نبشتانک: پروش نہ وارتگیں گَھگیری: بانک کریمہ بلوچ ءِ سیاسی جھد ءِ سر ءَ چمشانکے
نبشتہ کار: شاھان بلوچ
دی بلوچستان پوسٹ
سیاست ءُ راجی جُنزانی تہ ءَ زالبولانی ارزشت ءُ کِرد ھِچ وڑ ءَ شموشگ نہ بیت زالبولاں زند ءِ ھَر تَک ءُ پھناتاں، سیاست ءُ راجی جُھد ءَ ھوار، مزنیں کِساسے ءَ بھر زُرتگ ءُ کِرد پیلو کُتگ زالبولاں وتی راجی آجوئی ءِ جُنز، کومی ھکّانی لوٹ ءُ لس مھلوک ءِ بار وتی کوپگاں بستگ ءُ جھد کُتگ، راجدپتر مارا اے گواھی ءَ دنت کہ گُلامیں راجانی تہ ءَ زالبولاں پہ وتی زمین ءِ وت واجھی ءِ ھاتِر ءَ باز جھد کُتگ آیانی تہ ءَ بسنتی دیوی، ھِندوستان ءِ اُدّا دیوی، رانسم کوٹی، وینی منڈیلا چہ اپریکہ ءَ، پلستین ءِ لیلہ خالد ءُ بلوچ راجی جنز ءِ تہ ءَ گُل بی بی، بانڑی شیھک ءُ سیمُک ءِ مزنیں کِردے گِندگ بیت ھمے رنگ ءَ بلوچ راجی جُنز ءِ تہ ءَ یک نامے لُمّہ ءِ وتن بانُک کریمہ بلوچ ءِ نام ءِ سر ءَ ھم زانگ بیت۔
بانُک کریمہ یک اَبرمندیں ءُ نزریاتی راھشونے بیت بانُک 10 پروری 1983 ءَ واجہ مھراب ءِ گِس ءَ دبئ ءَ ودی بیت واجہ مھراب تُمپ ءِ جھمنندے بیت بلے اے وھداں کہ بانک ودی بیت واجہ مھراب گوں وت ھاندان ءَ دبئ ءَ بیت اے بانک ءِ وشبھتی بیت کہ بانک ھما گِس ءِ تہ ءَ ودی بیت کہ اود ءَ آئی ءِ سیاد ءُ وارِس چہ پیسر ءَ راجی جُنز ءِ تہ ءَ جھد ءَ بنت ءُ بانک چہ اولی روچ ءَ راجی جنز ءِ ارزشت ءِ بابت ءَ سرپدی ھیل کنت 2005 ءَ بِگر دانکہ 2020 ءَ بانک یک توانگریں راھشونے ءِ دروشُم ءَ پہ وتی زمین ءِ آجوئی ءُ بُنکّی ھَکّانی واستا جھد کنت بلوچستان ءِ راجی گلانی تہ ءَ یک مزنیں نامے بی ایس او آزاد (بلوچ اسٹوڈنٹس آرگنائیزیشن) ئیگ اِنت بی ایس او آزاد ءِ دیمروی ءُ راجی جُنز ءِ تہ ءَ شریں رنگے ءَ کار کنگ ءِ مستریں کِرد ءِ بانکے بوتگ بانک کریمہ 2005 ءَ بی ایس او ءَ ھوار بیت چوشکہ بی ایس او ءِ جُنز یک آشوبی جُنزے بیت ءُ بانک ھم دِلیر ءُ ابرمندیں راھشونے بیت ءُ بی ایس او ءِ توک ءَ مھکمیں راھشونے ءِ دروشُم ءَ کار کنت یک دِلیریں جُھکارے ءِ سوب ءَ بانک 2006 ءَ بی ایس او ءِ سی سی ممبر گِچین کنگ بیت اے وھد ءَ بانک، بلوچستان ءِ تہ ءَ یک نام کپتیں راھشونے ءِ دروشُم ءَ زانگ بیت۔
ھمے رنگ ءَ 2008 ءَ بانک بی ایس او ءِ جونئیر وائیس چئیر پرسن گِچین کنگ بیت اے وھد ءَ بانک وتی لیکہ، سَسّا ءُ پلسپہ ءَ گیشتر توانگر ءُ مھکم کنت ھمے رنگ ءَ 2012 ءَ بانک بی ایس او ءِ سینئیر وائیس چیر پرسن گِچین کنگ بیت اے وھد ءَ بانک سک باز سَکّی ءُ جپاکشیانی دیمپان بیت بلے انگت بانک چو کوہ ءَ مھکم ءُ توانگر بیت ءُ پہ وتی راج ءَ جھد کنت۔
2008 ءَ پد بلوچ راجی آجوئی جُنز پاکستان ءِ کاؤنٹر پالیسی ءِ زَد ءَ کیت گُڑا بی ایس او سک باز جپاکشیانی آماچ بیت ءُ آئی ءِ نِزور ترّینگ ءِ جھد کنگ بیت اے وھد ءَ بانک چو مھکمیں کلاتے ءَ اے جپاکشیانی دیمپان بیت ءُ وتی راج ءِ راھشونی ءَ کنت وھداں کہ بی ایس او ملک ءِ تہ ءَ بند کنگ بیت داں اے وھد ءَ بانُک ءَ دراھیں زمہ واری کوپگ ءَ بنت اے وھد ءَ بلوچ چُکچینی یک نوکیں دروشُمے زور اِیت 2014 ءِ وھد ءَ چئیرمین زاھد ( چئیر پرسن بی ایس او آزاد) کہ بیگواہ کنگ بیت گُڑا اے وھد ءَ بانک یک اِکٹِنگ چئیر پرسنے ءِ دروشُم ءَ بی ایس او ءِ سروکی ءَ کنت ءُ راجی جنز ءَ برجم داریت اے زمانگ ءَ بانک باز مھکم ءُ توانگر بیت پہ چئیرمین زاھد ءِ آجوئی ءِ واستا بانک یک زھرشانی نِندانکے ءِ جار ءَ جنت ھمے دَرگت ءَ بانک 40 روچ ءَ یک زھرشانی نِنداکے ماں کراچی ءَ برجم دار اِیت وتی بازیں جھد ءُ کُربانیاں چہ بانک 2015 ءَ بی ایس او آزاد ءِ اولی زالبولیں چئیر پرسن گِچین کنگ بیت 2015 ءَ ایشیا ءِ تہ ءَ، بانک یک نودَربَر گلے ءِ اولی زالبولیں راھشون جوڑ بیت۔
اے وھد ءَ کہ بانک بی ایس او ءِ سروکی ءَ کنگ ءَ بیت اے وھد ءَ بی ایس او بازیں اڑ ءُ جَنجالانی آماچ بیت بی ایس او ءِ سر ءَ پاکستان ءِ زلم ءُ زوراکی، گار ءُ بیگواھی، تیراں سُپتگیں کُنٹانی دور دیگ برجاہ بنت اے وھد ءَ بانک بلوچستان ءِ ھند ءُ دَمگاں، گیشتر مکُران ءِ نیمگ ءِ زالبولان ءَ سرپدی دنت کہ شُمارا پہ وتی گار ءُ بیگواھیں مَردُماں ءُ بُنکّی ھَکّانی واستا اے اِستان ءِ دیمپان بوّگی اِنت ءُ گَھگیری کنگی
اِنت۔
2008 ءَ ڈاکٹر خالد ءِ شھید کنگ اے گواھی ءَ دنت کہ بانُک چینکس دلیر ءُ توانگر بوتگ ھمے رنگ ءَ 2017 ءَ ماسٹر نورجان ھم شھید کنگ بیت بانک ءِ نزیکیں سیادانی شھید کنگ ءَ پد اوں بانک ءَ وتی جھد ءَ چو چلتن ءَ مھکم داشت بانک اے وھد ءَ ھرچ سِلاہ ءِ گوں زمہ واری ءَ زور اِیت ءُ لس مھلوک ءَ را شریں رنگے ءَ سرپد کنگ ءِ جھد ءَ کنت ھمے رنگ ءَ بانک سِلاہ کنت کہ بی ایس او ءُ بی این ایم یکجاہ ءُ ھور بنت ءُ یک سنّتی یے بی این ایپ ءِ نام ءَ جوڑ کنت ءُ دیمتر ءَ 2018 ءِ بی ایس او ءِ کونسل سیشن ءَ بی این ایپ ھلاس کنگ بیت بی این ایپ ءَ ھر سے ماہ ءَ پد بلوچستان ءِ جتا جتائیں ھنداں مشکے، پنجگُور، جاؤ، آواران، نال، تُربت، ءُ دگہ جاھاں وتی مراگشاں برجم داشت اَننت ءُ لس مھلوک ءَ را راجی جنز ءِ بابت ءَ سرپدی دات۔
بی ایس او ءِ 2015 ءِ کونسل سیشن ءَ اے سِلاہ کنگ بیت کہ بانک کَینَڑا ءَ بُروت ءُ بلوچ ءُ بلوچستان ءِ جیڑھاں دُنیا ءَ پیش بِدار اِیت ءُ دیم ءَ بیار اِیت پرچا کہ اے وھد ءَ بلوچستان ءِ سرزمین ءَ نندگ ءُ سیاست کنگ سک گران جوڑ کنگ بوتگ اَت اِستان ءِ زُلم ءُ زوراکی، روچ پہ روچ گیشتر بوان اِت اَنت کَینَڑا ءَ سَر بوگ ءَ پد بانک یک گُلگِدارے ءَ گُش اِیت کہ ” بلوچستان ءِ جاور پہ بلوچاں نگیگ اَنت من اِد ءَ اتکگاں اے منی گَل ءِ سِلاہ بوتگ کہ ما وتی راجی جھد ءَ میان اُستُمانی ستاہ ءَ ھم برجم بِداریں“ بانک ءِ درانڈیھ بوگ ءَ پد بانک ءَ بلوچستان ءِ سرزمین ءَ بازیں سَسّا ءُ لیکہ پشت گیتک اَنت ءُ ھمے سَسّایانی سوب اَت کہ بازیں بلوچ زالبول راجی جنز ءِ تہ ءَ ھوار بوت بانک ءِ جھد ءُ کُربانیانی سوب ءَ 2016 ءَ بانک ءِ نام بی بی سی ءِ 100 اسرمندیں زالبول راھشونانی تہ ءَ ھوار بیت۔
بانک وھدے کہ درانڈیھ بیت داں بازیں میان اُستُمانی گلاں روت ءُ بلوچ ءُ بلوچستان ءِ جیڑھاں دُنیا ءِ دیم ءَ کار اِیت اے درگت ءَ 2018 ءَ بانک یو این (یونائیٹڈ نیشنز) ءَ جینڈر ایکوالِٹی ءِ سر ءَ گپ کنت ءُ بلوچستان ءِ مُردُماں اے کلوہ ءَ دنت کہ زالبول ءُ مردین آدم برابر اَنت بانُک گُش اِیت کہ زالبولاں اے ھک ھست کہ آ سیاست ءُ وانگ ءِ پڑ ءَ گیش ءَ چہ گیش بھر بُزور اَنت اے بانک ءِ مھکمی ءِ سوب اَت کہ ”نیویارک ٹائمز“ ءَ وتی تاکبند ءِ تہ ءَ بی ایس او ءَ بلوچستان ءِ مستریں نودَربَر گل لیک اِیت۔
2017 ءِ وھد ءَ پاکستان بانک ءَ را دمکی دیگ ءَ بندات کنت ءُ گُش اِیت کہ اگاں تو وتی سیاسی چِست ءُ ایر بند نہ کُت اَنت گُڑا تو گوں تئی ھمراھاں ھوار شھید کنگ بہ اِت بلے بانک اے لیکہ ءَ رَد کنت ءُ اِستان ءَ را جواب کنت ءُ وتی مھکمی ءَ برجاہ داریت۔
2018 ءِ وھد ءَ بی ایس او ءِ 21 کونسل سیشن ءَ بانک بی این ایم ءَ جوائن کنت ءُ زالبولیں جُھدکارے ءِ بستار ءَ کار کنت۔ کَینَڑا ءِ زمانگ ءَ بانک ءِ دلیری، تاکت، توکل انگت چو کوہ ءَ مھکم بیت آ میان اُستُمانی گَلانی تہ ءَ مُدام بلوچ ءُ بلوچستان ءَ پیش کنت ءُ اِستان ءِ راستی ءَ دنیا ءِ دیم ءَ کار اِیت اے وھد ءَ پاکستان باز جھد کنت کہ بانک چہ اے راہ ءَ دائمی گار ءُ بیگواہ کنگ بہ بیت ھمے رنگ ءَ پاکستان، کینَڑا ءِ شھر ، ٹورنٹو ءَ بانک ءَ بیگواہ کنت ءُ 20 دسمبر 2020 ءَ بانک ءِ لاش کینَڑا ءِ کورے ءِ تہ ءَ دور دیگ بیت ءُ بانک شھید کنگ بیت۔
بانک ءِ جھد، جنگ، کُربانی ءُ گَھگیری ءِ سوب ءَ بی ایس او بانک ءَ را ”لُمّہِ ءِ وتن“ ءِ نام ءَ دنت بہ گند ئے اے وھد ءَ بانک مئِے میان ءَ ساڑی نہ اِنت بلے آئی ءِ سَسّا ءُ لیکہ پہ ابدمانی زندگ اَنت اے سَسّا ءُ لیکہ پہ آیوکیں پدریچاں چو راھشونی ءَ کار کن اَنت بانک ءَ بلوچستان ءِ ھرچ ھند ءُ دمگاں آشوب آؤرت ءُ ھرچ بلوچ ءَ را سرپدی دات کہ پہ زِندگ بوگ ءِ ھاتِر ءَ بلوچستان ءِ سرزمین ءَ گَھگیری ءُ سَرانی کُربان کنگ اَلّمی اِنت
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
