گُلزار امام ءُ پریس کانپریس – اے بی ریکانی

گُلزار امام ءُ پریس کانپریس

نبشتہ‌کار : اے بی ریکانی

دی بلوچستان پوسٹ

چوناهیگا ما بچاریں کُجام هم مردم بہ بیت وهدے ٹارچر کنگ بیت اِنت هر وڑیں جسمانی هزیت دیگ بیت اِنت گُڑا آ مردم الّم هزیّت دیوک ءِ هبرانی منّوگر بیت ءُ چینچو تچک بیت اِنت چینچو چوٹ اے هبر ءَ هزیّت وروک بہ زانت-

ٹارچر ورگ وهد یک بلائیں سکیں گرانیں ساهتے، شپ ءُ روچ ٹائرے ءِ تہ ئے ءُ درتکگ ئے لٹ ورگ ءَ ئے، کرنٹ دیگ بوگ ءَ ئے، مُشت ءُ شامات ورگ ءَ ئے، پٹرول جنگ بوگ ءَ ئے، تو بُرزا ٹنگ اِتگ ئے تئی پادانی چیر ءَ ڈیوا بلینگ بوتگ ءُ ڈیواهانی آس تئی پادانی چیر ءَ سوچگ ءَ اِنت یا تئی هجگیں هازهاں هزیت دیگ بوگ ءَ اِنت تئی گور ءَ دگہ راه نیست ابید ئے راستی ءِ پدر کنگ ءَ گُڑا تو الّم راستی ءَ پدر کن ئے، نو تو چینچو دْروگ بند ئے چینچو راست گْوش ئے آ گوں ترا سیادی دار اِیت اِنت-

گُلزار امام ءِ میڈیا ءِ دیم ءِ هارگ بس بلوچ کوم ءِ دل ءِ تہ ءَ گوں گُلزار امام ءَ نفرت پیداک کنگ اِنت یا بلوچ راج ءِ دل ءِ تہ ءَ پہ جُهد کاراں بُگز ءُ زار پیداک کنگ اِنت ءُ دگہ هِچ! بلے گُلزار امام ءَ سالے نزیک اِنت ٹارچر کنگ بوگ ءَ اِنت گُڑا مجبور اِنت کہ دژمن ءِ هبراں بہ منّ اِیت اِنت بلے گُلزار امام پریس کانپریس ءِ تہ ءَ اَنگت پیشدار اِیت کہ آ انگت جُهد کارے ءُ زمین زادگے-

گُلزار امام ءَ پانزده سال ءَ گیش اِنت کہ پہ زمین جیڑ اِتگ ئِے ءُ یک سلاهبندیں گَلے ءِ سر کماش بوتگ گُڑا گُلزار ءِ گُلگدار شش دمان تہ ءَ چتور هتم بیت کنت اِنت؟ اے هم جیڑگی هبرے-

وهدے گُلزار امام ءَ گُشگ بیت اِنت کہ تو ریاست ءَ گوں اے مدت ءَ کُت کن ئے کہ هما مردم کہ آجوئی لوٹوک اَنت آ بیا اَنت گوں ریاست ءَ سَلاه بہ کن اَنت گُڑا گُلزار گُش اِیت اِنت” من کوشست کن آں” چہ گُلزار ساهب ءِ اے هبراں زاهر اِنت گُلزار امام انگت پہ زمین جیڑگ ءَ اِنت ءُ گوں ریاست ءَ سَلاه کنگ ءِ هک ءَ نہ اِنت-

گُلزار امام ساهب یا ریاست اے هبر ءَ شر سرپد اَنت کہ هما مردماں پہ زمین ءَ هر وڑیں کربانی داتگ ریاست ءَ آیانی مردم شهید کُتگ اَنت آ مردم گوں ریاست ءَ هِچ وڑ ءَ سَلاه نہ کن اَنت-

گُلزار امام ءَ اے جُست کنگ بیت اِنت کہ ”شُمارا کُروڑانی کساس ءَ سلاه ءُ زر رستگ چہ کُجا آتکگ اَنت؟” گُلزار یک کسانیں پسّوے دنت کہ ” لازم دگنیا ءِ تہ ءَ یک جنگ ءِ بندات بیت اِنت کجام هم وڑ ءُ پیم ءَ اے سامان رس اَنت انچوش بلوچ ءَ را هم سر بوگ ءَ اَنت”-

وهدے کہ گُلزار ساهب ءِ دست ءِ چیر ءَ نور سلام نور ءِ دابیں سنگت رُستگ پہ زمین جنگ ءِ داتگ ءُ نمیران بوتگ، اُستاد سناء ءِ وڑیں همبلاں چہ گُلزار ءَ درس زُرتگ یا آ دگہ بی آر اے شهید بوتگیں همبل بہ بنت، گُلزار امام ءِ دست ءِ چیر ءَ ناسِر امام رُستگ ءُ پہ زمین پدائیگ بوت گُڑا چُشیں راهشون چتور وتی راه ءَ مٹ کنت ءُ پد کنز اِیت اِنت؟

گلزار امام ءِ چد ءُ پیسر من اکسے دیستگ اَنت ٹپ ءُ ٹوری اَت چہ هما اکس ءَ زاهر اَت کہ گُلزار امام ءَ را وڑ وڑیں هزیت دیگ بوتگ-

منی هیالاں ما مسلو ءَ گوں شوکیں نگاهے بچارین ءُ نو مکبر ءُ دلار یا دگہ هزار وڑیں هبر بہ کن ایں یا ودار بہ کن ایں دانکہ راستی پدر بہ بیت اِنت- انو من تچک گُشاں راستی چیر دیگ بوگ ءَ اِنت بس دْروگ دیما هارگ بوگ ءَ اَنت-

بلوچ راج یکبرے ودار بہ کنت کہ چو مہ بیت مرچی ما وتی دپ ءَ بند مہ کن ایں یک جُهد کارے ءَ هزار وڑیں هبر بہ گوش ایں ءُ باندا همے جُهد کار شهید کنگ بہ بیت اِنت ءُ ما وتی هبراں گوں پشومان بہ بہ ایں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔