TBP Balochi

امریکہ ءِ وزیر ھارجہ انٹونی بلنکن ءَ بیجنگ ءَ ناگتی تر ءُ تاب ءَ کنگ ءَ اِنت آئی ءَ گوشتگ کہ چین ءِ گون ءَ دلرنجی کمتر بیتگ اَنت-

ھال سر کنوکیں دارہ اے ایف پی ءِ رد ءَ شکاگو یونیورسٹی ءَ وھدیکہ امریکہ ءِ وزیر ھارجہ انٹونی بلنکن ءَ جست گرگ بیتگ کہ چین ءِ گون ءَ شمئے زھری کمتر بیتگ اَنت آئی ءِ گوشگ ات کہ من ءَ ھمے وڑ سما بیت اِنت تو وھدیکہ گپ ءُ تران ءُ رھوت کن ئے گڑا ایشی ءِ آسر بیت اِنت –

انٹونی بلنکن ءَ گوشتگ ات کہ آ دگہ دنیا ءَ اے اوست داریں کہ آیانی گون ءَ زمہ واری ءِ گون ءَ سیادی ءَ برجاہ داریں – آ زانت اِنت کہ ما آئی ءِ گون ءَ کجام رنگ ءَ سیادی ءَ داشت کن ایں گڑا آئی ءِ سان کپ ایت –

امریکہ ءِ یک کارندھے ءِ رد ءَ انٹونی بلنک پنچ یا شش فروری ءَ بیجنگ ءِ تر ءُ تاب ءَ کنت-

اے تر ءُ تاب ءِ پیسلہ ھما وھد ءَ کنگ بیتگ کہ وھدیکہ سروک جوبائیڈن ءُ آئی ءِ چینی ھم درور شی جن پنگ ءَ نومبر ءَ بالی ءَ دنیا ءِ دو مزنیں زرکاریں تاکتانی میان ءَ دلرنجی ءِ گپ ءُ تران برجاہ بیتگ اَنت-

بلے بلنکن ءَ اے گپ گشتگ کہ تائیوان ءِ جیڑہ ءِ سر ءَ یک رندے پد ءَ گوش ایں ترس ءِ گمان مانشانیتگ اَنت گوستگیں لھتے سالانی توک ءَ ما ھرچی دیستگ منی ھیال اِنت کہ چین ءَ اے پیسلہ کتگ آ نی اسٹیٹس ءَ نہ لوٹ ایت بازیں دھکاں چہ برجاہ اِنت ءُ مئے ڈیھ ءِ میان ءَ سیادی ءِ جوانیں شرپدارگ ءَ سوبمند بیتگ اَنت-

آئی ءَ گوشتگ کہ ما چین ءَ اے گوش ایں گڑا آ گوش ایت اے مئے وت واجھیں جیڑھے مئے پژدر ایش اِنت امریکہ ءُ سرجمیں دنیا ڈیھ ءِ پلامرزی ءَ بہ بنت-

امریکہ ءِ وزیر ھارجہ انٹومی بلنکن شکاگو ءِ تر ءُ تاب ءَ بیتگ گڑا چریشی ءَ روس ءِ اُرشانی پژدر ءَ ھم وتی ھیال ءُ لیکھانی واستا روکپتی شھرانی راجدپتری یوکرینی کمیونٹی ھم ھوار بیتگ-

گوادر ءِ مھلوک ءَ جنرل آصف غفور ءِ بیھار

ٹی بی پی شونگال

گوادر ءَ ماھیگیرانی لس زھرشانی ءِ چیر ترینگ ءِ ھاتر ءَ پاکستانی پوج ءُ پولیس ءَ تاکت ءِ پدراھیں کارمرزی کُتگ ءُ حق دو تحریک ءِ سروک واجہ حسین واڈیلہ ءَ ھوار زرمبشت ءِ بازیں باسک دزگیر کُتگ اِت اَنت۔ چریشی ءَ پد گوادر ءِ دمگ ءِ ھنکین جیونی ، پشکان، اورماڑہ، سربندر ءُ پسنی ءِ جاور داں بازیں روچاں ھراب بیتگ اِت اَنت ءُ حق دو تحریک ءِ رھشون دزگیر کنگ بیتگ اِت اَنت کہ آ بلوچستان ءِ جتاجتائیں زندانانی تہ ءَ بندیگ اَنت ءُ آ لَٹ ءُ کُٹ ءِ نشانگ جوڑ کنگ بئیگ ءَ اَنت۔

گوادر ءِ نگیگیں جاورانی تہ ءَ گھتری آرگ ءِ ھاتر ءَ جماعت اسلامی ءِ کارگشاد لیاقت بلوچ ءِ مستری ءَ پاکستانی پوج ءِ اپسرانی ءُ حق دو تحریک ءِ کونسلرانی نیام ءَ ترانکاری بیتگ ۔ ترانکاریانی تہ ءَ پاکستانی پوج ءِ کور کمانڈر شال جنرل آصف غفور ءَ اَے بیھار دات کہ اگاں دیمتر ءَ گودار ءَ ھڑتال کنگ بیت اگاں نندانک دیگ بیت، گُڑا شمارا زندان ءَ مان کن آں۔چد ءُ پیسر ھم جنرل آصف غفور ءَ پشتوناں بیھار دیان ءَ گُشتگ اَت جنگ ءُ مھر ءِ تہ ءَ درست روا اِنت ءُ آئی ءَ شال ءِ کور کمانڈر ءِ اگدہ ءِ آیگ ءَ پد بلوچستان ءِ تہ ءَ ورنایانی زورانسری بیگواھی ءِ تہ ءَ گیشی اَتکگ۔

کور کمانڈر شال ءِ درشان بلوچستان ءُ سرجمیں پاکستان ءِ سیاسی پاٹی ءُ کارستانی نیمگ ءَ ترندی ءَ گوں ایر جنگ بئیگ ءَ اِنت۔ حق دو تحریک ءِ کونسلر کاکا سلیمان ءَ گُشتگ کہ ترانکاری ءِ نیام ءَ زرمبشت ءِ رھشوناں جنرل آصف غفور ءَ تچکی ءَ پسہ داتگ کہ بیھاراں گوں مارا چہ مئے لوٹاں دزکش کنگ بیت نہ کنت ءُ زلم ءُ زوراکیاں گوں مئے زرمبشت ھلاس کنگ نہ بیت اِنت۔ بلوچ نیشنل موومنٹ ءِ کارگشاد دل مراد بلوچ ءَ وتی درشان ءِ تہ ءَ گُشتگ کہ آصف غفور ءِ بیھار مئے ( بلوچستان ) ءِ نوآبادیاتی بستار ءَ پدر کنت۔

پرایمنیں زھرشانیاں تاکت ءِ زوراں گوں ھلاس کنگ ءُ پرایمنیں راھانی بند کنگ نہ تھنا آصف غفور بلکیں سرجمیں ڈیھہ ءُ ڈیھی پوج ءِ مائنڈ سیٹ اِنت۔ پاکستان پوج ءِ بلوچستان ءِ تہ ءَ پوج کشی ءُ نواب اکبر خان ءِ نمیرانی تھنا گوں جنرل مشرف ءَ بندوک کنگ ءِ جھد کنگ بیت بلے بلوچستان ءِ تہ ءَ برجاھیں راجی آجوئی ءِ جد ءُ جھد ءَ ھلاس کنگ ءِ ھاتر ءَ انگت ھم تاکت کارمرز کنگ بئیگ ءَ اِنت۔

راجی آجوئی ءِ جد ءُ جھد ءَ گوں بندوکیں پاٹی ءُ ادارگانی سر ءَ پیسر ءَ چہ بندش جنگ بیتگ ءُ پرایمنیں زھرشانی کنوکانی راہ بند کنگ بئیگ ءَ اَنت کہ ایش آجوئی ءِ جھد ءَ گوں بندوکیں ادارگانی لیکہ ءَ راست کنت کہ پاکستان ءِ تہ ءَ پرایمنیں جد ءُ جھد ءِ ھچ گنجائشت نیست اِنت ءُ تھنا سلاہ بندیں جد ءُ جھد ءَ گوں بلوچ راجی اگبال (آجوئی) دزگرگ بیت کن اَنت۔

روکپتی بلوچستان ءَ انسانی ھکانی واستا کار کنوکیں گل بلوچ کمپعن فعالین ءِ رد ءَ سال دوھزار ءُ بیست ءُ دو ءَ ایران ءَ پاھو دیگ بیتگین مردمانی تہ ءَ سَے ھکے مردمانی بھر سیستان و بلوچستان ءَ اِنت-

رپورٹ ءَ گوشگ بیتگ کہ اے اود ءَ انسانی ھکانی لگتمالی یکشل ءَ بوگ ءَ اَنت ءُ چرے گوستگیں سال ءَ یک سد ءُ ھپتاد ءُ نُھ بلوچ پاھو ءِ دار ءَ درنجگ بیتگ اَنت-

رپورٹ ءِ رد ءَ پاھو دیگ بیتگیں مردمانی تہ ءَ یک سد ءُ ھبدہ مردم نشہ ءِ باپاری ءِ پژدر ءَ پاھو دیگ بیتگ اَنت ءُ چل ءُ ھشت کوشانی بھتام جنگ ءُ پاھو دیگ بیتگ اَنت-

رپورٹ ءَ گوشگ بیتگ کہ سیستان و بلوچستان ءَ پاھو دیگ بیتگیں مردمانی کساس گیشتر اَنت بلے اے ھما ھال اَنت بلوچ کمپعن ءَ سر بیتگ ءُ آئی ءَ دمگی ءُ سرکاری پھناتاں راست کتگ اَنت-

بلوچ کمپعن فعالین ءِ گوشگ اِنت کہ سیستان ءُ بلوچستان ءَ پاھو دیگ بیتگیں بازیں مردمانی ھال ھمے سبب ءَ چیر تر اَنت کہ اود ءَ آیانی کھولاں ھال نہ بیت یا کہ ترس ءُ بیم ءَ آیانی کھول گپ ءَ کش ات نہ کن اَنت-

زانگ بہ بیت چریشی ءَ پیش ایمنسٹی انٹرنیشنل ءَ ایران ءَ جتا جتا راجانی رنگ ءُ نسل ءُ دینانی پژدر ءَ پاھو دیگ ءَ بند کنگ ءِ بیھار داتگ اَت-

سرجمیں ایران ءِ پاھو دیگ بیتگیں مردمانی کساس شنگ نہ بیتگ اَنت بلے ایرانی انسانی ھکانی گل ءِ رد ءَ گوستگیں سال ءِ یازدہ ماھانی توک ءَ پاھو دیگ بیتگیں مردمانی کساس پنچ سد ءَ گیش اِنت –

ایرانی انسانی ھکانی گل ءِ رد ءَ ایران ءَ زھرشانیانی وھد ءَ گوستگیں چار ماھانی توک ءَ یک سد ءُ نُھ مردم پاھو ءِ دیگ ءِ ترس ھست اِنت ءُ ایشانی توک ءَ چار کس پاھو دیگ بیتگ اَنت-

نامانتریں سرچ انجن گوگل ءِ کمپنی ءِ مالک الفابیٹ ءَ گوشتگ کہ 12 ھزار مردماں چہ نوکری ءَ کشگ ءَ اِنت- اشانی توک ءَ کار کنوکانی کساس شش درسد بیت اِنت-

برطانیہ ءِ ھال سرکنوکیں روئٹرز ءِ رد ءَ ٹیکنالوجی ءِ سیکٹر مردماں چہ نوکری ءَ کشگ ءَ اِنت پرچاکہ اے سیکٹر ءِ دیم ءِ آیوکیں (مصنوعی ذہانت) بزانکہ ھژاری ءَ گوں ھوار بوگ ءَ اِنت-

اے امریکی ءِ کمپنی (مصنوعی ذہانت) ءِ بزانکہ ھژاریں لیڈر مانگ بیت اِنت بلے الفابیٹ ءَ اے وھد ءَ مائیکرو سافٹ ءَ ٹیکنالوجی ءِ چیلنجیانی دیمپانی اِنت چوشکہ گمانی رنگ ءَ کجام اے وڑیں مواد جوڑ کت کنت چریشی ءِ بارو ءَ کارمرد کنوک آ جیڑ اَنت کہ ٹیکسٹ باکس ءَ ٹائپ کت کن اَنت-

گوستگیں ھپتگ ءَ مائیکرو سافٹ ءَ گوشتگ ات کہ زرکاری ءِ بازار ءَ آئی ءَ دَہ ھزار نوکر چہ نوکری ءَ ھلاس کنگ ءِ لاچار کنگ ءَ اَنت کہ اے کمپنی ءَ کار کنوکانی کچ ءُ کساس پنچ درسد اِنت-

مائیکرو سافٹ ءَ گوشتگ کپ آ وتی زھن ءَ مصنوعی ذہانت ءِ دروشم ءَ دیم ءَ بار اِت انت اے ھنچیں یک ٹکے کہ ایشی ءِ نشانی الفابیٹ ءِ سی ای او سندر پیچائی ءَ ھم کتگ-

سندر پیچائی ءَ دوھزار ءُ نوزدہ ءَ الفابیٹ ءِ سی ای او ءِ دروشم ءَ اگدو پھریز اتگ آئی ءِ گوشگ ات کپ الفابیٹ ءَ گوستگین دو سالانی توک ءَ یک جتائیں زرکاری ءِ دیمپانی اِنت اے ھما وھد ات کہ آئی ءُ مھلوک بازیں کچے ءَ داشتگ اَنت-

آئی ءَ گوشتگ ات کہ آ اے امل ءِ سرجمیں زمہ واری ءَ زور ات اِنت، سندر پیچائی ءَ گوگل ءِ کارمرد کنوک، ڈیولپرز ءُ باپار کار ءِ واستا یک نوکین پٹ ءُ پولے جوڑ کنگ ءَ اِنت آ (مصنوعی ذہانت) بزانکہ ھژاری اِنت-

سندھ ءِ مزن شھر کراچی ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ نھ سد ءُ بیست ءُ ھپت روچ سرجم بوتگ انت، مروچی چہ حیدرآباد ءَ سیاسی ءُ چاگردی باسک داد محمد، خیربخش تالپور ءُ دگہ مردماں بنجل ءَ اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچ رھشون ءُ باسکانی سر ءَ زوراکی، کُشت ءُ کوش ءُ آھانی جوناں ژانگول ءُ ویرانگاں چگل دیوک کانود ءِ آمیدگس ءَ آرگ بہ بنت –

ماما قدیر ءَ گوشتگ کہ پاکستانی پوج ھما اولی روچ ءَ ھمے گوشگ انت کہ زورانسری آوار جنگ بوتگیں مردم مئے گور ءَ نہ انت ءُ اے مردم کوھ ءَ یا دبی ءَ شُتگ انت جنگ کنگ ءَ انت – کسے چہ ھمیشاں جست بکنت ھزارانی کچ ءَ بلوچ ورنایانی جون کئیا دور داتگ انت، اے چہ آزمان ءَ کپتگ انت، وش بھتی ءَ لھتے مردم یل کنگ بیت اِنت گڈا ھمایانی نپ ءَ زور انت ھمے گوش انت کہ ژانگولیں جون بلوچانی وت ماں وتی جیڑوانی سوب انت، اے گپ ءِ منگ ءَ تیار نہ انت کہ ژانگولیں جونانی چگل دیوک ھماھانی وتی چریں ادارھانی مردم انت، آیا اے زورانسری آوار جنوکاں سزا دئینت – تاں ھمود ءَ کہ پٹ پولی ءِ گپ انت گڈا پٹ پول ءَ پیش آھاں ھمے گوشتگ کہ کہ چیریں ادارھان نہ کتگ انت – آیا اے آمیدگس، کمیٹی، کمیشن ءُ ادارہ اشاں سزا دئینت، منی ھیالاں اے بس اھمکیں گپ انت ءُ دگہ ھچ –

آئی ءَ گوشتگ کہ استان یک زورگیرے ءُ وتی زورگیری ءِ برجاہ دارگ ءَ ھر چیز کت کنت، ناکہ استان وتی لشکر کشیاں بند کنت ءُ ناکہ کشندہ ٹولیاں ھلاس کنت، ناکہ جونانی چگل دیگ بند کنت ءُ ناکہ اے مارا دیمروئی دئینت – اے استان مارا بس تیر، جون، کبرستان ءَ ابید دگہ ھچ نہ دنت – استان ءِ زوراکی برجاہ انت مروچی بلوچستان ءِ تہ ءَ ھچ چشیں گِس ءِ نیست کہ پاکستانی پوج ءِ زلم زوراکیاں رک اِتگ – مئے جھد تاں گڈی بیگواھیں مردم ءِ یل بوگ ءَ تاں برجاہ مان ایت –

سربوتگیں ھالانی رِد ءَ گوستگیں روچ ءَ بزاں ھژدہ جنوری ءَ ناشناسیں مردماں پنجگور ءَ پاکستانی پوج ایف سی ءِ پانگِسے ءِ سر ءَ دزبمب اُرش ءِ کتگ –

اھوالکار ءِ رِد ءِ ایف سی پانگِسے سر ءَ دزبمب اُرش ھژدہ جنوری ءِ بیگاہ ءَ کنگ بوتگ کہ ناشناسیں مردماں اتکگ ءُ چتکان کلام چار راہ ءِ سر ءَ برجاھیں پوجی پانگسے سر ءَ دزبمب ءِ چگل داتگ ءُ در شُتگ انت – چریشی ءَ پوج ءَ جانی تاوان ءِ دیمپانی کنگ کپتگ – اُرش ءِ زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ منّ اِتگ –

بی ایل ایف ءِ جارکش میجر گوھرام بلوچ ءِ رِد ءَ سرمچاراں ھژدہ جنوری ءَ چار شمبے ءِ روچ ءِ بیگاھے ادار ھپت ءَ چتکان کلام چار راھے ءِ سر ءَ برجاھیں ایف سی پانگِس ءِ سر ءَ دزبمب اُرش ءِ کتگ کہ دزبمب پانگِس ءِ تہ ءَ کپتگ ءُ پوج ءَ جانی ءُ مالی تاوان رستگ –

میجر ءَ گوشتگ کہ زورگیریں پوج ءِ سر ءَ مئے اُرش بلوچستانءِ آجوئی ءَ تاں برجاہ مان انت –

بادل پہ وتن شیدا اَت

نبشتہ کار: ھوا بلوچ

دی بلوچستان پوسٹ

یک کولے گُش انت کہ ھما راج ءِ ورنایانی جون کماشانی کوپگ ءَ بنت ءُ مانش ءَ (کبرستان ءَ ) چہ ورنایانی ادیرہ سمبھینگ بنت آ راج ھچبر پروش نہ وارت بلوچ ورنایانی کربانی ھمے رنگ ءَ زانگ بیت پہ باندات ءَ وتی زند ندر کتگ ءُ ھچ چک ءُ پد نہ بنت چوناھا زندگ بوگ ءِ مول مُراد تھنا زندگی کنگ نہ اِنت-

بلکیں تئی امل ءُ کردار ترا زندگ بوگ ءِ پجار ءَ دنت ءُ کردار زند اِنت ،کردار پجار اِنت ءُ کردار لیکھانی مھکمیں پال اِنت انچیں مرگ کہ زندگی کنت ،مرگ ءَ پد دگہ زندے کناں ھمے کارست زندگ بنت راج دپترانی تہ ءَ بلے لھتے مرگ ھما مردم ءَ بیگواہ کنت کہ وتی زند ءَ کارستے جوڑ مہ کن اَنت بلے لھتے ورنایاں وتی زند ءَ انچیں امل ءُ کردار جوڑ کتگ انت کہ داں ابد زندگ بنت ما اگاں بلوچ راجدپتر ءَ چمشانکے بہ دے ایںگُڑا لھتے انچیں گنوک دیوانگ آشک مرید زمین زادگ دز کپ ایت کہ پہ بلوچ سر ڈگار ءِ ھاتر ءَ وتی تنگوئیں سراں دے اَنت ءُ شھادت ءِ پلسپہ ءَ ابدمان بنت ھمے کارستاں چہ یک کارستے پدائی بادل جان اِنت بادل یک بھادر ءُ جپاکشیں جھدکارے اَت گڈی وھد ءَ وتی راج ءِ بزگی،گلامی ءِ جیڑگ ءَ اَت، پہ وتی زمین ءَ شیدا ءُ گنوک اَت ،چہ گلامی ءِ سانکلانی سندگ ءُ وتی راج ءَ چہ زورگیر ءَ رکینگ ءَ جُھد ءَ اَت،پدائی بادل پہ سر ڈگار ءَ شیدائیں گنوکیں مریدے اَت ،چہ وتی زاتی زند ءَ چہ گیش راج ءِ ھیال ءَ اَت-

بلے کس ءَ نہ زانتگ اَت کہ اے ورنا وتی ھیال ءُ جیڑگانی تہ ءَ یک گیرت ءِ رمس (تاریخ ) کسھے نبیسگ ءَ اِنت پدائی بادل یک کتاب دوستیں مردمے اَت ھر وھد ءَ جیڑھانی سر ءَ پٹ ءُ پول ءُ نبشتہ کتگ ئِے یک شریں زانتکار ءُ نبشتہ کارے اَت ھوار یک ایمانداریں بلوچ جنگولے اَت بادل ھر وھد ءَ پہ وتی مات ءُ گھارانی بیگواھیں براتاں پہ جیڑگ ءَ اَت ،بادل جان مدام وتی بلوچ راج ءِ بے وسی،شُدکشی،بزگی،تکانسری ءِ درد ئِے مار اِت آئی ءَ را پہ وتی راج ءِ سر ءَ زلم ءُ زوراکیانی پسو یک انچیں دروشمے ءَ دات کہ دژمن سرین پروش بوت،اے جزبگ ءُ پلسپہ راج دپترانی تہ ءَ مدام نوک آھوگ ءَ دو دنتدان ءِ وڑ ءَ تاجگ بیت آئی ءَ اے ھم زانتگ اَت دانکہ کربانی دیگ مہ بیت ۔

ماتیں زمین آجو نہ بیت پدائی بادل ءَ مدام وتی سنگت سر ءُ سوج ءُ دلبڈی داتگ اَنت کہ اے آجوئی جنگ اِنت اد ءَ کربانی دیگ لوٹ ایت داں کربانی نہ دے اِت چو آجوئی ءَ گپت نہ کن ایں مارا پہ وتی ساہ ءُ سرانی کربان بوگ ءَ ھچ چک ءُ پد بوگی نہ اِنت-

پدائی بادل ءَ دشمن ءَ را پیش داشت کہ ما بلوچ ورنا مِرگ زانیں کربان بوگ زانیں بلے وتی زمین ءُ راج ءِ سر ءَ دگر ءِ زوراکیاں برداشت کت نہ کن ایں – بادل ءِ داتگیں پیگام ءُ بیھاراں دژمن گُڑینتگ ءُ بزدل کتُگ۔ مرچی ھمے ورنایانی کردار ءُ جنگی ھکمت املیاں دژمن ءِ سر ءَ یک نپسْیاتی ارشے کتگ نوں ھمے رنگ ءَ دژمن ءِ ھیال ءَ ھر ورنا چو بادل ءِ رنگ ءَ اِنت ھر مُچیانی تہ ءَ بس یکیں گوانک اِنت کہ مجید برگیڈ ءَ وانندگیں ورنا ھزارانی کچّ ءَ تیار کُتگ جھد ءَ را دگہ دروشمے داتگ ،راج ءِ تہ ءَ جھد کنگ ءِ کمک پیداک کتگ ۔چوناھا ھر ورنا، پیر،کماش زالبول سرجمیں ھمے بہ جیڑ اَنت کہ جھد ءِ دیمروی آئی ءِ تہ ءَ مھکمی آرگ مئے درستانی زمہ واری اِنت شھیدانی ھونانی پلسپہ ءِ زندگ دارگ ءُ مھکم کنگی اِنت آ پہ ھمے ھاتر ءَ زند ندرکتگ کہ راج بہ لیک ایت ءُ بہ مار ایت جھد نزور نہ اِنت بلکیں چو بولان ءُ ساھجی ءَ بیم دار اِنت باوہ اسلم جان ءِ کاراوان انگت دیم ءَ جنزان اِنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں اھوالانی رد ءَ روکپتی بلوچستان ءِ بنجاھی شھر زھدان ءَ مروچی آدینگ ءِ نماز ءَ پد ایرانی لشکر ءِ زوراکی ءُ وتی انساپ ءِ ھاتر ءَ زھرشانی کتگ –

زھرشانی کنوک زاھدان ءِ مزنیں مسیت مکی ءَ نماز جمعہ ءَ پد بندات بیتگ ءُ شھر ءِ جتا جتائیں دگاں تران بیتگ اَنت-

زھرشانی کنوکانی دستاں پلے کارڈ ءُ بینرز بیتگ اَنت کہ آیانی سر ءَ ایرانی سرکار ءِ ھلاپ ءَ لبز نبشتگ بیتگ اَنت، زھرشانی کنوکاں خامنہ ای سرکار ءِ ھلاپ ءَ اوگام جتگ ءُ وتی انساپ ءِ لوٹ کتگ-

زھرشانی ءَ مردینانی ھواری ءَ زالبول ءُ زھگاں ھم بھر زرتگ ءُ دگانی سر ءَ سر کپتگ اَنت ءُ آیاں راسک ءِ نیکراھی رھشون مولانا عبدالغفار بلوچ ءِ یل کنگ ءُ دگہ بندیگانی یل کنگ ءِ لوٹ کتگ-

دومی نیمگ ءَ ایران ءِ گوریچانی استان گالیش گلستان ءَ ھم بلوچ عالم دین مولنا گورگیج کہ گوستگیں روچاں ایرانی عالمانی آمیدگس ءَ پیش بیگ ءِ ھکم ءِ ھلاپ ءَ زھرشانی بیتگ-

مولانا گورگیج گوستگیں روچاں آمیدگس ءَ پیش بیگ ءِ ھکم بیتگ بلے اود ءَ مھلوک گوستگیں پنچ روچاں آئی ءِ گس ءِ دپ ءَ زھرشانی نندانک ءَ نشتگ ءُ آئی ءِ برگ ءِ ھلاپ ءَ زھرشانی کنگ ءَ اَنت-

زانگ بہ بیت روکپتی بلوچستان ءَ ھما وھد ءَ زھرشانی بندات بیتگ اَنت کہ اود ءَ چھبار ءَ یک پانزدہ سالی ئیں جنکو ماھو بلوچ ءِ گون ءَ ایرانی پولیس آپیسر ابراھیم کوچکزئی ءِ دست ءَ آئی ءِ گیرت ءِ سر ءَ اُرش بیتگ ات-

چرے وئیل ءَ پد روکپتی بلوچستان ءَ زھرشانیانی یک درچے بندات بیتگ ات کہ اے درچ ءَ سدانی کچ ءَ مردم جنگ ءُ کُشگ بیتگ ات اَنت ءُ سدانی کچ ءَ مردم ٹپ ءُ ٹور کنگ بیتگ ات اَنت-

اے زھرشانی نی ھمک آدینگ ءَ یک یاداشتے ءِ پژدر ءَ بناہ کنگ بوگ ءَ اَنت-

مردمانی گوشگ اِنت اے زھرشانی کنوک اگاں انساپ دیگ نہ بیت اَنت گڑا اے زھرشانی پژدر گیش ھرابی ءِ نیمگ ءَ شت کن اَنت –

ایشی ءِ توک ءَ اے گندگ ءَ کیت اِنت کہ اود ءَ اے کساس ءَ مردمانی کُشگ ءُ زدگ کنگ ءَ ابید مردم بے توار نہ بیتگ اَنت گڑا ایشی ءِ توک ءَ ھمے گمان پدر کنت اے مھلوک وتی انساپ ءِ ھاتر ءَ گیشیں گام چست کت کن اَنت-

بلوچستان ءِ دمگ کیچ ءِ ھند سنگ آباد ءَ تجابان لیٹریسی سوسائٹی ءِ جارکش ءَ وتی شنگ کرتگیں درشان ءَ گوشتگ کیچ ءِ دمگ سنگ آباد ( سری کرکی) ءَ ھستیں گورنمنٹ بوائز ھائی اسکول سنگ آباد ءُ گرلز پرائمری اسکول سنگ آباد ءَ بازیں وھداں چہ استادانی کمی ءُ سائنس لبارٹعی، چکاسی ھال، کوٹی ءُ دگہ دگہ آسراتیانی نہ بوگ ءِ ھلاپ ءَ گامگیج زورگ بہ بیت ءُ تچکی ءَ اے جیڑھانی گیش ءُ گیوار کنگ بہ بنت-

آئی ءَ گوشتگ کہ ھمے زوتاں سنگ آباد قاسم بازار ءَ یک دگہ پرائمری اسکولے سرکاری کاگداں گون جوڑ کنگ بیتگ بلے راستی ایش انت کہ اے اسکول ءِ بنپد ھم نیست اَنت بلے اے اسکول ءِ کوٹی ءِ جاہ ءَ یک گدانے ھست اِنت دمگی مردماں وتی کمک ءَ وت جوڑ کرتگ-

جارکش ٹی ایل ایس ءَ گوشتگ کہ گدان دروشمیں اسکول اسکول ءِ نگاھاں کم ءُ کمتری ءِ نگاھاں گیش گندگ بوگ ءَ اِنت –

آئی ءَ گوشتگ کہ بلوچستان ءِ سرکار ءُ مھکمہ ءِ تعلیم ایشی ءِ گامگیج ءَ بہ زور ایت ءُ ایشی ءَ ھوار ھوار زمہ داراں بہ گپت ءُ آیاں جست بہ کنت-

جارکش ءَ گوشتگ کہ سنگ آباد ءِ انیگیں وانگی جاورانی سر ءَ جیڑہ ءَ بہ چار ایت ءُ الکاپی بنچکاں بہ گیشین ایت ءُ ایشی ءِ ھوار ھوار سنگ آباد ءِ استاد ءُ ھیڈماسٹراں سیاسی لیکھانی چست ءُ ایر ءُ وت مانیاں ٹپاسی بہ کنت ءُ ایشی ءِ دارگ ءِ ھاتر ءَ بیوکیں گاماں بہ دار ایت-

آئی ءَ لوٹ کتگ ءُ گوشتگ کہ وانگی ادارھاں وانگی ادارہ بہ کنت نانکہ ایشاں سیاسی کارنامھانی سر ءَ کار بہ گر اَنت-

آئی ءَ گوشتگ کہ کیچ ءِ دمگ ءَ ایجوکیشن آفسراں سرپدی داتگ کہ آ کسے ءِ گوشگ ءَ دگہ چیزاں پھریز بہ کن اَنت ءُ وانگی دشمنی بھراں وت ءَ دور بہ دار اَنت اگاں گڑا آیانی ھلاپ ءَ ترندین گامگیج زورگ بیت اِنت-

بلوچستان ءِ دمگ مَچ ءَ چہ شال ءَ دیم پہ پشاور ءَ روکیں ریل ناشناساں نشانگ کتگ-

گیشیں سر بیتگیں اھوالانی رد ءَ سبی ءَ پشاور ءَ روکیں ریل جعفر ایکسپریس ناشناسیں مردماں بمبے ءِ نشانگ کتگ –

دمگی مردمانی رد ءَ اُرش ءِ زد ءَ اتکگیں انجن ءَ ھوار دو بوگی پٹری ءَ لگوشتگ اَنت ءُ اُرش ءَ بازیں مردمے ءِ زدگ بوگ ءِ ھال اِنت-

ریسکیو ءِ ٹیم وئیل جاہ ءَ رھادگ بیتگ اَنت ءُ اُرش ءِ سبب ءَ سبی ءُ شال ءِ ٹریک ٹرینانی روگ ءُ آیگی ءِ ھاتر ءَ بند کنگ بیتگ-