TBP Balochi

نجمہ بلوچ ءِ وتکُشی

ٹی بی پی شونگال

پاکستان ءَ بلوچ جنگ ءِ ھلاس کنگ ءِ ھاتر ءَ بازیں شوربندی اڈ داتگ اَنت، کہ ایشانی سانمندیانی سوب ءَ بلوچستان ءَ ھمُکروچی ڈول ءَ نوکیں وئیل ءُ کَزا ودی بئیگ ءَ اَنت۔

بلوچستان ءِ درستاں پدمنتگیں ءُ جنگ آماچیں دمگ آواران ءِ ھنکین گیشکور ءَ لھتے روچ پیسر نجمہ بلوچ، کہ اُستاد (ٹیچر) ءِ بیتگ وتکُشی کُتگ ئے ۔ وتکُشی ءِ سوب اے گُشگ بئیگ ءَ اِنت کہ بلوچستان لیویز ءِ کارندہ نور بخش ءِ نیمگ ءَ نجمہ بلوچ ءَ پاکستانی پوج ءِ ملٹری انٹیلیجنس ءِ ھاتر ءَ، بلوچ آجوئی ءِ جھد ءِ بگیر ءَ کارکنگ ءَ پہ باز لاچار کتگ بیتگ ءُ بیھار دیگ ءَ بیتگ اَنت، کہ ایشی ءِ سوب ءَ آئی ءَ وتکُشی کتگ۔

نجمہ بلوچ ءِ وئیل بلوچستان ءَ چُشیں اولی وئیل نہ اِنت بلکیں سرکاری مستری ءَ جنزوکیں ڈیتھ اسکواڈ ٹولی، ملٹری انٹیلیجنس ءُ انٹر سروس انٹیلیجنس ءَ گوں بندوکیں کارندہ یکشلی ءَ گوں چُشیں وئیلانی تہ ءَ ھوار بیتگ اَنت۔ اے ٹولیاں بلوچ راجی آجوئی ءِ جُنز ءِ کاؤنٹر کنگ ءِ بدل ءَ سرجمی ءَ پرمان دیگ بیتگ کہ چریشی ءِ سوب ءَ ترسناکیں ءُ ھترناکیں وئیل ودی بئیگ ءَ اَنت۔

بلوچ پارلیمانی پاٹی، چاگردی گل، انسانی اگبالانی گل یکشلی ءَ گوں چُشیں وئیلانی سر ءَ زھرشانی ءِ راہ ءَ کارمرز کنان ءَ ترندیں بیمناکی ءِ درشان کَنگ ءَ اَنت بلے بلوچستان سرکار ءُ پاکستان ءِ بُنجاھی سرکار اے وئیلانی دارگ ءَ بے سوب بیتگ اَنت۔

اے وئیلانی سوب ءَ بلوچستان ءِ تہ ءَ تکانسری ودگ ءَ اِنت کہ آ کجام ھم وھد ءَ یک مزنیں زھرشانی ءِ سوب جوڑ بیت کنت۔ پاکستان ءِ ڈیھی ادارگاں وتی پالیسیانی سر ءَ چار ءُ بیچار کنگ لوٹ ایت پرچاکہ چُشیں پالیسیانی کارمرزی ءَ گوں بلوچ راجی جُنز ھلاس نہ بیت بلکیں پاکستان ءُ بلوچ مھلوک ءِ نیام ءَ دیری ودیت ءُ آیانی دردواری گوں بلوچ راجی آجوئی ءِ جُنز ءَ گوں بندوک بنت۔

بلوچستان ءِ دمگ ھُزدار ءَ سی ٹی ڈی پولیس ءَ بیڑبرتگ ءُ ھپت مردم زورانسری آوار جنگ ءَ پد بیگواہ کتگ اَنت ءُ اشی ءَ پد شش یل کنگ بیتگ وھدے کہ یکے انگت بیگواہ ءَ اِنت-

گیشیں ھالانی رِد ءَ گوستگیں شپ ءِ ساھت سے ءَ ھُزدار ءِ دمگ کھنڈ جنگی آباد ءَ سی ٹی ڈی بیڑبرتگ ءُ زوراکی کنان ءَ یکیں کھول ءِ ھپت مردم زورانسری آوار جتگ ءُ بیگواہ کتگ اَنت-

آوار جنگ بیتگیں مردمانی پجّار علی حسن ء جنگی خان ، نعمان ء علی حسن، نوید ء علی حسن ، میر محمد ء خیر محمد ، سراج احمد ء میر محمد ، عبدالرؤف ء امام بخش ءُ سکندر ء رضا محمد نام ءَ چہ بیتگ اَنت-

دمگی مردمانی رِد ءَ کمی رند آ ششیں مردم سورگز ءَ یل کنگ بیتگ اَنت وھدے کہ نودربر نعمان ء علی حسن انگت بیگواہ ءَ اِنت- کھول ءَ نعمان ءِ بیگواھی ءِ درگت ءَ سرپدی دیگ ءِ دزبندی کتگ-

زانگ بہ بیت اشی ءَ ساری ھم بلوچستان ءِ جتاجتائیں دمگاں سی ٹی ڈی نیمگ ءَ زورانسری آوار جنی ءُ دروگیں میڑاں بیگواھیں مردماں کُشگ ءِ وئیل دیم ءَ اَتکگ اَنت-

پشمبے ءَ بلوچستان ءِ دمگ ھرنائی ءِ ھند زرد آلو ءَ دو بمب تراکاں دو مردم بیران بیتگ اَنت ءُ شش کس زدگ بیتگ اَنت-

لیویز واکدارانی گوشگ اِنت جہ زرد آلو ءَ ناشناسیں مردماں دگ ءِ کش ءَ چیر کرتگیں شور کل کتگ اَنت ءُ تراک ءِ آسر ءَ دو مردم بیران بیتگ اَنت-

آیانی گوشگ ات کہ تراک ھمے وھد ءَ مردم تراک ءِ جاہ ءَ مُچ بیتگ اَنت گڑا دگہ تراکے کنگ بیتگ کہ چریشی ءَ دگہ شش مردم زدگ بیتگ اَنت – زدگ بیتگیں مردم سول ھسپتسل شال ءَ ٹراما سینٹر ءَ برگ بیتگ انت ءُ ایشانی توک ءَ دو زدگ بیتگیں مردم دنگء نادراہ جاہ ءَ برگ بیتگ اَنت –

ھسپتال ءِ رد ءَ مارا سول ھسپتال ءَ چار زدگ بیتگیں مردم دزکپتگ انت کہ ایشانی توک ءَ دو کسانی جاور ناگیگ گوشگ بوگ ءَ اَنت – ھمے وڑ بیران بیتگین مردمانی لاش کھولانی ھوالگ ءَ دیگ بیتگ اَنت-

ایشی ءَ پیش سھبت پور ءَ یک سلاہ بندیں اُرشے ءَ یک پولیس آپیسرے مرتگ ات ءُ دو زدگ بیتگ ات اَنت-

ڈپٹی انسپکٹر جنرل آف پولیس نصیر آباد ریجن ءِ منیر اھمد شیخ ءَ گوشتگ کہ عادل پور ءِ تھانہ ءِ اسٹیشن ھاؤس آفیسر ایس ایچ او مھمد کھوسہ ءَ جرمکارانی جاڑیگ بوگ ءِ ھال رس اتگ گڑا سھبت پور ءُ ڈیرہ بگٹی ءِ ھندانی سیمسری ھنداں پٹ ءُ پول بندات کتگ-

پولیس ءِ سر بوگ ءَ سلاہ بندیں مردماں پولیس ءِ سر ءَ اُرش کتگ چریشی ءَ ایس ایچ او میر مھمد کھوسہ ءَ تیر لگگ ءِ سبب ءَ زدگ بیتگ کہ آ نادراہ جاہ ءَ برگ بیتگ ءُ اود ءَ آئی ءَ وتی ٹپ نہ سگ اتگ ءُ بیران بیتگ –

اُرش ءِ زمہ واری بلوچ سلاہ بندیں گل بلوچ ریپبلکن گارڈز ءَ زرتگ ات – جارکش دوستین بلوچ ءَ وتی درشانی ءَ گوشتگ ات کہ کشگ بیتگیں آفیسر بازیں وھداں تچک ءَ زورگریں پاکستانی پوج ءُ چیریں ادارھانی واستا کار ءَ بیتگ ءُ آیانی گوشگ ءِ پد ءَ جھد ءِ آجوئی ءِ بگیراری ءَ بیتگ – ایشی ءَ ابید آ سھبت پور ءِ کش ءُ گوری ھنداں بلوچانی آوار جنی ءُ پوڑی گرگ ءَ دزمانجن بیتگ-

بی آر جی ءِ جارکش ءَ گوشتگ کہ پولیس ءُ لیویز پورس ءَ را بلوچ بوگ ءِ سر ءَ آیانی گون ءَ ترندی نہ کتگ بلے زورگریں پوج ءِ ھمراہداری کنوکانی سر ءَ ھما وڑ کنگ بیت اِنت کہ دشمنیں پوج ءِ گون ءَ بوگ ءَ اِنت-

زاھدان ءِ جھمندے ءَ ھوار سَے کس ماں کرمان ءِ بندیگ جاہ ءَ گوستگیں روچ ءَ پاھو دیگ بیرگ اَنت-

گیشیں اھوالانی رد ءَ پاھو دیگ بیتگیں مردمانی پجار قادر بخش دھانی پنام ءِ نادر بلوچ ء نادر جھمنند زاھدان، عبدالرسول جمشیدی جھمنند استان فارس، علی شھریار ءِ ناماں زانگ بیتگ اَنت-

اھوالانی تہ ءَ گوشگ بیتگ کہ ھرسئیں مردم نشہ باپاری ءِ بھتام ءَ گرگ بیتگ اَنت-

اھوالانی رد ءَ قادر بخش ایرانی سال سیزدہ سد ءُ نود ءُ ھپت ءَ گرگ بیتگ ءُ پد ءَ آئی ءِ سر ءَ پاھو اتکگ بیتگ-

عبدالرسول ھم ھمے سال ءَ گرگ بیتگ ءُ پد ءَ آئی ءِ سر ءَ پاھو اتکگ بیتگ بلے سیمی مردم ءِ درگت ءَ دگہ گپ دیم ءَ نیتکگ اَنت-

زانگ بہ بیت روکپتی بلوچستان ءَ ھوار ھوار ایران ءِ دگہ اُستاناں چیزے ماھانی توک ءَ پاھو دیگانی توک ءَ گیشی گندگ ءَ اتکگ –

یوکرین ءَ گوشتگ کہ آئی ءَ روس ءِ نیمگ ءَ دیم دیگ بیتگیں 36 ایرانی ڈرونز جتگ ءُ دور داتگ انت –

برطانیہ ءِ ھال سرکنوکیں روئٹرز ءِ رد ءَ سروک ولادیمیر زیلنسکی ءَ گوشتگ کہ چار شمبے ءُ پشمبے ءِ میانی شپ یک گرانیں شپے بیتگ – آئی ءَ گوشتگ کہ ڈرونزانی ھلاپ ءَ برزی پھزدارانی کرد بے درور اِنت-

سروک ولادیمیر زیلنسکی ءَ وتی ٹیلی گرام چینل ءَ نبشتگ کتگ کہ یوکرین ءِ ترسینگ ءَ 36 ڈرونز کارمرد کنگ بیتگ اَنت بلے ھچ وتی نشانگ ءَ سر نہ بیتگ اَنت-

چہ گوستگیں سال ءِ اکتوبر ءَ بہ گر ماسکو یکشل ءَ وتی نشانگ ءَ ڈرونز روان دیگ ءَ اِنت-

یوکرین ءِ برزی پھزداراں گوشتگ کہ دشمن گمانی ءَ ڈیھ ءِ روکپتی بھراں جوانیں جاگہ ءُ پوجی بنجلاں نشانگ کنگ لوٹگ اِنت-

یوکرین ءِ پوج ءِ رد ءَ روس ءِ اُرشاں ایرانی ڈرونز کارمرد بیتگ اَنت – پوجی پھزدارانی گوشگ اِنت کیف ءَ بازیں براں ڈرون اُرش کنگ بیتگ اَنت بلے درست بے سوب کتگ اَنت-

آئی ءَ گوشتگ کہ ھمے ماہ ءَ کیف ءِ سر ءَ دوازدھمی ڈرون اُرش کہ بیتگ-

بلوچستان لبریشن فرنٹ ءِ جارکش میجر گوھرام بلوچ ءَ پنجگور ءَ بیتگیں اُرش ءِ زمہ واری منان ءَ گوشتگ کہ گوستگیں شپ ءِ ساھت ھشت ءَ پنجگور ءِ ھند گچک ءَ کرک ء ڈل ءِ ھند ءَ پاکستانی پوج ءِ چوکی راکٹانی گون ءَ نشانگ کتگ –

جارکش ءَ گوشتگ کہ اُرش ءِ آسر ءَ پوج ءَ بازیں کچے ءَ جانی ءُ مالی تاوانانی دیمپانی کنگ کپتگ-

میجر گوھرام بلوچ ءَ گوشتگ کہ اے اُرش ءِ زمہ واری ءَ بی ایل ایف من ایت ءُ بلوچستان ءِ آجوئی ءَ داں اے دابیں اُرشاں برجاہ کنت –

گوستگیں سَے روچانی توک ءَ پاکستانی پوج ءَ سندھی راجدوستیں پاٹی ءَ سیادی داروکیں ھپت کس آوار جنگ ءَ پد بیگواہ کتگ اَنت-

وائس فار مسنگ پرسنز آد سندھ، سندھ سجاگی فورم ءُ سندھ سبھا ءَ وتی آفیشل پیجزاں جتا جتا شنگ کتگیں درشاناں گوشتگ پاکستانی پوج ءَ سندھ ءَ سندھی باسکانی زورانسری آوار جنیانی توک ءَ گیشی آورتگ – چریشی ءَ چہ گمان بیت اِنت سندھ ءُ بلوچستان ءَ بنگلادیش ءِ جاوراں ودینگ لوٹ ایت-

آئی ءَ گوشتگ کہ پاکستانی پوج ءُ آئی ءِ چیریں ادارھاں سندھ ءَ انسانی ھکانی ترندیں لگتمالی برجاہ داشتگ اَنت – گوستگیں سَے روچانی توک ءَ سندھ ءِ جتا جتائیں جاھاں ھپت ءَ گیش سندھی باسک چست کنگ ءُ بیگواہ کنگ بیتگ اَنت-

درشان ءَ گوشگ بیتگ کہ گوستگیں شپ ءَ کراچی ءَ سندھ سبھا ءِ آفیس ءَ پاکستانی چیریں ادارھاں اُرش کتگ ءُ پرشت ءُ پروش کتگ کہ ما ایشی ءَ ترندی ءَ گوں ایر جن ایں ءُ اود ءَ دو سندھء باسک سجاد پنھیاد ءُ راجا گبول چست کنگ ءُ زورانسری بیگواہ کنگ بیتگ اَنت –

ھمے وڑ کورنگی ءِ ھند بلال کالونی ءَ ورنائیں شاگرد اصغر بھنگوات ھم دومی رند ءَ چست کنگ ءُ بیگواہ کنگ بیتگ – ایشی ءَ پیش سیاسی باسک اصغر بھنگوار بیگواھی ءِ آماچ کنگ بیتگ –

آئی ءَ گوشتگ کہ ایشی ءَ ابید سندھ ءِ دگہ جاگھاں بفکت پیرزانی، لیاقت پیروزانی، اصغر شاہ ءُ احسب لاشاری ھم زورانسری آوار جنی ءِ آماچ بیتگ-

آئی ءَ گوشتگ کہ ریاستی زوراکیانی ھلاپ ءُ سرجمیں سندھ ءَ زھرشانی ءِ جار ءَ جنت ایں –

روکپتی بلوچستان ءِ دو جتا جتائیں ھنداں دگ ءِ وئیل ءُ تیرگواری ءِ وئیل ءَ سے مردم بیران بیتگ اَنت-

گیشیں اھوالانی رد ءَ روکپتی بلوچستان ءِ دمگ کسر کند ءَ ناشناسیں مردماں تیرگواری کنان ءَ یک ورنایے کُشتگ –

کُشگ بیتگیں مردم ءِ پجار اسد آشپزی جھمنند گونگان کسرکند ءِ نام ءَ زانگ بیتگ –

اھوالانی رد ءَ اسد وتی لوگانی دپ ءَ جاڑیگ بیتگ کہ اود ءَ آئی ءِ سر ءَ ناشناسیں مردماں تیرگواری کنان ءَ کُشتگ-

اھوالانی رد ءَ کوش ءِ سبب تنی وھدی زانگ نہ بیتگ، بلے کوشکاراں تیرگواری ءَ پد پشت مانداتگ ءُ شتگ اَنت-

ھمے وڑ ءَ زاھدان ءِ دو جتاجتائیں جاھاں دو تیل کشیں مردم دگ ءِ وئیل آماچ بیتگ ءُ بیران بیتگ اَنت-

بیتگیں مردمانی تہ ءَ یکے ءِ پجار ایوب شاہ بَخش جھمنند پھلوانی زاھدان ءُ دومی ءِ پجار مھر اللہ براھوئی ء امان اللہ جھمنند سرجنگل زاھدان ءِ نام ءَ زانگ بیتگ-

ایشانی توک ءَ ایوب شاہ بخش نصرت آباد ءَ کھورک ءِ ھند ءَ آئی ءِ گاڑی وئیل ءِ آماچ بیتگ ءُ چریشی ءَ چہ آ بیران بیتگ-

سر بیتگیں ھالانی رد ءَ جیرفت ءِ زندان ءَ زاھدان ءِ جھمنند پاھو دیگ بیتگ –

گیشیں اھوالانی رد ءَ زاھدان ءِ جھمنندیں سِی سالیگیں مھمد دارائی ء عبدالناصر ماں جیرفت ءِ زندان ءَ مروچی بامسار ءَ پاھو دیگ بیتگ-

اھوالانی رد ءَ مھمد دارائی ایرانی سال 1398 ءَ نشہ باپاری ءِ بھتام ءَ فاریاب ءِ شھر ءَ دزگیر کنگ بیتگ-

زانگ بہ بیت ھمے دو ماھانی توک ءَ ایرانی آمیدگس ءَ تنی وھدی سِی ءُ چار بلوچ پاھو داتگ اَنت کہ ایشانی توک ءَ دو زالبول ھم ھوار اَنت-

اھولانی رد ءَ دگہ بندیگیں پاھو دیگ ءِ ھال ھم ھست کہ آ جتا جتائیں کوٹیاں برگ بیتگ اَنت پہ پاھو ءَ –