عمران خان دزگیری ءُ پوج ءِ پَدگرد-ٹی بی پی شونگال

الم بوانیت

عمران خان دزگیری ءُ پوج ءِ پَدگرد

ٹی بی پی شونگال

پاکستان ءِ پیسرگیں مزن وزیر عمران خان ءِ دزگیری ءَ پد پاکستان ءِ جاور ناگیگ اَنت، تحریک انصاف پاٹی ءِ بنجاھی رھشون دزگیر کنگ بیتگ اَنت۔ تحریک انصاف ءِ باسک چہ سئے روچاں اسلام آباد، پنجاب ءُ پختونخوا ءِ جتاجتائیں شھرانی تہ ءَ زھرشانی کَنگ ءَ اَنت سرکاری مڈیاں ماندارگ ءَ اَنت، لاھور ءَ پاکستانی پوج ءِ کور کمانڈر ءِ لوگ ءُ پشاور ءَ ریڈیو پاکستان ءِ ماڑی ماندارگ بیتگ اَنت ءُ پاکستان ءِ بازیں مزنیں شھرانی تہ ءَ زھرشانی برجاہ اَنت وھدیکہ زھرشانی جُنز ءَ دارگ ءِ ھاتر ءَ سئے روچاں سرجمیں پاکستان ءَ دامگی کارشون بند کنگ بیتگ اَنت۔

پاکستان ءِ تہ ءَ راجکاری پریسکار اے جاوراں پاکستانی پوج ءِ پالیسیانی بھر ءِ نامینگ ءُ گُشگ ءَ اَنت کہ عمران خان ءَ سرکار ءَ آروک پوج ءِ برجاھیں جنرل بیتگ اَنت ءُ نی ھمیشانی وت ما وتی جنگ ءَ پاکستان ءِ تہ ءَ ناگیگیں جاورھال ودی بیتگ اَنت۔ پنجاب ءَ زھرشانی کنوک پولیس ءِ گاڑی، سرکاری ءُ جندی مڈی ءُ پوج ءِ اُرد دارانی سر ءَ اُرش کنگ ءَ اَنت بلے پاکستانی پوج زھرشانیانی ھلاس کنگ ءِ ھاتر ءَ تاکت ءِ کارمرزی ءَ چہ پھریز کنگ ءَ اِنت ءُ پاکستانی پوج ءِ جارکش ءَ وتی درشانے ءِ تہ ءَ گُشتگ کہ آ زھرشانی کنوکانی گوں سبر ءُ اوپار ءَ دیمپانی کنگ ءَ اِنت۔

بلوچ، پشتون ءُ سندھی رھشون پنجاب ءِ وئیلانی پَدگَرد ءِ سر ءَ ایراد گران ءَ گُشگ ءَ اَنت کہ ھمے وئیل اگاں بلوچ، سندھی ءُ پشتون راجانی نیمگ ءَ کنگ بہ بیت اَنت گُڑا پاکستانی پوج ءَ ترندیں گامگیج زیران ءَ اے راجانی دمگ کوش جاہ جوڑ کُتگ اَت بلے پاکستانی پوج اگاں پاکستانی ڈیھ ءِ نیمگ ءَ چہ پنجاب ءِ وئیلانی سر ءَ تاکت ءِ کارمرز نہ کنگ پدر کنت کہ بلوچ، سندھی ءُ پشتوناں ھوار دگہ راجانی ارزشت پاکستان ءِ گلامانی ئیگ اِنت ءُ آیاں پنجابی راج ءَ گوں وتی برمیچ کنگ ءَ پھریز کنگ لوٹ ایت۔

پاکستان ءِ (سپریم کورٹ) مزن آمید گِس ءَ عمران خان لھتے دمانانی تہ ءَ مانزمانی دات بلے پشتون رھشون علی وزیر دو سالاں داں کراچی سنٹرل جیل ءِ تہ ءَ دروگیں کیسانی تہ ءَ بندیگ اَت آئی ءِ ھاتر ءَ پاکستانی آمید گِس ھاموش اِت اَنت۔ ایڈوکیٹ ایمان مزاری ءِ گُشگ اِنت کہ اسلام آباد (ھائی کورٹ) آمید گِس ءِ نیمگ ءَ اڈ کُتگیں بلوچ اسٹوڈنٹس کمیشن ءَ جم کنائنتگیں 69 زورانسری بیگواھیں نودربرانی لڑ ءَ چہ 59 داں انگت یل کنگ نہ بیتگ اَنت۔

پاکستان ءِ تہ ءَ پوج ءُ آمید گِس ءِ پنجاب ءِ رھشونانی ھاتر ءَ نرمیں رویش ءُ زیت انساپ ءِ دیگ ءُ دگہ راجانی گون ءَ یکشلی ءَ برجاھیں بے انساپی ءُ گلامانی دروشمیں رویش آیاں اے جیڑگ ءَ لاچار کنگ ءَ اِنت کہ اے ڈیھ تھنا پنجاب ءِ جھمنندانی اِنت۔پاکستانی ڈیھ ءِ گامگیجاں چہ دگہ راجانی گوں پاکستان ءَ دیری ودگ ءَ اِنت کہ آیوکیں وھد ءَ ڈیھ ءِ ھاتر ءَ جنجالانی سوب جوڑ بیت کنت۔

نوکتریں