TBP Balochi

شمبے ءِ سھب ءَ بلوچستان ءِ جتاجتائیں دمگاں سلاہ بندیں جنگ ءُ تراکانی ھال رس اِتگ اَنت ھمے وھد ءَ بلوچ بلوچ لبریشن آرمی ”بی ایل اے“ ءَ وتی آپریشن ھیروف ءِ دومی بھر ءِ بندات ءِ جار جتگ۔

بلوچستان ءِ بازیں دمگاں جاورھال ناگیگ انت-

شال ریڈ زون ءَ تیرگواری ءُ تراکانی ھال۔

بلوچستان ءِ بنجاھی شھر شال ءِ گچینی دمگ ریڈ زون ءَ تیر گواری ءُ تراکانی ھال رس اِتگ اَنت، شھر ءِ جتا جتائیں جاھاں تراک ءُ تیر گواری برجاہ اَنت۔

نوشکی: سینٹرل جیل ءُ ایف سی ءِ بنجاھی کارگس ءِ نزیک ءَ جنگ ءُ چوپ بوتگ۔

بنشون ءِ رد ءَ نوشکی ءِ سینٹرل جیل ءِ نزیک ءَ مزنیں تیرگواری ءِ ھال بیتگ ءُ لس ھالانی تہ ءَ بی ایل ءِ سینٹرل جیل دستیگ کتگ-

دومی نیمگ ءَ نوشکی ءَ ایف سی ءِ بنجاھی ھیڈکوارٹر ءِ نزیک ءَ ھم سلاہ بندیں جنگ ءُ چوہ برجاہ اَنت کہ اود ءَ توپ ءُ تیرگواری ءُ مزنیں تیرگواری ءِ توار اِش کنگ بیتگ۔ وھدے کہ نوشکی ءَ سی ٹی ڈی ءِ کارگس بی ایل اے ءِ سرمچاران دستیگ ءُ بازیں کارندہ دزگیر کنگ بیتگ اَنت۔

ڈھاڈر ، کچھی پولیس ءِ سر ءَ سلاہ بندیں مردماں اُرش کتگ ۔

کچھی ءِ دمگ ڈھاڈر ءَ بازیں کچے ءَ سلاہ بندیں مردماں شھر ءِ تہ ءَ پترگ ءِ ھال انت پد ءَ پولیس ءِ سر ءَ اُرش کتگ۔ اے اُرش ءِ تہ ءَ پولیس ءِ بازیں گاڑی سوچگ بوتگ اَنت ءُ بازیں کارندہ ٹپیگ بوتگ اَنت۔

کلات: لشکر ءِ بنجل ءِ گیٹ ءَ تراک، جنگ ءُ چوپ برجاہ انت

کلات ءَ سلاہ بندیں مردماں آپریشن ءِ وھد ءَ تراکناکیں گاڑی ءَ گوں لشکر ءِ مستریں دروازگ ءَ نشانگ جوڑ کتگ ءُ ایشی ءَ پد سلاہ بندیں جنگ بندات بوتگ۔

شال سریاب روڈ : پولیس ءِ موبائل ءِ سر ءَ اُرش ۔

شال ءَ سریاب روڈ ءِ نزیک ءَ پولیس اسٹیشن سریاب ءِ نزیک ءَ پولیس ءِ موبائل ءِ سر ءَ سلاہ بندیں مردماں اُرش کتگ ءُ ایشی ءِ آسر ءَ دو پولیس کارندہ بیران بوتگ اَنت۔ پولیس ءِ موبائل سرجم ءَ سُتکگ ءُ ھاک بوتگ۔

ریل اسٹیشن ءَ چہ تیرگواری ءُ تراک ءِ توار ھم بوتگ۔

بی ایل اے ءِ آپریشن ”ہیروف“ ءِ دومی بھر بندات کنگ بوت-

بلوچ لبریشن آرمی ءِ نیمگ ءَ یک کسانیں بیانے ءِ تہ ءَ گْوشگ بیتگ کہ آپریشن ھیروف ءِ دومی بھر بلوچستان ءِ جتا جتائیں دمگانی تہ ءَ بندات کنگ بیتگ ۔ اے گل ءَ اے کار ءَ را “ریاستی لشکر ءُ انتظامی ڈھانچھانی ھلاپ ءَ جنگ” لیک اِتگ۔ بیان ءَ چہ دمگی مھلوک ءَ ھم دزبندی کنگ بوتگ کہ آ گوں اے گل ءَ ھمکاری بہ کن اَنت۔

بی ایل اے ءِ آفیشل چینلاں ھم اُرشانی زمہ واری ءِ منگ ءُ کلو ءُ ویڈیو شنگ کنگ بوتگ اَنت۔

گل ءِ سروک ءَ تامربندی درشان شنگ کتگ

بی ایل اے ءِ سروک بشیر زیب ءَ دراجیں کلوھے شنگ کتگ ءُ بلوچ راج ءَ چہ وتی گساں درکپگ ءُ پاکستانی لشکر ءِ ھلاپ ءَ جنگ کنگ ءِ لوٹ کتگ۔ اے پیغام سوشل میڈیا پلیٹ فارم ءُ گل ءِ چینلاں شنگ بوتگ۔

بلوچستان ءِ جتاجتائیں دمگاں ترندیں اُرشانی ھال دیم ءَ آیگ ءَ اِنت دومی نیمگ ءَ بلوچ لبریشن آرمی ءَ وتی یک بیانے ءِ تہ ءَ گْوشگ بیتگ کہ آئی ءَ آپریشن ھیروف ءِ دومی بھر بندات کُتگ۔

بنداتی ھالانی رد ءَ ھاران، گوادر، شال، نوشکی، پسنی ءُ دالبندین ءَ ھوار بازیں دمگاں تراک ءُ مزنیں تیرگواریانی توار اشکنگ بوگ ءَ انت۔

بی ایل اے ءِ نیمگ ءَ شنگ بوتگیں بیان ءِ تہ ءَ گْوشگ بیتگ کہ سرجمیں بلوچستان ءَ آپریشن ھیروف ءِ دومی بھر بندات کنگ بیتگ کہ گل ءَ ایشی ءَ را ریاستی سیکورٹی ءُ انتظامی ڈھانچانی ھلاپ ءَ گھگیری نامینتگ۔ بیان ءَ چہ دمگی مردماں ھم دزبندی کنگ بوتگ کہ آ گل ءِ ھمراھی ءَ بہ اوشت اَنت۔

زانگ بہ بیت کہ بی ایل اے ءِ آپریشن ہیروف ءِ اولی بھر 26 اگست 2024 ءَ بندات کنگ بوتگ کہ ایشی ءِ تہ ءَ بی ایل اے ءِ جتا جتائیں سرمچاراں جتا جتائیں جاھاں پد ماں پد ءَ اُرشانی بندات کتگ- ھمے وڑ بی ایل اے ءِ سرمچاراں بیلہ بنجل ءِ سر ءَ اُرش کتگ ءُ بیست ءُ چار کلاکاں گیش آیاں وتی دستیگی ءَ داشتگ-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں بیانے ءِ تہ ءَ گْوشتگ کہ سرجمیں بلوچستان ءَ آپریشن ھیروف ءِ دومی بھر بندات بیتگ کہ آ زور گیریں ریاست ءُ آئی ءِ دراھیں جنگی ءُ انتزامیہ ءِ ھلاپ ءَ سکیں ٹوھیں جنگے برجاہ اِنت۔

آئی ءَ دیمترا گْوشتگ کہ بلوچ راج گوں سرمچاراں ھمراہ بہ بنت ءُ ھر شھر ءُ ھر کوچگ ءُ ھر میتگ ءَ دژمن ءَ بے سوب بہ کن انت ءَ دژمن ءَ را پدّریں کلوہے بہ دنت کہ آئی ءَ ماں بلوچستان ءَ ھچ جاگہ ​​نیست۔

شال ءَ گیس ءِ لیک ءِ سوب ءَ مردے، یک جنینے ءُ دو زھگ دمتوس بوتگ ءُ بیران بوتگ اَنت۔

ھالانی رد ءَ بلوچستان ءِ بنجاھی شھر شال ءِ دمگ نواں کلی لیبر کالونی ءَ یک لوگے ءِ تہ یَ گیس ءِ لیک ءِ سبب ءَ دم ءِ بند بوھگ ءَ چہ چار مردم بیران بوتگ انت۔

لاش پہ گیشیں چار ءُ تپاس ءَ نادراھجاہ ءَ سر کنگ بوتگ اَنت کہ نادراھجاہ ءِ انتزامیہ ءِ رد ءَ بیران بوتگیں مردمانی تہ ءَ مرد ءُ جن ءُ آیانی دوئیں چُک ھوار اَنت۔

زانگ بہ بیت کہ شال ءَ گیس ءِ لوڈ شیڈنگ، بے وھد ءَ گیس بند کنگ ءُ زمستان ءَ اناگہ ءَ پچ کنھمگ ءِ سبب ءَ اے وڑیں وئیل باز رند ءَ بوتگ انت۔

شال ءَ گیس ءِ لیک ءُ دگہ اے رنگیں وئیلان بازیں شھریانی ساہ گپتگ انت، ایشی ءِ سبب ءَ شھری زمستان ءَ گیس ءِ کارمرز کنگ ءَ ترسگ ءَ انت۔

شھریاں گشتگ کہ بازیں دزبندیاں ابید واکداراں ھچ وڑیں الکاپیں گامگیج زورگ نہ بوتگ کہ ایشی ءِ سبب ءَ شھریانی جان ءُ ساہ مرگ ءُ زند ءِ تہ ءَ انت-

پاکستان پوج ءِ ھمگرنچیں ادارہ آئی ایس پی آر ءَ ٹاہ داتگ کہ 29 جنوری 2026 ءَ بلوچستان ءَ دو جتاجتائیں انٹیلی جنس بیسڈ آپریشنزانی میان ءَ یکجاھی ھساب ءَ چل ءُ یک مردمانی جنگ ءِ ٹاہ داتگ-

آئی ایس پی آر ءِ رِد ءَ اولی آپریشن ھرنائی ءِ کش ءُ گور ءِ دمگ ءَ کتگ، چریشی ءِ آسر ءَ تُرندیں تیرگواری ءِ رد ءَ پد ءَ سی مردم جنگ بیتگ انت- درشان ءِ رِد ءَ کاروائی ءِ میان ءَ مزنیں کچے ءَ سلاہ، گولہ بارود ءُ تراکناکیں شورو دزکپتگ انت-

آئی ایس پی آر ءِ گوشگ اِنت کہ دومی انٹیلی جنس بیسڈ آپریشن پنجگور ءَ کنگ بیتگ – پوج ءِ رِد ءَ اے آپریشن ءَ یازدہ مردم جنگ بیتگ انت- درشان ءِ تہ ءَ گوشگ بیتگ کہ کاروائی ءِ میان ءَ سلاہ ءُ گولہ بارود ءَ اَبید پانزدہ دسمبر 2025 ءَ پنجگور ءَ برگ بیتگیں بینکانی زر ھم دزکپتگ اَنت-

بلے تنی وھدی آزاتیں رسانکدر ءَ اے گپ راست کنگ نہ بیتگ-

پاکستانی پوج ءَ پنچ مردم آوار جنگ ءَ پد ناشناسیں جاھے ءَ برتگ اَنت-

چہ سندھ ءَ ھالانی رِد ءَ نواب شاہ ءِ دمگ خیرپور ءَ پاکستانی پوج ءَ لوگ سر ءَ بیڑبرتگ پنچ مردم دزگیر کتگ ءُ وتی ھمراھی ءَ برتگ اَنت چریشی ءَ پد آ دیم ءَ آرگ نہ بیتگ اَنت-

پاکستانی پوج ءِ دست ءَ زورانسری آوار جنی ءِ نشانگ بیتگیں مردمانی پجّار نور محمد ء جمعہ خان، نور محمد ءِ چُک غلام محمد ءُ ظفر ء حضور بخش نام ءَ چہ بیتگ اَنت وھدے کہ آ دگہ دوئیں مردمانی پجّار نہ بیتگ اَنت-

وئیل ءِ ھلاپ ءَ زورانسری آوار جنی ءِ نشانگ بیتگیں مردمانی کھول ءَ خیرپور انتزامیہ ءِ کارگس دیم ءَ زھرشانی کتگ ءُ بیگواھیں مردمانی یل کنائنیگ ءِ لوٹ کتگ-

ھالانی رِد ءَ زورانسری آوار جنی ءِ نشانگ بیتگیں سرجمیں شھری ڈومکی ٹک ءَ چہ سیادی دار اَنت کہ سندھ ءِ دمگ خیرپور ءَ دگہ دمگاں جھمنند اَنت-

بلوچ اسٹوڈنٹس ایکشن کمیٹی ءِ نیمگ ءَ بلوچستان ءِ جتا جتائیں جاھاں کتاب میڑہ یکشل ءَ برجاہ انت کہ اود ءَ جتا جتائیں وھداں کتاب میڑہ کنگ بوگ ءَ انت-

بلوچ اسٹوڈنٹس ایکشن کمیٹی ءَ ھمے نوکیں سال ءَ جار پِرینتگ ات کہ بلوچ اسٹوڈنٹس ایکشن کمیٹی نوکین سال ءَ بلوچستان ءِ جتاجتائیں پھناتاں میڑہ برجاہ دار ایت-

چرے کتاب میڑھانی سر ءَ بازیں وانگی کتاب پیش کنگ بوگ ءَ انت کہ اود ءَ ھمک نودربر کتابی وانگ ءُ زانگ ءِ پِڑ ءَ کتاباں گوں ھبداری ءَ گندگ بوگ ءَ انت-

ھمے وڑ ءَ مروچی بلوچستان ءِ دمگ نصیر آباد ڈیرہ مراد جمالی ءَ بلوچ اسٹوڈنٹس ایکشن کمیٹی ءِ نیمگ ءَ اللہ چوک ءَ یک میڑھے برجم دارگ بوتگ کہ اود ءَ نودربراں کتاب زرتگ ءُ آیانی گون ءَ دلگوشی بیتگ انت-

زانگ بہ بیت اے گپ ھم دلگوشی انت کہ بازیں جاھاں بلوچ اسٹوڈنٹس ایکشن کمیٹی ءَ انتزامیہ ءِ نیمگ ءَ ھم کتاب میڑھانی برجم کنگ ءَ جنجالانی دیمپانی انت-

اود ءَ سرکار ءِ گوشگ انت اے کتاباں انتزامیہ ءِ رَزا گون نہ انت پرے ھاتر ءَ گیشتریں وھداں کتاب میڑھانی سر ءَ اڑانک گندگ ءَ کاینت-

نبشتانک: وتی ناسرجمیں زند

نبشتہ کار: مھُسن ساجدی

دی بلوچستان پوسٹ

اے کسہ من ءَ سک جیڑگ پرما اِیت کہ من وتی زندگی گوں چونیں جَیڑہ ءُ جنجالاں وت ءَ داں اے اُمر ءَ رسینتگ ۔ مردم سک جیڑ اِیت کہ مئے کسانی چی ءَ پَرے ھال ءَ بوتگ من اگاں وتی ھمسراں گنداں آ داں کجام ھند ءَ رستگ اَنت بلے من ھما بے راھیں منزل ءَ گون آں دل سک گمیگ بیت کہ چے بکناں؟ نوں من وتی ھمسراں گنداں من ءَ ھمے گُباں بیت کہ ما چنچو پدمنتگیں چہ وتی  زندگی ءِ گِرانیں منزلاں چہ ھما دیم کپتگ اَنت کہ پد ءَ کَدی واتری ءِ نام ءَ نہ زانت بنی آدم داں زندگ اِنت گڑا آئی ءَ جنزگی اِنت داں کہ آ نہ جُنز اِیت آ کدی وتی زندگی ءَ ناسرجمیں زند گُش اِیت بلے من تَنیگا نہ پھم اِتگ کہ منی گُڈی منزل  کجا اِنت؟ من ءَ کَدی دست کپ اِیت یا نا؟ من ھمائی ءِ رَندگیری ءَ سر کپاں اَنت بس ھمے پھم اِتگ ھما مردم دیمروی کنت کہ آئی ءَ شریں وڑے ءَ مال ءُ مَڈی ھست بزاں زَر ءُ نوکری شریں ھمسپر بلے من ھما  چاگرد ءَ گوں سیادی داراں آ ھما کہ نہ بوتگیں راہ اَنت یا ھما بے بُنیادیں گپ یا دومی مردمانی اِیرجنگ ءُ وت ءَ ھما پھک ءُ پلگاریں مردم  پھم اَنت۔

اے چاگرد ءَ ھرکس نشتگ گُڑا ھمے وڑ ءُ پیم ءَ اِنت پد ءَ پہ گلامیں راج ءَ اے سکیں بلاھیں جنجالے کہ آ راج ءَ مدام پہ وتی ماتیں گُلزمیں ءَ پہ ھون ریزی کتگ بلے انگاں آ راج ءَ چوشیں مردم نیست کہ وتی راجی رھشونانی رَند گیری ءَ بکن اَنت بلے پہ وتی لاپ ءِ ھاتر ءَ کجا داں کجا روان اَنت پد ءَ ھما راج گُش اِیت ما گلامیں بلے تو وت ءَ وت گلام کتگ ءُ گلامی وت زُرتگ  اد ءَ بازیں مردم ھست اَنت دگرانی پاداں کپتگ اَنت دپّیلاں وارت ءُ وتی لاپ ءَ والینی گُڑا ھچبر دیمروی نہ کنت من ھمے چاگرد ءِ بھرے آں کہ ھچبر پہ وتی کسانیں پدریچاں نہ جیڑاں ءُ وتی نوک رُستگین ورنا ءُ وتی بانداتیں ھیال ءَ نہ داریں مرچی  ما بچاریں ھما راج ءِ نوک رستگیں ورنا ھما دری راھاں روگ ءَ اَنت کجام نشہ ءَ آ نہ کنگ ءَ اَنت ھما کہ ھراب تِریں کار اَنت آ کنگ ءَ اَنت اِش وتی زندگی ءِ واست ءَ نہ جیڑ اَنت منی وڑیں نابودیں مردم ءَ کجام راستی ءَ سُوج دیاں من وت ھیراناں من پرچا اے گلامیں راج ءَ گوں سیادی داراں اے چونیں واھگے منی گور ءَ کپتگ بلے انگت ءَ من نہ پھم اِتگ بلے راستیں بھر ھمیش اِنت پہ وتی براتانی بھا کنگ ءَ مات ءُ گوھارانی سر ءَ زوراکی کنگ وتی ھمکوپگیں براتانی گار ءُ بیگواہ کنگ من ءَ وتی سر ءَ بزگ بوگ ءَ اِنت تو کَدی وت ءَ شریں مردمے پھم اِتگ تو چہ آ دگراں شرتر نہ ئے؟

من ایشی ءَ وتی ناسرجمیں زند پھماں پمیشکہ بازیں چیز ھست اَنت من ءَ ھچ وش نہ باں من وت نہ زاناں اے منی نزوری اِنت یا می تنگی اِنت آ راہ ءُ راھبنداں نہ رستگاں یکیں اے ھبر من پھم اِتگ کہ کَس پہ کَس ءَ اد ءَ درد وار نہ بیت ءُ آئی ءَ را بازیں تاوان اَلم دنت مرچاں ما بچاریں برات پہ برات ءَ نہ بیت گُڑا اَلم تو اے پھم ئے کہ ما چہ وشیاں باز گِستا اِیں ءُ پد ءَ سک دُور اَنت اے چاگرد ءَ اَنچیں مردم ھست کہ ترا ھما جُستاں کن اَنت ترا کنگی نہ اَنت ءُ ترا ھما کتابانی نام ءَ گُش اِیت بلے وت نہ زانت ھما کتابانی مَکسد چے اِنت ترا کجام راہ ءَ پِیشداری بازیں وانگجاھاں ھما کتاباں دنت پہ وانگ ءَ نودربرانی واست ءَ ھچ وڑیں شوک پیدا کُت نہ کنت متلب( Motivational) کتاب ترا دنت ءُ لھتیں وانگجاھ دومی ءِ (apposite ) ءَ اُوشتاتگ اَنت بلے بلاھیں جنجالے پہ منی وڑیں نوردرانی واست ءَ تنگی ءَ وتی جند ءَ شریں وڑے ءَ پھم اِت نہ کنت گُڑا کجا اے پیمیں کتاب ونت کنت؟

اگاں من بُگشاں اے شر اَنت پہ نودربراں بزاں من وت تنگاں سرپد نہ آں ءُ من ءَ وت سرپد بوگی اِنت پیسر ءَ پد ءَ وتی آیُکیں پدریچ ءَ شریں (ناول) آورت کُت بکناں ءُ وتی کساں سالیں نبشتہ کارانی (گِدار ءُ آزمانک) وانگی اَنت گوں ایماداری ءَ پد ءَ وتی برات یا کہ زھگانی واست ءَ دست گِرگ بہ بنت۔ من داں کَد ءَ رَستگاں بلے چوشیں مردمے نہ دیستگ کہ بگوش اِیت کہ تو وتی تَب ءِ کتاب ءَ بوان اَلم یک اَنچیں سُوج ئِے دنت گُڑا پد ءَ مردم بندات کنت انچوش پہ دیمیں جیڑگاں بزاں (Overthinking ) ھَد ءَ چہ گیش جیڑگ کہ من پرچا اے کتاب نہ ونتگ من ءَ پِلاں مردم ءَ گُشتگ شریں کتابے یا شریں آزمانکے یا شریں گِدارے۔ من ھمے کسھانی پُشت ءَ بازیں دل رنجی دیستگ بلے لُونٹانی سر ءَ بچکندگ تالاں کُتگ بلے ھما کہ نہ بوتگیں درد ءُ رنج بوتگ اَنت بلے من ءَ اَلم گوں بوتگ اَنت۔ پمیشکہ من ایشی ءَ وتی ناسرجمیں زند گُشاں۔
من اد ءَ کسانیں نبشتانکے نبشتہ کتگ اگاں رَدی بوت من ءَ پھل بکن اِت ءُ ھاں کَسے ءَ ھراب لَگ اِت من ءَ گُشت کنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ دمگ کیچ ءَ ورنا ءِ زورانسری آوار جنی ءِ ھلاپ ءَ یکرندے پد ءَ زھرشانی دگ بند وھدے کہ چہ کیچ ءِ جھمنندیں ورنایے چہ ھاران ءَ آوار جنگ بیتگ-

گیشیں ھالانی رِد ءَ کیچ ءِ دمگ چہ تجانان، کرکی ءَ پاکستانی پوج ءِ دست ءَ زورانسری بیگواہ کنگ بیتگیں رحمدل ء محمد بخش ءِ کھول ءَ یکرندے پد ءَ سی پیک شھدگ سر ءَ نندانک داتگ-

کھول ءِ نیمگ ءَ چہ تربت ءِ نزیک ءَ ایم ایٹ شھدگ سر ءَ نندانک داتگ گاڑیانی واستا بند کتگ، چریشی ءِ سوب ءَ گاڑیانی دراجیں لین لگ اِتگ-

زانگ بہ بیت اے ورنا ءِ کھول اشی ءَ ساری بیست جنوری ءَ نندانک داتگ چریشی ءَ انتزامیہ ءِ نیمگ ءَ دلجمی دیگ ءَ پد ھلاس بیتگ-

کھول ءِ گوشگ اِنت کہ انتزامیہ ءَ آ دلجمی داتگ ءُ بیگواھیں رحمدل دیم ءَ آرگ بیتگ اَنت، بلے بازیں روچ ءِ گوزگ ءَ اَبید دیم ءَ آرگ نہ بیتگ-

آیاں گوشتگ کہ اگاں انتزامیہ وتی مھاد ءِ سر ءَ کار نہ کت آیانی نندانک سی پیک شھدگ سر ءَ برجاہ بیت-

دومی نیمگ ءَ چارشمبے ءِ روچ ءَ ھاران ءَ پاکستانی پوج ءَ چہ بلیدہ زامران ءَ سیادی داروکیں اسماعیل ملک ء ملک محمد گوں گاڑی ءَ آوار جتگ ءُ ناشناسیں جاھے ءَ برتگ

–

کھول گوشگ اِنت کہ اسماعیل ملک یک ٹیچرے ءُ آئی ءَ یونیورسٹی آف سرگودھا ءَ سوشل ورک ڈپیارنمنٹ ءَ گریجویشن کتگ-

کھول ءَ ھمگرنچیں واکداراں زوت یل کنگ ءُ پلگاریں پٹ ءُ پول ءِ لوٹ کتگ-

ماڑی انرجی لمیٹڈ ءِ نیمگ ءَ شنگ بوتگیں جار ءِ تہ ءَ گوشگ بوتگ کہ ڈیرہ بگٹی کلچاس ساؤتھ بلاک ءَ تبری ون چات ءَ گیس در اتکگ ۔

جار ءِ رد ءَ گیس چات ءِ 7 ھزار 170 پٹ جھلانکی ءَ دست کپتگ ۔ کمپنی ءِ رد ءَ بنداتی کچ ءَ چات ءِ تہ ءَ روچ ءِ 6.5 ءَ بگر 11 ایم ایم ایس سی ایپ ڈی تاں گیس ءِ پریشر ایں ۔

زانگ بہ بیت ڈیرہ بگٹی ءَ بازیں وھدے بیت کہ پاکستان ءِ سوبہ ءِ پنجاپ ءُ کراچی وڈیں شھراں گیس دیگ ءَ انت ، وھدیکہ پاکستان ءِ توانائی صنعت مزنیں کچے ءَ ھمے گیس ءِ سرا انت ۔

ھمے رد ءَ ماڑی انرجی ءَ ھوار دمگی ءُ دگہ میان استمانی کمپنی گیس ءُ دگہ مادناںی شوھاز ءَ بلوچستان ءَ انت ۔

اسلام آباد ءَ برجاھیں ماڑی انرجی لمیٹد پاکستان ءِ یک توانائی کمپنی ءِ ھست کہ سرکار ءِ نیمگ ءَ گوستگیں سال ءَ بلوچستان ءِ تہ ءَ مزنیں کچے ءَ پہ مادن ءِ شوھاز ءَ لیسن ءُ زمین داتگ.

اے کمپنی پوجی فاؤنڈیشن ءِ رد ءَ پوج ءِ چیردستی ءَ انت کہ پاکستانی پوج ءِ چل درسد انت ۔ ماڑی انرجی بنکی ءَ ہائیڈروکاربن بزاں ابرمی گیس. خام تیل ، کنڈینسیٹ ءُ مائع پٹرولیم گیس ھوار انت شوھاز ءِ کنت ۔

زانگ بہ بیت بلوچستان ءَ برجاھیں اے شوربندیانی سرا کار کنوکیں کمپنی سرا بلوچ آجوئی لوٹوکیں سیاسی گلاں بگیری داشتگ ءُ بلوچ آجوئی لوٹوکاں اشانی سرا ارش ھم کتگ ۔

پاکستان ءِ پھازگی واکدار ءُ سرکار بلوچ آجوئی لوٹوک مادن درکنوکانی ھاتر ءَ مزنیں چیلنج کہ آئی ءِ پھازگ ءَ بازیں پھازگی یونٹ جنگ بوتگ انت ۔

بلوچستان ءَ کدرتی مادن بزاں ٹیل ، گیس ، اشکر ءُ دگہ مادن درکنوکیں کمپنی گیشتر بلوچ آجوئی لوٹوکیں سلاہ بندیں گلانی نشانگ ءَ بوتگ انت ۔

بلوچ آجوئی لوٹوک اے شوربندیاں لٹ ءُ پل گوش انت وھدیکہ بازیں بلوچ آجوئی لوٹوکیں سلاہ بندیں گلانی نیمگ ءَ اشانی سرا ارش کنگ بوتگ کہ آیانی تہ ءَ بلوچ لبریشن آرمی مجید برگیڑ ءِ ترندیں ارش ھم ھوار انت ۔