پاسپان ءِ وتن
نبشتہ کار: زرینہ بلوچ
دی بلوچستان پوسٹ
دنیا ءِ توک ءَ ھر راج ءَ را جُتائیں دود ءُ ربیدگ ءُ پجارے ھست زمینے ھست اگاں یک راجے ءَ را زبان ءُ دود ءُ ربیدگ مہ بیت آ راج گار بوگ ءَ دیر نہ کنت۔یک راج ءِ زبان پادمال کنگ بہ بیت آ راج ھچ مہ گْوش اِیت گُنگ بہ بیت الم یک روچے ھلاس بیت اِنت ۔
انچوں کہ ما درچکے کِشیں درچک پہ رودگ ءُ مزن ءُ سبز بوَگ ءِ واست ءَ آپ سمبالگ لوٹ اِیت ھیالداری لوٹ ایت ھمے وَڑ ءَ یک راجے پہ زندگ دارگ ءِ واست ءَ یا راج ءُ پجارے ءِ واست ءَ زبان ءُ زمینے ءِ در کار بیت بے زبان ءَ مردمے پجار گار بیت بے زمینیں مردم ھچ کار ءَ نہ اِیت ۔بلوچانی زبان ءُ پجار لگت مال انت۔بلوچانی تاسُپیں بچ بندیگ جاہ بند انت کس نہ زانت کجام ھال ءَ اَنت بلوچیں زالبول دگانی سر ءَ کم شرپ کنگ بوَگ ءَ انت بلوچ زالبول ھم زوراکیں لشکر دست ءَ گار ءُ بیگواہ کنگ بوَگ ءَ انت۔
بلوچ ورنا پہ زمین ءِ رکینگ ءِ ھاتر ءَ جنگ کنگ انت شھید بوَگ ءَ انت ۔
پہ بلوچستان ءِ آجوئی ءَ بازیں جُنت نُگرھیں سراں دیمونی داتگ ءُ انگت دیگ ءَ اَنت ءُ پہ کُربان بوَگ ءَ تیار انت۔ کسان ءُ مزن دْرست پہ آجوئی ءِ جنگ ءَ ھَوار انت ۔16فروری 2022 شھید نور سلام نور گوں وتی ھمراھاں پہ ھمے راج ءُ زمین ءُ پجار ءَ وتی ھون رِتک اَنت ۔ پِٹّ بات ھما چم جھل ءُ بے لجیں مکبراں کہ بلوچ ءِ بدوائیں لشکر ءِ ھمراہ اَنت راہ ءُ کِشکاں بر اَنت اِش پیش دار اَنت ءُ وتی بْراتانی بدی ءَ کن اَنت وھدے کہ نور سلام ءِ وابجاہ ءَ مُکبر پیش دار اِیں یزیدیں لشکر ءَ ، لشکر تیر گواری بندات کنت سھب ءَ بگر داں بیگاہ ءَ یک شَل ءَ جنگ برجم بیت ماتیں گُلزمین ءِ سالونکیں بچ ڈُنڈواریں دژمن ءَ بے سوب کنت دژمن ءِ ہیلیاں جن اَنت ءُ دَور دیاں داں گڈی ساہ جنگ کن اَنت وتی ساہ کُربان کن اَنت بلے ماتیں زمین دیّگ ءَ تیار نہ بنت۔
استال جان ءِ ھمراہ کسان سالیں ورنا بنت لگوریں دژمن ءَ گوں جنگ کن اَنت بلے پُشت ءَ نہ کِنز اَنت وت ءَ دژمن ءِ دست ءَ دستگیر نہ کن اَنت ۔
زمین ءِ انچیں مھرے کہ کسان ءُ مزن دْرست پہ دیمونی ءَ نہ کِنز اَنت انچُش کہ مارا یات بہ بیت 2018 امداد جان گوں کسانیں بالاد جنگ کنت ءُ شھید بیت بلے پُشت ءَ نہ کِنز اِیت اے کسان سالیں ورنا ھم امداد جان ءِ وَڑ ءَ وت ءَ کُربان کنت۔
ما تاریک ءَ بچار ایں بِہ وان ایں ھچ چُشیں راج نیست کہ دژمن ءَ بے وتی ھما ھندی مردُمانی کُمک ءَ اُرش کُتگ مُدام ھمے آستونک ءِ مار وتی راج ءَ تاوان ءِ بھر کن اَنت ۔ اگاں مئے وتیگاں نور سلام جان ءِ ڈس ءُ نشان مہ داتیں نور سلام نور ءِ سر ءَ بدواہ ءَ اُرش کُت نہ کُت ۔ نور سلام نور وتی شَیر ءِ بند ءِ توک ءَ گْوش اِیت ،
“جنگ ہر ڈول کہ بیت چے پرواہ
شَک ھمراہ ءِ سرائیں منی دل جَنگائیں “
جنگ ءِ توک ءَ دوستیں مردم پہ دژمن بوَگ ءَ دیر نہ کنت ، پہ چار کلدار ءَ ھم وت ءَ بھا کنت نگرئیں سراں سودا کنت-
آپریں ھما بچاں بات کہ پہ بچکند جنگ کن اَنت ءُ وتی سراں ندر کن اَنت داں گُڈی تیر ءَ جنگ کن اَنت ۔ بلے وتی دست ءِ سِلاہ ءَ دَور نہ دے اَنت ، دگہ جاگھے ءَ نمیرانیں نور سلام نور وتی شَیر ءِ بندے ءَ گْوش اِیت
“من زمین ءَ گوں ھمے کُول کتگ ءُ مُوک اِت من”
“جنگ ءَ سر دات بَلے دست ءِ تُپنگ دور نہ دات”
جنگ ءِ توک ءَ نور سلام نور گوں وتی ھمراھاں سر ءَ دے اَنت بلے دست تُپنگ دور نہ دے اَنت لگور نہ بنت
وش بھت ھما مردم کہ جنگ ءَ شھید بیت پہ آیوکیں پدریچ ءِ واست ءَ وتی وشیاں ندر کنت پہ وتی باندات ءَ واب گند اِیت ھمے وتی واب ءِ سرجم کنگ ءَ پہ وت ءَ ندر کنت-
اے جنگ کُل بلوچ ءِ جنگ اِنت بلوچ ورنا پہ زمین ءِ رکینگ ءِ ھاتر ءَ وتی سراں کربان کنگ انت مئے بلوچیں برات وتی گْوھارانی لج ءِ پَھریزگ ءِ ھاتر ءَ ماں کوھاں نشتگ اَنت جنگ ءَ اَنت ۔ ھمے ڈونڈّ واریں لشکر ماں دیگانی سر ءَ مئے گْوھارانی سریگاں پادمال کنگ ءَ اِنت اے بلوچانی گُڈی جنگ اِنت بندات بوتگ نوں مارا تپاک ءُ یکدست ءُ ھمدل ءُ یکمُشت بیگ لوٹ اِیت ۔ گوں راجی شھیدانی ھوناں وپا کنگ لوٹ اِیت ۔ مارا وتی شھیدانی گپ ءُ پَنت زورگی اَنت ھمایانی راہ ءَ مُساپِر بیگ لوٹ اِیت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
