بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت، دو مئی 2026 ءَ جتاجتائیں دمگاں چہ دگہ سے مردم پاکستانی پوج ءَ آوار جتگ ءُ بیگواہ کتگ اَنت-
گیشیں ھالانی رِد ءَ 27 سالی ئیں الطاف حسین بلوچ ء الٰھی بخش دو مئی ءِ شپ کساس دو ءَ چہ حب چوکی ءَ پوج ءَ آوار جتگ – اِھوالکار ءِ رِد ءَ آ آئی ایس آئی ، سی ٹی ڈی ءُ ڈیتھ اسکواڈ ءَ چہ ھمگرنچیں کارندھاں چست کتگ- آئی ءِ بُنکی ھنکین آواران ءِ دمگ چہ گشکور ءَ اِنت وھدے کہ آ ھب چوکی ءَ جھمنند اِنت-
دومی وئیل شال ءِ دمگ ھزار گنجی ءَ بیتگ، اود ءَ چل سالی ئیں جان خان ء شیر خان دو مئی ءِ بیگاہ ءِ چار ءَ آئی ءِ لوگ چہ مری بُنجل ءَ بیگواہ- کھول ءِ گوشگ اِنت کہ آ سی ٹی ڈی کارندھاں آوار جتگ ،چریشی ءَ پد آئی ءِ درگت ءَ ھچ وڑیں ھال نیست-
ھمے میان ءَ بیست سالی ئیں عبدالستار ء جان خان ھم ھمے ھند ،مری بُنجل چہ ھزار گنجی ءَ بیگاہ ءِ چار ءَ آوار جتگ- آ یک ھوٹلے ءِ کاردارے – کھول ءِ رِد ءَ دوئیں یکیں وھد ءَ چہ لوگ ءَ چست کتگ اَنت ءُ چریشی ءَ ھچ وڑیں ھال نیست-