TBP Balochi

ڈیرہ غازی خان ءِ دمگ فاضل پور، چہ بستی لاشاری ءَ سیادی داروکیں دو برات دروگیں پولیس میڑ ءِ کوش وئیل دیم ءَ اَتکگ اَنت-

بیران بیتگیں دوئیں براتانی پجّار سجاد لاشاری ء محمد حسین ءُ ساجد لاشاری ء محمد حسین نام ءَ چہ بیتگ اَنت-

اِھوالکار ءِ رِد ءَ دوئیں برات چار روچ ءَ ساری چہ اسلام آباد ءَ آوار جتگ اَنت ءُ پد ءَ گوستگیں روچ ءَ لاھور ءَ پولیس میڑ ءَ کشگ ءِ ھال سر بیتگ اَنت-

اِھوالکار ءِ رِد ءَ دوئیں برات لھتے روچ ءَ ساری چہ اسلام آباد ءَ ناشناسیں کارندھاں وتی ھمراھی ءَ برتگ اَنت، بلے آیانی دزگیری پدر نہ کتگ اَنت- لاھور ءَ بیتگیں میڑ ءَ آیانی کوش ءِ گپ دیم ءَ آیگ ءِ سر ءَ کھول ءَ آ دروگیں میڑ گْوشتگ کہ پلگاریں پٹ ءُ پول ءِ لوٹ کتگ-

بلوچستان ءِ دمگ کیچ ءِ ھند زمران ءَ ناشناسیں مردماں پاکستانی فوج ءِ کارندہ بمب تراکے ءِ نشانگ جوڑ کتگ انت۔

اے تراک مرچی سھب ءَ زمران ءِ گورکدان ءَ فوج ءِ پیادگیں کارندھانی سر ءَ ھما وھد ءَ بوتگ کہ آ کلیئرنس ءِ کار ءَ گوں ھوار بوتگ اَنت۔

ھال انت کہ اے تراک ءَ یک سپاھیگے بیران بوتگ بلے انگت ءَ واکداراں اے درگت ءَ ھچ وڑیں ھال ءُ اھوال نہ داتگ۔

بلوچ لبریشن آرمی ءَ وتی آفیشل میڈیا چینل ھکل ءَ 31 جنوری ءَ بگر تاں 6 پروری ءَ بوتگیں آپریشن ھیروپ 2 کہ بلوچستان ءِ چاردہ دمگاں بوتگ ات اے آپریشن ءِ تامر شنگ کتگ ، کہ ادارے ءُ بیست ملٹ ءِ تامر انت ۔

تامر ءِ بندات ءَ گندگ بیت کہ آپریشن ھیروپ 2 ءَ بھر زوروکیں جند ندر ءُ ایندگہ یونٹانی مردین ءُ جنینیں سرمچار نوکتریں سلاھانی گوم ءَ ٹرینگ ءَ انت ءُ ایدگہ چن ءُ لانچاں دلگوش انت ۔

تامر ءَ پیش دارگ بوتگ ھنچوش کہ آپریشن ھیروپ بندات بیت سرمچاراں بلوچستان ءِ بازارانی تہ ءَ مانرتکگ انت ءُ بازار ءُ دگ ھمایانی کنٹرول ءَ انت وھدیکہ لس مھلوک آیانی کش ءُ کراں گون انت ءُ گوں آیاں دچار کپگ ءَ انت ۔

تامر ءِ یک بھرے ءَ گندگ بیت کہ زالبولیں جندندر دار چنگ ءَ پد گرانیں ٹرینگ کنگ ءَ انت ۔

نوکتریں سلاھانی ھمراھی ءَ بی ایل اے ءِ سرمچار آپریشن ءَ روگ ءَ ساری گرانیں ٹرینگ ءُ ، بلوچی ناچ کنگ ءَ ھم گندگ بنت وھدیکہ یک زالبولیں جند ندر ءِ آیانی دستاں ھنی کنگ ءَ انت ۔

تامر ءِ تہ ءَ جند ندر ھوا بلوچ وتی کلوہ ءِ تہ ءَ گوش ایت کہ من بلوچ زالبولاں ھمے گوشگ لوٹاں کہ آ وتی براتانی ھواری ءَ اے جنگ ءِ بھر بہ بنت ، وتی براتانی ھمکوپگ بہ بنت ءُ اے جنگ ءَ دیم ءَ بہ بر انت ، جنگ ءِ تہ ءَ ترندی بیار انت ءُ دژمن ءَ پیش بہ دار انت کہ بلوچ زالبول نزور نہ انت ۔

جند ندر ھوا ءِ کلوہ ءَ پد مردین ءُ جنینین سرمچار انگر ءُ آنگر رؤگ گندگ بنت وھدیکہ ٹرینگ برجاہ انت ۔

تامر ءِ تہ ءَ بلوچستان ءَ ھما ایمنیں زھرشانیانی ندارگ ھم پیش دارگ بیت کہ پاکستانی پوج بلوچ زالبول ءُ زھگاں لٹ شاپ کنگ انت وھدیکہ باپشتی گالوار پاکستانی سرکار ءُ پوج دلگوش گور کنگ بوتگ ۔

تامر ءِ تہ ءَ اے ھم گندگ بیت کہ بلوچ سرمچار تراکناکیں شوروانی جوٹ کنگ ءَ دلگوش انت ءُ اشی ءَ آرت درشوکیں مشین ءِ سر ءَ کنگ ءَ انت وھدیکہ ڈرمباں مواد ءَ پُر کنگ ءَ انت ۔

تامر ءِ تہ ءَ ھما ندارگ ھم پیش دارگ بوتگ کہ بلوچستان ءِ چاردہ دمگاں آپریشن ھیروپ بندات بوتگ ۔ سرمچار بازار ءُ دگانی سر ءَ انت مھلوک مزنیں کچے ءَ آیانی گور ءَ اشتوک انت بازیں ندارگاں سرمچاراں گلائیش کناں ءُ آیانی دستاں چک انت ۔

تامر ءِ تہ ءَ پاکستانی پوجی کارمندانی جون ، ستکگیں گاڑی ءُ مانداشتگیں جاہ ھم گندگ بنت ۔

تامر ءِ تہ ءَ آپریشن ھیروپ 2 اولی جند ندر ھدایت اللہ کرد ھم زاھر کنگ بیت کہ کہ آ گاڑی ءَ سوار انت ءُ زدگی جاوراں بچکندگ انت ، پد ءَ روت وتی گاڑی ریڈ زون ءِ چیک پوائنٹ ڈکر دنت ۔ تامر ءِ تہ ءَ پرپٹ سواریں سرمچار ھم گندگ بنت کہ آ شال ءِ سریاب دگ ، کمبرانی دگ ، ءُ شال ءِ دگہ دگانی سر ءَ تر ءُ تاب انت ۔

تامر ءِ تہ ءَ پاکستانی پوج ءِ نیمگ ءَ بال دیگ بوتگیں ڈرون ءُ بالگردانی تباہ کنگ ءِ ندارگ ھم پیش دارگ بوتگ انت ۔

سرمچارانی دگہ ٹولی یے شال ءَ پیپلز پاٹی ءِ وزیر علی مدد جتک ھوٹل ءَ نشتگ ءُ چاہ ورگ انت ۔

تامر ءِ تہ ءَ سرمچار نوشکی ءَ پترگ ءَ ھم گندگ بنت کہ اود ءَ جند ندر فیضان شاھوانی ءُ آصفہ مینگل وتی گاڑی ءَ آئی ایس آئی ھیڈ کواٹر ءَ ڈکرین انت وھدیکہ ایندگہ جند ندر ءُ سرمچار دگہ پوجی جاھاں اُرش کن انت ۔ نوشکی پنچ روچ ءَ تاں بی ایل اے ءِ کنٹرول ءَ بوتگ ۔

نوشکی ءَ پاکستانی پوجی کارمندانی جون کپتگ انت ءُ وھدیکہ سرمچار بازار ءَ تر ءُ تاب کنگ ءَ انت مھلوک ءَ گوں تران کنگ ءَ انت ۔

تامر ءَ اے گندگ بیت کہ ڈپٹی کمشنر نوشکی ءُ آئی ءِ لوگ بانک سلاہ بنداں گپتگ انت ، ڈپٹی کمشنر درشان دیگ ءَ انت کہ آ اے وھد ءَ بلوچ لبریشن آرمی دست ءَ انت پد ءَ رند ءَ آ یل کنگ بنت ۔

یک بنجاھی پھلے تباہ کنگ بیت ، بازیں جاہ ءَ پاکستانی پوج ءُ سرمچارانی میان ءَ تیرگواری ءِ درچ برجاہ انت ءُ سرمچار ساھت پہ ساھت جاورھالاں سرکنگ ءَ انت ۔

رئیل اسٹیشن سرمچارانی کنٹرول انت کہ یک گاڈی ءَ دیت چست انت گندگ بیت.

تامر ءِ تہ ءَ ماں گوادر ءَ آپریشن ھیروپ 2 کار پیشدارگ بنت کہ نھ جند ندر بھر زور ایت ، تامر ءِ تہ ءِ اے ھم زاھر بیت کہ سرمچار یک کھولے ءَ پھریز انت ءُ ڈن ءَ در کن انت ۔

پسنی ءَ جندندر ناکو پزل ءِ ءَ ھوار شش جند ندرانی کار پیش دارگ بوتگ ۔ تامر ءِ تہ ءَ گندگ بیت کہ ناکو بنجل ءِ بنجاھی گیٹ ءَ تباہ کنت پد ءَ جند ندر یاسمہ وتی لوگواجہ ءُ ایدگہ جند ندرانی ھمراھی ءَ پوجی بنجل ءَ پتر انت ءُ وتی سنگراں گر انت وتی ھالاں ھر ساھت ءَ دیاں ۔

ھمے وھد ءَ سرمچارانی دگہ ٹولی ءِ مکران کوسٹل ہائی وے ءِ سر ءَ گندگ بیت کہ اود ءَ گاڑیانی دراجیں کتار ءِ لگ اتگ وھدئکہ سرمچار پٹ ءُ پول کنگ انت ۔

تامر ءَ مستونگ ءُ کلات ءِ سرمچارانی ترندیں ارش ءُ تر ءُ تاب ءُ مھلوک ءَ گوں تران کنگ ءِ ندارگ پیشدارگ بوتگ انت

تامر ءَ تمپ ، مند ءُ تربت ءِ نیوی کیمپ ءِ سر ءَ اُرشانی ندارگ ھم ھوار انت وھدیکہ تمپ ءَ مزنین کچے ءَ سنگت تر ءُ تاب انت ایپ سی بنجلے تباھی گندگ ءَ کئیت ۔

تامر ءِ تہ ءَ بی ایل اے ءِ سروک بشیر زیب بلوچ سرمچارانی یک ٹولی ءِ ھمراھی ءَ ھم گندگ بیت کہ بازیں نوکتریں سلاہ اش بڈ ءَ ات ۔

بلوچستان ءِ دمگ بلنگور ءُ سنی ءَ پاکستانی پوج سلاہ بندیں اُرشانی دیمپانی کنگ کپتگ، اُرشاں پوج ءِ کارندھاں جانی تاوان چست کنگ کپتگ-

گیشیں ھالانی رِد ءَ گوستگیں شپ ءَ کیچ ءِ دمگ دشت ،بلنگور ءَ سلاہ بندیں مردماں پاکستانی پوج ءِ بُنجل ءِ بُنجاھی دروازگ ءَ ساڑی کارندہ اُرش ءِ نشانگ کتگ اَنت-

ھمے وڑ کچھی ءِ ھند سنی شھر ءَ سلاہ بندیں مردماں پاکستانی پوج ءِ بُنجاھی بُنجل ءِ سر ءَ اُرش کتگ اود ءَ بازیں تراکانی ھمراھی ءَ تُرندیں تیرگواری ءِ توار اش کنگ بیتگ-

واکدار ءَ تنی وھدے اے اُرشانی درگت ءَ ھچ وڑیں درشان شنگ نہ کتگ-

بلال جان آشوب ءِ چیدگ

نبشتہ کار: رُژن بلوچ

دی بلوچستان پوسٹ

ھر روچ ھزاراں مردم اے گیدی ءَ وتی چمّاں پچ کننت ءُ ھزاراں مردم وتی سپر ءَ جننت ءُ رکست بنت۔ ھما مردم وتی زات ءَ چے درکاینت ءُ راجی سیت ءُ نپانی ھاتر ءَ وتی لیکہ، سوچ ءُ پِگرئے سر ءَ اُوشت اَنت ءُ وتی وھد، مال ءُ جان ءَ کربان کن اَنت گڑا آ دنیا ءَ چہ رکست بوھگ ءَ پد ھم زندگ ماننت۔سامراج، وھد ءِ ھکمران یا کہ چاگرد ھما مردم ءِ گون ءَ ھر وڈیں کردگار بہ کنت بلے راجدپتر ھچبر آئی ءِ گون ءَ نہ انساپی نہ کنت۔ آ ھما کرد ءِ ھُدا بُند اِنت ھما کرد ءَ آئی ءَ بکش ایت۔

اے ھما مردم بنت کہ آ گُلامی ءِ سیاہ ءُ تھاریں شپاں چو کندیلے ءَ بل اَنت۔ وھدے چاگرد بے تواری ءِ سانکلاں گون بندوک بہ بیت گُڑا ھمے مردم وتی ند ءَ چِست کن انت ءُ راستی ءِ توار جوڑ بہ اَنت۔ ھمے مردم توپک چِست کن انت ءُ گھگیری کن انت۔ آ زان انت کہ گُلامیں چاگردے ءَ راست ءَ راست گُشگ ارزان نہ اِنت۔ اے کِشک تھنائی ءِ چو سیاہ مار ءَ ڈنگ جنت، وتیگانی بُھتام ءُ وتی نُگرھیں ساہ ءُ جان ءِ دیمھونی دیگ کپ ایت۔ بلے اَنگت آ پُشت ءَ نہ کنز اَنت، پرچا کہ آ آشوبے آرگ لُوٹ اَنت۔ وتی راج ءَ وشیں بانداتے دیگ لُوٹ اَنت۔

ھمے پُشت ءَ نہ کنزوکیں ھمبلاں چہ یکے بلال جان اَت۔ بلال ءَ وتی ڈیھ ءَ گریبی، تنگدستی، درامدانی لُٹ ءُ پُل، بے وسی، تُرس ءُ بیم ءَ چہ اَبید ھر ھما چیز دیستگ اِتنت کہ یک زوراکیں استانے کبزہ کُتگیں ڈیھے ءَ کنت۔ آئی ءَ مُدام گُشتگ اَت: “انسان تھنا پہ وردن زندگ نہ بیت بلکیں اِزت ءُ آجوئی انسان ءَ زندگ کنت۔”

وھد ءِ ھمرائی ءَ آئی ءِ تھانگ ءَ لَھتیں جُست چو بَشّی جمبر ءَ سر کشان اِتنت۔ آ جُست چو اے وڑ اِتنت: پرچا راج تُرس ءِ ساھگ ءَ وتی زند ءَ بہ گوازینیت؟ پرچا مات وتی چُکّانی ودار ءَ پیر بہ بنت ءُ اے گیدی ءَ چہ سپر بہ کن انت؟ پرچا ورنا واب گندگ ءِ جاہ ءَ زندگ بوھگ ءِ جنگ ءَ بہ بنت؟

بلال ءَ گوستانگ ونتگ اَت، دُنیائے زرمبشت چمشانک داتگ اِتنت ءُ آشوب پھم اِتگنت۔ ھما مردمانی بارو ءَ ھم زانتگ اَت کہ آیاں وتی راج ءِ ھاتر ءَ دیمھونی داتگ اَت۔ آ چے گویرا، بھگت سنگھ ءُ اُستاد اسلم ءِ پگر ءِ منوکے اَت۔ آ زُلم ءُ زوراکی ءِ دیم ءَ اُوشتگ ءُ گھگیری کنگ ءِ فلسفہ ءِ سر ءَ اُوشتاتگ اَت۔آئی ءَ مُدام گُشت کہ اگاں گُلامی ءِ سیاہ ءُ تھاریں شپاں بام ءِ دیگ لُوٹ ئے گڑآ پہ تو یک راھے پشت کپتگ آ توپک ءِ راہ اِنت۔

بلال یاگی بوت، کوہ آئی ءِ واب جاہ اِت انت سنگ ءُ ڈوک آئی ءِ سرجاہ۔آئی ءَ وتی ورناھی ءِ درستیں واھشت، لُوٹ ءُ ارمان گُٹگیر کُتگ اِت انت۔ آ پند جنئگ ءَ اَت، ھید ریچگ ءَ اَت، دُشمن ءِ سر ءُ پُراں چارگ ءَ اَت۔

بلال کوہ ءَ رودینتگ اَت، آ سما ءُ زانت ءَ چہ سرچکار اَت، آئی ءَ زانتگ اَت کہ جنگ امینچو گُشاد بیت دُشمن اَمینچو بے وار بیت ءُ تچ ایت۔ ھمے سبب اَت کہ آ مجید برگیڈ ءِ کاروان ءَ ھوار بوت۔ دو ھزار بیست ءُ دو ءِ جنوری گوں وتی سارتیں گوات ءِ شیکگاں پہ مُدامی سرگیپتگ اَت ءُ روگ ءَ اَت گُڑا بلال گوں ھمراھاں نوشکی ءِ مسکیں دلبند ءَ آپریشن گنجل ءِ بھر بیت وتی ھیشی ساہ ءُ سراں ندر کنت ءُ ھاک ءِ وشوھاں پہ مُدامی ھوار بیت۔

اے گیدی ءَ اسل زندگی تھنا ساہ زُورگ ءِ نام نہ اِنت بلکیں گوستانک ءِ تہ ءَ یک اَنچیں کردے ءِ نام اِنت کہ داں جھان ھست اِنت تو نمیران بہ بئے۔ ھما مردم کہ وتی دیمھونیاں چہ راجاں وپتگیں واباں چہ پاد کننت گُڑا ھما زندگ مان انت۔ آ ھاکانی تہ ءَ وش واب بہ اَنت بلے آیانی نام وھد ءِ سینگ ءَ ھما جاہ ءَ نبشتہ کنگ بنت کہ ھود ءَ نہ مرگ اَتک کنت نہ وھد ءِ زُوراک۔

گُشنت کہ آشوبی مردم پہ وتی زاتی سیت ءُ نپانی ھاتر ءَ جنگ نہ کننت بلکیں وتی آھوکیں پدریچے وشیں بانداتے ءَ جنگ کن انت ءُ ابدمان بنت۔ بلال ءَ ھم اَنچیں آھوکیں بانداتے ءِ واب دیستگ اَت کہ ھود ءَ کسی زھگ آوار جنئگ مہ بنت، ھر کس وتی زند ءَ پہ آجوئی بہ گوازین ایت۔

بھگت سنگھ ءَ گشتگ اَت کہ: شُما تھنا منی زِرد ءَ ھلاس کُت کن ئے بلے منی پِگر ءُ ھیالاں اِنا۔” مروچی بلال مئے میان ساڑی نہ اِنت بلے آئی ءِ پِگر، لیکہ ءُ آئی ءِ داتگیں دیمھونی مُدامی زندگ مان انت۔شھید چوناھیا نہ مر انت بلکیں وتی راجانی دل ءَ زندگ بنت۔ وھدے ھما مردم کہ وتی ڈیھ ءِ ھاتر ءَ وتی ساہ ءُ سراں بکشاھیت گُڑا آ تھنا یک پردے نہ بیت بلکیں یک چیدگے جوڑ بیت۔ بلال ھم گھگیری، دیمھونی ءُ وپاداری ءِ چیدگ جوڑ بوتگ۔

بلال گونگیں ورنا راجی مڈی اَنت۔آیانی داتگیں دیمھونی تھنا یک ویلے نہ اِنت بلکیں آھوکیں پدریچ ءَ پہ یک کُلوھے کہ گُلامیں ڈیھ ءُ راج تھنا پہ گپ ءُ بٹاکاں نہ بلکیں داتگیں دیمھونی ءَ چہ آجو بنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ جتاجتائیں دمگ شال ءُ کیچ ءَ پاکستانی پوج ءُ چیریں ادارھانی کارندھاں سے مردم آوار جتگ ءُ بیگواہ کتگ اَنت-

گیشیں ھالانی رِد ءَ کیچ ءِ تھسیل دشت ءَ پاکستانی پوج ءَ یک مردمے آوار جتگ ءُ بیگواہ کتگ-

گیشیں ھالانی رِد ءَ 09 مئی 2026 ءَ دشت ءِ دمگ ڈمبی ءَ پاکستانی پوج ءَ یک ورنایے آوار جتگ ءُ بیگواہ کتگ-

آوار جنگ بیتگیں ورنا ءِ پجّار زمیر ء امیر جھمنند ڈمبی دشت نام ءَ چہ بوتگ-

ھمے وڑ پاکستانی پوج ءَ شش مئی 2026 ءَ شپ ءِ یک ءَ شال ءِ ھند سریاب دگ ءَ فیز آباد، کلی حبیب ءَ بیڑ برتگ ءُ سعید بلوچ ء لال محمد چہ لوگ ءَ آوار جتگ ءُ بیگواہ کرتگ۔

دومی نیمگ ءَ چہ کیچ ءِ ھند تربت، جوسک ءَ 25 اپریل 2026 ءَ پاکستانی چیریں ادارھانی کارندھاں بیڑبرتگ خالد ء ھاجی اختر آوار جتگ ءُ بیگواہ کرتگ۔

بیگواہ کنگ بیتگیں خالد ءِ درگت ءَ گوشگ بیگ ءَ اِنت کہ آ تربت آپسر ءِ جھمنند اِنت۔

چریشی ءَ پد آیانی درگت ءَ ھچ وڑیں ھال نیست زانگ بہ بیت بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت-

گوادر ءِ دمگ دشت شولیگ ءَ برجاہ ھوتانی بازار ءِ نزیک ءَ ڈرون اُرش ءَ دو مردم ٹپی بیتگ اَنت-

دمگی اِھوالکار ءِ رِد ءَ ٹپیانی پجّار صادق ء مراد محمد ءُ ماجد ء عبدالرحمان نام ءَ چہ بیتگ اَنت-

اِھوالکار ءِ گوشگ اِنت کہ یکشمبے ءِ روچ ءَ سھب ءَ دشت شالیگ ءُ آئی ءِ ھمگرنچیں دمگاں ڈرون بالگردانی یکشل ءَ بُرز بالی ءَ گندگ بیتگ اَنت-

بلے واکدار نیمگ ءَ چہ تنی وھدے اُرش ءِ درگت ءَ ھچ وڑیں گپ دیم ءَ نیاورتگ-

بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں یک بیانے ءِ تہ ءَ گْوشتگ کہ گوستگیں شپ ءَ بلوچ ریپبلکن گارڈز ءِ سرمچاراں نصیر آباد ءِ ھند ڈیرہ مراد جمالی ءِ نزیک ءَ میر حسن ءَ تراکناک شورواں دو بجلی ٹاور تباہ کتگ اَنت۔ تراک ءِ سبب ءَ یک ٹاورے کپتگ ءُ دومی ءَ را سک باز تاوان رس اتگ۔

جارکش ءَ گْوشتگ: مئے گل بی آر جی اے اُرش ءِ زمہ واری ءَ من ایت ءُ اے وڑیں اُرش داں بلوچستان ءِ آجوئی ءَ برجاہ مان اَنت۔

من انگت ہما کوہ، آبشار، ءُ میتگاں گیر کاراں

نبشتہ کار: لعل خان بلوچ

دی بلوچستان پوسٹ

آ اَنگت منی ھمراہ اِنت یا بوت کنت من تھنا وت ءَ ھمے باور ءَ دیگ ءَ آں کہ تو ھست ئے من انگت ھمے ماراں ءُ باز براں گوں وت ءَ گُشاں کہ ھرچی پیسر ءِ داب ءَ اِنت۔ ھما بے تْرانگیں زمانگ، ھلک ءُ کوچگ، آشک مزاجیں راہ ءُ در، ھما اسکول ءُ ھما بنچ، کہ ما یکجاہ نشتگ اتیں۔ من چماں بند کناں تَہ جیڑاں تو منی کِرّا نشتگ ئے- بچکندگ ءَ ئے ءُ بے پرواھی ءَ گوں ٹھک دیگ ءَ ئے، انچو گُشئے وھد ءَ مارا کمّو ھم نہ تلوسینتگ ءُ دور ءُ باریگ ھما پیسری ئین اَنت، وشھال ءُ بے ھاجتیں ، بلے چو کہ من چماں پچ کناں زندمان ءِ گوچن چماں سھرا بیت ءُ راستیں جاورھال سَک گران ءُ نہ سگوک اَنت۔ چو گرانیں بارے ءَ منی سینگ ءِ سرا ایر اَنت کہ پہ ساه ءِ زورگ ءَ جھد کنگی اِنت۔

ساربان، یار منی۔۔۔۔ مئے سنگتی چو کسہ ءَ نہ اَت۔ ما یک دومی ءِ گوماں تھنا زندے ناں بلکیں اھدے گوازینتگ۔۔ ھور کند اِتگ، ھور گریتَگ، اسکول ءِ زمانگ ءَ بگر داں شال ءِ دمک ءُ آبشاراں ما ھوری ءَ زندمان ءِ جھلی ءُ بُرزی دیستگ اَنت۔۔ نہ زاناں چونی ءَ بلے تو منی دل ءُ مجگ ءِ توک ءَ سان زُرتگ۔ مروچی ھمے اسرمندی اِنت کہ منی مجگ ءُ دل ءَ جنگے ودینتگ ئے ءُ من پرتو ند ءُ تاک دست ءَ کُتگ اَنت ۔

وشھالیں باریگ ھما اَت کہ ما دوئیں ابید یکے دومی ءَ ناسرجم اتیں۔ اسکول ءِ روچ، ہما بنچ، کتابانی سنگتی، دیوان ءُ ڈسکشن۔۔۔ مساپرے ءِ داب ءَ ما ھور اِتیں۔ میتگ، پدا شال ءُ زندمان ءَ مارا ھوری ءَ ماتکوھاں سر کُت۔۔۔ ابدو، من انگت ھمودا پشت کپتگاں ءُ زان ئے من کدی نہ جیڑ اِتگ اَت کہ یک روچے انچیں کئیت چہ ھمے بنچ ءَ پاد آھگ ءَ رند من پہ ابد ترا گار کناں ءُ تو چو مھرگے ءَ منی دستاں لگوش ئے۔ جون ھاکاں ھوار بیت ءُ زِرد مُدامی آباد بیت ءُ گوں من ھمدیوان بیت ۔

مردم گْوش اَنت تو شہید بوتگ ئے وتی زمین ءَ پہ جنگ کتگ ءُ کربانی داتگ، نمیران بوتگ ئے من اے گپ ءَ اشکنگ ءَ آں بلے من ءَ باور نہ بیت من وت ءَ ھما جھان ءِ تہ ءَ بندیگ کُتگ کہ اودا تو انگت زندگ ئے من تُرس ءِ آماچ باں وھدے کسے تئی نام ءَ پہ اے ھاتِر ءَ گیپت کہ تو رپتگ ئے، منی دماگ ءِ اندر ءَ ھزاراں جیڑه ودی بیت، من نزور باں، مجگ ءُ دل ءَ جنگ ودّگ ءَ ءُ اے جنگ من ءَ بے ھاٹیگ کنگ ءَ اِنت من اے چیز ءَ جیڑگ ھم نہ لوٹاں کہ تو گوں من ھمراہ نہ ئے، تئی ودار نوں بے مانا اِنت، تئی توار نزور اِنت ءُ من ءَ سر نہ بیت، تئی دروشم مجاں گیپتہ کہ نوں بھ ساپ ءُ پلگاری ءَ گوں سھرا نہ بیت ۔

من تئی نام ءِ گرگ ءَ چہ رکّاں، پرچا کہ تئی نام منی ھیال ءَ وھدے کیت، گواچن منی اندر ءَ چیہانٹگ ءَ بندات کنت۔ من تچگ ءَ آں.. چہ تئی گپاں، چہ یاتاں، چہ مردماں کہ تئی کسھاں گوں من کن اَنت. چہ ھرچ هما چیز ءَ کہ من ءَ تئی نیستی ءِ احساس ءَ دنت۔ من چہ اے راستی ءَ تچگ لوٹاں۔۔ من چہ اے زمانگ ءَ کنارہ آں کہ مناں ھمے باور ءَ دنت، تو اِد ءَ نئے ءُ من ترا کدی ھم دوبر دیست نہ کناں، مار اِت نہ کناں ۔
بلے دل ۔۔۔۔ دل کجا باور کنت؟ برے برے اناگہ ءَ آئی ءِ بچکند منی ھیال ءَ زاھر بیت ءُ من ءَ سک زدگ کنت. منی چماں چہ ارس ءِ رچگ بندات بیت، انچو گُشئے کسے ءَ چہ اندر ءَ منی باتن ٹپیگ کُتگ ءُ من ءَ پہ دارو ءُ درمان ءَ ساربان ءِ بچکندے پکار اِنت آئی ءِ ٹھک نوں ھاموشی یے جوڑ بوتگ ءُ اے ھاموشی ءَ من ءَ سُوتکگ من چہ وت جُست کناں کہ آ راستی ءَ شتگ؟ پدا یک انچیں ساھتے کیت کہ من ءَ آئی ءِ چمّانی تہ ءَ ھما جزم یات کیت، ھما مول ءُ مراد ۔۔۔ کہ آئی ءِ ھاترا ساربان ءَ ھرچی یلہ داتگ۔ ءُ پدا من ءَ انچوش سما بیت کہ آ ایوک ءَ جسمانی رد ءَ اَچ من دور اِنت، آئی ءِ واب، آئی ءِ جہد اَنگت زندگ اِنت ۔

زمین ءِ نہ سگوکیں گم، نہ ھلوکیں کِشک، پہ آجوئی ءَ ھمبلانی جھد ءُ سپر، اے کُل برجاہ اَنت۔۔ من سما کناں ساربان اگاں مروچی اَچ مئے چماں اندیم اِنت بلے آ پہ اے ھبر ءَ الم پھریگ اِنت کہ ھما راہ ءَ آئرا شھیدی رَس اِت، آ کشک ءَ انگت سنگت رھادگ اَنت، آئی رپتن ءَ بلکیں سنگتان آں ملور کُتگ بلے آ نزور نہ اَنت۔۔ جنگ ءُ جھد ھما داب ءَ روان اِنت ءُ دیمتر ءَ ھم روت داں آجوئی ۔۔ سنگت بلکیں مارا ایموشنلی نزور بہ کناں بَلے مُدامی مئے آئیڈیل ھست اَنت ۔

من نادراہ آں… بوت کنت کہ زھنی لحاظ ءَ، بوت کنت کہ جزباتی لحاظ ءَ۔ کہ تو پہ راستی ءَ شُتگ ئے ۔ بلے داں کدی؟ یک روچے من ءَ اَچ وتی ھیالاں درکپگی اِنت۔ یک روچے من ءَ اے گپ منگی اِنت کہ تو پدا نیا ئے۔ موتکیگ بوھگی نہ اِنت ءُ تئی راہ ءَ جھد کنگی اِنت ءُ تئی ناسرجمیں کار پہ گیگ ءُ گوم سرجمی ءِ نیمگ ءَ برگی اَنت ساربان تو ایوک ءَ منی سنگت نہ اِت ئے تو یک پگرے ءُ مرادے اِت ئے، یک ھمبلے اِت ئے، ءُ یک نا سرجمیں سپرے اِت ئے۔

کہ ما اودا نشتگ اتیں، سپر ءَ اِتیں، گوں مُلگر ءَ دیم پہ دیمے اتیں، جاھے ما دُژمن بےوار کتگ اَت۔ جاھے آئی مارا۔۔ بلے من انگت ایمن اِتاں کہ ما یکجاھیں۔۔ مروچی تو اد ءَ نئے ءُ ایندگہ درستیں چیز ھما داب ءَ جنزگ ءَ اَنت۔۔۔ من تہنا آں بلے تئی یات منی ھمراہ اَنت۔۔۔ بے باوریں کیپے کہ تو دوبر نیا ئے بلے من ءَ اے زھر ءِ پیالہ نوشگی اِنت۔۔ زمین وتی بچاں مرگ ءِ شیدائی کنت۔ تو ھم پہ زمین ءَ ھدوک اِت ئے۔ تئی واھشت اَت کہ تو پہ زمین ءَ چیزے بہ کن ئے۔ ترا زمین ءَ وتی ھمبازاں زُرت۔۔ چہ شھر ءَ ماتکوھاں آرت ءُ سر کُت ۔۔ ءُ پدا پہ مُدامی نمیران کُت ۔

دو روچ پیسر تئی گوانکو (مبائل) من ءَ اتک ءُ سر بوت۔۔ اے ساھتاں داں دیر ءَ من تھنا ایوک ءَ نشت ءُ ملور بوتاں۔۔ ھیران اتاں کہ تو پہ دلجمی رپتگ ئے؟ من ءَ نوں اے گپ منگی اِنت کہ تو اد ءَ نئے! چم تو وَ زان ئے برے برے گوار اَنت۔۔ ارسے درکئیت، ما ھم انسانیں، مارا ھم جاگہ نا جاگہے سِدَگ ءُ مردُمانی رپتن گنوک کنت بیرگ ءَ دل ءَ گُشت تئی مبائل ءَ پچ بکناں۔۔ نوٹسانی توک ءَ کہ من شتاں دل پہ کلھے گل بوت۔ چم پہ ساھتے تھار بوت اَنت، بالاد کروتک۔۔۔ تئی مھرانی نھاد گران اِنت ءُ پھل کن کہ من تئی رپتن آ کساس ءَ موتکیگ بوت نہ کت کہ من ءَ بوھگی اَت۔۔۔ بلے تو ھمراہ ئے۔ بلوچستان ءِ ھمُک دمک ءُ در پرتو ملور اِنت، تئی ھون ءِ وشبو ماں زمین ءِ ٹپی ئیں آزمان ءَ چو وشبوے ءَ ھر وھد ءَ تالان اِنت۔۔ مھر ءُ جنگ ءِ سپر نمیران اِنت ءُ تئی نبشتہ کُتگیں گپ انگت منی مجگ ءَ چکرگ ءَ اَنت ۔

مھر
‎
“تو منی زنگی ئیں تُپنگ ئے ”
“درتگیں جاٹا نے”
“یا کہ درمان نہ بوتگیں ٹپ ئے؟”
“چی یے ئے تو”
“گُلامیں بلوچے ئے؟”
“یا آزادیں ھیالے ئے؟”
مھر ءَ منی نیمگ ءَ چار اِت ءُ گُشت:
“من سرمچارے آں”
“نرے دُرّک آں”
“برے الماس آں ‘

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ دمگ اورناچ ءُ قلات ءَ چہ بمب تراکاں پاکستانی لشکر ءَ تاوان رس اتگ۔

خضدار ءِ دمگ اورناچ ءَ آر سی ڈی ءِ مزن شھدگ ءِ سر ءَ ناشناسیں مردمانی نیمگ ءَ بمبتراکے ءَ پاکستانی لشکر ءِ گاڑی نشانگ جوڑ کنگ بوتگ۔

گوستگیں روچ ءَ قلات ءِ دمگ چپر ءَ پاکستانی لشکر ھما وھد ءَ تراک ءِ تہ ءَ نشانگ جوڑ کنگ بوتگ کہ آ آپریشن ءِ واستا دمگ ءَ دیم ءَ روگ ءَ بوتگ اَنت۔ دمگی مردمانی رد ءَ اے تراک ءَ چہ لشکر ءَ تاوان رس اتگ۔

تراک ءَ چہ پد دمگ ءَ سلاہ بندیں جنگ ءُ چوپ بوتگ کہ اود ء پاکستانی لشکر ءَ ھوار دو بلوچ آجوئی لوٹوکیں مردم بیران بوگ ءِ ھال اِنت۔

واکداراں انگت ءَ اے وئیلانی بابت ءَ ھچ وڑیں ھال ءُ اھوال شنگ نہ کتگ۔