TBP Balochi

بلوچستان ءَ بلوچ سلاہ بندانی چِست بیتگیں زوراں پاکستانی لشکر ءَ بازیں کچے ءَ جانی ءُ مالی تاوانانی دیمپانی کنگ کپگ انت-

اے گیش بیتگیں اُرشانی یک درچے ھمیش گندگ ءَ کیت گوستگیں روچ ءَ بلوچ لبریشن آرمی ءِ جارکش جیئند بلوچ ءَ گوشتگ ات کہ بی ایل اے ءَ شال تپتان ءِ شھدگ سرجم ءَ کنٹرول کتگ ءُ اود ءُ مڈی بروکانی واستا راہ بند انت-

بلوچستان ءَ اے گیش بوتگیں اُرش یک گپے گیشنگ ءَ انت اود ءَ بلوچ سلاہ بندانی وَس گیش بوتگ ءُ پاکستانی پوج ءَ روچ پہ روچ نیزروری وتی اندر ءَ وران انت-

بلوچستان ءَ جتاجتائیں دمگاں پاکستانی لشکر ءِ سر ءَ بازیں اُرش کنگ بیتگ انے۔

ھالانی رد ءَ بلوچستان ءِ دمگ کیچ ءِ ھند زمران ءَ جبشان ءَ آئی ای ڈی اُرشے ءَ کم چہ کم دو پاکستانی لورسز ءِ کارندہ بیران ءُ بازیں ٹپیگ بوتگ اَنت۔

تراک ءَ پد پاکستانی لشکر ءَ جاہ انگر کتگ ءُ ٹپی ءُ بیران بوتگیں کارندہ یک کیمپے ءَ برتگ اَنت ۔

دومی نیمگ ءَ کیچ ءِ دمگ ءَ مند ، سوراپ ءِ سیمسر ءِ نزیک ءَ سلاہ بندیں مردمانی ءُ پاکستانی لشکر ءِ میان ءَ جنگ ءُ چوپ ءَ پاکستانی لشکر ءِ بازیں کارندہ بیران ءُ ٹپیگ بیتگ اَنت ۔

سرکاری بنشون ءَ اے وئیل ءِ پدر کتگ ءُ گْوشتگ کہ اے درگت ءَ یک شمبے ءِ روچ ءِ سھب ءِ 9 بج ءِ نزیک ءَ بوتگ۔ اُرشاں پد پاکستانی لشکر ءَ سیمسر بند کتگ ءُ آپریشن بندات کتگ ۔

دگہ اُرشے بلوچستان ءِ دمگ مستونگ ءِ دمگ دشت ءَ ڈگری کراس ءَ پاکستانی لشکر ءِ سامان ءِ بروکیں گاڑی دست گپتگ ءُ سوچگ بوتگ۔

دومی نیمگ ءَ واشک ءِ دمگ بسیمہ ءَ پاکستانی فوجی کیمپ ءَ راشن ءِ بروکیں گاڑی سلاہ بندیں مردماں دستیگ کتگ۔

کیچ ءِ بنجاھی شھر چہ تربت ءَ پاکستانی لشکر ءِ دست ءَ زورانسری ءَ بیگواہ کنگ بوتگیں سئے مردمانی یل بیگ ءِ ھال دیم ءَ اتکگ انت۔

گیشیں ھالانی رد ءَ اپسر تربت ءِ نندوکیں عبدالرحمان ء خالد اختر 25 اپریل 2026 ءَ پاکستانی لشکر ءِ دست ءَ زورانسری ءَ بیگواہ کنگ بوتگ ءُ بنشون ءِ رد ءَ 12 مئی 2026 ءَ ڈی سی آفس چہ تربت ءَ یلہ کنگ بوتگ۔

ھمے وڑ ءَ بلوچی بازار اپسر تربت ءِ نندوکیں منور اختر اختر گلام ھم 3 مارچ 2026 ءَ پہ زورانسری بیگواہ کنگ بوتگ ھالانی رد ءَ 15 مئی 2026 ءَ چہ ڈی سی آفس تربت ءَ یل کنگ بوتگ ءُ وتی کھول ءِ گور ءَ سر بوتگ۔

سیمی یل بیتگیں مردم عبدالرحمان ء خالد اختر اِنت کھول ھال راست کتگ کہ آ چہ بندیگ کنگ ءَ پد یلہ کنگ بوتگ۔

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ گوستگیں دو روچانی میان ءَ سرجمیں بلوچستان ءَ دُژمن ءِ توانمند ءُ پُلپانچیں نیٹ ورکس سر ءَ اُرش کنان ءَ دہ سوبمندی کاروائی کتگ، اشانی تہ ءَ دالبندین شھر ءِ سرجمی ءَ دستیگ کنگ ھوار اِنت- اے یکجاھی اُرشاں زورگریں پاکستانی پوج ءِ یازدہ کارندھانی کوش ءَ بازین ئِے ٹپی کتگ، وھدے کہ پُلپانچیں شرکتاں چہ ھمگرنچیں بازیں گاڑی تباہ ءُ بُنجاھی شھدگانی سر ءَ سرمچارانی دستیگ برجاہ داشتگ-

15 مئی : مستونگ ءِ دمگ کانک ءَ شال –تفتان بُنجاھی شھدگ سر ءَ سرمچاراں بلوچ مڈی لُٹ ءُ پُل ءَ دلگوش، مڈی (کرومائیٹ) بروکیں پنچ مزنیں ٹریلرز وتی دستیگ کنگ ءَ پد مانداشتگ-

جارکش ءَ گْوشتگ ھمے روچ ءَ مستونگ ءِ دمگ شیخ واصل ءَ شال –تفتان بُنجاھی شھدگ سر ءَ برجاہ یک یک مزنیں پُھلے سرمچاراں تراکناکیں شورو پٹ کتگ ءُ سرجمی ءَ تباہ کتگ، چریشی ءَ دُژمن ءِ سامان ءِ برگ ءِ نزام بند بیتگ-

جارکش ءَ گْوشتگ کہ نوشکی ءَ مَل ءِ ھند سر ءَ سرمچاراں شال –تفتان بُنجاھی شھدگ سرجمی ءَ دستیگ کتگ بازیں کلاکاں تاں اسنیپ چیکنگ کتگ ، اے میان ءَ سیندک پروجیکٹ ءَ چہ ھمگرنچ چار شکی ئیں مردم ءِ جُست ءُ پرس ءِ واستا دزگیر کتگ اَنت- اے میان ءَ زورگریں پاکستانی پوج ءَ دمگ ءَ پیشگامی کنگ ءِ ناکامیں جُھد کتگ، کہ سنگر گپتگیں سرمچاراں مزنیں سلاھاں چہ نشانگ کتگ اَنت- اے اُرش ءَ دُژمنیں پوج ءِ دو کارندہ جاہ پہ جاھی مرتگ اَنت ءُ بازین ئِے ٹپی بیتگ اَنت، وھدے کہ زورگریں پوج ءِ یک گاڑی ءَ سک تاوان رس اِتگ-

جارکش ءَ گوشتگ کہ ھاران ءِ دمگ ارماگئے ءَ سرمچاراں کاروائی کنان ءَ مڈی برؤکیں دو مال کشیں ٹرک وتی دستیگ ءَ کتگ اَنت ءُ پد ءَ آ مانداشتگ اَنت-

16 مئی : مستونگ ءِ دمگ کانک ءَ آباد ءِ ھند سر ءَ شال – تفتان شھدگ سر ءَ سرمچاراں زورگریں پوج ءِ کاروان سنگر گپتگ ءُ اُرش کتگ- اے یکجاھی اُرش ءَ زورگریں پوج ءِ سے کارندہ مرتگ ءُ بازین ئِے ٹپی کتگ اَنت، وھدے کہ دُژمن ءِ یک پوجی گاڑی یے جاہ پہ جاھی ناکارہ –

جارکش ءَ گوشتگ تربت ءِ دمگ ناصر آباد ءَ سرمچاراں زورگریں پوج ءِ پوسٹ سر ءَ سرمچارانی سُر ءُ پُرانی چاریگی ءِ ھاتر ءَ مک کتگیں سرجمیں چاریگی کیمرہ نشانگ کتگ ءُ تباہ کتگ اَنت- ھمے وڑ تمپ ءِ دمگ خیرآباد ءَ ھم ریاستی چاریگی کیمرھانی نیٹ ورک ناکارہ کتگ اَنت، وھدے کہ زامران ءِ دمگ جابشان ءَ سرمچاراں زورگریں پوج ءِ واٹر سپلائی مشینری نشانگ کتگ اَنت ءُ سک تاوان داتگ اَنت-

جارکش ءَ گوشتگ کہ مروچی یک یکجاھی ءُ مزنیں اُرشے ءَ بی ایل اے ءِ سرمچاراں دالبندین شھر سرجمی ءَ دستیگ کتگ – دمگی پولیس تھانہ ءَ ھوار سرجمیں سرکاری ماڑی بازیں کلاکاں تاں سرمچارانی دستیگ بیتگ – پولیس تھانہ ءَ چہ مزنیں کچے ءَ سلاہ، گولہ بارود ءُ دگہ پوجی ساز ءُ سامان دستیگ کتگ گوں وت برتگ اَنت ،وھدے کہ اود ءَ ساڑی سرکاری گاڑی مانداشتگ اَنت- اے کاروائی ءِ میان ءَ پیشگامی کنوکیں زورگریں پوج ءِ بائی پاس ءِ ھند سر ءَ تُرندیں اُرشانی نشانگ کتگ ،چریشی ءِ آسر ءَ زورگریں پوج ءِ شش کارندہ مرتگ اَنت وھدے کہ آ دگہ کارندھاں وتی بازیں ٹپی ئیں ھمراہ یل داتگ ءُ تتکگ اَنت- اے سوبمندیں پسھی اُرش ءَ دُژمنیں پوج ءِ دو گاڑی سرجمی ءَ تباہ بیتگ-

جارکش ءَ گوشتگ بلوچ لبریشن آرمی اے پریس ریلیز ءِ اے تچک کنگ لوٹ اِیت کہ شال –تفتان بُنجاھی شھدگ سر ءَ بی ایل اے نو سرجمی ءَ دستیگ کتگ ءُ اے سرجمیں شھدگ نو بی ایل اے دستیگ ءِ بھر اِنت- ما نو ھچ وڑ بلوچ مڈیانی لُٹ ءُ پُل کنوکیں گاڑیانی ٹرکاں، ٹریلرز یا کجام وڑیں کاروان اد ءَ چہ گوزگ ءَ ھچ موکل ندے ایں- کجام ھما شرکتاں، ٹھیکیدار یا ٹرانسپورٹر بلوچ مڈیانی لُٹ ءُ پُل ءِ بھر جوڑ بنت، آ وتی ھرچ وڑیں جانی ءُ مالی تاوان ءِ زمہ وار وت بنت-

جارکش ءَ گْوشتگ بلوچ راج ءُ لس مساپرانی جان ءُ مال ءِ پھازگ ءِ سرجمی ءَ کول کنت ءُ آئی ءِ کمکاری ءِ ھاتر ءَ شھدگانی سر ءَ آیاں گوں ھرچ وڑیں کمک کن ایں- ما بلوچ راج ءَ چہ ھم دزبندی کن ایں کہ آ ھاک ءِ وپاداری ءِ منانک داتگ ءُ بی ایل اے ءِ سرمچارانی گوما وتی کمک ءَ ھمے وڑ برجاہ بدار اَنت، ھمے وڑ آیاں تاں انو برجاہ داشتگ، دانکہ لس بلوچ شھریاں تاوان دیگ ءَ بید دُژمن ءِ اے پُلپنانچ ءُ لُٹ ءُ پُل ءِ دگ مدامی بند کت بہ کن ایں- اے سرجمیں مڈی تھنا بلوچ ءِ مِلکت اَنت، بلے وتی راجی مڈیاں اے ریاستی لُٹ ءُ پُل ءَ چہ رکینگ ما درست یکجاہ ءُ اولی راجی پرز اِنت-

جارکش ءَ گوشتگ ما اے سرجمیں دمگی ءُ در دمگی شرکتاں ءُ مڈی بروکیں مردماں گُڈی رند ءَ تُرند ءُ آسری بیھار ءَ دے ایں کہ آ نو سرڈگار بلوچستان ءَ چہ بلوچ مڈیانی دُزگ ءِ سرجمیں جُھد ءَ زوت یل بہ کن اَنت، اگاں ناں گُڑا بی ایل اے ءِ سرمچارانی آؤکیں اُرش گیش ابرتناک بنت-

نامداریں شائر ءُ ادیب پروفیسر غمخوار حیات ءِ جنازہ ءِ نماز کلی مینگل ءِ کبرستان ءَ وانگ بوتگ۔

جنازہ ءِ نماز ءَ مزنیں کساسے ءَ ٹکی کماش، سیاسی نمائندگ، استاد، نودربر، سرکاری ادارھانی جتا جتائیں افسر ءُ جتا جتائیں تکاں بندوکیں ءِ مردماں بھر زرتگ۔

زانگ بہ بیت کہ پروفیسر غمخوار حیات مرچی نوشکی ءِ دمگ کلی مینگل ءَ سرکاری کمک ءِ سلاہ بندیں گل ”ڈیتھ اسکواڈز“ ءِ تیرگواری ءِ آسر ءَ بیران بوتگ۔

استاد غمخوار حیات براھوئی زبان ءِ نامداریں شائر، نبشتہ کار، رجانکار، کسہ نویس ءُ انشائیہ نویس بوتگ۔ آئی ءَ لبزانک ءِ جتا جتائیں تبکاں ارزشت داریں ھزمت کتگ ءُ نزیک ءَ بیست کتابانی نبشتہ کار بوتگ۔ آ راسکوہ لبزانکی دیوان ءُ اوتان کلچر اکیڈمی ءِ بن ھشت ایر کنوکانی تہ ءَ ھم ھوار بوتگ۔

آئی ءِ وانوکاں چہ ھوار سیاسی، چاگردی، لبزانکی ءُ المی پڑاں آئی ءِ کوش ءِ سر ءَ سکیں رنج ءُ گم ءِ درشانی کتگ۔

جتاجتائیں تکاں گوشتگ کہ غمخوار حیات ءِ شھیدی ءَ براہوئی لبزانک نہ ایوکا بلکیں زانت ءُ زانت ءِ دنیا ءَ ھم بے کچوئیں تاوان رس اتگ۔

بلوچستان ءِ دمگ نوشکی ءَ سرکار ءِ پلامرزی ءَ ھستیں ٹولی ڈیتھ اسکواڈ ءِ تیرگواری ءَ براھوائی زبان ءِ شائر، کواس ءُ پروفیسر غمخوار حیات بیران بیتگ –

وئیل مروچی سھب ءَ نوشکی ءَ کلی مینگل پیش اتکگ کہ اود ءَ ڈیتھ اسکواڈ ءَ تیرگواری کتگ ءُ چریشی ءَ بلوچ پروفیسر غمخوار حیات بیران بیتگ-

وئیل ءَ پد غمخوار حیات ءِ لاش چِست کنگ ءُ ھسپتال ءَ سر کنگ بیتگ-

غمخوار حیات براھوائی زبان ءِ مزن نامیں شائرانی لڑاں ھواریں یک شائرے بیتگ ءُ آئی ءَ شائری ءِ ھواری ءَ دگہ زباناں ھم زبان ترینتگ ءُ براھوائی ءَ نبشتگ کتگ انت-

غمخوار حیات ءِ برانی ءِ سر ءَ چاگردی ترامجاہ، وانگی تک، سیاسی ءُ نودربر گل، انسانی ھکانی گلانی نیمگ ءَ پدردی درشان بوگ ءَ انت-

غمخوار حیات ءِ کوش ءَ بلوچ چاگرد ءِ زانت ءُ زانشت ءِ سوھو ءُ کواسانی ھلاس کنگ ءِ یک درچے گوشگ ءَ انت-

بلوچستان ءَ ریاستی چیردستی ءَ ھستیں ٹولی کہ آ لس نام ءَ “ ڈیتھ اسکواڈ” ءِ نام ءَ زانگ بیت انت بازیں وھداں سیاسی گل اے گل ءَ بلوچ مھلوک ءِ کشندہ ،آوار جنی ءُ دگہ چاگردی سلکاریاں ھواری ءِ بھتام ءَ جنگ ءَ انت-

بلوچستان ءَ بازیں کچے ءَ تنی وھدی ورنا اے گل ءِ ارجان بیتگ ءُ کشگ بیتگ انت انت کہ آ گیشتریں دروشم تیرگواریانی رنگ ءَ پیش آیگ ءَ انت-

بلوچ لبریشن آرمی ءِ آپریشن ھیروپ دومی بھرگ ءِ شھیدانی یات ءَ آدینگ ءِ روچ ءَ یک آشوبی دیوانے برجم دارگ بوتگ۔

آسوبی دیوان ءِ تہ ءَ بلوچی ءُ براھوی زبان ءِ نامداریں ازمکار استاد میر احمد بلوچ، میرل بلوچ، ساؤل کندیل ءُ سرفراز واحد ءَ براھوئی ءُ بلوچی شائری ءِ تک ءَ آپریشن ھیروپ ءِ دومی بھرگ ءِ شھیدانی یات ءَ دیوان برجم کتگ ءُ وتی وشیں تواراں گوں دیوان پرزیمر کتگ۔

زانگ بہ بیت کہ 31 جنوری 2026 ءِ سھب ءِ ساھت ءَ سرجمیں بلوچستان ءَ تراکانی تواراں جکسینتگ ات۔ منٹانی تہ ءَ سلاہ بندیں مردم کم چہ کم بازیں شھرانی ، سڑک، کوچگ، پولیس اسٹیشن ءُُ پوجی بنجل کش ءُ گور ءَ گندگ ءَ اتکگ انت-

پد ءَ بلوچ لبریشن آرمی ءَ جار جت کہ من ”آپریشن ھیروپ“ ءِ دومی بھر بندات کتگ، آپریشن ھیروپ 2.0 ءِ چیر دستی ءَ بلوچستان ءِ دوازدہ شھراں یکیں وھد ءَ مزنیں اُرشے کنگ بوتگ۔ بی ایل اے مجید بریگیڈ ءِ پنجاہ ’فدائین‘ ءَ اے اُرشانی تہ ءَ بھر زرتگ۔ آپریشن ھیروپ ءِ تہ ءَ سرجمیں بلوچستان ءَ پاکستانی لشکر ءِ مستریں کیمپانی سر ءَ ترندیں اُرشانی آماچ بوتگ اَنت کہ ایشانی تہ ءَ نوشکی ءِ شھر ھم ھوار اِنت کہ شش روچ ءَ بلوچ لبریشن آرمی ءِ چیردستی ءَ بیتگ-

زانگ بہ بیت چِد ءُ پیش ھم اے آشوبی گشندھانی نیمگ ءَ بازیں وھداں بلوچستان ءَ ندر بیوکیں ورنا نازینگ بیتگ انت –

بلوچستان ءِ دمگ نوشکی ءَ سرمل ءَ شال ءُ تپتان ءِ مزن شھدگ ءِ سر ءَ سلاہ بندیں مردمانی ناکہ بندی برجاہ اِنت ءُ ھمے وھد ءَ پاکستانی لشکر ءَ گاڑیانی ھواری ءَ دیم ءَ روگ ءِ کوشست کتگ کہ سلاہ بندیں مردماں نشانگ جوڑ کتگ۔

دمگی مردمانی رد ءَ سلاہ بندیں اُرش ءَ فورسز ءِ کارندہ جانی تاوان ءِ دیمپان بوتگ اَنت۔

ایشی ءَ چہ پیسر ناکہ بندی ءِ وھد ءَ سلاہ بندیں مردماں چہ بسے ءَ چار مردم دزگیر کتگ کہ گشگ بیتف کہ آ گوں سینڈک پروجیکٹ ءَ ھمگرنچ اَنت بلے انگت ءَ آیانی پجار پدر نہ بوتگ۔

مرچی سھب ءَ مستونگ ءِ دمگ کانک ءَ سلاہ بندیں مردماں مزن شھدگ ءِ سر ءَ کنٹرول کنگ ءَ پد کرومائٹ ءِ برگ ءِ پنچ گاڑی سوتکگ انت ۔

دومی نیمگ ءَ جدید آباد مستونگ ءَ مزنیں شھدگ ءِ پھل نامالومیں مردماں تراکناکیں شورواں گوں تراک کہ ایشی ءِ سبب ءَ ٹریفک بند بوتگ۔

اے وئیل ھما وھد ءَ دیم ءَ اتکگ اَنت کہ بلوچ لبریشن آرمی ءَ شال ءُ تلتان آر سی ڈی شھدگ ءِ سر ءَ شیخ واسل، کردگاپ، نوشکی ءُ دالبندین ءِ پنچ کاروائیانی زمہ واری زرتگ انت۔

اُرشانی تہ ءَ شیخ واسل ءَ مڈی برگ ءِ بیست گاڑی ءِ کاروان ءِ سر ءَ اُرش ، نوشکی ءَ دو چیک پوسٹ ءُ یک چیک پوسٹے دالبندین ءَ ھوار اِنت ءُ چہ دالبندین ءَ سیندک منسوبگ ءِ سئے کارندہ ھم دزگیر کنگ بیتگ انت ءُ ریکو ڈیک منسوبگ ءِ یک گاڑی یے ھم دست اش گپتگ ۔

انگت ءَ کانک ءُ نوشکی ءِ آپریشن ءِ زمہ واری کس ءَ نہ زرتگ۔

بلوچ ریپبلکن گارڈ ءِ جارکش دوستین بلوچ ءَ وتی شنگ کتگیں درشان ءَ گوشتگ گوستگیں شپ ءَ سرمچاراں نصیر آباد ءِ دمگ ڈیرہ مراد جمالی ءِ شھر ءِ نزیک ءَ اوچ پاور پلانٹ ءِ بجلی ءِ دو بنجاھی ٹاور بارودی شورو ایر کتگ ءُ تباہ کتگ انت-

جارکش ءَ گوشتگ اے تراک ءِ آسر ءَ دو ٹاور زمین ءَ کپتگ انت ءُ یکے ءَ تاوان رس اتگ – ھمے وھد ءَ بزدلیں لشکر ءَ لس آبادیانی سر ءَ کورکائی تیرگواری کتگ-

دوستین بلوچ ءَ گوشتگ بی آر جی اے اُرش ءِ زمہ واری ءَ من ایت ءُ اے دابیں اُرش بلوچستان ءِ آجوئی ءَ داں برجاہ مان انت-

بلوچستان ءِ جتاجتائیں دمگ نوشکی، مستونگ ءُ ڈیرہ مراد جمالی ءَ سلاہ بنداں شھدگ ءِ سر ناکہ بندی کتگ، مڈی بروکیں گاڑی مانداشتگ اَنت ءُ یک پُھلے ءُ دو لین ءِ ٹاور گوں تراکناکیں شورواں تباہ کتگ اَنت-

گیشیں ھالانی رِد ءَ مروچی سھب ءَ مستونگ ءِ دمگ کانک ءَ شال –تفتان بُنجاھی شھدگ ءِ سر ءَ سلاہ بندیں مردماں کرومائیٹ برؤکیں پنچ گاڑیانی دستیگ کنگ ءَ پد مانداشتگ ءُ تباہ کتگ-

ھمے وڑ مستونگ ءِ دمگ شیخ واصل ءِ ھند آباد ءَ سلاہ بندیں مردماں بُنجاھی پُھل گوں تراکناکیں شورواں تراکینتگ ءُ تباہ کتگ شال – تفتان شھدگ پہ گاڑیانی واستا بند کتگ-

ھمے وڑ نوشکی ءِ دمگ مَل ءَ ھم شال – تفتان بُنجاھی شھدگ سلاہ بندیں مردماں دستیگ کتگ- چمّگدانی رِد ءَ سلاہ بندیں مردمانی مزنیں کچے ءَ بُنجاھی شھدگ سر ءَ ھستیں گاڑیاں پٹ ءُ پول کنگ ءَ اَنت-

دومی نیمگ ءَ گوستگیں شپ ءَ ڈیرہ مراد جمالی شھر نزیک ءَ اوچ پاور پلانٹ ءَ چہ ھمگرنچیں لین ءِ دو بُنجاھی ٹاور تراکناکیں شورواں چہ تباہ کتگ اَنت وھدے کہ یک ٹاورے ءَ تاوان رس اِتگ-

اے میان ءَ پوج ءَ چوکیاں چہ سر ءُ دیم تیرگواری کتگ چریشی ءَ گیش تُرس ودی بیتگ-

اے وئیل انچیں وھدے ءَ دیم ءَ اتکگ اَنت وھدے بلوچ لبریشن آرمی ءَ شال – تفتان آر سی ڈی شھدگ سر ءَ شیخ واصل، کردگاپ، نوشکی ءُ دالبندین ءَ پنچ کاروائیانی زمہ واری منّ اِتگ اَنت-

اے اُرشاں شیخ واصل ءِ ھند سر ءَ مڈی بروکیں بیست گاڑیانی کاروان سر ءَ اُرش ءَ ھوار نوشکی ءَ دو ءُ دالبندین ءَ یک ھندے ءِ سر ءَ ناکہ بندی ھوار اَنت وھدے کہ دالبندین ءَ چہ سیاہ دک پروجیکٹ ءِ سے کارندہ ھم دزگیر کتگ اَنت؛

شیخ واصل، کانک ،نوشکی ءُ ڈیرہ مراد جمالی ءَ بیتگیں اُرشانی زمہ واری انگت ھچ گل ءَ نہ زرتگ اَنت-

گوستگیں روچ ءَ پاکستان پیپلز پارٹی ءِ پارلیمانی سروک صادق عمرانی ءَ بلوچستان اسمبلی ءَ وتی لیکہ درشان کتگ گوشتگ کہ بلوچستان ءَ جاور ھما جاہ ءَ سر بیتگ اَنت کہ وزیر ھم وتی دمگاں تاں پہ گاڑیانی سر ءَ شت نہ کن اَنت-

صادق عمرانی ءَ اسمبلی ءِ بائیکاٹ ءِ بیھار داتگ گوشتگ کہ ریاست ءُ انتزامیہ ایمنی جوڑ کنگ اربانی زر ھرچ کنگ ءَ اَنت بلے اشی ءَ اَبید جاور ھال شر بیگ ءَ نہ اَنت- آئی ءِ رِد ءَ پولیس گندگ نہ بیت وھدے کہ ایف سی کارندہ بیگاہ پنچ ءَ پد وتی بُنجلاں رو اَنت-

آئی ءَ دیمتر ءَ گْوشتگ کہ بلوچستان ءَ ھُزدار، ژوب ءُ نصیر آباد ءِ گچین ءِ شھدگ بند اَنت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ بلوچ لبریشن آرمی ءِ سرمچاراں چہ 4 مئی ءَ بگر داں 14 مئی ءَ سرجمیں بلوچستان ءَ دژمن ءِ ھلاپ ءَ 18 سوبمندیں کاروائی کتگ انت کہ ایشی ءِ تہ ءَ زورگیریں پاکستانی لشکر ءِ میجر رینک ءِ اپسر ءَ ھوار 31 کارندہ کشتگ انے ءُ بازینے سکا ٹپیگ بوتگ اَنت۔ اے اُرشانی تہ ءَ ھپت مزنیں آئی ای ڈی اُرش ھوار اَنت ھمے وڑ سرمچاراں جتا جتائیں جاھاں کلاکانی کلاک مزن شھدگانی سر ءَ کنٹرول گپتگ ءُ لُٹ ءُ پل کنوکیں کمپنی ءُ زور گیریں لشکر ءِ گاڑی نشانگ جوڑ کتگ انت ءُ کمپنیانی گوں ھمگرنچیں مردم دزگیر کتگ انت۔ اے ھمگرنچیں کارروائیانی تہ ءَ زورگریں لشکر ءِ جوڑ کتگیں وتگڑیں ”ڈیتھ اسکواڈ“ ءُ ملٹری انٹیلی جنس ( ایم آئی) ءِ ھپت کارندہ ھم کشتگ اَنت۔

جارکش ءَ گوشتگ زورگیریں لشکر ءِ گوما جتا جتائیں جاھاں بوتگیں ترندیں جنگ ءُ چوپانی تہ ءَ بی ایل اے ءِ پنچ سرمچار سنگت علی جان پنام ءِ سودیس، سنگت احسان اللہ پنام ءِ ماسٹر ماران، سنگت نصر اللہ پنام ءِ ماما زگرین، سنگت تنویر پنام ءِ مراد خان ءُ سنگت سعد اللہ پنام ءِ واجد شھید بوتگ اَنت۔

4مئی: زامران ءِ جونکی ءَ سرمچاراں پاکستانی لشکر ءِ راشن ءِ بروکیں گاڑی گوں بمب تراکے ءَ نشانگ جوڑ کتگ ءُ تباہ کتگ ءُ پد ءَ سرمچاراں کہ سنگر گپتگ ءُ ھمے جاہ ءَ سر بوکیں گاڑی مانداشتگ ۔

جارکش ءَ گوشتگ ھمے روچ ءَ خاران ءِ دمگ راسکوہ ءِ ایری کلاگ ءَ زور گیریں اُرد ءِ دمگی کارندھاں بزدلیں اُرشے کتگ ءُ بی ایل اے سنگت علی جان سیاپاد پنام ءِ سودیس شھید کتگ۔

5مئی: نوشکی ءِ کیشنگی ءِ دمگ ءَ سرمچاراں ریاستی پورس ‘ لیویز’ ءِ یک چوکی تراکناکیں شورواں گوں سرجم ءَ تباہ کتگ-

7مئی: مستونگ ءِ دمگ اسپلنجی ءَ سرمچاراں زورگیرین لشکر ءِ کیمپ ءَ اوشتوکیں یک کارندھے اسنائپر ءِ اُرش ءَ کشتگ۔ ھمے روچ ءَ سرمچاراں اورناچ ءِ آر سی ڈی شھدگ ءِ سر ءَ ریموٹ کنٹرول آئی ای ڈی ءِ اُرش ءَ گوں زورگیریں لشکر ءِ گاڑی نشانگ جوڑ کتگ ءُ مزنیں جانی ءُ مالی تاوانانی دیمپان بوتگ۔

8مئی: مستونگ ءِ مَرو ءِ دمگ ءَ سرمچاراں قبضہ گیریں لشکر ءِ کاروان ءِ سر ءَ سر بستگ ءُ ارش کتگ ءُ ایشی ءِ آسر ءَ دژمن ءِ لشکر ءِ سئے کارندہ جاہ ءَ مرتگ اَنت۔

10مئی: کلات ءِ دمگ چپر ءَ سرمچاراں زورگیریں پاکستانی لشکر ءِ کارندہ گوں آئی ای ڈی ءِ اُرش ءَ نشانگ جوڑ کتگ انت ءُ جانی ءُ مالی تاوان داتگ انت۔ پد ءَ ھمے دمگ ءَ گوں زورگیریں لشکر ءَ بوتگیں ترندیں جنگ ءُ چوپانی تہ ءَ بی ایل اے ءِ دو سرمچار سنگت احسان اللہ پنام ءِ ماسٹر ماران ءُ سنگت نصر اللہ پنام ءِ ماما زگرین بھادری ءَ جنگ کنان ءَ شھید بوتگ اَنت۔ ھمے روچ ءَ سرمچاراں دالبندین ءِ سیا چنگ ءَ سلاہ بندیں اُرشے ءَ “ڈیتھ اسکواڈ” ءِ کارندہ نشانگ جوڑ کتگ اَنت ءُ پد ءَ زورگیریں لشکر ءَ دوئیں کُشگ بوتگیں کارندھانی لاش چہ ھمے جاہ ءَ برتگ اَنت۔

11مئی: سرمچاراں کیچ ءِ دمگ بلنگور ءَ زورگیریں لشکر ءِ کیمپ ءَ اوشتوکیں کارندہ نشانگ جوڑ کتگ اَنت کہ ایشی ءِ آسر ءَ یک کارندھے جاہ ءَ مرتگ ءُ دومی سکا ٹپی بوتگ۔

12مئی: سرمچاراں زمران ءِ دمگ گورکادان ءَ زورگیریں لشکر ءِ پیادگیں سپاھیگ ریموٹ کنٹرول ءِ ارش ءَ گوں نشانگ جوڑ کتگ انت وھدے کہ آ پہ وت راشن ءَ برگ ءَ بیتگ انت۔ یک کارندھے چہ تراک ءَ جاہ ءَ مرتگ ءُ یکے ٹپیگ بوتگ۔

ھمے روچ ءَ گوادر ءِ فقیر کالونی ءَ سرمچاراں دستی بم ءِ اُرش ءَ پولیس ءِ کارندہ نشانگ جوڑ کتگ اَنت کہ ایشی ءِ آسر ءَ دو کارندہ ٹپیگ بوتگ اَنت۔

13 مئی: سرمچاراں پنجگور ءَ سی پیک ءِ راہ ءَ سلاہ بندیں اُرشے کتگ ءُ”ڈیتھ اسکواڈ” ءِ دو پرکاریں کارندہ شھاب ء نزیر ءُ نبیل ء جمیل کشتگ اَنت۔ ھمے روچ ءَ مستونگ ءِ شیخ واسل ءَ سرمچاراں مزنیں اُرشے ءَ بلوچانی مڈیانی لٹ ءُ کُٹ ءَ گوں بندوکیں مڈی بروک ھواریں بیست مزنیں گاڑیانی کاروان شال تپتان ءِ مزنیں شھدگ ءِ سر ءَ پہ پھازگی ءَ ھواریں زورگیریں لشکر نشانگ جوڑ کتگ۔ اے اُرش ءَ 8 مڈی بروکیں گاڑی ناکارہ بوتگ انت ءُ ھمے وڑ 6 زورگیریں فورس ءِ کارندہ مرتگ انت۔

چمالنگ ءِ دمگ ءَ سرمچاراں بی ایل اے ءِ انٹیلی جنس ونگ ’’زراب‘‘ ءِ نیمگ ءَ داتگیں راستیں انٹیلی جنس ءِ سر ءَ کار کنان ءَ زورگیریں پاکستانی لشکر ءِ ھشت کارندہ کشتگ اَنت کہ آھانی تہ ءَ میجر توسیف بھٹی ھم ھوار اِنت۔ بالا ڈکا ءَ اے کاروائی ءَ اولی رند ءَ یک گاڑی یے ریموٹ کنٹرول ءِ تراک ءَ چہ تراک کنگ بوتگ ، ایشی ءَ پد دومی گاڑی ءِ سر ءَ مزنیں سلاہ بندیں اُرش کنگ بوتگ ، ایشی ءِ تہ ءَ میجر توسیف بھٹی ءَ ھوار دژمن ءِ فوج ءِ 8 کارندہ مرتگ اَنت ۔ ھمے روچ ءَ سرمچاراں دالبندین ءِ لاگ آپ ءُ خزانگی ءِ میان ءَ شال ءُ تپتان ءِ مزنیں شھدگ ءِ سر ءَ دو کلاک ءَ گیش ناکہ بندی کتگ۔ دومی نیمگ ءَ سرمچاراں ’’سیاہ دک‘‘ ءِ لٹ ءُ پلی ءِ منسوبگ ءِ گوں سیادی داروکیں سئے جرمدار دزگیر کتگ اَنت وھدے کہ ’’ریکو ڈک‘‘ ءِ لُٹ ءُ پلی منسوبگ ءِ گاڑی یے دستیگ کتگ۔ ھمے روچ ءَ نوشکی ءِ سرمل ءُ جورکین ءَ سرمچاراں شال ءُ تپتان ءِ مستریں شاھدگ ءَ کلاکانی کلاک بند کتگ ءُ سنیپ چیکنگ برجاہ داشتگ۔ سرمچاراں سرمل ءَ دیم ءَ روگ ءِ جھد کنوکیں زورگیریں لشکر ءِ گاڑی نشانگ جوڑ کتگ اَنت کہ ایشی ءِ آسر ءَ زورگیریں لشکر ءِ سئے کارندہ جاہ ءَ مرتگ اَنت وھدے کہ آھانی یک گاڑی یے سرجم ءَ تباہ بوتگ۔

14مئی: بی ایل اے سرمچاراں یک ھمگرنچیں ءُ سوبمندیں اُرشے ءَ مستونگ ءِ درنگڑھ ءِ دمگ سرجمیں کنٹرول کتگ۔ سرمچاراں دمگی پولیس اسٹیشن ءُ دگہ سرکاری ماڑیانی سر ءَ دستیگ کتگ ءُ اود ءَ سلاہ ءُ گولہ بارود دستیگ کتگ انت۔ ھمے روچ ءَ سرمچاراں مستونگ ءِ دمگ کردگاپ ءَ شال ءُ تپتان ءِ مستریں شاھدگ ءِ سر ءَ دستیگ کتگ ءُ ساھاتانی ساھت سنیپ چیکنگ برجاہ داشتگ۔

سرمچاراں 25 اپریل ءَ مستونگ ءِ دمگ دشت ءَ چہ ایم آئی (ملٹری انٹیلی جنس) ءِ سئے کارندہ ماجد بادینی، علی احمد ءُ سنیل اقبال دزگیر کتگ انت کہ آ دمگ ءَ چہ وتی دروشم ءَ مشکوکیں رنگے ءَ رھادگ بوتگ انت۔ دزگیری ءِ وھد ءَ چہ آھاں ٹریسنگ ڈیوائس دزکپتگ اَنت۔

جست ءُ پرس ءِ وھد ءَ دزگیریں کارندہ ماجد بادینی ءَ پدر کتگ کہ آ بازیں وھدے ءَ چہ زورگیریں لشکر ءِ ایجنٹ ءِ بستار ءَ کار کنگ ءَ اِنت ۔ آئی ءَ من اتگ کہ آ زورگیریں اُرد ءِ واستا جتا جتائیں فوجی آپریشنانی آسراتی ءَ کنگ ءَ اِنت ایشی ءِ تہ ءَ سلاہ بندیں ڈیتھ اسکواڈانی یک گلے ءِ سرپرستی ھم ھوار اِنت۔

دگہ دزگیریں ایجنٹے نور احمد ءِ چُک علی احمد ءَ من اتگ کہ آ گوستگیں سئے سالاں گوں مولو نامیں نیٹ ورکے ءَ زورگیریں لشکر ءِ ایجنٹ ءِ بستار ءَ کار کنگ ءَ اِنت۔ آئی ءَ من اتگ کہ آ زورگیریں لشکر ءِ پوجی زوراکی ءِ آسراتی ءِ تہ ءَ تچک ءَ ھوار بوتگ انت، ایشی ءِ تہ ءَ دکاندار ءِ دروشم ءَ دمگ ءَ سرمچارانی رھادگ بوھگ ءِ نگاھچاری ءَ ھم ھوار انت۔

علی احمد ءَ گیشتر من اِتگ کہ کرنل عبید ءَ پد آ نوں کرنل احسان ءِ دیم پہ دیمیں چاریگری ءَ کار کنگ ءَ اِنت۔ آئی ءَ من اِتگ کہ آئی ءَ را انٹیلی جنس ءِ کارندھاں چیریں ٹریکنگ چپ ءِ سر کنگ ءِ کار داتگ ءُ ھمے وھد ءَ آئی ءَ گوں وت ءَ دگہ چار دمگی مردم ھم ھوار کتگ اَنت کہ آ زورگیریں لشکر ءَ را آسراتی بہ دنت۔ آ دمگ ءَ بلوچانی لوگانی سر ءَ چھاپہ جنگ ءُ زورگیر لشکر ءِ نیمگ ءَ ورنایانی پہ زور بیگواہ کنگ ءَ ھم ھوار بیتگ۔ علی احمد ءَ من اِتگ کہ زورگیریں لشکر ءَ اے راجی جرمانی واستا آئی ءَ را زر داتگ وھدے کہ آئی ءِ سر ءَ دمگ ءَ دُزی ءِ ھم پدریں الزام جنگ بوتگ۔ جست ءُ پرس ءِ وھد ءَ ایجنٹ ءَ وتی دگہ ھمراھ ءُ زورگیر لشکر ءِ بازیں ایجنٹانی نام ھم پدر کتگ انت۔ علی احمد ءَ را اے سنگینیں راجی جرمانی کنگ ءِ سرا بلوچ راجی آمیدگس ءَ مرگ ءِ سزا داتگ کہ داں گڈی آسر ءَ سرجم کنگ بوتگ۔

جارکش جیئند بلوچ ءَ گڈسر ءَ گوشتگ 15 اپریل ءَ زھری ءِ دمگ سوہندا ءَ گوں زورگیریں لشکر ءَ دگہ یک ترندیں جنگے ءَ بی ایل اے ءِ دگہ دو سرمچار تنویر مینگل پنام ءِ مراد خان ءُ سنگت سعد اللہ پنام ءِ واجد دژمن ءِ دیم ءَ بھادری ءَ گوں دیم پہ دیم بوھگ ءِ وھد ءَ شھید بوتگ اَنت۔ بلوچ لبریشن آرمی گوں راجی شان ءَ اے درستیں سرمچارانی مزنیں کُربانیاں یات کنت کہ آیاں پہ بلوچ راجی زرمبش ءِ برجاہ دارگ ءَ وتی سر ندر کُت اَنت۔ آزاتی ءِ چراگ کہ سنگت علی جان پنام ءِ سودیس، سنگت احسان اللہ پنام ءِ ماسٹر ماران، سنگت نصر اللہ پنام ءِ ماما زگرین، سنگت تنویر پنام ءِ مراد خان ءُ سنگت سعد اللہ عرف واجد ءَ گوں وتی ھوناں آپ داتگ پہ بلوچ راج ءِ آیوکیں پدریچاں رژن ءِ چراگ انت۔ اے شھیدانی پرس ءُ پُریں ھون اے گپ ءِ گواہ اَنت کہ داں بلوچ سرڈگار ءِ یکیں پُسّگ زندگ اِنت زوراکین ریاست ءُ آئی ءِ لٹ ءُ پلانی پندل ھچبر سوبمند بیت نہ کن انت۔