TBP Balochi

سربوتگیں ھالانی رِد ءَ گوستگیں ھپتگ ءَ پاکستانی پوج ءَ مند ءِ دمگ ھوزئی ءَ زوراکی کنان ءَ دو برات آوار جتگ ءُ بیگواہ کتگ انت –

گیشیں ھالانی رِد ءَ پاکستانی پوج ءَ گوستگیں ھپتگ ءَ سیزدہ جنوری سال دوھزار ءُ بیست ءُ سَے ءِ شپ ءَ مند ءِ دمگ ھوزئی ءِ میتگ ءَ نور بخش نامیں مردمے ءِ گس ءَ بیڑ برتگ ءُ زوراکی کنان ءَ آئی ءِ دو زھگ آوار جتگ ءُ بیگواہ کتگ انت ، آوار جنگ بوتگیں ورنایانی پجار ھسن ءُ نوروز ء نور بخش ءِ ناماں چہ بوتگ انت –

اھوالکار ءِ رِد ءَ ھردو براتانی تہ ءَ مستریں برات حسن گوستگیں روچ ءَ مند ءِ بنجاھی پوجی بنجل ءَ یل کنگ بوتگ بلے آئی ءِ کستریں برات نوروز انگت گار ءُ بیگواہ انت کہ آئی ءِ ھچ ھال ءُ اھوال نیست –

زانگ بہ بیت بلوچستان ءِ جتا جتائیں ھند ءُ دمگاں پاکستانی پوج ءِ زوراکی ءُ آوار جنیانی درچ یکشل ءَ برجاہ انت ، کہ آھانی تہ ءَ کمے کساس مردم یل بوتگ انت بلے دومی نیمگ ءَ دو ھمینچو آوار جنگ ءُ بیگواہ کنگ بوتگ انت آھانی تہ ءَ گیشتریں کچ بلوچ ورنا ءُ نودربرانی انت – بیگواھیں مردمانی پانکجنیں گل وی بی ایم پی ءِ رِد ءَ تنی وھدی کساس پنجاہ ھزار مردم زورانسری آوار جنگ ءُ بیگواہ کنگ بوتگ انت –

بلوچستان ءِ تیاب دپی دمگ پسنی چربندر ءِ بچکانی سرکاری مزن وانگ جاہ پرشت پروشی ءِ آماچ انت –

گوستگیں روچ ءَ دومی تبک ءِ نودبرانی کوٹی ءِ چت ءِ پلستر کپتگ بلے وشبھتی ءَ اے وھد ءَ نودربر ڈن ءَ لوھ ءِ لکگ ءَ شُتگ بوتگ انت کہ کوٹی ءِ چت ءِ پلستر لُڑ اِتگ ءُ کپتگ –

چت ءِ پلستر ءِ کپگ ءَ پد نودربر ترس ءِ آماچ انت –

زانگ بہ بیت چربندن ءِ بچکانی سرکاری مزن وانگجاہ ءَ پیسر ءَ کوٹی نیستی ءِ ھساب انت –

نودبراں چت ءِ لڑگ ءُ کپگ ءَ دلپدردی درشان اِتگ ءُ گوشتگ کہ اے سارتی ءَ ڈن ءِ نندگ ءُ وانگ سک باز تکانسری ات –

چربندن ءِ دمگی مردماں دمگی واکدار، برزی تبک ءِ واکداراں چہ لوٹ کتگ کہ ھمے زوتاں چربندن ءِ مزن وانگ جاھ ءِ کوٹی شر کنگ بہ بنت تانکہ مئے زھگ بید ترس ءَ کوٹیاں نشت ءُ ونت بہ کناں –

زانگ بہ بیت بلوچستان ءِ گیشتریں وانگ جاہ پُرشتگ انت کہ اشی ءِ مستریں سوب زرانی ورگ ءُ بے دردیں میٹریل ءِ کارمرز کنگ انت –

سربوتگیں ھالانی رِد ءَ کیچ ءِ دمگ مند شیراز ءَ پاکستانی پوج ءِ کاروان ءِ سر ءَ ٹوھیں اُرش ءِ کنگ بوتگ – اُرش ءَ پاکستانی پوج ءَ جانی ءُ مالی تاوان ءِ دیمپانی کنگ کپتگ –

گیشیں ھالانی رِد ءَ شیراز ءَ نیلگ ءُ چکاپ ءِ میان ءَ چکاپ کور ءَ ناشناسیں سلاہ بندیں مردماں پاکستانی پوج ءِ راہ بستگ ءُ آھانی سر ءَ ٹوھیں اُرش ءِ کُتگ، اُرش ءِ آسر ءَ پاکستانی پوج ءَ جانی ءُ مالی تاوان ءِ دیمپانی بوتگ –

پاکستانی پوج آئی ایس پی آر ءَ اُرش ءِ ھبر راست کُتگ ءُ گوشتگ کہ سلاہ بندیں مردماں پھازگی لشکر ءِ سر ءَ ھما وھد ءَ اُرش کتگ وھدیکہ آ سیمسر ءَ ترءُگرد کنگ ءَ بوتگ انت چریشی ءَ چار پوجی کارمند مُرتگ انت –
آئی ایس پی آر ءِ رِد ءَ اُرش ءَ ایران ءِ زمین کارمرز کنگ بوتگ – آئی ءَ چہ ایران ءِ سرکار ءَ اُرشکارانی گرگ ءِ لوٹ کتگ –

دمگی اھوالکارانی رِد ءَ اُرش ءَ پد چہ تربت ءَ دو جنگی بالگرد مند ءِ نیمگ ءَ روگ ءَ گندگ بوتگ انت – آھانی گوشگ انت کہ شیراز ءِ کوھی دمگاں پاکستانی پوج ءِ نیمگ ءَ شیلنگ کنگ بوگ انت –

زانگ بہ بیت اے دمگاں پاکستانی پوج ءِ سر ءَ بوتگیں اُرشانی زمّہ واریاں گیشتر بلوچ آجوئی لوٹوکین سلاہ بندیں گل منّ انت بلے تنی وھدی اے اُرش ءِ زمّہ واری ھچ گل ءَ نہ منّ اِتگ –

گوستگیں روچ ءَ کیچ ءِ دمگ ھوشاپ ءَ پاکستانی پوج ءِ گون ءَ بیران بیتگیں مردمانی پجار بیتگ-

بیران بیتگینانی تہ ءَ امام ء مسکان جھمنند تجابان، رضائی ء واھد بکش جھمنند سری کرکی، یحییٰ ء آسمی جھمنند پسنی ءُ ممتاز ء گزی جھمنند پرکوٹگ ھوشاپ ءِ ناماں زانگ بیتگ اَنت-

زانگ بہ بیت گوستگیں روچ ءَ کیچ ءِ دمگ ھوشاپ ءَ پاکستانی پوج ءُ سلاہ بندیں مردنانی میان ءَ ترندیں جنگ ءُ چوپے بیتگ ات ءُ جنگ ءُ چوپ ءَ چار کس بیران بیتگ ات اَنت ءُ آیانی لاش لیویز ءَ تربت سول ھسپتال ءَ آورتگ ات اَنت-

پاکستانی پوج ءِ جارکش ءَ اے جنگ ءِ راستی کتگ اَت ءُ چار مردمانی جنگ ءِ ھال شنگ کتگ ات –

دومی نیمگ ءَ دمگی مردمانی گوشگ اِنت بیران بیتگیں مردمانی سیادی آجوئی دوستیں گلان اِنت بلے داں انگت ءَ آیانی نیمگ ءَ ھچ گپ دیم ءَ نیتکگ اَنت-

یوکرین ءِ شھر دنپرو ءَ روسی میزائل اُرشاں کپتگیں ماڑی ءَ بیران بیتگیں مردمانی کچ چل ءُ پنچ ءَ سر بیتگ دگہ بیست مردم بیگواہ اِنت-

فرانسیسی ھال سر کنوکیں ادارہ اے ایف پی ءِ رد ءَ سَے شمبے ءُ چار شمبے ءِ میانی شپ ءَ بیتگیں اُرش ءَ پد یوکرین ءَ روکپتی ڈیھاں سلاہ دیگ ءِ دزبندی کتگ-

ھمے وڑ ءَ اولی رند ءَ یوکرین ءِ آرمی چیف ویلری زلوزنی ءَ پولینڈ ءَ امریکہ ءِ جوائنٹ چیف آف اسٹاف ءِ سروک مارک ملی ءَ گون گند ءُ نند کتگ-

یوکرین ءِ واکدارانی گوشگ اِنت ماڑی ءِ سر ءَ اُرش ءَ بیران بیتگیں مردمانی تہ ءَ شش زھگ ھوار اَنت کہ ایشانی توک ءَ یکے ءِ اُمر یازدہ سال اِنت-

شمبے ءِ روچ ءَ بیوکیں اُرش فروری ءَ جنگ ءِ بندات ءَ بگر داں انیگ ءَ درستاں مستریں اُرش لیکگ بوگ ءَ اَنت-

یوکرین ءِ واکدارانی گوشگ اِنت اُرش ءَ ھپتاد ءُ نُھ کس زدگ ھم بیتگ دومی نیمگ ءَ کرملن ءَ اے اُرش ءِ زمہ واری زورگ نہ من اتگ-

اُرش ءَ بیران بیتگیں مردمانی تہ ءَ دنپرو ءِ باکسنگ کوش میخائلو کورینوسکی ھم ھوار بیتگ کہ آئی ءِ گڈی منزل ءَ سدانی کچ ءَ مردماں بھر زرتگ-

میخائلو کورینوسکی ءَ چہ دربروکین باکسر ءِ پت ءَ ھمے وھد ءَ اے ایف پی ءَ گوں گوشتگ کہ آ یک لیجنڈے بیتگ ءُ آئی ءَ وتی زند ءَ بازیں مردم ھیل داتگ اَنت مروچی من تہ ءَ چہ پروشتگ آں –

یوکرین ءِ سروک ولادیمیر زیلنسکی ءَ یک رندے پد ءَ ترندی ءَ گوں گوشتگ کہ ھرکس ءَ اے ناشری بندات کتف آ درگیجگ بیت اِنت ءُ چراھی ءَ چہ ھساب ءُ کتاب کنگ بیت اِنت-

مھکمہ ایمرجنسی سروسز ءَ سَے شمبے ءُ چار شمبے ءِ میانی شپ ءَ دیوال ءِ شوھاز سرجم کتگ ءُ پد ءَ آئی ءِ نیمگ ءَ گوشگ بیتگ داں انگت ءَ بیست مردم بیگواہ اَنت-

دومی نیمگ ءَ ماسکو ءَ ھم دنپرو ءِ اُرش ءَ بیران بیتگیں مردمانی پرس داشتگ ءُ اود ءَ لھتے مردماں یوکرین ءِ نامی ئیں شائر لیسیا یوکرینکا ءِ یات ءَ پُلانی درشانی کتگ-

کتاب: مھر گوش ءِ سر ءَ چمشانکے

نبشتہ کار: میرو مری

دی بلوچستان پوسٹ

کتاب مھر گوش بلوچ لبریشن آرمی ءِ سروک واجہ بشیر زیب بلوچ ءِ اولی کتاب انت اے کتابے نبشتانک مارچ 2016 تا مارچ 2017 ءِ سیاسی جھل ءُ برزیانی سر ءَ آئی ءِ نبشتانک انت اے کتاب ءِ درستی 176 تاک دیم انت کہ ایشی ءِ توک ءَ نبشتہ کار ءَ ھمے سیاسی جھل ءُ برزیانی ءَ نپسیات ءِ علم ءِ رد ءَ گیش ءُ گیوار کنگ ءِ جوانیں جھدے کتگ ءُ وتی ھیال ءُ لیکہ یک کتابے ءِ دروشم ءَ وتی راج ءِ دیم ءَ آؤرتگ انت اے کتاب ءِ اولی بھر مئے دست ءَ اتکگ ءُ ایشی ءِ دومی بھر گمان بیت کہ دیمتر ءَ بلوچ راج دیم ءَ کئیت انت-

کتاب ءِ اے اولی بھر ءَ جتا جتائیں سرھالانی سر ءَ نبشتہ کنگ بوتگ کہ من نوں چندیں نبشتانکانی سر ءَ وتی ھیال ءُ لیکھاں نبشتگ کنگ ءِ جھد ءَ کن آں –

اولی نبشتانک ” سنچ ءُ مکسد ءِ ” سر ءَ نبشتہ بوتگ اے نبشتانک ءِ توک ءَ آ گش ایت کہ سنچ پہ مکسد ءَ بیت ءُ پہ مکسد ءِ واستا یک مھکمیں سِنچے ءِ بوھگ ھژدری انت پد ءَ زانت ءُ سرپدی ءِ ھمے مکسد ءِ دیمروئی ءَ کنت ءُ پہ وتی منزل ءِ سر بوھگ ءِ ھاترا ترا یک تچکیں راھے گچین کنگی انت ءُ ھر وھد ءَ امل کنگی انت یکمشت ءُ یک سنچے ءِ ٹولی ءَ وتی منزل ءِ رسگ ءَ پہ یک جوانیں ءُ دور چاریں رھشونے ءِ سروکی الّمی انت- یک توانگریں ٹولی ءِ لوٹ ایت کہ آ وتی رھشون ءِ ھمراھداری ءَ بہ کن اَنت وھدیکہ یک رھشونے گوں وتی توانگریں ٹیم ءَ یک توانائیں ڈسپلن Displine ءِ گوں بندوک بیت گڑا منزل ءِ سر بوھگ ءَ ارزانی بیت ءُ تنگی کم بنت ءُ ھمے کل یک پارٹی ءِ گشگ بنت-

امیت ءُ بھیسہ ءِ سر ءَ وتی ھیالاں درشان چو اے وڑ ءَ کنت کہ، انسان ءِ اولی پدیانک چہ امیت ءَ بنا بیت ءُ پد ءَ آ دیم ءَ جنز ایت ءُ کار کنت آ وتی راجی جھد کار ءُ بلوچ مھلوک ءَ گش ایت کہ ھچ کس ءَ اے ھک Right ءَ مہ دے کہ آ ترا نا امیت بہ کنت ءُ ترا چہ تئی لوٹ ءُ کاز Cause ءَ دلپروش بہ کنت چیا کہ امیت ءِ ھلاسی انسان ءِ زند ءَ گوں بندوک انت وھدیکہ یک انسانے ءِ امیت ھلاس بہ بیت یا چرائی ءَ چہ پچگرگ بہ بیت تا انسان تھنا یک زندگیں جونے بیت ءُ مان ایت-

بلوچ جھد کارانی سپر یک نہ اوشتوکیں کاروانے، آئی ءِ اوشت تھنا گوں بلوچ زمین ءِ آجوئی ءَ بندوک انت اے دراجیں راہ ءَ ھر وڑیں تنگی ءُ نزوری دیم ءَ کاینت اے نزوری ءُ کوتاھی ءُ تنگیاں یک جھد کارے ھما وھد ءَ وتی ھکّ ءَ کنت کہ آ سرجم ءَ زھنی دروشم ءَ آزات بہ بیت ءُ زانت ءُ سرپدی ءَ مھکم بہ بیت-

اگاں دیم ءَ جیڑھے اتک گڑا ھمک کس ھمے جیڑہ ءِ سائنسی بنیاتاں چار ءُ تپاس ءِ جھد ءَ بہ کنت ءُ جیڑہ ءِ گیش ءُ گیواری ءَ بہ کنت نا کہ دلپروش بہ بیت- راجی جنز ءِ راہ ءَ دلپروشی ءِ ھچ جاہ نیست اِنت-

تُرس ءِ باروا واجہ وتی دُرّیں دانکاں نبشتہ کنت ءُ گش ایت کہ تُرس ءِ دگنیا ءِ تھاریانی آماچ انت ترس مدام انسان ءِ بودشت ءُ آئی ءِ مھکمیں پیسلھانی دیم ءَ کئیت ءُ اوشت ایت نپسیات ءِ زانت ءِ رِد ءَ ترس ءِ دو تھر انت اولی تھر وتی رکّینگ ءِ ترس انت ءُ دومی تھرے ترس لگوری انت ءُ باز براں رکینگ ءِ ترس وھدے وتی سیمسراں چہ درکپ ایت داں آ لگوری گشگ بیت ءُ لگور نہ پہ وت چیزے کت کنت ءُ نہ کہ وتی راج ءُ زمین ءِ ھاترا-

بلوچاں گوشتگ کہ یکّیں پتّر ءَ گوات بارت تو ھور ءِ یکمشت ءُ ھمسنّتے گڑا تو بدواھاں پروش دات کن ئے اگاں شنگتگے ءُ نا تپاکے تاں بدواہ ترا اّلم پروش دنت-

مولوی عبداللہ پیشنی ءَ گوشتگ کہ:

“اے بلوچاں اتھاد”
“پہ وشیں روچاں اتھاد”

گڈسراں نبشتہ کار (واجہ بشیر زیب) ءَ وتی راجی جھد کار ءُ بلوچ راج ءَ لوٹ کرتگ کہ آ چہ شھیدانی کھولاں بے ھیال مہ بنت، آوانی تؤکل جوڑ بہ بنت ءُ آھاں دلبڈی بہ دے اَنت-

پہ بلوچ ماتاں وتی کلوہ ءَ نبشتہ کنت ءُ گش ایت کہ اے منی مکھیں ماتاں تئی کنگریں بچّانی ھون ءِ بیر ءَ راجی سرمچار ھر روچ گوں بدواھاں گرگ ءَ انت ءُ جنگ کنگ ءَ انت. ما چہ شھیدیں بچّانی ھوناں ھچبر شمشکار نہ بہ ایں-

“جور بیت جور جوابی بدیں جورانی دپ ءَ”

اے چندیں نبشتانکانی سر ءَ منی ھیال ءُ تران ات انت البتہ! سرجمیں کتاب وانگ کرز ایت ھر بلوچ وانندہ اّلم اے کتاب ءَ بوان ایت-

بلوچ ءِ جنز توانگر بات شالا
بلوچستان آجو بات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ھندوستان ءِ سر وزیر نریندر مودی ءَ وتی باسکاناں ڈیھ ءَ نندوکیں جتاجتائیں پرکہ ایشانی توک ءَ گچینی پہ مسلمانانی بارو ءَ نزیک بیگ ءِ سَلاہ داتگ –

انڈین ھال سرکنوکیں ادارہ اے این آئی ءِ رد ءَ بنجاھی شھر نئی دھلی ءَ یک نیادے ءَ تران کنان ءَ سر وزیر نریندر مودی ءَ سرجمیں ڈیھ ءِ بارو ءَ گپ کتگ لوک سبھا ءِ گچینکاری ءَ پیسر بھارتیہ جنتا پاٹی ( بی جے پی) ءِ مھکم کنگ المی اِنت-

تران ءِ وھد ءَ سر وزیر نریندر مودی ءَ گوشتگ ات کہ پشکپتگیں مسلمان، بوھرہ برادری، جتائیں پھناتاں سیادی داروکیں ونندگیں مسلمانین ورنیاں گند ءُ نند بہ کن اَنت بلے ووٹاں ابید-

نریندر مودی ءَ گوشتگ کہ بی جے ہی ءِ باسکاں سال دوھزار ءُ بیست ءُ چار ءَ گچینکاری ءِ مھم ءِ درچ ءَ مسیحی برادری ءِ ابادتگاھ ءُ وانگجاھاں تر ءُ تاب کنگ ءِ سَلاہ داتگ ءُ گوشتگ کہ سرجمیں ڈیھ ءِ سرجمیں ریاستاں کار کنگ ءُ یکے دومی ءِ دودمان ءِ دیم ءَ برگ ءِ درکار اِنت-

گوستگیں بازیں ھپتگاں چہ بی جے پی ءُ انڈیا ءِ دگہ راستیں دستکاری پاٹیانی نیمگ ءَ بالی وڈ ءَ جوڑ بیوکیں بازیں تامرانی سر ءَ ایراد گرگ ءَ اَنت –

پاٹی ءِ رھشونانی نیمگ ءَ ھم ھمے زوتاں شاہ رخ خان ءُ دیپیکا پاڈوکون ءِ نوکیں تامر “پٹھان ” ءِ سر ءَ ایراد گرگ ءُ آئی ءَ چہ بائیکاٹ کنگ ءِ دزبندی ءَ کنگ ءَ اَنت-

سر وزیر نریندر مودی ءَ گوشتگ کہ تامر یا ازمکارانی نام ءِ گرگ ءَ ابید باسک سرپد کتگ اَنت تامرانی وڑیں بے کاریں جیڑھانی سر ءَ گیر زلوری درشاناں چہ پھریز بہ کن اَنت پرچاکہ ایشی ءَ چہ بی جے پی ءِ دیمروئی ءِ جھلک پشت کپ ایت-

بلوچستان ءِ دمگ مستونگ ءَ گیس ءِ پریشر ءِ کمی ءُ بندی ءِ بگیری ءَ دمگی مردماں جنگل کراس ءَ شال تاں کراچی ءَ رؤکیں شھدگ بند کُتگ ءُ زھرشانی کتگ –

زھرشانی ءِ سوب ءَ شھدگ سرجمی ءَ بند بوتگ ءُ ھردو نیمگاں گاڑیانی رش لگ اِتگ مردم جنجالی بوتگ انت –

گیشیں ھالانی رِد ءَ مستونگ ءِ دمگ کلی ھزار خان، کلی تیری ءُ کش ءُ گور ءِ دمگی مردماں سارتی ءِ گیشی ءَ گیس پریشر ءِ کمی ءُ بندی ءِ بگیری ءَ شھدگ بند کتگ ءُ زھرشانی کتگ –

درنگاز کنوکانی گوشگ ات کہ گیس ءِ کمی ءِ سوب ءَ.مردم دلسیاہ انت ءُ گیس ءِ نہ بوگ ءِ سوب ءَ دمگی مردم سارتی ءَ رکگ ءُ گِس ءِ ھاتر ےَ باگ ءُ جنگلانی درچکاں بُرگ ءُ وتی زلورتاں سرجم کنگ, ءَ انت چریشی ءِ سوب ءَ باگاں تاوان بوگ ءَ انت –

درنگاز کنوکانی گوشگ ات کہ سوئی سدرن گیس کمپنی ءِ واکدار گیس پریشر ءِ کمی ءُ بندی ءِ ھاتر ءَ گامگیج بہ زور انت گیس سر بہ کن انت تانکہ مردمانی جیڑہ کم بہ بنت – اگاں ھمے وڈ برجاہ بیت گڈا ما لاچار بہ ایں ترندیں زھرشانی بہ کن ایں ءُ جاورھالانی زمہ وار واکدار بہ انت –

واکدارانی باور کنائینگ ءَ پد درنگاز کنوکاں وتی زھرشانی ھلاس کتگ واتر بوتگ انت ـ دگ پچ کنگ بوتگ-

سربوتگیں ھالانی رِد ءَ گوستگیں روچ ءَ بزاں شانزدہ جنوری ءَ ناشناسیں سلاہ بندیں مردماں پاکستانی پوج ءِ دو پانگسانی سر ءَ اُرش کُتگ –

سلاہ بندیں مردماں اولی اُرش مشکے ءِ ھند جکی ءَ،دومی اُرش ملشبند ءَ پاکستانی پوج ءِ برجاھیں پانگسانی سر ءَ کتگ، اُرشانی آسر ءَ پاکستانی پوج ءَ جانی ءُ مالی تاوان ءِ دیمپانی کنگ کپتگ – ھردو اُرشانی زمّہ واری بلوچستان لبریشن فرنٹ ءَ منّ اِتگ انت –

بی ایل ایف ءِ جارکش میجر گوھرام ءِ رِد ءَ شانزدہ جنوری ءَ روبرکت ءِ وھد ءَ مئے سرمچاراں مشکے ءِ ھند جکی ءَ برجاھیں پاکستانی پوج ءِ پانگسے ءِ سر ءَ گوں راکٹ ءُ مزنیں سلاھاں اُرش کرتگ چریشی ءَ دو پوجی کارمند مرتگ انت ءُ سَے زدگ بوتگ انت –

جارکش ءَ گوشتگ کہ اے اُرش ءَ ادارے ءَ پد سرمچاراں ملشبند ءَ ھم پاکستانی پوج ءِ پانگسے سر ءَ دور جنگیں توپک ءَ گوں یک کارمندے ءِ نشانگ کنگ ءُ کُشگ ءَ پد پانگس ءِ سر ءَ گوں مزنیں سلاھاں اُرش کرتگ چریشی ءَ پوج ءَ گیش جانی تاوان بوتگ – ھردو اُرشاں دُژمنیں پوج ءَ جانی ءُ مالی تاوان ءِ دیمپانی کنگ کپتگ –

میجر گوشتگ کہ زورگریں پوج ءِ سر ءَ مئے اُرش زورگپتیں بلوچستان ءِ آجوئی ءَ تاں برجاہ مان انت –