TBP Balochi

روکپتی بلوچستان ءِ بنجاھی شھر زاھدان ءَ گاڑی ءِ چپ بوگ ءَ دو کس زدگ ءُ بیران بیتگ اَنت-

وئیل زاھدان ءِ ھند ساپیا ءَ پیش اتکگ کہ اود ءَ یک گاڑی یے چپ بوگ ءَ دو کس زدگ ءُ بیران بیتگ اَنت-

بیران بیتگیں مردم ءِ پجار بیست ءُ پنچ سالیگیں دلاور درکزئی ء اشرف جھنند شورک سرجنگل زاھدان ءِ نام ءَ زانگ بیتگ – ءُ زدگ بیتگین ءِ پجار زکریا درکزئی ءِ نام ءَ زانگ بیتگ کہ اے وھد ءَ زاھدان ءِ بیمارستان ءَ تھتیگ اِنت-

روکپتی بلوچستان ءَ تیل کشانی بیرانی زدگ بوگ اے لس وئیلے جوڑ بیتگ کہ اود ءَ ھمک روچ مردم پہ چُنڈے نانے ءَ جگر کُشیں کار ءِ دیمپان اَنت-

سیاسی کواسانی گوشگ اِنت پاکستان ءَ بیوکیں ناوشیں جاورھالانی پھناتاں میانی اُستمانی پنڈ دیوک ( آئی ایم ایف) ءِ گون ءَ بیوکیں مسام اسرمند بیت کُت کنت-

برتانیہ ءِ ھال سرکنوکین روئٹرز ءَ کواسانی درور دیان ءَ گوشتگ کہ گوستگیں وئیلاں اے اُمیتانی توک ءَ کمی گندگ ءَ اتکگ کہ ھما پاکستان ءَ آئی ایم ایف ءِ گون ءَ بندوکی بیتگ- اژدری درکاری ءَ اے وھد ءَ آئی ایم ایف ءِ نیاد ءِ زرکاری زوت ءَ ٹریک ءَ کیت اِنت-

گوستگین سروزیر عمران ءِ دزگیری ءَ پد پولیس ءُ پی ٹی آئی ءِ باسکانی میان ءَ بازیں شھراں جنگ ءُ چوپانی درچ یکشل ءَ برجاہ اَنت-

کساس بیست ءُ سَے کروڑ ءِ آبادی داروکیں ڈیھ سیاسی جاورھالانی ناوشیاں یک ھنچیں وھدے ءَ مان پتاتگ کہ اے موسم ءُ تروکیں گچینکاری ءِ چن ءُ لانچ ءُ بوگ ءَ اِنت ءُ دومی بدتردیں بے زری ءِ دیمپان اِنت-

ھمے داب ءَ شش ارب ڈالر ءِ نیاد ھم جون ءَ ھلاس بوگی اِنت دگہ زرکاری پھناتاں ھم کمی گندگ ءَ آیگ ءَ اِنت –

کلانیں زرکار گءرتھ لیدر ءِ گوشگ اِنت دگانی سر ءُ زھرشانی کنوکانی جاڑیگ بوگ ءَ پد آئی ایم ایف ءِ وام ءِ زیرگ ءَ گیش چمداری کنگ کپ ایت-

ڈیھ ءَ زرکاری ھما وھدی تباھی ءِ دیمپان بیتگ کہ گوستگیں سال ءَ عمران ءِ سرکار پروشگ بیتگ-

گوستگیں دوازدہ ماھانی توک ءَ پاکستان ءِ زَر ءَ کساس پنجاہ درسد کمی اتکگ ءُ اے وھدانی توک ءَ کراچی ءِ سٹاک ایکسچینج ( کے ایس ای) ءِ کساسانی توک ءَ دو ٹک کمی گندگ ءَ اتکگ –

چارشمبے ءِ روچ ءَ زر ءِ نھاد ءَ دگہ کساس دو درسد کمی ءُ ڈیھ ءَ ڈالر ءِ نھاد دوسد ءُ نود ءَ سر بیتگ-

کیتھی ھیپورتھ ءِ رد ءَ پاکستان ءُ اود ءَ ھستیں زرکارانی واستا سیاسی چست ءُ ایر نوکیں گپے نہ اِنت بلے آئی ایم ایف ءِ درگت ءَ کمو اجکہ کنگی کتگ ءُ اے جیڑہ ءِ دیری ءُ ایشی ءَ کمو مردم بَھ بکڑ کتگ –

وھدی ترندی ءَ روان اِنت آئی ایم ایف ءِ مشن پاکستان ءِ تر ءُ تاب ءَ کساس سد روچ گوستگ- ایشانی میان ءَ داں انگت ءَ بنداتی مسام ھم نہ بیتگ کہ دانکہ دیم ءِ کِست ءِ مھکم کنگ ءَ جوانیں گامگیج زورگی کپ ایت-

اے سال دوھزار ءُ ھشت ءَ پد اے دراج تریں دگری اِنت – جی پی مورگن ءَ سیادی داروکیں کواس مائیلو گناسنگھے ءِ گوشگ اِنت کہ پاکستان ءَ پوڑی دیگ ءِ گمان سک کم اِنت-

نوکتریں ھاورھالانی سر ءَ گمانی ھردوکیں نیمگاں سیاسی گامگیج ءِ گمانی کم اِنت-

بلوچستان ءِ تیابدپی شھر گوادر ءَ اھوال اَنت کہ گوستگیں روچ ءَ ناشناسیں مردماں چہ گوادر ءَ دیم پہ کراچی ءَ روکیں گیس بروکیں ٹینکر بمب ءِ نشانگ کنگ بیتگ-

ٹینکر تیابدبی ھند ماکولا ءَ نشانگ کنگ بیتگ ءُ ٹینکر ءَ ھوار یک پُھلے ءَ ھم تاوانباری ءِ دیمپانی کنگ کپتگے

سرکاری پھناتاں تنی وھدی اے درگت ءَ دگہ گپ دیم ءَ نیتکگ اَنت ءُ نانکہ اُرش ءِ زمہ واری دگہ گلے ءَ پہ وت ءَ زرتگ-

بلوچستان لبریشن فرنٹ ءِ جارکش میجر گوھرام بلوچ ءَ درشانے شنگ کنان ءَ گُشتگ کہ مئے سرمچاراں گوستگیں روچ ءَ بزاں دہ مئی ءَ ادار پنچ ءُ نیم ءَ کیچ دمگ ءِ ڈنڈار ھنکین ءِ ھند مادگ قلات ءَ پاکستانی پوج ءِ پانگس ءِ سرءَ اُرش کُتگ، چریشی ءَ دژمنیں پوج ءَ مزنیں تاوان ءِ دیمپانی کنگ کپتگ۔

آئی ءَ گُشتگ کہ سرمچاراں پیسرءَ بنجل ءِ سنگر ءَ اوشتوکیں پوجی کارندہ اسنائپر ءَ گوں نشانگ کُتگ ءُ کُشتگ۔اِشی ءَ پد پانگس ءِ سرءَ گوں راکٹ ءُ وتکاریں مزنیں سلاھاں نشانگ کُتگ۔

جارکش ءَ گُڈ سرءَ گُشتگ کہ بی ایل ایف اے اُرش ءِ ذمہ واری ءَ من ایت۔ اے اُرش بلوچستان ءِ آجوئی ءَ داں برجاہ مان اَنت۔

پاکستان ءِ گوستگیں سروزیر عمران ءِ دزگیری ءَ پد پاکستان ءَ بیوکیں زھرشانی دو روچاں داں برجاہ بیتگ اَنت بازین مردمے بیران ءُ زدگ ءُ پی ٹی آئی ءِ سروک ءَ ھوار بازیں رھشون دزگیر، پواد چوھدری، شاہ مھمد قریشی ءُ دگہ دگہ رھشون دزگیر کنگ بیتگ اَنت-

تھریک انساپ ءِ رھشون پواد چوھدرء سپریم کورٹ ءِ نزیک ءُ گوستگین شپ ءَ دزگیر کنگ بیتگ،سرجمیں ڈیھ ءَ پاٹی ءِ چیئرمین ءُ گوستگیں سروزیر عمران خان راجی ھکانی ھسابگری ءِ دُزی ءِ یک بھتامے ءَ دزگیر کنگ ءِ ھلاپ ءَ سرجمیں ڈیھ ءَ زھرشانی برجاہ بیتگ اَنت-

گوستگیں وزیر اطلاعات پواد چوھدری یک ھنچیں وھدے ءَ دزگیر کنگ بیتگ کہ یک وکیلے ءِ دروشم ءَ سپریم کورٹ ءُ بیتگ ءُ ڈن ءَ درایگ ءَ بیتگ –

اھوالانی رد ءَ پواد چوھدری ءَ جست گرگ بیتگ ترا پرچا دزگیر کنگ ءَ اَنت آئی ءِ پسو ءَ گوشگ بیتگ من ءَ سرپدی نیست اِنت ءُ ارزی نامہ ھم نیست اِنت-

دزگیری ءِ وھد ءَ آئی ءَ اھوالکاراں گون کسانوکیں تران ءَ گوشتگ ات کہ بچار اِت کہ من سیاھیں کوٹ گور ءَ کرتگ ءُ شما بہ چار ات چی بوگ ءَ اِنت-

زانگ بہ بیت پاکستان ءَ اے وھد ءَ سیاسی جاور ناگیگی ءِ دیمپان اَنت ءُ بازیں جاھان پوج توار پر جنگ بیتگ ءُ بازیں جاھان پوجی کارمند دگانی سر ءَ اُُشتگ ءَ گندگ آیگ ءَ اَنت-

دومی نیمگ ءَ پوج ءِ جارکش ءَ گوستگیں روچ ءَ وتی درشان ءَ گوشتگ کہ تاوان دیوکانی ھلاپ ءَ ترندیں گامگیج زورگ بیت اِنت –

زانگ بہ بیت شنگ بیتگیں تامر بندانی توک ءَ گندگ بیت اِنت بازیں پوجی جاہ ءُ پولیس بنجلاں آس پر کپتگ ءُ اود ءَ جاہ ءُ پولیسانی گاڑی سوچگ ءَ ھم گند بوگ ءَ اَنت ءُ ایشانی ھواری ءَ پشاور ءَ ریڈیو پاکستان ءُ روالپنڈی ءَ پوجی کارمند ءِ گسانی سوچگ ءِ تامر ھم گندگ ءَ کاینت-

سرجمیں پاکستان ءَ ھوار بلوچستان ءِ مزن شھر شال ءُ دگہ شھرانی تہءَ پی ٹی آئی چیئرمین عمران خان ءِ دزگیری ءَ پد دومی روچ ءَ ھم موبائل انٹرنیٹ بندش ءِ آماچ اَنت وھدیکہ ٹوئٹر، فیس بک ءُ یوٹیوب ءَ جنجالانی دیمپانی اِنت۔

پی ٹی آئی چیئرمین ءِ دزگیری ءَ پد دومی روچ ءَ سرجمیں ڈیھہ ءَ موبائل دامگی بند اَنت وھدیکہ چاگردی رسانکدری تندجاہ فیس بک، ٹوئٹر ءُ یوٹیوب ءَ جنجالانی دیمپانی اِنت۔گوستگیں روچ ءَ چہ سرجمیں ڈیھہ ءَ موبائل دامگی ءُ چاگردی رسانکدر بند کنگ بیتگ اَنت۔

بلوچ لبریشن آرمی ءِ جارکش جیئند بلوچ ءَ رسانکدراں شنگ کُتگیں درشانے تہءَ گُشتگ کہ بی ایل اے ءِ سرمچاراں کیچ ءِ ھنکین تجابان، کرکی ءُ  کولواہ ءَ قوضہ گیریں پاکستانی پون سئے جتاھیں اُرشانی تہءَ نشانگ کُتگ، اُرشانی تہءَ سئے دژمنیں کارندہ کُشتگ اَنت ءُ ھپت ٹپی کُتگ اَنت وھدیکہ دژمن ءِ چریکیں ڈرون ھم جتگ دور داتگ۔

آئی ءَ گُشتگ کہ بی ایل اے ءِ سرمچاراں تجابان ءَ سی پیک راہ ءِ سرءَ قوضہ گیریں پاکستانی پوج ءِ بنجاھی بنجلءِ سلاہ بندیں اُرش ءَ نشانگ کتگ، سرمچاراں راکٹ ءُ دگہ وتکاریں سلاہ کارمرز کُتگ اَنت کہ اشی آسرءَ کم چہ کم دو دژمن کارندہ ھما دمان ءَ مُرتگ اَنت وھدیکہ دگہ سئے ٹپی بیتگ اَنت۔

آئی ءَ دیمترءَ گُشتگ کہ دومی نیمگءَ سرمچارانی دگہ یک ٹولی ءَ کرکی ءِ ھنکین ءَ پاکستانی پوج ءِ یک بنجل ءِ سرءَ اُرش کتگ،اُرش ءِ آسر ءَ یک دژمن کارندہءِ کُشگ بیتگ ءُ کم چہ کم دو ٹپی بیتگ اَنت۔

جارکش ءَ گُشتگ کہ بی ایل اے ءِ سرمچاراں دگہ یک اُرشے کولواہ ءِ ھنکین ءَ قوضہ گیریں پاکستانی پوج ءِ یک بنجل ءِ سرءَ گرنیڈ لانچر ءَ گوں دژمن ءِ سرءَ بازیں گولہ آس داتگ کہ اشی آسرءَ دو دژمن کارندہ ٹپی بیتگ اَنت۔

جارکش ءَ دیمترءَ گُشتگ کہ اُرش ءِ وھدءَ دژمن ءَ چریکی ڈرون کارمرز کُتگ کہ سرمچاراں نشانگ کُتگ ءُ دور داتگ۔

آئی ءَ گُشتگ کہ بلوچ لبریشن آرمی ھمے سئیں اُرشانی ذمہ واری ءَ من ایت ءُ اھدءَ نوک کنت کہ قوضہ گیریں پوج ءِ سرجمی ءَ درکپگ ءَ داں مئے اُرش ترندی ءَ گوں برجاہ مان اَنت۔

شال پریس کلب ءِ دیم ءَ زورانسری آوار جنیانی بگیری ءَ وی بی ایم پی ءِ زھرشانی برجاہ، زھرشانی بنجل ءَ پنج ھزار ءُ چِل روچ سرجم بوتگ انت –

مروچی چہ ھزدار ءَ سیاسی ءُ چاگردی باسک محمد کریم بلوچ، امام بخش بلوچ ءُ نور احمد بلوچ ءَ ھوار دگہ مردماں اتکگ ءُ بیگواھیں مردمانی کھولانی گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچستان ءَ اے وھدی سرجمی ءَ جنگی جاور انت، جون کپگ انت، بلوچ آوار جنگ بوگ ءَ انت، زاندانی تہ ءَ زالبولانی کم شرپی بوگ ءَ انت –

آئی ءَ گوشتگ کہ پاکستانی پوجی تاکت ءُ چیریں ادارہ بلوچانی کُشت ءُ کوش ءَ دلگوش انت، بلوچ ءِ ننگ ءُ ناموس ءِ لگتمالی بوگ ءَ انت –

ماما قدیر بلوچ ءَ گوشتگ کہ بلوچ ءِ ھاک ءُ بلوچ راج ءِ درد ءُ آھیں جاورھالاں سنگ دلیں مردمے بیت کنت وتی ارساں داشت بہ کنت، زوراکیانی اوپار کنگ بلوچانی لاچاری انت پرچا کہ ایردستیں راج بید اشی ءَ دگہ ھچ کت نہ کنت –

ماما ءِ گوشگ ات کہ پاکستانی پوج ءُ چیریں ادارھاں بلوچستان ءِ تہ ءَ بے کساس زوراکی ءُ زورانسری آوار جنیانی تہ ءَ گیشی آرتگ – اے زوراکیانی بگیری ءَ راج ءَ یکجاہ بوگ ءُ جھد کنگی انت –

ھبدہ فروری ءِ شپ ءَ شال ءِ ءَ چہ جند ءِ لوگ ءَ آوار جنگ ءَ پد سی ٹی ڈی ءِ گون ءَ دزگیری ءِ پدر کنگ بیتگیں ماھل بلوچ ءِ زمانت آمیدگس ءَ من اتگ-

ماھل بلوچ ءِ زورانسری آوار جنی ءُ دزگیری ءِ سر ءَ سرجمیں بلوچستان ءَ جتا جتائیں جاھاں زھرشانی ءُ نندانکاں ھوار سیاسی ءُ چاگردی پھناتاں پریس کانفرنس ءُ درشانانی توک ءَ آئی ءِ دزگیری ءُ جتگیں بھتام رد کتگ اَنت-

ماھل بلوچ ءِ زورانسری آوارجنی ءُ بندیگ کنگ ءِ پژدر ءَ جتا جتائیں تکاں بندوکیں مردماں وتی زھر درشان داتگ ءُ سرکار ءَ ھوار بلوچ پارلیمنٹ پاٹیاں ترندیں ایرادگریانی دیمپانی کنگ کپتگ-

سی ٹی ڈی ءَ ماھل بلوچ وتکُش تراک پدر کرتگ ءُ آئی ءِ دزگیری ءِ ٹاہ داتگ – ماھل بلوچ ءِ کھول ءَ نودربرانی ھمراھی ءَ شال ءُ ریڈ زون ءَ زھرشانی بنجل جتگ ءُ بھتام رد کتگ اَنت-

ماھل بلوچ ءِ دزگیری ءِ ھلاپ ءَ جتا جتائیں نودربر گل ءُ سیاسی گلاں بلوچستان ءَ ھوار پاکستان ءِ دگہ شھراں زھرشانی ھم کتگ –

زھرشانی کنوکاں لوٹ کتگ ات کہ بلوچستان ءَ جھلانکیں سزا ءِ ھواری ءَ زالبولانی نشانگ کنگ بند کنگ بہ بیت اِنت-