دو فروری ءِ اُرشانی سان
دی بلوچستان پوسٹ گچینی
نبشتہ کار: آصف بلوچ
گوستگیں سال ءَ دو فروری ءِ شپ ءَ ادار ھشت ءُ نیم ءِ نیام ءَ بلوچستان ءِ دو جتاجتائیں دمگ نوشکی ءُ پنجگور ءَ یکیں وھد ءَ تراک ءُ تیرانی تواراں چہ جَکس اَنت، کہ چریشی ءَ پد آیوکیں بازیں روچ ءُ ماھاں داں پنجگور ءُ نوشکی سرجمیں جھان ءِ رسانکدرانی سرھالانی تہ ءَ پہ وت ءَ یک جاھے جوڑ کنت ۔
دو فروری ءَ چی بیتگ اَت؟
شانزدہ سلاہ بندیں مردم ءُ وتکُشیں تراک کار کہ گاڑیاں سوار بیتگ اَنت، پیسر ءَ نوشکی ءُ پنجگور ءَ ھستیں پاکستانی پوج ءِ بنجلانی بنجاھی دروازگاں تراکانی نشانگ کن اَنت، کہ چریشی ءَ پد ایندگہ سلاہ بندیں مردم بنجلانی تہ ءَ پُترگ ءَ سوبمند بنت، نوشکی کیمپ ءَ پتروکیں درستیں سلاہ بندیں مردم دومی روچ ءَ جَنَگ بنت، وھدیکہ پنجگور ءَ سئے روچاں داں سلاہ بند ءُ پاکستانی پوج ءِ نیام ءَ ترندیں میڑ برجاہ بنت، سئے روچاں داں اے سلاہ بندیں مردم بنجل ءَ وتی دستیگی ءَ برجاہ دار اَنت۔
اُرش کار کئے بیتگ اَنت؟
اُرش ءِ لھتیں دمان ءَ پد بلوچ لبریشن آرمی (بی ایل اے) اے دویں اُرشانی زمہ داریاں من اِیت، بی ایل اے ءِ جارکش جیئند بلوچ ءِ رد ءَ بی ایل اے مجید برگیڈ ءِ پدائیں پنجگور ءُ نوشکی ءِ پوجی بنجلانی سر ءَ ارش کار بیتگ اَنت، جارکش ءَ ٹاہ داتگ اَت کہ بی ایل اے ءِ جنگولاں دویں بنجلانی یک مزنیں بھرے وتی دستیگی کُتگ ءُ بازیں پوجی کارندہ کُشگ بیتگ اَنت، وھدے سئے روچ ءَ پد درستیں ارشکار جنگ بنت ءُ جنگ آسر بیت اِنت گُڑا بی ایل اے ءِ نیمگ ءَ ٹاہ دیگ بیت کہ اے اُرش ءِ تہ ءَ دوسد ءِ کچ ءَ پوجی کارندہ کُشگ بیتگ اَنت۔ ءُ مجید برگیڈ ءِ شانزدہ پدائیں ارشکار اے اُرش ءِ تہ ءَ نمیران بیتگ اَنت۔
سرکاری لیکہ چی بیتگ اَنت ؟
پاکستانی پوج ءِ جارکش ءُ پاکستان ءِ ھما وھد ءِ تھی کارانی وزیر شیخ رشید ءَ اُرش ءِ لھتیں اداراں پد دویں دمگانی تہ ءَ درستیں مردمانی کُشگ بئیگ ءِ جار ءَ جتگ ات، وھدیکہ زمینی راستی ءَ اے سرجم ءَ چپ کت۔ اُرشانی گمانی دروشم ءَ بے سوب کنگ ءِ ٹاھاں پد ھم سئے روچاں داں پنجگور ءُ نوشکی ءِ دمگاں کرفیو ءِ جار جنگ بیت، ءُ ترندیں تیرگواری ءُ شیلنگ ءِ توار جکسان بنت وھدیکہ واکدارانی نیمگ لس مھلوک ءِ لوگانی تہ ءَ نندگ ءِ پابند کنگ بیت اِنت۔ دیمی یک ھپتگے ءَ داں دویں دمگانی تہ ءَ موبائل دامگی ءُ نیٹورک بند کنگ بنت، وھدیکہ ھمے دمگانی تہ ءَ جنگی بالگرد ءُ چریں بالی گرابانی بال، بمب تراک ءُ تیرانی توار یکشل ءَ برجاہ بنت اِنت۔
مجید برگیڈ کئے اِنت ؟
مجید برگیڈ بلوچ لبریشن آرمی ءِ مزن ھیلکاریں پدائی بنزہ اِنت، کہ پدائیں ءُ وتکُشیں ارشکارانی سر ءَ بندوک اِنت، کہ اِیشی ءَ چد ءُ پیسر بلوچستان ءُ کراچی ءَ بازیں اُرش کُتگ اَنت۔
مجید برگیڈ ءِ نام درستاں پیسر ھما وھد ءَ دیم ءَ اتکگ وھدیکہ سال دوھزار ءُ یازدہ ءِ گُڈی روچ سی دسمبر ءَ تراکناکیں شورواں چہ پُریں یک گاڑی ءَ پاکستان ءِ پیسرگیں وزیر میر نصیر مینگل ءِ زھگ شفیق مینگل ءِ لوگ نشانگ کُتگ اَت، واکدارانی رد ءَ اَے اُرش ءِ تہ ءَ سینزدہ مردم کُشگ بیتگ اَت وھدیکہ سی ءُ چار ٹپی بیتگ اَنت۔ شفیق مینگل ءِ سر ءَ اے بھتام بیتگ کہ آ پاکستانی پوج ءِ مستری ءَ بلوچ آجوئی دوستانی بگیری ءَ سلاہ بندیں ڈیتھ اسکواڈ جنزینگ ءَ اِنت۔
بلوچ لبریشن آرمی ءِ جارکش میرک بلوچ ءَ اے تراک ءِ زمہ واری منان ءَ گُشتگ اَت کہ اے پدائی اُرش ءِ بیتگ، کہ مجید بریگیڈ ءِ پدائی درویش بلوچ ءَ کُتگ۔
مجید برگیڈ ءِ اے اُرش ءَ پد داں ھپت سالانی مزنیں ھاموشی ءَ پد مجید برگیڈ ءِ نام یک برے پد ءَ ھما وھد ءَ دیم ءَ اتکگ اَت، وھدے یازدہ اگست دوھزار ءُ ھژدہ ءَ مجید برگیڈ ءَ بلوچستان ءِ دمگ دالبندین ءَ چینی انجینئرانی یک بسے نشانگ کُتگ اَت۔ اے اُرش ھما وھدے بی ایل اے ءِ سروک اسلم بلوچ ءِ زھگ ریحان بلوچ ءَ کُتگ اَت۔
اے اُرش ءَ پد مجید برگیڈ ءَ ھمے سال ءَ نومبر ءِ ماہ ءَ 23 ءِ روچ ءَ کراچی ءَ ھستیں چینی قونصل خانہ نشانگ کُتگ اَت، وھدیکہ دیمی سال 2019 ءَ یازدہ مئی ءِ روچ ءَ گوادر ءَ بستگیں فائیو اسٹار ہوٹل ‘پرل کانٹیننٹل’ ءِ سر ءَ اُرش کُتگ اَت، اِشی ءَ پد بیست ءُ ھشت جون دوھزار ءُ بیست ءَ پاکستان ءِ درستاں مستریں شھر ءَ ھستگیں، پاکستان سٹاک ایکسچینج نشانگ کُتگ اَت ، نوزدہ اگست 2021 ءَ بلوچستان ءِ تیاب دپی شھر گوادر ءَ چائنیز اننجیئرانی کاروان ءِ سر ءَ دگہ یک پدائیں اُرشے کنگ بیتگ اَت، وھدیکہ 26 اپریل 2022 ءَ کراچی یونیورسٹی ءَ اولی بلوچ زالبولیں پدائی شاری بلوچ ءَ چینی شھری نشانگ کُتگ اِت اَنت، کہ اود ءَ چینی زبان ھیل دیوکیں ادارگ کنفیوشس انسٹیٹیوٹ ءِ ڈائریکٹر ءَ ھوار چار مردم کُشگ بیتگ اَت۔
مجید بریگیڈ ءِ اُرشانی تہ ءَ ترندی ءِ سوب؟
بلوچ لبریشن آرمی ءِ مجید بریگیڈ کہ دوھزار ءُ یازدہ ءَ وتی اولی پدائی اُرش ءَ کنت، ءُ ھپت سال ءِ مزنیں ھاموشی ءَ پد وھدیکہ دوھزار ھژدہ ءَ چینی شھریاں نشانگ کنت، اِیشی ءَ پد سئے سالانی تہ ءَ نیم درزن ءِ کچ ءَ پدائی اُرش کنگ ءَ چون سومبند بیت ؟ کہ اِیشانی بیست ءُ نھ ءِ کچ ءَ پدائیں ارشکار بھر زیر اَنت۔
اِیشی ءِ درستاں مستریں سوب بی ایل اے ءِ توک ءَ مزنیں تھی بدلیاں گُشگ بیت اِنت۔ کہ اود ءَ گل ءِ قبائلی بن ھشت ءَ ایر کنوکیں سروکی ءَ مٹ کنگ، اسلم بلوچ ءُ بشیر زیب بلوچ ءِ پئیمیں مڈل کلاس سیاسی رھشون گل ءِ مستری ءَ زیر اَنت ءُ بی ایل اے ءِ تہ ءَ نوکیں اھد ءِ رد ءَ بدلی کار اَنت۔ اے بدلیانی تہ ءَ مستریں بدلی مجید بریگیڈ ءَ پد ءَ مھکم کنگ اَت۔ اِیشی ءَ ھوار ھوار فتح اسکواڈ ءُ ایس ٹی او ایس ءِ وڑیں ایلیٹ بنزھانی اڈ دیگ ھم ھوار اَنت۔
پدائی اُرشانی بلوچ جُنز ءِ سر ءَ سان
بیست سالاں چہ برجاھیں بلوچ سلاہ بندیں جُنز ءَ اگاں ھورتی ءَ گوں شر چارگ بہ بیت گُڑا زانگ بیت کہ ھمینکس ترندی اے جُنز ءِ تہ ءَ گوستگیں پنچ سالانی تہ ءَ اَتکگ، ایشی ءِ درور گوستگیں دو دھکانی تہ ءَ گندگ نہ بیت۔ ایشی ءِ درستاں مستریں سوب پدائی اُرش اَنت۔
گوستگیں دو دھکانی نیام ءَ کہ ھما مزنیں اُرش بیتگ اَنت آیانی تہ ءَ دوھزار ءُ چار ءَ گوادر ءَ چار چینی انجینئرانی کوش، دوھزار ءُ یازدہ ءَ بولان ءِ تہ ءَ بستگیں پاکستانی پوج ءِ بنجل ءِ دستیگ کنگ ءُ دوھزار ءُ سینزدہ ءَ تیاب دپی شھر گوادر ءَ کوسٹ گارڈ ءِ بنجل ءِ دستیگ کنگ ءُ کارمندانی دزگیری ھوار اَنت۔
ھمود ءَ دومی نیمگ ءَ دوھزار ءُ ھژدہ ءَ دالبندین ءَ چینی انجنیئرانی بس ءِ سر ءَ بیوکیں اُرش ءَ پد سلاہ بندیں جُنز ءِ تہ ءَ یکپارگی ءَ ترندی اتک۔ اود ءَ کہ ھژدہ سالانی تہ ءَ تھنا لھتیں مزنیں اُرش کنگ ءَ بلوچ سلاہ بندیں گل سوبمند بیتگ اَنت، ھمود ءَ دوھزار ھژدہ ءَ پد دہ ءِ کچ ءَ لشکریانی بنجلانی دستیگ کنگ ءُ دگہ بازیں مزنیں کساسے ءِ ارش کنگ بیتگ اَنت۔
اے ھم گندگ ءَ اَتکگ کہ بلوچ سلاہ بندیں گلانی نوکتریں شوربندی کارمرز کنان ءَ، ھندی چریک تکنیکی اُرشانی تہ ءَ نشانگ کُتگ اَنت، وھدیکہ پاکستانی پوج ءِ حاضر سروس اپسر ءُ دگہ کارمند بیڑ بران ءَ دزگیر کنگ ءَ سوبمند بیتگ اَنت۔ اے دزگیر بیتگینانی تہ ءَ پاکستانی پوج ءِ کرنل لئیق بیگ ھم ھوار اِنت۔
آسری
بی ایل اے مجید برگیڈ ءِ اُرشاں پد ھمود ءَ یک نیمگے بلوچ سلاہ بندیں گلانی اُرشانی تہ ءَ گیشی ءُ ترندی گندگ ءَ اَتکگ۔ ھمود ءَ سیاسی تک ءَ ھم زمینی جاورانی تہ ءَ مزنیں بدلی ءِ گندگ ءَ پیداک اَنت۔ انیگیں وھدانی تہ ءَ مزنیں کساس ءَ پاکستانی پوج ءِ زوراکی ءُ استانی سلاہ بندیں ٹولیانی بگیر ءَ ھم لس مھلوک ءِ تہ ءَ مزنیں کساس ءَ گھگیری گندگ ءَ پیداک اِنت، ھمے پئیم ءَ بلوچستان ءِ تہ ءَ سیاسی تکانسری ءِ جمبر میلانک بوگ ءَ اَنت۔ مردم بُنکی اگبالانی ھاتر ءَ ھم چمدار اَنت، جتاجتائیں وھدانی تہ ءَ بلوچستان ءِ جتا جتائیں تکاں سیادی داروکیں مردم ءُ ٹولی یکشل ءَ زھرشانی ءُ درانگازی ءِ دروشم ءَ وتی گم ءُ زھر ءِ درشانی ءَ کنگ ءَ اَنت، کہ ایشی ءِ مُز تچکی ءَ بلوچ سلاہ بندیں رسگ ءَ اَنت۔
بلوچ جُنز ءُ بلوچستان ءِ سر ءَ چم ایر کُتگیں پریسکارانی گُشگ اِنت کہ کسانسالیں جِنکو برمش ءِ ٹپی کنگ ءُ آئی ءِ مات ءِ کوش ءَ پد کہ ھما لس مھلوک ءِ نیمگ ءَ چہ گھگیری گندگ ءَ اَتکگ اَت، اے درستاں سکین چہ ھما اُرشاں رس اتگ اَت۔ چد ءُ پیسر ھم چُشیں اُرش بیتگ اَنت، بلے لس مھلوک ءِ نیمگ ءَ چُشیں ءِ گھگیری ءَ ابید گیشتر ھاموشی گندگ ءَ اتکگ بیتگ، بلے انیگیں روچانی تہ ءَ چُشیں وئیلانی پد ءَ ھروھد ءَ لس تک ءَ گھگیری گندگ ءَ پیداک اِنت۔
یک سالے گوزگ ءَ پد ھم دو فروری ءِ اُرشانی سانمندی داں انگت ھم بلوچ سیاست ءُ گھگیری ءِ سر ءَ گندگ بیت کن اَنت۔ دو فروری ءِ اُرش ءَ اے ھیال ھم ھلاس کُتگ کہ بلوچستان ءِ تہ ءَ پاکستانی پوج بلوچ جنگولانی پروش دیگ ءَ بے سوب اِنت – چریشی ءِ سوب ءَ بلوچستان ءِ آزاریں ورناہ، جنگولیں بلوچ سلاہ بندیں گلانی نیمگ ءَ روان اَنت۔
