ھزاراں ھانُل ءِ رھشونی ءَ کن ئے۔ چی ءَ کہ پگر ءُ لیکہ پہ مُدامی مان اَنت ، ءُ تو یک لیکہ ءِ چیدگے جوڑ بَہ ئے۔

ھانُل۔۔۔! اُمیت کن آں من ءُ تو بلوچستان ءِ ماتکوھاں ڈیک وریں ءُ دُژمن ءَ ھوار دُگنیا ءَ ھمے پیگام ءَ دے اِیں کہ اگاں ما زُلم ءُ زُوراکی ، کْوزہ ءُ یلگاری ءِ توک ءَ ساہ کشّ اِت کن اِیں ، گڑا ما ساہ گِپت ھم کن اِیں ۔
بیا پد ءَ ما بانڑی ءِ نام ءَ دوبر زندگ کن اِیں، بیا وتی باندات ءَ نوکیں پگر ءُ لیکّھے دے اِیں کہ اگاں ما یک دست ءُ یکمُشت نہ بَہ اِیں ، ما ھِچ نہ ایں ۔
ءُ ما بلوچستان ءِ مزاریں پُسّگ اِیں ، مئے ھون ءَ گوں مُزاھمت ءُ گھگیری ھوار اِنت۔ ما مِرگ زان اِیں ، بلے پدکِنِزگ ءُ بکشاھگ نہ
گُڈّی ءَ یکرندے پد ءَ گْوش آں
ھانُل—! سلامت بات ئے— آجو بات ئے۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ مگس ءَ دو ٹولیانی میان ءَ جنگ ءُ چوپ بیتگ کہ چریشی ءِ آسر ءَ چار مردم بیران ءُ شش زدگ بیتگ اَنت –

گیشیں ھالانی رد ءَ جنگ ءُ چوپ مگس ءِ دمگ شاری کور آشار ءَ بیتگ کہ اود ءَ دو ٹکانی میان ءَ جنگ ءُ چوپ بیتگ، جنگ ءُ چوپ ءَ ھردوکیں نیمگاں تیرگواری بیتگ –

اھوالکار ءِ رد ءَ شاری کور آشار ءَ مروچی دو ٹولیانی میان ءَ جنگ ءُ چوپ بیتگ کہ آیانی جنگ “نِشہ “باپاری ءِ سر ءَ چِست بیتگ –

اھوالکار ءِ رد ءَ ھردوکیں نیمگاں بازیں وھداں تیرگواری بیتگ ءُ چریشی ءَ چار مردم بیران ءُ شش زدگ بیتگ اَنت –

بیران بیتگیں مردمانی پجار شیر مھمد ء مھمد جھمنند پتکان، درمھمد ء فقیر مھمد جھمنند ایرفشان، فتح مھمد ء لال مھمد پتکان ءُ ھدا بکش ءِ ناماں زانگ بیتگ اَنت –

وئیل ءَ پد دمگ ءَ پھزدار اتکگ ءَ جاورھال اش ایرموش کرتگ ءُ زدگ ءُ بیران بیتگیں مردم نادراہ جاہ ءَ سر بیتگ اَنت –

دی بلوچستان پوسٹ

بلوچستان ءِ دمگ پنجگور ءِ ھند پروم ءَ گوستگیں شپ ءِ نھینگام ءَ پاکستانی پوج ءَ نامی ئیں باپاری ملک میران ءِ لوگ ءِ سر ءَ بیڑ برتگ –

گیشیں ھالانی رد ءَ پاکستانی پوج ءَ گوستگیں شپ ءِ ساھت دو ءَ ملک میران ءِ لوگ ءِ سر ءَ بیڑ برتگ ءُ پَٹ ءُ پول کرتگ اَنت، پَٹ ءُ پول ءِ وھد ءَ پوج ءَ ملک میران ءِ گاڑی ھم گون وت برتگ –

دمگی مردمانی رد ءَ پنجگور ءُ کش ءُ گوری دمگاں گوستگیں بازیں روچاں پاکستانی پوج ھمک روچ بیڑ برگ ءَ اِنت ءُ مردماں لَٹ ءُ کُٹ کنگ ءَ اِنت زانگ بہ بیت بیست روچ ءَ پیسر ملک میران ءِ لوگ ءِ سر ءَ ھم بیڑ برگ بیتگ ءُ آئی ءِ گاڑی گوں وت اش برتگ –

ھمے رنگ ءَ گوستگیں دو روچاں پاکستانی چیریں ادارھانی چیردستی ءَ برجاھیں ٹولی ءَ پنجگور ءِ دمگ بونستان ءَ بلوچ نیشنل مومنٹ ءِ رھشونبءُ بلوچ اھوالکار ءِ لوگ ءِ سر ءَ بیڑ اش برتگ چُک ءُ زالبول لٹ ءُ کُٹ اش کرتگ اَنت ئِے –

پنجگور ءَ لشکر کشیانی وھداں مردمانی دزگیری ءُ ناشناسیں جاھاں برگ ءِ ھال ھم سر بیتگ اَنت –

بلوچ نیشنل مومنٹ ءِ رد ءَ پاکستانی چیریں ادارھانی چیردستی ءَ جوڑ کرتگیں ٹولی ءِ نیمگ ءَ پاٹی ءِ رھشون ءُ اھوالکار ءِ لوگ ءِ سر ءَ بیڑ برگ ءُ چُک ءُ زالبولانی لَٹ ءُ کُٹ کنگ گیر انسانی املے –

بی این ایم ءِ بنجاھی جارکش ءَ پاٹی ءِ چیئرمین ھلیل بلوچ ءِ لوگ ءِ سر ءَ بیڑ ایر جتگ ءُ گوشتگ کہ پاٹی ءِ رھشون ءُ باسک ریاست ءِ اے وڑیں بیھاراں نہ ترس اَنت –

دی بلوچستان پوسٹ

دالبندین ءِ نزیک ءَ دگ وئیلے ءَ دو مردم بیران دو زدگ بیتگ اَنت، وئیل آر سی ڈی شھدگ ءَ روکپتی ھند جوجکی ءِ دمگ ءَ بیتگ –

گیشیں ھالانی رد ءَ دالبندین ءِ ھند جوجکی ءَ زمباد پک اپ گاڑی ءُ ٹرالے ءَ ٹکر وارتگ چریشی ءِ سوب ءَ دو مردم بیران بیتگ اَنت دو زدگ بیتگ اَنت –

بیران بیتگیں مردم زمباد پک اپ گاڑی ءِ ڈرائیور ءُ کلینڈر ھوار اَنت ءُ زدگ بیتگیں ٹرالر ءِ کلینڈر ءِ ڈرائیور ھوار اَنت –

وئیل ءِ ھال ءِ سر بیگ ءَ اسٹنٹ کمشنر دالبندین جاوید ڈومکی ءِ سروکے ءَ لیویز پھزدار سر بیتگ اَنت ءُ زمباد گاڑی ءَ چیرترینتگیں مردمانی لاش اش کش اِتگ ءُ زدگ بیتگیں مردم ڈی ایچ کیو ھسپتال دالبندین ءَ سر کرتگ اَنت –

ھمے وڑ ءَ پدگ ءِ ھند ءَ دو گاڑیانی میان ءَ ٹکر ورگ ءَ ھپت مردم زدگ بیتگ اَنت –

گیشیں ھالانی رد ءَ شال ءُ دالبندین ءِ دگ ءَ پدگ ءِ ھند ءَ وٹز کار گاڑی ءُ زمبادے ءِ میان ءَ ٹکر وری بیتگ چریشی ءِ سوب ءَ زالبولے ءَ ھوار ھپت مردم زدگ بیتگ اَنت بی ایچ یو ءِ پدگ نادراہ جاہ ءَ برگ بیتگ اَنت ءُ اشانی تہ ءَ دو کسانی جاور نگیگ بیتگ اَنت ءُ نوشکی ءِ نادراہ جاہ ءَ برگ بیتگ اَنت –

زانگ بہ بیت بلوچستان ءِ پرشتگیں دگ ءُ گاڑیانی ترند روگ ءُ ڈرائیورانی نادلگوشی ءِ سوب ءَ بازیں مردمانی ساہ زوال بیگ ءَ اَنت ءُ چاگردی مردمانی گوشگ اِنت کہ دگانی سر ءَ گر ءُ دار کنوکیں پھزدارانی نہ بوگ ءِ سوب ءَ گیشتریں وئیل دیم ءَ آیگ ءَ اَنت –

تربت بازار ءَ پوج ءِ سر ءَ بوتگیں اُرش ءِ زمّہ واری ءَ منّیں، اُرش ءَ چار پوجی کارمند ٹپی بوتگ اَنت – جیئند بلوچ

دی بلوچستان پوسٹ

سربیتگیں ھالانی رِد ءَ مروچی بلوچستان ءِ دمگ کیچ ءِ بنجاھی شھر تربت بازار ءَ ناشناسیں مردماں فرنٹیر کور ءِ پانگس ءِ نزیک ءَ بمب اُرشے کُتگ – اُرش ءَ چار مردم ٹپی بوتگ اَنت – ٹپی بوتگیں مردم پنجاپ ءُ سندھ ءِ جاھمنند انت –

تراک تربت بازار ءَ سینیما چوک ءَ پوجی پانگس ءِ نزیک ءَ کنگ بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں کیچ ءِ بنجاھی شھر تربت ءِ بازار ءَ برجاھیں پاکستانی پوج ءِ یک پانگسے بمب تراک ءِ نشانگ کرتگ –

جارکش ءَ گوشتگ کہ سرمچاراں دژمن پوج ءِ کارمند ھما وھد ءَ وتی نشانگ جوڑ کرتگ انت کہ آ پانگس ءَ ڈن یکجاہ بوتگ انت – تراک ءِ آسر ءَ چار کارمند ٹپی بوتگ اَنت –

جارکش جئیند بلوچ ءَ گوشتگ کہ تربت شھر ءِ تہ ءَ پاکستانی پوج ءُ چیریں ادارہ دگہ دمگانی مردماں آباد کن انت جتائیں پھناتانی تہ ءَ آھاں یکجاہ کن انت ءُ آھاں چہ چاریگری ءَ ھوار بلوچ راجی زرمبشت ءِ بگیری ءَ کار گِر انت –
ھمے وڑ دمگ ءِ تہ ءَ ھم نوکیں وتگڑیں ڈیت اسکواڈ جوڑ کنگ ءُ بلوچ راجی زرمبشت ءِ بگیری اڑاند ودی کنگ ءِ جھد ءَ انت – اے ڈیتھ اسکواڈ ورنایانی آوار جنی ءَ ھوار بلوچ چُک ءُ زالبولانی شھید کنگ ءِ کتکاریاں ھم ھوار انت –

جارکش ءَ گوشتگ کہ بی ایل اے سرپد کنت کہ درسیں ریاستی کارندہ مئے چم ءِ تہ ءَ انت ءُ راجی زرمبشت بلوچ راج ءِ بگیری ءَ پرکاریں دژمن ءُ آئی ءِ کمکاراں بیمناکیں سزا دے ئِے ـ

گوستگیں سال گوں پاکستانی پوج ءِ زوراکیاں گوں ھلاس بوتگ ءُ نوکیں سال ھم گوں نیکیں واھگاں نہ اتکگ، سال ءِ بندات ءَ بلوچستان ءِ مھلوک ءِ ھون ریچی بندات بیتگ – ماما قدیر بلوچ

دی بلوچستان پوسٹ

سندھ ءِ مزن شھر کراچی ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ یک سد ءُ ھشتاد ءُ ھشت روچ سرجم بوتگ-
بلوچ نودربر ایکشن کمیٹی ءِ رھشون ءُ باسکاں ھوار ایچ آر سی پی سندھ ءِ سرکماش سعید بلوچ ءُ باسکاں، شال ءَ چہ چاگردی ءُ راجداریں باسک ایڈوکیٹ خالدہ بلوچ ءُ دگہ مردماں بنجل ءِ ترءُتاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ گوستگیں سال ءِ گُڈی ماہ ءَ پاکستانی پوج ءَ بولان، ھرنائی ءُ کش ءُ کری دمگاں لشکر کشی بندات کرتگ کہ روچ مروچی انگت برجاہ انت – لشکر کشیانی میان ءَ پانزدہ مردم زورانسری آوار جنگ ءُ بیگواہ کنگ بوتگ اَنت، وھدیکہ اے دمگاں چاریں نیمگاں ماٹر گولہ آس دیگ بوتگ ءُ جنگی بالی گراباں تیرگواری ھم کرتگ –

آئی ءَ گوشتگ کہ نوکیں سال ھم گوں نیکیں واھگاں نہ اتکگ، سال ءِ بندات ءَ بلوچستان ءِ مھلوک ءِ ھون ریچی بندات بیتگ – بزگیں کاریزکارانی کوش ءَ ھوار بلوچستان ءِ جتا جتائیں دمگاں دنیگتا چار مردمانی زانگولیں جون دست کپتگ اَنت کہ آھانی پجار ھم نہ بیتگ اَنت وھدیکہ دالبندین ءَ چہ بیگواہ بوتگیں ورنایے ئے جون ھم ھمیشاں ھوار انت –

ماما قدیر بلوچ ءَ گوشتگ کہ بیگواھیں بلوچ پرزندانی ءُ لس مھلوک ءِ سر ءَ لشکر کشی ءِ درگت ءَ وفاق ءُ بلوچستان ءَ نندوکیں آھانی نمائندگانی نیمگ ءَ ھواریں درشان دیم ءَ گوستگ انت بلے راستی ءَ دؤئیں درشان کرت نہ کناں –

آئی ءَ گوشتگ کہ وتی زرزیرانی زور ءَ پُرایمنیں جد ءُ جھد ءِ بگیری ءَ پندل ساز کنگ ھر ایردست کنوکانی نیمگ بوتگ پرچا کہ چہ آھاں ھمے امیت دارگ بیت ءُ اے سلسلہ وتی مول ءُ مراداں تاں برجاہ بیت اِنت –

دی بلوچستان پوسٹ

بلوچستان ءِ شھر ھزدار ءَ لس ٹرانسپورٹر لشکری پھزدارانی بدھادتیاں، ڈرائیورانی سر ءَ لَٹ ءُ کُٹ ءِ ھلاپ ءَ زھرشانی ءَ نشتگ اَنت – ٹرانسپورٹانی واھنداں وتی کوچ اوشتارینتگ ءُ کراچی ءُ شال ءِ بنجاھی شھدگ بند کرتگ –

ترندیں سارتی ءَ سوب ءَ گوستگیں شپ ءَ بازیں گاڑیاں سدانی مساپر مشکلانی آماچ اَنت –

کوچانی واھندانی گوشگ اِنت کہ گوستگیں شپ ءَ ایپ سی ءَ وتسر ءَ مئے گاڑی گپتگ ءُ ڈرائیور لَٹ شاپ کرتگ اَنت ءُ مئے کراچی ءَ آؤکیں مساپر بریں کوچ نشہ باپاری ءِ نام داتگ اَنت ءُ زُلمی گامگیج زرتگ اَنت –

آیاں گْوشت کہ ما ڈیھی گززران بیتگ اِنت بلوچستان ءَ بے زورگار ھمے کوچانی سون ءَ پیداگ بیگ اِنت ءُ یک کوچے ءَ دَہ کس زورگار کنگ ءَ اِنت ءُ دَہ لوگانی تہ ءَ نشتگیں مردمانی گزران بیت اِنت ءُ ھزاراں مردم بے روزگار اَنت بلے ما گام گام ءَ جھد کنگ ءَ اِنت –

آیاں گوشت کہ اے اَمل اوپار ءُ سگگی نہ اِنت اے وڑ ءَ مارا وتی کارکنوکانی کمشرپ کنگ اوپار نہ بیت اِنت – آیاں گْوشت ما وتی گاڑیاں اوشتارین اِنت ءُ چابیاں ایف سی ءِ بنجل ءَ سر کن ایں ءُ نہ کُٹوکیں وھدے ءَ داں زھرشانی ءَ برجاہ دار اِنت –

گڈی ھالانی رد ءَ داں واکدارانی نیمگ ءَ گپ ءُ تران کنگ ءَ ھچ گامگیج زورگ نہ بیتگ اَنت ءُ واکدارانی نیمگ ءَ اے درگت ءَ ھچ ھال دیم ءَ نیاتکگ اَنت –

دی بلوچستان پوسٹ

لُکیں تامر “بلڈی ورڈز” چاگردی تامر شنگ جاہ “یوٹیوب” ءَ گوستگیں روچ ءَ شنگ بیتگ-

تامر ءِ تہ ءَ بلوچ مھلوک ءِ بزگی ءُ بلوچستان ءَ بلوچ مھلوک ءِ سر ءَ کپتگیں زوراکیانی درنگازی ءِ ندارگ گری پیشدارگ بیتگ اَنت –

تامر گوستگیں روچ ءَ تامر شنگ جاھیں چاگردی رسانک جاہ یوٹیوب “بیزا ویژولز” تندجاہ ءَ شنگ بیتگ –

ٹی بی پی ءِ اھوالکار ءَ تامر ءِ نبشتہ کار حکیم واڈیلہ ءَ گپ کنان ءَ گوشت کہ “اے تامر ھما بلوچ اھوالکارانی درگت ءَ جوڑ کنگ بیتگ کہ آ راستی ءِ شوھاز ءَ کُشگ بیتگ اَنت یا گار ءُ بیگواہ کنگ بیتگ اَنت –

آئی ءَ گْوشت کہ اے تامر ءِ نبشتگ کنگ ءَ ھما وھد ءَ بندات کرتگ کہ دو ھزار ءُ بیست ءَ بلوچ اھوالکار ساجد ھسین ءِ گار ءُ بیگواھی ءِ ھال شنگ بیتگ گڑا ھمے وھد ءَ مارا اے ناوشیں جیڑہ ءَ تامرے ءِ نبشتگ کنگ ءَ جیڑینتگ –

آئی ءَ گُشت کہ تامر ءَ بلوچستان ءَ چیر تر اِتگیں توار کہ اود ءَ مردمی اگبال ھمک روچ ءَ لگتمال بیگ ءَ اَنت ما وتی جھد ءَ اے تامر ھما درانگازیانی پُشدر ءَ جوڑ کرتگ –

حکیم واڈیلہ ءَ گْوشت: اے تامر ءِ تہ ءَ بازیں چیزانی پدراھی کنگ بیتگ اَنت ءُ آئی ءِ ازمکاراں ھم ھما رنگ ءَ کار گرگ بیتگ اَنت کہ آ بلوچستان ءِ ناوشیں جاوراں گوں ھمدپی ءَ ندارگ ءَ نزیک کن اَنت –

آئی ءَ گْوشت کہ اے تامر ءِ تہ ءَ “ڈپریشن” جیڑگ ءُ بلوچ راجی جھد ءِ بارہ ءَ ھم کم ءُ کساس ندارگاں گوں نزیک کنت-

آئی ءَ گْوشت کہ اے لُکیں تامر “بلڈی ورڈز” پہ بلوچ اھوالکاراں یک کسانوکیں ستاشانی یے –

آئی ءَ گْوشت کہ تامر ءِ تہ ءَ انگلینڈ ءِ جتا جتائیں شھراں اکسکاری ءُ تامری گرگ بیتگ اَنت –

اے تامر حکیم واڈیلہ ءَ نبشتہ کرتگ ءُ اے تامر ءِ تہ ءَ ازمکاری احسان بلوچ ءُ حکیم بلوچ ءَ کرتگ اَنت ءُ تامر ءِ بتکاری بین سمتھ ءَ کرتگ اَنت –

تامر لنک