TBP Balochi

بلوچستان ءِ سرکار ءَ مروچی چارشمبے ءِ روچ ءَ ھژدہ گریڈ اپسر وقاص علی محمود بلوچستان جانسلامتی ءِ سیکرٹری گچین کتگ وھدیکہ دومی نیمگ ءَ کیچ ءِ بنجاھی شھر تربت ءِ سول نادراھجاہ ءَ پہ چیک اپ ءِ ھاتر ءَ اتکگیں نادراہ دلسیاہ انت ڈاکٹر گواہ نہ کنت –

سروسز اینڈ جنرل ایڈمنسٹریشن ڈیپارٹمنٹ (ایس ءُ جی اے ڈی) ءِ نیمگ ءَ شنگ کنگ بوتگیں درشان ءِ رِد ءَ وقاص ولی محمود بلوچستان جانسلامتی ءِ نوکیں سیکرٹری بیت اِیں وھدیکہ چدوپیسر اے اگدہ ءِ سر ءَ صالح ناصر ایڈیشنل چیف سیکرٹری بیت انت –

بلوچستان ءِ سرکار ءِ نیمگ ءَ گچین کنگ بوتگیں جانسلامتی ءِ سیکرٹری پنجاپ ءِ جھمنند انت وھدیکہ چدوپیسر آ گوجرانوالہ ءِ کمشنر، پنجاپ ءِ زانشتی سکرٹری ءُ پنجاپ ءِ ایکسائز ءُ ٹیکسیشن ءِ سیکرٹری ھم بوتگ –

اے ھم گوشگ بوتگ کہ گوستگیں سیکرٹری داخلہ بلوچستان ءِ محمد اکبر حریفل بلوچستان سیکرٹری انڈسٹریز وھدیکہ ظفر علی بخاری ایکسائز ءُ ٹیکسیشن ءِ سیکرٹری اگدہ ءِ سر ءَ آرگ بوتگ انت –

زانگ بہ بیت بلوچستان ایندگہ جیڑہ ءُ جنجالانی ھمراھی ءَ جانسلامتی ءِ جیڑہ ھم نگیگ انت – بلوچستان ءِ بنجاھی شھر شال ءَ ھوار بازیں دمگاں جانسلامتی ءِ ھچ وڈیں آسراتی نیست انت –

بلوچستان ءِ دمگ شال ءَ ھستیں شومک ءِ یکیں سنٹر “سینار” ءَ گوستگیں بازیں ماھے بیت کہ درمان دیگ بوگ ءَ نہ انت وھدیکہ بازیں دمگاں تپ، سر درد، شکری ءُ شومک ءَ ھوار دگہ بازیں نادراھی ءِ درمان نیست انت –

ھمے وڈ سردرد ءُ تپ ءِ نادراھی ءِ پیناڈول ھم شال میڈیکل اسٹوراں دست نہ کپیت – شال ءَ اے درمان تھنا میڈیکل اسٹوراں چہ گار نہ انت بلکنہ سرکاری نادراھجاہ ءَ ھم دست نہ کپ انت –

دومی نیمگ ءَ کیچ ءِ بنجاھی شھر تربت سول نادراھجاہ ءَ ڈاکٹر ڈوٹی سر ءَ گار انت ءُ وتی ڈوٹی ءِ وھد ءَ پرائیوٹ نادراھجاھاں نندگ انت –

پہ چیک اپ کنگ ءِ ھاتر ءَ اتکگیں نادراہ بازیں اڈوجنجالانی دیمپانی ءَ کنگ ءَ انت – ایس ایم ءَ ھم اے درگت ءَ وتی شکایت کتگ کہ آ ڈاکٹرانی گوم ءَ ھوار انت ءُ دمگی واکدار ھچ وڈیں گامگیج زورگ ءَ نہ انت –

ایم ایس وت پرائیویٹ نادراھجاہ ءَ چلائینگ ءَ انت آھانی ھمے کوشست انت کہ نادراھ پرائیویٹ نادراھجاھاں بیا انت –

دمگی مردمانی رِد ءَ تربت ٹیچنگ نادراھجاہ ءَ گوستگیں دو سالیں لیبارٹری ٹیسٹ گرگ بنت – شکری ءُ سی بی سی ٹیسٹ ءَ شش سد کلدار گرگ بوتگ، پہ ایکسرا سَے سد ءُ چار سد گرگ بوتگ کہ چریشی ءَ نادراھجاہ ءَ اتکگیں نادراہ دلسیاہ انت –

ٹیچنگ نادراھجاہ ءَ گیشتر بزگریں مردم پہ الاج ءِ ھاتر ءَ کائنت – وھدیکہ پہ ٹیسٹ ءَ لیبارٹری ءَ رو انت گڈا بازیں زرے گرگ بنت – اے درگت ءَ دمگی مردماں چہ برزی تبک ءِ واکداراں لوٹ کتگ کہ تربت نادراھجاہ ءَ بنکی آسراتی دیگ بہ بنت –

سربوتگیں ھالانی رِد ءَشال ھوار بلوچستان ءِ گیشتریں دمگاں ترندیں نادراھیانی درمان نیست اِنت –

شال ءَ ھوار دگہ دمگاں شومک، (مرگی)، گردگ، ڈائیلسز، تھلیسمیا ءُ تپ ءَ ھوار دگہ بازیں نادراھیانی درمان مارکیٹانی تہ ءَ چہ گار بوتگ انت – نادراھ چہ ڈن ءَ بزاں بلیک ءَ گرانیں نھاد ءَ درمانانی زیرگ ءَ لاچار انت –

مارکیٹ بنشون ءِ رِد ءَ شال میڈیکل اسٹور ءَ کینسر، (مرگی)، گردگ ڈائلسز، تھیلیسمیا ءُ تپ ءَ ھوار دگہ بازیں اژدری درمان رسگ ءَ نہ انت –

سی ٹی سکین ءَ کارمرز بوؤکیں انجیکشن کہ ڈنی میڈیکل اسٹوراں سَے ھزار کلدار ءَ بھا بوتگ ھنو ھما انجکشن بلیک ءَ ھپت ھزار ءَ بھا بوگ ءَ انت –

ھمے وڑ نارملیں تپ ءِ ھاتر ءَ کارمرز بوکیں پیناڈول گولی ھم شال میڈیکل اسٹوراں کم انت، شال ءَ اے درمان تھنا میڈیکل اسٹورانی تہ ءَ گار نہ انت بلکیں سرکاری نادراھجاھاں ھم نہ رس انت –

امریکہ ءِ یک آمیدگسے ءَ راجدپتر ءِ توک ءَ اولی رند ءَ یک ھجاب کنوکیں زالبولے جج جوڑ بیتگ-

عرب نیوز ءِ رد ءَ جج ءِ اگدو ءَ زیروکیں نادیہ کیف مصری زالبولے ءُ آ اود ءَ وکیلے ءِ دروشم ءَ کار ءَ بیتگ-

دمگی رسانکدر ءِ رد ءَ گوستگیں سال ءَ امریکہ ءِ ریاست نیو جرسی ءَ گورنر فِلپ مرفی ءَ نادیہ کھف اے اگدو ءَ گچین کنگ بیتگ-

چریشی ءَ پد مئی ءَ کمیونٹی لیڈرز کہ چریشانی توک ءَ میئرز، کونسل ممبرز، اسکول بورڈ ممبرز ءُ نیو جعسی مسلم لائیرز ءِ رھشوناں گوں ھوار اِنت – آ مئی ءَ یک نمدی ءَ سینیٹر کرسٹن کوراڈو ءَ اے نامانی دیم ءَ برگ ءِ لوٹ کتگ-

نادیہ ءِ نام ءِ پلامرزی ءَ ھپت سد ءَ گیش مردماں آن لائن پٹیشن سائن کتگ –

نادیہ کھف امریکہ ءَ مزنیں آمیدگساں ججی ءِ واستا گچین بوتگیں سیمی مسلمانیں زالبول اِنت- آئی ءَ گوستگیں ھپتگ ءُ اے پاک تاک ءَ گوں اگدو ءِ سوگند چست کتگ کہ آئی ءِ بلک ءَ داد داتگ بیتگ-

مراگش ءِ سوگندواری ءِ نیاد ءَ آئی ءَ گوشتگ ’ من امریکہ ءَ مسلمان ءُ عرب کمیونٹی ءِ نمائندگی کنگ ءَ پھر سما کن آں ‘-

نادیہ کھف ءَ دیمتر ءَ گوشتگ کہ’ من لوٹ آں نوکیں نسل ءَ بہ گنداں وتی دین ءَ ابید ءِ ترس ءُ امل کنگ ءَ آں – آئی ءَ گوشتگ اے رنگ مئے تاکت اِنت اے کمزوری نہ اِنت ‘

نادیہ کھف ءِ کھول لاء ءَ گوں بندوک اَنت ءُ آئی ءَ سال دوھزاد ءُ سَے ءَ نیو جرسی ءَ مسلمانانی واستا شھری ھکانی گل کونسل آف امریکن – اسلامک ریلیشنر ءِ گون ءَ بندوک بیتگ-

نادیہ کھف ءَ سوگندواری ءَ پد ھمے روچ ءَ اسلامی اسکارف ءِ گروکیں یک دگہ کھولے ءِ لاء وکیل دالیا یوسف ءَ ھن سامر سیٹ نیوجرسی ءَ جج ءِ اگدو ءِ سوگند وارتگ-

گوستگیں لھتے سالاں امریکہ ءَ جھمنندین بالی وڈ ءِ ازمکار پریانکا چوپڑا ءَ یک انٹرویو ءِ تہ ءَ گوشتگ کہ آئی ءَ بالی وڈ ءَ یک جاھے ءَ دومی جاہ ءَ ھمے واستا روگ کپتگ کہ اود ءَ من ءَ دیوال ءَ جنگ ءَ بیتگ اَنت-

انڈین ایکسپریس ءِ رد ءَ ازمکار ءَ ڈیکس شیفرڈ ءِ پوڈ کاسٹ ’ آرم چیئر ایکسپرٹ ‘ ءَ گوں گپ کنان ءَ آئی ءَ لھتے مردمانی گون ءَ جیڑہ ودی بوتگ چریشی ءِ سبب ءَ آئی ءَ را بالی وڈ ءِ نیمگ ءَ لھتے مردم ڈالچار کنگ ءَ اَنت-

پریانکا چوپڑا ءَ گوشتگ کہ ’ من ءَ بالی وڈ انڈسٹری ءِ دیوال ءِ نیمگ ءَ چگل دیگ ءَ اَنت مھلوک من ءَ تامراں کاسٹ کنگ ءَ نہ اِنف چریشی ءِ سبب ءَ لھتے جیڑہ ھست اَنت کہ اود ءَ انیگیں سیاست ءِ سبب ءَ مردم گوش ئیگ ءَ تمبوردگی سما کتگ ءُ چریشی ءَ من ءَ بریک کنگ المی کنگ کپتگ‘-

زانگ بہ بیت پریانکا چوپڑا ءَ بالی وڈ وتی ڈیبیو امریکہ ءِ ٹیلی وژن سریز ’کونٹیکو ‘ ءُ کتگ ءُ اود ءَ آئی ءَ سال دوھزار ءُ ھژدہ ءَ امریکہ ءِ ازمکار ءُ گشندہ نک جونس ءَ گوں آروس کنگ ءَ پد اود ءَ ھمک وھدی رنگ ءَ امریکہ ءَ نندوک اِنت-

پریانکا چوپڑا ءَ انٹرویو ءَ گوشتگ کہ پد ءَ انڈین ازمکار کنگنا رناوت ءَ ٹوئٹر ءَ ٹاہ داتگ ءُ گوشتگ ’ درست سرپد اَنر کرن جوھر ءَ پریانکا ءِ سر ءَ بندش جتگ ‘-

کنگنا رناوت ءَ دیمتر ءَ نبشتگ کنان ءَ گوشتگ کہ ’ پریانکا چوپڑا ءُ کرن جوھر ءِ میان ءَ جیڑہ ھست اَنت کہ چریشی ءِ سبب ءُ ازمکار ءِ دوستی گون شاہ رخ خان ءَ بیتگ‘-

آئی ءَ کرن جوھر ءِ بارو ءَ گیش نبشتگ کتگ ءُ گوشتگ کہ ھندوستانی سوجکار ءَ گون ھساب گرگ بہ بیت ’ آئی ءَ فلم انڈسٹری ءِ رواج ءُ دودمان تباہ کتگ کہ امیتابھ بچن ءُ شاہ رخ خان ءِ زمانگ ءَ ڈنی مردماں واستا اینکس زھر نہ بیتگ اَنت-

ایران ءِ رودراتکی استان مشھد ءَ روکپتی بلوچستان ءِ جھمنندیں ورنایے بیگواہ کنگ بیتگ-

گیشیں ھالانی رد ءَ گوستگیں روچ ءَ یاسین سوری ء مھمد کریم نامیں ورنایے ایرانی چیریں ادارھاں آوار جنگ ءَ پد بیگواہ کرتگ-

ھالانی رد ءُ یاسین گوستگیں روچاں مشھد ءَ پہ سیل ءُ سواد ءَ شتگ بیتگ کہ حرم امام رضا ءِ زیارت ءِ نزیک ءَ چیریں ادارھانی کارندھاں آوار جتگ ءُ برتگ-

ھالانی رد ءَ گوشگ بیتگ کہ یاسین روکپتی بلوچستان ءِ دمگ ھاش سراوان ءِ نندوک اِنت کہ آ اے وھد ءَ پہ تر ءُ تاب ءَ مشھد ءَ شتگ بیتگ-

یاسین ءِ آوار جنگ ءُ آئی ءں درگت ءَ دگہ گپانی بارو ءَ سرپدی نہ بیتگ اَنت-

زانگ بہ بیت روکپتی بلوچستان ءَ ماھو بلوچ ءِ زرمبشت ءَ پد اود ءَ بازیں کساسے ءَ ورناہ آوار جنگ ءُ بیگواہ کنگ بیتگ اَنت کہ اے آوار جنی تھنا روکپتی بلوچستان ءَ ناں بلکیں ایران ءِ دگہ اُستاناں ھم روکپتی بلوچستان ءِ جھمنندیں ورنا آوار جنگ ءُ بیگواہ کنگ بیتگ اَنت-

بلوچ ءِ ایجوکیشن؟

2/2: گُڈی بھر

نبشتہ کار: شازیہ بلوچ ءُ رُکسار بلوچ

دی بلوچستان پوسٹ

اگاں ما انگریزی ءِ اِے جھلی لبزاں ھورت بچار ایں گُڑا ما سرپد بہ ایں کہ وانگ ءُ زانگ چے ءَ گْوش اَنت؟
Studying + Learning= Knowledge

بزانکہ ایشی ءَ گْوش اَنت ایجوکیشن:- وانگ، دربرگ ءُ وت ءَ یک زانتکاریں وانِندھے جوڑ کنگ۔ داں وھدیکہ وانگ ءَ زانگ مہ بیت، وانوک وت ءَ یک زانتکار ءُ پوھیں بنی آدمے جوڑ مہ کنت آئی ءِ وانگ زوال اِنت پمیشکا بے زانتکارے ءِ جوڑ بوگ ءَ تو وت ءَ واِنندھے گْوشت نہ کن ئے۔ یک وانِندھے ءَ بے سُد ءُ بے سما بوگی نہ اِنت بلکیں آئی ءَ زانت ءُ پوھی بہ بیت۔

اگاں تو بلوچے ئے ءُ تو وتی زِندہ ءَ یک ساھتے ءَ ھم نہ جیڑ اِت کہ ما بلوچاں مئے جِند ءِ راجی زبان پرچا ماں وانگجاھاں وانینگ نہ بوگ ءَ اَنت ءُ مارا پرچا پارسی، ھِندی ءُ انگریزی ماں وانگجاہ، دربرجاہ ءُ زانشجاھاں وانینگ بوگ ءَ اَنت؟ زاناں من یک راجے نہ آں؟ زاناں من ءَ سرڈگار نیست، من ءَ زُبان نیست یا منی زُبان ءَ رھبند نیست؟ وھدیکہ ما وانان ءَ اے جُستامی جواباں ھم بزان ایں گُڑا وت ءَ زانتکار گْوشت کن ایں۔ انی باید اِنت ما سرپد بِہ بَہ ایں کہ بلوچ یک گُلامیں راجے پمیشکا مئے جِند ءِ راجی زُبان ماں ایران ءُ پاکستان ءِ ایردستیں بلوچستان ءَ وانینگ نہ بنت گُڑا ایشی ءِ ملتب اِے وَ نہ اِنت ما وتی راجی زُبان ءَ وت مہ وان ایں یا مہ وانین ایں!

گُڑا باید اِنت مرچیگ ٹیکنولوجی ءَ شر کارمرز کنان ءَ ما بلوچی وٹس ایپی وانگجاہ ءُ پیسبوک ءِ بلوچی دربرگی گروپاں وت ءَ مُدام ساڑی بکن ایں، وتی پجّاروکیں بلوچاں ھم ھمے دامگی (انٹرنٹی) وانگجاھاں ھوار بہ کنائین ایں کہ انی ما بلوچ راج ءَ چہ ھمے موبائلاں وتی راجی زُبان وت ونگ ءُ دربرگ ءَ ھوار وتی راج ھم وانینگی اِنت۔ گِند ئے بلوچی مئے وتی جِند ءِ ماتی ءُ راجی زُبان اِنت، اگاں ما بلوچاں پارسی ءُ ھِندی(اردو) ماں اَربی سْیاھگ ءَ ونتگ گُڑا ما وتی راجی زُبان بلوچی ءَ وت ھم ونت کن ایں، سرپد بہ ایں۔ بِل اِت تو نبشتہ کُت نہ کن ئے بلے وانگ ھم گنج اِنت، بلوچی دَرونت ءُ نبشتانکاں وانان ءُ دلگوش کنان ءَ کم کم ءَ وت سرپد بہ ئے۔ ما بے ھال مہ بہ ایں کہ پہ بلوچی راست نبیسّگ ءُ وتی راجی زُبان ءِ شریں شائِر ءُ نبشتہ کارے ءِ بوگ ءَ لازم اِنت چہ دُرستاں پیسر بلوچی دَرونتاں وان ایں، نامداریں بلوچ نبشتہ کارانی زُبان دوستی ءُ راجدوستی نبشتانکاں بوان ایں پرچا کہ یک شریں وانوکے شریں نبشتہ کار ءُ شائِرے جوڑ بیت۔ اگاں دری زبانانی دَرونت ءُ آیانی کتاباں وانان ءَ ما دہ سال ءَ پد آیانی زباناں راست نبیسّگ ھیل کن ایں۔ گُڑا باید اِنت ما وتی زُبان ءِ وانگ ءُ دربرگ ءَ پرچا اشتاپ بہ کن ایں یا دلپروش بَہ ایں۔ اگاں ما تھنا یک ھپتگے ءَ ھر روچ بلوچی درونت ءُ راجدوستی نبشتانکاں وانان کن ایں، ھمے راجدوستی نبشتانکانی تہ ءَ لبزانکی ٹِک ءُ نشاناں ھوار بھرگاں(Paragraphs) دلگوش بہ کن ایں گُڑا ما بازیں چیزاں ما وت کم کم سرپد بَہ ایں۔ چہ بلوچی دَرونت ءُ بلوچی نبشتانکانی وانگ ءَ پد باید اِنت ما کم کم ءَ وت ھم نبشتہ بہ کن ایں، نبیسّگ ءَ پد وتی گالرِداں مُدام وت چمشانک دیان ءَ راست کنگ ءِ جُھد کن ایں۔ چہ ردیانی راست کنگ ما زوت وتی راجی زُبان ءِ شریں جُھدکار، وانینوک ءُ نبشتہ کار جوڑ بہ ایں۔

ما گوں شما تھنا ھمے دزبندی کن ایں کہ مرچیگیں زمانگ ءَ تھنا انگریزی، میڈیکل ءِ بائیلوجی، انجینئرنگ ٹیکنولوجی ءُ وتی جِند ءِ زبان ءَ بوان اِت پرچا کہ انگریزی یک جھانی ءُ میان اُستمانی زُبانے، انگریزی ءِ وانگ ءُ دربرگ راجاں دیمروی دنت پرچا کہ کارگس ءُ کارجاھی زُبان انگریزی ءَ اَنت، میڈیکل ءُ انجینئرنگ سائنس ھم انگریزی ءَ اِنت پمیشکا وتی دزھُورکی ءِ وھد ءَ بلوچی وت بوان اِت ءُ راج ءَ ھم بوانین اِت۔ شوشل میڈیا ءَ وتی جِند ءِ زبان ءَ کارمرز بہ کن اِت کہ بلوچ راج ءُ چاگِرد ءِ تہ ءَ بلوچی وانگ ءُ نبیسّگ البار بہ بیت۔

بلوچی شالا زُبان دوست، یکمُشت ءُ تپاک بات اَنت، بلوچی شالا دیمروی بکنات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ ھزدار ءِ جھمنند ءُ پنچ سالاں بیگواھیں رشید بلوچ ءِ مات بیران بیتگ-

کھول ءِ رد ءَ گوستگیں شپ ءَ رشید ءِ مات ءَ دل ءِ دور ءَ گپتگ چریشی ءَ اے دل پٹی پراھی ءَ مرگ ءِ اجل جوڑ بیتگ-

بیگواھیں آصف ءِ گوھار ءُ رشید ءِ ناکوزگ سائرہ بلوچ ءَ وئیل ءِ ھال راست کتگ ءُ چاگردی ترامجاھاں نبشتگ کتگ کہ’ کَے گوش ایت ریاست مات اِنت، اے مئے ماتاں ورگ ءَ اَنت، بیگواھیں رشید ءِ مات وتی زھگ ءِ آیگ ءِ وداراں بیران بیتگ‘-

آئی ءَ گوشتگ کہ ’ گڈی ساھت ءَ اگاں آئی ءِ دپ ءَ چیزے دراتکگ گڑا بس زھگ ءِ نام، اے ماتانی دلاں چست بیستگیں درد یک روچے ءَ ادارھانی واستا کھر بنت ءُ ریچ اَنت ‘ –

سی ءُ یک اگست دوھزاد ءُ ھژدہ ءَ پاکستانی پوج ءَ نوشکی زنگی ٹاور ءَ پکنک ءَ روکیں دَہ مردم دزگیر کتگ اَت انت کہ ایشانی اکس ھم پوج ءَ رسانکدراں شنگ ءُ تالان کتگ ات اَنت-

بلے ایشانی توک ءَ آدگہ مردم دو سال ءُ کم ءُ گیشیانی وھداں یل کنگ بیتگ اَنت ءُ ایشانی ھمراھی ءَ آوار جنگ بیتگیں آصف ءُ رشید بلوچ داں انگت ءُ بیگواہ اَنت-

بیگواھیں آصف ءُ رشید ءِ یل کنائینگ ءِ واستا آیانی کھولاں شال، کراچی ءُ اسلام آباد ءَ زھرشانی یاداشت کنائینتگ اَنت ءُ ایشانی ھواری ءَ ایشانی کھول ھم بیگواھیں مردمانی کمیشن ءَ پیش بیتگ اَنت بلے ایشانی دیم ءَ آرگ ھچ پیم ءَ داں انگت ءَ نہ بیتگ-

بلوچستان ءَ بازیں مات وتی زھگانی وداراں ھشکی ءَ نیشتگ ءُ بیران بیتگ اَنت ءُ ایشانی ھواری ءَ زھرشانیانی وھد ءَ ھم چوشیں وھد گندگ ءَ اتکگ اَنت کہ بیگواھیں مردمانی مات بے ھوش بیتگ ءُ کپتگ اَنت-

بلوچستان ءِ راجدوست ءُ انسان ھکانی گل پاکستانی پوج ءَ انسانی ھکانی لگتمالی ءُ مردمانی بیگواھی ءِ زمہ وار کرار دیگ ءَ اَنت-