TBP Balochi

کراچی پولیس ءُ رینجرز ءَ بی وائی سی ءِ رھشون سمی دین ءِ لوگ ءِ سر ءَ پولیس ءِ بیڑ –

اے درگت ءَ سمی دین بلوچ ءَ گوشتگ یک ماھے بیت کہ یکشل ءُ بیم ءُ ترسانی آماچ انت ءُ ایشی ءَ پد گوستگیں شپ ءِ یک بج ءِ نزیک ءَ قانون سازمان کنوکیں کارمند ءُ پولیس ءِ کارندہ کہ بیست ءُ دو گاڑی ءِ تہ ءَ ھوار بیتگ کساس 60 ءُ 70 ءِ نیام ءَ بیتگ انت گوں زالبولیں پولیس ءِ کارندھاں منی لوگ ءَ سربوتگ اَنت کہ من ءَ دزگیر بہ کن اَنت۔

آئی ءَ گوشتگ اے وھد ءَ من لوگ ءَ جاڑیگ نہ بیتگ آں ۔ کارندھاں زورانسری دروازگ پروشتگ ءُ تہ ءَ پترتگ انت ءُ نزیک ءَ پنچ کلاک ءَ لوگ ءِ تہ ءَ پٹ ءُ پول اش کتگ ءُ لوگ ءِ تہ ءَ لیپ ٹاپ، کیمرہ، موبائل، کتاب، کاگد ءُ سھراں ھوار دراھیں سامان برتگ اَنت۔

آئی ءَ گوشتگ اگاں ایشانی مول ءُ مراد منی دزگیر کنگ بوتگ گڑا منی نہ بوھگ ءِ پدر کنگ ءَ پد ھم منی لوگ ءِ دروازگاں پروشگ ءُ تہ ءَ پترگ مول ءُ مراد چے بوتگ؟ منی لوگ ءِ ارزشت داریں چیزانی دُزی کنگ، منی سامانانی شنگ ءُ شانگ کنگ ءُ ھمساھگاں ٹارچر ءُ آزار دیگ ءِ مول ءُ مراد چے بوتگ؟ اے درستیں کار کجام قانون ءِ چیر دستی ءَ کنگ بوھگ ءَ انت؟

آئی ءَ گوشتگ من باز رند ءَ اے گپ پدر کتگ کہ اگاں منی ھلاپ ءَ کیسے بوت گڑا من قانونی دیواناں آئی ءِ دیمپانی کنگ ءَ تیار آں ۔ بلے شپ ءِ تھاری ءَ یک پر امنیں سیاسی باسکے ءِ لوگ ءَ ارش کنگ، ہمساہگاں گوں زوراکی ءُ دھمکی دیگ ءُ منی لوگ ءِ مردماں آزار دیگ ءِ سبب ءَ اے گپ ءِ پدر کنگ بیت کہ مول ءُ مراد قانون ءِ در نہ اِنت بلکیں من ءُ منی لوگ ءِ مردماں ترس ءُ بیم ءِ آماچ کنگ ءُ بے توار کنگ اِنت۔

آئی ءَ گوشتگ منی لوگ ءِ سرجمیں تاوان ءُ اے کارروائی ءِ آسر ءِ زمہ واری بغدادی پولیس، لیاری پولیس ءُ سندھ سرکار ءِ سر ءَ انت۔

زانگ بہ بیت سمی دین ءِ پت ڈاکٹر دین مھمد بلوچ ءِ بیگواھی ءَ ھبدہ سال سرجم بیتگ کہ آ بیست ءُ ھشت جون دوھزار ءُ نُھ ءَ پاکستانی پوج ءَ ھزدار اورناچ ءَ ڈیوٹی ءِ وھد ءَ دزگیر کتگ ءُ برتگ-

بلوچ لبریشن آرمی ءِ میڈیا چینل ھکل ءِ نیمگ ءَ بلوچستان ءِ جتاجتائیں دمگاں گل ءِ نیمگ ءَ 21 اُرشانی ویڈیو شنگ کنگ بوتگ انت۔

بیست ءُ دو منٹ ءِ ویڈیو سیریز ءَ پاکستانی فوج ءِ کاروان، پولیس اسٹیشن، مزنیں شھدگانی سر ءَ ناکہ بندی ءُ گاڑیانی نشانگ جوڑ کنگ ءِ ندارگ ءُ ھمے رنگ ءَ شاھدگانی سر ءَ پھلانی تراک ءَ گوں تباہ کنگ ءِ ندارگ ھم ہوار انت۔

ندارگاں گندگ بیت کہ کیچ ءِ دمگ بلنگور ءَ پاکستانی لشکر ءِ دو گاڑی نوکیں سلاھاں گوں بی ایل اے ءِ جنگولانی ترندیں اُرش ءَ سنگر گپتگ ءُ نشانگ جوڑ کنگ بنت۔

قلات ءِ دمگ اسکلکو ءَ پاکستانی لشکر ءِ بکتربندیں گاڑیانی جتاجتائیں نیمگاں نشانگ جوڑ کنگ ءُ پد ءَ یک گاڑی یے دستیگ کنگ ءِ ندارگ ھم گندگ بیت، وھدیکہ نوشکی، خاران ءُ زہری ءَ پاکستانی لشکر ءِ کاروانانی سر ءَ اُرش ءِ ندارگ ھم گندگ بنت۔

ویڈیوز ءِ تہ ءَ نوشکی، پنجگور، وڈھ ءُ اورناچ ءَ مڈی باریں ءُ دگہ کمپنیانی گاڑیاں ھوار بنجاھی شھدگ ءِ سر ءَ ایف ڈبلیو او ءُ دگہ کمپنیانی مزنیں مشینری ءَ نشانگ جوڑ کنگ ءِ ندارگ ھوار انت۔

گوستگیں روچاں بلوچ لبریشن آرمی ءِ اسپیشل ٹیکٹیکل آپریشن اسکواڈ ءِ ایکشن کیمرہ ءِ سر ءَ تربت شگر ءَ پاکستانی فورسز ءِ چیک پوسٹ ءِ سر ءَ تراکناکیں شوروانی گون ءَ چہ تباہ کنگ ءِ اکس گندگ بوتگ وھدے کہ تربت ءَ ھم پاکستانی لشکر ءِ لیفٹیننٹ کرنل ءُ ریٹائرڈ ارسلان ءَ نشانگ جوڑ کنگ ءَ پیش دارگ بوتگ۔

ایشی ءَ ابید بلوچ لبریشن آرمی ءِ دکی، قلعہ سیف اللہ ءُ پیشین ءِ سئے تھانہ کنٹرول کنگ ءِ ندارگ ھم گندگ بنت۔

h

بلوچستان ءِ دمگ گوادر ءَ پاکستانی پوج ءِ دست ءَ گوستگیں روچ ءَ آوار جنگ بیتگیں کماش دوشی یل کنگ بیتگ-

گیشیں اھوالانی رد ءَ گوستگیں روچ ءَ چہ دشت شولیگ ءَ دیم پہ گوادر ءَ روکیں کماش عبداللہ ء موسیٰ جھمنند دشت شولیگ گوادر مژانی چیک پوسٹ ءَ پاکستانی پوج ءَ دزگیر کنگ ءَ پد بیگواہ کتگ ات کہ آ گوستگیں شپ ءَ یل کنگ بیتگ ءُ وتی گِس ءَ سر بیتگ-

دمگی مردمانی رد ءَ عبداللہ شست سال ءَ برزی کماشے کہ گوستگیں روچ ءَ گوادر ءَ روگ ءَ بیتگ پاکستانی پوج ءَ چہ گاڑی ءَ ایر گپتگ ءُ گون وت برتگ –

اھوالانی رد ءَ چیزے وھد پیش عبداللہ ءِ برات ھدا داد ھم پوجی آپریشن ءِ وھد ءَ پوج ءِ زوراکیاں دل ءَ گپتگ ءُ بیران بیتگ-

بلوچستان ءِ تیاب دپی شھر گوادر ءِ دمگ چہ پسنی ءَ پاکستانی پوج ءِ دست ءَ چار مردم زورانسری بیگواہ کتگ اَنت-

بیگواہ کنگ بیتگیں مردمانی تہ ءَ دو براتانی پجّار رحیم لعل ء لعل بخش ءُ امیر لعل ء لعل بخش ناماں چہ بیتگ اَنت آ دگرانی پجّار انگت نہ بیتگ، اِھوالکار ءِ رِد ءَ اے وئیل پسنی ءِ دمگ ریک پشت ، وارڈ نمبر ھپت ءِ شپ ءَ کساس یک ءَ بیتگ-

دمگی اِھوالکار ءِ گوشگ اِنت کہ اے کاروائی ءَ پاکستانی پوج ءِ کارندھانی ھمراھی ءَ سلاہ بندیں ٹولی ھم ساڑی بیتگ اَنت، آ ڈیتھ اسکواڈ نام ءَ چہ زانگ بنت-

ھمے وڑ چاگی ءِ دمگ چہ کلی لشکر آپ ءَ سیادی داروکیں حمل خان ء لوانگ خان دسمبر 2025 ءَ نیمروچ ءِ دو ءَ پاکستانی پوج ءَ آوار جتگ ءُ بیگواہ کتگ –

دومی نیمگ ءَ یل بیتگیانی تہ ءَ چہ ھُزدار ءَ زبیر ء مراد خان ھوار اِنت آ بیست نومبر 2025 ءَ آوار جتگ آ بیست ءُ دو جون 2026 ءَ چہ شال ءَ یل بیتگ-

چہ شال سریاب ءَ عادل بلوچ ء محمد شریف شش جون 2026 ءَ آوار جنگ بیتگ کہ بیست ءُ پنچ جون ءَ یل کنگ بیتگ-

ھمے وڑ چہ سوراب ءَ علی احمد ریکی ء رشید احمد بیست ءُ چار جنوری 2026 ءَ آوار جنگ ءَ پد ھژدہ جون 2026 ءَ چہ سریاب بائی پاس ءَ یل کنگ بیتگ-

نوشکی ءِ جتاجتائیں دمگاں چہ کلی جمالدینی ءُ قاضی آباد ءَ بازیں مردمے جتاجتائیں وھداں یل کنگ بیتگ اَنت آیانی تہ ءَ طیب، اللہ نظر، علی محمد، سعداللہ، سدام ءُ حاجی غلام ھوار اَنت- سرجمیں مردم بیست ءُ چار ءُ بیست ءُ پنچ جون 2026 ءَ یل کنگ بیتگ-

درستی ھساب ءَ پاکستانی پوج ءِ دست ءَ زورانسری بیگواہ دہ مردم یل بیگ ءِ گپ راست بیتگ اَنت وھدے کہ یکے انگت بیگواہ ءَ اِنت-

شال ءَ بلوچ یکجھتی کمیٹی ءِ دزگیریں رھشون ڈاکٹر ماھرنگ بلوچ ءُ شاہ جی ءِ کھول ءَ مروچی گوں اھوالکاراں تران کنان ءَ گوشتگ کہ آیانی دزگیری ءُ انسداد دھشتگردی آمیدگس ءِ نیمگ ءَ دیگ بوتگیں امرکیز ءِ سزائے بگیری ءَ توار چست کتگ ۔

کھول ءَ اے پیسلہ سراسر ناھکی ءِ گوشتگ ءُ ڈاکێر ماھرنگ ءَ ھوار ایندگہ بندیگانی زوت ءَ زوت یل کنگ ءِ لوٹ کتگ ۔

کھول ءِ رد ءَ ڈاکٹر ماھرنگ ءُ شاہ جی ءَ مدامی ایمنی ءُ جمہوری وڈ ءُ ڈولاں وتی جھد برجاہ داشتگ ۔ آیاں بلوچستان ءَ زورانسری آوارجنی ، انساپ نہ دئیگ ءِ وڈیں مزنیں جیڑوانی سرا مدامی توار چست کتگ ۔

آیانی گوشگ ات کہ ایمنیں راجکاریں تواراں امر کیز ءِ سزا دیگ مردمانی بنکی ھک ، آجوئی درشان ، ایمنیں مچیانی ھک ءِ سرا ارش ئے.

اھوالکاراں گوں تران کنان ءَ کھول ءَ جار جتگ کہ باندا آ ایمنیں زھرشانی ءِ کن انت ۔ آیاں نودربر ، وکیل ، راجکاریں باسک ، مردمانی ھکانی پھازدار ، اھوالکار ، سول سوسائیٹی ءِ نمائندگ ءُ لس مھلوک ءَ چہ لوٹ کتگ کہ آ اے سنگینیں ناھکیانی بگیری ءَ یکمشت بہ بنت زھرشانی ءَ بھر بہ زور انت ۔

کھول ءَ چہ لس مھلوک ءَ گوں لوٹ کتگ کہ آ انساپ ءُ بنکی ھکانی پھازدار ءُ ڈاکێر ماھرنگ ، شاھ جی بلوچ ، بیبگر بلوچ ، گلزادی بلوچ ءُ بیبو بلوچ ءِ منصفانہ ٹرائل ءِ ھکانی لوٹ ءَ یکمشت بہ بنت ۔

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں بیانے ءَ گْوشتگ کہ بی ایل اے ءِ سرمچاراں زیارت ءِ دمگ ءَ یک جوان ءُ مھکمیں کاروائی ءَ زورگیریں پاکستانی لشکر ءِ دو کیمپ سرجمیں کنٹرول ءَ گپتگ ءُ اود ءَ سرجمیں سلاہ ءُ گولہ بارود دستیگ کتگ اَنت ءُ کمک ءَ آیوکیں پوج ءُ پولیس ءِ سر بستگ ءُ نشانگ کتگ ءُ جانی ءُ مالی تاوان داتگ انت-

جارکش ءَ گشتگ کہ شمبے ءِ روچ ءَ بی ایل اے ءِ سرمچاراں یک مھکمیں ھکمت املی ءِ رد ءَ زیارت ءِ ”خرواری بابا“ ءِ ھند ءَ زورگیریں پاکستانی فوج ءِ دو فوجی کیمپانی سر ءَ یکیں وھد ءَ اُرش کتگ۔ سرمچاراں جتا جتائیں نیمگاں چہ دیم ءَ روگ ءِ وھد ءَ پیشگامی کتگ ءُ یک ترندین جنگے ءَ پد ءَ دوئیں کیمپانی سر ءَ سرجمیں کنٹرول ءَ سوبمندیں رنگے ءَ سرجمی کتگ۔ اے نزیکیں جنگ ءِ آسر ءَ زورگیریں لشکر ءِ 9 کارندہ ھما جاہ ءَ مرتگ اَنت ءُ پروش وارتگیں دژمن ءِ دگہ کارندہ وتی جاہ ءُ سلاھاں یلہ داتگ ءُ چہ جنگ ءِ میدان ءَ درکپت اَنت۔

آئی ءَ گْوشتگ کہ سرمچاراں کیمپانی سر ءَ دستیگ کنگ ءَ پد اود ءَ ھواریں مزنیں کساسے ءَ نوکیں فوجی سلاہ، رھوتی سامان ءُ گولہ بارود دستیگ ءُ پد ءَ دوئیں فوجی بنجل سرجم ءَ سوتکگ ءُ ھاک ءُ پُر کتگ انت-

جارکش ءَ گشتگ کہ ھمے وڑ ءَ سرمچارانی دگہ ٹولی ءَ شھدگ ءِ سر ءَ ناکہ بندی کتگ ءُ راہ ءُ درانی سر ءَ کنٹرول کتگ۔ اے میان ءَ سرمچاراں زورگیریں لشکر ءُ پولیس ءِ کمکی کاروان کہ خروری بابا ءِ نیمگ ءَ دیم ءَ روگ ءِ جھد ءَ بیتگ کہ دو جتا جتائیں جاھاں سنگر گپتگ ءُ نشانگ جوڑ کتگ۔ اے سوبمندیں اُرشانی تہ ءَ دژمن ءِ دگہ 4 کارندہ مرتگ ءُ بازینے ٹپیگ بوتگ اَنت ءُ آیانی فوجی گاڑی ھم نا کار کنگ بوتگ ۔

آئی ءَ گْوشتگ: بلوچ لبریشن آرمی کول کنت کہ دژمن ءِ پوزیشنانی سر ءَ اے رنگیں مھکمیں، ھمگرنچ ءُ برانزوکیں اُرش داں زورگیریں بلوچستان ءِ سرجمیں آجوئی ءُ زورگیریں لشکر ءِ سرجمی ءَ درکپگ ءَ گوں ترندی ءَ.برجاہ مان اَنت۔

بلوچستان ءِ دمگ کلات ءُ مستونگ ءَ پاکستانی پوج ءُ سلاہ بندیں مردمانی میان ءَ میڑ بیتگ-

مروچی سھب ءَ کلات ءِ رمگ دمگ شور پارود ءَ ھما وھد ءَ پاکستانی پوج ءُ سلاہ بندیں مردمانی میان ءَ تُرندیں میڑ بندات بیتگ وھدے پوج ءِ نیمگ ءَ چہ ڈرون اُرش ءَ پد دمگ ءَ پیشگامی کنگ ءَ بیتگ-

ھمے وڑ مستونگ ءِ دمگ دشت کمبیلا ءَ پاکستانی پوج ءُ سلاہ بندیں مردمانی میان ءَ میڑ بیتگ-

دومی نیمگ ءَ مروچی سُھب ءَ کیچ ءِ دمگ ھیرونک ءَ نکیر ءِ ھند سر ءَ پاکستانی پوج ءِ بمب ڈسپوزل اسکواڈ ءِ کارندہ ھما وھد ءَ بمب تراک ءِ نشانگ کتگ اَنت وھدے آ راہ ءَ کلئرینس کنگ ءَ بوتگ-

دمگی اِھوالکار ءِ رِد ءَ تراک ءَ پوج ءِ یک کارندھے مرتگ ءُ دگہ یکے ٹپی بیتگ- واکدار ءَ انگت درشان شنگ نہ کتگ-

تنی وھدے سئیں اُرشانی زمہ واری ھچ گل ءَ نہ زرتگ اَنت-

بلوچستان ءِ دمگ گوادر ءَ پاکستانی پوج ءَ چہ چیک پوسٹ ءَ یک کماشیں مردمے دزگیر کنگ ءَ پد بیگواہ کتگ-

گیشیں اھوالانی رد ءَ گوستگیں روچ ءَ چہ دشت شولیگ ءَ دیم پہ گوادر ءَ روکیں کماش عبداللہ ء موسیٰ جھمنند دشت شولیگ گوادر مژانی چیک پوسٹ ءَ پاکستانی پوج ءَ دزگیر کنگ ءَ پد بیگواہ کتگ-

دمگی مردمانی رد ءَ عبداللہ شست سال ءَ برزی کماشے کہ گوستگیں روچ ءَ گوادر ءَ روگ ءَ بیتگ پاکستانی پوج ءَ چہ گاڑی ءَ ایر گپتگ ءُ بیگواہ کتگ-

بلوچستان ءِ دمگ زیارت ءَ سلاہ بندیں مردماں اُرشے ءِ تہ ءَ پاکستانی لشکر (فرنٹیئر کور) ءِ پوسٹانی سر ءَ اُرش کتگ ءُ دستیگ کتگ اَنت ءُ کمک ءِ واستا سر بوھوکیں کاروان اُرشانی نشانگ جوڑ کنگ بوتگ اَنت۔

اے وئیل گوستگیں روچ ءِ بیگاہ ءَ خرواری بابا ءَ بوتگ کہ اود ءَ مزنیں کساسے ءَ سلاہبنداں پاکستانی لشکر ءِ دو پوسٹانی سر ءَ یکیں وھد ءَ اُرش کتگ۔ دراجیں وھد ءَ چہ دمگ ءَ مزنیں تیرگواری ءُ تراکانی توار اشکنگ بوتگ انت ۔

اُرش ءَ پد لشکر ءُ پولیس ءِ کارواناں دیم ءَ روگ ءِ جھد کتگ کہ دو جاھاں اُرشانی نشانگ جوڑ کنگ بوتگ اَنت کہ ایشی ءِ تہ ءَ بازیں کارندہ بیران ءُ کم چہ کم چار پولیس ٹپیگ بوتگ اَنت۔

دمگی مردمانی رد ءَ ھمے وھد ءَ سلاہ بندیں مردمانی نیمگ ءَ بنجاھی شھدگ ءِ سر ءَ ناکہ بندی برجاہ بوتگ۔

دمگی مردماں ٹی بی پی ءَ گوں تران کنان ءَ گْوشتگ کہ اُرش ءِ وھد ءَ پوسٹ ءِ تہ ءَ لشکر ءِ سلاھانی جاہ ءَ آس چست بوتگ کہ ایشی ءِ سبب ءَ اود ءَ تراک بوتگ۔ گمان پدر بیگ انت کہ سلاھانی جاہ ءَ بوتگیں تراک ءَ چہ فوج گیشتر جانی تاوان رس اتگ۔

اُرشکاراں سرجمیں کنٹرول ءِ گرگ ءَ پد دوئیں پوسٹ سوتکگ ءُ اود ءَ سلاہ ءُ گولہ بارود دستیگ کتگ انت۔

واکداراں انگت ءَ اے درگت ءَ ھچ وڑیں ھال ءُ اھوال نہ داتگ ءُ نہ کہ ٹپیانی بابت ءَ ھچ وڑیں ھال ءُ اھوال داتگ ءُ نہ کہ انگت ءَ کس ءَ اے اُرش ءِ زمہ واری زرتگ۔