TBP Balochi

ڈیرہ بگٹی ءِ دمگ سوئی ءَ سینزدہ سالی شُدیکیں ورنایے ءَ ھُشکیں نان ءِ نہ رسگ ءِ سوب ءَ وتی گُٹ وت ساد لوپ کُتگ ءُ وت ءَ کُشتگ –

گیشیں ھالانی رِد ءَ گوستگیں روچ ءَ بلوچستان ءِ دمگ سوئی، وشحال کالونی ءِ سینزدہ سالی کسانسالیں ورنا راجو ڈومب بگٹی ءَ چہ گریبی ءُ گِس ءِ نگیگیں جاوراں بیزار بوتگ ءُ وتکُشی کُتگ –

ھمے گوشگ بوگ ءَ انت کہ کسانسالیں ورنایے کار بازار ءَ مردمانی بوٹ پالش کنگ بوتگ بلے گوستگیں روچ ءَ آئی ءِ ھچ کمائی نہ بوتگ ءُ گِس ءَ شُتگ چہ مات ءَ ورگ لوٹ اِتگ –

دمگی مردمانی رِد ءَ مات ءَ زھگ گِس ءَ نادین اِتگ ھمساھگانی گور ءَ آرت ءِ پچگرگ ءَ شُتگ گڈا چہ شُد ءَ بیزارءِ کسانسالیں ورنا ءَ مایوس بوتگ وتی گُٹ ءَ ساد لوپ کُتگ ءُ وتکشی کُتگ –

زانگ بہ بیت ڈیرہ بگٹی ءَ اے وھدی چار گیس فیلڈز ھست کہ سوئی، پیرکوہ، لوٹی ءُ اُچ انت کہ سرجمیں پاکستان ءَ.سر بنت بلے ھمود ءِ مردم چہ سوئی گیس ءَ زبھر انت وھدیکہ بیروزگاری ھم گیش بوتگ –

سوئی گیس فیلڈ ءَ پاکستان پیٹرولیم لمیٹڈ بزاں پی پی ایل نامی کمپنی ءِ چلائینگ ءَ انت کہ آئی ءِ مزن کارگس کراچی ءَ انت – سوئی گیس ءَ کساس شش سد ءُ شست ملین کیوبک فٹ درکیت ءُ ھمے گوشگ بیت کہ اودا دو ٹریلین کیوبک فٹ گیس ءِ زخائر ھست انت –

سربوتگیں ھالانی رِد ءَ مند ءُ تمپ ءِ میانجی ءَ مزن بند ءِ کوھی دمگاں پاکستانی پوج ءِ جاسوسیں ڈرون بالگرد چکر اِتگ انت –

اھوالکار ءِ رِد ءَ پاکستانی پوج ءِ جاسوسی ڈرون بالگرداں مروچی ادار سَے ءَ مزن بند ءِ کوھی دمگ گورگی ءَ بگر تاں بانسر، چرپان، گوراپی، بودیگ، تکشی، پکیر چات ءُ سیمسری ھنداں چکر جتگ ءُ تنی وھدی ھنگت چکرگ انت –

دمگی اھوالکار رِد ءَ اے دمگاں مزنیں لشکر کشی ءِ گمان کنگ بیگ ءَ انت ھر وھد ءَ کہ پاکستانی پوج لشکر کشی ءَ کیت گڈا پیسرا ڈرون بالگرد چکر جن انت ءُ پدا لشکر کوھانی تہ ءَ مانرچیت بلے مروچی تنی وھدی پوج کوھانی نیمگ ءَ نہ شُتگ –

بلوچستان ءِ دمگ لسبیلہ ءَ مروچی پیش اتکگیں وئیلے ءَ داں انگت ءَ چِل مردم مرگ ءَ وتی ارجان جتگ اَنت –

دگ ءِ وئیل لسبیلہ ءِ دمگ چینک اسٹاپ ءِ نزیک ءَ مساپر بریں کوچ ھما وھد ءَ پیش اتکگ مساپت بردار کوچ شال ءَ دیم پہ کراچی ءَ روگ ءَ بیتگ کہ کھڈ ءَ کپتگ ءُ چریشی ءَ داں انگت ءَ چِل مردم بیران بیتگ اَنت ءُ بازینے زدگ بیتگ اَنت-

وئیل ءِ سر بوگ ءَ فائریگیڈ گاڑی ءُ ریسکیو ءِ واکدار سر بیتگ اَنت ءُ آس اش توسینتگ،اے سی بیلہ ءِ رد ءَ مساپر کوچ ءِ چل ءُ ھشت مساپر سوار بیتگ اَنت-

بلوچستان ءَ اے وڑیں جانکُشیں وئیل لس جوڑ بیتگ اَنت دگانی پروشت ءُ پروشانی سبب ءَ ٹریفک ءِ رھبندانی لگتمالی ءِ سبب ءَ اے وڑیں گاڑی وئیل ءِ آماچ بنت-

بلوچستان ءَ ھمک سال ھزارانی مردم دگ ءِ آماچی ءِ سبب ءَ مرگ ءِ دیمپان بنت- گوستگیں سال ءَ قلعہ سیف اللہ ءَ یک ترند روکیں بسے ھمے وڑ ءَ کم چہ کن بیست ءُ دو مردم بیران بیتگ ات اَنت –

ھمے وڑ دو سال ءَ پیسر چہ کراچی ءَ دیم پہ پنجگور ءَ روکیں مساپر بریں کوچ دگ ءِ وئیل ءَ پد آس کپتگ ات ءُ سِی ءِ کساس ءَ مردم بیران بیتگ ات اَنت-

ھشت روچ ءَ پیسر ایران ءِ استان چہ مشھد ءَ چیریں ادارھانی دست ءَ آوار جنگ بیتگیں مردم یل کنگ بیتگ –

آئی ءِ پجار عمر کمبر زئی ءِ نام ءَ زانگ بیتگ ات کہ آ چھبار ءُ زاھدان ءِ نندوک گوشگ بیتگ اَت ھشت روچ ءَ پیسر آ ماں مشھد ءَ ساز ءُ سامان ءِ زورگ ءِ ھاترا شتگ بیتگ ءُ اود ءَ چریں ادارھاں دزگیر کنگ ءَ پد بیگواہ کرتگ-

ھمے وڑ ءَ چہ زاھدان ءَ نُھ ورنا آوار جنگ ءَ پد بیگواہ کنگ بیتگ اَنت –

سر بیتگیں اھوالانی رد ءَ گوستگیں روچ ءَ روکپتی بلوچستان ءِ بنجاھی شھر زاھدان ءَ ایرانی چیریں ادارھانی کارندھاں نُھ کس آوار جنگ ءَ پد بیگواہ کتگ اَنت-

آوار جنگ بیتگیں مردمانی پجار آصف ریگی ء نعمت اللہ، یاسین ریگی ء عبدالحق، علی ریگی ء نوشیروان، اویس براھوئی، عرفان براھوئی ء غفور، یاسین شاھوزئی ء جعفر، مصطفیٰ شاھوزئی ء نادر، عثمان رخشانی ء عبدالرؤف ءُ عبدالمالک سنجرانی کہ ھردوک خدانظر خان ءِ زھگ اَنت –

اھوالانی تہ ءَ گوشگ بیتگ کہ ایشانی توک ءَ گیشتری نوزدہ سال ءَ چہ کم اُمری ورناینت کہ ایرانی چیریں ادارھانی کارندھاں آوار جتگ ءُ برتگ اَنت-

اے ورنا گیشتر زاھدان ءَ مکسی مسیت ءِ کش ءُ گوراں دزگیر کنگ ءُ ناشناسیں زنداناں برگ بیتگ اَنت-

ھالانی تہ ءَ گوشگ بیتگ کہ اے مردمانی ھواری ءَ اود ءَ مردم لٹ شاپ ھم کنگ بیتگ اَنت ءُ ھالانی تہ ءَ ھمے گمان بوگ ءَ اِنت آوار جنگ بیتگیں مردم گیش بوت کن اَنت-

بلوچستان ءِ دمگ چاگی ءِ ھند نوکنڈی آپ نیستی ءِ ھساب انت –

گوستگیں ھپتگے بیت بازیں سارتی ءَ ابید ھم آپ نیست دمگی مردم پہ آپ شوھاز ءَ.سرگردان انت –

نوکنڈی ءَ دو مزنیں واٹر سپلائی ھم ھست اِنت بلے دمگی مردم پہ پٹ ءِ آپ ءَ تلوسگ انت –

دمگی مردمانی رِد ءَ گھٹ ءِ واٹر سپلائی ءَ گوستگین ماھے بیت کہ بس آزاد لانڈھی ءَ آپ دیگ انت ھرکس ءَ کہ زلورت انت آ ازاد لانڈھی ءَ آپ بیاریت ءُ دومی نیمگ ءَ بوٹگ واٹت سپلائی جرنیٹر ءِ ھرابی ءُ پیپانی پُرشگے سوب ءَ گوستگیں ھپگے بیت کہ آپ بند انت –

چہ ایشی ءَ آپ ءِ پٹ ءِ ھم نوکنڈی ءِ پی ایچ ای ٹانکیاں سر نہ بیت – دمگی مردم اے سارتی ءَ پہ آپ ءِ ھاتر ءَ دلسیاہ ءُ سرگردان انت – پی ایچ ای ءِ سروکاں پاد ماں پاد ءِ سر ءَ انت ءُ نشتگ انت آھاں مردمانی دلسیاھی ءَ ھچ کار نیست –

نوکنڈی ءِ دمگی مردماں چاگی ءِ ڈی سی ءَ گوں لوٹ کتگ ءُ گوشتگ کہ گھٹ ءُ بوٹگ ءِ واٹر سپلائی زوت ءَ زوت شر کنگ بہ بنت اگاں ناں گڈا نوکنڈی ءِ مردم آر سی ڈی ءِ شھدگ ءَ سرجمی ءَ بند کن انت تانکہ آپ دیگ نہ بیت ءُ اشی درسیں زمہ واری پی ایچ ای ءِ سر ءَ لڈگ بنت –

روکپتی بلوچستان ءِ بنجاھی شھر زاھدان ءَ ناشناسیں سلاہ بندیں مردمانی تیرگواری ءَ یک کماشے بیران بیتگ-

بیران بیتگیں مردم ءِ پجار خدارھم براھوئی ءِ نام ءَ زانگ بیتگ کہ آ زاھدان ءِ نندوک گوشگ بوگ ءَ اِنت-

وئیل گوستگیں شپ ءَ پیش اتکگ مہ اود ءَ سلاہ ببدیں مردماں اے اسپیت ریشے کماشے ءِ سر ءَ تیرگواری کنان ءَ کُشتگ-

زاھدان ءَ ھوار روکپتی بلوچستان ءِ دگہ جاہ ءُ ھنداں اے وڑیں وئیل گوست ءَ ھم پیش اتکگ بیتگ اَنت، گوستگیں شپ ءَ بیتگیں وئیل ءِ درگت ءَ زانگ نہ بیتگ –

کیچ ءِ بنجاھی شھر تربت ءَ محراب خالد ءُ طارق غنی ءِ تھیلیسیمیا نادراھی ءِ سر ءَ جوڈ کرتگیں ڈاکومینٹری تامر دی ریڈ سرکل ( The Red Circle) مروچی گورنمنٹ گرلز ڈگری کالج ءَ مزنیں پردھے ءِ پشت ءَ پیش دارگ بوتگ –

تامر ءِ چارگ ءِ ھاتر ءَ مزنیں کچے ءَ جنک ءُ بچکیں نودربراں بھر زرتگ مزنیں پردہ ءِ سر ءَ تامر ءِ چارگ ءَ پد کیچ تھیلیسیمیا کئیر سنٹر ءِ سرکماش ارشاد عارف ءَ نودربر تھیلیسیمیا ءِ درگت ءَ سرپدی داتگ انت –

زانگ بہ بیت ریڈ سرکل ڈاکومینٹری تامرے کہ آئی ءِ تہ ءَ تھیلیسیمیا ءِ نادراھی ءِ آماچیں مردم ءُ آھانی مات ءُ پتانی ھمراھی ءَ ھاسکر مکران ءِ زانتکاریں مردمانی میان ءَ بوتگیں گپ ءُ تران پیش دارگ بوتگ انت – اے تامر زامُر ءُ ساز کلک میڈیا ءِ نیمگ ءَ چہ پیش دارگ بوگ انت ءُ زامُر میڈیا ءَ وتی آفیشیل ترامجاہ ءَ گوشتگ کہ اے تامر سرجمیں بلوچستان ءَ پیش دارگ بیت اِنت پدا زامر ءِ آفیشل یوٹیوب چینل ءَ.شنگ کنگ بیت –

بلوچستان ءِ دو جتاجتائیں دمگ شال ءُ مستونگ ءَ پاکستانی پوج ءِ دستءَ سے ورناہ زورانسری آوار جنگ ءَ پد بیگواہ کنگ بیتگ اَنت-

گیشیں ھالانی رِدءَ بلوچستان ءِ دمگ مستونگ ءِ بازار ءَ آدینگءِ روچ ءَ پاکستانی پوج ءَ یک ورنایے آوار جنگ ءَ پد بیگواہ کتگ-

آوار جنگ بیتگیں ورنائے پجّار نصیب اللہ ء بختیار شاھوانیءِ نام ءَ چہ بیتگ-

کھول ءَ گوں سرکاری واکداراں دزبندی کتگ نصیب اللہ ءِ پہ سلامتی در کنگ ءِ لوٹ کتگ-

ھمے وڑ شال ءَ سول نادُراھجاہ ءَ پاکستانی پوج ءَ یک ورنایے آوار جتگ ءُ بیگواہ کتگ ءُ آئی ءِ پجّار حدا رحم نام ءَ چہ بیتگ زانگ بہ بیت اشی ءِ ھمراھی ءَ مشکے ءِ جھمنند سلام ء محمد اعظم ءِ نام ءَ چہ بیتگ اَت-

ھمے وڑ چاگردی رسانکدر ماں ٹوئیٹر ءَ علی جان لھری ءَ وتی شنگ کتگیں ٹوئیٹ ءِ تہ ءَ گْوشتگ پرندوشی پاکستانی پوج ءِ کارندھاں منی یک سیادے زورانسری آوار جتگ ءُ بیگواہ کتگ-

شنگ کتگیں ٹوئیٹ ءِ تہ ءَ بیگواھیں ورنائے پجّار باسط بلوچ ءِ نام ءَ چہ کتگ-

زانگ بہ بیت کہ بلوچستان ءَ ھمے ھپتگ ءَ چار ورناہ زورانسری آوار جنگ بیتگ ءُ وھدے کہ سے تیرسُپتگیں لاش دزکپتگ-

انسانی ھکانی گل ءُ بلوچ راجدوستیں پارٹی بلوچستان ءَ سیاسی باسکانی زورانسری آوار جنی ءُ تیرسُپتگیں لاشانی بھتام ءَ پاکستانی پوج ءِ سرءَ دیگ ءَ اَنت-

بلوچ راجداریں باسکانی زورانسری آوار جنی ءِ بگیری ءَ کراچی پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ چار ھزار ءُ نُھ سد ءُ سِی چار روچ انت کہ یکشل ءَ برجاہ انت مروچی اے زھرشانی بنجل ءَ جماعت اسلامی ءِ نائب امیر اُسامہ زری، یوتھ ونگ ءِ جنرل سیکٹری اسمائیل بلوچ ءُ دگہ مردماں اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

اے درگت ءَ گل ءِ کمک سرکماش ماما قدیر بلوچ ءَ گوشتگ کہ بلوچ ورنایانی پُرایمنیں جھدے درگان کنگے ھاتر ءَ استان تُرس ءِ ودی کنگ ءَ اِنت بلے ورنایانی پرایمنیں جھد برجاہ اِنت –

آئی ءَ گوشتگ کہ مروچی یکرندے پدا ژانگولیں جونانی دور دیگ ءِ درچ بندات کنگ بوتگ اگں اے کارانی کنگ ءِ سر ءَ پاکستانی پہ جوابدھی ءَ لوٹارینگ نہ بوت گڈا بلوچستان ءَ انسان نیستی ءِ جاور ودی بوت کنت –

بنجل ءَ مروچی بیگواھیں انسانی ھکانی باسک راشد حسین ءِ برازتک ماھزیب بلوچ ءَ بھر زرتگ ءُ گوشتگ کہ مارا بازیں وھدے بیت کہ زھرشانی کنگ ءَ ایں بلے مارا راشد حسین ءِ درگت ءَ ھچ وڈیں سرپدی دیگ بوگ ءَ نہ انت کہ آ چہ متحدہ عرب امارات ءَ پاکستان ءِ آرگ ءَ پد کجا برگ بوتگ ءُ کجام کتکاریانی سوب ءَ آئی ءَ چار سال انت کہ بندیگ کنگ بوتگ –

آئی ءَ گُوشتگ کہ راشد حسین ءَ ھوار ایندگہ زورانسری آوار جنگ بوتگیں مردمانی وش ءُ سلامتی ءَ یل کنائینگ ءِ ھاتر ءَ میان استمانی انسانی ھکانی ادارہ وتی کرد ءَ پیلو بہ کن انت –