TBP Balochi

ایران ءِ اُستان سمنان ءَ ایرانی آمیدگس ءَ یک بندیگیں بلوچے پاھو داتگ –

گیشین ھالانی رد ءَ ایران زرباری اُستاناں ھواریں اُستان سمنان ءِ زندان ءَ بندیگیں یک بلوچے پاھو دیگ بیتگ-

پاھو دیگ بیتگیں مردم ءِ پجار نجم الدین ے مھمد علم جھمنند دامغان ءِ نام ءَ زانگ بیتگ-

اھوالانی تہ ءَ گوشگ بیتگ کہ نجم ایرانی سال سیزدہ سد ءُ نود ءُ نُھ ءَ ماں سمنان ءَ نشہ ءِ باپاری ءُ دزگیر کنگ بیتگ-

اھوالانی رد ءَ آئی ءِ سر ءَ پاھو اتکگ بیتگ ءُ چریشی ءَ چہ آ گوستگیں روچ ءَ پاھو دیگ بیتگ، ءُ آئی ءِ کھول ءَ گوستگیں روچ ءَ پاھو دیگ ءَ پیسر گڈی گند ءُ گدار کتگ بیتگ ءُ پاھو دیگ ءَ پد لاش کھول ءِ ھوالگ ءَ کنگ بیتگ-

روکپتی بلوچستان ءَ بندوکیں مردمانی پاھو دیگ ءِ درچ یکشل ءَ برجاہ اَنت کہ گوستگیں لھتے روچانی توک ءَ بازیں کساسے ءَ مردم پاھو دیگ بیتگ اَنت-

ھمے وڑ ءَ ٹوئٹر ءَ درشان دیان ءَ مولانا عبدالحمید بلوچ اسماعیلزئی ءَ گوشتگ کہ پاھو دیگ مردمانی جیڑہ ءِ ھل نہ اِنت اے دابیں گامگیج گیش ناوشی کار اَنت ءُ جیڑہ گیش بوت کن اَنت –

روکپتی بلوچستان ءَ ایرانی لشکر ءَ یک تیل کشیں گاڑی ءِ سر ءَ تیرگواری کتگ ءُ یک تیل کشے کُشتگ ءُ ھمے وڑ دگ ءِ وئیل ءَ سَے کس بیران بیتگ اَنت-

گیشیں ھالانی رد ءَ گناباد ءَ ایرانی لشکر ءِ تیرگواری ءَ یک مردمے بیران بیتگ –

بیران بیتگیں مردم ءِ پجار مھم کرمانی جمالزئی ء عبدالصمد جھمنند چالزرد سرخس ءِ نام ءَ زانگ بیتگ-

اھولانی رد ءَ ایرانی لشکر ءَ ابید ءِ دارگ ءُ دست دیگ ءَ تچک ءَ گاڑی ءِ سر ءَ تیرگواری کتگ ءُ چریشی ءَ گاڑی ءِ ڈرائیور بیران بیتگ-

ھمے وڑ ءَ راسک ءَ دو گاڑیانی ٹکر ورگ ءَ سَے مردم بیران بیتگ اَنت-

اھوالانی رد ءَ وئیل راسک ءِ ھند نوزدہ راھی ءَ پیش اتکگ کہ اود ءَ دو گاڑیاں ٹکر وارتگ ءُ چریشی ءَ چہ سَے کس سوتکگ ءُ بیران بیتگ اَنت –

بیران بیتگیں مردمانی پجار داں انگت ءَ دیم ءَ نیتکگ اَنت، ھالانی تہ ءَ گوشگ بیتگ کہ گاڑیاں تیل مان بیتگ ءُ چریشی ءَ آس ءَ گیش وتی لپیٹ ءَ زرتگ اَنت –

گوستگیں سروزیر پاکستان عمران خان رینجرز ءُ نیب ءَ القادر ٹرسٹ ءِ کیس ءَ دزگیر کتگ-

عمراب خان بائیو میٹرک کنگ ءِ واستا ھنچش ھائی کورٹ ءِ ھواریں کارگس ءَ روگ ءَ دلمانگ بیتگ کہ آ رینجرز ءَ دزگیر کتگ ءُ برتگ-

عمران خان ءِ دزگیری ءِ وھد ءَ اود ءَ جاڑیگیں پولیس ءَ ھم پی ٹی آئی ءِ وکلاء ءِ میان ءَ دست جنگی بیتگ اَنت-

آئی جی اسلام آباد ءَ گوشتگ کہ عمران خان القادر ٹرسٹ کیس ءَ دزگیر کتگ-

زانگ بہ بیت گوستگیں لھتے روچاں پاکستانی پوج ءُ عمران ءِ میان ءَ ترندکشیں درشانی کنگ ءَ بیتگ اَنت-

گوستگیں سال ءَ وزیر آباد ءَ پی ٹی آئی ءِ سروک ءِ سر ءَ ناگتی اُرش بیتگ ات ءُ چریشی ءَ پد عمران ءَ پاکستانی سروزیر شھباز شریف، وزیر داکلہ رانا سناء اللہ ءُ یک کلانیں انٹیلی جنسے آپیسر ءِ ئے سر ءَ کوش ءِ بھتام جتگ ات-

چریشی ءِ پسو ءَ گوستگیں روچ ءَ پاکستانی سروزیر شھباز شریف ءَ گوشتگ ات کہ عمران نیازی ءِ کسانوکیں سیاسی نپے ءِ ھاتر ءَ پاکستان ءِ پوج ءُ انٹیلی جنس ایجنسی ءَ بنام کنگ اِنت ءُ اے بیھار ایرجنی اَنت جنرل پیسل نسیر ءُ مئے انٹیلی جنس ایجنسی ءِ ھلاپ ءَ ابید ءِ سبوت ءَ بھتام جنگ ءِ اجازت نہ دے ءُ ناکہ اے دابیں گپانی اوپار کنگ بیت اِنت-

پاکستانی پوج ءِ جارکش ءَ گوشتگ کہ گوشتگ گوستگیں یک سالے ءُ چہ اے گپ اڑینگ ءَ اِنت کہ پوج ءُ چیریں ادارہ سیاسی لوٹانی ھاتر ءَ وسرا کامرد بوگ ءُ آیانی ھلاپ ءَ پندل سازگ ءَ اَنت-

جارکش ءَ گوشتگ ات کہ عمران خان ءَ ابید منانک ءَ یک جاڑیگیں پوجی آپیسرے ءِ سر ءَ بھتام جتگ ءُ اے دابیں گیر زمہ داریں بیان ءُ بے بن اَنت-

آئی ءَ گوشتگ کہ ما اے درگت ءَ سیاسی رھشوناں لوٹ کن ایں آ کانونی ترز ءَ کارمرد بہ کن اَنت دروکیں بھتام جنی ءَ یل بہ کن اَنت-

جارکش ءَ گوشتگ ات کہ اے دابیں آڑینوک ءُ بدنیتی ءِ چکاریں بھتام باز پدردی اَنت اے ایرجنی اَنت جارکش ءَ گوشتگ کہ ادار تچک کنت دروک ءُ ردیں درشان ءُ پندل سازوکانی ھلاپ ءَ کانونی کاروائی کنگ ءِ ھک ءَ دار ایت-

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں شنگ کتگیں درشان ءِ توک ءَ گوشتگ کہ بی ایل ایف ءِ سرمچاراں گوستگیں روچ ءَ آواران ءِ دمگ جھاؤ ءَ ملائی گزی ءِ ھند ءَ ھستیں پاکستانی پوج ءِ چوکی ءِ سر ءَ اسنائپر ءُ وتکاریں سلاھانی گون ءَ اُرش کتگ-

آئی ءَ گوشتگ اُرش ءِ آسر ءَ دشمنیں پوج ءَ جانی ءُ مالی تاوانانی دیمپانی کنگ کپتگ-

جارکش ءَ گوشتگ کہ بی ایل ایف اے اُرش ءِ زمہ واری ءَ من ایت ءُ بلوچستان ءِ آجوئی ءَ داں اے دابیں اُرش برجاہ بنت-