TBP Balochi

بلوچستان ءِ دمگ ھُزدار ءِ ھند زھری ءَ پاکستانی پوج ءَ سلاہ بندیں اُرشاں جانی تاوان دیمپانی کنگ کپتگ-

زھری ءِ دمگ بلبل ءَ گوستگیں روچ ءَ سلاہ بندیں مردماں جتاجتائیں ھندانی سر ءَ پاکستانی پوج ھما وھد ءَ اُرشانی نشانگ کتگ اَنت وھدے پوج بکتر بند گاڑی، ٹینک ءُ دگہ گاڑی دمگ ءَ پیشگامی کنگ ءَ بیتگ اَنت-

دمگی اِھوالکار ءِ رِد ءَ گوستگیں روچ ءَ سھب ءُ بیگاہ ءِ وھد ءَ کلاکاں تاں تُرندیں میڑ برجاہ بیتگ- میان ءَ دمگ مردم لوگ ءَ درتک ئے نہ کتگ وھدے کہ دمگ ءَ تیرگواری ءُ تراکاں چہ جکستگ-

میڑاں جانی تاوان ءِ ھال اِنت بلے واکدار ءَ تنی وھدے ھچ وڑیں درشان شنگ نہ کتگ-

 نیادے گوں پِدائی لاشاری ءَ 

ساھِل چِراگ

دی بلوچستان پوسٹ

مُدام بِچار اِتیں چیزے نا چیزے وانگ ءَ اَت سنگت ! نزاناں چے وانگ ءَ اَت ءُ پہ کَے ءَ ￴ وانگ ءَ اَت بَلے ھر وھداں کہ آئی ءِ ￵ در ءَ ￴سر کپتیں داں آ وانگ ءَ اَت بَرے ابّا کازی ءِ ￵کِتاب ( ھانی منی ماتیں وتن ) ءَ چارگ ءَ اَت ءُ بَرے واجہ سَبا ساھِب ءِ گُشتانکاں ماں لبزانی دُروشم ءَ نِبشتہ کنَگ ءِ جُھد ءَ اَت ،ھاموش یکمُشت ءُ مُھکمیں جُزبگ “ من ھِچبر چُشیں مُھریں سنگت وتی زِند ءَ ندیستگ اَت ھیر دیم ءَ کُلّیں کِسّھاں کاراں۔

وھد نیم سُھب اَت ءُ نیم شَپ اَت بِزانکہ بام اَت ، اِے ھما پاس اِنت کہ ھیال مُدام چہ دریگ ءَ برانز گِرَگ ءَ ساجُو اَنت ءُ اِے اَھدی ئیں ھبرے کہ شائِرے بہ بیت یا کہ نِبشتہ کارے آ الّم ءَ چہ روچ ءِ ￵ٹِک دیَگ ءَ پیسر وتی اَندر ءِ کُلّیں ناسرجمیں کولاں سرجم کنت ءُ نُو گوں دُگنیا ءِ پاساں مُلمہ بیت ، گُڑاں من چم پَچ کُت اَنت داں چہ بُرز ءِ کمرہ ءَ یک تھار چکیں رُژنائی یے دیم پہ مئے کمرہ ءَ گوں ھاموشی ءَ الھان کنان ءُ پیداک اَت ھیر چہ وتی نابودی ءَ من اِنچو کِمار نہ کُت ءُ دوبر وپسگ ءِ جُھد کُت ، بَلے واب کُج اِنت ھھھہ !اِے وَ کمبھتیں اَنچیں اِلّتے سر ءَ ￴ کپتگ اَت یکرندے کہ چہ واب ءَ پَچ گُڑ اِتاں داں دوبر واب ءَ گْواہ نہ کُت، پدا چم پچ کُت اَنت ءُ دست موش کُت چہ کَش ءَ کَلنڈیں گْوانکو چِست کُت ءُ وھد چارت داں 4 ءَ 10 کمّ اَت ، بَلے آ رُژنائیں بْرانز انگت ھست اَت ءُ چہ ساری ئیگ ءَ گیشتِر اَت ، نُو دِل ءَ بود کُت کہ بِچاران ئِے￸ باریں کے اِنت اِے وھد ءَ آگاہ اِنت ؟

دیر نہ گْوست گوانکو ءَ توار کُت ءُ چہ وٹسپ ءَ میسجے ءَ ٹِینگَگے جت ، سنگت ! من لاشاریاں بیا بُرز ءَ ￴پرتو کار ھست من گُشت ۔ ھیر اِنت ؟۔ ھو ھیر اِنت تو بیا کمّے ۔ بَلے جان کمّے سبر پیداک آں
گوں اجکّھی ءَ روان ءُ پاداں ایر کنان اِتاں کہ دروازگ ءِ دپ ءَ سر بوتان ءُ لاشاری ءَ گْوانک جت اووو ڈاکٹر جان بیا مروچی پرتو بلاھیں کارے ھست کُربانو۔۔ کارے ؟ءُ ￶ اِے وھد ءَ ؟من ھِچ پھمگ ءَ نہ اِتاں ۔ ھو جان بیا بہ نِند ۔گُڑاں لاشاری ءَ وتی گوانکو منی کش ءَ چگل دات ءُ گوں کسانُکیں کندگے ءَ ھوار گُشتے :۔ یار ڈاکٹر مروچی من لچّھے نِبشتہ کُتگ باریں چمشانکے بدے ئِے چون اِنت ؟ ۔ لَچّھے ؟۔ ھو جان لَچّھے

( سرھال )
تو جیڑ اِتگ ؟

اِے مسکیں زمین ترا گوانک اِنت !

پَہ تئی باندات ءَ کَسے جنگ ءَ اِنت
بیل ءُ ھمبلانی دست گوں تُپنگ ءَ اِنت
تو اِے اوں جیڑ اِتگ ؟
اِے جنگ باریں نُو چون بیت !
زمین منی بیت یا کہ نہ بیت ۔
مئے گُلامیں زِند آجو بیت یا نہ بیت ۔
یک ماتے پہ وتی بچ ءِ شوھازگ ءَ
چون چے پیمیں جاوراں گُوز اِیت
کرنے اَت مئے جنگ کُجا سر اَت،
نی بِچار کُجا سر اِنت ۔
تو جیڑ اِتگ ؟
بِہ جیڑ کہ تراجیڑگی اِنت،
بِہ جیڑ ءُ سر بِگر گوں وتی جزبگ ءَ۔
بیا وت ءَ ￴یک جنگ زدیں بچے بہ لیک،
اوار ءُ ھور جُنزان بہ ایں،
کندان کندان بہ ایں،
شر بِہ جیڑ۔
بِہ جیڑ ءُ سر بِگر پہ منزل ءَ وتی،
بِہ جیڈ بِچار اے زمین ءِ پُّسگاں
کوھ ءُ اگاراں سر گِپتگ اَنت،
وتی جان اِش نْدر کُتگ،
پہ وتی ماتیں دیار ءَ مُرتگ اَنت،
پرچا چو بدگُمان ئے او بلوچ
تو پرچا زُلم ءِ سانکلاں کُتگ وت ءَ ￴
پرچا وتی گلامی ءِ سر ءَ ￴نہ جیڑ اِت ؟
تو وتی گدار ءَ نزانِ ئے،
اِے راج ءِ رھبر
اِے راج ءِ رھشون
اِے راج ءِ شھیداں نزان ئے￷ ؟
سمّو ءُ شارُل، ماھل ءَ نزان ئے ؟

۔ واہ یار ! تو وَ بلاھیں شائِرے ئے
ھو جان ۔ بَلے بِگندے اِے گُڈّی ھیال اَت ھھھھ

اِے باریگ انچو پہ بے تواری گْوستگ اِت اَنت کہ مارا ھِچ سما نہ بوتگ اَت داں شپ ءَ چوں وتی دُروشم مٹ کُتگ اَت بِزانکہ روچ در اَتکگ اَت ءُ جھل ءِ دراھیں سنگت چہ واب ءَ پاد اَتکگ اِت اَنت، گُڑا جاک اَت ، سُھب ءِ سر ءَ ￴ سنگتانی مسکرا ءُ کوکّار اَت ما کِساس دہ ءَ بُرز سنگت اِتیں پِدائی ھاکِم اوں ھمے اوتاگ ءَ اَت ، بَلے چہ منی آھگ ءَ ھوار دیم پہ وتی سپر ءَ درکپتگ اَت گُڑا من چہ لاشاری ءِ ￵دیوان ءَ پاد اَتکان ءُ جھل ءَ سنگتانی گْورا شُتاں کہ شھید المان ءَ گومن ڈیک دات ، ھو ! المان ھمیش اَت کہ مزنیں آپریشنے ( کومی مشک ) ءِ ￵توک ءَ ￴ ماں زامُران ءَ شھید بیتگ اَت ، المان سکّیں وشتبیں سنگتے اَت بَلے چی بُگشاں جنگ ھمیش اِنت روچے نہ روچے سُپتگیں تیر الّم ءَ جِند ءِ سینگ ءَ دوبر سُمب اِیت،
المان جان ءِ تھنا ھما یکّیں کِسّہ من ءَ ￴یات اِنت کہ ما دیوان اِتیں گُڑا شیھُو ءَ کسِّہ بِندات کُت ، بس ھمے یکّیں گال گیر کیت کہ آئی ءِ ￵ تہ ءَ ￴نِبشتہ اَت ، ” وھد ءِ روڑ ءِ کش ءَ من سیکل داشت ( Marboro cigrate ) ءِ تراکینت “ گُوں اِے گال ءَ ما دُرستاں گُشت واہ بھی Marboro ھاں ھھھ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ تیاب دپی دمگ گوادر ءِ ھند کلانچ ءُ آئی ءِ کش ءُ گوراں مروچی پاکستانی پوج ءِ مزنیں کچے ءَ سُر ءُ پُر ءُ آپریشن ءِ ھال سر بیتگ-

دمگی اِھوالکار ءِ رِد ءَ پوج ءَ کوھی دمگاں پُترتگ اَنت آپریشن بندات کتگ، بلے سرکاری ھساب ءَ تنی وھدے اے درگت ءَ ھچ وڑیں درشان شنگ نہ کتگ-

اِھوالکار ءِ گوشگ اِنت کہ پاکستانی پوج ءِ کارندہ مزنیں کچے ءَ سُھب ءِ وھد ءَ دمگاں گندگ بیتگ، اود ءَ آیاں جتاجتائیں کوھی دمگاں پیشگامی کنگ ءَ گندگ بوتگ اَنت-

تنی وھدے ھچ وڑیں جانی ءُ یا دزگیری ھال دیم ءَ نیتکگ-

بلوچستان ءِ دمگ نوشکی ءِ مزن شھدگ ءِ سر ءَ دگہ شش گاڑی سوچگ ءُ تباہ کنگ بوتگ انت، ایشی ءَ پد پیسر ءَ یک بوزرے ءَ ھوار چار گاڑی نشانگ جوڑ کنگ بوتگ انت۔

نوشکی ءِ دمگ احمد وال ءَ شال ءُ تپتان شھدگ ءِ سر ءَ پھاٹک ءِ نزیک ءَ سلاہ بندیں مردماں شش مزنیں گاڑیانی سر ءَ اُرش کتگ ءُ سوتکگ انت۔

ایشی ءَ چہ پیسر نوشکی مل ءِ ھند ءَ ھمے شھدگ ءِ سر ءَ بوزر ءَ ھوار چار گاڑی نشانگ جوڑ کنگ بوتگ اَنت۔

ایشی ءَ ابید مرچی مستونگ ءِ شیخ واسل ءِ دمگ ءَ شال ءُ تپتان شاھدگ ءِ سر ءَ کلاکانی کلاک ناکہ بندی ءِ وھد ءَ سلاہ بندیں مردماں 7 ٹریلر گاڑی دستیگ کتگ اَنت۔

انگت ءَ اے کارروائیانی زمہ واری کس ءَ نہ زرتگ انت بلے گْوستگیں دو ماہ ءَ گْوشگ بیتگیں شاھدگ بلوچ لبریشن آرمی ءِ کنٹرول ءَ انت۔

بلوچستان ءِ دمگ کلات ءَ یک ماھے ءَ پیش بلوچ لبریشن آرمی ءِ نیمگ ءَ دزگیر کنگ بیتگیں ایئرپورٹس سیکیورٹی فورس ( اے ایس ایف) ءِ ڈپٹی ڈائریکٹر ءِ لاش دزکپتگ-

پولیس ءِ واکدارانی رد ءَ 58 سالی محمد وسیم ءِ سیادی گوں کراچی ءَ بوتگ۔ آ اے سال ءِ 20 مئی ءَ یک ھمراھے ءِ ھواری ءَ کلات ءَ کساس 40 کلو میٹر دور مھمد تاوا ھما وھد ءَ سلاہ بندیں مردماں آوار جتگ کہ آ چہ شال ءَ دیم پہ کراچی ءَ روگ ءَ بوتگ-

اے وئیل ءَ پد سی ٹی ڈی تھانہ ءَ کیس درج کنگ بوتگ ھمے وڑ پولیس، انسداد ناشرکاری ءِ محکمہ، فرنٹیئر کور ءُ دگہ ادارھانی نیمگ ءَ آوار جنگ بوتگیں افسر ءُ آئی ءِ ھمراہ ءِ درگیجگ ءِ ھاترا پٹ ءُ پولی کارروائی بندات کنگ بوتگ بلے آ سوبمند نہ بوتگ انت۔

کلات ڈویژن انتزامیہ ءِ مزنیں کارندہ ءَ وتی نام ءِ شنگ نہ کنگ ءِ شرت ءَ رسانکدر ءَ گوں تران کنان ءَ گشتگ کہ چار شمبے ءِ روچ ءَ کلات ءِ تھانہ صدر ءِ سیمسر ءِ چیر ءَ توک نامیں دمگ ءَ چہ محمد وسیم ءِ لاش دزکپتگ۔

کلات پولیس کنٹرول ءَ ھم اے وئیل ءِ پدرائی کتگ ءُ گْوشتگ کہ لاش شال ءُ کراچی نیشنل ہائی وے ءِ رو برکتی نیمگ ءَ نزیک ءَ دو کلومیٹر ءِ دوری ءَ ویرانیں جاھے ءَ دست کپتگ۔

پولیس ءَ لاش دمگی ہیڈ کوارٹر ہسپتال کلات ءَ سر کتگ ءُ پد ءَ المی ئیں رسمی کارانی پد ءَ کراچی ءَ دیم داتگ۔

پولیس ءِ رد ءَ اے ایس ایف ءِ ڈپٹی ڈائریکٹر محمد وسیم احمد 20 مئی ءَ وتی ھمراہ ءِ ھواری ءَ چہ شال ءَ کراچی ءَ روگ ءَ بوتگ۔ آ زاتی گاڑی ءِ ھواری ءَ سپر کنگ ءَ بیتگ کہ ایشی ءِ تہ ءَ دو ڈرائیور ھم ھوار بیتگ انت۔

پولیس ءِ گشگ انت وھدے گاڑی محمد طوا ءِ دمگ ءَ سر بوتگ ناشناسیں سلاہ بندیں مردماں گاڑی اوشتارینتگ ۔ پجار ءَ پد سلاہ بندیں مردماں محمد وسیم احمد ءُ آئی ءِ ھمکار گوں وت برتگ ءُ گاڑی ءُ دوئیں ڈرائیور رند ءَ یلہ داتگ اَنت۔ ڈرائیوراں اے وئیل تھانہ صدر کلات ءَ ھال داتگ ءُ پد ءَ آوار جنگ بوتگیں مردمانی پٹ ءُ پول بندات کنگ بیتگ۔

اے ایس ایف ءِ افسر ءِ دزگیری ءِ زمہ واری بلوچ لبریشن آرمی ءَ کبول کتگ۔ جارکش جیئند بلوچ ءَ وتی کسانیں بیانے ءَ گوشتگ کہ زورگیریں پاکستان ءِ وزارت دفاع ءِ بالی پٹ سیکورٹی فورس ءِ ڈپٹی ڈائریکٹر ءُ کمانڈنگ آفیسر وسیم احمد مئے دست ءَ انت۔ بی ایل اے ءِ سرمچاراں کلات ءِ مستریں شاھدگ ءِ سر ءَ آئی ءِ پجار کنگ ءَ پد دزگیر کتگ۔

جیئند بلوچ ءَ گشتگ کہ اے آپریشن بی ایل اے ءِ انٹیلی جنس ونگ زراب ءِ داتگیں انٹیلی جنس ءِ ھالانی بنیاد ءَ کنگ بوتگ۔

بلوچستان ءِ دمگ کیچ ءَ پاکستانی پوج ءِ نیمگ ءَ چہ آپریشن کنگ بیگ ءَ اِنت، اے میان ءَ کوھاڈ ءَ داد محمد ء چاکر نامیں مردمے ءِ لوگ مانداشتگ اَنت-

دمگی اِھوالکار ءِ رِد ءَ اے اولی رند نہ اِنت اے مردم ءِ لوگ نشانگ کنگ بیگ ءَ اِنت، بلکیں اے اشی ءَ ساری ھم آئی ءِ لوگ باز رند ءَ بیڑبرتگ ءُ لوگ تاوان داتگ اَنت-

اِھوالکار ءِ گوشگ اِنت کہ پوج ءِ نیمگ ءَ چہ تمپ ءِ دمگ رودبن ءَ ھم بیڑ ءُ آپریشن کاروائیانی ھال اِنت-

نوشکی ءَ بنجاھی شھدگ ءِ سر ءَ ناکہ بندی ءِ وھد ءَ سلاھبنداں دو گاڑی سوتکگ انت ۔

نوشکی ءِ دمگ مل ءَ شال ءُ تفتان ءِ بنجاھی شھدگ ءِ سر ءَ دو گاڑی سوچگ بیتگ انت ۔

اے دابیں وئیل شھدگانی سر ءَ دومی وئیل نت۔ ایشی ءَ چہ پیسر مستونگ ءِ شیخ واسل ءِ دمگ ءَ سلاہ بندیں مردماں 7 گاڑی دستیگ کتگ انت کہ آھانی تہ ءَ یک بوزر ءِ بم ھوار انت۔

مستونگ ءَ سلاہ بندیں مردماں شھدگ کنٹرول کتگ ءُ کلاکانی کلاک بند کتگ ءُ ھپت مزنیں گاڑی گون وت برتگ انت۔

مروچی سھب ءَ مستونگ ءِ دمگ شیخ واسل ءَ شال ءُ تپتان شھدگ بند کتگ ءُ پٹ ءُ پول برجاہ داشتگ۔ بنشون ءِ رد ءَ سلاہ بندیں مردماں 7 مزنیں گاڑی دستجگ کتگ کہ ایشانی تہ ءَ ٹرالر ءُ بوزر گاڑی ھم ھوار اَنت۔

اے درگت ءَ انگت ءَ واکداراں ھچ وڑیں ھال ءُ اھوال نہ داتگ۔

زانگ بہ بیت گوستگیں روچاں شال – تفتان شاھدگ ءِ سر ءَ مڈی ءُ ایندگہ گاڑیانی سر ءَ اُرشانی بازیں وئیل بوتگ انت کہ آیانی زمہ واری بلوچ لبریشن آرمی ءَ زرتگ انت۔ بی ایل اے ءَ شاھدگانی سر ءَ بوتگیں بندشاں ”زرکاری بندش“ گشتگ۔

شاھدگانی سر ءَ یکشلیں اُرشانی سبب ءَ مڈی بار ءُ دگہ سامانانی برگ ءِ گاڑیانی انجمناں لوڈنگ بند کتگ، اے درگت ءَ زھرشانی ھم کنگ بوتگ بلے واکدارانی دلجمی ءَ پد ہڑتال مھتل کنگ بوتگ۔

سرکار ءِ دلجمی ءَ پد ھم اُرش برجاہ اَنت۔ گوستگیں روچاں مستونگ، نوشکی ءُ پنجگور ءِ مستریں شاھدگانی سر ءَ پاکستانی لشکر ءِ کاروان، مڈی باریں ءُ دگہ گاڑیانی سر ءَ اُرش بوتگ انت کہ ایشی ءِ زمہ واری بلوچ لبریشن آرمی ءَ من اِتگ انت۔

بلوچ یکجھتی کمیٹی (BYC) ءِ راھشونانی دیگ بیتگیں اُمر بندیگیں سزا ءِ ھلاپ ءَ سرجمیں بلوچستان ءَ شٹر ڈاؤن ہڑتال کنگ بیتگ-

گیشیں ھالانی رِد ءَ مروچی بلوچستان ءِ جتاجتائیں دمگاں شال، گوادر، ھُزدار، کیچ ، ھب چوکی، ھاران، پنجگور، دالبندین، کلات، واشک، مستونگ، نوشکی ءَ ھوار دگہ دمگاں سرجمی ءَ شٹر ڈاؤن ہڑتال کنگ بیتگ- اے ھڑتال ڈاکٹر ماہ رنگ بلوچ ءَ ھوار صبغت اللہ شاہ چی بلوچ داتگیں اُمر بندیگین سزا ءُ بی وائی سی راھشونانی یکشلیں بندیگ ءِ ھلاپ بیتگ-

سرجمیں بلوچستان ءَ شھریاں کاروباری بُنجاہ بند کتگ اَنت وتی راھشوناں گوں یکجاھی کتگ ءُ پیسلہ ءُ سیاسی ھلاپ ایرموش جھد ءِ کنگ گوشتگ – اے وڑ شال ءَ ھوار دگہ شھریاں ھم سرجمی ءَ ھڑتال کنگ بیتگ، اود ءَ جتاجتائیں پڑ ءَ چہ سیادی داروکیں مردماں آمیدگسی کاروائیاں نا اساپی ءُ سیاسی بدل ءِ بُنیاد لیکہ اِتگ-

راجی پارٹیانی رِد ءَ باز دمگاں دکانداراں زورانسری کار ءُ بار ءِ پچ کنگ ءَ لاچا کنگ جُھد کتگ، بلے اشی ءَ اَبید ھڑتال مزنیں کچے ءَ سوبمند بیتگ-

زھرشانی کنوکاں گوشتگ کہ مروچی زھرشانی بلوچستان ءَ سیاسی تواراں ایرموش کنگ ءُ دراجیں مدتے ءَ چہ برجاہ دزگیریانی ھلاپ ءَ یک مچی کلوھے-

بی وائی سی ءِ رِد ءَ بلوچستان ءِ شھراں بیتگیں اے ھڑتال راجی ھساب ءَ ریاستی پالیسیانی ءُ آمیدگس پیسلھانی ھلاپ ءَ یک مھکمیں پدکرد کندگ بیگ ءَ اِنت، وھدے کہ زھرشانی کنوکیں مردماں تچک کتگ کہ آ پُرایمن سیاسی گھگیری ءُ وتی لوٹانی درشان ءِ درچ برجاہ ءَ اِنت-

اے درگت ءَ کار ءَ باری مردم ءُ شھریاں گوشتگ کہ مروچی زھرشانی ءَ کمکاری ھساب ءَ ھوار بیگ ءِ مول ءُ مراد ریاستی زوراکی ءِ ھلاپ ءُ بی وائی سی ءِ سروکاں گوں یکجاھی درشان اِتگ، وھدے کہ باز دکانداراں گوشتگ کہ آ پوج ءُ سلاہ بندیں مردمانی نیمگ ءَ چہ زھرشانی ءَ ھوار بیگ ءُ تُرسینگ بیگ ءَ اَنت-

بلوچستان ءِ دو جتاجتائیں دمگ کلات ءُ بسیمہ ءَ پاکستانی پوج ءِ سر ءَ اُرش ءُ سرکاری ٹھیکیدار گوں ھمراہ سے پھازوکاں آوار جنگ بیتگ اَنت-

گیشیں ھالانی رِد ءَ سے شمبے ءِ روچ ءَ بسیمہ ءِ دمگ جُر ءَ سلاہ بندیں مردماں پاکستانی پوج ھما وھد ءَ اُرش ءِ نشانگ کتگ وھدے آ دمگ ءَ پیشگامی ءِ جُھد ءَ بیتگ-

اِھوالکار ءَ ٹی بی پی ءَ گوشتگ کہ پوج ءَ دمگ ءَ مارٹر آس دیگ ءَ بیتگ اَنت کہ سنگر گپتگیں مردماں آیانی سر ءَ راکٹ ءُ دگہ سلاھاں چہ اُرش کتگ- اُرش ءَ تاوانانی درگت ءَ تنی وھدے واکدار ءِ ھچ وڑیں گپ دیم ءَ نیتکگ بلے اُرش ءِ سوب ءَ پوج پُشتکنز بیتگ-

ھمے وڑ کلات ءِ نزیک ءَ ناشناسیں سلاہ بندیں مردماں گورنمنٹ کنٹریکٹر میر ثناء اللہ بھرانی آئی ءِ سے پھازوکاں ھوار آوار جتگ ءُ ناشناسیں جاھے ءَ برتگ-

اِھوالکار ءِ گوشگ اِنت آوار جنگ بیتگیں میر ثناء اللہ بھرانی جعفر آباد ءِ جھمنند اِنت ءُ سروزیز بلوچستان ءِ مشیر ھادیہ نواز بھرانی ءِ نزیکیں سیاد اِنت-

وئیل ءَ پد پولیس ءَ ناشناسیں مردمانی ھلاپ ءَ ایف آئی آر نکش کتگ آوار جنگ بیتگینانی یل کنائینگ ءُ کتکارانی دزگیری ءِ ھاتر ءَ پٹ ءُ پول بندات کتگ-

تنی وھدے دوئیں وئیلانی زمہ واری انگت ھچ گل ءَ نہ زرتگ اَنت-