ایمنی ءِ نام ءِ سر ءَ ناشرکاری
نبشتہ کار: شَکّل بلوچ
دی بلوچستان پوسٹ
اِستان انّا بلکیں ناشرکاریں پنجاپی لشکر ماں بلوچستان ءَ ایمنی ءِ نام ءَ ناشرکاری کنگ ءَ اِنت، ناشرکاریں پنجاپی لشکر بلوچستان ءَ وتگڑیں استان اسلامی پاکستان ءِ نام ءَ، وتی وتگڑیں اڈ داتگیں جمھوری اندازہ ءَ اود ءَ آمیدگس ءِ لگتمال کنگ ءُ آئی کانون ءِ پادمال کنگ ناشرکاری یے نہ اِنت کہ ناشرکاریں پنجاپی پوج ھر روچ بلوچ ڈیھ ءَ بلوچ ءِ چُکچینی ءَ کنگ ءَ انت، بلوچستان ءَ مالی، سماجی، زند ءِ کجام ھم تَکے ءَ آ یا تئی سیاسی پِڑ بہ بیت شر مزھبی پِڑ ناشرکاریں پنجاپی پوج بلوچ ڈیھ ءَ را یکشل ءَ لُٹ ءُ پل کنگ ءَ ھچ چَک ءُ پد نہ بوگ ءَ اِنت۔
ناشرکاریں پنجاپی پوج اسلامی استان ءِ پاکستان ءِ وتگڑیں پارلیمانی رازمان ءِ پُشدر ءَ وتی لُٹ ءُ پُل ءِ برجا دارگ ءِ ھاتر ءَ لھتے وتگڑیں بلوچ سیاسی مردم گچین کُتگ اَنت ءُ چہ آھانی وسیلہ ءَ بلوچ ڈیھ ءِ بلوچ لس مھلوک ءِ چُکچینی ءَ کنگ ءَ اَنت۔ اے پنجاپی لشکر ءِ پندل اِنت کہ ھما وتگڑیں سیاسی پارلیمان پرست کہ وت ءَ بلوچ راج ءِ رھشون لیک اِنت بلے راستی چہ ایشی ءَ چَپ اِنت اے بس وتی لاپ ءِ پُر کنگ ءَ ناشرکاریں پنجاپی لشکر ءَ ھوار بلوچ چُکچینی ءَ شریکدار اَنت۔ پرچاکہ ایشی ءَ چہ مستریں سبوت بی وائی سی ءِ رھشون ڈاکٹر ماھرنگ ءُ آئی ءِ ھمراہ سیاسی کیڈر اَنت کہ ناھک ءَ اُمر کید ءِ سزا داتگ اَنت۔ ایشی ءِ پُشدر ءَ ھمے وتگڑیں بلوچ پارلیمانی سیاستدان ناشرکاریں پنجاپی لشکر پندل ءَ ھوار اَنت۔
بلوچ یکجھتی کمیٹی بلوچ راج ءِ راستیں ماس پارٹی اِنت کہ بلوچ راج ءَ گچین کُتگ ءُ کُل بلوچ بی وائی سی ءِ پُشت ءَ اوشتاتگ چی ءَ کہ بلوچ راج شری ءِ سر ءَ پوہ ءُ سرپد اِنت کہ مرچیگ ءَ چہ پیسر 80 سال اِنت کہ آ چہ بُنکی زلورتاں زِبھر کنگ بوتگ، بلوچ راج مدام گوں گلامیں زندے ءِ پَیم ءَ زندگی کنگ ءَ اِنت، انگت ءَ اوں آئی ءَ ساپیں آپ نسیب ءَ نہ اِنت ءُ یکشل ءَ اے راج ءِ پُسگ شھید کنگ بوگ ءَ اَنت، ھمے سبب اِنت کہ دری ناشرکاریں پنجاپی لشکر بلوچ راج ءِ چُکچینی ءَ کنگ ءَ انت، وتی جند ءِ لوگ ءِ تہ ءَ بلوچ راج ءَ کوشارینگ ءَ اِنت، آئی ءِ زمین ءِ گواجنانی دری ملٹی نشنل کمپنیانی گوم ءَ سودا جَنگ ءَ اَنت، بلوچ ءِ مستریں دژمن وتیگ انت ھمے وتیگانی سبب ءَ بلوچ راج لاچار اِنت، ھر یک سیاستدانے ءَ وتی یک کیمپے جوڑ کُتگ، آئی ءِ باقائدہ چہ ناشرکاریں پنجاپی لشکر ءِ نیمگ ءَ پنڈز دیگ بیت، دیتھ اسکواڈ ءِ شکل ءَ بلوچ راج ءَ را بیگواہ کنگ ءَ دست اِش مان انت آھانی جوناں ٹاچر کنگ ءَ پد ماں جنگل ءَ چگل اِش دے اَنت۔
چہ ایشی ءَ پد بی وائی سی، ڈاکٹر ماھرنگ پہ ھمے وتگڑیں دژمن ءُ ھواریانی واستا جان ءِ وبال جوڑ بوتگ چمیشکا مرچی ڈاکٹر ماھرنگ ءَ را اُمر کید ءِ سزا دیانگ بوتگ۔ بلوچ راج ءَ وتی چم پچ کنگی اِنت ءُ وتی اسل دژمن ءَ بزان اَنت کہ دری پنجاپی ءِ انچو بستار نہ اِنت کہ بلوچ ءِ مات ءُ گوھاراں چو بے شرپ بکن اَنت الم ایشی ءِ پُشت ءَ وتی بزاں وتگڑیں سیاسیُکانی دست مان انت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-