TBP Balochi

متحدہ عرب امارات ابوظبی ءَ واٹس اپ ءِ سر ءَ دیم دیگ بیتگیں کلوہ یک زالبولے ءَ گران ءَ کپتگ اَنت-

الامارات الیوم ءِ رد ءَ ابوظبی ءَ یک زالبولے ءَ وتی دزگھار ءُ یک دگہ مردینے ءِ ھلاپ ءَ آمیدگس ءَ پیش کتگ ءُ سیزدہ لک ءُ شست ءُ چار ھزار ءُ ھپت سد ءُ ھپتاد ءُ ھپت درھم دیگ ءِ گوشتگ، پنچ درسد نپ ءُ دو لکھ پنجاہ ھزار ءِ تاوان ءِ پُرکنگ ءِ لوٹ کتگ-

زالبول ءَ گوشتگ کہ آئی ءِ دزگھاراں آئی ءِ گون ءَ ٹگی کتگ، واٹس اپ ءِ سر ءَ کلوہ دیم داتگ ءُ آئی ءِ زر گپتگ اَنت- زالبول ءِ دزگھاراں واٹس اپ ءِ سر ءَ یک مردمے زر دیگ ءَ رازیگ کتگ –

ابوظبی فیملی اینڈ سول کورٹ ءَ منانکانی دیم ءَ آیگ ءَ پد زالبول ءِ ھک ءَ پیسلہ کتگ –

آمیدگس ءَ زالبول ءِ دو دزگھار ءُ یک مردمے ءَ ھکم داتگ کہ آئی ءِ سیزدہ لکھ ءُ شست ءُ چار ھزار ءُ ھپت سد ءُ ھپتاد ءُ ھپتیں درھماں واتر بہ کن اَنت-

ایشی ءِ ھواری ءُ ٹگی ءُ زالبول ءَ مالی تاوان ءُ زھنی ترس آماچ کنگ ءِ پژدر ءَ بیست ھزار درھم دیگ کپ ایت – ءُ آمیدگس ءَ وتی پیسلہ ءِ پنچ درسد نپ ءِ دیگ ءِ ھم ھکم داتگ-

بلوچستان ءِ جتاجتائیں دمگاں بیتگیں وئیلانی آسر ءَ شش مردم بیران ءُ یازدہ ٹپی بیتگ اَنت-

گیشیں ھالانی رِد ءَ بلوچستان ءِ دمگ ڈیرہ بگٹی ءَ ناشناسیں مردمانی تیرگواری ءَ چہ ھژدہ سالی ئیں ورناہ ارشد علی ء دین علی بیرانبیتگ- لاش چار ءُ ٹپاس ءِ ھاتر ءَ ڈی ایچ کیو نادُراھجاہ ءَ برگ بیتگ-

دومی نیمگ ءَ لورالائی ءِ دمگ لونی آباد ءَ چُک ءَ تپر ءِ سر ءَ مات جتگ ءُ کُشتگ- لورالائی پولیس واکدارانی رِد ءَ وئیل کوھنیں وت ماں وتیجیڑھے سوب گوشگ بیگ ءَ اِنت-

ھمے وڑ کراچی ءَ چہ اورماڑہ ءَ رؤکیں پاکستانی نیوی ءِ بس مکران کوسٹل ھائی وے کنڈ ملیر روکپتی دمگ کنڈ گری ءِ ھاک ءَ تُرند روگ ءِسبب ءَ چپی بیتگ، بس ءَ سواریں یک مردمے مرتگ ءُ نُھ ٹپی بیتگ اَنت-

شال ءِ دمگ سریاب ءَ دگ ءَ گاڑی ءُ پرپٹ ءِ میان ءَ ڈِک ورگ ءِ آسر ءَ یک مردمے بیران ءُ دو ٹپی بیتگ اَنت، وئیل ءَ ٹپی ءُ بیران بیتگینانیلاش سول نادُراھجاہ ءَ برگ بیتگ اَنت-

ھمے وڑ ھب کئور ءَ سے مردم بُک اِتگ اَنت، یکے ءِ لاش در کنگ بیتگ وھدے کہ دگہ دوئیں لاشانی پٹ ءُ پول کنگ بئیگ ءَ اَنت-

گوستگیں روچ ءَ بلوچستان ءِ تیاب دپی شھر گوادر ءِ ھند مونڈی ءَ گرند یے ءِ کپگ ءَ چہ توکل نامیں مردمے بیران بیتگ-

کیچ ءِ دمگ ھوشاپ ءَ بچکانی سرکاری دربرجاہ ءَ داد دئی ءِ مراگش ءِ برجم دارگ بوتگ، مراگش ءَ ھر تک ءُ پھناتاں سیادی داروکیں مردماں بھر زرتگ، مراگش ءِ مول مراد دربرجاہ ءِ تہ ءَ زانت ءُ زانشت ءِ دیمروئی دیگ –

مراگش ءَ تران کنان ءَ دربرجاہ ءِ پرنسپل ءِ گوشگ ات کہ ھر وڈیں ڈیھے ءِ دیمروئی ءُ اودے ورنایانی زانت ءُ زانگ ءِ ٹپاس ءَ پہ اودے زانشتی جاوراں چہ زانگ بیت – زانت ایوک ءَ ھما درونتی کتابانی وانگ لیکچر ءِ گوشدارگ نہ انت، بلکنہ درنصابی کتاب ھم نودربرانی ماژگی، جانی ءُ اخلاقی ردوم ھاتر ءَ آیانی رھشونی ءَ انت –

آئی ءَ گوشتگ کہ نودربراں چو مِٹو ءِ داب ءَ درونتانی رٹا جنائینگ ءَ چہ گھتر انت کہ درونتاں بہ پھم انت – وانگ جاہ ءِ درونتانی ھمراھی ءَ در نصابی کتانی وانگ ھم ورنایانی ھاتر ءَ المی انت کہ چریشی ءَ ورنایانی زانت ءِ تہ ءَ گیشی ءُ آیانی تہ ءَ ھمت ءُ ھوسلہ پیداک بیت –

مراگش ءِ گڈسر ءَ جنک ءُ بچکیں نودربراں تھی ءُ ڈنی گوازیاں بھر زرتگ – اے مراگش ءِ گڈسر ءَ جنک ءُ بچکیں نودربراں داد بھر کتگ ءُ مراگش ءِ گڈسر ءَ دربرجاہ ءِ پرنسپل ءَ گچینی مھمان ءُ سنئیر پروفیسرز ھم شیلڈز داتگ –

ابدمانیں کرد

نبشتہ کار: کندیل بلوچ

دی بلوچستان پوسٹ

“ما پہ سالونکی مراد ءُ واهگاں پہ گلزمین”
“آجوئی ءَ لوٹ اِتگ هون ما وت ءَ کُربان کُتگ”

کِرد بنی آدم ءِ پجار جوڑ بیت اِنت کرد چاگرد ءِ تہ ءَ مردم ءِ ستا ءَ کنائین ایت درستاں چہ پیش ستا راجی آجوئی ءِ جُھد ءَ هواریں آشوبی جُھدکارے ءِ بیت اِنت اگاں مرچی راج اِے جھان ءَ زندگ اِنت گُڑا همے پیمیں کارستانی کردانی برورد ءَ اِے سرجمیں جھان ءَ پہ وتی راجانی آجوئی ءَ آشوب ءِ راه ءَ پہ گرانبهائیں دیمهونی داتگ اش همے پیمیں کرد پہ جھان ءِ راجانی راهشونی ءَ درور جوڑ بوتگ اَنت –

ما آگاں دیمهونیانی گّپ ءَ بکّناں گُڑا مارا دری کومانی درورانی پکار نہ بیت پرچاکہ اِے زمین ءَ پہ وت ءَ اَنچیں بچّ ءُ جنکّ ردینتگ کہ وهدے آهاناں وتی گُلامی ءِ سما بوتگ گُڑا آهاں پہ وتی گھگیری ءَ وتی زند ءِ سرجمیں وشی پہ راج بانی ءَ ندر کُتگ اَنت-

اِے زمین ءَ شاری ءُ بارگ ءِ پیمیں چُک پیداک کُتگ کہ پہ اِیشی ءِ رکینگ ءَ مُدامی وتی زند ءِ سرجمیں وشیاں پہ وتی هاک ءِ پهریزگ ءَ کُربان کن اَنت-

زندگ بوگ ءِ مول ءُ مراد تھنا پہ وت زندگی کنگ نہ اِنت هست لھتے اَنچیں کارست کہ چہ مرگ ءَ پد هم زندگ ءُ ابدمان اَنت بلوچ راجدپتراں آگاں ما چمشانکّے بہ دے آں اود ءَ لھتے اَنچیں کرد دست کپ ایت کہ آهاں گوں وتی گراں بھائیں کرد ءَ راجدپتر ءَ را نوکیں نامے بکّشات ءَ پیاپ چیدگ، گلزمین ءِ چھرگ،آزمان بالاد اِشک وتن،گہھگیری ءِ نشان، مھر ءِ رنگ دگہ چے بُگّوشاں پہ ترا بارگ چہ هما کارستاں یکّے اَت کہ آئی ءَ وتی زند ءِ کُلیں واب ءُ واهگ پہ هاک ءِ پهازگ ءَ کولیگ کُت اَنت گوں پُرکیلیں بالاد ءَ مُھکمیں پگّر ءُ سسا ءَ گوں نوک رودیں واهگاں زند ءِ دُرستیں تماه یل کُت اَنت ءُ پہ زمین ءِ پهازگ ءَ رپت ءُ وتی نُگراهیں جان اش کُربان کُت-

اِے مرزبومیں هک پہ هون ءِ ترمپے ءَ ادا نہ بیت بلّئے من گوشاں بارگ ءَ هاک ءِ ھک ادا کُرت بارگ پہ هاک ءَ شیدا اَت مرگّ ءِ شیدائی پہ زندمانی ءَ گرانیں کشکانی مساپراں پہ زندگی ءَ سپر هچ مساپتاں پدکنز اِت نہ کنت تئی اِشک گوں گلزمین ءَ همدا پدر ات ابید ء ورد ءُ وراک ءَ گوں تیر وارتگیں باسک ءَ اَنگت دپ ئے پُر کندگ اَت ءَ گوں لگوریں دژمن ءَ دیم پہ دیمی ءَ جنگ ءَ ات ءُ دژمن ءَ را همے باور کنائینت ئِے بلوچ سرڈگار تنیگا بے وارس نہ اِنت-

راستے کہ زمین ءِ اِشک انسان ءَ را گوار بہ جنت گُڑا اِے اِشک آرا داں گُڈی سیمسراں کارایت ءُ سرکنت بارگ زمین ءِ اشکّ ءَ گنوک اَت همے هاتر ءَ گوں اسلم ءِ مُھکمیں پگّر ءَ جنگ ءِ میدان ءَ گوں تمردی ءَ جُنزان بوت ءُ لشکر ءِ ما پروش ورگ ءَ لاچار کُت کُربان ! تو چو سرپد ءِ کہ چہ ترا پد تئی همراه ءُ همکوپگیں چینچو همبل تئی رندگیری ءَ آتک ءَ او پہ وتن نمیران بوتگ اَنت تئی پد ءَ هزار بارگ ودی بوتگ پہ یزید ءِ چَک پروش کنگ ءَ هزار بارگ تئی پُشت پداں راه رنداناں آشوبے ءِ درپشوکیں نام تئی رند پداں ڈیواے شیدائی پروانگ اَنگت رهادگ اَنت تئی مسکیں هونانی ملپداں سبزیں بھارے رود ایت تئی هونانی لیکھاں ءَ پہ بلوچستان ءَ آشوب کار انت تئی هونانی وشبوھیں سرجمیں ڈیھ ءِ ملپداں تالان اِنت ءُ همئے وشبوه مئے اندیمیں بُتارا ٹوهینیت همئے پوهین اِت کہ چہ هاک ءِ اِشک ءَ ابید همُک اِشک بے آسر اِنت-

کاگد پہ سیاهی ءُ راج دپتر پہ هون نبیسگ بنت هما مردماں کہ وتی گوستانک گوں وتی پاک ءُ پلگاریں هونان نبشتہ کُتگ اَنت پہ مُدامی نمیران بنت ءُ راج وتی پهازوکیں سراں پہ شرپے گیر کار ایت هاک ءِ بستار ءَ اگاں چو تئی پیما یکّے بزانت گُڑا یکّ رندے نا چُشیں سراں ءَ هزار رند ءَ زند بہ رس اِیت کُربان اش کن اَنت کہ زمین ءِ موکگ سرانی رون پرمائیت آیانی لوٹ ءُ واهشت یکّ پُر اِیمن ءُ وشهالیں باندات ئے ءِ وتی زمین ءَ چہ ناشرانی پنجگاں رکینگ ءِ جُھد ءَ مرگ ءِ جوریں کُچلاں پہ شات نوش کن اَنت ءُ پہ راج ءُ گلزمین ءَ وتی بے مٹیں سرانی کُربانی ءَ دے اَنت ءُ وتی زمین ءِ امبازاں بنت تو پہ سرڈگار ءِ موکگ ءَ وتی ساه ندر کُتگ تئی پاک ءُ پلگاریں هون بلوچستان ءِ آجوئی ءِ مستاگ بہ اَنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل برجاہ، زھرشانی بنجل ءَ مروچی چار ھزار ءُ نُھ سد ءُ نود ءُ شش روچ سرجم بوتگ انت –

مروچی چہ چمن ءَ سیاسی باسک محمد رمضان اچکزئ، خیر محمد کاکڑ ءُ دگہ مردماں اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ زوراک ءِ اگاں گوستانک ءِ سرا چمشانک ءِ دیگ بہ بیت گڈا اے گپ الم دیما کئیت کہ وتی زورگپتیں دمگانی کبزہ ءِ برجاہ دارگ ءَ پہ کجام وڈیں ھنر ءُ پندل نہ ساز اِتگ – ھر تک ءُ پھناتاں سیادی داروکیں مردم بیھار داتگ انت ترسینتگ انت لٹ شاپ کتگ انت ءُ آھانی ننگ ءُ ناموس لگتمال کتگ –

آئی ءَ گوشتگ کہ بلوچ سرڈگار ءِ سر ءَ برجاھیں زورگیریں ریاست ءِ زلم زوراکیانی تہ ءَ روچ پہ روچ گیشی آیگ ءَ انت، زند ءِ ھر تکاں سیادی داروکیں بلوچ پاکستانی پوج ءِ زوراکیانی آماچ انت پاکستانی ریاست ءِ پھازگی کارمند ھمک روچ بلوچ پرزندانی ننگ ءُ ناموس ءَ لگتمال کنگ ءَ انت ءُ آھانی گوم ءَ ھمے رویش ءِ برجاہ دارگ ءَ وتی پرز لیک انت –

ماما قدیر بلوچ ءَ گوشتگ کہ بلوچ زالبولانی جھد ءِ تہ ءَ یکشلیں بھر زورگ ءَ ریاست ءِ پادانی چیر ءِ زمین کش اِتگ ـ پرچا کہ چدوپیسر آئی ءَ وتی رسانکدر ءُ زانت ءَ چہ زبھریں زانتکارانی کمک ءَ پروپکنڈہ کنائیں اِتگ کہ بلوچ زالبول چاردیواری ءِ تہ ءَ بندیگ کنگ ءُ آھانی سر ءَ زوراکی کنگ بوگ ءَ انت بلے ھستیں وھدے جاورھالانی تہ ءَ بلوچ زالبولانی ستاکرزیں کرد ھاسکر انسانی ھکانی لگتمالی ءِ درگت ءَ میان استمانی ادارھانی دلگوش گور کنائینگ ءَ بلاھیں پیلو کتگ ءُ ریاست ءِ درسیں دروگ ءُ پروپکنڈہ ھاکاں ھوار کتگ انت –

ماما قدیر ءَ گوشتگ کہ میان استمانی تاکتاں ناکہ تھنا پاکستان ءِ درسیں کتکاریانی سر ءَ چم بند کتگ ءُ نشتگ انت بلکنہ آئی ءَ بلوچ ءِ وڈیں ایردستیں راجانی کشت ءُ کوشءُ چکچینی ءَ لائسنس ھم دیگ بوتگ –

اوگانستان ءُ پاکستان ءِ نیام ءَ برجاھیں سئے گوازیانی ٹی ٹوئنٹی کرکٹ سیریز بیتگ، اوگانستان اولی دو گوازیاں باج بر بیتگ ءُ سیریز وتی نامءَ کُتگ اِش، وھدیکہ پاکستان ءَ گُڈی گوازی وتی نام ءَ کُتگ۔

متھدہ عرب امارت ءِ شارجہ کرکٹ پَٹ ءَ پاکستان ءُ اوگانستان ءِ نیام ءَ سئے ٹی ٹوئنٹی گوازی لئیب کنگ بیتگ اَنت کہ اِشانی تہءَ اولی دوھیں گوازی اوگانستان ءَ وتی نامءَ کُتگ اَنت۔

اوگانستان ءَ پاکستان سیریز ءِ تہءَ پروش داتگ، ءُ پاکستان ءِ دیمءَ کجام ھم سیریز ءَ اولی بر ءَ باج بری وتی نام ءَ کُتگ۔

اوگستان ءِ باج بری ءَ پد اوگانستان ءِ مھلوک ءَ مزنیں شاتکامی ءِ درشان کُتگ ءُ اوگان لئیبیاں مرادباتی داتگ۔

زانگ بہ بیت پاکستان آئی سی سی ءِ ٹی ٹوئنٹی رینکنگ ءَ سئے می لمبر ءَ اِنت وھدیکہ اوگانستان دھمی لمبر ءَ اِنت، اے باج بری پہ اوگانستان ءَ نہ تھنا مزنیں دلبڈی ءُ دیمروی ءِ سکین گُشگ بئیگ ءَ اِنت بلے پاکستان ءَ مزنیں تژن ءُ شگان ءِ ھم جوڑ بیتگ۔

بلوچستان ءِ دمگ کیچ ءِ بُنجاھی شھر تربت ءِ دمگ سری کھن زامرانی بازار ءَ گوستگیں شپ ءَ پاکستانی لشکر ءَ مزنیں کچے ءَ بیڑبرتگ ءُ الندور بلیدہ ءِ جھمنند وارث ء موسیٰ آوار جنگ ءَ پد بیگواہ کتگ-

کھول رِد ءَ آیاں وئیل ءِ ھال تربت پولیس ءَ داتگ بلے آیاں گوشتگ کہ مارا اشی ءِ دزگیری ءِ درگت ءَ ھچ وڑیں سرپدی نیست-

کھول ءَ گْوشگ اِنت کہ مارا گوشگ بہ بیت کہ وارث، موسیٰ کجام جرم ءَ شپ ءِ نیم ءَ زورانسری آوار جنی ءِ نشانگ کتگ- آئی ءَ یل کنگ بہ بیت مارا زندگ بوھگ ءِ ھک بدے اَنت-

آیاں گْوشتگ کہ وارث موسیٰ اد ءَ پوریاگری کتگ وتی کھول لاپ داتگ- شپ ءِ وھد ءَ چو دُزانی پیم ءَ آ بیگواہ کتگ-

زانگ بہ بیت بلوچستان ءِ جتاجتائیں دمگاں ھمکروچ ءَ زورانسری آوار جنی ءِ رپورٹ نکش بوگ ءَ اَنت دومی نیمگ ءَ بیگواھیں مردمانی یل کنائینگ ءِ ھاتر ءَ توار چست کنوکیں گل وائس فار بلوچ مسنگ پرسنز ءِ شُدکُشیں ھڑتالی بُنجل برجاہ اِنت-

اوگانستان ءَ مپت ءَ جنکیں زھگاں وانینوکیں چاگردی باسک دزگیر کنگ ءُ گوں وت برگ بیتگ-

ھال سرکنوکیں ادارہ اے ایف پی ءِ رد ءَ اوگانستان ءِ میان اُستمان ءِ “مشن ” ٹویٹ ءَ راست کتگ کہ “پین پاتھ ” ءِ سروک ءُ جنکویں زھگانی وانگ ءِ پلامرزی کنوکیں مطیع الکہ ویسا دوشمبے ءِ روچ ءَ کابل ءَ دزگیر کنگ بیتگ-

اوگانستان دنیا ءِ اولی ڈیھ اِنت کہ اود ءَ جنکیں زھگانی سر ءَ سرکار ءَ بندش جتگ ءُ اے بندش ءِ ھلاپ ءَ گوست ءَ زھرشانی ھم کنگ بیتگ اَنت-

چاگردی باسک مطیع اللہ ویسا ءِ برات سمیع اللہ ءَ اے ھال راست کتگ کہ دوشمبے ءِ بیگاہ ءَ مسیت ءَ واتر بیتگ ءُ آ چست کنگ بیتگ-

سمیع اللہ ءَ گوشتگ مطیع اللہ ءَ نماز ھلاس کتگ ءُ واتر دراتکگ کہ دو گاڑی والایاں دزگیر کتگ ءُ گون وت برتگ-

مطیع اللہ وھدیکہ آیانی بارو ءَ.جست کتگ گڑا آیاں جت ءُ زورانسری گون وت برتگ-

مطیع اللہ ویسا ءِ گل “پین پاتھ ” کُچگی دمگاں کتاب بھر کنت ءُ کماشیں مردماں گپ ءُ تران کنت ءُ آیاں جنکیں زھگانی وانگ ءِ بارو ءَ سرپدی دنت-

طالبان ءِ نیمگ ءَ جنکیں زھگانانی وانگ سیکینڈری ءِ بندش ءِ سبب ءَ مطیع اللہ ویسا دور ءُ کُچگی دمگاں شتگ ءُ اود ءَ وانگ ءِ واستا مھمے ھلائینتگ-

زانگ بہ بیت مطیع اللہ ویسا ءَ گوستگیں روچاں وتی ٹوئٹر ءَ یک ٹویٹے ءَ گوشتگ کہ ما جنکانی وانگاجاھی پچ بیگ ءَ ادار، منٹ ءُ سیکنڈاں ھساب کنگ ءَ ایں ءُ وانگجاھی بندش اوپار کنگ نہ بیت ءُ اے مزنیں تاوانے –

آئی ءَ گوشتگ کہ ما دمگی مردماں گند ءُ نند کن ایں وانگجاھانی بندش ءِ سر ءَ وتی زھرشانی ءَ برجاہ بہ دار اَنت –

زانگ بہ بیت جنکانی سیکنڈری وانگ جاہ ءِ بند بوگ ءَ پد طالبان ءَ یونیورسٹیانی وانگ ھم بندش جتگ –

میان اُستمانی گل ءُ دگہ ڈیھانی نیمگ ءَ ایرادگری بیتگ اَنت ءُ طالبان سرکار ءَ اے گپ سدکی کتگ کہ جاورانی گھتری ءَ پد وانگ دوبر پچ کنگ بنت-

طالبان ءِ سرکار ءِ گوشگ اِنر پوڑی ءِ کمی ءُ اسلامی وانگی ءُ رنگ ءُ دروشمانی نہ کنگ ءِ سبب ءَ وانگجاہ ءُ یونیورسٹی داں انگت ءَ بند اَنت-