TBP Balochi

بلوچستان ءِ دو جتائیں دمگ ڈیراہ مراد جمالی ءُ چاگی ءَ وتکشی ءُ تیرگواری ءِ وئیل ءَ دو مردم بیران ءُ دو ٹپی بیتگ اَنت-

گیشیں ھالانی رِد ءَ بلوچستان ءِ دمگ چاگی ءَ یک مردمے ءَ وتکشی کتگ ءُ وتی دستاں گوں وتی زندمان ھلاس کُتگ- وتکشی کنوکیں مردے پجّار ملا آغا مزاری ءِ نام ءَ چہ بیتگ-

مردمانی رِدءَ وتکشی لوگی جیڑھے ءِ سر ءَ بیزاری ءِ سوب ءَ بیتگ- رسیکیو واکداراں لاش دستیگ کتگ گیشیں چار ءُ ٹپاس ءَ پد کھول ءَ داتگ-

زانگ بہ بیت بلوچستان ءَ جتاجتائیں دمگاں وھد وھد سر ءَ وتکشی ءِ ھال نکش بنت ءُ وتکشی ءِ سبب گیشتر بے روزگاری ءُ لوگی جیڑھانی سر ءَ بنت-

دومی نیمگ ءَ ڈیرہ مراد جمالی ءَ سیشن کورٹ ءِ نزیک ءَ تیرگواری ءِ آسر ءَ یک مردمے بیران ءُ دو ٹپی بیتگ-

بیران بیتگیں مردم ءِ پجّار عبدالستار سرپراہ ءِ نام ءَ چہ بیتگ وھدے کہ ٹپیانی پجّار ایوب عمرانی ءُ کریم بخش گورشانی نام ءَ چہ بیتگ اَنت-

وئیل ءِ سوب داں انگت زانگ نہ بیتگ-

بلوچی زبان ءِ شائر خالق ارمان ءِ شئیرانی چارمی تاک ” دریا سبزیں بازارے ” زوت چہ ساچ در لبزانکی گل مکران ءِ نیمگ ءَ چاپ ءُ شنگ کنگ بیت اِنت –

ساچ در لبزانکی گل مکران ءَ وتی آفیشئیل فیس بُک پیج ءَ شنگ کرتگیں جار ءِ تہ ءَ گوشتگ کہ بلوچی لبزانک وانوک دوستاں نوکیں ٹیکی یے کہ بلوچی ءِ نامداریں شائر خالق ارمان ءِ شئیرانی چارمی دپتر “دریا سبزیں بازارے” ھمے زیتّاں چہ ساچ در لبزانکی گَل مکران ءِ نیمگ ءَ چاپ ءُ شنگ کنگ بیت انت –

دریا سبزیں بازارے ءِ پیشگال بلوچی زبان ءِ شائر ءُ ندکار اے آر داد ءَ نبشتہ کُتگ – پیشگال ءِ تہ ءَ اے آر داد نبشتہ کنت کہ خالق ارمان مجید عاجز ءِ ھلک ءُ میتگ ءَ چہ درکپتگیں شائرے ، بلکیں عاجز ءِ سر ءُ سوج رھدربری ھم آئی ءَ گون بوتگ انت-

خالق ءِ شوھاز ءَ اوسپان کنگ نیست، کہ شریں ازمکار کدی اوں جاھے دیرو نہ کن انت – منی دیر انت دل ءَ انت کہ خالق ءِ سر ءَ کمیں نبشتگ بکناں بلے اینچو وھد گوزگ ءَ پد باریں چی ءَ ماں تہ ءَ کسے ءَ منی دست نہ گپتگ ءُ سکین نہ داتگ- ھمے گپ ءِ سر ءَ من وت کند ات ءُ پسّہ دات کہ کتاب ءَ پچ کن ، بچار چون کنت باریں ، مرچی کہ من آئی ءِ دپتر پچ کت من ءَ ھیال اتک کہ چندیں شائر بلوچی ءِ ھما انت کرن گوزگ ءَ پد اوں آیانی گور ءَ ازمی شئیر ءُ بندے پہ درمانی ھم نہ رس ایت-

داد نبشتہ کنت کہ چندیں شائر بلوچی ءَ ھما انت کہ کسانیں مدتےءِ تہ ءَ آیاں اینچو لشکر ءِ تہ ءَ وتی گستائیں رنگ ءُ توارے ءِ ارمان ساز اتگ – ھما یاں کہ گستا بیگ نہ جیڑ اتگ آ وَ داں مرگ ءَ بیدے پدگیری ، دگرانی زمین ءِ رنگ ءُ آواز ءِ جکس ءَ چی بوت کن انت ؟ من مرچی خالق ءِ ھمے ھاترا وانگ بندات کت کہ دیمتر ءَ ھم دل مان بہ بیت ، ءُ من آئیءِ ازم ءِ سر ءَ چیزے نبشتگ بکناں –

پیشگال ءِ تہ ءَ اے آر داد گُش ایت کہ نوکیں شائری نوکیں درشانی ءِ نام انت۔ نوکیں درشانی زند ءُ گیدی ءَ جتا ءُ نوکیں تجربتے ءَ گوں بیان کنگ ءِ نام انت – گڑا باید اے نوکیں درشانی ءِ ردءُ بند ، گالجوڑ ، چھرءُ شبین ھم نوک بہ بنت – دیم ءَ ماہ گوشگ ، ءُ شپ ءَ زلم ءُ زوراکی ءِ چھر کنگ ءِ باریگ ءَ جتگ- خالق ارمان ءِ دستونک ءِ چندیں شئیراں منءَ دلمانگ کت کہ من آئی ءِ کتاب ءَ دست گور ءَ ایر بکناں کہ دبوج ءَ شیر ءُ سگریٹے ءَ پد آئی ءِ رنگ ھمے بیت کہ روچگی ءِ کمار ءِ تہ ءَ انت؟-

گڈسر ءَ داد ءَ پیشگال ءِ تہ ءَ ارمان ءِ لھتے شئیر نبشتگ چوش کہ: –

“ھرکس گدارے واب کپیت وھد ءِ مانش ءَ”
“اے تچکیں زندگی یے اد ءَ پیچ ءُ تاب نیست”
“کردار ءِ آپ کپتہ بدیں یار ءِ دیدگاں
ما پھمتہ کہ اے وڑیں خانہ خراب نیست”

“ارمان ما پہ واھگے ارواہ کپن کتہ
ارمان جنگ است بلے انکلاب نیست”

“تو اے پیشانی ءَ ھمے رنگ ءَ بوسگائے من لڑءُ بوج کناں”

“کشک ارمان نہ گوستگنت دیم ءَ کاروانے نہ سبز تہ چماں”

زانگ بہ بیت خالق ارمان ءِ چدوپیسر ءَ شائری ءِ سَے تاک کسہ رمیزاں گپتگ، کوش ءِ گریتگیں زیمر، لبزاں بانزل رودینتگ چاپ ءُ شنگ بوتگ انت اے آئی ءِ چارمی شئیرانی تاک انت –

بلوچستان ءِ دمگ پنجگور ءَ پاکستانی لشکر ءَ دو مردم آوار جنگ ءَ پد ناشناسیں جاھے ءَ برتگ اَنت-

گیشیں ھالانی رِد ءَ پنجگور ءِ ھنکین گچک ءَ چہ پاکستانی لشکر ءَ دو مردم آوار جنگ ءَ پد بیگواہ کتگ اَنت کہ آیانی پجّار گلاب ء واحد ءُ سلیم ء ملنگ ءِ ناماں چہ بیتگ اَنت-

اِھوالکارانی رِد ءَ اے مردم دہ روچ ءَ ساری پاکستان لشکر ءَ آوار جتگ ءُ بیگواہ کتگ اَنت- دمگ ءَ ھال اھوالی آسراتی نہ بوگ ءِ سوب ءَ آوار جنی ءِ گپ دیم ءَ نیتکگ-

زانگ بہ بیت مروچی پنجگور ءِ دمگ خدابادان ءَ مواچ چار راہ ءِ سر ءَ سرف گاڑی ءَ سواریں سلاہ بندیں مردماں نیوگ دکانے ءَ بیڑبرتگ ءُ شعیب ء ایوب نامیں ورنایے آوار جنگ ءَ پد بیگواہ کتگ-

دمگی مردمانی رِد ءَ اے ھما دکان ایں کہ داد جان نامیں ورنایے پاکستانی پوج ءِ چیردستی ءَ کارکنوکیں ڈیتھ اسکواڈ ءِ کارندھانی تیرگواری ءَ چہ بیران بیتگ اَنت-

زانگ بہ بیت بلوچستان ءَ ھمکروچ زورانسری آوار جنی ءِ ھال نکش بنت یک نیمگے پاکستانی پوج ءُ دومی نیمگ ءَ آئی ءِ داشتگیں ڈیتھ اسکواڈ ءِ کارندہ ورناھاں آوار جنگ ءُ بیگواہ کنگ ءَ اَنت-

بلوچستان ءِ پنجگور دمگ ءَ ناشناسیں سلاہ بندیں اولاک سواراں یک مردمے آواز جنگ ءَ پد ناشناسیں جاھاں بُرتگ۔

اھوالانی ردءَ پنجگور ءِ ھنکین خدابادان مواچ چارراہ ءِ سرءَ سرف گاڑی ءَ سورایں پجار نہ بیتگیں سلاہ بندیں مردماں یک مردمے بیگواہ کنگ ءَ پد ناشناسیں ھنداں بُرتگ۔

بیگواہ بیتگیں مردمے پجار شعیب ء ایوب جھمنند خدابادان ءِ نامءَ چہ بیتگ۔

پولیس ءَ وئیل ءِ ھال راست کُتگ، البت گیشتر اھوال پولیس ءَ نہ داتگ اَنت ءُ نانکہ بیگواہ کنوکانی پجار داں انگت پولیس ءَ کُتگ۔

یات بہ بیت بلوچ راجدوستیں گل چُشیں وئیلانی بھتام ءَ پرست پاکستانی چیریں ادارگ ءُ آیانی داشتگیں کشندہ ٹولیانی (ڈیتھ اسکواڈ) ءِ سرءَ دئینت، آیانی گُشتن ءَ چُشیں وئیلانی تہءَ ڈیھی مشینری ھوار اِنت۔

نیشنل ڈیموکریٹک پارٹی ءِ بنجاھی جارکش ءَ وتی درشانے تہءَ گُشتگ کہ سئے فروری ءَ شال ءِ ھنکین گشکوری ٹاون ءَ چہ محمد رحیم زھری ء چاکر خان زھری، آئی یک سالیگیں جِنک دعا زھری، چار سالی بچ یحیٰ زھری، لوگ بانک رشیدہ زھری ءُ مات بس خاتون ابید قانودی رھبند دزگیر کنگ بیتگ اَت اَنت وھدیکہ گوستگیں روچاں محمد رحیم زھری ءِ مات ءُ کسان سالیں گونڈو یل کنگ بیتگ اِت اَنت البت رحیم زھری ءُ آئی لوگیگ رشید زھری داں انگت زورانسری بیگواہ اَنت۔

جارکش ءَ گُشتگ کہ جھان ءَ زورانسری بیگواھی ءِ پالیسی ءَ نے ھواریں سزا ءِ پئیم ءَ زانگ بیت کہ اے یک سنگینیں جُرم اِنت بلے اے جرم ءِ سرءَ سرجمی ءَ گوں کاربند بیگ ءَ گوں اِشی ءَ بلوچ چاگرد ءِ کارمرز کنان ءَ رھبندی جوڑ کنگ بئیگ ءَ اِنت اِشی ءَ ھوار بلوچ زالبول رشیدہ زھری ءِ بیگواھی ءَ گوں بلوچ دود، ننگ ءُ شرپ لگتمال کنگ بیتگ اَنت ءُ اے اولی بر نہ اِنت بلکینہ چدوپیسر ھم ڈیھی ادارگانی نیمگ چُشیں گامگیج گوستگیں بازیں سالاں چہ کنگ بئیگ ءَ اَنت کہ اِشی پسہ ءَ بلوچ گھگیری ءِ تہءَ ترندی ھم گندگ ءَ اتکگ کہ اے یک فطری عمل اِنت۔ ما ڈیھی ادارگاں چُشیں گیر انسانی گامگیجانی تہءَ ھوار بیگ ءَ چہ مکن کنیں کہ آ میان اُستمانی انسانی اگبالانی سرجمی ءَ ھلاپ ورزی ءَ ھوار ھوار بلوچ راج ءِ ننگ ءُ دودانی ھلاپ اَنت۔

جارکش ءَ وتی درشان ءِ گُڈ سرءَ گُشتگ کہ رشیدہ زھری ءُ آئی لوگ واجہ زیت ءَ زیت دیما آرگ بہ بیت ءُ اگں آیانی سرءَ کجام ھم بھتام اَنت گُڑءَ رھبند ءِ ردءَ گامگیج زیرگ بہ بیت اگں نہ

نیشنل ڈیموکریٹک پارٹی بلوچ ءِ رکینگ، راجی دودمان، ننگ ءُ شرپ ءِ رکینگ ءِ ھاترءَ کجام ھم دیمھونی ءَ چہ چک ءُ پد نہ بیت۔

نبشتانک: بلوچ راجدپتر ءُ جنرل مُشرپ

نبشتہ کار: پاتما بلوچ

دی بلوچستان پوسٹ

اگاں ما انیگیں بلوچ راجی آجوئی ءِ جُھد ءَ چمشانکے بدے ایں گُڑا ما سرپد بہ ایں کہ بلوچ راج ءِ سر ءَ اِے جنرل پرویز مُشْرَپ ءِ بُنگیج کُتگیں جنگ، یکشل ءَ برجاہ داشتگیں دُژمن ءِ زُلم ءُ زوراکیانی آسر اِنت کہ ٹَک ءُ دمگانی میان ءَ بھر ءُ بانگیں بلوچ راج ءِ دلیریں ورناہ پہ وتی راجی آجوئی ءِ راہ روان کُتگ اَنت۔ اگاں ما راجدپتر ءَ وان ایں گُڑا ما سرپد بہ ایں کہ مرچی مئے بلوچ راجی آجوئی ءِ جُھد ءَ سک باز دیمروی کُتگ پرچا کہ بلوچ راج مُدام وتی دمگاں وتگڑیں میر، سردار ءُ نوابانی گُلام بیتگ ءُ انگت ھم ھست، چہ ایشی ءَ بلوچ راج مُدام ناتپاکی، وتواہ ءُ بھر ءُ بانگ اِنت۔ گِند ئے ھمے میر، نواب ءُ سردار دُژمن ءِ کاسگ چٹ ءُ دلار اَنت پرچا کہ اِے نہ لوٹ اَنت کہ لس بلوچ راج یکمُشت ءُ ھمسنت بہ بیت ءُ پد ءَ اے بلاھیں راج آزات ءُ وتواجھیں بلوچستان، آزات ھیال ءُ راجمستری ئیں مُلکے ءِ واھُند بہ بیت پرچا کہ یک آزات ھیال ءُ راجمستری ئیں بلوچستان ءَ سرداری، میر ءُ نوابی روا نہ بیت۔ اگاں ما راجدپتر ءَ وان ایں گُڑا دْراھیں چیز بلور ءِ وڑ ءَ پدرا اَنت کہ اے کاسگ چٹیں میر ءُ سرداراں مُدام بلوچ راج ءِ دژمن ءَ پائدگ داتگ۔

وھدیکہ بلوچ راج ءِ دُژمن ءَ 28 مارچ 1948 ءَ بلوچستان ءِ سر ءَ اُرش کنت گُڑا چہ دُرستاں پیسر ھمے دمگی سردار، میر ءُ نواباں لب ءُ لالچ دیان ءَ بھا زُرت اَنت ئِے پمیشکا ما گِند ایں کہ 1948 ءَ شھزادگ ابدلکریم بلوچ ءِ سرکماشی ءَ اولی بلوچ راجی آجوئی ءِ سِلاھبندیں جُھد ءَ ھمے دمگی میر ءُ سرداراں بلوچ راجی گھگیری ءَ ناں وت بھر زورت ناں کہ وتی دمگی بلوچاں گْوشت اش کہ پہ وتی آجوئی ءَ پاد بیا اَنت ، پہ راجی آجوئی ءَ شھزادگ ابدلکریم ءِ کاروان ءَ ھوار بہ اِت۔ گِند ئے پہ دُژمن ءِ پائدگاں ھمے دمگی میر ءُ نواباں بلاھیں بلوچ راج بھر ءُ بانگ کنان ءَ چہ سرجمیں راجے ماں کسانیں ٹَکاں ونڈ ءُ چُنڈ کُتگ اَنت۔ نی بچار کہ کسے وت ءَ مینگل ءُ کسے وت ءَ رئیسانی ءُ بُلیدی گْوش ایت، کسے وت ءَ کھوسہ، لیگاری، کھتران، بُزدار، مری ءُ گیشکوری گُڑا کسے وت ءَ بُگٹی، لانگو ءُ رِند گْوش ایت کسے جمالی اِنت ءُ کسے مگسی۔

گِندئے اے سرجمیں راج پہ دُژمن ءِ سیت ءُ پائدگاں ماں دمگی راجدْروہ ءُ کاسگ چٹّانی دست ءَ بھر ءُ بانگ اَنت چمیشکا اے وت ءَ اول بلوچ نہ لیکھ اَنت اگاں ایشاں وت ءَ بلوچ منّ اتیں گُڑا اے دْراہ بلوچاں بابو نوروز ھان زھری ءِ سرکماشی ءَ 1958-59 ءِ بلوچ راجی جنگ ءَ ھوار بوتگ اِت اَنت! اگاں ھمے دمگی وتگڑیں سردار، میر ءُ نواباں کمیں گیرت، بلوچیت ءُ راجدوستی ءِ مارشتے بوتیں گُڑا ایشاں 1973-78 ءِ بلوچ راجی آجوئی ءِ سِلاھبندیں جُھد ءَ بابا ھیربکش ءُ اتا اُلہ مینگل بے کُمک ءُ بے ھمراہ نہ کُتگ اَت اَنت کہ ساھیوال ءُ چکوال ءِ پنجابی پوج بلوچ راج ءِ مری ءُ مینگل ٹک ءِ بلوچانی گِساں ماندارگ ءُ بلوچ راج ءِ ورناہ ءُ کماشاں کُشگ ءَ ات اَنت، اگاں ھمے نزیکیں لگوریں سردار ءُ میر وت جنگ ءِ بھر بُوگ ءَ تُرسگ ءَ اِت اَنت گُڑا باید اِنت وتی ٹَک ءِ بلوچاں بہ گْوشتین اش کہ برو اَنت ءُ بابا ھیر بکش مری ءِ سرکماشی ءَ بلوچ راجی آجوئی ءِ سِلاھبندیں جنگ ءَ ھوار بہ بنت۔ بلے اِنّاں پرچا کہ اے دْراہ پنجابی ءِ کاسگ چٹّ اِت اَنت، ایشاں پنجابی ءِ لب ءُ لالچ رسگ ءَ اَت گُڑا ایشاں چون بلوچ راجی آجوئی ءِ بھر بہ زُرتیں یا کہ وتی ٹَک ءِ بلوچاں بہ گْوشتین اش کہ راجی جنگ ءَ ھوار بَہ اِت۔ چوناھا 1971 ءَ پاکستان وت ھِندوستان ءُ بنگلادیش ءِ دست ءَ پْروشتگ اَت پمیشکا پہ راجی آجوئی ءَ بلوچ راج ءِ تپاکی ءُ یکمشتی لازمی اَت باید اِنت نزیکیں سلیمانی بلوچاں ھوار مکران ءُ رکشان ءِ بلوچاں نمیرانیں بابا ھیربکش مری 1973 ءِ جنگ ءَ بے کُمک مہ کُتیں بلے چے کن ئے او بات بلوچ تئی کِسمت ءَ-

ھمے وڑ ءَ داں روچ ءِ مرچیگ ءَ وتگڑیں دمگی میر ءُ سردار ءِ وڑیں کاسگ چٹّاں بلوچ راج بھر ءُ بانگ داشتگ اَنت بچار کہ یک پنجابی ءِ وڑیں درآمدگیں زورانسرے کہ آئی ءَ گوں بلوچ راج ءَ ھچ سْیادی ھم نیست۔ آئی ءِ زُبان، آئی ءِ دود ءُ ربیدگ گوں بلوچ ءَ جتا اَنت چون راج ءِ دمگ، میتگ، کوہ ءُ کوچگاں بلوچ راج ءِ تْرُندیں چیرجنگ ءَ داشت کنت وھدے کہ ھمے زورانسر بلوچ کوہ، دمگ ءُ میتگاں وت ناشناس اِنت؟ گِند ئے پہ وتی بْراتانی کُشائینگ ءَ ما بلوچ راج ءِ ھمے راجدْروہ وت پنجابی پوج ءِ رھشُونی ءَ کنان ءَ کوہ ءُ کوچگاں سر کنگ ءَ ایں، بلوچ میتگانی ماندارگ، راجی سرمچار ءُ رھشُونانی شھیدی، زالبولانی کم شرپی ءُ ورنایانی گار ءُ بیگواھی ءَ مئے راجدْروھانی دست مان چے ءَ کہ اے چکوال ءُ ساھیوال ءِ تینّو مینّواں مجال اِنت کہ سربازیں بلوچ سرمچارانی دیم ءَ اوشت اَنت اگاں روس، امریکہ ءُ نیٹو چیرجنگ ءِ ھرچگاں برداش کُت نہ کن اَنت گُڑا اے پنڈوکیں پنجابی چہ کُجا یک گْوریلہ جنگے برداش کنت۔

بژن اِنت کہ ما بلوچ ناتپاک ایں، وتگڑیں دمگی میر ءُ سردار پنجابی ءِ ٹوھیں آسراتی اَنت۔ البت ما وتی راج ءِ مستریں دُژمن جنرل مُشْرَپ ءِ منّتوار ایں کہ ھمے جھندمی ءِ زُلم ءُ ناھودگیں کَشت ءُ کوش ءِ آسر ءَ راجی جنگ بلوچ وانِندھانی دست ءَ شُت چریشی ءَ راجی آشوب چہ کوھلو ءُ ڈیرہ بُگٹی ءَ درکپتگ ءُ سرجمیں بلوچستان ءِ ھمُک کُنڈ ءَ سر بیتگ۔ مرچاں ڈیرہ گازی ھان، جیکب آباد ءَ بہ گِر تاں نمروز، زاھدان ءُ بندرآباس ءَ بلوچ راج آجوئی لوٹ ایت۔ کسے منّ ایت یا مہ منّ ایت بلے راستی وَ ایش اِنت کہ اے بلوچ راجی آجوئی جنگ ءِ آسر اِنت کہ مرچاں پاکستان یک ایکونومک اندوھے ءِ آماچ اِنت۔

نی باید انت بلوچ راجی لشکر ھمے داب ءَ مُدام راج ءِ لس وانِندگیں ورنایاں وتی سِلاھبندیں گلاں ھوار کنائینگ ءِ جُھد ءَ بہ کن اَنت کہ دمگی میر ءُ سرداراں ھوار راجدْروھاں پْروش دیگ بِہ بیت وھدے کہ ھمے دمگی میر ءُ سرداراں پْروش بیتگ گُڑا دُژمن ءَ ھم الم پْروش بیت، راج وتی ڈیھ ءِ وتواجہ بیت ءُ آزات ءُ راجمستریں آجوئی بلوچستان ھم دیمروی کنت۔

بلوچ شالا یکمُشت ءُ وت ماں وت ھمکوپگ بات، بلوچستان شالا آجوئی بہ بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پاکستانی پوج ءِ جارکش (آئی ایس پی آر) ءِ رد ءَ پھازگی لشکریانی نیمگ ءَ لکی مروت ءَ چیریں اھوالانی سر ءَ بیڑ بُرتگ ءُ ناشرکارانی تچگ ءِ کوشست بے سوب کُتگ۔

آئی ایس پی آر ءِ گُشت اِنت کہ پھازگی لشکریاں دو نیمگی تیرگواری  ءِ نیام ءَ 12 ناشرکار کُشتگ اَنت، پھازگی لشکریاں بیڑ 7 ءُ 8 فروری ءِ نیامی شپ ءَ بُرتگ، شوربندی ءَ گوں ناشرکاراں تچگ ءِ ھاتر ءَ یک گاڑی یے دیگ بیتگ۔ 

پاکستانی پوج ءِ جارکش ءَ گُشتگ کہ بیڑءِ نیام ءَ ناشرکارانی گورءَ سلاہ، گولہ تراکناکیں شورہ ءُ اوگانستان ءِ زر ھم دزکپتگ اَنت، پھازگی لشکریانی نیمگ دمگ ءِ پھک کنگ ءِ ھاترءَ انگت بیڑ برجاہ اِنت۔

آئی ایس پی آر ءَ گُشتگ کہ ناشرکارانی گوستگیں یک ھپتگے ءَ داں چاریگی کنگ بیتگ، ھندی مردماں ناشرکارانی بگیر ءَ پوج ءِ کوشست ساڑاتگ اَنت۔

بلوچستان ءِ دمگ مستونگ ءَ چہ ڈھاڈر ءِ جھمنندیں دو مردم زورانسری آوار جنگ ءَ پد بیگواہ کنگ بیتگ اَنت-

ھالانی رِد ءَ ھمے سال ءِ یک فروری ءَ پاکستانی پوج ءَ دو مردم رؤف ء عبداللہ ءُ امیر ء محمد امین جھمنند ڈھاڈر یک ھوٹلے ءَ چہ آوار جتگ ءُ ناشناسیں جاھے ءَ برتگ اَنت، چریشی ءَ پد اشانی درگت ءَ ھچ وڑیں ھال دز نہ کپتگ-

کھول ءَ گوشتگ کہ آ کجام جرم ءَ چہ بیگواہ کتگ اَنت مارا بگش اَنت ءُ آیاں آمیدگس ءَ بیار اَنت-

زانگ بہ بیت چہ مستونگ ءَ گوستگیں ھپتگ ءَ دگہ یک ورنایے نصیب اللہ شاھوانی ھم بیگواہ کنگ بیتگ-

انسانی ھکانی گل ءُ بلوچ راجدوست پارٹی بلوچستان ءَ سیاسی باسکانی زورانسری آوار جنی ءُ تیرسُپتگیں لاشانی زمہ وار پاکستانی پوج ءَ گُشگ ءَ اَنت-

وھدے کہ چہ شال ءَ آواز جتگیں محمد رحیم زھری ءُ آئی ءِ لوگ بانُک رشیدہ انگت بیگواہ اَنت-