TBP Balochi

ڈیرہ اسماعیل خان ءِ ھند ٹانک دگ ءَ چھکان ءِ نزیک ءَ پرپٹ سواریں وتکش تراکارے ءَ پاکستانی پوج ءِ کاروان نشانگ کتگ –

تراک ءَ سَے کارندہ ھما جاہ ءَ مرتگ اَنت ءُ نوزدہ زدگ بیتگ اَنت، زدگ بیتگینانی توک ءَ لھتے جاور ناگیگ گوشگ بوگ ءَ اَنت چریشی ءِ سبب ءَ بیرانیانی توک ءَ گیش بوگ ءِ گمان اِنت-

دومی نیمگ ءَ باڑہ ءِ ھند سپاہ ءَ پاکستانی پوج ءِ پیراملٹری پورس ایف سی ءِ گشت کنوکانی سر ءَ تیرگواری کنگ بیتگ چریشی ءَ پنچ کارندہ زدگ بیتگ اَنت، زدگ بیتگینانی تہ ءَ لانس نائیک امتیاز، لانس نائیک سھیل، عمران، وقاص ءُ سپاھی سھیل ھوار اَنت-

واکدارانی رد ءَ تیرگواری ءَ اُرشکاراں پشت ماندات ءُ شتگ انت ءُ زدگ بیتگیں کارندہ سی ایم ایچ پشاور ءَ برگ بیتگ اَنت –

بلوچستان ءِ دمگ پنجگور ءُ تربت ءَ پاکستانی لشکری اُرشانی تہءَ نشانگ کنگ بیتگ اَنت۔ دومی نیمگ ءَ چہ تمپ ءَ سربیتگیں ھالانی ردءَ ناشناسیں مردمانی تیرگواری ءَ یہ مردمے بیران بیتگ۔

سربیتگیں ھالانی ردءَ گوستگیں شپ پنجگور شھر ءَ گریڈ اسٹیشن ءِ نزیک ءَ اَڈ کُتگیں پاکستانی لشکریانی پانگس ناشناسیں سلاہ بندیں مردماں نشانگ کُتگ ءُ تتکگ اَنت۔ اھوالانی ردءَ اُرش ءِ وھدءَ تراک ءُ تیرگواری ءِ توار ھش کُنگ بیتگ۔

دومی نیمگ ءَ تربت ءِ ھند آبسر ءَ حیات بلوچ ءِ نمیرانی ءِ ھند ءَ بستگیں پاکستانی لشکریانی پانگس اُرش ءِ تہءَ نشانگ کنگ بیتگ۔

واکدارانی ردءَ ناشناسیں ھنداں چہ پاکستانی لشکریانی پانگس ءِ سرءَ دئے راکٹ آس دیگ بیتگ اَنت۔

دوھیں اُرشانی تہءَ واکداراں تاوانانی بابت ھچ پئیمیں اھوال شنگ نہ کُتگ اَنت وھدیکہ اُرشانی ذمہ واری ھم داں انگت ھچ گل ءَ نہ من اِتگ اَنت۔

دومی نیمگ ءَ تمپ ءَ کوھاڈ ءِ ھند ءَ تیرگواری ءِ وئیل ءَ یک مردمے بیران بیتگ، تیر گواری ءِ وئیل دوشی شپ ءَ دیما اتکگ پولیس ءِ ردءَ گوستگیں شپ ءَ کوھاڈ نھنگ کور ءِ نزیک ءَ ناشناسیں مردماں تیرگواری کُتگ ءُ یک مردمے کُشتگ۔

بیران بیتگیں مردمے پجار قریش ء الہی بخش جھمنند کوھاڈ تمپ ءِ ناماں چہ بیتگ۔

البت داں انگت وئیل ءِ پُشدر زانگ نہ بیتگ اَنت۔

انڈین پریمیر لیگ ءِ شانزدھمی سیزن ءِ سیمی فائنل ءَ گجرات ٹائٹنز ءَ ممبئی انڈین شست ءپ دو رناں پروش داتگ ءُ اے سال ءَ ھم وت ءَ پائنل ءَ سرکتگ – اے گجرات ءِ دومی رند انت کہ پائنل ءل سربوگ ءَ انت – پائنل گوازی گجرات ءُ چنئی سپرکنگز ءِ میان ءَ بیست ءُ ھشت مئی ءَ ماں احمد آباد ءَ نریندر مودی کرکٹ پٹ ءَ کنگ بیت انت-

ممبئی انڈین ءِ لیبی سوریہ کمار ءِ نیم سنچری کنگ ءَ ابید ھم ممبئی ٹیم ءَ دوسد ءُ سِی ءُ چار رنانی ٹارگٹ پروشت نہ کتگ ءُ ممبئی ٹیم ھژدھمی اوور ءِ دومی بال ءَ یکسد ءُ ھپتاد ءُ یک رنانی جوڈ کنگ ءَ پد آل آؤٹ بوتگ انت – سوریہ ءَ سِی ءُ ھشت بالاں شست ءُ یک رن جوڈ کتگ – تلک ورما چِل ءُ سَے رنانی جوڈ کنگ ءَ پد آؤٹ بوتگ وھدیکہ کیمرون ءَ سِی رن جوڈ کتگ – گجرات ءِ نیمگ ءَ تیزتریں بالر موھت شرما ءَ پنچ وکٹ گپتگ – ممبئی بندات جوان نہ بوتگ کہ آئی ءِ پد ماں پد وکٹ کپان بوتگ انت ءُ گوازی ءِ کٹگ ءَ بے سوب بوتگ –

چدوپیسر اولسر ءَ بیٹنگ کنان ءَ گجرات ءِ لیبی شبھمن گل ءَ لائف لائن ءِ پائدگ چست کتگ ءُ سنچری کتگ چریشی ءَ گجرات ءَ سَے وکٹانی تاوان ءَ دوسد ءُ سِی ءُ سَے رنانی ٹارگٹ داتگ – گل ءَ شست بالاں یکسد ءُ بیست ءُ نھ رن جوڈ کتگ – شبھمن گل ءَ ھپت چوکا ءُ دھ چکا جتگ – سائی شدرن ءَ سِی ءُ یک بالاں چِل ءُ سَے ءُ گڈسر ءَ کپٹن ہاردک ءَ سینزدہ بالاں بیست ءُ ھشت رن جوڈ کتگ ءُ ناٹ آؤٹ بوتگ –

اے سیزن ءِ تہ ءَ گل ءِ اے سیمی سنچری انت ءُ آئی ءَ ٹی ٹوئنٹی ءِ کیرئیر ءَ درساں مستریں اسکور ھم جوڈ کتگ – آئی پی ایل ءِ اے سیزن ءَ درساں گیش وراٹ کوھلی ءُ جوس بٹلر ءَ سنچری کتگ کہ اے ھردوکاں چار چار سنچری کتگ –

روکپتی بلوچستان ءِ بنجاھی شھر زاھدان ءَ گوستگیں روچ ءَ آدینگ ءِ نماز ءَ پد بیگواھی، پاھو دیگ ءُ دگہ دگہ وئیلانی بگیری ءَ زھرشانی ءُ روانک کشگ بیتگ اَنت-

روانک ءَ بازیں کچے ءَ مردماں بھر زرتگ ءُ روانک ءَ بھر زیروکیں مردمانی دستاں بینر ءُ تاک بیتگ انت کہ آیانی سر ءَ ایرانی سرکار ءِ ھلاپ ءَ لبز نبشتگ بیتگ اَنت-

روانک ءَ اوگام جنان ءَ بندیگیں مردمانی یل کنگ ءِ لوٹ کنگ بیتگ اَنت کہ آیانی توک ءَ گوشگ بیتگ کہ سیاسی بندیگ یل کنگ بہ بنت-

ھمے وڑ روانک ءَ گوستگیں روچاں روکپتی بلوچستان ءِ دمگ ھاش ءِ نندوکیں مولوی عبدالغفار نقشبندی ءِ نیمگ ءَ شنگ کنگ بیتگیں تامر بندے ءَ گوشگ بیتگ ات کہ آجوئی ھمک انسان ءِ ھک اِنت باید ھرکس وتی آجوئی ءِ واستا جھد بہ کنت-

روانک ءَ چرے گپانی پشدر ءَ آئی ءِ پلامرزی کنگ بیتگ ءُ آئی ءِ ھک ءَ اوگام ءُ ستاشانی کنگ بیتگ-

دومی نیمگ ءَ دزاپ ءِ مکی مسیت ءِ پیش امام ءُ سنی رھشون مولانا عبدالحمید بلوچ ءَ گوشتگ کہ بندیگ پاھو دیگ بیگ ءَ اَنت، مھلوک کوکد کنگ اِنت کہ نان لوٹ اَنت-

آئی ءَ گوشتگ کہ ایمنی ءُ آرامش ھچ نیست اِنت پرچاکہ مجلس ءَ نمائندہ ھچ نہ گوش ایت پرچا ھچ کارے نیست نہ کنت؟ ھمے سبب اِنت اے مجلس ءُ نمائندگاں دگہ ھچ پلسفہ وجود نیست اِنت-

ھاران ءَ نرسنگ کالج ءِ نودربرانی نیمگ اسکالرشپ ءِ نہ رسگ ، لیکچرارانی کمی ءِ بگیری ءَ زھرشانی روانک ءِ کشگ بوتگ ءُ بنجاھی شھدگ بند کنگ بوتگ –

اے میان ءَ نودربراں چہ ھاران نرسنگ کالج ءَ روانک کش اِتگ ءُ پدا بنجاھی شھدگ ءَ نندانک جتگ –

ھاران نرسنگ کالج ءِ یک نودربرے ءِ گوشگ ات کہ گوستگیں بازیں سالے بیت کہ واکدارانی نیمگ ءَ دلگوش نہ دیگ ءِ سوب ءَ کالج بازیں جنجالانی دیمپان انت چریشی ءِ سوب ءَ نودربر لاچار انت کہ زھرشانی بہ کن انت –

آئی ءَ گوشتگ کہ چدوپیسر ھاران ءِ ایم پی، چیف سیکٹری ءُ جانسلامتی ءِ سیکٹری ءَ کالج ءِ تر ءُ تاب کتگ ءُ مارا باور کنائیں اِتگ کہ جیڑہ گیشگیوار کنگ بنت بلے بازیں وھدے ءِ گوزگ ءَ پد ھم خاران نرسنگ کالج ءِ بنکی جیڑہ گیشگیوار کنگ نہ بوتگ انت –

آئی ءِ گوشگ ات کہ گوستگیں دو سال انت کالج ءَ ناکہ لیکچرار ءِ ھست ءُ ناکہ نودربر اسکالرشپ دیگ بوگ ءَ انت – ھاران نرسنگ کالج ءِ نودربرانی گیشتریں کچ گریبیں مردمانی انت کہ بید اسکالر شپ ءَ وتی وانگ ءَ سرجم کت نہ کن انت –

دومی نیمگ ءَ ھاران ءِ ڈپٹی کمشنر منیر احمد موسیانی سروکی ءَ نرسنگ کالج ءِ جیڑوانی درگت ءَ اجلاس ءِ برجم دارگ بوتگ کہ اودا نودربرانی اسکالر چپ، ٹیوٹر کمی ءُ ٹرانسپورٹ ءَ ھوار درسیں جیڑوانی سر ءَ گپ جنگ بوتگ –

اے میان ءَ نودربراں لوٹ کتگ کہ واکدار نودربرانء لوٹانی سر ءَ گامگیج بہ زور انت ءُ آھاں زوتاں زوت گیشگیواری ءِ راھے در بگیج انت –

ھاران ءِ ڈپٹی کمشنر نرسنگ کالج ھں ائیرکنڈیشن ءُ ڈی ایس ایل انسٹالیشن، کمپیوٹر دیگ ھکم داتگ ءُ گوشتگ کہ ھنے زوتاں نودربرانی ٹرانسپورٹ ءِ جیڑہ ھم گیشگوار کنگ بیت –

ھاران ءِ ڈپٹی کمشنر ءَھمے زوتاں اسکالر شپ دیگ ءُ لیکچرارانی آرگے درگت ءَ برزی تبک واکداراں مراسلہ نبشتہ کنگ ءِ باور کنائیں اِتگ –

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلیگرام چینل آشوب ءَ شنگ کرتگیں درشان ءِ تہ ءَ مشکے ءَ پوجی پانگس، کُشندہ ٹولی ءُ گچگ ءَ یوفون ٹاور ءِ سر ءَ بوتگیں اُرشانی زمّہ واری منّ اِتگ انت –

میجر گوھرام ءِ رِد ءَ بیست ءُ پنچ مئی ءِ بانگواہ ءَ ادار شش ءَ مشکے ءِ دمگ جھکی کلاتک ءَ سرمچار ءُ ریاستی کشندہ ٹولی تر ءُ گرد ءِ میان ءَ دپ کپتگ انت کہ پدا میڑ بندات بوتگ، اے میڑ ءَ ریاستی مکبرانی ٹولی (مسلح دفاع) جانی ءُ مالی تاوان رستگ – میڑ ءَ پد ھما دمان ءَ پاکستانی پوج ءِ جنگی بالگرداں نزیکیں ھند منجو ءَ کمانڈو ایر گپتگ انت ءُ زوراکی بندات کتگ ءُ درچک ءُ دار مانداشتگ انت –

آئی ءَ گوشتگ کہ اے میڑ ءَ پد سرمچاراں شپ ءِ ادار نُھ ءَ مشکے میانی کلات ءَ برجاھیں پوجی پانگس ءِ سر ءَ راکٹ ءُ وتکاریں سلاھاں گوں اُرش کتگ چریشی ءَ دو پوجی کارمند مُرتگ ءُ یک ءِ زدگ بوتگ –

جارکش میجر گوھرام ءَ دیمتر ءَ گوشتگ کہ یک دگہ اُرشے ءَ سرمچاراں پنجگور ءِ دمگ گچک ءَ پاکستان ٹیلی کمیونیکیشن لمیٹڈ ءِ موبائیل پون کمپنی نشانگ کتگ ءُ آئی ءِ مشینری مانداشتگ انت – اے ٹاور بلوچستان ءِ جتا جتائیں ھند ءُ دمگاں بلوچ آجوئی لوٹوکیں جھد کار ءُ کمک کارانی ٹریس کنگ ءِ ھاتر ءَ کارمرز کنگ بنت –

جارکش ءَ گوشتگ کہ مئے اُرش بلوچستان ءِ آجوئی ءَ تاں برجاہ مان انت –