TBP Balochi

پاکستانی پوج ءِ بنشون( آئی ایس پی آر) ءَ ٹاہ داتگ کہ آیاں ڈیرہ بگٹی ءَ انٹیلی جنس ءِ سر ءَ کارروائی ءِ وھد ءَ پورسز ءَ 5 سلاہ بندیں مردم کُشتگ اَنت۔

پاکستانی پوج ءِ شنگکار گشتگ کہ آپریشن ءِ تہ ءَ بیران بوتگیں مردماں چہ سلاہ ءُ گولہ بارود دزکپتگ انت ۔

آئی ایس پی آر ءَ گیش گوشتگ کہ ناشرکار دمگی تک ءَ بازیں ناشریں کارروائیانی تہ ءَ ھوار بوتگ اَنت ءُُ سوبمندیں کارروائی ءَ پد دمگ ءَ کلیئرنس ءُ سینیٹائزیشن آپریشن برجاہ اِنت۔

زانگ بہ بیت کہ بلوچستان ءَ پاکستانی لشکر ءُ سی ٹی ڈی ءِ کارروائی باز براں شکی بوتگ اَنت، اود یَ آھانی سر ءَ پیسر ءَ بندیگیں مردمانی کُشگ ءِ بھتام جنگ بیتگ کہ آیاں جنگ ءِ رنگ ءَ پیش دارگ ءَ اَنت۔

گوستگیں وھداں ھم بلوچستان ءِ تہ ءَ اے وڑیں آپریشنانی بابت ءَ انسانی ھکانی گل ءُ بیگواھیں مردمانی کھول وتی پدردی ءِ درشانیاں کنگ ءَ انت-

اے گلانی رد ءَ بازیں براں پورسز دروگیں انکاؤنٹر ءَ بیگواھیں مردماں کُشگ ءَ اِنت ءُ آیاں سلاہ بندیں مردم لیکگ ءَ اَنت۔ بیگواھیں مردمانی کھولاں گْوشگ ءَ انت کہ آیانی نزیکیں مردم ماہ ءُ سالاں بیگواہ بوتگ اَنت ءُ رند ءَ آیانی لاش ”دروگیں میڑاں “ پد دزکپگ ءَ انت-

بلوچستان ءُ کراچی ءَ نُھ مردم آوار جنگ ءُ بیگواہ کنگ بیتگ اَنت-

کراچی ءِ بلوچیں دمگ چہ شراپی گوٹھ ملیر ءَ سی ٹی ڈی ءَ شش مردم زورانسری دزگیر کتگ ءُ ناشناسیں جاھے ءَ برتگ-

پرندوشگیں شپ ءَ سی ٹی ڈی ءِ کارندھانی مزنیں کچے ءَ شاہ علی گوٹھ شرافی ملیر ءَ بیڑبرتگ لوگ لوگ ءَ پٹ ءُ پول کتگ مھلوک ءِ سر ءَ لَٹ ءُ کُٹ کتگ لوگ تاوان داتگ اَنت، بلوچ دودمان لگمتال کتگ اَنت شش بلوچ ورنا آوار جتگ ءُ بیگواہ کتگ اَنت کہ آیانی پجّار زبیر شفیع، نزیر حنیف، ھزیپہ عرفان، منور آتپ، اسحاق ءُ احمد گل ناماں چہ بیتگ اَنت-

وئیل ءِ پُشدر اش اِنت کہ دو شپ ءَ ساری کساس دہ ءَ سی ٹی ڈی ءِ ٹولی ءَ شراپی گوٹھ ءِ دمگی ھوٹل سر ءَ بیڑبرتگ ءُ یک بلوچ ورنایے کہ جیونی پانوان ءِ جھمنند اِنت چست کتگ گاڑی ءَ نندارینتگ، بلے اود ءَ ساڑی مھلوک ءَ گھگیری کتگ گورجیگ ماں گورجیگ بیتگ اَنت، مردمانی سر ءَ لَٹ ءُ کُٹ کتگ ورنا زورانسری چست کتگ ءُ بیگواہ کتگ – بلے مھلوک ءَ یک سی ٹی ڈی ءِ کارمندے یے ھمود ءَ داشتگ، بلے کمو دیر ءَ پد پولیس سروک ءُ کارمندانی مزنیں کچے ءَ کارمند یل کنائینتگ ءُ گوں وت برتگ-

اے وئیل ءِ بیر گرگ ءِ ھاتر ءَ سی ٹی ڈی کارندھاں پرندوشی شرافی گوٹھ ءَ اُرش کتگ شش ورنا آوار جتگ ءُ زورانسری بیگواہ کتگ اَنت-

ھمے وڑ یونیورسٹی آف بلوچستاں ءَ وانوکیں نودربر سید احمد شاہ ی سید ظاہر شاہ یک دستمبر ءَ شپ ءِ کساس ساھت دہ ءَ پاکستانی چیریں ادارھاں زورانسری بیگواہ کتگ –

نودبرر بلوچستان یونیورسٹی ءِ گیٹ دیم ءَ زورانسری بیگواہ کنگ بیتگ- ھمے وھد ءَ ساڑی مردمانی گوشگ اِنت کہ یک سیاھیں کانچیں گاڑی ءَ چہ سلاہ بندیں مردم ایر کپتگ ءُ ورنا زورانسری وتی ھمراھی ءَ برتگ گوں-

ھمے وڑ مستونگ ءِ دمگ چہ دشت، جلب گندان ءَ پاکستانی پوج ءَ دو ورنا ندیم کرد ء مھیم خان کرد جھمنند جلب گندان ءُ فرید کرد ء محمد رفیق کرد جھمنند ریلوے سوسائٹی شال زورانسری بیگواہ کتگ اَنت-،

مئے گیمرتگیں درچک

نبشتہ کار: سنگت بلوچ

دی بلوچستان پوسٹ

انچش کہ شُما گند اِت یک نیمگے اے درچک سبز ءُ شادان اِنت ءُ دومی نیمگ ءَ ھُشک ءُ گیمُرتگ تاک ئِے زمین ءِ دلبند ءَ چو گُلامیں زمین ءِ ورنائیں بچانی جوناں کپتگ اَنت۔ من اے اَکس ءَ وتی زندمان ءِ دو جِتائیں دور ءُ باریگ سرپد باں، سبزگیں تاک ءُ شادابیں شاوڑ منی زند ءِ ھما باریگ اَنت کہ گوں منی زند ءِ ھما نزیکیں سنگت۔ دوست ءُ ھمبلاں بندوک اَنت کہ آ منی زند ءِ دور ءُ باریگاں پہ من چہ ھمبوئیں بھشت ءَ کمتر نہ اَنت۔

ھما دیوان ءُ نیاد، ھما کندگ ءُ بچکند، ھما ٹھک ءُ وشدلی کہ ما توامیں اگاں یکے ءِ بڈّ ءَ کپتگیں گڑا بزانتیں کہ آ اللہ ءَ نَواھِتگ اَت۔ آ روچاں اگاں چہ مئے تہ ءَ کئی کہ باریگ بوت آئی ءِ ھال بدیں ھال اَت۔ ناشریں ھمبلانی کوچرائیاں آ سنگت سک بیوار بوت۔

اگاں بیواری ءَ لاچار بوت گڑا چِڑ اِت ءُ بد ئِے بُرت اے نوبت کہ اتک گڑا بزاں آئی ءَ پہ وت ءَ گنتر چاھے جت گیشتر بیوار ءُ بیزار کنگ بوت۔وھدے مئے کوچرائی ءِ بام ءَ دات گُڑا ما پدا ءَ درستان یکجاھی ءَ آ سنگت ءَ را تسلہ ءُ مھر دات ءُ گوستگیں کوچرائی چیر ترّینت اَنت ما نشت ءُ یکمُشت ءُ یکدل بوتیں۔.بچار اتیں پد ءَ کندگ ءُ ٹھکانی توار میتگ ءِ دمکان چو نازبو ءَ شنگ ءُ تالان اِت اَنت۔

مرچی راستی ھمیش اِنت کہ زیکیں مھر ءُ یات درست گوات ءَ بُرتگ اَنت چہ وتی ھمدلیں ھمبلانی مُچیاں چہ کسے سست ءُ زمین ءِ باھوٹ بوت۔ کسے جھندمیں لاپ ءِ شوھاز ءَ در پہ در اِنت۔

کسے چو منی ءَ چہ ھنکین ءَ دور یک کوٹی یے ءَ کپتگ ءُ وتی دل ءَ تسلہ دنت کہ من چار لبز در بران ءُ وتی باندات ءَ چہ تھاری ءَ رکیناں۔ زندمان ءِ راستی ھمیش اِنت کہ گوں ما بس چندے زپتین ءُ دل بُرّیں زھیر پش کپتگ ءُ لھتیں اکس ءُ یات۔ مدام کہ چمّاں کپ اَنت دل پد ءَ ھما دیوالانی ساھگ ءَ روت ءُ کنڈ بیت کہ ما سجھیں یکجاہ نشت ٹھک دات ءُ گوں کوچرائیاں سارتیں شپ پہ مسکرا ءُ کندگ روچ کت اَنت۔ چہ ھمے مُچیاں ما چیزے سنگت انگت پش کپتگ ءُ زندگیں بلے تھنا بس پہ نام زندگ ایں درچکے ءِ باتن ءَ گیمُرتگ زاھر ءَ سبزیں۔ برے ارسانی زِر ءَ بُک ورانیں ءُ برے دروگیں کندگانی ساھگ ءَ بچکندے چہ دپ ءَ در کیت اِنت, بلے دل زانت ما کُجام جاگہ ءَ کنڈیں۔ رپتگیں باز اَنت، چہ آوانی تہ ءَ دو انچیں پُل چہ مئے زند ءِ باگ ءُ بھار ءَ سندگ بوت کہ آوانی جاہ داں کیامت ھالیگ اِنت۔

آ گواڈگ زیشان ءُ داد جان ءِ دروشم ءَ اچ ما سندگ بوت اَنت، زیشو ءُ دادُل ءِ روگ ءَ چہ پد ما بس تھنا ساہ کشیں زندمان ءِ دگہ ھچ وشی یے مئے ھمراہ نہ اِنت۔ ما نزانت کہ بدواہ چو زوت مارا یکے چہ دومی ءَ سند اِیت ما نزانت کہ زند ءِ سبز تاکیں درچک چو گیمُر اِیت ءُ آئی ءِ شاھُڑ چش گُڈگ ءُ دور دیگ بنت۔ ما کدی نہ زانتگ اَت کہ وھد چہ ما اے دوئیں استالاں پُل اِیت مئے آزمان مُدامی چو تھار ءُ مج اندیم بیت۔ برے برے من کہ چماں گون آزمان ءَ سک دیان ھمے گنداں کہ منی وتی ارس منی انارکاں چہ لیٹان اَنت ءُ آزمان مُج ءُ تامور اِنت ءُ منی کُنٹ ءَ ندارگ کنگ ءَ اِنت ءُ ودار ءَ اِنت باریں مئے اے جگر بُریں زند ءُ گم جتیں ساہ کدی چہ جبین ءَ در کیت ما کدی نہ زانت مئے زندمان ءِ سبز اتگیں درچک بیرگ ءَ ھُشک ءُ ویران بیت۔

گِند ئے زندگی پد ءَ چہ ھمود ءَ بندات کنگ بوتیں چون وش اَت یار۔ گند ئے زیشو مرچی تو ءُ دادُل پد ءَ مئے دیوان ءِ بھر بوتین اِت دل ءَ گرکے جت پد ءَ ھدابادان ءِ وشیاں ساہ مان بوت ھدابادان ھما ھدابادان بوت کہ ھر نیمگ ءَ مھر اَت ءُ ھر دپ پُر ء کندگ چہ شُما پد ابیتکی یے ءَ مانشانتگ، ناں وشی یے تالان اِنت کہ ھچ مُرگے ھم پِیسکک نہ کنت۔

دریگتیں پد ءَ میتگانی تہ ءَ مئے شمئے کوکار ءُ جاکاں چہ میتگ بیزاری بوتیں۔ گند ئے پد ءَ ھر کجا لیبے بوتیں ما شما پد ءَ دست ماں دست بوتین ءُ سر بہ گپتین ایں پہ لیب۔ گند ئے پد ءَ اے گیمُرتگیں ھنکین ءِ میتگ ءُ بازاراں ما ویل بوتین ایں یار۔ بیا اِت پد ءَ ھما رمزان ءِ سارتیں شپاں کہ ما یکجاہ پوٹبال کرت سینکلانی سر ءَ ھر شپ ما چُتکان گوازی ءِ چارگ ءَ شُتیں پد ءَ واتر دیم پہ ھِدابادان اتکیں مئے سینکلانی توار ءُ مئے کوکار ءُ بچکانی مسکرایاں پنجگور ءِ دگ ءِ سر ءَ زرتگ اَت ۔ یار آ ساھت بے کِساس یات کاینت، بژن کہ آ ساھت نوں یات بوت اَنت بس ھمے گُشاں ھرجاہ ءَ اِت شات بات اِت بس مئے ودار ءَ کن اِت ھواریں۔

بس اِنت یار چِد ءُ گیش منی دستاں ھاٹیگ مان نیست کہ نبشتہ بہ کناں۔ شمئے یاری ءِ کسہ پہ نبیسگ سرجم نہ بنت، بلے ھیر من اے چاریں گالاں پہ شمئےے ارواھاں نَدر کناں۔ چہ شُما رند نوں زند انچو سما بیت کہ تھنا بس زندگ بوگی اِنت گوں شمئے یات ءُ زھیر ءُ ترانگ ءُ کھتاں تاں پد ءَ دوبر پہ شما بیا آن ءُ زندمان ءِ درچک پہ دائمی بہ سبز اِیت ءُ ھچ تبد ءُ لوار آماچ مہ بیت، شمئے ارواہ آسودگ بات اَنت یاراں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

تربت یونیورسٹی ءِ لیکچرار بالاچ بالی پاکستانی پوج ءِ دست ءَ بیگواھی ءَ پد آدینگ ءِ روچ ءَ یل کنگ بیتگ ءُ وتی گِس ءَ سر بیتگ –

آ چار شمبے ءِ بیگاہ ءَ چہ یونیورسٹی ءَ دیم پہ لوگ ءَ روگ ءِ وھد ءَ آپسر ءَ پاکستانی پوج ءَ دزگیر کنگ ءَ پد بیگواہ کتگ- زانگ بہ بیت بالاچ بالی ءِ بیگواھی ءِ ھلاپ ءَ تربت یونیورسٹی ءِ نودربر ءُ اکیڈمک اسٹاف ایسوسی ایشن ءَ یونیورسٹی ءَ روانک کش اتگ بیتگ ءُ کلاسانی بائیکاٹ کنگ ءِ ھواری ءَ دو روچ ءَ نندانک داتگ-

ھمے وڑ ءَ کیچ ھیرونک ءِ جھمنندیں نودربر شھزاد منیر پاکستانی پوج ءَ گوستگیں شپ ءَ سبزل دگ شال ءَ آوار جتگ ءُ بیگواہ کتگ-

شہزاد ءِ بیگواھی ءَ پد کھول ءَ پریس کانفرنس کنان ءَ گوشتگ شھزاد ءِ بیگواھی پدردی یے۔ شھزاد ءِ کھول ءَ ڈپٹی کمشنر کیچ بشیر احمد بڑیچ ءَ گوں گند ءُ نند کتگ ءُ آئی ءَ مات ءُ پت ءَ را سرجمیں کمک ءُ ھرچ وڑیں کوشست ءِ دلجمی داتگ۔

شہزاد ءِ مات رضیہ بی بی ءَ تربت پریس کلب ءَ پریس کانفرنس کنان ءَ گشتگ کہ آئی ءِ زھگ بے قانونی کارروائی ءَ ابید آ بیگواہ کنگ بوتگ کہ ایشی ءَ سرجمیں ھاندان زھنی جیڑگانی دیمپان انت-

آئی ءَ گْوشت کہ مئے چُک بے گناہ اِنت۔ آئی ءَ گوں ھچ وڑیں سیاسی یا ناشرکاراں گوں ھچ سیادی نیست ءُ آئی ءِ سر ءَ ھرچ وڑیں الزام جنگ نہ بوتگ۔ اے درست بے بنیاد انت –

مات رضیہ ءِ گشگ ءِ رد ءَ شھزاد ءَ وتی سیمسٹر ءِ چکاس سرجم کنگ ءَ پد دومی روچ ءَ لوگ ءَ واتر کنگی بیتگ بلے چکاساں پد ھما دمان ءَ بیگواہ کنگ بوتگ۔

مات ءَ پریس کانفرنس ءِ تہ ءَ چہ واکداراں دزبندی کتگ ءُ گشتگ کہ ما چہ سرکاری ادارہ ءُ بُرزیں واکداراں دزبندی کنیں کہ مارا انساپ بہ دے انت ءُ مئے زھگ ءَ زوت وش ءُ سلامتی یل بہ کن انت، ما لوٹیں کہ مئے زھگ مئے گور ءَ وش ءُ سلامتی ءَ سر بہ بیت۔ ھاندان ءَ گْوشتگ کہ ما ایمنی ءُ کانونی راہ ءِ سر ءَ باور کن ایں ءُ اُمیت داریں کہ واکدار شھزاد ءِ جان سلامتی ءِ واستا زوت گامگیج چست کن اَنت۔

یونیورسٹی آف تربت ءِ کمپیوٹر سائنس ءِ لیکچرار بالاچ بالی ءِ درکانودی دزگیر کنگ ءُ زورانسری ءَ بیگواہ کنگ ءِ ھلاپ ءَ کیمپس ءِ تہ ءَ زھرشانی کنگ بیتگ ءُ روانکے کشگ بیتگ۔ نودربرانی دستاں پلے کارڈ بیتگ انت کہ آھانی سر ءَ بالاچ بالی ءِ سلامتی ءَ یل کنگ ءُ زورانسری بیگواھیانی ھلاس کنگ نبشتگ بیتگ انت-

زھرشانی کنوکاں گْوشتگ بالاچ بالی نہ ایوک ءَ یک زمہ وار ءُ توانمندیں استادے بلکیں وتی وانگ ءُ زانگ ءِ ھزمتانی سوب ءَ نودربرانی تہ ءَ سک دوست بیت ۔ آھاں گشتگ کہ یک استادے ءِ اے وڑیں دزگیر کنگ ءَ چہ سرجمیں وانگ ءُ زانگ ءِ چاگرد سک باز تاوان بوتگ ءُ نودربر سکیں زھنی زور ءِ آماچ انت۔

زھرشانی کنوکاں لوٹ کرتگ کہ ھمگرنچیں واکاں بالاچ بالی ءَ یل بہ کن انت ءُ اے وئیل ءِ تچکیں پٹ ءُ پولے بہ کن اَنت۔ نودربراں گْوشتگ کہ داں مئے استاد یل نہ بیت ما وتی زھرشانی ءَ برجاہ داریں-

بلوچستان لبریشن فرنٹ ءِ اسپیشل بھرگ سدو آپریشنل بٹالین ( سوب) ءِ سرمچاراں 30 نومبر ءِ شپ ءَ کساس ھشت ءُ نوزدہ دمان ءَ چاگی ءِ دمگ نوکنڈی ءَ برگیڈ ھیڈ کوارٹر ءِ سر ءَ اُرش کتگ بُنجل ءِ تہ ءَ ساڑی سیندک ءُ ریکوڈک شوربندی ءِ دری کاردارانی کارگس ءُ نندانکجاہ کمپاؤنڈ ءَ تاں سر بیگ ءَ سوبمند بیتگ اَنت- سوب ءِ سرمچاراں کمپاؤنڈ ءَ ساڑی بازیں دری مردمانی دزگیر کنگ ءَ سوبمند بیتگ اَنت-

جارکش ءَ گوشتگ پاکستانی پوج ءَ سرمچارانی بگیری ءَ وتی بُرزی ءُ ایس ایس جی کمانڈوز، نوکیں ءُ مزنیں سلاہ کارمرز کتگ انت بلے سرمچاراں پوج ءِ ھرچ اُرش بے سوب کتگ آ پُشتکنزی ءَ لاچار کتگ اَنت- اے میان ءَ گل ءَ زورگریں پوج موہ داتگ کہ آ مئے لوٹانی سر ءَ گپ ءُ دیوان بہ کنت آیاں بہ منّ اِیت- گل اے ایر کتگیں گپ ھژدہ کلاکاں پد پاکستانی پوج ءَ تاکت کارمرزی گچین کتگ کمپاؤنڈ تچکی ءَ نشانگ کنگ بندات کتگ چریشی ءِ آسر ءَ زورگریں پوج ءُ سرمچارانی میان ءَ تُرندیں میڑ بندات بیتگ کہ سرمچارانی شھیدی ءَ پد آسر بیتگ- سدو آپریشنل بٹالین ءِ اے آپریشن ءَ دری مردمانی دزگیری ھوار 76 پوج ءِ کارندہ مرتگ ءُ شش سرمچار نمیران بیتگ اَنت-

جارکش ءَ گوشتگ سدو آپریشنل بٹالین ءَ نوکنڈی آپریشن بلوچستان آجوئی ءُ مڈیانی پھاز ھاتر ءَ بی ایل ایف ءِ دراجکشیں سلاہ بندیں گھگیری ءِ دْرچ اِنت-

آئی ءَ گوشتگ کہ آصف بلوچ پنام ءِ خالد بلوچ ء غلام جان دزپروم ءِ جھمنند اِنت آئی نوکنڈی ءَ سدو آپریشنل بٹالین آپریشن ءِ کمانی کرتگ۔ آصف 2013 ءَ بی ایل ایف ءَ ھوار بوتگ ءُ پہ کار ءَ 2024 ءَ سدو آپریشن بٹالین ( سوب ) گچین کرتگ۔ آصف بلوچ پنام خالد بلوچ جنگی ھیلکاری ءِ رپک، شوربندی ٹھینگ ءُ سلاھانی شریں وڑے ءَ کارگرگ ءَ بلد بوتگ۔ کماندار آصف بلوچ ءَ بے مٹیں بودناکی پیش داشتگ اَنت ءُ داں سی ءُ شش ادار ءَ دژمنیں پوج ءِ بگیری ءَ آپریشن برجاہ داشتگ ءُ داں گڈی دم ءَ شریں وڑے ءَ سروکی کنگ ءُ نہ ترسی ءَ جنگ دیان ءَ 2 دسمبر 2025 ءَ نمیران بیتگ۔

جارکش ءَ گوشتگ کہ عنایت ساھل پنام ءِ گھرام بلوچ ء اسحاق سولیر گچک ءِ جھمنند اِنت، اے میڑ ءَ نوکنڈی ءَ کمک کمان ءِ بستار ءَ وتی زمہ واری پیلو کرتگ اَنت۔ عنایت ساھل بلوچ 2017 ءَ بی ایل ایف ءَ ھوار بیتگ ءُ 2023 ءَ پہ وتی راجی ھزمتگاری ءَ سدو آپریشنل بٹالین ءَ بھر زرتگ۔ آئی ءَ پہ وتی آپریشن ءِ سوبین کنگ ءَ کمک کمان ءِ بستار ءَ پوجی بودناکیانی پیش دارگ ءَ جوانیں کرد پیلو کرتگ۔

جارکش ءَ گوشتگ کہ سرمچار زرینہ رفیق پنام ءِ ترانگ ماھو ء ماسٹر رفیق اھمد سنگ آباد ءِ جھمنند اِنت ءُ 2022 ءَ بی ایل ایف ءَ ھوار بوتگ ءُ 2024 ءَ پہ وتی راجی ھزمتگاری ءَ سدو آپریشنل بٹالین گچین کرتگ ءُ اے گھتریں کاروائی ءِ بھر بوتگ ءُ بی ایل ایف ءِ بنداتی جندندری زالبولیں سرمچار بوتگ۔ سرمچار بانک زرینہ بلوچ ءَ نوکنڈی ءَ برگیڈ ھیڈکوارٹر ءِ مزنیں بیریئرز ءَ پدائی کرتگ ءُ بیریئرز پروشتگ ءُ پہ وتن ندر بیتگ ءُ وتی سرمچاریں سنگت برگیڈ ھیڈ کوارٹر ءَ پترینگ ءُ ریکوڈک ءُ سیندک شوربندی ءِ دری نوکرانی کمپاؤنڈ ءَ سر کنگ ءِ راہ پچ کرتگ۔

آئی ءَ گوشتگ کہ نبیل احمد پنام ءِ استاد عادل بلوچ ء ھاجی محمد اسحاق پَنجگُور، سند ءِ سر ایسائی ءِ جھمنند اِنت 2020 ءَ بلوچ راجی زرمبشت ءَ ھوار بوتگ ءُ 2024 ءَ پہ وتی جنگی پرز ءَ سدو آپریشنل بٹالین گچین کرتگ۔ نبیل احمد پنام ءِ استاد عادل نوکنڈی ءَ گوں نہ ترسی ءُ پوجی بودناکی جوانیں وڑے ءَ پیش کرتگ اَنت ءُ دژمنیں پوج تاوان داتگ ءُ 2 دسمبر ءَ شھید بوتگ۔

جارکش ءَ گوشتگ کہ میر جان پنام ءِ جانان بلوچ ء محمد رحیم بلوچ ھسن آباد مسکانی کلات ھاران ءِ جھمنند اِنت 2024 ءَ بی ایل ایف ءَ ھوار بیتگ ءُ پہ وتی راجی پوجی کاراں 2025 ءَ سدو آپریشنل بٹالین گچین کرتگ۔ میرجان میرل پنام ءِ جانان بلوچ گوں توکل ءُ نہ ترسی ءَ وتی سرمچاریں سنگتانی ھمراھی ءَ نوکنڈی ءَ دژمنیں پوج تاوان داتگ ءُ شھید بوتگ۔

جارکش ءَ گوشتگ کہ غلام جان پنام ءِ استال بلوچ ء فیض محمد بلیدہ میناز ءِ جھمنند اِنت پروری 2024 ءَ بی ایل ایف ءَ ھوار بوتگ ءُ پہ راجی وشھالیں بانداتے ءَ 2025 ءَ سدو آپریشنل بٹالین گچین کرتگ۔ آ گوں سرمچاریں ھمبلاں نوکنڈی ءَ سدو آپریشن بٹالین ءِ بنداتی سوبمندیں کاروائی ءِ بھر بوتگ ءُ دژمن ءِ بگیری ءَ گوں نہ ترسی ءُ پوجی بودناکیاں مڑ اتگ ءُ شھید بوتگ۔

میجر گھرام بلوچ ءَ گوشتگ کہ بی ایل ایف نوکنڈی برگیڈ ھیڈکوارٹر ءَ سیندک ءُ ریکوڈک ءِ وڑیں نوک آبادکاری لٹ ءُ پلی شوربندیاں دری نوکرانی کارگس ءُ گسانی کمپاؤنڈ ءَ نمیران بیتگیں سرمچاراں ستک شانی ندر کنت ءُ ھمے کھول ءَ کن ایں داں بلوچستان ءِ آجوئی ءَ زورگریں پوج ءِ ھلاپ ءَ وتی کاروائیاں برجاہ دار ایں۔ ما درسیں دری باپاریاں گوشگ لوٹ ایں کہ بلوچستان ءَ باپاری کنگ ءِ ھک تھنا بلوچ ءِ اِنت ءُ ایشی زورگریں ریاست نہ تھنا گوں بلوچستان ءِ آجوئی ءَ کنگ بیت۔

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گوشتگ کہ دو جتاجتائیں اُرشاں زورگریں پاکستانی پوج نشانگ کتگ ءُ جانی تاوان ءِ دیمپانی کتگ-

جارکش ءَ گوشتگ کہ بی ایل اے ءِ سرمچاراں گوستگیں روچ ءَ کیچ ءِ دمگ ھوشاپ ءَ زورگریں پاکستانی لشکر ءِ بُنجاھی بُنجل راکٹ ءُ دگہ سلاھاں چہ نشانگ کتگ – راکٹ لگگ ءَ چہ زورگریں پوج ءِ یک پھازوکی سنگرے تباہ بیتگ- اُرش ءَ زورگریں پوج ءِ دو کارندہ کشتگ ءُ بازین ئِے ٹپی کتگ-

جارکش ءَ گوشتگ بلوچ لبریشن آرمی ءِ سرمچاراں گوستگیں شپ ءَ ھاران ءِ دمگ لجے ءَ شوآپ ءِ ھند سر ءَ زورگریں پاکستانی پوج ءِ کارندھاں وتکاریں سلاھاں چہ نشانگ کتگ- اُرش ءَ زورگریں پوج ءِ سے کارندہ جاہ پہ جاھی مرتگ ءُ کم چہ کم سے گیش ٹپی بیتگ اَنت-

جارکش ءَ گوشتگ بلوچ لبریشن آرمی اے اُرشانی زمہ واری ءَ منّ اِیت-

بلوچستان ءِ جتاجتائیں دمگاں پنچ بیگواھیں مردمانی لاش دزکپتگ اَنت ءُ دو مردم بیگواہ کنگ بیتگ اَنت-

گیشیں ھالانی رِد ءَ پاکستان ءِ بُنجاھی شھر اسلام آباد ءَ پولیس ءَ زورانسری بیگواھیں نودربر سعید بلوچ ءِ برات اعظم بلوچ ءُ نودربر مجید بلوچ دزگیر کتگ اَنت-

گیشیں ھالانی رِد ءَ اے وئیل ڈسٹرکٹ کورٹ ، G-11 جوڈیشل کمپلیکس ءِ دیم ءَ بیتگ، اود ءَ اسلام آباد پولیس ءَ سعید بلوچ ءِ برات اعظم بلوچ ءُ بلوچ اسٹوڈنٹس کونسل اسلام آباد ءِ باسک مجید بلوچ زورانسری آوار جتگ-

بلوچ اسٹوڈنٹس کونسل ءَ گوشتگ کہ اے درکانودی دزگیری وکیل ءُ اِھوالکارانی ساڑی بیگ ءَ بیتگ، بلے پولیس ءَ ھچ وڑیں سبب نہ گوشتگ نانکہ ایف آئی آر پیش داشتگ ءُ نانکہ دگہ کانودی سرپدی داتگ-

جارکش ءَ گوشتگ کہ ما اے ریاستی تاکت ءِ کارمرز کنگ ءَ گوں تُرندی ءَ ایر جن ایں – اے وڑیں گامگیج ناں تھنا درکانودی بلکیں ھرچ شھری ءِ جمھوری ھکانی سر ءَ تچکی ءَ اُرش اِنت- واکدار توری زوراک ءُ بیھاراں چہ ایرموش کنگ جُھد اِنت، بلے اے وڑیں کار تھنا اشانی اھتساب ءِ تُرس ءَ پدر کنت-

بلوچ اسٹوڈنٹس کونسل ءَ دیمتر ءَ گوشتگ ما اعظم بلوچ ءُ مجید بلوچ ءِ زوت یل کنائینگ ءِ لوٹ ءَ کن ایں ءُ زور دے ایں کہ اے درکانودی گامگیج ءِ زمہ واراں آمیدگس ءَ بیار اَنت-

ھمے وڑ بیگواھیں مردمانی لاشانی دور دیگ دْرچ ھم یکشل ءَ برجاہ ءَ اِنت-

گیشیں ھالانی رِد ءَ پنجگور ءِ تھسیل پروم ءِ دمگ چہ پُل آباد ءَ یک مردمے ءِ ٹپ ءُ ٹوریں لاش دزکپتگ-

اِھوالکار رِد ءَ لاش ءِ پجّار عبدالوھاب ء محمد عمر نام ءَ چہ بیتگ کہ تربت ءِ دمگ زامران ءَ جھمنندے-

عبدالوھاب بیست ھپت اکتوبر 2025 ءَ ھکومتی پلامرزی سلاہ بندیں ٹولی ڈیتھ اسکواڈ ءِ باسکاں آوار جتگ –

دمگی اِھوالکار ءَ گوشتگ کہ آوار جنی ءِ وھد ءَ تیر جتگ کہ آئی ءِ پاد لنگ بیتگ – یک ماھے ءَ تاں بیگواھی ءَ پد مروچی آئی ءِ لاش چہ پُل آباد ءَ دزکپتگ-

اشی ءَ اَبید خالق آباد ءِ بدرنگ ھند ءَ چہ سے مردم ءِ لاش دزکپتگ اَنت-

پولیس ءَ ھال سر بیگ ءَ دمگی نادُراھجاہ ءَ برتگ اَنت، اود ءَ آیانی کسگاں دزکپتگیں پجّار کارڈاں چہ آیانی پجّار خدابخش جھمنند جوھان، ظھور احمد جھمنند خالق آباد، برکت خان جھمنند کشان نام ءَ چہ بیتگ اَنت-

اِھوالکار ءِ رِد ءَ سئینانی سیادی لھڑی ٹک ءَ چہ ءَ اِنت ءُ وت ماں وت ناکوزتک گوشگ بیگ ءَ اَنت- پولیس ءَ وئیل گیش پٹ ءُ پول کنگ ءَ اِنت-

ھمے وڑ ھزدار ءِ تھسیل زھری ءَ فٹبال گراؤنڈ نزیک ءَ دگ کش ءَ چہ یک ورنایے ءِ لاش دزکپتگ-

بنداتی ھالانی رِد ءَ ورنا ءَ تیرگواری کنگ ءُ کُشگ بیتگ-

کُشگ بیتگین ءِ پجّار شاہ زیب ء محمد اسلم، ٹک ملازئی ءِ نام ءَ چہ بیتگ اَنت- آ تھسیل زھری ءِ دمگ صادق آباد زھری سٹی ءِ جھمنند بیتگ- لاش ءِ پجّار ءُ گیشیں کاروائی ءِ واستا نادُراھجاہ ءَ برگ بیتگ-

کیچ ءِ دمگ شاہی تمپ تربت ءِ جھمنندیں ورنا ساجد اھمد ءِ زورانسری آوارجنی بگیریءَ آئی ءِ کھول ءَ مروچی ماں تربت پریس کلب ءَ گوں اھوالکاراں تران کتگ ءُ یل کنگ ءِ لوٹ کتگ ۔ کھول ءِ رد ءَ ساجد اھمد یک وانندھیں ورنا ، اسکالر ءُ بلوچی لبزانت ءَ بندوکیں مردمے بوتگ کہ گوستگیں چار روچ ایں بیگواہ انت ءُ آئی ءِ درگت ءَ تنی وھدی ھچ وڈیں سرپدی دیگ بوگ ءَ نہ انت ۔

کھول ءِ رد ءَ 30 نومبر ءَ ساجد اھمد ء اھمد چہ پنجگور ءِ دمگ گوارگو ءَ آوار جنگ بوتگ چار روچانی گوزگ ءَ ابید ناکہ آئی ءِ ھال ءُ بودے ھست ءُ ناکہ جانسلامتی ءِ سرپدی ئے ۔ کھول ءِ رد ءَ آ سک باز مجگی ازیت ءِ آماچ انت ۔

کھول ءَ گوں اھوالکاراں تران کنان ءَ پدردی درشانتگ ءُ گوشتگ کہ چاگردی ترامجاھاں بازیں فیک آئی ڈی ساجد ءِ بگیری ءَ وتگڑیں ءُ دروگیں پروپگنڈہ کنگ ءَ انت ءُ آئی ءَ ناشرکار ءِ زاھر کنگ ءِ جھد ءَ انت کہ اشی ءَ ما ترندی ءَ گوں ایرجن ایں ۔

کھول ءَ کیچ ءِ دمگی واکدار ، کانود جوڈ کنوکیں ادارہ ءُ سرکاری نمائندگاں چہ لوٹ کتگ کہ ساجد بلوچ زوت یل کنگ بہ بیت ءُ آئی ءِ آوار جنی ءِ راستی مھلوک ءِ دیم ءَ آرگ بہ بنت ۔

کھول ءَ گوشتگ کہ آ انساپ ، راستیں پٹ ءُ پول ءُ ساجد اھمد یل کنگ ءِ وداری ءِ انت ۔

ساجو تو ھم

نبشتہ کار : نادیہ بلوچ

دی بلوچستان پوسٹ

بے تواری من ءَ چو مارا ڈنگ جَنگ ءَ اِنت اے تھاریں کوٹی سنگتے ءِ بچکندگانی توار اَنت گوشاں جانگلینگ ءَ اِنت اَنچو سما بوگ ءَ اِنت من کرّ باں اے توار پجّاروکے ءِ توار اِنت بلے آئی ءِ جند اِد ءَ نہ اِنت. من امینچو جُھد کنگ ءَ آں کہ تئی گاری ءَ نارملیں گاری یے بہ زوراں بلے دو روچ گوست تئی گاری نارمل بوگ ءَ نہ اِنت تئی گاری ءَ من آ دگہ بلوچانی پیم ءَ پراموش کُت نہ کنگءَ آں. زورانسری بیگواه بوتگیں بلوچ بے کساس اَنت بلے تئی بیگواھی جُتائیں بیگواھی یے من زانتگ اَت تئی زمین شیدائی ترا تھاریں کوٹیاں بارت ءُ من ترا گُشتگ اَت ھم کہ ساجو تئی چو سیاست ءَ بَلد بوگ ءُ لبزانک ءَ سیادی کنگ ترا دروہ اِیت بلے تو ھِچ نہ گُشت ءُ تھنا بچکند اِت-

ترا وتی توسیپ بھ دوست نہ بوت تو مُدام گُشت بازیں توسیپ انسان ءَ نادُراہ کنت آئی ءَ کار کنگ ءَ نیل اِیت من مُدام گُشت تئی جُھد ستا کرز اِیت بلے تو اِت ئے کہ وتی زندگی ءَ چہ مُتمئن نہ اِت ئے ترا اے زندگی‌ پہ زندگی‌ کنگ ءَ دوست نہ بوگ ءَ اَت سجّھیں شپ تو بے وابی چہ کتابانی وانگ ءَ گوازینتگ اَنت ءُ انگت تو جُست گِپت کہ من ءَ گیشیں بلوچی گدارانی نام ءَ بہ گُش من لھتیں کتابانی‌ نام دیم دات ءُ آوانی تھ ءَ من ترا کاپکا ءِ کتاب میٹامارپاسز سجسٹ کُت کہ سر زاھد آسکانی ءِ رجانک کُتگیں کتاب اِنت تو من ءَ گیش سر زاھد ءِ درگت ءَ ھم گُشت ءُ پد ءَ تو ھم منی سر ءَ کاپکا ءِ دگہ آزمانکے دیم دات کہ من ءَ تنیگتی اے آزمانک دوست اِنت the hunger artist.

لھتیں روچاں پد تو میٹامورپوسز ءِ چمشانک ءِ داتگ اَت وتی Facebook ءَ ماں بلوچی ءَ من کمّے بژنیگ ھم بیتاں کہ من میٹامورپوسز بلوچی ءُ انگریزی دوئیں زباناں ونتگ اَت بلے کسانیں چمشانکے ھم نبشتہ نہ کُت تو وتی ھمے کاراں چہ مردُم جیڑگ پرمات اَنت من ترا لھتیں انگریزی کتابانی نام ھم داتگ اَت کہ بہ وان اِش بلے تو ھمے گُشت کہ مئے کِرّ ءَ اِینچو وھد نیست کہ ما دری زبانانی کتاباں بہ وانیں شرتِر ھمش اِنت ما بلوچی بہ وانیں ءُ گیشتر بلوچی‌ بہ پھمیں یار تئی گوں بلوچی ءَ دگہ دابے مھرے اَت کہ مردُماں تئی چمّانی تہ ءَ مار اِت تو ھمے چاگرد ءِ واستہ بے واب اِت ئے ونت، وانینت ءُ نبشتہ کُت تئی پیمیں مردُمے بائد اِنت آوار جَنگ مہ بوتیں بلے یار آواں چہ تئی کِرّ ءَ بیم اَتک تئی ھستانک پہ آواں threat ءِ اَت تئی کلم ءَ زور مان اَت کہ ترا تھاریں کوٹیاں سر اِش کُت. بلے کسانیں وھدے ءَ تو باز کُت ءُ تو اے ھم زانتگ اَت کہ تو آوار جنگ بہ ئے پمیشکا تو مُدام گُشت مئے کر ءَ وھد نیست.

تو من ءَ رجانکاری ءَ گُشتگ اَت من گُشت اے کار کِشت ءُ کشاری ءَ چہ ھم گِرانتر اِنت تو گوشت کہ یک رندے بنا بہ کن رند ءَ آدت بہ ئے بلے گوں من نہ بوت. سنگت اے کار من نیم راہ ءَ یل دات بلے تو اِت ئے کہ ھِچ کار نیم راه ءَ یل نہ دات ھمُک کار تو چو بانوری ءَ سمبھینت ءُ گُڈ سری ءَ سر کُت بلے تئی کتاب نویسگ ءِ واھگ کُجا سر بوت ؟

من سھیگ نہ آں تو وتی کتاب ءِ نویسگ سرجم کُت اگاں اِناں آ دگہ وابانی پیم ءَ اے واب ھم زدگ بوت؟

گُڈ سر ءَ من زاناں تو ھر کُجا ئے الّم واتر کن ئے ترا نیم راه ءَ کارانی یل کنگ دوست نہ بیت تو الّم کا ئے وتی پشت ءَ کپتگیں کاراں سرجم کن ئے ءُ شوکیں دروشُمے ءَ مردُمانی دیم ءَ کار ئے من ءَ سِتک اِنت کہ زالمانی دیم ءَ تو چو سیاجی ءَ مُھکم ءُ دلیر ئے۔

“پُل چہ کُننگاں تالان ءُ جِتا بُوّان اَنت”
“گوشت ءُ ناکُن و ت ءَ سندان ءُ جِتا بُوّان اَنت”

خان صابر

تئی سوگات کُتگیں کتاب ءِ تہ ءِ کشّ اِتگیں دو گال۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-