TBP Balochi

مروچی آدینگ ءِ روچ ءَ بلوچستان ءِ بنجاھی شھر شال ءَ پریس کلب ءں دیم ءَ وائس فار بلوچ مسنگ پرسنز ءِ سرکماش نصراللہ بلوچ ءَ زورانسری آوار جنگ بوتگیں بلوچ زالبول بی بی رشیدہ ءُ آئی ءِ لوگواجہ محمد رحیم ءِ کھول ءِ ھمراھی ءَ گوں اھوالکاراں تران کنان ءَ گوشتگ کہ مروچی مئے گور ءَ آوار جنی ءِ آماچ بوتگیں ھما کھول نشتگ آھانی گوشگ انت کہ سَے فروری ءَ شال ءِ دمگ گیشکوری ٹاؤن، بشیر چار راہ ءَ پوج ءَ شپ ءِ ادار یک ءَ گِس ءِ سر ءَ بیڑ برتگ بی بی رشیدہ ءُ آئی ءِ لوگواجہ محمد رحیم ءُ دو زھگ ھمراھے تِری ءَ آوار جتگ ءُ بیگواہ کتگ انت –

آھاں گوشتگ کہ بی بی رشیدہ ءِ تری ءُ زھگ پنچ فروری ءَ چہ کمبرانی دگ ءَ یل دیگ بوتگ انت بلے بی بی رشیدہ ءُ آئی ءِ لوگواجہ محمد رحیم ھنگت گار انت –

کھول ءِ گوشگ انت کہ آھاں بی بی رشیدہ ءُ آئی ءِ لوگواجہ ءِ درگت ءَ ھچ وڈیں سرپدی دیگ بوگ ءَ نہ انت – رشیدہ ءِ یک سالی ءُ چار سالی دو چک ھست، ھردو چُک بید مات ءَ نہ بنت گریوگ ءَ انت ، ورگ ھم ورگ ءَ نہ انت چریشی ءِ سوب ءَ کھول سک باز ماژگی ازیت ءِ آماچ انت –

نصراللہ بلوچ ءَ گوشتگ کہ وھدیکہ اے کھول ءَ اتکگ ءُ مئے گور ءَ بی بی رشیدہ ءُ آئی ءِ لوگواجہ رحیم ءِ زورانسری آوار جنی ءِ رپورٹ نبشتہ کنائینتگ ءُ چہ گل ءَ دزبندی کُتگ کہ گل بی بی رشیدہ ءُ آئی ءِ لوگواجہ ءِ یل کنائینگے ھاتر ءَ وتی کرد ءَ پیلو بہ کنت، گڈا ما زورانسری آوار جنگ بوتگیں رشیدہ ءُ آئی ءِ لوگواجہ ءِ سرجمیں ھال وزیر داخلہ میر ضیاء لانگو ءَ داتگ انت ءُ ما گوں کھول ءِ ھمراھی ءَ سریاب ءِ ایس پی، ڈی ایس پی ءُ ایس ایچ او ءَ ھم گند ءُ نند کتگ، ارزی ءِ نبشتہ کنائینتگ آھاں زورانسری آوارجنی ءِ آماچیں کھول درشان ھم نبشتہ کتگ انت کہ آ رشیدہ ءُ آئی ءِ لوگواجہ ءِ یل کنگ ءَ وتی کرد ءَ پیلو کن انت – بلے تنی وھدی رشیدہ ءُ آئی ءِ لوگواجہ ءِ درگت ءَ ھچ وڈیں سرپدی دیگ بوگ ءَ نہ انت –

آئی ءَ گوشتگ کہ بلوچستان پیش ءَ زلم زوراکی، درکانودی گامگیج، انسانی ھکانی لگتمالی ءِ آماچ انت ءُ بلوچ زالبولانی زورانسری آوار جنی ءَ بلوچستان ءِ مردمانی دل ءِ تہ ءَ زھری گیش ودّیت، ھمے ھاتر ءَ سرکار، ملکی ادارہ ءُ سروک ءُ آمیدگس دلگوشی بدئینت بی بی رشیدہ ءُ آئی ءِ لوگواجہ رحیم بلوچ ءِ زورانسری آوار جنی ءِ بگیری ءَ گامگیج بہ زور انت ءُ بی بی رشیدہ ءُ آئی ءِ لوگواجہ ءِ یل کنگ ءَ وتی کرد ءَ پیلو بہ کن انت ءُ کھول ءُ ھاسکر رشیدہ ءِ زھگاں چہ اے ماژگی زوراکی ءَ بہ رکین انت –

آئی ءَ گوشتگ کہ ما لوٹ کنیں اگاں بلوچ زالبول ءُ آئی ءِ لوگواجہ ءِ سر ءَ الزام ءِ ھست گڈا زاھر کنگ بنت ءُ آمیدگس ءَ آرگ بہ بنت تانکہ درسیں کانودی کار سرجم کنگ بہ بنت –

آئی ءَ گوشتگ کہ بی بی رشیدہ ءُ آئی ءِ لوگواجہ یل نہ کنگے بگیری ءَ وائس فار بلوچ مسنگ پرسنز آمیدگس ءِ نیمگ ءَ رؤت ءُ سیاسی پاٹی ءُ نودربر گلانی ھمراھی ءَ ترندیں زھرشانی کنت –

بلوچ اسٹوڈنٹس ایکشن کمیٹی ءِ بنجاھی جارکش ءَ وتی شنگ کرتگیں درشان ءِ تہ ءَ گوشتگ کہ ماتی زبانانی میان استمانی روچ ءَ “زبان راجی پجار اِنت”ءِ نام ءَ تیوگیں ھنکیناں مراگش اڈ دیگ بیت اِنت –

جارکش ءَ گوشتگ کہ بیست ءُ یک فروری ءَ ماتی زبانانی میان استمانی روچ ءِ درگت ءَ بلوچستان ءِ جتائیں جتائیں دمگاں مراگشانی اڈ دیگ ءِ جہد کنگ بیت انت –

بنجاھی جارکش ءَ گوشتگ کہ بلوچ اسٹوڈنٹس ایکشن کمیٹی یک نودربر گلے ءِ بستارءَ مدام بلوچ ءِ ماتی زبانانی پھازگ ءُ رکینگ ءِ جھد ءَ کنگ ءَ اِنت ءُ ھمے درگت گل جتائیں سیاسی ءُ لبزانکی تاک کشگ ءَ اِنت- گل ءِ آفیشل زبان بلوچی ءُ براھوئی کنگ بوتگ اَنت ، پمیشکہ لبزانک، مراگش ، ھنکینی ءُ بنزھی دیواناں ھوار کسانیں ءُ مزنیں مراگش کُل ماتی زباناں کنگ بنت- گل ءِ ھنکین بلوچی ءُ براھوئی کلاس اڈ دیگ ءِ جھد کنگ ءَ اَنت ءُ گل ءِ کوشست اِنت کہ بلوچ مھلوک چہ درآمدی ءُ ڈنی زبانانی وامداری ءَ در بئیت ءُ وتی زباناں وت ماں وتی میان ءِ زبان جوڑ بکن اَنت-

آئی ءَ گوشتگ کہ درآمدانی زبان بلوچ راج ءِ پجار گار کن انت ءُ بلوچ ءِ دودماناں ھوار بلوچ ءِ تب ھم بدل بیت- بلوچ راجی پجار ءِ ھاتر ءَ ماتی زبانانی کرد پہ بلوچ ءَ استی ءُ نیستی ءِ ڈول ءَ اَنت، پمیشکہ اے جاورھالانی تہ ءَ وھدیکہ بلوچ ءِ زبانانی گار کنگ ءِ ھاتر ءَ پندل سازگ بوگ ءَ اَنت ءُ بلوچ راج ءِ بھر ءُ بانگ کنگ ءِ ھاتر ءَ زبانانی تضادے پیداک کنگ بوگ ءَ اِنت گُڑا بلوچ ورنا ءُ لس مھلوک ءِ کوپگ ءَ مزنیں ڈبہ وتی ماتی زبانانی پھازگ ءُ دیمروی اِنت- گوشگ بیت کہ زبان پاھازیں راج زندگیں راج زانگ بنت۔

بساک ءِ بنجاھی جارکش ءَ وتی درشان ءِ گڈسر ءَ گشتگ گوستگیں سالءِ پیم ھمے سال ماتی زبانانی میان استمانی روچ ءَ تیوگیں ھنکین مراگش اڈ دینت ءُ بلوچستان ءِ جتائیں دمگاں کسانیں ءُ مزنیں مراگش اڈ دیگ ءِ جھد کنگ بیت انت –

زندگی ءِ ابیریں همراه

نبشتہ کار: سیپ بلوچ

دی بلوچستان پوسٹ

تھاری ءَ مانشانتگ اَت، من مرمرانکیں چراگے روک کتگ اَت ءُ لوگانی پُشتی کُڈک ءَ تِکّہ اِت ءُ گوں گْوانکو ءَ دلگْوش اِت آں کہ پرپٹے ءِ توار بوت ، یکبرے من سک اَجکہ بیت آں کہ چوناها مئے میتگاں شپ ءِ تهاری ءَ پیسر پرپٹ سرکار ءَ بند کتگ اَت پمیشکا من هیران بیت آں باریں کے بیت ءُ چونینے بیت؟ منی گْوهارک نشتگ اَت اَچ منی پاد آیگ ءَ پیسر در اتک ءُ چار اِت ئِے۔

گْوهار ءَ ڈن ءَ سر کش اِت ءُ پد ءَ پسہ دات کہ نشهی یے، زاناں نشہ ئِے نیست۔ سر ئِے کش اتگ ءُ اتکگ۔ پد ءَ من جست کت تسلیمہ کے اِنت؟ گُڑا گْوشت ئِے ناکو اِنت۔

من جیڑگ ءَ لگ اِت آں کہ ناکو اوں نشھی یے بوتگ! من پاد اتک ءُ ڈن ءَ در اتک آں۔ ھو مرد وَ ناکو اِنت بلے کجام هالت ءَ اِنت ءُ وھدے کہ ناکو ءَ من ءَ دیست گُڑا من ءَ امبازاں زرت ئِے۔ ناکو سک بوه کنگ ءَ ات، مید ءِ یلو اِت اَنت ریش ءُ بروت چو گنوک ءَ اَت۔

گُڑا من دست گپت ءُ گِس ءَ بُرت نیادینت۔ من تسلیمہ ءَ را گْوشت برو چاه ءُ آپ بیار کہ ناکو سک دیر اِنت نہ دیستگ، مرچی دیوانے گران ئِے۔ ناکو ءَ پسہ دات من نندگی نہ آں، لالا من همے تئی بالاد دیست نوں من تئی دیم ءَ شرمندگی ءَ گوں نشت نہ کن آں بوت کنت تو گْوستگ بہ جیڑے بلے هچ جست نہ کن ئے من ءَ بس یک کارے بکن من ءَ زور بر نشه جاہ ءِ نیمگ ءَ منی جان من ءَ ورگ ءَ اِنت۔

منی چمانی ارس در اتک اَنت داں تسلمیہ آپ ءُ چاه دات ءُ من ناکو ءِ چارگ ءُ جیڑگ ءَ لگ اِت آں ، یار اے سنگت کہ ناکو ءِ نام دیگ بوت اهد ءِ روژنائیں بالادے اَت، هلکانی چراگانی بَتّی ءِ وٹ دائم ناکو ءِ کیسگ ءَ اَت گشت داں کوهنیں یاتے آتک کہ بی ایس او آزاد ءِ دوران ءَ کمبر چاکر ءِ همراهی ءَ برز بارگیں همبلے بلوچستان ءِ کُنڈ کنڈ ءَ ویل اَت ءُ زندگی ءُ راجمان ءِ تاک ءِ بهر کت۔ بلوچ ءِ هما امیت ءِ کندیل اَت کہ شهمگ ءَ ات، هلک ءُ میتگانی تہ ءَ همے کہ تلو ءَ اتک ءُ گپ ءِ کت مردم زگریں دانکانی شیدا اِت انت۔

دانکہ ناکو ءَ منی پاد ءَ دست ایر کت، سگریٹ ئِے گون ۔ من گْوشت “هو ناکو جان سگریٹ ءِ ٹالے ترا دیاں، کربان آں بلے هالاں کن تو اے هالت ءَ یار سک درد بوْگ ءَ اِنت؟”-

گوں دردیگیں دلے ءَ دْرائینت ئِے ءُ ارس ءِ شلیپ وران بیت اَنت “من چار سال زندان ءَ زهر ماریچگ بوتگ آں وهدے من نشہ ءِ درپ ءَ تنیگ بیت آں گڑا سما کت من شال ءِ پشتی نیمگ ءِ کورے ءِ تہ ءَ بے سمائی وتی جان ءِ پوست ءَ لگوشگ ءَ اِت آں داں شش ماه ءَ رند سر میتگ ءَ کپت ءُ اے زهر منی جان ءَ پیل اِت ءُ من کرسٹل ءِ همراهی ءَ بہ گیر سما ءَ نیا آں”-

دیم گْوشان بوت “لالا گپے زان ئے یار مرچاں منی گس ویران اِنت مدتے بیت کمبر ءَ پہ زهیر کنت ءُ شئے ءُ باهڑ ءَ مرچاں کس منی شیر چاهانی ورگ ءَ نئیت برے برے بیگهانی وهد بیت من چیر چیروکائی تهاروکی ءَ نِند آں بلکیں ملنگ جان پہ سر کپتی کیت بلے سما کن آں هلک ءِ زهک ڈوک جنان ءُ منی سر ءَ پروش اَنت کہ من نشھی یے آں ءُ هلک ءِ توشگاں دز آں، من لالا نشهی یے آں، بس منی زندگی ءِ ابیریں پند آسری ءَ اَت کہ من نشه ءِ آس ءَ دور دیگ بوت آں ناں جند ءِ سما ناں کہ ڈیھ ءِ ءُ ناں نوری ءِ بس نشہ ءِ مهری ءَ سوار آن ءُ سهڑگ ءَ آں”-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

مروچی آدینگ ءِ روچ ءَ سندھ ءِ مزن شھر کراچی پریس کلب ءَ بیگواھیں عبدالحمید زھری ءِ لوگبانک ءُ عبدالحفیظ زھری ءِ گھار فاطمہ بلوچ ءَ وائس فار بلوچ مسنگ پرسنز ءِ رھشون ماما قدیر بلوچ، سمی دین بلوچ ءُ بلوچ یکجھتی کمیٹی ءِ وھاب بلوچ ءِ ھمراھی ءَ گوں اھوالکاراں تران کنان ءَ گوشتگ کہ منی برات عبدالحفیظ زھری کہ گوستگیں سالے بیست ءُ ھپت جنوری ءَ چہ متحدہ عرب امارات ءَ زورانسری آوار جنگ ءُ بیگواہ کنگ بوتگ کہ پدا رند ءَ آ کراچی ءَ زاھر کنگ بوتگ ءُ آئی ءِ سر ءَ وتگڑیں الزام جنگ ءُ بندیگ کنگ بوتگ، کہ ھما انت آئی ءِ سر ءَ جنگ بوتگیں دروگیں کیسانی پیشی ءَ جنگ ءَ بوتگ –

آھانی گوشگ ات کہ سَے فروری ءَ وھدیکہ آمیدگس ءَ آئی ءِ یل دیگ ءِ جار جتگ گڑا ما آئی ءِ دست گرگ ءَ کراچی سنٹرل جیل ءَ شُتگیں ءُ ھمودا جیل ءِ درآیگ ءَ ھوار مئے سر ءَ ویگو سواریں چیریں ادارھانی سلاہ بندیں کارمنداں اُرش کُتگ –

فاطمہ بلوچ ءَ گوشتگ کہ آ روچ ءَ سلاہ بندیں مردماں دوبر منی برات حفیظ زھری ءِ آوار جنگ یا آوار جنگ ءِ بے سوبی ءَ آئی کُشگ ءَ اُرشے کتگ ، اے اُرش ءَ منی برات عبدالحفیظ ءَ ھوار منی گِس ءِ مردم باز زدگ بوتگ انت، اے وئیل ءِ دُرسیں منانک ریکارڈ ءَ ایراَنت ءُ رسانکدر ءَ ھم شنگ بیتگ اَنت کہ گندگ بیت اِنت کراچی ءِ وڑیں جاگھے ءَ منی برات ءِ سر ءَ چوں اُرش کنگ بوتگ-

آئی ءَ گوشتگ کہ مئے مرچیگیں پریس کانپرنس ءِ سَے لوٹ اَنت کہ ما چہ بُنجاھی واکدار ءُ سندھ سرکار ءَ لوٹ کن ایں کہ عبدالحفیظ زھری پُرایمنیں شھری ءُ چہ آمیدگس ءَ یل کنگ بوتگیں مردمے ءِ بستار ءَ پھریزگ بہ بیت ءُ مارا باور کنائینگ بہ بیت کہ آئی ءِ سر ءَ چوشیں اُرش نہ بیت – اے وئیل ءَ ھواریں دُرسیں کارِست کانود ءِ رد ءَ دیم ءَ آرگ ءُ سزا دیگ بہ بنت، چہ سی ٹی ڈی ءَ جُست کنگ بہ بیت کہ اے وئیل ءَ پیش مُدام یکشل ءَ مارا دلسیاہ کنگ ءَ اِنت، انچوش کہ مئے گِس ءِ سر ءَ بیڑ برگ بوتگ ءُ منی لوگواجہ عبدالحمید زھری درکانودی آوار جنگ ءُ بیگواہ کنگ بوتگ –

آئی ءَ اے ھم لوٹ کتگ کہ منی لوگواجہ ءُ گِس ءِ یکیں کمائینوک عبدالحمید زھری زوتاں زوت دیما آرگ بہ بیت ءُ آ یل کنگ بہ بیت –

چہ کراچی ءَ نزیکیں بلوچستان ءِ باپاری شھر ھب ءَ ھستیں پنجاہ نپادانی سرکاری ٹیچنگ نادراھجاہ جام گلام قادر سیول دری چیزانی زورگ ءَ لاچار، درماناں ھوار سرجری ءِ ھاتر ءَ کارمرز بؤوکیں ساز ءُ سامان ھلاس بوتگ انت –

ھب ءُ کش ءُ گوری دمگانی گریب ءُ بزگریں مردم پہ وتی الاج ءِ ھاتر ءَ جام غلام قادر سرکاری ٹیچنگ نادراھجاہ ءَ کائنت نوں آ بازیں دلسیاھیانی دیمپان انت – ڈاکٹرانی آپریشن ءِ ھاتر ءَ کارمرز بوکیں گُداں ھوار درمان ءُ سرنجاں ھم چہ پرائیوٹ میڈیکل اسٹوراں بھا زورگ ءَ لاچار انت –

مردمانی گوشگ انت نادراھجاہ ءَ مردمانی آپریشن وا کنگ بیت بلے پہ آپریشن ءَ کارمرز بوکیں ساز ءُ سامانانی زورگے گنجائش نیست بلے وتی دوستیگیں مردمانی الاج کنگے ھاتر ءَ لاچار انت کہ بھا بہ زوریں –

اے درگت ءَ نادراھجاہ ءَ پہ الاج ءَ شُتگیں مردمانی گوشگ انت کہ جام غلام قادر سرکاری ٹیچنگ نادراھجاہ ھب دری چیزانی زورگ ءَ لاچار انت – نادراھجاہ ءَ ناکہ درمان ھست ءُ ناکہ آپریشن ءِ ھاتر ءَ کارمرز بؤوکیں کسان کسانیں ازباب ھست انت ـ ھتاکہ سرنج، انجکشن، گلوکوس ھم چہ پرائیویٹ اسٹوراں زورگی انت – آپریشن ءِ ھاتر ءَ کارمرز بؤکیں گُد ھم نادراھجاہ ءَ نیست انت ءُ آئی ءِ یک جوڈی یے کیمت کساس سَے ھزار ءُ پنچ سد کلدار انت کہ چہ پرائیوٹ اسٹوراں زورگ بیت ءُ آیاں دیگ بیت –

آھانی گوشگ ءَ انت ھب ءُ کش گوری دمگانی گریب ءُ بزگریں مردم وتی دوستیگیں مردمانی الاج ءِ ھاتر ءَ گلام قادر نادراھ جاہ ءَ.کائنت بلے آسراتیانی نہ بوگ ءِ سوب ءَ مایوس بنت ءُ وتی نادراھانی الاج ءِ ھاتر ءَ لاچار بنت کہ گرانھادیں درمان دگہ ساماناں بہ زور انت مردمانی ھچ جست ءُ پد کنوکے نیست –

آھاں چہ بلوچستان ءِ سرکار ءَ لوٹ کتگ کہ جام گلام قادر سرکاری ٹیچنگ نادراھجاہ ءَ درماناں ھوار درسیں اژدری آسراتی دیگ بہ بنت تانکہ نادراھجاہ ءَ آؤکیں بزگریں مردم چہ دلسیاھی ءَ بہ رک انت –

سربوتگیں ھالانی رِد ءَ کیچ ءَ یک دگہ مردمے چہ شومک ءِ نادراھی ءَ بیران بوتگ –

شومک ءِ نادراھی ءَ بیران بوتگیں مردمے پجار اکبر ء محمد حکیم جھمنند ڈنے سر ءِ نام ءَ بوتگ کہ آ میڈیکل ٹیکنیشن ءَ کار ءَ بوتگ –

زانگ بہ بیت بلوچستان ءَ شومک ءِ نادراھی گیش بوان انت – گوستگیں روچاں چہ شومک ءِ نادراھی ءَ یک دگہ زھگے بیران بوتگ ات –

سرجمیں بلوچستان ءَ شومک ءِ نادراھی ءِ الاج ءَ پہ ھچ وڈیں آسراتی نیست – بلوچستان ءِ سیاسی ءُ چاگردی باسک ءُ گلانی نیمگ ءَ مدامی لوٹ کنگ بیت کہ شومک ءِ نادراھی ءِ گر ءُ دار کنگ بہ بیت ءُ بلوچستان ءَ شومک ءِ نادراھجاہ ءِ پچ کنگ بہ بیت –

بلوچستان ءِ بازیں دمگاں ھاسکر نوشکی ءُ ھزدار ءَ بازیں شومک نادراھانی کیس دیم ءَ اتکگ انت ءُ تنی وھدی بازیں مردمے کہ آھانی تہ ءَ گیشتر زھگ ءُ ورنا چہ شومک ءِ نادراھی ءَ وتی زند ءَ زبھر بوتگ انت –

روکپتی بلوچستان ءَ یک رندے پد ءَ لس مھلوک ءَ زھرشانی کتگ ءُ بندیگیں مردمانی یل کنگ ءِ لوٹ کتگ-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ آدینگ ءِ نماز ءَ پد اود ءَ مھلوک ءَ روانک ءُ زھرشانی کتگ-

زھرشانی کنوکانی دستاں بینر، پلے کارڈ بیتگ اَنت کہ آیانی سر ءَ بیگواھیانی یل کنگ ءِ سر ءَ نبشتگ بیتگ اَنت-

زھرشانی زاھدان ءَ ھوار ھاش ءُ دگہ دگہ جاھاں کنگ بیتگ اَنت کہ اود ءَ مردیناں ھوار ھوار زالبولاں ھم بھر زرتگ ءُ زھرشانی کتگ –

زھرشانی کنوکاں اوگام جنان ءَ سیاسی بندیگانی یل کنگ ءِ لوٹ کتگ ءُ اود ءَ ایرانء سرکار ءِ ھلاپ ءَ ھم اوگان جتگ –

پلے کارڈانی سر ءَ گوستگیں ھپتگ ءَ ھاش ءَ دزگیر کنگ بیتگیں مولانا عبدالمجید مرادزئی ءِ یل کنگ ءَ ھوار ھوار دگہ بندیگین مردمانی نام نبشتگ بیتگ اَنت-

دومی نیمگ ءَ روکپتی بلوچستان ءُ زابل ءَ ھواریں دمگ استان گالیش ءَ مولانا مھمد ھسین گورگیج ءِ دزگءر نامہ ءِ ھلاپ ءُ روکپتی بلوچستان ءَ دگہ مردمانی آوار جنیانی ھلاپ ءَ ھم زھرشانی کنگ بیتگ اَنت-

زانگ روکپتی بلوچستان ءَ زھرشانی درچ گوستگیں سال دوھزار ءُ بیست ءُ دو ءِ سی ستمبر ءَ بندات بیتگ اَنت کہ اود ءَ چھبار ءَ پانزدہ سالی ئیں جنکو ماھو ءِ گون ءَ پولیس آفیسر ابراھیم کوچکزئی ءَ زوراکی کتگ ات-

چریشی ءَ پد اود ءَ یک زھرشانیانی درچے بندات بیتگ ات کہ چرے زھرشانیاں بازیں کچے ءَ مردم کشگ ءُ بیگواہ کنگ بیتگ اَت اَنت-

براھوئی زُبان ءِ سر ءَ چمشانکے

نبشتہ کار: شازیہ بلوچ

دی بلوچستان پوسٹ

چوش کہ کُرد راج ءِ دو راجی زُبان اَنت انچوشکہ زازاگورانی ءُ کُردی ھمے پیم ءَ بلوچی ءُ براھوئی ھم بلوچ راجی زُبان اَنت۔ بزانکہ یک بلاھیں راجے ءَ چہ یکے ءَ گیش زُبان ھم بنت۔ دِگہ درور بنگلادیش ءَ چکمہ ءُ بنگلالی اَنت، روس ءَ روسی ءُ کاکسس ءُ دِگہ بازیں راج ھست اَنت کہ آیانی بازیں زُبان بنت۔ بزانکہ براھوئی ھم بلوچ راج ءِ زُبانے انچوشکہ بلوچی اِنت۔ نی ما گْوش ایں کہ براھوئی زُبان ءِ گپ کنوکیں بلوچ کُجام جاہ اَنت؟

براھوئی زُبان ءِ بلوچ مستونگ، ھُزدار ،کلات(ساراوان)، نوشکی، شال ءُ اوگانستان ءِ ولایت نمروز ءَ ھم آباد اَنت۔ ھمے وڑ ءَ سِندودیش ءِ بازیں دمگ ءُ میتگاں ھم براھوئی گپ کنوکیں بلوچ ھست اَنت۔

البت بلوچستان ءِ برھوئی دمگاں انچوشکہ مستونگ، ھُزدار، کلات(ساراوان)، نوشکی ءُ شال ءَ بلوچی زُبان ءِ بلوچ ھم بازیں کچے ءَ بنت پمیشکا گیشتری ءَ بروھوئی بلوچ بلوچی ءَ سرپد بنت ءُ گپ ھم کن اَنت بلے بلوچستان بازیں انچیں جاہ کہ اود ءَ بلوچی زبان ءِ بلوچ وَ ھست بلے براھوئی گپ کنوکیں بلوچ آباد نہ انت انچوشکہ کوھلو، کاھان، بارکھان، ڈیرہ گازی ھان، راجنپور، ڈیرہ بُگٹی، جھل مگسی، ڈیرہ مُراد جمالی، پنجگور، کیچ ءِ دْراھیں دمگاں بہ گِر داں گْوادر، روایرشُتی بلوچستانی زاھدان، نمروز، زابُل تاں بندراباس ءُ چھبار ءِ وڑیں دمگ ھست اَنت۔

نی ما کسانیں سرپدی یے دے ایں کہ براھوئی کدی ودی بوتگ ءُ چُنت سال کْوھن اِنت؟ بروھوئی زُبان ءِ بُنگیج ءُ ودی ءِ بابت ءَ ھاسیں پٹ ءُ پول نہ بوتگ پمیشکا تچکیں سرپدی ءُ راجدپتر ئِے نیست۔

البت لھتیں میان اُستمانی زُبانزانت گْوش اَنت کہ براھوئی 2000 سال پیسر چہ زِرباری ھندوستان ءِ لڈ ءُ بوجیں مھلوکاں در کپت پرچا کہ بروھوئی زُبان ءِ توارینک گوں رودرآتکی ھِندوستان ءِ مالٹو ءُ کورک زبان ءَ کمیں نزیکی دار ایت ناں کہ لبز ءُ گال، بلکیں تھنا توارینک۔ براھوئی زبان ءِ گیشتر لبز گوں بلوچی ءَ ھوار اَنت۔

براھوئی ءُ بلوچی مئے شھدیں زُبان اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دو جتا جتائیں بمب تراکاں ایف سی ءِ گاڑی ءُ ٹریکٹر نشانگ کنگ بیتگ اَنت-

کوھلو ءَ لیویز انتزامیہ ءِ رد ءَ کاھان ءِ دمگ باریلی ءُ چپی کھچ ءِ ھند ءَ سڑک ءِ نزیک ءَ بمب تراک ءَ ایف سی ءِ بازیں کارمند بیران ءُ زدگ بیتگ اَنت-

کوھلو ءِ ھند ءَ اُرش ءَ پد ایف سی ءَ دمگ انگیر کنان ءَ تراک جاہ ایف سی ءَ بند کتگ-

تراک ءَ پد ایف سی ءُ لیویز ءِ کارمنداں وئیل جاہ ءَ سر بیتگ اَنت زدگ بیتگیں مردم اش نادراہ جاہ اش برتگ اَنت-

کوھلو ءِ انتزامیہ ءَ دیمتر ءَ گوشتگ اے دگ ءِ سر ءَ یک دگہ تراکے ءَ ٹریکٹر ءِ ڈرائیور زدگ بیتگ ءُ ٹریکٹر زدگ بیتگ –

انتزامیہ ءِ رد ءَ واکدار وئیل ءِ چار ءُ ٹپاس کنگ ءَ اَنت ءُ تراک ءَ زدگ ءُ بیران بیتگیں کارمندانی بارو ءَ رسانکدراں دگہ گپ دیم ءَ نیتکگ اَنت-

زانگ بہ بیت کوھلو ءِ ھند گیشتر بلوچ آجوئی لوٹوکانی دست ءَ اَنت ءَ دمگی مردمانی رد ءَ بلوچ لبریشن آرمی ءِ بازین سلاہ بندین باسک دمگ ءَ جاڑیگ اَنت بلے داں انگت ءَ بی ایل اے ءِ جارکش جیئند بلوچ ءِ نیمگ ءَ اے درگت ءَ گپ دیم ءَ نیتکگ اَنت-

دستونک

شائر: شاه هُسین شهزیب

دی بلوچستان پوسٹ

اَهد ءِ بے بالیں کَپوت ءَ نالِتہ جَمبر نہ بیت
چورهیں اوستان ءَ آسے بالِتہ جَمبر نہ بیت

پُکّی ءَ مِسلے شِتگ اِے اَهد ءِ زوراک ءَمنءَ
چو کُچِکّ ءَ شَهر ءُ میتگ وَکّ اِتہ جَمبر نہ بیت

تئ گِس ءِ سَبزیں چِنالاں دُور بُرتہ کہ وتا
نوں هَمائیں من تئ شَهر ءَ چاراِتہ جَمبر نہ بیت

باریں چونیں بے اومیتیں نوبتےءَ دْرپش اِتہ
چاریں نیماں پَہ هَزابی جیڑتہ جَمبر نہ بیت

اِچ نَہ گِنداں دُور چَمّاں بِید ءِ روکیں اَنگرءَ
پَهرواں مَستیں لِوارے جَلّتہ جَمبر نہ بیت

چو بُراک ءَ کَارچ ءُ ڈَکّی بوهگاهاں هَمسپر
اَچ وت ءَ ما نوکیں رَاهے کَشّ اِتہ جَمبر نہ بیت

بے وَسیں شهزیب چِست کَں دِیدگانی پَرده ءَ
گَنجیں کوهاں هُون ءِ هَارے مَلّتہ جَمبر نہ بیت