TBP Balochi

بلوچستان ءِ جتاجتائیں دمگاں چار مردم آوار جنگ ءُ یکے یل کنگ بیتگ-

گیشیں ھالانی رِد ءَ ھپدہ سالی ئیں شھاب بلوچ ء حاجی عطااللہ کہ میٹرک ءِ نودربرے سیزدہ مئی 2026 ءَ نیمروچ ءِ کساس ساھت دو ءَ واشک ءِ دمگ ناگ ءَ آیانی لوگ ءَ چہ ایم آئی ءُ پاکستانی پوج ءِ کارندھاں آوار جتگ ءُ بیگواہ کتگ – کھول ءِ رِد ءَ پوج ءَ لوگ ءِ سر ءَ بیڑبرتگ آ وتی ھمراھی ءَ برتگ، چریشی ءَ پد آئی ءِ درگت ءَ ھچ وڑیں ھال سر نہ بیتگ-

دومی نیمگ ءَ ھژدہ سالی ئیں یحییٰ بلوچ ء امیر بخش کہ یک دریاوردے یازدہ مئی 2026 ءِ شپ کساس 1:30 گوادر ءِ دمگ جیونی پانوان، آئی ءِ لوگ ءَ چہ ایم آئی ءُ ایف سی کارندھاں آوار جتگ ءُ بیگواہ کتگ-

ھمے وڑ ڈیرہ بگٹی ءِ تھسیل سوئی ءَ سی ٹی ڈی ءَ دو مردم زورانسری آوار جنی ءِ نشانگ کتگ ءُ بیگواہ کتگ-

زورانسری بیگواہ کنگ بیتگیں یک لیویز کارندھے کہ انّو پولیس ءَ ھمگرنچ کنگ بیتگ کہ آئی ءِ پجّار سراج پنّام ءِ بگا ء بنا بگٹی نام ءَ چہ بیتگ، وھدے کہ دومی ءِ پجّار گل محمد ء زر خان حمزانی بگٹی نام ءَ چہ بیتگ کہ آ یجوکیشن ڈیپارنمنٹ ءِ چوکیدارے-

دومی نیمگ ءَ یازدہ مئی 2026 چہ شال ءَ آوار جنگ بیتگیں ڈاکٹر ظھیر ء یعقوب جھمنند ھوشاپ کیچ دوازدہ مئی 2026 ءَ شال ءِ دمگ چہ جوائنٹ دگ ءَ یل کنگ بیتگ- کھول ءَ آئی ءِ یل بیگ گپ راست کتگ-

بلوچستان ءِ دمگ نوشکی ءُ مستونگ ءَ سلاہ بندیں مردماں ناکہ بندی ءِ وھد ءَ پوج ءُ پولیس ءِ کارگسانی سر ءَ اُرش کتگ انت-

سلاہ بندیں مردماں پولیس اسٹیشن ءِ سرا اُرش کتگ ءُ سلاہ ءُ دگہ سرکاری سامان دَزگپتگ انت۔

بلوچستان ءِ دمگ مستونگ ءَ ھالانی رد ءَ درینگڑہ ءَ بازیں سلاہبنداں ناکہ بندی کتگ ءُ چہ اود ےَ گوزوکیں گاڑیانی پٹ ءُ پول کتگ ءُ پٹ کتگ۔

ھالانی رد ءَ ھمے وھد ءَ نزیکیں پولیس اسٹیشن ءِ سر ءَ سلاہ بندیں مردماں اُرش کتگ ءُ پولیس ءِ سلاہ ءُ دگہ سرکاری سامان دست گپتگ انت۔

بلے اے وئیل ءِ تہ ءَ ھچ وڑیں تاوان ءِ ھال سر نہ بیتگ اَنت ۔

ھمے وڑ ءَ گوستگیں شپ ءَ نوشکی ءِ دمگ سرمَل ءَ سلاہ بنداں بازیں کچے ءَ شال تپتان ءِ بنجاھی شھدگ بستگ ءُ چِک ءُ تان کتگ – ءُ ھمے وھد ءَ بنجاھی شھدگ ءِ سر ءَ پاکستانی پوج ءِ دو گاڑی نشانگ کتگ انت-

دمگی مردمانی رد ءَ اُرش ءِ آسر ءَ پورسز ءِ یک گاڑی ءَ آس چِست بیتگ ءُ بازیں کارندھانی بیران ءُ زدگ بوگ ءِ ھال انت-

یات بہ بیت کہ مرچی مستونگ ءِ سلاھبنداں گوادر یونیورسٹی ءِ وائس چانسلر گوں آئی ءِ دگہ سئے ھمبلاں آوار جتگ ءُ گوں وت برتگ اَنت، ھما جاہ ءَ کہ رند ءَ بلوچستان سرکار ءَ ٹاہ داتگ کہ آوار جنوکانی ھلاپ ءَ سرچ آپریشن بیگ ءَ اِنت۔

بلوچستان ءِ جتا جتائیں دمگاں ناکہ بندی ءُ پولیس ءِ دست ءَ سلاہ ءِ چست کنگ ءِ بازیں وئیل بوتگ انت کہ ایشانی زمہ واری ءَ بلوچ آجوئی ءِ جتاجتائیں سلاہ بندیں گلاں زمہ واری زرتگ انت، البت انگت ءَ ھچ گل ءَ مرچیگیں وئیل ءِ زمہ واری نہ زرتگ۔

بلوچستان ءِ دمگ مستونگ ءَ گوادر یونیورسٹی ءِ وائس چانسلر ءَ ھوار چار مردمانی گمانی رنگ ءَ آوار جنگ ءِ ھال دیم ءَ اتکگ انت۔

بنشون ءِ رد ءَ گوستگیں شپ ءَ مستونگ ءِ دمگ کھڈکوچہ ءَ گوادر یونیورسٹی ءِ وائس چانسلر پروفیسر عبدالرزاق صابر، پرو وائس چانسلر سید منظور احمد، لیکچرر شکیل احمد ءُ آھانی ڈرائیور نامالومیں سلاہ بندیں مردماں آوار جتگ انت۔

ھالانی رد ءَ موٹر سائیکل ءِ سر ءَ سواریں سلاہ بندیں مردماں راہ ءِ سر ءَ روڈ بلاک کتگ ءُ آوار جتگ انت- آوار جنگ بوتگیں مردمانی گاڑی ءِ اوشتارینگ ءَ پد آ ھم وتی ھمراھی ءَ ناشناسیں جاھے ءَ برتگ اَنت ۔

یک سرکاری بنشونے ءَ اے وئیل ءِ پدرائی کتگ ءُ گْوشتگ کہ آوار جنگ بوتگیں مردمانی شوھازگ ءِ ھاترا سیکورٹی فورسز ءُ دمگی انتزامیہ ءِ نیمگ ءَ پٹ ءُ پول بندات کنگ بوتگ بلے انگت ءَ کس ءَ اے وئیل ءِ زمہ واری نہ زرتگ۔

بلوچستان ءِ جتاجتائیں دمگاں پاکستانی پوج ءُ مڈی بروکیں گاڑیانی سر ءَ سلاہ بنداں اُرش کتگ میجرے ءَ ھوار بازیں کارندھانی بیرانی ءِ ھال اِنت-

گیشیں ھالانی رِد ءَ چمالنگ ءَ ناشناسیں مردمانی نیمگ ءَ پاکستانی پوج ءِ یک گاڑی ءِ سر ءَ بمب تراکے کنگ بیتگ-

بمب تراک ءِ آسر ءَ میجر رینک ءِ سروک توصیف احمد بھٹی ءَ ھوار پنچ کارندہ بیران بیتگ اَنت-

ھمے وڑ نوشکی ءَ شیخ واصل ءِ ھند ءَ سلاہ بندانی مزنیں کچے ءَ سیندک ءَ چہ سُھر ءُ دگہ مڈی بروکیں بیست گاڑیانی ءُ آیانی پھازوکیں پوج ءِ کارندھانی سر ءَ راکٹ ءُ دگہ سلاھاں چہ اُرش کتگ-

ھمے میان ءَ کاروان ءِ پھازوکی ءَ ساڑی پاکستانی پوج ءُ اُرشکارانی میان ءَ تُرندیں میڑ بیتگ، چریشی ءِ آسر ءَ شش کارندھانی بیرانی ءِ ھال اِنت-

اُرش ءَ بازیں پاکستانی پوج ءِ کارندہ ٹپی بیتگ اَنت-

ھالانی رِد ءَ اُرش ءَ مڈی ءَ چہ سریچیں ھشت ٹرک تباہ وھدے کہ آ دگراں تاوان رس اِتگ- اُرش ءَ ٹرک ڈرائیورانی ھم جنگ ءِ ھال اِنت-

وئیل ءَ پد دمگ ءَ مزنیں کچے ءَ پاکستانی پوج ءِ آیگ بندات بیتگ وھدے کہ وئیلجاہ ءَ پولیس ءُ ایمبولینس ھم دیم دیگ بیتگ اَنت-

ھمے وڑ دالبندین ءِ نزیک ءَ سلاہ بندیں مردماں ناکہ بندی کنان ءَ گاڑی پٹ ءُ پول کتگ وھدے کہ اے میان ءَ کاپر پروجیکٹ ءِ سیاہ دک ءِ سے کاردار دزگیر کتگ ءُ برتگ اَنت-

سلاہ بنداں اے میان ءَ سیندک پروجیکٹ ءِ ھم یک گاڑی یے گپتگ ءُ گوں وت برتگ-

پاکستانی پوج ءِ واکدار ءَ تنی وھدے وئیل ءِ پدر ءُ رد نہ کتگ، بلے اے دمگ ءَ بلوچ آجوئی لوٹوکیں سلاہ بندیں گل پُرکار اَنت ءُ اے وڑیں اُرش کن اَنت-

دومی نیمگ ءَ چمالنگ ءَ بیتگیں اُرش ءِ زمہ واری بی ایل اے ءَ منّ اِتگ

بلوچ لبریشن آرمی ءَ وتی شنگ کتگیں درشان ءِ تہ ءَ گْوشتگ کہ مئے سرمچاراں مروچی چمالنگ ءِ دمگ ‘بالا ڈاک ‘ ءَ زورگریں پاکستانی پوج ءِ کاروان یک ھمگرنچیں اُرشے ءَ نشانگ کتگ اَنت – اے کاروائی بی ایل اے ءِ چیریں بھرگ زراب ءَ داتگیں تچکیں چیریں ھالانی بُنیاد ءِ سر ءَ کتگ-

جارکش ءَ گوشتگ کہ کاروائی ءَ اول ءَ یک گاڑی یے ریموٹ کنٹرول تراک ءَ چہ تراکینتگ- اشی ءَ پد دومی گاڑی ءِ سر ءَ تُرندیں اُرشے کتگ- اے سوبمندیں اُرش ءَ میجر توصیف بھٹی ءَ ھوار دُژمنیں پوج ءِ ھشت کارندہ مرتگ اَنت- بی ایل اے اے کاروائی ءِ زمہ واری ءَ منّ اِیت، وھدے کہ وئیل ءِ گیشیں سرپدی ءَ زوت رسانکدر ءَ شنگ کن ایں-

کیچ ءِ بنجاھی شھر تربت ءِ دمگ ڈنک خلیل آباد ءَ ناشناسیں سلاہ بندیں مردمانی تیرگواری ءَ یک مردمے بیران ءُ آئی ءِ برات ٹپیگ بوتگ۔

پولیس بنشون ءِ رد ءَ بیران بوتگیں مردم ءِ پجار وحید ء عبدلکریم ءُ ٹپیگ آئی ءِ برات حبیب الرحمان ء عبدالکریم ءِ نام ءَ زانگ بیتگ۔

بنشون ءِ رد ءَ گشگ بیتگ کہ دوئیں برات خدرئی میتگ کردگاپ، مستونگ ءِ مردم اَنت ءُ آ دمگ ءَ بورنگ ءِ کار کنگ ءَ بیتگ اَنت۔

وئیل ءَ پد ارش کنوک تچگ ءَ سوبین بوتگ اَنت۔ ٹپیگ پہ درمان کنگ ءَ نادراھجاہ ءَ سر کنگ بوتگ اَنت ءُ پولیس ءَ اے وئیل ءِ پٹ ءُ پول بندات کتگ۔

بلوچستان ءِ دمگ پنجگور ، تربت ءُ دشت ءَ چار لاش دزکپتگ انت ۔

پولیس ءِ رد ءَ بیران بوتگیں مردم سئے جتا جتائیں وئیلاں تیرگواری ءَ بیران بوتگ اَنت ءُ یکے لھتیں روچ پیسر آوار جنگ بوتگ۔

پولیس ءِ رد ءَ پنجگور ءِ دمگ سریکوران ءِ ھند العمارت ہوٹل ءِ نزیک ءَ زمباد ءِ گاڑی ءَ دو مردمانی لاش دست کپتگ انت۔ ایشانی پجار نبیل ء جمیل اھمد ءُ شھاب ء نزیر اھمد ءِ ناماں بوتگ انت کہ گشگ بیتگ کہ آ سند ء سراور ءُ دِز پروم ءِ نندوک اَنت۔

پولیس ءِ واکداراں گشتگ کہ بنداتی پٹ ءُ پول ءَ چہ پدر بوتگ کہ دوئیں مردم نزیکیں دوری ءَ تیرگواری ءَ بیران بوتگ انت۔

دومی نیمگ ءَ کیچ ءِ بنجاھی شھر تربت ءَ ھم یک ورنایے ءِ لاش دست کپتگ ۔ پولیس ءِ رد ءَ کیچ ٹرمینل روڈ ءِ سر ءَ بانک ءِ چڑھائی ءِ جاہ ءَ دست کپتگیں لاش ءَ بازیں تیرانی ٹپ پر انت۔

بیران بوتگیں مردم ءِ پجار جان محمد ءِ قادربخش ءِ نام ءَ بوتگ کہ آ گومازی تمپ ءِ نندوک ءُ ھشتمی کلاس ءِ نودربرے ۔

پولیس ءِ رد ءَ لاش ٹیچنگ ہسپتال تربت ءَ سر کنگ بوتگ۔

دومی نیمگ ءَ تھسیل دشت ءِ دمگ چہ ملائی نگور ءَ یک مردمے ءِ لاش ھم دزکپتگ۔ ھسپتال ءِ بنشون ءِ رد ءَ بیران بوتگیں مردم ءِ پجار کھڈان دشت ءِ نندوکیں ماسٹر عابد ء مھمد عمر ءِنام ءَ بوتگ۔

پولیس ءِ بنشون ءِ گشگ انت کہ ماسٹر عابد ءِ گمانی ءَ لھتیں روچ پیسر آوار جنگ بوتگ ءُ نوں آئی ءِ لاش دزکپتگ۔ المی ئیں کارروائی ءَ پد لاش کھول ءِ دست ءَ دیگ بوتگ۔

کیچ ءِ دمگ چہ زامران سیادی داروکیں برھان الدین ء محمد نعیم ءِ لاش دزکپتگ-

دمگی اِھوالکار ءِ رِد ءَ برھان الدین بیست ھشت اکتوبر 2025 ءِ کساس 6:30 ءَ ڈیتھ اسکواڈ ءُ ایم آئی ءِ کارندھاں تربت ءِ دمگ بگ میری ءَ برجاہ آئی ءِ لوگ ءَ زورانسری بیگواہ کتگ-

بلوچ یکجھتی کمیٹی ءِ رِد ءَ شش ماہ ءُ چار روچ ءَ تاں کھول آزار، بے دلجمی ءُ اُمیت ءِ واتری ءِ راھچار بیتگ اَنت، بلے انساپ ءِ جاہ ءَ آ برھان الدین ءِ تیرسُپتگیں لاش دزکپتگ-

بی وائی سی ءِ رِد ءَ لاش ءِ سر ءَ ترسناکیں لُٹ ءُ کُٹانی نشان تچکی ءَ بیتگ اَنت- گل ءِ گوشگ اِنت کہ برھان الدین ریاستی آزارجاھاں بندیگ کتگ، ھچبر آمیدگس ءَ پیش کنگ نہ بیتگ، آئی ءِ بُنیادی انسانی ھک ورگ بیتگ اَنت ءُ اشی ءَ آ درکانودی کُشتگ-

یک درشانے ءِ بلوچ یکجھتی کمیٹی ءَ بلوچ راج ءِ ھلاپ ءَ برجاہ زورانسری آوار جنی، ٹارگٹ کلنگ ءُ درکانودی کوش ءِ پالیسی ءَ تُرندی ءَ ایر جنان ءَ گوشتگ کہ مروچی آ نزگاریں ورنا ھم مُھر نہ اَنت کہ آ تھنا وتی کھول ءِ رکینگ ءِ ھاتر ءَ جُھد کنگ ءَ اَنت-

گل ءِ میان اُستمانی مردم ءُ انسانی ھکانی گلاں چہ دزبندی کتگ کہ آ وتی بے تواری ءَ بہ پروش اَنت زوت گامگیج بزور اَنت پرچاکہ بلوچستان ءِ مردم ھمکروچ زوراکی، لَٹ ءُ لُٹ ءُ چُکچینی ءِ جاورانی دیمپانی کنگ ءَ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں دہ مئی 2026 ءَ سوراب ءِ دمگ بینچہ ءَ آ رسی ڈی شھدگ سر ءَ سنگر گپتگ زورگریں پاکستانی پوج ءِ کاروان راکٹ لانچرز، کسان مشین توپگ ءُ دگہ وتکاریں سلاھاں چہ ھما وھد ءَ اُرش ءِ نشانگ کتگ وھدے پوجی کاروان یک بُنجلے ءَ چہ دومی بُنجل نیمگ ءَ روگ ءَ بیتگ اَنت- دو گاڑی سرجمی ءَ نشانگ ءِ تہ ءَ اَتکگ اَنت چریشی ءِ آسر ءَ زورگریں پوج ءِ پنچ کارندہ مرتگ ءُ چار ٹپی بیتگ اَنت، وھدے کہ اُرش ءِ نشانگ آؤکیں دوئیں گاڑی سرجمی ءَ ناکاراہ بوتگ اَنت-

جارکش ءَ گوشتگ اُرش ءَ پد بینچہ چیک پوسٹ ءَ چہ دُژمن ءِ کُمک ءِ ھاتر ءَ دگہ کارندہ پیشگامی ءِ جُھد کتگ بلے اود ءَ ساڑی پیسر ءَ چہ سنگر گپتگیں سرمچاراں پوجی کاروان ءِ کُمک ءِ ھاتر ءَ سُر ءُ پُر کنوکیں ٹولی ءِ سر ءَ ھم اُرش کتگ آ پشتکنزی کتگ- چریشی ءَ چہ زورگریں پوج ءِ دگہ جانی ءُ مالی تاوان چست کپتگ-

جارکش ءَ گْوشتگ کہ سرمچاراں دہ مئی 2026 ءَ ھاران ءِ دمگ تاگزّی ءَ بُنجاھی پُھل سر ءَ برجاہ فرنٹیر کور (ایف سی ) چیک پوسٹ اُرش ءِ نشانگ کتگ- سرمچاراں اے کاروائی ءَ راکٹ لانچر، گرنیڈ لانچر ءُ دگہ وتکاریں سلاہ کارمرز کتگ، چریشی ءِ آسر ءَ پوج ءِ دو کارندہ جاہ پہ جاھی مرتگ اَنت ءُ سے ٹپی بیتگ اَنت-

جارکش ءَ گوشتگ کہ ھپت مئی 2026 ءَ کولواہ ءِ دمگ مالار دمب ءَ مک کتگیں چاروگی ٹاور ءِ سر ءَ تیرگواری کتگ ناکارہ کتگ ءُ مشینری مانداشتگ اَنت-

جارکش ءَ گوشتگ اے میان ءَ نزیکیں پوجی بُنجل ءِ کارندہ سرمچاراں جتاجتائیں نیمگاں چہ انگیر ءَ جُھد کتگ، بلے سرمچاراں پہ وھد ءَ کاروائی کنان ءَ پوج ءِ سر ءَ اُرش کتگ، چریشی ءِ آسر ءَ زورگریں پوج پشتکنزی ءَ لاچار بیتگ- اے میڑ ءَ پوج ءَ جانی تاوان چست کنگ کپتگ-

جارکش ءَ گْوشتگ کہ مئے سرمچاراں شش مئی 2026 ءَ مستونگ اڈہ سر ءَ پولیس ءِ جھلی فورس ءِ گشتی ٹولی ءِ سر ءَ اُرش کتگ آ دزگیر کتگ اَنت ءُ آیاں کلاشنکوف دستیگ کتگ اَنت، بلے جست ءُ پُرس ءَ پد پولیس کارندہ انسانی ھمدردی بنیاد ءَ یل کتگ اَنت-

گُڈی ءَ جارکش ءَ بلوچستان لبریشن فرنٹ ءَ جتاجتائیں بیتگیں اُرشانی زمہ واری منّ اِتگ اَنت-

بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ گوستگیں شپ ءَ بلوچ ریپبلکن گارڈز ءِ سرمچاراں نصیر آباد ءِ دمگ میرواہ ءَ اوچ پاور پلانٹ ءَ چہ شال ءَ رؤکیں لین ءِ دو ٹاورز ءِ شورو پٹ کتگ ءُ تراک ءَ چہ تباہ کتگ- تراک ءَ دو ٹاورز کپتگ اَنت وھدے کہ گیش دو ٹاوراں ھم تاوان رس اِتگ-

جارکش ءَ گْوشتگ کہ مئے گل بی آر جی اے اُرش زمہ واری ءَ منّ اِیت ءُ اے وڑیں بلوچستان ءِ وتواجھی ءَ تاں برجاہ بنت-

کیچ ءِ دمگ دشت بلنگور کراس ءَ پاکستانی لشکر ءُ ایف سی ءِ نیمگ ءَ بلڈوزر ءِ کمک ءَ بازیں کچے ءَ دکانانی ڈروھینگ ءِ ھال دیم ءَ اتکگ انت-

دمگی دکاندار ءُ مھلوک ءَ اے کارروائی ءَ را گریبیں مردمانی لاپ جنی لیک اتگ۔

دمگی مردمانی رد ءَ مردماں وتی کمک ءَ بالنگور کراس ءِ جاہ ءَ کسان ءُ مزنیں دکان جوڑ کتگ انت کہ اودا روچ ءِ لوٹ ءُ گزر، ھوٹل، ورکشاپ ءُ دگہ کاروباری بنجل ھست انت۔

اے دکاناں سداں ھاندان روزگار داتگ انت کہ گیشتریں ھاندان گریب ءُ میان اُستمانی تبک ءِ مردم انت۔

دمگ ءِ نندوکیں مردمانی گْوشگ اِنت کہ اے آپریشن ءِ سوب ءَ نہ ایوک ءَ دکاندار سکیں مالی ناگیگی ءِ آماچ بنت، بلکیں سداں مزدور ءُ آھانی کھول ھم تاوان ءِ آماچ بنت۔