TBP Balochi

دکی ءَ ناشناسیں سلاہ بندیں مردماں سڑک جوڑ کنوکیں کمپنی ءِ مشینری ءُ گاڑی سوتکگ انت۔

گیشین ھالانی رد ءَ ناشناسیں سلاہ بندیں مردماں دکی شھر ءِ کراس ءِ نزیک ءَ دکی چمالنگ روڈ ءِ جوڑ کنگ ءَ گوں بندوکیں کمپنی ءِ مشینریانی سر ءَ اُرش کتگ ءُ سوتکگ انت ءُ ایشی ءِ آسر ءَ مشینریاں مزنیں تاوانے رس اتگ۔

وئیل ءَ پد سیادی داروکیں ادارگاں جاہ ءِ چار ءُ تپاسی کتگ، چمدیستگیں مردم جم کتگ اَنت، وھدیکہ ارش کنوکانی شوھازگ ءُ وئیل ءِ سببانی پجارینگ ءِ واستا پٹ ءُ پول بندات کنگ بوتگ۔

زانگ بہ بیت کہ بلوچستان ءَ جوڑیشت ءُ مادیانی پٹ ءُ پول ءَ گوں بندوکیں کمپنیانی سائٹاں سلاہ بندیں مردمانی نشانگ کنگ برجاہ اِنت۔

مرچی شال ءِ نزیک ءَ گیس ءِ درگیجگ ءَ دلگوشیں کمپنی ءِ گاڑی سلاھبنداں راشن ءِ ھمراھی ءَ دز گپتگ ۔

بلوچستان ءَ برجاھیں اے اُرشانی زمہ واریاں بلوچ آجوئی لوٹوکیں سلاہ بندیں گل زیرگ ءَ انت، البت مرچی بوتگیں اُرشانی زمہ واری انگت ءَ ھچ گل ءَ نہ زرتگ انت۔

بلوچستان ءِ دمگ مستونگ ءَ پاکستانی پوج ءُ سلاہ بندیں مردمانی میان ءَ میڑ برجاہ-

مستونگ ءِ دمگ دشت، کرّی ڈور ءِ ھند سر ءَ پاکستانی پوج ءُ سلاہ بندیں مردمانی میان ءَ میڑ بندات بیتگ وھدے پوج ءِ مزنیں کچے ءَ پیشگامی ءِ جُھد کتگ-

اِھوالکار ءِ رِد ءَ پوج ءِ نیمگ ءَ چہ وتی پوسٹاں تاں راشن ءُ دگہ سامان سر کنگ ءِ جُھد کنگ ءَ بیتگ بلے سلاہ بندانی اُرشانی سوب ءَ آیاں اڑ ءُ جنجال ءِ دیمپانی اِنت-

دو روچ ساری ھم اے دمگ ءَ پوج ءَ سلاہ بندیں اُرشاں پد پُشتکنزی بیتگ وھدے کہ پوج پوسٹانی سر ءَ آ راشن ءُ دگہ سامان سر کنگ ءَ بے سوب بیتگ-

اے میڑاں پوج ءَ جانی تاوان دیمپانی کنگ کپتگ اُرش ءِ زمہ واری انگت ھچ گل ءَ نہ زرتگ-

بلوچستان ءِ بنجاھی شھر شال ءِ نزیک ءَ سلاھبنداں گیس فیلڈ ءَ راشن سرکنوکیں گاڑی گوں راشناں دستیگ کتگ-

شال ءَ گوں ہمگرنچیں دمگ ڈغاری ءَ گوستگیں روچ ءَ سلاھبنداں کرکڑ (زرغون) ءِ گیس ءِ فیلڈ راشن بروکیں گاڑی ناکہ بندی ءِ وھد ءَ دزگیر کتگ وھدے کہ آ فیلڈ ءَ راشن برگ ءَ بیتگ۔

بنشون ءِ رد ءَ سلاہ بندیں مردماں گاڑی ءِ ڈرائیور ھم دزگیر کتگ۔

انگت ءَ اے وئیل ءِ زمہ واری کس ءَ نہ زرتگ بلے بلوچ سلاھبندیں آجوئی لوٹوکاں گوستگیں وھداں گیس ءِ پڑ ءُ آیانی سامان نشانگ جوڑ کتگ اَنت۔

بلوچستان ءِ جتاجتائیں دمگ دشت، ھوشاپ ءُ ڈھاڈر ءَ بیتگیں اُرشانی زمہ واری بی ایل ایف ءُ بی آر جی ءُ منّ اِتگ اَنت

بلوچستان لبریشن فرنٹ ءِ جارکش میجر گْوھرام بلوچ ءَ وتی درشان ءَ گوشتگ کہ بی ایل ایف ءِ سرمچاراں 28 جون 2026 ءَ دشت ءِ میتگ مچات ءَ شھدگ ءَ زورگریں پاکستانی پوج ءِ سر ءَ گوں مزن ءُ وتکاریں سلاھاں اُرش کرتگ۔ اے سوبمندیں کاروائی ءِ آسر ءَ زورگریں پوج ءَ جانی ءُ مالی تاوان بوتگ، سرمچاراں ھمے جاہ ءَ پوج ءِ جتگیں درسیں کیمرہ ھم پروشتگ اَنت۔

آئی ءَ گوشتگ کہ چہ ایشی ءَ پیش 27 جون 2026 ءَ دشت ءِ دمگ پٹوک ءِ چنال ءَ بی ایل ایف ءِ سرمچاراں زورگریں پوج ءِ یک سنگرے ءِ سر ءَ اُرش کرتگ اود ءَ ساڑی ئیں یک کارندھے جاھی مرتگ ءُ سنگر ءِ آدگہ کارندھانی سر ءَ گوں راکٹ لانچر ءُ مزنیں سلاھاں ارش کرتگ، ایشی آسر ءَ دگہ دو کارندہ ٹپی بوتگ، سنگر ءِ نزیک ءَ اوشتاتگیں پوجی گاڑی یے تباہ بوتگ۔

جارکش ءَ گوشتگ کہ ھمے روچ ءَ 27 جون ءَ دگہ یک کاروائی یےءَ بی ایل ایپ ءِ سرمچاراں دشت ءِ ھند بل نگور ءَ برجاھیں پاکستانی پوج ءِ بنجل ءِ سر ءَ گوں راکٹ ءُ مزنیں سلاھاں اُرش کرتگ، ایشی آسر ءَ زورگریں پوج ءَ جانی ءُ مالی تاوان بوتگ۔

آئی ءَ گوشتگ کہ چہ ایشی ءَ ابید 27 جون ءَ ھوشاپ ءِ ھند دمب ءَ بی ایل ایف ءِ سرمچاراں زورگریں پوج ءِ بنجل نشانگ کرتگ۔ سرمچاراں گرنیڈ لانچر ءِ باز گولا بنجل ءِ سر ءَ آس داتگ کہ آ وتی نشانگ ءَ کپتگ اَنت، ایشی آسر ءَ زورگریں پوج ءَ گیشتر جانی ءُ مالی تاوان بوتگ،

ھمے وڑ بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں گوستگیں شپ ءَ کچھی ءِ دمگ ڈھاڈر شھر ءَ گشت کتگ – گشت ءِ میان ءَ زورگریں پوج ءِ گوما داں دیراں میڑ برجاہ بیتگ- اے تُرندیں میڑ ءَ زورگریں پوج ءَ جانی ءُ مالی تاوان چست کنگ کپتگ-

گُڈی ءَ دوئیں گلاں اُرشانی زمہ واری منّ اِتگ ءُ گْوشتگ کہ مئے کاروائی داں بلوچستان ءِ وتواجھی ءَ تاں برجاہ بنت-

بل نگور بازار یکشل ءَ دومی روچ ءَ ھم بند اِنت، وھدے کہ پاکستانی پوج ءِ نیمگ ءَ چہ دکاندار تھنا سھب شش ءَ تاں نُھ بزانکہ سے گنٹہ ءِ واستا کار ءُ بار ءِ موکل دیگ بیتگ-

انجمن تاجران بل نگور ءِ رِد ءَ اے داتگیں وھد ءِ سوب ءَ تاجرانی کار ءُ بار ءِ سر ءَ اسر کپگ ءَ اِنت، وھدے کہ شھریاں ھم ھمکروچی توژگ ءِ زیرگ ءَ سک دلسیاھی دیمپانی کنگ کپگ اِنت-

تاجراں گوشتگ کہ انّگیں جاور ھال ناں تھنا کار ءُ بار ءِ پُرکار سانمند بیگ اَنت بلکیں دمگی آبادی ءِ زورتیں چیز رسگ تہ ءَ اڑان ودی بیگ ءَ اِنت-

انجمن تاجراں بل نگور ءَ کمشنر مکران ءُ ڈپٹی کمشنر کیچ ءَ چہ لوٹ کتگ کہ راج ءُ تاجراں دیمپانی دلسیاھیانی پُشدر ءَ سیکورٹی پابندیاں نرم بکنت دانکہ بل نگور بازار ھمکروچے ھساب ءَ پچ بہ بیت ءُ کار ءُ باری پُرکاری پچ بہ بنت-

زانگ بہ بیت کہ اشی ءَ ساری نوشکی، زھری ءُ مشکے ءَ سیکیورٹی ءِ نام سر ءَ کار ءُ باری بُنجاہ بند کنگ بیتگ اَنت- وھدے کہ کار ءُ بار ءِ وھد دارگ بیتگ اَنت چریشی ءَ دمگی مردم تاجراں سک دلسیاھی دیمپانی کنگ کپتگ-

بلوچستان ءِ دمگ ھاران ءَ ناشناسیں سلاہ بندیں مردماں پلانٹانی سر ءَ اُرش کتگ ءُ مشینری سوتکگ ءُ یک گاڑی یے ھم برتگ۔

ناشناسیں سلاہ بندیں مردماں گوستگیں روچ ءَ ھاران شھر ءِ نزیک ءَ باب ھاران ءِ ھند ءَ کریش ءُ ڈامبر پلانٹ ءِ سر ءَ اُرش کتگ-

اود ءَ پلانٹ، مشینری ءُ گاڑی سوچگ بوتگ انت وھدیکہ سلاہ بندیں مردماں پلانٹ ءَ آئی ای ڈی بمبے ایر کتگ۔

اُرش ءَ پد سلاہ بندیں مردماں یک گاڑی یے گوں وت زرتگ ءُ چہ جاہ ءَ درکپتگ اَنت ءُ پد ءَ لشکر ءَ دمگ انگیر کتگ ءُ بمب ناکارہ کتگ ءُ پٹ ءُ پول بندات کتگ-

بلوچستان ءِ دمگ مستونگ ءَ پاکستانی پوج ءِ راشن بروکیں گاڑی سلاہ بندیں مردماں اُرش ءِ نشانگ کتگ، دمگ ءَ داں دیراں میڑ برجاہ بیتگ بلے پوج راشن سر کنگ ءَ بے سوب بیتگ-

مستونگ ءِ دمگ دشت ءَ کرّی ڈور ءِ ھند سر ءَ سلاہ بندیں مردماں ھما وھد ءَ پاکستانی پوج اُرش ءِ نشانگ کتگ وھدے آ وتی بُنجلانی واستا راشن برگ ءَ بیتگ اَنت- اُرش ءَ پد میڑ بندات بیتگ داں دیراں برجاہ بیتگ-

اِھوالکار ءِ رِد ءَ میڑاں پوج ءَ جانی تاوان دیمپانی کنگ کپتگ- اے میان ءَ تیرگواریں ھیلی کاپٹراں چہ جتاجتائیں ھندانی سر ءَ شیلنگ کتگ بلے پوج راشن سر کنگ ءَ بے سوب بیتگ-

واکدار ءَ تنی وھدے اے درگت ءَ ھچ وڑیں درشان شنگ نہ کتگ اُرش ءِ زمہ واری انگت ھچ گل ءَ نہ زرتگ-

شال ءَ بلوچ یکجھتی کمیٹی ءِ بنجاھی رھشون ڈاکٹر مھرنگ بلوچ ءُ شاہجی بلوچ ءِ اُمر کیز ءِ ھلاپ ءَ شال ءَ زھرشانی برجاہ اِنت وھدے کہ جاورھال گیش ناگیگ بوتگ اَنت۔

گیشیں ھالانی رد ءَ برما ہوٹل سریاب ءَ کھولانی نیمگ ءَ پرامنیں زھرشانی بندات کنگ بوتگ کہ ایشی ءِ مول ءُ مراد دزگیریں سروکانی یلہ کنگ ءُ آھانی ھلاپ ءَ برجاھیں کارروائیانی ھلاپ ءَ توار چست کنگ اِنت۔

بلے زھرشانی کنوکیں مردمانی گْوشگ ءِ رد ءَ پولیس ءُ دگہ کانود ءِ کارندھانی زور ءُ زوراکی ءِ کارمرد کنگ ءَ پد جاور ھال گیش ناگیگ بوتگ اَنت۔

اے کارروائی ءِ پسو ءَ زھرشانی گیشتر شنگ ءُ تالان بوتگ ءُ زھرشانی کنوکاں بائی پاس ھم بند کتگ۔ اے سبب ءَ رودراتکی بائی پاس ءِ سر ءَ ٹریفک ءِ روانی سرجم ءَ بند اِنت ، وھدے کہ دمگ ءَ مزنیں کساسے ءَ فورسز ءِ دیم دیگ بوھگ ءَ اِنت ۔

ایشی ءَ چہ پیسر زھرشانی ءِ سبب ءَ بشیر چوک ھم بند کنگ بوتگ ۔

زھرشانی کنوکیں مردمانی گْوشگ اِنت کہ اے زھرشانی ھما وھد ءَ برجاہ مان اِیت داں دزگیریں مردم بے شرت ءَ یلہ کنگ مہ بنت ءُ بوت کنت ایشی ءِ پتر گیش گیشتر گیش بہ بیت۔

زھرشانی کنوکاں چہ شال ءِ مھلوک، انسانی ھکانی گل، وکیل، سیاسی جھدکار ءُ سول سوسائٹی ءَ دزبندی کتگ کہ آ دھرنا ءَ ھوار بہ بنت دانکہ یکجاھی ءِ درشان ءَ بہ کن اَنت ءُ انساپ، بنیادی ھک ءُ کانود ءِ ھاکمی ءِ واستا وتی توار ءَ چست بہ کن اَنت۔