روکپتی بلوچستان ءَ ھم دگہ ڈیھانی رنگ ءَ عید کتگ

سر بیتگیں اھوالانی رد ءَ روکپتی بلوچستان ءِ جتا جتائیں جاھاں مروچی عید ءِ نماز وانگ بیتگ ءُ مھلوک ءَ عید کتگ-

گیشیں ھالانی رد ءَ روکپتی بلوچستان ءِ بنجاھی شھر زاھدان، ھاش، دگہ دگہ جاھاں مھلوک ءَ نیکراھی روچ بزانکہ عید ءِ نماز ونتگ –

روکپتی بلوچستان ءَ عید ءِ نماز ءِ وھد ءَ سنی علما ءِ سروک مولانا عبدالحمید اسماعیل زئی ءَ نماز وانینتگ بیتگ ءُ نماز ءِ وھد ءَ آئی ءِ حطبعہ ءَ چہ پیش “جمعہ خونین ” ءِ درگت ءَ ھم وتی لیکہ درشان کتگ اَنت-

آئی ءَ گوشتگ کہ ’انسان ھمک رنگیں بندشان چہ آجو اِنت باید ھمک انسان ءَ آئی ءِ ھک ءُ دیان دیگ بہ بنت آ بندش ءِ ساھگ ءَ ساہ مہ کش ایت بلکین آرام ءُ پُرسکینیں رنگے ءَ ساہ بہ کش ایت‘-

ھمے رنگ ءَ روکپتی بلوچستان ءِ تیابدپی شھر چھبار ءَ عید ءِ جار ءَ پد ملا نماز ءَ نیتکگ ءُ اود ءَ مھلوک ءَ وتی دلرنجش ءُ لیکہ درشان کنان ءَ گوشتگ کہ تیوگیں بلوچستان ءَ عید اِنت بلے اد ءَ داں انگت ءَ ملا ءَ وتی کینگ داشتگ –

زانگ بہ بیت عید ءِ جار گوستگیں بامسار ءَ وھد ءَ سنی علما زاھدان ءِ نیمگ ءَ جنگ بیتگ کہ آئی ءَ مروچی عید کنگ ءِ جار جتگ بیتگ-

ایشی ءَ ھوار ھوار بندیگیں مردمانی کھولاں وتی کھولانی بارو ءَ نماز ءِ وھد ءَ ھم اکسی دروشم ءَ زھرشانی یاداشت کتگ-

زاھدان ءَ عیدگاہ ءَ نبشتگ کنگ بیتگیں بینراں گندگ بیت اِنت اود ءَ مردماں وتی مردمانی نام نبشتگ ءُ آیانی یل کنگ ءِ لوٹ ءَ کنگ ءَ اَنت-