بلوچستان ءِ دمگ مشکے ءَ پوجی اُرشانی پژدر ءَ مھلوک ءِ سر ءَ پوجی زوراکی، مھلوک لٹ ءُ کُٹ کنگ بیتگ –
گیشین ھالانی رد ءَ مشکے ءِ دمگ تنک، جھکی، گورجک، جھل واری ءَ پوج ءِ سر ءَ اُرشانی پژدر ءَ پوج ءَ مھلوک گپتگ ءُ لٹ داتگ اَنت-
دمگی مردماں گوں دی بلوچستان پوسٹ ءَ اھوال کنان ءَ گوشتگ کہ مشکے ءِ بازیں دمگاں بیوکیں اُرشاں پد پوج اود ءَ لس بے گناھیں مردماں گرگ ءُ آیاں لٹ ءُ کُٹ کنگ ءُ ایانی پاداں بلیڈ ءِ سر ءَ برگ ءُ آیاں اُرشانی دارگ ءِ کڈنی کنگ بوگ ءَ اِنت-
دمگی مردمانی رد ءَ پوج ءَ مھلوک ءِ سر ءَ زوراکی کنان ءَ مھلوک کڈن کتگ کہ آ دزنبشتگ بہ کن اَنت ءُ بہ دے اَنت دوبر اد ءَ اُرش نہ بوگ ءِ زمہ واری ءَ بہ زور اَنت کہ اے جاھاں اُرش نہ بیت اِنت-
دمگی مردماں ٹی بی پی ءَ گوں گوشتگ کہ ما چون اُرشکارانی زمہ ءَ زرت کن ایں آ اے وڑیں زمہ داری وتی کوپگاں زرت نہ کن ایں ءُ گڑا چریشی ءِ پژدر ءَ پیر ءُ آجزیں کماش گپتگ ءُ ایانی پاد بلیڈ ءُ دگہ لٹ ءُ کُٹ کتگ اَنت-
دمگی مردمانی رد ءَ پوج ءَ ھیر جان ءُ باول نامیں دو مردم پرماتگ اَنت کہ شما برو ات بازاراں مردمان زور کڈن بہ کن ات ءُ مھلوک ءَ دزنبشتگ کنگ ءَ لاچار بہ کن ات-
دمگی مردمانی رد ءَ ھیر جان ءُ باول پوج ءِ چیردستی ءَ مھلوک ءَ تنگ کنگ ءُ آیاں زورانسری لاچار کنگ ءُ دزنبشت ءَ پرمایگ ءَ اَنت-
دمگی مردمان چہ مزنیں واکداراں لوٹ کتگ ءُ گوشتگ ما شوانگ ءُ بزگیں مردم اِنت مئے سر ءَ زوراکیانی ھلاپ ءَ توار چست بہ کن اَنت-
