TBP Balochi

پوج ءَ بیگواھیں ورنایے گِس ءِ سر ءَ بیڑ برتگ ءُ زوراکی کنان ءَ کھول ءِ مردم جتگ انت ءُ موبائیل پچ گپتگ انت –

ھالانی رِد ءَ گوستگیں روچ ءَ لیاری ءِ دمگ گل محمدی لین ءَ رینجرز ءُ چیریں ادارھانی کارمنداں زورانسری آوار جنگ بوتگیں بلوچستان بالیچہ ءِ جھمنند سلطان سعید ءِ گِس ءَ بیڑ برتگ زوراکی کنان ءَ زالبول جتگ انت ءُ چہ آھاں موبائیل پچ گپتگ انت –

اے درگت ءَ گیشیں سرپدی دیان ءَ بیگواھیں سلطان سعید بلوچ ءِ گھار عدلہ سعید ءَ گوشتگ کہ رینجرز ءُ چیریں ادارھاں بید پٹ پولی وارنٹ ءَ کراچی ءَ مئے گِس ءَ بیڑ برتگ ءُ گِس ءِ تہ ءَ درسیں مردمانی موبائیل پچ گپتگ انت، گِس ءِ الماری پُروشتگ انت ءُ کھول ءِ مردم جتگ انت –

آئی گوشتگ کہ پاکستانی پوج ءَ اے میان ءَ پُروشت پروش کتگ مارا جتگ ءُ جست کتگ کہ سلاہ کجا چیر داتگ انت –

عدلہ سعید ءِ رِد ءَ دو سال ساری پاکستانی پوج ءَ منی برات سلطان سعید وتگڑیں آپریشن ءَ آوار جتگ ءُ بیگواہ کتگ کہ ھنگت بیگواہ انت –

آئی ءَ گوشتگ کہ دگہ دابیں مھلوک ءِ چادر ءُ چاردیوالی لگتمال کن انت ءُ مئے دوستگیں مردماں آوار جن انت ءُ بیگواہ کن انت وھدیکہ ما وتی دوستیگیں مردمانی ھاتر ءَ توار چست کن ایں گڈا اے مارا گناھگار گُش انت ءُ مئے سر ءَ زوراکی کن انت –

بیگواھیں سلطان سعید ءِ گھار ءَ لوٹ کتگ گوشتگ کہ اگاں اے ملک ءَ انساپ ءِ ادارہ ھست انت گڈا مارا انساپ دیگ بہ بیت ءُ اے ریاستی گنڈی دارگ بہ بنت –

زانگ بہ بیت بیگواھیں مردمانی کھول ءِ سر ءَ کراچی رینجرز ءِ اے اولی رند نہ انت اشی ءَ چیزے روچ ساری چیریں ادارھانی کارمندان کراچی سنٹرل جیل ءِ دیم ءَ ھزدار ءِ جھمنند عبدالحفیظ آوار جنگ ءِ کوشست کتگ ءُ آئی کھول لٹ شاپ کتگ زدگ کتگ انت –

اشی ءَ ساری ءَ گوستگیں سال دوھزار بیست ءُ دو ءَ رینجرز ءُ پاکستان ءِ چیریں ادارھان کراچی نیول کالونی ءَ بلوچ سیاسی باسک راشد حسین بلوچ ءِ گِس ءَ بیڑ برتگ مات ءُ گھار لٹ شاپ کتگ انت ءُ کھول ءِ ایندگہ مردم آوار جتگ انت –

گوستگیں روچاں چہ کراچی ءَ حفیظ بلوچ ءِ دوبر زورانسری آوار جنی ءِ تامر ھم شنگ بوتگ ات کہ چریشی ءَ پد راجکاریں گل ءُ انسانی ھکانی ادارھاں سندھ ءِ سرکار ءَ لوٹ کتگ کہ گامگیج بہ زور انت –

عبدالحفیظ زھری ءَ گوں چی بیتگ؟

ٹی بی پی گچینی

نبشتہ کار۔ فتح بلوچ

جنزوکیں سال ءِ 3 فروری ءَ ناشرکاری ءِ بگیر ءَ کارکنوکیں آمید گِس ءِ کراچی ءِ جج محمد یاسین قادری ءَ عبدالحفیظ ء محمد رمضان ءِ سر ءَ بستگیں بھتام پدر نہ بیگ ءِ سوب ءَ آ یل کُتگ ات۔

عبدالحفیظ کراچی سنڑل جیل ءَ بندیگ بُرتگ، وھدے آئی ءِ کھول ءِ مردم آمید گسِ ءِ پرمان نامگ ءَ گوں زندان ءَ چہ وتی برات ءِ زیرگ ءُ ڈَن ءَ درکپگ ءَ بیتگ اَنت کہ یک اسپیتیں ویگو گاڑی ءَ آیانی راہ بستگ ءُ عبدالحفیظ ءَ گوں وت برگ ءِ جھد کُتگ۔

کہ چریشی ءَ پد آئی ءِ گوھار ءُ کھول ءَ دگہ ترندیں گھگیری کُتگ ات۔ سلاہ بندیں مردماں آیانی سر ءَ تیر گواری کُتگ، جنین آدماں لگت جنگ بیتگ، زاہ ءُ بد کنگ بیتگ ءُ آیانی مُد چِکگ بیتگ ات اَنت بلے بی بی فاطمہ ءَ وتی بیگواھیں، دزگیریں برات دوبر بیگواہ بیگ ءَ نئیشتگ۔

سلاہ بنداں گھگیری گندگ ءَ پد تچگ ءَ پیسر عبدالحفیظ ءِ کُشگ ءِ کوشست کنان ءَ سک باز ٹپی کُتگ۔

چاگردی رسانکدرانی تہ ءَ یک ءَ چہ گیشتر وائرل بیتگیں تامرانی تہ ءَ اے ندارگ گندگ بیت کن اَنت۔

عبدالحفیظ دبئی ءَ چہ کراچی چون سربیتگ؟

عبدالحفیظ گوستگیں سال ءِ 27 جنوری ءِ شپ ءَ ھماوھد ءَ چہ آئی لوگ ءِ دپ ءَ پارکنگ ءَ چہ متحدہ عرب امارات ءِ چیریں ادارگاں بیگواہ کُتگ، وھدے آ کار ءَ چہ واتر لوگ ءَ آیگ ءَ بیتگ۔

رند ءَ ھال رس اتگ کہ آ امارتی چیریں پولیس ءَ پاکستانی واکدارانی دست ءَ داتگ بلے کجام جرم ءِ سوب ءَ اے گُشگ نہ بیتگ اَت۔

یک مزنیں مدتے ءَ داں پاکستان ءَ آئی ءِ ھچ اھوال نہ رس اتگ اَت۔ حفیظ ءِ کھول ءَ آئی ءِ درگیجگ ءِ جھد ءَ پاکستان ءِ تہ ءَ ھمک ھما دروازگ ءِ دپ ءَ شتگ اَنت کہ آیانی واک بیتگ، سئے ماھانی جھد ءَ پد گُڑ ءَ آ درگیجگ بیتگ اَت۔

رندتر ءَ آئی ءِ کھول ءَ سندھ ہائیکورٹ ءِ تہ ءَ ارزی ءِ داتگ اَت کہ آ 29 مارچ 2022 ءَ دلجمی ءَ گُوشدارگ ءِ ھاتر ءَ منگ بیتگ اَت۔

گوستگیں سال ءِ اپریل ءَ وھدے آئی ءِ بیگواھی ءِ ارزی ءَ گُوشدارگ بیت گُڑ ءَ مزن آمید گِس ءَ گُشگ بیت کہ آ سی ٹی ڈی ءَ چہ کراچی ءَ دزگیر کُتگ ءُ آ سینٹرل جیل کراچی ءَ دیم دیگ بیتگ۔

عبدالحفیظ ءِ ھلاپ ءَ سی ٹی ڈی تھانہ زرباری دمگ کراچی ءَ سندھ سلاہ قانود ءِ رد ءَ ارزی نبشتہ کنگ بیتگ اَت۔

آئی ءِ بگیر ءَ نبشتگیں ارزی ءِ رد ءَ آ 31مار چ 2022 ءَ شاہ مبارک شھید دگ ءَ دزگیر کنگ بیتگ ءُ آئی ءِ گور ءَ یک 30 بور ءِ پسٹلے ءُ تیر دراتکگ اَنت۔

وھدیکہ سی ٹی ڈی ءِ نیمگ ءَ سندھ ہائیکورٹ ءَ اے بابت ءَ 14 اپریل ءَ کہ ھما پسہ دیگ بیتگ، آئی ءِ رد ءَ بیگواھیں عبدالحفیظ دزگیر کنگ بیتگ ءُ آئی ءِ ھلاپ ءَ دو قانودانی رد ءَ ارزی نبشتہ کنگ بیتگ اَنت۔

البت آئی ءِ گوھار ءَ گُشتگ کہ آئی برات بے میار اِنت ءُ مارءَ امیت اِنت کہ چہ آمید گِساں مارءَ انساپ رس اِیت ءُ برات یل کنگ بیت اِنت ءُ ھمے وڑ بیت حفیظ دروگیں بھتاماں چہ یل کنگ بیتگ۔

گوست ءَ حفیظ زھری ءِ کھول ءِ سرءَ چی گوستگ؟

عبدالحفیظ زھری ءِ زورانسری بیگواھی ءُ لَٹ شاپی ءِ وئیل پہ اے کھول ءَ اولی وئیل نہ اِنت بلکینہ اے یک دھکءِ پیسرءَ چہ آ زورانسری بیگواھی، ژانگولیں جونانی رسگ ءُ نشانگ کنگ ءُ کُشگ ءِ وئیل آماچ بیتگ اَنت۔

حفیظ زھری ءِ زورانسری بیگواھی ءَ پیسر آئی سیاد، مردمی اگبالانی باسک راشد حسین بلوچ 26 دسمبر 2018 ءَ چہ متحدہ عرب امارات ءَ زورانسری بیگواہ کنگ بیتگ اَت۔ راشد حسین ءِ کھول ءِ گُشگ اِنت کہ آئی ءَ شش ماہ ءَ زورانسری بیگواھی ءِ آماچ کنگ ءَ پد متحدہ عرب امارات ءُ پاکستان ءِ واکداراں قانودی ردءَ آ پاکستان ءَ دیم داتگ اَت، کہ اِشی ءَ پد آ داں انگت بیگواہ اِنت۔

چریشی ءَ پد آئی ءِ زامات عبدالحمید زھری 10 اپریل 2021 ءَ چہ کراچی ءَ زورانسری بیگواہ کنگ بیتگ اَت کہ آ داں انگت دیما آرگ نہ بیتگ۔

وھدیکہ یک دھک ءِ پیسر چہ خضدار ءَ حفیظ زھری ءِ 14 سالیگیں برات مجید زھری 2010 ءَ زورانسری بیگواھی ءَ پد کُشگ بیتگ اَت ءُ آئی ءِ ژانگولیں جون دزکپتگ اَت۔ اے وئیل ءِ دو سال ءَ پد 2012 ءَ حفیظ زھری کے کماش (پِت)، نامداریں باپاری مردم حاجی رمضان زھری خضدار بازار ءَ تیرگواری کنگ ءُ کُشگ بیتگ اَت۔

ھمے دویں مردمانی کوش ءِ وئیلانی تہ ءَ سیاسی ءُ چاگردی گلانی رد ءَ پاکستانی پوج ءُ آئی ءِ اڈ داتگیں سلاہ بندیں ٹولی ھوار اَنت۔

عبدالحفیظ انی کجا اِنت ؟

عبدالحفیظ زھری کراچی ءَ ٹپیگیں جاوارانی تہ ءَ وتی گوھار ءِ لوگ ءَ بند اِنت، آئی ءِ گوھار فاطمہ بلوچ گُش ایت کہ چیریں ادارگ آئی ءِ برات ءَ پد ءَ بیگواہ کنگ ءِ کوشست کن اَنت۔

فاطمہ حمید ءِ رد ءَ گوستگیں روچاں سینٹرل جیل کراچی ءَ چہ یل بیگ ءَ پد اسپیتیں ویگو گاڑی ءَ سواریں چیریں ادارگانی سلاہ بندیں کارندھاں عبدالحفیظ ءَ زورانسری بیگواہ کنگ ءِ نیام ءَ گھگیری کنگ ءِ پد ءَ سک باز لٹ شاپی ءِ نشانگ کُتگ اے وھدءَ حفیظ زھری ءُ آئی کستریں برات سک باز ٹپیگ اَنت ءُ لاچاری ءِ سوب ءَ آیاں پہ اِلاج ءَ نادراھجاہ ءَ ھم برگ بیت نہ کنت۔

فاطمہ حمید ءِ رد ءَ گوستگیں روچاں وھدے کھول ءَ چہ چیریں ادارگانی کارندھاں چہ وتی براتاں رکینگ ءَ پد ٹپیگیں جاورانی تہ ءَ نادراھجاہ ءَ برگ ءِ جھد کُتگ گُڑ ءَ ھما وھدءَ ھم ھمے ویگو گاڑی ءُ سلاہ بندیں کارندہ آیانی رندگیری کنگ ءَ بیتگ اَنت، انی ھم عبدالحفیظ ءُ آئی ایندگہ سیاد لَٹ شاپی ءِ سوب ءَ سک ٹپیگ اَنت بلے تُرس ءُ بیم ءِ سوب ءَ کو آیاں پہ اِلاج ءَ ھچ کجا بُرت نہ کنیں۔

عبدالحفیظ زھری ءِ گوھار ءَ بلوچ سیاسی گل انسانی اگبالانی ادارگ ءُ وکلاء برادری ءَ چہ دزبندی کُتگ کہ آ اے جیڑہ ءِ سر ءَ آیانی توار جوڑ بہ بنت دانکہ آ آمید گِس ءَ بے میار نامینگ بیتگیں وتی برات ءِ زند ءَ رکینت کُت بہ کنت۔

فاطمہ ھمے واھگ دارگ ءَ اِنت کہ آمید گِس آئی ءَ پھازگی ءُ انساپ دئینت۔

بلوچستان ءِ دوجتاجتائیں دمگ کیچ ءُ مند ءَ ناشناسیں سلاہ بندیں مردماں پاکستانی پوج سرءَ اُرش کتگ ءُ دومی نیمگ ءَ اے دوئیں اُرشانی زمہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءَ زرتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ پاکستانی ءِ پوج سرءَ بیتگیں اُرش زمہ واری منّ اِتگ گْوشتگ کہ مئے سرمچاراں شش فروری ءَ کیچ ءِ دمگ مند ءِ ھند گوک ءَ واٹرسپلائی سر ءَ برجاھیں پاکستانی پوج ءِ پانگس سرءَ گوں راکٹ ءُ مزنیں سلاھاں اُرش کتگ چریشی ءِ آسر ءَ آیاں جانی ءُ مالی تاوان چست کنگ کپتگ-

میجر گْوھرام بلوچ ءَ دیمترءَ گْوشتگ کہ دگہ یک اُرشے کیچ ءِ بُنجاھی شھر تربت ءَ تعلیم چوک سرءَ برجاھیں پاکستانی پوج ءِ پانگس سر ءَ دستی بمب اُرشے کتگ-

 دستی بمب پانگس ءِ تہ ءَ کپتگ چریشی ءَ چہ پانگس ءَ ساڑی ایں یک کارندھے مرتگ ءُ یکے ٹپی بیتگ-

جارکش میجر گْوھرام بلوچ ءَ گُڈسرءَ گوشتگ کہ اے اُرش تاں بلوچستان ءِ وتواجھی ءَ برجاہ بنت-

نبشتہ کار: اے جنک وَ گنوک اِنت 

نبشتہ کار: سیپ بلوچ

دی بلوچستان پوسٹ

اے بری میتگ ءَ جتائیں تورشتے ءِ نیمگ ءَ بُرت ءُ جیڑگ ءَ پرمات ،گوستگیں سئے سال سرجم اَت کہ اے میتگ ءَ سر نہ کپتگ اَت بلے اے بری پاداں بُرت کہ پیر زال ءَ سک باز کلوه دیم داتگ ات کہ بیا گڑا پہ سر کپتی پیر زال ءِ گس ءَ شُت ءُ سر بیت آں۔

چوناها اے گس ءَ گیشتر جنکیں زهگ اِت اَنت ءُ پد ءَ مزهبی ئیں مردم من ءَ پمیشکا اے کهول ءِ نیمگ ءَ پاداں نہ بُرتگ کہ ایشانی مرد نہ اَنت رستر اَنت پد ءَ جنکیں زهگانی سر ءَ کش اتگیں کارچ اَنت۔

من ءَ اے پیمیں چاگرد دوست نہ بیت، پہ زور پاداں بُرت داں گس ءِ دریگ ءَ پُترت آں پیرزال منی دیم ءَ اوشتاتگ اَت من امبازاں زرت ءُ آدگہ لهتیں چاگرد ءِ جنکیں زهگ نشتگ اِت انت کس پاد نہ اتک هیر من وت دست ملاریناں کت انت پہ ترسیں دل ءِ دست اش دات ءُ پیر زال اوں اجکہ ات اے دست ملارینگ ءِ وهد ءَ چاگرد ءِ مردین ءِ بہ گند ایت ٹوهین جنگے ود ایت بلے من اے چیز کمار نہ کت ءُ بیگ دور دات لوگ ءِ برانڈه ءَ سر جاه ایر اَنت ءُ زهگ نشتگ اِت اَنت من نشت آں گوں همے کہ چمانی دیم ءَ جنکیں چکے نشتگ اَت ایشی ءِ سر ءِ دیم ءِ مید من ءَ گندگ نہ بوت آں من هیران بوت آں اے چوں ؟

  یکبرے من گْوشت جست ئِے کن آں پد ءَ جیڑ اِت دم ءِ سارت کن آں آپ چاه ءِ وراں شپ وتیگ اِنت پہ جست ءُ پست ءَ داں پیر زال اتک ءُ آپ ءِ آؤرت پمن داں من آپ وارت پیر زال ءَ درائینت تو برو گس ءَ ڈن ءَ نندگ شر نہ اِنت ایشانی هال وَ تو سهی ءِ بیا آں کچک جوڑ بنت۔

من پیر زال ءِ گپ ءِ اشکنگ ءَ کمو دلگران بوت آں کہ من اے گس ءَ رُستگ آں همے زهگاں گوں هوار اے چون منی دیم ءَ ستر بوت کن اَنت اے گپ هست کہ منی هنکین ءُ جاه جتائین اَنت بلے من کسانی گیشتر همے میتگ ءَ گوازینتگ من همے جنکو ءَ را گوشت تو منی بیگ ءَ بر کمره ءَ من کایاں همود ءَ جنک ءَ بزگی پہ انگو آنگور چار ات ءُ زوت بیگ کمره ءَ دور دات ءُ در اهت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربوتگیں ھالانی رِد ءَ بلوچستان ءِ بنجاھی شھر شال ءَ زھگ ءُ زالبولاں ھوار پنچ مردم زورانسری آوار جنگ ءُ بیگواہ کنگ بوتگ انت –

دی بلوچستان پوسٹ ءِ پتر ءَ رستگیں ھالانی رِد ءَ بلوچستان ءِ بنجاھی شھر شال ءَ پاکستانی پوج ءَ گِس ءِ سر ءَ بیڑ برتگ زوراکی کنان ءَ زھگ ءُ زالبولاں ھوار پنچ مردم زورانسری آوار جتگ ءُ گوں وت برتگ انت –

آوار جنگ بوتگیں مردمانی پجار محمد رحیم زھری ء چاکر خان زھری ءُ آئی ءِ کسانسالیں جنکو دعا زھری، چار سالیگیں بچک یحییٰ زھری لوکبانک رشیدہ زھری ءُ مات بس حاتون ناماں چہ بوتگ انت –

اھوالکار ءِ رِد ءَ اے مردم سَے فروری ءَ چہ شال ءَ گشکوری ٹاؤن ناشناس کالونی ءَ پٹ پولی آپریشن ءِ میان ءَ آوار جتگ ءُ بیگواہ کتگ انت کہ پدا رند ءَ آھانی ھچ ھال اھوال نیست –

زانگ بہ بیت چدوپیش ھم بلوچستان ءَ چُش بوتگ کہ پاکستانی پوج ءَ زھگ ءُ زالبول آوار جتگ ءُ بیگواہ کتگ انت –

لھتے روچ ساری کراچی سنٹرل جیل ءِ دیم ءَ یل بوتگیں عبدالحفیظ زھری دوبر آوار جنگ ءِ کوشست کنگ بوتگ ءُ اے میان ءَ آئی ءِ کھول زھگ زالبولانی سر ءَ ھم لٹ شاپی کتگ –

زالبول ءِ ارزِشت

نبشتہ کار: ھانی بلوچ

دی بلوچستان پوسٹ

راجانی آبادی ءِ نیم زالبول اَنت، زالبول ءَ اَبید ھَمک راج ناسرجم اِنت۔ باید اِنت ھما آجوئی کہ مردین ءَ دیگ بُوگ ءَ اِنت زالبول ءَ ھم دیگ بہ بیت بلے مئے چاگرد ءَ زالبول لوگ ءِ کارانی کَنگ ءُ چُک ءِ پیداک کَنگ ءِ مشینے لیکھگ بیت ، یک نیمگے ءَ آ لوگ ءِ کاراں کَنت ءُ دومی نیمگ ءَ چُک ءَ رودین ایت ءُ دگہ کار کنت بلے مئے چاگرد ءِ مردم انگت ھم گوں زالبول ءَ رازی نہ بنت آ ھمے گوش اَنت “زالبول اللہ پاک ءَ لوگ ءِ کارانی ءُ چُک ءِ پیداک کَنگ ءِ ھاتر ءَ سازِ اتگ”-

گِندئے مئے چاگرد ءَ زالبول ءَ ھچ ارزِشت دیگ بوگ ءَ نہ اِنت ءُ زالبول ءِ مَستری ءَ ھم تھنا یکے نہ کَنت۔ پِت تا مَستری کَنت برات جُتا ءُ لوگ واجہ جُتا ، زالبول وتی جِند ءِ مَستری ءَ ھم وت کُت نہ کَنت۔ گوستگیں زمانگ ءَ زالبول ءَ ھچ ارزِشت نہ بوتگ آ وھد ءِ مردم ءَ گُشتگ زالبول تھنا لوگی چیزے بلے آ وھد دگہ وھدے بوتگ آ وھد ءَ مئے چاگرد ءَ الم ءُ زانت اینچو نہ بوتگ بلے مرچی باندا اِلم ءُ زانت گیشتر اِنت ھرکس ءَ ونتگ ءُ اِلم ءُ زانت گیش بوُان اِنت بلے انگت ھم زالبول ءَ آجوئی رَسگ ءَ نہ اِنت ءُ باز مردم ھمے گپ ءَ ھم کنت کہ زالبول وان ایت گُڑا مئے واست ءَ چی کنت آ باندا آروس کنت دگہ لوگے ءَ روت ، اگاں آروس کنت ھم بلے وانگ زالبول ءِ بُنکی ھک اِنت آئی ءَ کہ تو اِلم ءُ زانت دئے آ آروس کَنت وتی چُکاں اِے گپ ءَ کُت نہ کَنت کہ شما زالبول اِت پمیشکا شما ھم مہ وان اِت۔ وھدیکہ تو زالبول ءَ اِلم ءُ زانت دئے آئی ءِ باندات شَر بیت ءُ آ مئے آیوکیں پدریچ ءَ جوانیں وڑے ءَ اِلم ءُ آگاھی دات کَنت گوش اَنت اگاں یک بچکے بوان ایت گُڑا آئی ءِ زانت داں ھمائی ءَ سر بیت بلے یک جنکے بوان ایت آئی ءِ زانت آئی ءِ کئولِ مردماں سر بیت۔ ھر ھمک کار کہ مردین آدم کنت زالبول ھم کُت کنت بلے زالبول ءَ آجوئی دیگ بوُگ ءَ نہ انت۔ بدبھتی ما چہ زالبول ءِ وانگ ءَ گیشتر لوگ ءِ کار ءَ ارزِشت دئے ایں۔

گُڑا باید اِنت مرچیگیں دیمروی کُتگیں زمانگ ءَ زالبول ءَ آئی ءِ بُندری ھک دیگ بہ بنت۔ چوناھا آزات ھیالیں بلوچ راج ءِ دود ءُ ربیدگانی رِد ءَ بلوچ زالبوالاں آزاتی ءُ ھَک ھم ھست بلے اے دْراہ گپانی تہ ءَ اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ترکی ءُ شام ءَ ھوار سرجمیں دمگ ءَ ترندیں زمین چنڈ ءِ اَتکگ کہ اِشی سوب ءَ داں انگت پانزدہ سد مردمانی بیران بیگ ءِ ھال اِنت وھدیکہ مزنیں کساس ءَ مردم انگت ڈراتگیں لوگ ءُ ماڑیانی چیر ءَ گَٹ اِتگ اَنت۔

امریکی جیولوجیکل سروے ءِ ردءَ ترندیں زمین چنڈ  قبرص، یونان، اردن، لبنان ءُ اسرائیل ءَ ھم بیتگ اَنت۔ 

زمین چنڈ ءِ آسرءَ بیرانیانی کساس ءِ گیش بوّگ ءِ گمان کنگ بئیگ ءَ اِنت۔

جرمن پٹءُ پول بنجاہ ءِ ردءَ  ترکی ءَ اتکگیں اے زمین چنڈ ءِ ترندی 7.9 ریکارڈ کنگ بیتگ،زمین چنڈ ءِ بنجاہ ترکی ءِ زربار ءَ Nurdadi/Gaziantep ءِ دمگ بیتگ، اے زمین چنڈ ءِ جھلی 10 کلو میٹر زمین ءِ چیر ءَ بیتگ۔

ترکی ءَ ترندیں زمین چنڈ ءَ اسر مند بیتگیں دمگانی تہءَ کمکی کار برجاہ اَنت، کمکی ادارگانی ٹولیاں ابید ھندی مردم ھم مانشتانی تہءَ پس اِتگیں مردماں درگیجگ ءَ اَنت۔

ترک ڈیزاسٹر اینڈ ایمرجنسی مینجمنٹ اتھارٹی ءِ ردءَ ترکی ءِ زرباری شھر کھرا منمار ءُ آئی کَش ءُ گوراں زمین چنڈ ءِ ترندی 7.4 ریکارڈ کنگ بیتگ۔

زمین چنڈ ھندی وھدءِ ردءَ شپ ءِ 4:15 ءَ اتکگ، ھما وھدءَ گیشتریں مردم واب بیتگ اَنت۔

زمین چنڈ ءِ سوب ءَ ماڑیاں باز تاوان رستگ،  مردم تُرس ءَ چہ دگانی سرءَ درکپتگ اَنت،  زمین چنڈ داں یک 1 مِلٹءَ مارگ بیتگ۔

زمین چنڈ ءِ آفٹر شاکس ترکی ءِ نیامی دمگانی تہءَ ھم مارگ بیتگ اَنت، کہ اِشانی ترندی 6.7 ریکارڈ کنگ بیتگ، آفٹر شاکس کساس 11 دمان ءَ پد مارگ بیتگ اَنت۔

ترک سرکاری ٹی وی ءِ ردءَ ترکی ءِ زربار ءَ اتکگیں زمین چنڈ ءَ بازیں مردم ٹپی بیتگ اَنت، وھدیکہ مزنیں زمین چنڈ ءَ پد کساس  32 آفٹر شاکس اتکگ اَنت۔