TBP Balochi

ندر پہ اُستاد راشد دیدار ءِ نام ءَ

شائر: سلیم ناز

دی بلوچستان پوسٹ

کیچ ءِ دمکاں راشد ءِ دیدار بیت
چو کہ سال ءَ ائید ءِ پیم ءَ گار بیت

وهد ءِ   دست ءَ   همسپر رد کپتگیں
کے گواهی دات سرے بازار بیت

آدم ءِ اشک ءَ   بنی آدم مہ کنت
مست ءُ شیدا دیدگاں چہ هار بیت

مکتب ءِ  لاڑیں   منی  پل ءُ گلاب
چو نہ زانت امروز ءِ درداں بار بیت

روچ ءُ شپ کنتیں وتی روچاں هساب
مشکلیں مرچاں دو بر آ سار بیت

َاَشکی    انچیں   وبالے همبلاں
اندار ءَ   مردم  وتی  بیمار  بیت

وهد ءُ باریگ ءِ سلیم بس منتیں
مئے وڑیں نازانت اد ءَ آشکار بیت

من ءَ ھوار بازیں چوشین انسانی واھشت بیت اِنت آ پیری ءَ چہ بہ رک ایت اُمر ءِ مزن بوگ ءَ انسان ءِ جسم ءِ سر ءَ سان نہ کپگ ما گیشتر سائنسی فکشن تامرانی ءَ دیستگ اَنت بلے راستی ءَ اے وڑ بوت کنت؟

العربیہ ءَ نیٹ ءَ برطانیہ ءِ روتاک “ڈیل میل ” ءِ رپورٹ ءِ درور دیان ءَ گوشتگ مردمانی گمان اِنت آیوکیں پنچ سالانی توک ءَ ایٹنی ایجنگ یا پیری ءِ دارگ ءِ ھاتر ءَ دارو درمان شوھازگ بیتگ اَنت-

چہ مُشکاں پٹ ءُ پول کنگ بیتگیں یک پٹ ءُ پولے ءِ دیم ءَ اتکگ ایشانی نوکیں دروشم ودی کت کن ایں ءُ ایشانی اُمر ھم گیش بیت کت کنت نوکیں انداماں ودی بوگ ءِ جسمانی کمزوری ءِ توک ءَ کمی، دل ءُ پُپانی سلامتی گیشتر بوت کنت-

امریکہ ءِ ھارورڈ یونیورسٹی ءَ اینٹی ایجنگ ءِ سر ءَ کار کنوکیں سائنسدانانی گمان اِنت اے پٹ ءُ پول ءَ انسانی واستا چکاسگ ءِ راہ پچ بیت کت کن اَنت ءُ آ کینسر ءُ ڈیمنشیا ( زھنی بگار) ءِ وڑیں نادراھیانی رکگ ءِ کابل بنت –

زانتکارانی گوشگ اِنت سال دوھزار ءُ بیست ءُ ھشت ءَ اے وڑیں درمانے ءِ آیگ ءِ نھاد جاھاں زور ءِ گمان اِنت-

روتاک دی ٹائمز ءِ رد ءَ اے پٹ ءُ پول ءَ اسپانسر کنوکیں کمپنی رجووینیٹ بائیو ءَ بندوکیں چیف سائنٹسٹ نوح ڈیوڈسن ءَ گوشتگ کہ ’ اے ٹیکنالوجی ءِ کمک ءَ مئے واستا اے دلجمی بیتگ کہ آیوکیں پنچ سالانی توک ءَ انساناں چہ چیزے در بہ بریں ‘-

زانتکار ءِ گوشگ اِنت راجدپتری رنگ ءَ منگ بیتگ کہ درمان سلامتی ءِ رنگ ءَ زندگی ءَ انسان ءِ اُمر ءَ گیشتر کُت کنگ ءِ جوانیں کرد پیلو کت کنت بلے ایشی ءِ اے متلب ھچ نہ اِنت پیری کجام ھم رنگ ءَ سانمندی ءِ دروشم ءَ سما نہ بیت اِنت-

اگاں اُمر ءِ کسان کنگ ءَ نوکیں آئیڈیا اتکگ اَنت گڑا اے منگ بیت اِنت نوکیں دزکپتگیں دروشمی درماناں پد اُمر ءِ گیش کنگ ءِ گمان ھم ھست اِنت-

ھا اے جوڑ کرتگیں درمانانی مٹی ءَ اُمر ءِ گیشی بیت اِنت؟ اے جست ءِ پسھی ءِ واستا زانتکاراں یک سد ءُ بیست ءُ چار ھپتگان پیریں مشکانی چکاس کتگ کہ ایشانی توک ءَ یک مُشکے ءِ اُمر ھپتاد ءُ ھپت سال انسان ءِ اُمر ءَ بروبر بیتگ-

اے مشکانی یک ٹولی ءَ ھمک ھپتگ ھالیگین انجیکشن جنگ بیتگ ءُ ھمے وڑ دومی ٹولی ءَ جنیٹنگ کوڈ گیش کنوکیں مواداں ھوار امجیکشن جنگ بیتگ اَنت-

دومی ٹولی ءِ مشکاں لھتے دگہ درمان دیگ بیتگ اَنت چریشی ءَ پد گندگ بیتگ درمان دیوکیں ٹولی ھژدہ ھپتگ ءَ گیش زندگ بیتگ اَنت ءُ اے پٹ ءُ پول ءَ پد زانتکاراں گوشتگ کہ اُمر ءِ گیش کنگ ءِ سیادی انساناں چہ گیشتر کنگ بیت اِنت-

گوستگیں روچ ءَ بزاں ھژدہ جنوری چارشمبے ءِ سُهب ءَ چہ پیشکان وانگی بُنجل Pishukan Reading Club ءِ نیمگ ءَ ” ماتی زُبان ءِ ارزشت ” ءِ بُن گپ ءِ پد ءَ پہ نودربراں ماں کنرکی بازار ءِ مزن وانگجاہ ءِ ھال ءَ یک مراگشے برجم دارگ بوتگ – ماں اِے مراگش ءَ دَر ءَ آتکگیں مھمان بلوچستان مزن شاه دربرجاه ءِ شعبہ پشتو ءِ استاد ءُ گوستگیں ڈین فیکلٹی آف لینگویجز ڈاکٹر نصیب الله سیماب ، بلوچی ءِ سرکماش ءُ بلوچی زبان ءِ نامداریں ندکار ءُ شائر ڈاکٹر رحیم مهر ، بلوچی ءِ اُستاد ءُ بلوچی زبان ءِ مزن نامیں ندکار ءُ شائر ڈاکٹر اِے آر داد ، سوشولوجی ءِ استاد عبدالرحیم نصر ، پشتو زبان ءِ نامی ئیں لبزانت خلیل باور هَوار بوتگ انت –

ماں مراگش ءَ هَندی لبزانت شائر ءُ ندکار ڈی-ای-او عزیز پیشُکانی ، عیسی گُل ، عارف محمود ، کنرکی وارڈ ءِ مزن وانگجاھے ہیڈماسٹر واجہ نورالامین ، کیمل لائبریری پلیری ءِ کارمستر اسماعیل یعقوب ءُ وانگجاهانی ایندگہ اُستاد هم ساڑی بیتگ اَنت –

مراگش ءِ پاگواجہ ڈاکٹر نصیب اللہ سیماب ءُ هاسیں مہمان ڈاکٹر اِے آر داد بوتگ انت- مراگش ءِ جارچینی ءِ ڈُبّہ نور محمد نور ءَ گون بوتگ اِے مراگش ءَ گُشتانک ، لچّہ ، کسمانک ، جست و پُرس ءُ کوئیز ءِ بَھر هَوار بوتگ انت ءُ کتابی میڑه یے هم کنگ بوتگ –

مراگش ءِ بندات ءَ هَند ءِ جتائیں وانگجاه ءِ زهگ ءُ نودربراں ” ماتی زبان ءِ ارزشت ” ءِ سرهال ءَ وتی گُشتانک،وش گٹی ءَ سوت ءُ لچه ونتگ انت ،دومی بھر ءَ مراگش ءِ بُن گپ ءِ پَد ءَ ” پیشُکان وانگی بُنجل ” ءِ باسک سلال ساوَڑ ، عارف محمود ، ڈاکٹر رحیم مهر، عزیز پیشُکانی ، ڈاکٹر اِے آر داد ءُ ڈاکٹر نصیب اللہ سیماب ءَ تران کُتگ ءُ وتی گُشتانک داتگ انت اِے میان ءَ گَل ءِ نیمگ ءَ چہ ڈاکٹر ناگمان ءَ گِرگ بیتگیں گُلگدارے ءِ توار بندے اوں پیش کنگ بوتگ –

مراگش ءِ سیمی بھر مراگش ءِ سرهال ءِ رِد ءَ کسمانکے بوتگ ءُ آسری بزاں چارُمی بھر هَند ءِ دگہ دگہ وانگجاهانی زهگانی نیام ءَ کوئیز ءُ جست ءُ پرس بوتگ –

گُڈسر ءَ چہ گل ءِ نیمگ ءَ پہ بھر زُرتگیں نودربراں داد بَھر کنگ بوتگ ءُ آسر ءَ گَل ءِ باسک فوزیہ بلوچ ءَ اتکگیں کُلّیں مھمانانی منّت گپتگ ءُ مراگش ءِ آسری ءِ جار جَتگ –

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں تربت ءِ دمگ آبسر ءَ یک مردمے تیرباران کُتگ کُشتگ –

کُشگ بوتگیں مردمے پجار بابو خان ء اللہ رکھیہ ءِ نام ءَ چہ بوتگ کہ آ سندھ جیکب آباد ءِ جھمنند انت – آئی ءِ کوش ءِ زمّہ واری بلوچ آجوئی لوٹوکیں سلاہ بندیں گل بی ایل اے ءَ منّ اِتگ –

بلوچ لبریشن آرمی ءِ جارکش جیئند بلوچ ءَ وتی آفیشل ٹیلیگرام چینل “ھکل” ءَ شنگ کرتگیں درشان ءِ تہ ءَ آئی کوش ءِ زمّہ واری منّ اِتگ ءُ گوشتگ کہ آ پاکستانی پوج ءِ کارمند ءِ بوتگ –

جیئند بلوچ ءِ رِد ءَ بی ایل اے ءِ سرمچاراں گوستگیں روچ ءَ تربت ءِ دمگ آبسر ءَ زورگیریں پاکستانی پوج ءِ یک کارمند تیرباران کُتگ ءُ کُشتگ –

جارکش ءِ رِد ءَ بی ایل اے ءِ انٹیلجنس ٹولی ءَ ھال داتگ کہ تربت ءُ کش ءُ گور ءِ دمگاں یک دری مردمے بابو خان ء اللہ رکھیہ پاکستانی پوج ءِ ھاتر ءَ چاریگری کنگ ءَ انت – اے مرد ءَ بازیں دمگاں کار کُتگ بوتگ وھدیکہ اے مرد پاکستانی پوج ءِ ھمراھی ھم گندگ بوتگ –

آئی ءَ گوشتگ ھمے ھالانی رِد ءَ گوستگیں روچ ءَ بی ایل اے ءِ سرمچاراں شُتگ ءُ آ تیرباران کُتگ ءُ کُشتگ –

جارکش ءَ گوشتگ کہ بلوچ لبریشن آرمی اے آئی ءِ کوش ءِ زمّہ واری ءَ منیت – ما پیش ءَ ھم اے گپ ءِ پدرائی کُتگ کہ زورگیریں پوج ءِ چیریں ادارھانی ھاتر ءَ کارکنوک، چاریگ ھچ وڈا پھل کنگ نہ بنت آ تری ھر راج ءُ دمگ ءَ سیادی بہ دار انت –

بلوچستان ءِ بنجاھی شھر شال ءِ گوریچانی دمگاں ترندیں برپگواری ءَ بازیں گاڑی برپانی تہ ءَ مھتل بیتگ اَنت ءُ ھمے درچ ءَ مکران ءِ دمگاں ھم گوستگیں شپ ءَ چہ ھوراں گوارگ بندات کتگ –

شال ءِ ریسکیو ءِ رد ءَ شال ءِ گوریچانی دمگاں ترندیں برپگواری ءَ مساپر کشیں گاڑیاں سواریں یک ھزار مردم کش اتگ ءُ مھکمیں جاھاں سر کرتگ اَنت-

وادی زیارت، پشین، مسلم باغ، خان مھترزئی ءَ ھوار بلوچستان ءِ گوریچانی دمگاں برپگواری ءِ نوکیں درچ گوستگیں شپ ءَ چہ بندات بیتگ کہ وھد وھد ءِ سر ءَ داں انگت ءَ برجاہ اِنت ءُ کوھانی سر ءَ وش ءُ زیبداریں ندارگاں اسپیتیں برپاں رنگ پدر کرتگ اَنت-

ھمے وڑ ءَ شال ءِ نزیکیں کوھانی سر ءَ زیبداریں رنگ ءُ ڈولداری ءِ دروشم ءَ برپاں وتی یکشلیں گوارگ بندات کتگ-

دومی نیمگ ءَ نیشنل ھائی ویز اینڈ موٹروت پولیس ءُ پی ڈی ایم ءِ نیمگ ءَ دگانی سر ءَ برپانی دور کنگ ءِ کار بندات کنگ بیتگ –

رپورٹ ءِ رد ءَ ترندیں برپگواری ءِ سبب ءَ گاڑیاں پس اتگیں یک ھزار مردم کشگ ءُ مھرین جاھاں برگ بیتگ اَنت –

موٹروے پولیس ءِ رد ءَ جاورھالانی گر ءُ دار ءِ ھاتر ءَ سرجمیں مشینری گیگ ءُ گور کنگ بیتگ اَنت مھترزئی ءِ ھنداں شترگ ءِ ترس ءَ دگانی سر ءَ واد ریچگ بیتگ اَنت –

موٹروے پولیس ءَ شھریاناں دزبندی کتگ کہ آ گیر زلوری سپر ءَ ابید سپر مہ کن اَنت اگاں مساپراں اژدری ءِ واستا زلوری بیت گڑا 130 رھوت کت کن اَنت-

دومی نیمگ ءَ مکران ءِ بازیں دمگاں ھم ھورانی گوارگ گوستگیں شپ ءَ چہ بندات بیتگ اَنت-

کیچ، تربت، مند، دشت، گوادر، جیونی، پنجگور ءُ ھوشاپ ءَ ھوار بازیں ھنداں گوستگیں شپ ءَ ھوراں گوارگ بندات کتگ ءُ مھلوک ءِ کلگ ءُ کِلگ پُر ءُ سریچ کتگ اَنت-

سنگرانی ھسار تئی میار اَنت ھُدا

نبشتہ کار : جلال اھمد

دی بلوچستان پوسٹ

ناکو اُمیتان چہ درملک ءَ نوک اَتکگ اَت ءُ تربت ءِ بالی پٹ ءَ وتی بْرات زتک گَمانی ءِ ودار ءَ اَت کہ کدین ءَ آ کیت ءُ ما دیم پہ میتگ ءَ رھادگ بہ ایں سئے اَدار ءَ پد گمانی اتک ءُ تربت ءِ بالی پٹ ءَ سر بُوت ءُ ناکو اُمیتان ءَ گوں درؤت ءُ دْراہ باتی یے کُت ءُ سرگِپت اَنت دیم پہ میتگ ءَ راھی بُوت اَنت۔

ناکو اُمیتان سر بُوّگ ءَ پیسر میتگ ءِ کسانیں گْونڈل یکجاہ ءَ نشتگ اَت اَنت ءُ ودار ءَ اَت اَنت کہ ناکو اُمیتان کَدی کیت ءُ مارا درملُکی پُودنی دنت، دیر نہ گْوست کہ گَمانی ءُ ناکو اُمیتان میتگ ءَ سر بُوت اَنت۔ اے رند ناکو اُمیتان ءِ اولی رند اَت کہ آ پُرّیں ھپت سال ءَ پد درملک ءَ چہ مُلک ءَ اتکگ اَت۔ آ وھد ءَ کہ ناکو اُمیتان درملک ءَ اَت آئی ءَ را پہ میتگ ءَ سک زھیر بُوتگ اَت بلے ناکو کہ میتگ ءَ اتک گُڑا ناکو ءَ مار اِت کہ نوں میتگ پیشی میتگ نہ اِنت ءُ سرجمیں ھند ءَ جاور مٹ اِت اَنت، میتگ ءِ بازیں مردم اِد ءَ نہ اَت اَنت، گِس ھُشکیں دیوال اَت اَنت، آیان ءَ مردم مان نیست اَت ءُ سبزگیں درچْک ءُ دار مُرتگ اِت اَنت گْوش ئے تِیوگیں میتگ ءَ مُوتک آؤرتک اَت ءُ مھمد ھان گوں وتی پنچیں زھگاں بیگواہ اَت۔

ھمُک شپ میتگ ءَ مردین تُرس ءَ چہ گِساں دراتکگ اَنت ءُ جنگل ءَ شُتگ اِت اَنت، آدینگ ءِ سُھب ءَ ناکو اُمیتان مھلا واب ءَ پاد اتک داں کُوہ ءَ ٹوپ ءُ بمبانی توار اَت، ناکو ءَ پہ پَھر گْوشت “سنگرانی ھسار، تئی میار اَنت ھُدا-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دنیا ءِ توک ءَ نامدار تریں سپٹویر کمپنی مائیکرو سافٹ ءَ چار شمبے ءِ روچ ءَ گوشتگ آ دوھزار ءُ بیست ءُ سے ءِ زرکاری سال ءِ سیمی سَے ماھی ءَ داں ھلاسی ءَ وتی دَہ ھزار ملازماں کش ات اِنت اے گپ ءِ نوکتریں اھوال ایش اِنت کک امریکہ ٹیکنالوجی سیکٹر ءَ کشگ ءِ گیشی گندگ بوگ ءَ اِنت چریشی ءَ کمپنی ءَ سستی دیمپانی کنگ کپگ اِنت-

مائیکرو سافٹ ءَ گوشتگ کہ کشگ ءُ بارڈ وئیر پورٹ فولیو ءُ دومی مٹ ءُ بدلیانی آرگ ءَ ھواریں ھرچ ءُ درچ کمپنی ءِ مالی سال دوھزار ءُ بیست ءُ سَے ءَ دومی سے ماھی ءَ یک ٹک دو ارب ڈالر بار چست کنگ کپ ایت-

اسٹاف ءَ یک نوٹے ءَ چوشکہ رائٹرز ءَ دزکپتگ ایشی ءِ توک ءَ گوشگ بیتگ کہ مائیکرو سافٹ ءِ چیف ایکزیکٹو ستیا ندالہ ءَ گوشتگ کہ کارمرد کنوک کم چہ کم ھرچ ءِ زور ءَ گیش ءَ چہ گیش ڈیجیٹل ءِ نپ ءَ چست کنگ اش لوٹ اتگ ءُ پھریز اش لوٹ اتگ بلے اے دنیا ءِ لھتے سست بازاری ءِ آماچ اِنت ءُ دومی بھراں امیت دارگ ءَ اِنت-

سَے شمبے ءِ روچ ءَ رسانکدرانی بندوکیں ادارھانی نیمگ ءَ کشگانی ھال ءَ پیسر گوستگیں سال ءَ لھتے کٹوتیانی ھال ھم دیم ءَ آیگ ءَ اِنت-

مائیکروسافٹ ءَ گوستگیں سال ءِ جولائی ءَ کمپنی ءِ لھتے ملازم کش اتگ بیتگ اَنت- ھمے وڑ نیوز سائٹ ایکسیوز ءَ اکتوبر ءَ ھال داتگ ات کہ کمپنی ءَ بازین پھناتاں بندوکیں ملازمانی تہ ءَ یک ھزار کش اتگ اَنت –

ستیا ندالا ءِ چیردستی ءَ کمپنی ءَ پرسنل کمپیوٹر مارکیٹ منڈی ءِ دیمپانی کنگ کپگ اِنت پینڈیمک ءِ وبا ءِ وھد ءَ آئی ءِ نھاد باز گیش بیگ ءَ پد نی وینڈوز ءُ آئی ءَ ھواریں سافٹ وئیر ءِ نھاد ءَ باز کمی اتکگ بیتگ-

بلوچستان ءِ دمگ نوشکی ءَ چہ پاکستانی پوج ءَ پنچ ورناہ آوار جتگ ءُ ناشناسیں جاھے ءَ برتگ اَنت-

بیگواہ بیتگینانی تہ ءَ یک کسان سالی ئیں ھم ھوار اِنت کہ 29 دسمبر ءَ چہ نوشکی ءِ دمگ قاضی آباد دگ چاگی بس اسٹاپ ءَ آوار جنگ ءُ برگ بیتگ کہ آئی ءِ پجّار خلیل احمد ء عنایت اللہ جھمنند قاضی آباد نام ءَ چہ بیتگ-

اشی ءَ اَبید بیگواہ بیتگیں آ دگہ ورناھانی پجّار سفیان جمالدینی ء ماسٹر حنیف جمالدینی، نقیب جمالدینی ءِ خیراللہ جمالدینی، عدنان جمالدینی ء بابو اکبر جمالدینی ءُ مزمل ءِ ناماں چہ بیتگ اَنت-

اِھوالکارانی رِد ءَ پوج ءَ مزمل ءُ سفیان چہ بدل کاریز ھند ءَ آوار جتگ ءُ بیگواہ کتگ اَنت- اے ورناھانی آوار جنگ ءِ وھد ءَ پوج ءَ دمگ انگر کنگ ءَ پد لاؤڈ اسپیکر سر ءَ جار جتگ-

اشی ءَ اَبید عدنان جمالدینی ءُ نقیب جمالدینی چہ احمد وال ءِ ھند ءَ ھما وھد ءَ آوار جتگ اَنت وھدے کہ آ وتی تیل کشوکیں گاڑی ءِ سر ءَ چہ دالبندین ءَ نوشکی ءَ روگ ءَ بیتگ اَنت، پوج ءَ تیل ءَ پُریں گاڑی ھم گوں وت برتگ-

زانگ بہ بیت بلوچستان ءِ جتاجتائیں دمگاں آوار جنی ءِ نہ کُٹّوکیں دْرچ یکشلہ برجاہ ءَ اِنت-