TBP Balochi

بلوچستان ءِ دمگ کیچ ءِ ھند دشت ءَ ناشناسیں سلاہ بندیں مردماں روڈ ءِ کار کنوکیں شرکت ءِ ڈمپر مانداشتگ انت-

اھوالانی رد ءَ ویل گوستگیں روچ ءِ بیگاہ ءَ تولگی ءُ کوھک ءِ میان ءَ جوڑ بیوکیں روڈ ءِ سر ءَ پیش اتکگ کہ اود ءَ سلاہ بنداں روڈ ءِ کار بند کتگ ءُ ڈمپر مانداشتگ انت-

زانگ بہ بیت بلوچستان ءِ دگہ جاھاں ھم اے دابیں ویل پیش آیگ ءَ انت کہ اود ءَ سرکاری کارشوناں بندوکیں ساز ءُ سامان نشانگ کنگ بوگ ءَ انت-

گوست ءَ اے دابیں ویلانی زمہ واری بلوچ آجوئی لوٹوکیں گلاں زرتگ انت کہ آیانی گوشگ انت کہ اے روڈاں گیشتر پوج وتی کارمرد ءُ آسانی ءَ کارمرد کنت انت پرے ھاتر ءَ اے روڈ ءُ ساز ءُ سامان نشانگ کنگ بوگ ءَ انت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتف کہ مئے سرمچاراں دوازدہ دسمبر ءَ نیمروچ وھد ءَ کساس دوازدہ ءَ آواران شھر ءَ آرمی ءِ بریگیڈ ھیڈکوارٹر ءُ بُنجاھی بُنجل نشانگ کتگ- سرمچاراں بازیں مارٹر گولے آس داتگ کہ بُنجاھی بُنجل ءُ ھیڈکوارٹر ءِ تہ ءَ کپتگ- پروش وارتگیں زورگریں پوج ءَ آواران ءِ شھر ءَ چہ ھمگرنچ نزیکیں لوگانی سر ءَ بے کساس مارٹر گولہ آس داتگ کہ آبادی دمگاں کپتگ اَنت-

جارکش ءَ گوشتگ کہ زورگریں پوج ءِ مزنیں بنجل ءِ کش ءَ پوج ءِ چیردستی ءَ ایپ سی ءِ وانگجاہ ءِ نام ءَ یک وانگی ادارھے جوڑ اِنت۔ مارٹر ءِ یک گولھے ھمے ایف سی وانگجاہ ءِ سر ءَ کپتگ۔ بی ایل ایف چہ رسانکدرءِ کمک ءَ بلوچ مھلوک ءَ ھال دنت کہ اے وانگجاہ یک وانگی ادارھے ءِ گیش نہ پوجی درسگاھے کہ اود ءَ دری وانگ ءَ ھوار زھگاں چہ بلوچ زرمبشت، دود ءُ گھگیری لبزانک ءَ دور دارگ ءَ اِنت۔ اے نام ءِ وانگجاہ ءَ آیوکیں وھد ءَ بلوچ زھگاں پوجی ادارھاں ھوار کنگ ءِ یک شوربندی یے۔

جارکش ءَ گوشتگ کہ بی ایل ایف گوں بلوچ کھولاں دزبندی کنت اے پندل سازیں شوربندی ءَ شری ءَ سرپد بہ بنت پرچا کہ اے گوں بلوچ ءِ پدریچ ءَ بندوکیں جیڑھے۔ اے ھم گُش ایں کہ مزنیں کاروائیانی وھد ءَ پوجی بنجلانی نزیک ءَ زھگانی تاوان بوگ ءِ ھم گمان بیت۔ اے ناگیگیں جاوراں سرپد بہ بہ اِتءُ بلوچ کھول وتی زھگاں چہ اے وڑیں ادارھاں دور بہ دار اِت۔

جارکش گوشتگ کہ زی یک دگہ کاروائی یے ءَ بیگاہ ءِ ادار ھپت ءَ سرمچاراں آواران ءِ ھند کنیرہ ءَ پاکستانی پوج ءِ بنجل ءِ سر ءَ چہ سکا نزیک ءَ اُرش کرتگ۔ اُرش ءِبندات ءَ گوں راکٹ لانچراں بنجل نشانگ کرتگ۔ یک گولایے پوج ءِ پھازداریں سنگر ءِ سر ءَ کپتگ کہ چہ ایشی ءَ دو کارندہ جاھی مرتگ۔ پد ءَ سرمچاراں ایل ایم جی ءُ اسنائپر توپک ءَ بنجل نشانگ کرتگ۔

جارکش ءَ گوشتگ کہ سرمچاراں چیریں ھالے ءِ پژدر ءَ یک دگہ کاروائی یے کرتگ ءُ یک شمبے ءِ روچ ءِ ادار یک ءَ تُربَت ءِ ھند آپسر ریسرچ پارم ءَ رھمدل ء اپزل تیرگواری کرتگ ءُ کشتگ۔ کشگ بوتگیں مردم تُربَت ءِ ھند آپسر ڈاکی بازار ءِ جھمنند اِنت کہ آ زورگریں پوج ءِ نزیکیں کارندھے بیتگ۔ رھمدل چہ ایشی ءَ پیش گوں زلخان ءَ ھوار کار کرتگ ءُ زلخان ءِ کوش ءَ پد آ ایم آئی ءِ یک دگہ کارندھے نصیر ءِ گون ءَ کار ءَ بوتگ۔ نصیر ءِ کوش ءَ پد آ تُربَت ءَ برجاھیں ایم آئی ءِ کارگس ءَ کاراں تچک ءَ ھوار بوتگ۔

آئی گوشتگ کہ ایم آئی ءِ کارندہ رھمدل بلوچ راجی زرمبشت آجوئی ءِ بگیری ءَ پُرکار بیتگ ءُ تُربَت شھر ءِ جتاجتائیں ھنداں بلوچ ورنایانی زوریں بیگواھی، زورگریں پوج ءِ سروکی ءَ جتائیں چاگردی سلکاریاں ھوار بوتگ۔

جارکش میجر گْوھرام بلوچ ءَ درشان ءِ گڈی ءَ پاکستانی پوج ءِ سر ءَ دو اُرش ءُ ایم آئی ءِ کارندہ ءِ کوش ءِ زمہ واری من اِتگ ءُ گوشتگ کہ ھمے کول ءَ کن ایں کہ زورگریں پوج ءُ آئی کمکاراں داں بلوچستان ءِ آجوئی ءَ نشانگ کن ایں۔

نبشتانک: قاضی جُھد ءِ پلسپہ

نبشتہ کار: وسیمہ بلوچ

دی بلوچستان پوسٹ

انسان زند ءِ سپر ءَ بازیں مردمے ءَ گوں دچار کپ اِیت لَھتیں مردم بس چہ نِگاھاں گوز اَنت ءُ ما تھنا آھانی ناماں آژنا بئیں، لَھتیں دل ءَ نزیک بنت ءُ یاتانی اندر ءَ پہ وت ءَ مھکمیں جاھے جوڑ کن اَنت، چریشاں لَھتیں ھما کِردار بنت کہ آ مردم ءِ جیڑگاں بدل کن اَنت ءُ کِشکاں مانا بکشا اَنت، تئی پگر ءَ بدل کن اَنت ءُ تئی کردار ءِ سر ءَ سانے دور دے اَنت منی ھاتر ءَ ابدالباسد زھری اُرپ ء کازی ھما مردم بوتگ منی استاد، منی رھشون ءُ سوجکار۔

پہ منی ھاتِر ءَ کازی ایوک ءَ یک سرمچارے نہ بوتگ، آ یک پکرے بوتگ، یک نزریھے بوتگ، یک آدینکے بوتگ کہ تھاری ءِ تہ ءَ مناں مُدامی راہ ئِے پیش داشتگ آئی ءِ گپانی تہ ءَ زانت ھست اَت ھما الم کہ من چہ کتاباں دربُرت نہ کُت، ھما سوج کِہ کتابانی تھ ءَ نیست اَت، آ مُچ الم ءُ زانت، کوم دوستی، گھگیری، وتن ءِ ھاتِر ءَ مھر ءُ جنگ، زمین دوست بوّگ، من چہ کازی ءَ دربُرت اَنت اے زانشتاں داں سیمسرے ءَ راجانی راج تاراج کُتگ اَنت، مُلک وتواجھی ءِ نیمگ ءَ بُرتگ اَنت ءُ انسان ءِ زمیر اِش بدل کُتگ کہ آ پوہ بِہ بیت وتی گُلامی ءَ ءُ پہ آجوئی ءِ راھاں گام جنان بِہ بیت کازی ءِ الم ءَ گیشتر کلم ءُ شئور ءِ نیمگ ءَ مناں بُرتگ ءُ پوہ کُتگ کہ گوں مارگ ءَ ھوار مارا وتی زانت ءُ زانشت لبزانک ءُ ندکاری ءِ نیمگ ءَ ھم برگی اِنت کازی ھما کارِست بوتگ چہ آئی ءَ من تھنا لبزانی ساھِگاں چے نہ گوستگاں، آئی ءَ مناں سوج داتگ کہ مارا تھنا لبز گاجیل کنگی نہ اَنت بلکیں لبزانی پُشتدر ءِ کسہ ھم زانگی اِنت، مارا مارشت ءُ اھساس ھم سرپد بیگی اَنت مناں انگت گیر کیت کہ آئی مناں مدام گُشت: کہ جیڑگ ابادتے، جُست ءُ پُرس زانشت ءِ بُن اِنت ءُ راست گْوشگ مستریں جُھد اِنت دِگہ شوکیں چیزے کازی ءِ بابت ءَ کہ آ وتی گپانی سر ءَ سک مُھکم بوتگ ءُ وتی گُشتگیں گپ ئِے پیشداشتگ اَنت ءُ سرجم کُتگ اَنت چہ اِے گپاں پدّر بیت کہ آ سکیں توانگِریں مردے بوتگ۔

من ھمے سما کناں کہ مروچی اگاں من اتکگ اے جاہ ءَ سراں، سیاسی ھوالہ، شئوری بُنیاد ءَ، یا مارِشتی تک ءُ پھناتاں، اگاں مرچی منی گپانی تہ ءَ درد، جزبگ ءُ راستی ءِ اکس گندگ ءَ کیت گڑا اے درست آئی ءِ تربیت ءِ پزل اِنت کازی ءِ بچکندانی توک ءَ مُدامی مارا وژنودی درا اَت، آئی ءِ بے تواری ءَ توپانے گون اَت، ھما توپان کہ یک گُلامے ءِ دل ءَ ھست بیت پہ وتی آجوئیں دیارے ءَ کہ آ مُجتی وھدے ھاموش بیت تا پہ زمین ءُ آئی ءِ بچّاں جیڑ اِیت ءُ پِگر کنت ءُ آئی ءِ چماں یک جزبگے مارا گِندگ ءَ اتک آ ایوک ءَ استادے نہ بوتگ، آ یک دورے ءِ جارکش بوتگ پہ ھمُک ھما نودربراں کہ گوں آئی ءَ دچار کپتگ اَنت ءُ چہ آئی ءَ سبک اِش زُرتگ آ کازی اَت کہ آئی ءَ پدریچان ءَ جیڑگ، گپ جنگ، ءُ مھکم بوگ ءِ سکین داتگ۔

آئی ءِ روگ ءَ پریم ھالی کُت بلے آئی ءِ گپ اَنگت منی ھمراہ اَنت ھر وھد ءَ کہ من نگیگیں جاوراں دچار کپاں گڑا منی نبشتہ کنگ مھتل بیت یا ترس منی دل ءَ نِند اِیت من کازی ءَ گیر کاراں ءُ وت ءَ مُھکم کناں ءُ من اناگتہ سما کناں گُش ئے آ منی کِرّ ءَ اوشتاتگ ءُ گُشگ ءَ اِنت: “راستی ءِ نبشتہ کنگ ءَ ھچبر مہ ترس، پرچا کہ راستی مدام زندگ اِنت۔”مرچی من ھر لبزے نبشتہ کنگ ءَ ساری کازی دیم ءَ کُتگ ءُ وت ءَ را توانگر کُتگ منی رھبر ھما کازی بوتگ کہ رُژنے ماں رُژنائیاں کہ ھچبر گار نہ بیت، رھشونی کنت،مارا گُش اِیت کہ استاد تھنا زانت نہ دنت بلکیں آ روہ ءِ تہ ءَ چراگے رُژنا کنت ءُ اے چراگ کہ منی اندر ءَ رُژنا اِنت کازى ءِ داتگیں سوگات اِنت اے رژنائی ھچبر ھلاس نہ بیت وھد، جاور ءُ تجربہ بدل بنت بلے رُژن مان اِیت منی راہ ءَ گیشّین اِیت، من ءَ اے سرپدی ءَ دنت کہ جھد ءُ جھدکار ءِ پہ ھاک ءَ شیدائیں راہ روان کنت سپر ھچبر ھلاس نہ بیت۔

گُڈسر ءَ ھمے گُشاں کازی ءَ پدّر کت کہ استاد ناں ایوک ءَ زانت ءُ زانشت ءَ بکشا اِیت بلکیں روہ ءِ تہ ءَ چراگے بلین اِیت ھما چراگ کہ بے زمین ءُ راہ ءُ دراں رژنائی ءَ وتی تالان کنت، کہ مجگ ءَ پچ کنت ءُ دل ءَ مھکم کنت ھمے سوَب اِنت کہ مرچی ھم ھمے رژنائیں چراگ منی گپانی تہ ءَ زاھِر اِنت ءُ اِے منی استاد ءِ داتگیں گُڈی سوگات اِنت کہ مُدام منی رھشونی ءَ کنت۔

داں کوچگاں آسے بل اِیت تو زِندگ ئے۔۔۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ دمگ پنجگور چتکان ءِ بنجاھی بازار ءَ تیرگواری ءُ تراکانی ھال سر بیتگ انت ۔ چہ دمگی بنشون ءُ نادراھجاہ ءِ واکدارانی رد ءَ تیرگواری ءَ دو مردم بیران بوتگ اَنت کہ آھانی تہ ءَ یک پولیس کارمندے ھم ھوار اِنت ءُ دو دگہ کارندہ سک ٹپیگ بوتگ اَنت۔

بنداتی ھالانی رد ءَ چتکان ءِ دمگ ءَ مزنیں کساسے ءَ سلاہ بندیں مردماں سرکاری جاہ نشانگ جوڑ کتگ انت۔ دمگی بنشون ءِ گشگ انت کہ ارش کنوکاں بینک مانداشتگ وھدیکہ تھانہ ءُ دگہ سرکاری کارگسانی سر ءَ ھم اُرش کنگ بیتگ انت ۔

لھتیں ھالانی رد ءَ اے گپ ھم بوگ ءَ اَنت کہ لھتیں سرکاری ماڑیانی سر ءَ کنٹرول کنگ بوتگ بلے اے ھال سرکاری تک ءَ پدر کنگ نہ بوتگ اَنت۔

موبائل فون ءُ رھوتی ءِ دگہ کارشون دمگ ءَ بند کنگ بیتگ انت کہ ایشی ءِ سبب ءَ تاوان ءُ جاور ھال ءِ لس ھالانی سرپدی نہ رس اتگ انت۔ چمدیستگیں مردمانی گشگ ءِ رد ءَ تیرگواری ءُ تراکانی توار بازیں وھدے ءَ گوشدارگ بوتگ اَنت۔

انگت ءَ اے اُرش ءِ زمہ واری کس ءَ نہ زرتگ۔

بلوچستان ءِ دمگ پنجگور ءِ ھند چکول ءَ چہ آوار جنگ بوتگیں کاؤنٹر ٹیررزم ڈپارٹمنٹ ( سی ٹی ڈی) ءِ کارندہ ءِ لاش ءِ دزکپگ ءَ پد کھول ءِ مردماں زھرشانی ءِ درشان ءَ ڈی پی او ءِ کارگس ءِ دیم ءَ بنجاھی شھدگ ءِ سر ءَ لاش ایر کتگ ءُ زھرشانی کتگ۔

کھول ءَ گشتگ کہ گوستگیں روچ ءَ سی ٹی ڈی ءِ کارندہ خلیل احمد ء احمد چہ ناشناسیں مردماں تسپ ءِ ھند ءَ آوار جتگ کہ مروچی آئی ءِ لاش چکول ءَ دزکپتگ-

دمگی مردمانی رد ءَ کارندہ پاکستانی چیریں ادارھاں آوار جنگ ءَ پد کشتگ –

کھول ءَ گوں لاش ءِ ھمراھی ءَ ڈی پی او ءِ کارگس ءِ دیم ءِ مزنیں دگ ءِ سر ءَ زھرشانی کتگ ۔ پد ءَ گوں پولیس ءِ کارندہ ءُ انتزامیہ ءَ گپ ءُ تران ءَ پد زھرشانی اش ھلاس کتگ۔

پولیس اے درگت ءَ گیش پٹ ءُ پول کنگ ءَ اِنت۔

مشکت اومان ءِ انٹیلی جنس ایجنسی ءَ یک بلوچیں وکیلے گپتگ ءُ پاکستان ءَ ڈی پورٹ کتگ ، کہ تنی وھدی آئی ءِ درگت ءَ ھچ وڈیں سرپدی نیست ۔

ھالانی رد ءَ چل ءُ پنچ سالی ایں ایڈوکیٹ مھمد ھسن ء دوشمبے کہ تربت ءِ دمگ دشتی بازار ءِ جھمنند انت ، کساس چار ماہ ساری چہ مشکت ءَ دزگیر کنگ بوتگ کہ پدا رند ءَ 11 دسمبر ءَ پاکستان ءَ دیم دیگ بوتگ ۔

آئی ءِ یک سنگتے ءَ گوں دی بلوچستان پوسٹ ءَ ھال اھوال کنان ءَ وتی نام نداتگ ءُ گوشتگ کہ مھمد ھسن یک ستمبر ءِ کساس ادار ھشت ءَ چہ وتی جند ءِ گس ءَ پٹ ءُ پول ءِ وھد ءَ دزگیر کنگ بوتگ ۔ ھالانی رد ءَ اے کار لس پوشاک گوریں کارمنداں بزاں کہ آیاں کندورہ گور ءَ بوتگ ءُ رائل اومان پولیس ھمراھی ءَ کتگ ۔ اھوالکار ءِ رد ءَ ڈی پورٹیشن ءَ پد مھمد ھسن ءِ ھچ ھال ءُ بود نیست ۔

آئی ءِ سنگت ءِ رد ءَ آئی ءَ مھمد ھسن ءِ ڈی پورٹیشن ءِ ھال ھما وھد ءَ سر بوتگ کہ وھدیکہ بلوچ یکجھتی کمیٹی کہ بلوچ ھکانی پانکجنیں گل ئِے ھما گل ءَ آئی ءِ دزگیری ءُ ڈی پورٹیشن ءِ درشان شنگ کتگ ۔

ھالانی رد ءَ مھمد ھسن ءَ دھکے ءَ گیش انت کہ ھلیجی ڈیھاں نندوک بوتگ ، چہ متھدہ ارب امارات ءَ اومان ءِ آیگ ءَ پیش آ یورپ ءَ پہ پناہ گرگ ءِ ھاتر ءَ وتی کاگداں ھڈ کنگ ءَ بوتگ ۔

مھمد ھسن ءِ کھولے مردمے ءَ گوں دی بلوچستان پوسٹ ءَ اھوال کنان ءَ گوشتگ کہ آئی ءِ گوں بلوچ زرمبشت ءَ ھمگرنچیں ھچ وڈیں سیاسی چست ءُ ایراں سیادی نہ بوتگ آئی ءَ پہ روزگار ءِ ھاتر ءَ بلوچستان یل داتگ ءُ درملک ءَ شتگ ءُ اودا آ یک مزور ءِ بوتگ ۔

کھول ءِ رد ءَ آ بس نمیرانیں گلام مھمد ءِ آوار جنی ءِ چم دیست ایں شاھد ءِ بوتگ ۔ ھما گلام مھمد کہ بلوچ نیشنل مومنٹ ءِ سروک بوتگ ۔

گلام مھمد بلوچ ، لالا منیر بلوچ ءُ شیر مھمد بلوچ سَے اپریل 2009 ءَ ماں تربت ءَ یک وکیلے ءِ چیمبر ءَ چی آوار جنگ بوتگ انت لھتے روچاں پد آیانی ژانگولیں جون دست کپتگ انت کہ پدا رند ءَ اے میان استمانی تکاں اے دلگوش گور کنگ بوتگ ۔ اھوالکار ءِ رد ءَ مھمد ھسن ءُ یک دگہ وکیلے کہ نام کچکول انت ءُ مروچاں ناروے ءَ باھوٹی ئِے اے وئیل ءِ گواہ بوتگ انت ۔ بوت کنت ھمے چیز مھمد ھسن ءِ دزگیری ءُ ڈی پورٹیشن ءِ سوب بوتگ ۔

اومان ءِ سرکار یا پاکستانی واکدارانی نیمگ ءَ تنی وھدی مھمد ھسن ءِ دزگیری یا ڈی پورٹیشن ءِ ھچ وڈیں ھال نیست ۔

چہ اومان ءَ اے اولی رند انت کہ بلوچیں مردمے دزگیر کنگ ءُ پاکستان ءَ ڈی پورٹ کنگ بوتگ بلے چدو پیسر چہ امارات ءُ بحرین ءَ بلوچ باسکانی دزگیری ءُ پاکستان ءَ دیم دیگ ءِ وئیل بوتگ انت ۔

اے گامگیج بلوچستان ءِ سرکار ءِ نیمگءَ ھمے ماہ ءِ بندات ءَ جار جنگ بوتگ ۔3 ستمبر ءَ سوبائی سرکار ءَ گوشتگ کہ کساس سے سد شکی ایں مردمانی بگیری ءَ کریک ڈاؤن کنگ بیت ءُ درملک ءَ سلاہ بندیں گلانی ھاتر ءَ کارکنوکیں رھشونانی دزگیری ءِ ھاتر ءَ انٹرپول ءِ کمک زورگ بیت ۔

سروزیر سیکٹریٹ ءِ درشان ءِ رد ءَ اے شئور سروزیر سرپراز بگٹی ءِ سروکی ءَ برزی تک ءِ اجلاس ءِ کنگ بوتگ کہ اودا واکداراں درملک ءَ نشتگیں گلانی رھشون ءُ پاکستان ءِ تہ ءَ آیانی مردمانی گوم ءَ اھوالکاری ءِ شاھد پیش کنگ بوتگ انت ۔

ھزاراں بلوچاں بازیں دھکے بیت کہ ھلیجی ڈیھاں باھوٹی انت کہ آ اودا بازیں تکاں ھاسکر مزوری ءُ سیکٹر ءِ کار ءَ انت ۔

آپسر ءُ ھیر آباد ءَ تیرگواری ویلاں دو مردم بیران بیتگ انت-

پولیس ءِ رد ءَ اے وئیل آپسر ءِ ریسرچ فارم ءِ ھند ءَ بوتگ کہ اود ءَ بیران بوتگیں مردم گوں وتی سنگتاں پکنک ءَ بوتگ۔

پولیس ءِ گشگ انت کہ تیرگواری ءَ بیران بوتگیں مردم ءِ پجار فضل ء رحمدل انت کہ آ آپسر ءِ دمگ ڈکی بازار ءِ نندوک انت۔ تیرگواری ءَ پد اُرش کنوک شُتگ اَنت۔

پولیس ءِ بنشون ءِ گشگ ءِ رد ءَ وئیل ءِ ھال ءِ شنگ بوگ ءَ گوں پولیس جاہ ءَ سر بوتگ ءُ لاش پہ المی ئیں کانونی کارروائی ءَ نادراھجاہ ءَ سر کنگ بوتگ۔

بلے اے وئیل ءِ پُشت ءَ انگت ءَ چے سبب زانگ نہ بوتگ۔

ھمے وڑ تربت ھیر آباد ءَ ناشناسیں مردمانی تیرگواری ءَ یک مردمے بیران بیتگ –

اھوالانی رد ءَ پرپٹ سواریں مردماں تیرگواری کتگ ءُ نعیم یاکوب نامیں مردمے کشتگ-

ویل ءِ سبب زانگ نہ بیتگ تیرگواری کنوکاں پشتمانداتگ ءُ شتگ انت-

کرفیو ءِ آماچیں شھر

ٹی بی پی شونگال

شال بلوچستان ءِ بنجاھی شھر انت، چوشکہ جانسلامتی، وانگی، سیاسی ءُ زرکاری ءِ پرکاریاں نامانی ءَ زانگ بیت انت، بلے ایشی ءَ ابید ھم شھر مروچی بنکی آسراتیاں زبھر انت – پاکستان پیپلز پاٹی ءِ سرکار ءِ واک ءِ آیگ ءَ پد کساس ھمک ماہ شال ءَ انٹرنیٹ سروس ءِ سر ءَ بے جارانکی ءَ بندشانی دیمپانی بیت انت، چریشی ءَ شھریانی زندگی ناگیگ بیتگ – دفعہ 144 ءِ جَنگ ءِ نام ءَ شھدگانی سر ءَ ترندیں پٹ ءُ پول کنگ ھمک روچی ئیں کارے جوڑ بیتگ، اود ءَ شھریانی کمشرپ کنگ ھمک روچ بوگ ءَ انت – شپ ءِ وھد ءَ لوگانی سر ءَ بیڑ ءُ ورنایانی زورانسری بیگواھیاں شھر ءِ بازیں جاھاں کساس کرفیو ءِ دروشم ءِ جاورھال ودیتگ انت-

شال ءِ شھر ءَ زورانسری بیگواھی ءِ وئیلانی توک ءَ گیشی اتکگ، ھمے وڑ اے زورانسری بیگواھیانی ھلاپ ءَ توار چِست کنوکیں سیاسی رھشون بندیگ کنگ ءُ گھگیری سیاست ءِ سر ءَ بندش جنگ بوگ ءَ انت- اے اَملاں شھر ءِ جاورھال ناگیگی ءُ بے سِتکی کتگ انت- واکداریں سرکار ھما پالیسیانی پلامرزی ءَ کنت آئی ءَ انسداد انسرجنسی ءِ بھرگ ءَ جوڑین ایت، بلے زمین ءِ جاور اے دابیں درشاناں ھاک ءُ پر کنگ ءَ گِندگ آیگ ءَ انت-

سرکار ءُ پاکستان ءِ سیکورٹی ادارہ شال ءَ اے گامگیج ءَ سنگینیں سیکیورٹی جاورھال ءِ سبب ءَ کمی لیک انت، بلے نومبر ءِ ماہ ءَ شھر ءِ گچینی دگانی سر ءَ اڑانک ایر کتگ ءُ بند کتگ انت – ٹرانسپورٹ ءُ انٹرنیٹ سروس ءِ سر ءَ سرجم ءَ بندش جنگ بیتگ، بلے اے دراھیں گامگیجاں ابید پاکستانی پوج ءِ سر ءَ اُرشاں ھچ کمی گندگ ءَ نیتکگ – سلاہ بندیں گلانی نیمگ ءَ بلوچستان ءِ گچینی شھدگانی سر ءَ ناکہ بندی ءِ درچ برجاہ انت ءُ نوکنڈی ءَ پاکستانی پوج ءِ بریگیڈ ھیڈکوارٹر ءِ سر ءَ ھترناکیں اُرش بیتگ-

ریاستی ادارہ وتی ناکامیانی چیر دیگ ءِ واستا شال ءِ شھر ءَ کرفیو ءِ وڑیں جاور آورتگ ءُ مھلوک ءِ واستا گیشیں جنجالاں ودی کنگ ءَ انت- شال ءَ ھوار سرجمیں بلوچستان ءَ انٹرنیٹ سروس بندش ءِ سر ءَ مھلوک ءِ زھر ءِ درشان ءَ پد سرکار ءَ اژدری گامگیج ءِ درچ ءَ انٹرنیٹ ءِ رواج ھنچ کم کتگ انت المی ءَ سروس ءِ کامرد کنگ نا بروبری ءَ انت- سرکار ءِ اے گامگیجاں لنگڑیں جاورانی بھتر بوگ ءَ ابید شال ءِ شھریانی واستا مشکلانی توک ءَ گیشی اتکگ انت-

بلوچستان ءَ زورانسری بیگواھیانی درچ ترندی ءَ گوں برجاہ انت کہ اود ءَ ھمک روچ نوکیں بیگواھیانی ویل رپورٹ بوگ ءَ انت ءُ گوستگیں روچ ءَ اَچ بلوچستان ءِ بنجاھی شھر ءَ ھوار جتا جتائیں ھنداں دگہ سَے مردم آوار جنگ ءَ پد بیگواھی ءِ آماچ کنگ بیتگ انت-

بلوچستان ءَ بیگواھیں مردمانی ھاتر ءَ توار چِست کنوکیں گل بلوچ یکجھتی کمیٹی ءِ رد ءَ تربت دشتی بازار ءِ نندوکہں وکیل ایڈوکیٹ حسن حسرت بیگواہ کنگ بیتگ-

بی وائی سی ءِ رد ءَ ایڈوکیٹ حسن حسرت مسقط عمان ءَ بیتگ کہ اود ءَ نا مالومیں سبب ءَ ڈی پورٹ کنگ بیتگ ءُ چریشی ءَ پد آ بیگواہ انت-

ھمے وڑ بلوچستان ءِ بنجاھی شھر شال ءَ ڈاکٹر راشد علی ء برکت جھمنند کیچ سنگ آباد آوار جنگ ءُ بیگواہ کنگ بیتگ-

اھوالانی رد ءَ ڈاکٹر راشد علی 9 دسمبر ءِ شپ ءَ اَچ شال ءَ آوار جنگ ءُ بیگواہ کنگ بیتگ-

ھمے وڑ چہ پنجگور ءَ یک مردمے آوار جنگ ءَ پد بیگواہ کنگ بیتگ –

آوار جنگ بیتگیں مردم ءِ پجار سرور ء امام بخش ءِ نام ءَ زانگ بیتگ – اھوالانی رد ءَ سرور پاکستانی پوج ءِ چیردستی ءَ ھستیں سلاہ بندین گلاں آوار جتگ ءُ بیگواہ کتگ-

بلوچستان ءَ بیگواھیانی درچ یک دردناکیں رنگے ءَ گیش بوان انت کہ اود ءَ ھمک روچ بیگواھیانی درچ گیش بوان انت ءُ ورنا بیگواھی ءِ آماچ بوان انت-

بلوچستان ءَ زورانسری آوار جنی ءِ وئیلانی تہ ءَ گیشی گندگ اتکگ، پیسر ءَ مردین آوار جنی ءِ نشانگ کنگ بیتگ اَنت نو زالبول زورانسری آوار جنی وئیل نکش بیگ ءَ اَنت-

نوکتریں وئیل ھُزدار ءَ بیتگ اود ءَ یک زالبولے فرزانہ زھری زورانسری آوار جنی ءَ انسانی ھکانی پارٹی تُرندیں تُرس ودی کنت-

انسانی ھکانی گل پانک (Paank) ءِ رِد ءَ فرزانہ زھری ء محمد بخش زھری یک دستمبر 2025 ءِ شپ ءَ ھُزدار ءَ ھما وھد ءَ پاکستانی پوج ءَ آوار جتگ وھدے آ نادُراھجاہ ءُ چہ واتر لوگ ءَ روگ ءَ بیتگ-

گل ءِ گوشگ اِنت کہ اے وئیل ءَ پد فرزانہ زھری ءِ درگت ھچ وڑیں ھال دز نہ کپتگ ءُ واکدار تنی وھدے آئی ءِ دزگیری ءِ پدری یا کانودی ھچ سرپدی دیگ نہ بیتگ-

پانک ءِ رِد ءَ سانمندیں کھول ءَ زھری ءَ چہ لَڑ ءُ بار کتگ ھُزدار ءَ شتگ بیتگ اَنت، بلے لَڑ ءُ بار ءَ اَبید آ نشانگ کنگ بیتگ-

گل ءَ اے کار زورانسری آوار جنی داتگ ءُ گوشتگ کہ میان اُستمانی ھکانی سنگینیں ھلاپ ورزی اِنت-

انسانی ھکانی کارکنانی گوشگ اِنت کہ بلوچستان ءَ ھمے سال زالبولانی زورانسری آوار جنی ءِ وئیل نکش بیتگ اَنت کہ یک تُرسناکیں چیدگی ءَ کنت-

ھمے سال ءَ چہ شال ءَ یک جنکے ماہ جبین ءِ زورانسری آوار جنی نکش بیتگ اَنت، وھدے کہ چہ ھب چوکی ءَ نسرینہ، چہ دالبندین رحیمہ ءُ چہ ھُزدار ءَ ھم زورانسری آوار جنی ءِ وئیل ھم دیم ءَ اتکگ اَنت-

انسانی ھکانی گلانی رِد ءَ اے سرجمیں مردم تنی وھدے پاکستانی پوج ءِ دست ءَ اَنت-

بلوچستان ءَ زورانسری آوار جنی جیڑہ نوک نہ اَنت- گوستگیں بازیں سالاں چہ بلوچستان ھزرانی مردین بیگواھی بیگ ھال دیم ءَ اَتکگ اَنت- بیگواھیں مردم کھول ءِ رِد ءَ اے نودربر چ سیاسی کارکن، استاد ، مزدور ءُ لَس شھری ھوار اَنت- بازیں کھول سالانی سال وتی دوستناکانی یل کنائینگ ھاتر ءَ زھرشانی ءُ کانودی راہ گیچن کنگ ءَ اَنت بلے گیشتریں کیس دیم ءَ نہ شتگ اَنت-

پانک ءَ فرزانہ زھری ءَ ھوار سرجمیں بیگواھیں مردمانی سلامتی ءِ سرجمیں زمہ وار ریاست ءُ آئی ءِ ادارہ سر ءَ داتگ ءُ لوٹ کتگ کہ آیاں زوت آمیدگس ءَ پیش بہ کن اِت بید شرت ءَ-

گل ءَ راجی ءُ میان استمانی انسانی ھکانی ادارہ، اکوام متھدہ ءُ میان استمانی مردماں چہ دزبندی کتگ کہ آ بلوچستان ءَ زورانسری آوار جنی ءُ انسانی ھکانی ھلاپ ورزیانی سر ءَ سنجیدگی ءَ چہ گامگیج بزور اَنت-