TBP Balochi

دالبندین ھند زھور کالونی ءَ گوستگیں روچ ءَ پاکستانی لشکر ءَ یک گوھار ءُ براتے دزگیر کتگ ءُ زورانسری بیگواہ کتگ انت۔ دمگی مردمانی رد ءَ لشکر ءَ اے دوئیں مردم دزگیر کنگ ءَ پد ناشناسیں جاھے ءَ برتگ انت کہ داں انگت ءَ بیگواہ انت-

دمگی مردماں بیگواھیں مردمانی پجار زبیر ء محمد رحیم ءُ رحیمہ ء محمد رحیم ءِ ناماں زانگ بوتگ انت۔ دمگی مردماں گشتگ کہ بیڑ ءِ وھد ءَ بازیں لوگ پٹ ءُ پول کنگ بوتگ انت ءُ مھلوک لٹ ءُ کُٹ کنگ بیتگ انت-

زانگ بہ بیت ایشی ءَ پیسر ءَ ماہ جبین بلوچ ءُ آئی ءِ برات یونس ھم پاکستانی لشکر ءَ زورانسری بیگواہ کتگ بیتگ انت۔ رند ءَ یونس یل کنگ بوتگ، بلے ماہ جبین بلوچ بازیں ماہانی گوزگ ءَ پد ھم انگت گار ءُ بیگواہ اِنت۔

ھمے وڑ ءَ نسرینہ بلوچ حب چوکی ءَ پاکستانی لشکر ءِ دست ءَ دزگیر کنگ ءَ پد بیگواہ کنگ بیتگ ءُ تاں انوگ ءَ آئی ءِ بارو ءَ ھچ ھال نیست-

بلوچستان ءَ پاکستانی پوج دو جتا جتائیں جاھاں بمبانی نشانگ کنگ بیتگ – اے بمب تراک گوستگیں شپ ءَ کنگ بیتگ انت کہ اود ءَ ناشناسیں مردماں پاکستانی پوج ءِ بَنجاہ بمبانی نشانگ کتگ انت-

گیشیں اھوالانی رد ءَ بلوچستان ءِ بنجاھی شھر شال ءُ ڈھاڈر ءَ دو جتا جتائیں بمب تراک ناشناسیں مردمانی نیمگ ءَ کنگ بیتگ انت ۔

شال ءِ پولیس ءِ رد ءَ سریاب روڈ ءِ سر ءَ زیارت کالونی ءِ مزنیں دروازگ ءِ دپ ءَ ناشناسیں موٹر سائیکل سواراں دزبمبے چگل داتگ کہ چریشی ءَ ٹوھیں تراکے بیتگ-

ھالانی رد ءَ تراک پاکستانی لشکر ءِ یک پوسٹے نشانگ کنگ بیتگ-

ھمے وڑ ءَ بلوچستان ءِ دمگ بولان ءِ ھند ڈھاڈر ءَ سرکٹ ہاؤس ءِ نزیک ءَ ٹوھیں تراکے ءِ توار اشکنگ بیتگ کہ ایشی ءَ پد دمگ ءَ تیرگواری ءِ توار ھم بوتگ ۔

دمگی مردمانی رد ءَ تراک ءِ توار باز دور ءَ اشکنگ کنگ بوتگ۔ انگت ءَ ھچ وڑیں تاوان ءِ پدر کنگ نہ بوتگ۔

زانگ بہ بیت بلوچ آجوئی لوٹوکیں گلانی نیمگ ءَ اے دابیں اُرش یکشل ءَ بوگ ءَ انت کہ اود ءَ پاکستانی پوج ءُ اود ءَ بند ساچی شرکت نشانگ کنگ بوگ ءَ انت-

تربت شھدربرجاہ ءِ نودربراں سے نودربر نور خان نزر، رحمر ھلکو ءُ عمران تاج ءِ زورانسری آوار جنی ءِ ھلاپ ءَ مروچی تربت یونیورسٹی ءَ زھرشانی روانک کشگ بیتگ-

نودربرانی مزنیں کچے ءَ یونیورسٹی ءَ پند بُران وتی سنگتانی یل کنائینگ ءِ لوٹ کتگ- زھرشانی کنوکاں پلے کارڈز ءُ بینرز چست کتگ بیتگ کہ آیانی سر ءَ بیگواھیں نودبرانی یل کنائینگ لوٹ بیتگ اَنت-

نودربریں رھشوناں گوشتگ کہ نور خان نزر شش دسمبر ءَ وھدے کہ رحمت ھلکو پنچ اکتوبر ءُ عمران تاج بیست یک جون 2025 ءَ بیگواہ کنگ بیتگ اَنت بلے تنی وھدے ھچ وڑیں سرپدی دیگ بیگ ءَ نہ اِنت، چریشی ءِ سوب ءَ نودربرانی تہ ءَ یک تُرسے ودی بیت آیانی کھول ءُ سنگت سک سسّائی درد ءُ گماں دوچار اَنت-

ترانکاراں تران کنان ءَ گوشتگ کہ زانشتی ادارھاں چہ ھمگرنچیں ورنا اے وڑ بیگواہ کنگ آئین ءُ کانود ءِ ھلاپ ورزی اِنت- آیاں دمگی انتزامیہ ، صوبائی ھکومت ءُ انسانی ھکانی ادارھاں چہ دزبندی کتگ کہ سئیں نودربراں یل کنائینگ ھاتر ءَ زوت گامگیج بزور اَنت-

زھرشانی ءَ ھواریں مردماں کڈن کتگ کہ اگاں بیگواھیں نودربر یل کنگ نہ بیت اَنت گُڑا زھرشانی دراجکش کنگ بیت- نودربراں لوٹ کتگ کہ آ ورنایانی زند ءِ پھاز ءِ دلجمی بدے اَنت-

روانک پُرایمنی ءَ گوں آسر کنگ بیتگ، بلے نودربراں تچک کتگ کہ وتی سنگتانی یل کنائینگ ءَ تاں زھرشانی برجاہ بیت-

تربت پریس کلب ءَ زورانسری بیگواھی ءِ ھلاپ ءَ پریس کانفرنس ، بیگواھیں یحییٰ عبدالواحد ءِ گوھار ءَ وتی برات ءِ یل کنگ ءَ مزن واکداراں دزبندی کتگ-

بیگواھیں ورنا ءِ گوھار ءَ بھتام جتگ کہ آئی ءِ برات یحییٰ ء عبدالواحد 8 ستمبر 2025 ءَ حب چوکی بلوچ کالونی ءَ سیکورٹی پورسز ءُ چیرین ادارھانی کارندھاں شپ ءِ نسپ ءَ دزگیر کتگ ءُ گون وت برتگ کہ سَے ماہ ءِ گوزگ ءَ پد ھم آئی ءِ بارو ءَ مارا سرپدی دیگ بوگ ءَ نہ انت-

پریس کانفرنس ءَ گوں تران کنان ءَ سانمندیں گوھار ءَ گشتگ کہ بلوچستان ءَ پہ زور بیگواہ کنگ ءِ سلسلگ برجاہ انت ءُ آئی ءِ کھول ھم اے دردناکیں سلسلگ آماچ انت۔ آئی ءَ گوشتگ تھسیل نظرآباد، تمپ، ضلع کیچ ءَ یحییٰ عبدالواحد ءِ لوگ ءِ یکیں سروک بیتگ۔ پت ءِ بیرانی ءَ پد چار گھاراں آ رودینتگ مزن کتگ ءُ آ پہ لوگ ءِ ھرچ ءُ درچ ءِ پورا کنگ ءَ مھنت کنگ ءَ بیتگ۔

آیاں گوشتگ کہ اگاں ریاستی ادارھانی گور ءَ یحییٰ ءِ بابت ءَ ھرچ وڑیں سبوت یا بھتام ھست انت گڑا آئین ءُ قانون ءِ رد ءَ آمید گس ءَ پیش کنگ بہ بنت۔ مئے برات بے گناہ اِنت۔ اگاں آئی ءَ ملکی کانون ءِ ھلاپ ءَ کارے کتگ گڑا مارا ھال بہ دے اِت۔ بلے سئے ماہ اِنت کہ ما بزگی ءُ واری ءَ کپتگ انت کہ اے کیامت ءَ کم نہ انت-

سانمندیں مردم ءِ کھول ءِ رد ءَ آیاں یحییٰ ءِ جان سلامتی ءِ ھاتر ءَ چار رند ءَ ڈپٹی کمشنر کیچ ءِ گور ءَ درھواست داتگ بلے آھاں ھچ وڑیں تک ءُ پھنات ءَ وشیں پسو نہ رس اتگ۔ پریس کانفرنس ءَ رسانکدر ءَ گوں تران کنان ءَ آھاں گوشتگ کہ ما رسانکدر ءِ دیم ءَ بیا ایں دانکہ مئے توار واکداراں سر بہ بیت۔

آہاں لوٹ کتگ کہ سرکاری ادارہ یحییٰ عبدالواحد ءِ جان سلامتی ءِ ھاتر ءَ زوت املی گامگیج چست بہ کن انت ءُ آئی ءَ کھول ءِ دست ءَ بہ دئینت۔

پریس کانفرنس ءِ گڈسر ءَ آھاں اھوالکارانی منت گپت ءُ گوشت کہ میڈیا ایوکیں پلیٹ فارم انت کہ مزلومانی توار ءَ را مھکم دنت ءُ حکومتی تک ءَ دپ کپتگیں جیڑھاں دیم ءَ کاریت۔

بلوچ یکجھتی کمیٹی ءِ بندیگیں سروک ڈاکٹر ماہ رنگ بلوچ ءَ گوشتگ من ایمان مزاری ءُ ھادی علی چٹھہ ءِ گون ءَ انساپ، انسانی ھک ءُ ھمک انسان ءِ شرپ ءِ جد ءُ جھد ءَ یکجاھی ءِ ھواری ءَ ھمکوپگ آں – آئی ءِ ھمت ءُ جد ءُ جھد ءِ سر ءَ بے توار بوگی نہ انت-

ڈاکٹر ماہ رنگ بلوچ ءَ گوشتگ آجوئی ءِ وڑیں لیکھانی درشان کنگ بنکی ھک چہ آیاں پچگرگ بیتگ، ھمے وڑ ریاستی ادارھانی نیمگ ءَ بیوکیں زوراکیانی پُرکنگ ءَ ابید نوآبادیاتی وھد ءِ رھبندانی باسکاں بے توار کنگ ءِ واستا کارمرد بوگ ءَ انت-

ڈاکٹر ماہ رنگ بلوچ ءَ گوشتگ چہ بازیں سالاں ایمان ءُ ھادی انسانی ھکانی وکالت ءَ چہ درستاں دیم ءَ انت – چیرتراتکگیں تواراں دیم ءَ آرگ ءَ انت ءُ ھر وڑیں دروشمانی نا انساپی ءُ زُلمانی ھلاپ ءَ توار چِست کنگ ءَ انت – آیانی ھلاپ ءَ وتگڑیں ارزی، ریاست ءِ زوراکیاں پاشک کنت – ءُ اے گپ ءَ راستی ءَ پدر کنت کہ انساپ ءِ نزام کجام کساس ءَ سُبکی ءَ ھما مردمانی ھلاپ ءَ کارمرد کنگ بیت چُشکہ انسانی بنکی ھکانی پھریزی ءَ کنگ ءَ انت-

ڈاکٹر ماہ رنگ بلوچ ءَ گوشتگ من میان اُستمانی برادری ءَ کڈن کن آں کہ آ ایمان ءُ ھادی ءِ پھریزگ ءَ ستکی کنگ ءَ آیانی سر ءَ جتگیں دراھیں بے بنیں بھتاماں سرجمی ءَ واتر بہ کنائین ایت ساپ ءُ پلگاریں رنگے ءَ کانودی دروشم ءِ لوٹ ءَ بہ کنت- کانود ءِ کارمرد زوراکی ءِ زور ءِ رنگ ءَ ھلاس کنگ بہ بیت باج انساپ ءِ بہ بیت-

بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت، دگہ دو مردم زورانسری آوار جنی ءِ نشانگ کنگ بیتگ اَنت-

گیشیں ھالانی رِد ءَ ھپت دسمبر ءِ شپ ءَ گوادر ءِ تھسیل جیونی ءِ دمگ پنوان ءِ جھمنند، ھاجی ابراھیم کلمتی ءِ چُک فاروق ابراھیم پاکستانی پوج، آیانی ھمراھی ءَ ڈیتھ اسکواڈ ءِ کارندہ ھم ھوار بیتگ اَنت، آئی ءِ لوگ ءَ چہ زورانسری بیگواہ کتگ-

زانگ بہ بیت کہ فاروق ابراھیم ءِ مستریں برات، نامی ئیں گاڑی تاچ طارق کلمتی پاکستانی پوج ءَ یازدہ مئی 2025 ءَ چہ لوگ ءَ بیگواہ کتگ کہ یکروچے ءَ پد آئی ءِ تیرسُپتگیں لاش چہ گوادر ءَ دزکپتگ-

وھدے کہ ھمے شپ ءَ کراچی ءِ دمگ شرافی ءَ علی نواز ء بخش کلمتی جھمنند پانوان پاکستانی پوج ءَ آوار جتگ ءُ زورانسری بیگواہ کتگ-

دومی نیمگ ءَ بلوچستان ءَ زورانسری آوار جنی ءِ نشانگ بیتگیں سے مردم یل کنگ بیتگ اَنت-

کھول رِد ءَ جیئند لیاقت، کہ درکانودی دزگیر کتگ آیانی ھلاپ ءَ دروگیں ایف آئی آر نکش کتگ، شش دسمبر 2025 ءَ زمانت یل کنگ بیتگ- اشی ءَ پد آئی ءِ یل بیگ راستی ھپت دسمبر 2025 ءَ بیتگ-

آ دگہ مردم چاکر اکبر ء اکبر علی جھمنند کیچ، معروق بلوچ ء پنڈوک بلوچ جھمنند ھب چوکی ھوار اَنت کہ ھمے سال نومبر ءَ پاکستانی پوج ءَ زورانسری بیگواہ کتگ اَنت-

بلوچستان یونیورسٹی ءِ نودربر شھزاد منیر ءِ زورانسری ءَ بیگواہ کنگ ءِ ھلاپ ءَ شال پریس کلب ءَ کھول ءَ پریس کانفرنس کتگ ءُ سرکاری ادارگانی نیمگ ءَ چہ آئی ءِ لوگ ءَ اُرش ءُ بندیگ کنگ ءِ سر ءَ سکیں دلپدردی درشان کتگ۔ کھول ءِ گْوشگ ءِ رد ءَ سرکاری کارندھاں شپ ءِ دیر ءَ بے وارنٹ ءَ آھانی لوگ ءَ چھاپہ جتگ ءُ آھانی ناکوزتک شھزاد منیر زورانسری ءَ دزگیر کتگ ءُ ناشناسیں جاھے ءَ برتگ۔

پریس کانفرنس ءَ گوں تران کنان ءَ کھول ءَ گوشتگ کہ تاں روچ ء مرچی دزگیری یا بندیگ کنگ ءِ ھچ وڑیں کانونی سبب پیش نہ بوتگ ءُ نہ کہ ھچ ادارگ ءَ دگہ ھال داتگ- اے آئین ءُ بنیاتی انسانی ھکانی سر ءَ مزنیں لگتمالی یے ۔ سانمندیں کھول ءَ گْوشتگ کہ پاکستان ءِ آئین ءَ شھریانی زند، آجوئی ءُ ایمنی ءِ ھک ءِ زمانت داتگ۔

آئی ءَ آرٹیکل 9 (زندگی ءُ آجوئی ءِ حق) ءُ آرٹیکل 10-اے (تچکیں پٹ ءُ پول ) ءِ ھوالہ ءَ گشتگ کہ شھزاد منیر ءِ بے کیس، بے وارنٹ ءُ بے آمید گس ءَ پیش کنگ ءِ اناگت ءَ بیگواہ کنگ آئین ءِ درچ ءِ ھلاپ انت۔ کھول ءَ گْوشتگ کہ ما سک ءَ گمگین ءُ پدردی ءِ جاوران انت ءُ شھزاد منیر باریں کجام جاوران انت۔ بلے آیاں اے گپ پدر کتگ کہ آیانی زھرشانی سرجم ءَ کانود ءِ تَک ءَ اِنت ءُ آیانی لوٹ ایوک ءَ انساپ ءُ آئینی لوٹانی پدجنی اِنت۔ کھول ءَ لوٹ کتگ کہ ریاستی ادارہ زوت شھزاد منیر ءَ دیما بیار اَنت، ءُ اگاں آئی ءِ سر ءَ ھرچ وڑیں بھتام ھست گڑا آ کانود ءِ رد ءَ آمیدگس ءَ پیش کنگ بہ بیت۔ آئی ءِ ھست ءُ جاور ءِ بابت ءَ کھول ءَ سرپد کنگ بہ بیت ءُ بیگواھی بندیگ جاہ ھلاس کنگ بہ بیت۔

کھول ءَ گشتگ کہ آیانی بنگپ سیاسی نہ انت بلکیں ایوک ءَ انسانی ءُ کانونی بنیادانی سر ءَ انت۔

آھاں گوشتگ کہ ھانون ءِ ھاکمیت گر شھری ءِ ایمنی ءِ زمانت انت ءُ ایشی ءِ لگتمال کنگ ءَ چہ کجام ھم لوگ ءِ سر ءَ سان کپت کنت۔

گڈسرا کھول ءَ چہ اھوالکاراں دزبندی کتگ کہ اے جیڑھ ءَ چہ انسانی ھک، کانود ءُ انساپ ءِ چمشانک ءَ پدر بہ کن اَنت دانکہ اے وڑیں وئیلانی دیم دارگ بہ بیت۔

بلوچستان ءِ دمگ مستونگ ءَ پاکستانی لشکر سلاہ بندیں مردماں نشانگ کتگ۔ بازیں ساھتان برجاھیں اُرش ءِ وھد ءَ لشکر ءِ یک کارندھے اُرشکاراں دزگیر کتگ ءُ گوں وت برتگ۔

مستونگ ءِ دمگ عمر ڈور دشت ءِ زہری گٹ ءِ ھند ءَ پاکستانی لشکر ءُ سلاہ بندیں مردمانی نیام ءَ ھما وھد ءَ ترندیں جنگ ءُ چوپ بندات بوتگ کہ لشکر پیادگ ءَ دیم ءَ روگ ءِ کوشست ءَ بوتگ اَنت۔

دمگی مردماں ٹی بی پی گوں ووشتگ دو کلاک ءَ گیش برجاہ بوتگیں جنگ ءِ وھد ءَ مزنیں تیرگواری ءُ تراکانی توار بوتگ انت۔

دمگی مردماں ٹی بی پی ءَ گوں تران کنان ءَ گْوشتگ کہ اے اُرش ءَ لشکر ءَ تاوان رس اتگ ءُ اُرش کنوکاں فرنٹیئر کور ءِ یک کارندھے زندگ ءَ دزگیر کتگ ءُ گون وت برتگ۔

اُرش ءِ وھد ءَ دمگ ءَ ھیلی کاپٹر بال کنگ ءَ گندگ بوتگ اَنت بلے واکداراں اے درگت ءَ انگت ءَ ھچ وڑیں ھال ءُ اھوال نہ داتگ۔

بلوچستان ءَ پاکستانی پوج ءِ سر ءَ بیتگیں اُرشانی زمہ واری بلوچ سلاہ بندین گلاں من اتگ ءُ گوشتگ اے اُرشاں پوج ءِ 17 پوجی کارندہ کشتگ انت-

گوستگیں روچاں جتا جتائیں ھنداں بیتگیں اُرشانی زمہ واری دو جتا جتائیں گلاں زرتکگ انت کہ آیانی توک ءَ بی آر جی ءُ بلوچستان لبریشن فرنٹ ءَ وتی کاروائیانی توک ءَ 17 پوجیانی کوش ءِ زمہ واری من اتگ –

بلوچ ریپبلکن گارڈز ءِ جارکش دوستین بلوچ ءَ گوشتگ بی آر جی ءِ سرمچاراں سبی ءِ شھر ھرنائی پھٹک ءَ پاکستانی پوج ءِ کاروان ءِ سر ءَ ریموکنٹرول بمب اُرشے ءَ یک گاڑی یے تباہ بیتگ ءُ چریشی ءَ پنچ کارندہ جاہ پہ جاہ ءَ مرتگ انت ءُ دگہ زدگ بیتگ انت-

ھمے وڑ ءَ بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں درشان ءَ گوشتگ کہ بی ایل ایف ءِ سرمچاراں بلوچستان ءِ جتاجتائیں دمگاں 12 اُرشاں 12 پوجی کارندی کشتگ انت ءُ بازینے ٹپی کتگ انت۔

جارکش ءَ گوشتگ کہ سرمچاراں مرچی روچ ءِ ساھت 12 ءَ بولان ءِ دمگ سراج آباد ءِ شھدگ ءِ سر ءَ سنگر گپتگ ءُ پاکستانی پوج ءِ سے گاڑی نشان کتگ انت۔ اے اُرش ءَ دژمن ءِ سے کارمند مرتگ انت ءُ بازینے ٹپی بوتگ انت ۔ گاڑیاں تاوان بیتگ ۔

آئی ءَ گوشتگ کہ بی ایل ایف ءِ سرمچاراں یک دسمبر ءِ شپ ءِ ساھت 12:00 ءَ بارکھان ءِ دمگ دولہ کور ءَ ھستیں پولیس چوکی انگر کتگ ءُ کارندہ دزگیر کتگ اَنت۔ ھمے وھد ءَ چہ پاکستانی پوج ءِ نزیکیں چوکی ءَ دو گاڑی ءُ ھپت موٹر سائیکلانی کاروانے آتکگ ءُ سرمچارانی انگر کنگ ءِ جھدے کتگ۔ چہ ایشی ءَ پوج ءُ سرمچارانی میان ءَ میڑ بندات بوتگ سرمچاراں پوج ءِ یک گاڑی یے ءُ دو موٹرسائیکل سکا نزیک ءَ نشانگ کتگ اَنت کہ چہ ایشی ءَ پوج ءِ چار کارندہ مرتگ انت ءُ بازینے ٹپی بیتگ انت۔ پولیس کارمنداں ھچ وڑیں تاوان نہ بوتگ۔

بی ایل ایف ءَ یک دسمبر ءَ آواران چیری مالار دمب، رکشان ءَ سی پیک دگ ءِ بند، بلیدہ ءِ دمگ گلی ءَ پوج ءِ بنجل ءِ نشانگ کنگ، تمپ پل آباد ءَ پوج ءِ بنجل ءِ نشانگ کنگ، دو دسمبر ءَ تربت دھات ءَ ماشاء اللہ ھوٹل ءَ دو پوج ءِ کاروان ءِ سر ءَ اُرش، پنجل دسمبر ءَ گیشکور گراڑی ءَ پوج ءِ نشانگ کنگ ءُ ھمے وڑ کچی ءُ جھل مگسی ءَ ھم پورسز ءِ چوکیانی سر ءَ اُرشانی زمہ واری من اتگ انت-

بلوچستان ءَ بلوچ سلاہ بندیں گلانی نیمگ ءَ گیش بیتگیں اُرشاں پاکستانی پوج ءَ مشکل ءُ جنجالانی دیمپانی کنگ کپگ ءَ انت-

بلوچستان ءِ جتاجتائیں دمگ کیچ ءُ شال ءَ دگہ نُھ مردم زورانسری آوار جنی ءِ نشانگ کنگ بیتگ اَنت-

گیشیں ھالانی رِد ءَ شال ءِ دمگ چہ کلی کمبرانی ءَ گوستگیں شپ ءَ سیر مراگشے ءَ چہ زورانسری آوار جتگ ءُ بیگواہ کتگ اَنت کہ آیانی پجّار ساتک ء حاجی قدرت قمبرانی، بسملہ ء خیراللہ قمبرانی، ماسوم ء شاہ جھان قمبرانی، حمل ء عباس قمبرانی، آفتاب ء قدوس لھڑی، افضل ء حاجی مھراب قمبرانی، حیر بیار ء محمد اسحاق قمبرانی ءُ بیبرگ ء محمد عباس ھوار اَنت-

چہ تربت ءَ ھم یک ورنائیں نودربرے بیگواہ کنگ ءِ ھال دیم ءَ اَتکگ-

کھول ءَ گوشتگ کہ تربت یونیورسٹی نودربر نور خان ء نزر محمد گوستگیں شپ ءَ پاکستانی پوج ءَ وتی ھمراھی ءَ برتگ، چریشی ءَ پد آ بیگواہ اِنت-

زانگ بہ بیت بلوچستان ءَ زورانسری آوار جنی ءِ دْرچ گوں تُرندی ءَ برجاہ ءَ اِنت –