TBP Balochi

بلوچستان ءِ دمگ اورناچ ءُ قلات ءَ چہ بمب تراکاں پاکستانی لشکر ءَ تاوان رس اتگ۔

خضدار ءِ دمگ اورناچ ءَ آر سی ڈی ءِ مزن شھدگ ءِ سر ءَ ناشناسیں مردمانی نیمگ ءَ بمبتراکے ءَ پاکستانی لشکر ءِ گاڑی نشانگ جوڑ کنگ بوتگ۔

گوستگیں روچ ءَ قلات ءِ دمگ چپر ءَ پاکستانی لشکر ھما وھد ءَ تراک ءِ تہ ءَ نشانگ جوڑ کنگ بوتگ کہ آ آپریشن ءِ واستا دمگ ءَ دیم ءَ روگ ءَ بوتگ اَنت۔ دمگی مردمانی رد ءَ اے تراک ءَ چہ لشکر ءَ تاوان رس اتگ۔

تراک ءَ چہ پد دمگ ءَ سلاہ بندیں جنگ ءُ چوپ بوتگ کہ اود ء پاکستانی لشکر ءَ ھوار دو بلوچ آجوئی لوٹوکیں مردم بیران بوگ ءِ ھال اِنت۔

واکداراں انگت ءَ اے وئیلانی بابت ءَ ھچ وڑیں ھال ءُ اھوال شنگ نہ کتگ۔

دمگی اھوالکارانی رد ءَ پنجگور ءَ زورانسری آوار جنگ بوتگیں مردمانی کھول ءِ سرا زور دیگ بوگ انت ۔ آیانی رد ءَ پاکستانی پوج ءَ دو برات زورانسری آوار جتگ ءُ بیگواہ کتگ انت کھول ءِ زالبولانی سرا زور دیگ بوگ ءَ انت کہ آ سیاسی لیکہ ءِ سر ء وتی گپ ءَ بہ جن انت ءُ پریس کانپرنس بہ کن انت ۔

ھالانی رد ءَ شش مئی ءَ پنجگور ءِ دمگ ھدابادان مواچ ءَ پاکستانی پوج ءَ دو برات توحید ءُ ابوبکر ء محمد صدیق زورانسری آوار جتگ ءُ بیگواہ کتگ انت کہ آیانی درگت ءَ ھچ وڑیں ھال ءُ بودے نیست ۔

ھالانی رد ءَ توحید زورانسری آوار جنگ بوتگیں ظہیر ءِ زامات ایں وھدیکہ آئی ءِ لوگبانک آدیبہ ظہیر ، بلوچ یکجھتی کمیٹی ءِ باسک ءِ زانگ بیت ۔

دمگی اھوالکارانی رد ءَ ھردو براتانی زورانسری آوار پد آدیبہ ظہیر ءِ سر ء زور دیگ بوگ ءَ انت کہ بلوچ یکجھتی کمیٹی ءِ بگیری ءَ درشان بہ دنت ءُ گل ءَ دزکش بہ بیت ۔ اھوالکار ءِ رد ءَ ھمے شرت ایر کنگ بوتگ کہ چریشی ءَ پد آئی ءِ لوگواجہ ءُ وسرک یل کنگ بنت ۔

ھمے گوشگ بوگ ءَ انت زور دیگ ءَ پد آدیبہ ظہیر ءَ گوستگیں روچ ءَ پریس کانفرنس ھم کتگ ، بلے پد ءَ ھم واکدارانی نیمگ ءَ اے درگت ءَ ھچ وڑیں گپ تنی وھدی دیم ءَ نہ اتکگ ۔

اے وئیل یک ھنچیں کھول ئے گوم ءَ بوتگ کہ آئی ءَ دھک ءِ بیت کہ ھمے زوراکیانی دیمپان انت. آدیبہ ءِ پت 13 اپریل 2015 ءَ پاکستانی پوج ءَ چہ ھب چوکی ءَ آوار جتگ ءُ بیگواہ کتگ کہ ھما انت بیگواہ انت ۔

ھمے کھول ءِ یک دگہ مردمے زیشان ظہیر کہ 29 جون 2025 ءَ گرمکان فٹبال گوازی پٹ ءَ روچ ءُ رھمانی آوار جتگ کہ دومی روچ ءَ آئی ءِ ژانگولیں جون دست کپتگ ۔ کھول ءَ ھمے گوشتگ کہ آ آوارجنی ءَ پد کشگ بوتگ ۔

بلوچستان لبریشن فرنٹ ءِ جارکش میجر گْوھرام بلوچ ءَ وتی شنگ کتگیں درشان ءِ تہ ءَ گوشتگ کہ بی ایل ایف ءِ سرمچار 4 مئی 2026 ءَ واشک ءَ تر ءُ گردے ءَ بوتگ اَنت کہ اناگاہ ءَ گوں زورگریں پوج ءَ دیم پہ دیم بیتگ اَنت سرمچاراں زوت گوں چیرجنگی شوربندیانی رد ءَ وت ءَ بھر کتگ ءُ دژمن ءِ سر ءَ اُرش کتگ۔ سرمچارانی اُرشانی آسر ءَ سے دژمنیں پوجی مرتگ ءُ باز ٹپی بیتگ اَنت-

جارکش ءَ گوشتگ کہ جنگ ءُ چوپ ءِ میان ءَ گل ءِ یک سرمچارے ٹپی بیتگ۔پد ءَ ھم آئی گوں جوانمردی ءَ گوں دژمنَ جنگ برجاہ داشتگ۔ دو سرمچاراں وتی سنگر گوں مھکمی ءَ داشتگ اَنت ءُ دژمن ءِ دیم داشتگ ءُ دیم ءَ آیگ ءَ نہ اشتگ اَنت ءُ آ دگہ سرمچار چہ انگیر ءَ در بہ کپ اَنت۔ چہ آیانی اے نہ ترسی شوربندی ءَ آ دگہ سرجمیں سرمچار پہ سلامتی وتی مھکمیں اوتاک ءَ روگ ءَ سوبین بیتگ اَنت۔ دوئیں سرمچاراں داں گڈی تیر ءَ گوں دژمن ءَ جنگ داتگ ءُ شھید بیتگ اَنت۔

جارکش ءَ گوشتگ کہ چہ نمیران بیتگیں سرمچاراں شھید کپٹن مختیار بلوچ پنّام ءِ پیرک بلوچ مشکے ءِ میتگ کلر ءِ جھمنند اِنت۔ آ یک وانندھے ءُ لیکھی ورنایے اَت، آ چہ کسان امری ءَ 2012 ءَ بی ایل ایف ءَ ھوار بیگ ءُ وتی جھد بندات کتگ۔ آ چہ کسانی امری ءِ سوب ءَ تچک ءَ پرکاریاں ھوار نہ بیتگ، آئی اے میان ءَ وتی وانگ برجاہ داشتگ ءُ بلوچستان یونیورسٹی ءَ سوشیالوجی ءَ بی ایس ءِ ڈگری گرگ ءَ پد 2021 ءَ کوہ ءَ شتگ ءُ وتی پُرکاری برجاہ داشتگ اَنت۔ آ چہ وتی جنگی بودناکی ءُ گل ءِ راھبندانی پاسداری ءِ سوب ءَ زوت رکشان دمگ ءِ اوتاک کمان گچین کنگ بیتگ۔ آئی ءَ نہ تھنا مشکے، آواران ءُ واشک ءَ سوبمندیں اُرشاں جنگ مڑ اتگ بلکیں یک شریں ھیلکاری ءِ رد ءَ سرمچارانی جانی ءُ لیکھی ھیلکاری ءَ جوانیں کرد پیلو کتگ۔ آئی ءِ کھول ءَ پہ آجوئی زرمبشت ءَ درزنے ءَ گیش جانانی دیمونی داتگ کہ پہ بلوچ راج ءَ پھر ءُ پہ سرمچاراں مادنیں کشکے اِنت۔

جارکش ءَ گوشتگ کہ شھید غریب شاہ پنام عرفان بلوچ ء ناصر بلوچ مشکے ءِ گزی ءِ جھمنند اِنت، مئی 2024 ءَ پہ بلوچ راجی باندات ءُ سرڈگار ءِ آجوئی ءَ چہ بی ایل ایف ءِ راھبند ءَ وتی جھد بندات کتگ۔ آئی ءَ کسانیں وھدے ءَ چہ وتی بودناکی ءُ پرز شناسی ءَ وت ءَ یک جوانیں سرمچارے پیش داشتگ۔آئی مشکے ءُ جھاؤ ءِ جتاجتائیں جنگاں بھر زرتگ ءُ اوتاک ءَ وتی زمہ واری شریں وڑے ءَ پیلو کتگ اَنت۔ 4 مئی 2026 ءَ واشک ءَ گوں دژمنیں پوج ءَ نہ ترسی ءَ جنگ داتگ ءُ گوں وتی سنگت کمانڈار کیپٹن پیرک بلوچ ءَ ھوار شھید بیتگ۔

جارکش میجر گْوھرام بلوچ ءَ درشان ءِ گڈی ءَ گوشتگ کہ بی ایل ایف وتی اے گرانکدریں شھیداں راجی جھد ءُ بے مٹیں دیمونیاں سھرچکیں دروت ندر کنت۔ گل ھمے کول ءَ کنت کہ شھیدانی ھوناں زوال بوگ ءَ نیل ایت۔ دژمن اے گپ ءَ نہ زانت کہ سرمچارانی شھیدی مئے نزوری نہ اِنت بلکیں مئے توانمندی اِنت، اے زرمبشت ءَ گیشتر توانمند کنت۔ ما وتی شھیدیانی رندگیری ءَ کن این ءُ زورگریں ریاست ءِ بگیری ءَ وتی گھگیری ءَ گیشتر تیز کن ایں۔

کیچ ءِ دمگ دشت ءَ پاکستانی پوج ءَ بیڑبرتگ ءُ یک ورنایے آوار جتگ-

اھوالانی ءِ رد ءَ گوستگیں شپ ءِ ساھت یک ءَ پاکستانی پوج ءَ دشت ءِ دمگ کنچتی ءَ لوگانی سر ءَ بیڑبرتگ ءُ یک ورنایے آوار جتگ-

آوار جنگ بیتگیں ورنا ءِ پجّار عمر ء مجید جھمنند کنچتی دشت ءِ نام ءَ بوتگ-

دمگی مردمانی رد ءَ ھمے میان ءَ پاکستانی پوج ءَ موبائل زر ءُ دگہ گرانبھائیں سامان برتگ اَنت ءُ چُک ءُ جنین لَٹ ءُ کٹ کتگ اَنت-

چریشی ءَ پد آئی ءِ درگت ءَ ھچ وڑیں ھال نیست-

زانگ بہ بیت بلوچستان ءِ جتا جتائیں جاھاں پاکستانی پوج ءُ چیریں ادارھانی دست ءَ بلوچ مھلوک ءِ آوار جنگ ءُ بیگواہ کنگ ءِ درچ یکشل ءَ برجاہ انت ءُ چریشی ءَ بلوچستان ءَ بندوکیں سیاسی ءُ انسانی ھکانی گل یکشل ءَ اے وئیلانی ھلاپ ءَ توار چِست کنگ ءَ انت-

گوادر ءِ تیابدپی دمگ جیونی ءَ پاکستان کوسٹ گارڈز ءِ گشت ءِ ٹیم ءِ سر ءَ ناشناسیں سلاہ بندیں مردمانی اُرش ءَ دو کارندہ بیران بوتگ اَنت۔

واکدارانی رد ءَ اے وئیل آدینگ ءِ بیگاہ ءَ دریائی سیمسر ءِ نزیک ءَ بوتگ کہ اود ءَ کارندہ ھمک روچی ڈول ءَ گشت ءِ سر ءَ بوتگ اَنت۔

دمگی مردمانی رد ءَ اے اُرش جیونی ءِ ”مچین کاپر“ ءِ نزیک ءَ بوتگ۔ چمدیستگینانی گشگ انت کہ ارش کنوک نزیک ءَ اتکگ بوتگ انت ءُ کارندھانی سر ءَ تیرگواری اش کتگ۔ تیرگواری ءِ آسر ءَ دو کارندہ جاہ ءَ بیران بوتگ اَنت۔

دمگی مردمانی گشگ انت کہ ارش کنوک اُرش ءَ پد شُتگ انت۔

انگت ءَ ھچ گل ءَ اے اُرش ءِ زمہ واری نہ زرتگ۔

نوشکی ءَ سلاہ بندیں مردمانی تیرگواری ءَ اسکول ءِ استاد ءَ ھوار دو مردم بیران بوتگ انت ۔

کلی جمالدینی ءَ گورنمنٹ بوائز ھائی اسکول ءِ لائبریری ءِ نزیک ءَ سلاہ بندیں مردماں تیرگواری کتگ کہ ایشی ءِ آسر ءَ حق نواز جمالدینی جاہ ءَ بیران بوتگ ءُ اسکول ءِ استاد محمد اکرم جمالدینی سک ٹپی بوتگ ءُ نادراھجاہ ءَ سر کنگ بوتگ بلے آئی ءَ وتی ٹپانی سبب ءَ بیران بوتگ۔

پولیس ءِ رد ءَ وئیل ءِ مول ءُ مراد انگت ءَ زانگ نہ بوتگ انت بلے اے درگت ءَ گیشیں پٹ ءُ پول برجاہ انت ۔

امریکہ ءِ پوج ءِ واکداراں ڈیھ ءِ این بی سی نیٹ ورک ءَ گوں تران کنان ءَ گْوشتگ کہ آیاں قشم ءُ بندر عباس ءَ دو جاگہ ​​ءَ اُرش کتگ بلے اے پھریزی کارروائی یے ءُ ایشی ءِ بزانت ایران ءَ گوں جنگ پد ءَ بندات کنگ نہ اِنت۔

این بی سی نیوز ءَ پنٹاگون ءِ کارندھانی درور دیان ءَ اژدری ٹپاسی رپورٹے ءِ تہ ءَ گشتگ کہ امریکہ ءِ جھازاں ایران ءِ اُرشانی پسو ءَ کارروائی کتگ۔

ایران ءِ گشگ اِنت کہ آئی ءَ ھما وھد ءَ کارروائی کتگ کہ امریکہ ءِ لشکر ءَ آئی ءِ یک ٹینکرے ءِ گرگ ءِ جھد کتگ۔

خاتم الانبیاء بنجاھی کارگس کہ ایران ءِ جنگ ءِ زمہ وار اِنت، گوشتگ کہ ایرانی فوجی لشکر ءَ امریکہ ءِ اُرشانی پسو داتگ: ‘ایرانی سلاہ بندیں لشکر ءَ زوت ءُ بدلی ءِ رد ءَ آبنائے ھرمز ءِ روکپت ءَ ءُ چابهار بندر ءِ زربار ءَ امریکہ فوجی جھازانی سر ءَ اُرش کتگ ءُ آھاں تاوان داتگ’۔

ایرانی رسانکدر ءَ امریکی جھازانی سر ءَ تیرگواری ءِ ساھت ءِ ویڈیو شنگ کتگغ

آدینگ ءِ روچ ءَ سھب ءَ ایرانی ھال رسانکی ادارہ فارس ءُ تسنیم ءَ گارڈ انقلابی ءِ نیمگ ءَ میزائلانی آس دیگ ءِ ساھت ءِ ویڈیو شنگ کتگ کہ آھانی گشگ اِنت کہ آ آبنائے ہرمز ءُ قشم ءُ بندر عباس ءِ کش ءُ گوراں امریکہ جھازانی سر ءَ آس دیگ بوتگ اَنت۔

بی بی سی ءَ اے تامر ءُ آئی ءَ پیشدارگ بیتگیں اکسانی راستی راستیں رمس ءِ پٹگ پدر نہ بیتگ بلے سینٹ کام ءَ ٹاہ داتگ کہ اے جنگ ءَ ھواریں سئیں جھازاں گچ وڑیں تاوان نہ بوتگ۔

شال ءُ بارکھان ءَ زورانسری آوار جنی دگہ وئیل رپورٹ بیتگ اَنت-

ھالانی رِد ءَ شش مئی 2026 ءِ شپ ءَ کساس یک ءَ شال ءِ دمگ ایئرپورٹ دگ سر ءَ بیڑانی میان ءَ پانزدہ سالی سرفراز بلوچ ء محمد خان ءُ پانزدہ سالی ئیں ریحان بلوچ ء سلطان بلوچ آئی ءِ لوگ ءَ پاکستانی پوج ءَ آوار جتگ ءُ ناشناسیں جاھے ءَ برتگ-

ھمے وڑ دوازدہ اپریل 2027 ءَ بیست یک سالی ئیں نودربر معیب اللہ ء عبدالباقی چہ منیر احمد، شال ءَ سی ٹی ڈی کارندھاں آوار جتگ، معیب اللہ ءِ سیادی کردگاپ، مستونگ ءَ اِنت آ تنی وھدے بیگواہ ءَ اِنت-

دومی نیمگ ءَ سے مئی 2026 ءَ بارکھان ءَ شپ ءِ یک ءَ چل یک سالی ئیں غلام رسول ء حاجی نظام الدین، کہ یک ریٹائرڈ نادرا افسر، ءُ چل ھپت سالی ئیں عبداللہ جان ء حاجی نظام الدین آئی ءِ لوگ ءَ چہ آوار جتگ- کھول ءِ رِد ءَ دوئیں سی ٹی ڈی کارندھاں وتی ھمراھی ءَ برتگ اَنت، بلے آیانی درگت ءَ ھچ وڑیں ھال دیم ءَ نیتکگ-

ھمے وڑ شال ءَ زورانسری بیگواہ بیتگیں مردم یل کنگ بیتگ اَنت آیانی تہ ءَ بیست ھشت اپریل 2026 ءَ چہ بریوری دگ، شال ءَ آوار جنگ بیتگیں عبدالغفار بلوچ ء رسول بخش ءُ علی رضا بلوچ ء رسول بخش پنچ مئی 2026 ءَ یل کنگ بیتگ اَنت-

ھمے وڑ قمبرانی دگ، چہ شال ءَ بیست چار اپریل 2026 ءَ بیگواہ کنگ بیتگیں لعل خان قمبرانی ء جعفر خان قمبرانی، منور قمبرانی ء غلام علی، سراج قمبرانی ء غنی قمبرانی چار مئی 2026 ءَ چہ ایئرپورٹ دگ، شال ءَ بیتگ اَنت-

بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءِ تہ ءَ گْوشتگ کہ سبی ءِ دمگ لیمجی ءَ لین ءِ دو ٹاور تراکناکیں شور پٹ بیتگ ءُ تراک ءَ چہ تباہ کتگ- تراک ءَ دو ٹاور کپتگ اَنت وھدے کپ دو ٹاوراں سک تاوان رس اِتگ-

جارکش ءَ گْوشتگ کہ مئے سرمچاراں صحبت پور ءَ بسکٹ ءِ ھند سر ءَ زورگریں پاکستانی رینجرز ءِ چیک پوسٹ سر ءَ کسان ءُ مزنیں سلاھاں چہ اُرش کتگ رینجرز ءَ جانی ءُ مالی تاوان رس اِتگ-

جارکش ءَ گْوشتگ کہ مئے گل بی آر جی اے اُرشانی زمہ واری ءَ منّ اِیت ءُ اے وڑیں اُرش بلوچستان ءِ وتواجھی ءَ تاں برجاہ بنت-

بلوچستان ءِ تیابدپی شھر چہ پسنی ءَ رس اتگیں ھالانی رد ءَ شادی کور ءَ روکیں پک اپ گاڑی یے گوں وتی درستیں مساپراں ​​بیگواہ بوتگ۔

دمگی مردمانی گشگ اِنت کہ گاڑی ءِ تہ ءَ ھواریں 8 مردمانی تہ ءَ 3 جنین ءُ 2 چُک (ایشانی تہ ءَ یک شِیر مِچیں چُکے ھوار اِنت) ءُ 3 مرد ھوار اَنت۔

دمگی مردمانی رد ءَ اے درستیں مردم پاک عمان ءِ نادراھجاہ ءَ الاج ءَ پد وتی میتگاں واتر بوھگ ءَ بوتگ اَنت کہ پسنی ءُ شادی کور ءِ میان ءَ بیگواہ بوتگ اَنت۔

دمگی مردم گْوشگ ءَ اَنت کہ اے وئیل ءَ چہ دو روچ گوستگ بلے نہ مساپرانی بارو ءَ سرپدی بوتگ ءُ نہ گاڑی ءِ نشان نا دزکپتگ انت۔

سانمندیں ھاندان ءَ چہ انتزامیہ ءُ قانوندار کنوکیں ادارھاں زوتیں گامگیج زورگ ءِ دزبندی کتگ۔

زانگ بہ بیت اے دمگ ءَ گوستگیں روچ ءَ چہ یک فوجی آپریشنے برجاہ انت کہ اود ءَ پنجاہ ءَ چہ گیش مردمانی زورانسری بیگواہ کنگ ءِ ھال رس اتگ انت۔

دمگی مردمانی رد ءَ پورسز ءَ رؤگ ءُ آیگ ءِ راہ ھم بند کتگ اَنت بلے واکداراں اے درگت ءَ انگت ءَ ھچ وڑیں ھال ءُ اھوال نہ داتگ۔