بلوچستان ءِ دمگ مستونگ ءُ پنجگور ءَ پاکستانی لشکر ءِ دست ءَ سئے مردم بیگواہ کنگ بیتگ انت۔
بیگواھیں مردمانی پجار زکریا ء دلمراد ، عادل ء عبدالرشید ءُ صدیق ء رسول جان ءِ ناماں زانگ بوتگ اَنت۔
دمگی اھوالانی رد ءَ کہ زکریا 21 مارچ ءَ پاکستانی لشکر ءَ مستونگ ءِ کلی کاریزسر ءَ چہ وتی لوگ ءَ دزگیر کتگ۔ دمگی مردمانی رد ءَ دزگیر کنگ ءَ پد آئی ءِ بابت ءَ ھچ وڑیں ھال ءُ اھوال دیگ نہ بیتگ۔
دومی نیمگ ءَ پنجگور ءِ دمگ پروم ءِ نندوکیں صدیق ء رسول جان لھتیں روچ پیسر کیمپ ءَ تلب کنگ بوتگ کہ اود ءَ سر بوگ ءَ پد آ دزگیر کنگ بوتگ۔ آئی ءِ لوگ ءِ مردمانی رد ءَ چہ اے وئیل ءَ پد آئی ءِ ھچ اھوال دست نہ کپتگ۔
وھدے کہ مرچی سھب ءَ پاکستانی لشکر ءَ عادل چہ پروم لیگورک ءَ دزگیر کتگ کہ ایشی ءَ پد آ بیگواہ اِنت۔
سانمندیں کھولاں اے سئیں مردمانی زوت جان سلامتی ءِ لوٹ کتگ ءُ گْوشتگ کہ اگاں آیانی ھلاپ ءَ کیس ھست گڑا آ کانود ءِ رد ءَ آمید گس ءَ پیش کنگ بہ بنت اگاں ناں زوت یل کنگ بہ بنت۔
زانگ بہ بیت کہ بلوچستان ءَ زورانسری ءَ بیگواہ کنگ ءِ جیڑہ گوستگیں بازیں سالاں چہ انسانی ھکانی مزنیں جیڑھے ھست کہ ایشی ءِ سر ءَ سانمندیں کھول، انسانی ھکانی گل ءُ جتا جتائیں سیاسی ءُ چاگردی تک ءُ پھنات مدام وتی جیڑہ ءِ درشان کنگ ءَ اَنت۔