TBP Balochi

چار شمبے ءِ روچ ءَ کراچی پریس کلب ءِ دیم ءَ بلوچ یکجھتی کمیٹی ءِ نیمگ ءَ چی محمد رحیم زھری زمان بلوچ ءَ ھوار دگہ مردمانی زورانسری آوار جنی ءِ بگیری ءَ زھرشانی ءِ کنگ بوتگ –

زھرشانی ءَ مزنیں کچے ءَ انسان دوستیں مردماں بھر زرتگ ءُ بلوچستاں بؤوکیں زوراکیانی بگیری ءَ توار چست کتگ –

ترانکاراں بلوچستان ءَ بؤوکیں زورانسری آوار جنی درچ ءِ ترندی ءَ ایرجتگ ءُ گوشتگ کہ بلوچستان ءَ دو دھک انت زورانسری آوار جنیانی درچ یکشل ءَ برجاہ انت نوں پھازگی لشکر ءِ نیمگ ءَ زھگ ءُ زالبول ھم نشانگ کنگ بوگ ءَ انت – اے اولی رند نہ انت کہ یک گِسے ءَ بلوچ زالبول ءِآوار جنگ بوتگ بلکنہ چدوپیسر ھم پنجگور، کراچی، ڈیرہ بگٹی دشت، تربت ھاران ءَ ھوار بلوچستان ءِ کنڈ کنڈ ءَ چشیں وئیل بوتگ انت کہ بلوچ زالبول جتگ انت ءُ زورانسری آوار جتگ انت ھتاکہ کُشگ ھم بوتگ انت –

ترانکارانی گوشگ ات کہ ھمے وڈ سَے فروری شال ءِ دمگ گیشکوری ءَ پھازگی ادارھاں گِس ءِ سر ءَ بیڑ برتگ رشیدہ زھری، آئی ءِ لوگ واجہ رحیم زھری، تِری ءُ دو زھگ آوار جتگ انت پدا رند ءَ رحیم زھری ءِ مات گوں نماسگاں یل کنگ بوتگ ءُ مروچی رشیدہ زھری ھم یک کنگ بوتگ بلے رحیم ھنگت بیگواہ انت – کہ آئی ءِ کھول ءُ وائس فار بلوچ مسنگ پرسنز ءَ شال ءَ ھم زھرشانی کتگ کہ اودا سپریم کورٹ ءِ جج لوٹ کنگ بوتگ کہ گامگیج زورگ بہ ءُ آ یل کنگ بہ بیت – ھمے وڈ چہ تربت ءَ ورنا زمان ء سپاھان بلوچ کہ آ سال دوھزار بیست ءِ جون ماہ ءَ آوار جنگ ءُ بیگواہ کنگ بوتگ کہ پدا شش ماہ ءَ رند یل کنگ بوتگ – کھول ءِ گوشگ انت آئی ءِ بے کساس جتگ اش ءُ پدا ھمے سال ءَ دھ فروری ءَ چہ تربت ءَ دوبر زورانسری آوار جنگ ءُ بیگواہ کنگ بوتگ –

زمان بلوچ ءِ کھول ءَ گوشتگ کہ مئے کھول ءَ وڈ وڈا زوراکی نشانگ کنگ بوگ ءَ انت ءُ زمان بلوچ ءِ آوار جنج ءَ پھازگی کارمنداں گِس ءِ سر ءَ بیڑ برتگ ءُ پُرشت پروش کتگ ـ زھگ ءُ زالبول ھم لٹ شاپ کتگ انت – ھمے وئیل ءِ بگیری ءَ زمان بلوچ ءِ کھول ءَ ھوشاپ ءَ تربت دمگ ءَ سی پیک شھدگ بند کتگ ءُ زھرشانی کتگ –

ترانکارانی گوشگ دھ ءُ سَے فروری ءَ بوتگیں وئیل اولی رند نہ انت کہ بوگ انت – بلوچ زالبولانی آوار جنگ ءُ آھاں لٹ شاپ کنگ بلوچستان ءِ کنڈ کنڈ ءَ بوتگ انت بلے اے وئیلانی بگیری ءَ ھچبر گامگیج زورگ نہ بوتگ – بیگواھیں مردمانی ھاتر ءَ کمیشن ءِ سر ءَ دگہ کمیشن جود کنگ وا بوتگ بلے ھچ وڈیں برورد نیست بلکنہ وئیلانی تہ ءَ گیشی آیگ ءَ انت – بیگواھیں مردمانی کھولانی لٹ شاپ کنگ، آھاں زھرشانی کنگ ءَ دارگ، تیرگواری کنگ بوگ انت آھاں چہ وتی بنکی ھکاں دزکش کنگ جھد بوگ ءَ انت – ھمے زوتاں زمان بلوچ ءِ زورانسری اوار جنی بگیری ءَ کھول ءِ مردمانی سر ءَ پولیس ءَ بے سوب ءَ تیرگواری کتگ –

آھانی گوشگ ات کہ بلوچ راج گوم ءَ یکجاھی سزا ءِ رویش دارگ بوگ انت کہ آھاں یک ٹولی ءِ چیردستی ءَ بوگ ءَ انت ءُ وتی بنکی ھکاں سربوگ ھمے واست ءَ ناممکن کنگ بوتگ – بلوچ راج ءِ دود ربیدگانی لگتمالی، زورانسری آوار جنی، لشکر کشی، بلوچانی مال ءُ مڈیانی پُلگ، ماندارگ، چنڈے نان ءِ ھاتر ءَ بلوچ ڈرائیوراں پہ تُن ءَ مرگ اے درسین وئیل بلوچ ءِ نفسیات ءِ باور کناءینگ ءَ بس انت کہ آ یک نوک آبادی سماج ءِ چیر انت کہ اشی ءِ در آیگ ءِ یکیں راہ گھگیری انت –

آھانی گوشگ ات کہ بلوچ یکجھتی کمیٹی کراچی درسیں بلوچ راجدوست ءُ انسانی ھکانی پلامرزاں لوت کنت کہ اے زلم زوراکیانی بگیری ءَ توار چست بہ کن ات وتی بلوچی ءُ انسانی پرز ءَ پیلو بہ کن انت –

سندھ ءِ مزن شھر کراچی ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ ،زھرشانی بنجل ءَ مروچی چار ھزار ءُ نُھ سد ءُ پنجاہ ءُ سَے روچ سرجم بوتگ انت – مروچی نیشنل پاٹی ءِ بنجاھی اگدہ دار تاج محمد کاکڑ، رحمت اللہ کاکڑ، امیر محمد کاکڑ ءَ بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

بنجل ءَ اتکگیں مردمانی گوم ءَ تران کنان ءَ وی بی ایم پی ءِ کمک سرکماش ماما قدیر بلوچ ءَ گوشتگ کہ بیگواھیں مردمانی گیش گیواری بدل ءَ گیشتر دراجکش ءُ بلکنہ ھمک روچ آھانی کچ گیشتر بوان انت – بلوچستان ءَ پاکستان ءِ چیریں ادارہ ءُ کارمندانی دست ءَ بلوچ پرزندانی زورانسری آوار جنی درچ چہ لشکر کشی ءَ بندات بوتگ – زورانسری آوارجنی درچ چیردیگ بوتگ بلے بلوچ ءِ جھد ءُ بلوچ ورنایاں ھوار ھر تک ءُ پھناتاں سیادی داروکیں مردمانی جھد ءَ پاکستان ءَ وتی زوراکیانی تہ ءَ گیشی آورتگ –

ماما قدیر بلوچ ءَ گوشتگ کہ بازیں زوراکیاں پوج ءُ چیریں ادارھانی دست ءَ زورانسری آوار جنگ بوتگیں بلوچانی وش ءُ سلامتی یل بوگ ءِ امیت ءُ واھشت بے باوری ءِ تہ ءَ بدل بوتگ انت کہ چریشی ءَ بیگواھیں مردمانی کھول وتی دوستیگیں مردمانی یک دیدار ءَ تلوسگ انت –

آئی ءَ گوشتگ کہ اے درگت ءَ پاکستان ءِ کانود ءُ انساپ ءِ ادارھاں زورانسری آوار جنگ بوتگیں مردمانی کھول ءُ بلوچ سیاسی باسکانی ٹپانی درمان ءِ کنگ ءِ بدل ءَ گیش واد پِرکتگ انت – سیاسی ءُ دینی پاٹی ءُ انسانی ھکانی پلامرزی کنوک ھر پڈ ءَ سرپدی داتگ ءُ انساپ ءِ لوٹ کت بلے ھر نیمگ ءَ بس تسلی دیگ ءُ گپ تاب دیگ بوتگ –

بلوچستان ءِ دمگ مستونگ ءُ کیچ ءَ چہ تیرگواری سوب ءَ یکے بیران ءُ یکے ٹپی بوتگ۔

گیشترین ھالانی رد ءَ مستونگ ءَ سلاہ بندیں مردمے ءَ تیرگواری کرتگ ءُ شِیک ابدالباکی نامے مردم ءِ کُشتگ ءُ اے وئیل چہ رند سلاہ بندیں مردم تتکگ، دمگی مردمانی گوشگ اِنت کہ اے وئیل ھما وھد ءَ بیتگ کہ وھدے شِیک ابدالباکی وتی نادْراھجاہ ءَ رواگ ءَ بیتگ۔

بنشون ءِ در ءَ کیچ ھند دشت سورک ءَ گوستگیں شپ ءَ ناشناسی سلاہ بندین مردمے تیرگواری چہ سناہ اللہ نامے مردم ٹپی بیتگ، زدگ بیتگیں مردم پہ گیشیں درمان ءِ ھاتر ءَ تربت ءِ نادْراھجاہ ءَ برگ بیتگ۔

ٹپی بوتگیں مردے باروا ھند ءُ دمگی مردمانی گوشگ اِنت کہ اے مردکار گوستگیں وھد ءَ بلوچ آجوئی لوٹوکیں گلاں ءَ گوں بندوک بوتگ بلّے چیزے وھد پیسرا آئی وتی سلاہ دور داتگ انت۔ البتہ اے وئیل سوب انگت ءَ زانگ نہ بیتگ۔

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ سَے بندیگیں مردم یل کنگ بیتگ اَنت-

یل بیتگیں مردمانی پجار بسم اللہ براھوئی ء امان اللہ، سماعیل ءُ ابراھیم سرگلزئی ء حسن جھمنند شیر آباد زاھدان ءِ ناماں زانگ بیتگ اَنت-

ایشانی توک ءَ اسماعیل ءُ ابراھیم ھردوک برات اَنت کہ ایرانی چیریں ادارھاں آوار جتگ ءُ برتگ اَنت-

سر بیتگیں اھوالانی رد ءَ اے مردم لٹ ءُ کُٹ کنگ ءَ پد ایشانی جاور الکاپ ءَ نہ بیتگ اَنت-

اھوالانی تہ ءَ گوشگ بیتگ کہ اے مردم سِی دسمبر دوھزار ءُ بیست ءُ دو ءَ ما زاھدان شیر آباد ءَ آوار جنگ ءُ بیگواہ کنگ بیتگ اَنت-

دستونک: آجوئی

شائر: آبد رھشون

دی بلوچستان پوسٹ

آجوئی ءِ اگاں روکیں جارے بباں
تئی زبان ءَ رُداں چیں توارے بباں

تو منی جلوہ ءَ زینت ءُ براہ بئے
یاگی یے تو بہ بئے من ھسارے بباں

جلّ ئے تو چاھڑاں ساھگ ءَ ساھتے
من اَلنگیں اگاں سیہ تلارے بباں

واے واے بہ کن بلکن ءَ من پہ تو
گلزمین ءِ دل ءَ ھشکیں دارے بباں

من تئی برھنگیں بند ءُ بوگاں رچاں
تیھرانی تھ ءَ آبشارے بباں

چُکّاں من ململیں سینگ ءَ تئی مدام
بَڈّ ءِ تئی ریدگیں من کتارے بباں

گوں من ءَ گون بئے گُڈّی داں منزل ءَ
تو تپنگے ءُ من سرمچارے بباں

پمّنی موکگ ءَ سد بر ءَ نَدر بئے
من اگاں بندی ئیں سرڈگارے بباں

ھق دو تھریک ءِ سروک ھُسین واڈیلہ ءَ وتی یک ترانے ءَ گوشتگ کہ زور ءُ تاکت ءِ بُنیات ءَ مولانا ھدایت الرھمان بلوچ ءِ گند ءُ نندے مَکن کنگ انسانی ھقانی سنگینیں ھلاپ ورزی یے اے ڈولیں گامگیج لس مھلوک ءِ جزبگ ءَ گیش کنگ ءِ برابر انت۔

آئی ءَ وتی تران ءِ تھا دیمترءَ گوشتگ بائیدھمیش انت کہ آوتی زور ءُ زورکیاں ٹرالرز ماپیا ءُ نشہ پُروشانی ھِلاپ ءَ کارمز بہ کن انت بلّے اے زرو ءُ زرواکی مھلوک ءُ لس مھلوک رھشونانی سر ءَ موشگ بوھگ ءَ اِنت۔

ھَک دو تھریک بلوچستان ءِ کماش ھُسین واڈیلہ ءَ دمگی انتزامیہ ءُ پولیس ءِ اپسرانانی نیمگ ءَ چہ مولانا ھدایت الرھمان بلوچ ءِ ھچ ڈولیں گند ءُ نندے سرءَ مَکن کنگ گوں تْرندیں گالاں ایر جتگ۔

آئی ءَ گوشتگ کہ دمگی انتزامیہ ءُ ایندگہ اِدارگ ٹرالرز ماپیاھانی ھِلاپ ءَ بے وس انت کہ آیانی دیم ءَ یک سرکاری اُگدادارءِ بیگواہ کنگ بیت اِنت ءُ کراچی ھند ءُ دمگاں برگ بیت بلّے انتزامیہ چہ اے گامگیج ءَ پراموش اِنت چیاکہ آ مولانا ءَ گیش بندیگ جاھاں بند کنگ ءَ دِلگوش انت، دومی نیمگ ءَ پولیس ءِ اپسر ھم وتی بُنکی کرد ءَ نشہ پروشءُ دز ءُ ڈنگانی ھِلاپ ءَ پیلو کنگ چہ ابیدمھلوک ءُ مھلوک ءِ رھشونانی تنگ کنگ ھرچ ءُ درچ کنگ ءَ انت۔

ھُسین واڈیلہ ءَ دیمترءَ گوشتگ کہ اے ڈولیں گامگیجاں گوں آ مھلوک ءَ را وتی سرُوک ءَ چہ جتا کُت نہ کن اَنت ءُ نانکہ آیانی دل پہ سُروک ءَ مھر کمتر بیت اِنت۔