بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ سرمچاراں دہ روچ ءِ میان ءَ جتاجتائیں دمگاں 26 کاروائی کتگ انت۔ اے اُرشانی تہ ءَ زورگیریں لشکر ءُ آیانی ایجنٹانی کیمپ، پوسٹ ءُ کاروان نشانگ جوڑ کنگ بوتگ اَنت ءُ زورگیریں لشکر ءِ زرکاری بندش ءِ چیر ءَ شھدگانی سر ءَ بندش برجاہ داشتگ ءُ زورگریں ریاست ءَ را زرکاری توانائی ءِ رسگ ءِ گاڑی اُرشانی تہ ءَ نشانگ جوڑ کنگ بوتگ اَنت۔ سرمچاراں مزنیں شاھدگانی سر ءَ پُھل ھم تباہ کتگ انت۔ اے اُرشانی تہ ءَ سرجم ءَ 30 پاکستانی لشکر ءِ کارندہ مرتگ انت ءُ بازیں ٹپیگ بوتگ اَنت ءُ ھمے وھد ءَ آیاں مزنیں مالی تاوانے رس اتگ۔ زورگیریں لشکر ءِ گون ءَ جنگ ءُ چوپاں بی ایل اے ءِ بھادریں سرمچار سنگت سفر خان ءَ شھید بیتگ۔
یازدہ جون: پنچ شمبے ءِ شپ ءَ پنجگور ءِ دمگ پروم ءَ پاکستانی لشکر ءِ پوسٹ ءِ سر ءَ سرمچاراں اُرش کتگ۔ دومی نیمگ ءَ قلات ءِ دمگ منگچر ءَ بدرنگ ءَ لُٹ ءُ پلی کمپنی ءِ نزیک ءَ زورگیر فوج ءِ پوسٹ راکٹ لانچر ءُ گرنیڈ لانچرانی گون ءَ بازیں گولہ آس داتگ انت۔ دوئیں اُرشاں زورگیریں لشکر ءَ جانی تاوان ءُ مالی تاوان رس اتگ۔
دوازدہ جون: مستونگ ءِ دمگ اسپلنجی ءَ سلاہ بندیں اُرش ءَ زورگیریں پاکستانی لشکر ءِ یک افسرے مرتگ۔ سرمچاراں شال ءِ میان گھنڈی ءِ نزیک ءَ مزنیں شھدگ ءِ سر ءَ ناکہ بندی کتگ ءُ سنیپ چیکنگ برجاہ داشتگ۔ زورگیریں لشکر ءِ گاڑی ءِ سر ءَ اُرش ءَ سئے کارندہ مرتگ اَنت کہ آ دیم ءَ روگ ءِ جھد ءَ بیتگ انت ءُ پد ءَ زورگیریں لشکر ءُ پولیس ءِ گیشتریں لشکر ءَ دیم ءَ روگ ءِ جُھد کُتگ کہ چہ ایشی ءَ پد بوتگیں جنگ ءَ دگہ دو لشکر ءِ کارندہ ءُ یک پولیس ءِ کارندھے مرتگ ءُ کم چہ کم چار کارندہ ٹپیگ بوتگ اَنت۔ اے ویلاں سرمچار سنگت سفر خان شھید بوتگ۔
چاردہ جون: کیچ ءِ گورکوپ سری کلگ ءِ دمگ ءَ زورگیریں لشکر ءِ پیادگیں لشکر آئی ای ڈی ءِ اُرش ءَ نشانگ جوڑ کنگ بوتگ کہ ایشی ءِ تہ ءَ یک کارندھے جاہ ءَ بیران بوتگ۔ ھمے روچ ءَ سرمچاراں مستونگ ءِ کردگاپ ءِ دمگ ءَ زورگیر ءِ لشکر ءِ پوزیشنانی سر ءَ مارٹرے آس داتگ ءُ بازیں زورگریں لشکر ءِ کارندہ مرتگ ءُ ٹپیگ بوتگ اَنت ءُ پروش وارتگیں زورگریں لشکر ءَ کردگاپ ءِ شھر ءِ تہ ءَ لس آبادی ءِ سر ءَ مارٹر گواری کتگ کہ ایشی ءِ آسر ءَ یک زالبولے شھید ءُ یک زھگے ٹپی بیتگ-
پانزدہ جون: نوشکی ءِ احمد وال پھاٹک ءِ مزن شھدگ ءِ سر ءَ سرمچاراں آئی ای ڈی ءِ اُرش ءَ بازیں زورگیریں لشکر ءِ گاڑیانی کاروان ءِ تہ ءَ یک گاڑی یے تباہ کتگ ءُ پد ءَ دگہ گاڑیانی سربستگ ءُ نشانگ جوڑ کتگ انت؛ زورگیریں لشکر ءِ بکتربندیں گاڑی ءَ ھوار پنچ گاڑی ءِ سر ءَ دیم پہ دیم اُرش کنگ بوتگ کہ ایشی ءِ آسر ءَ زورگیریں لشکر ءِ ھشت کارندہ مرتگ ءُ بازینے ٹپیگ بوتگ اَنت۔
دومی نیمگ ءَ کیچ ءِ دمگ بلنگور ءِ ٹالویگ بازار ءَ زورگیریں لشکر ءِ مزنیں بنجل ءِ نزیک ءَ سرمچاراں زورگیریں لشکر ءِ دو گاڑیانی سربستگ ءُ نشانگ جوڑ کتگ انت۔ اے اُرش ءَ زورگیریں لشکر ءِ سئے کارندہ مرتگ ءُ بازینے ٹپیگ بوتگ اَنت ءُ یک گاڑی یے راکٹ ءِ سبب ءَ تباہ بوتگ۔
پد ءَ ھمے روچ ءَ مستونگ ءِ کردگاپ ءِ دمگ شال ءُ تپتان ءِ مزن شھدگ ءِ سر ءَ اُرش ءَ زورگیریں لشکر ءِ بازیں گاڑیانی کاروان نشانگ جوڑ کنگ بوتگ کہ آ زورگیریں لشکر ءِ افسراں سیکورٹی دیگ ءَ بیتگ اَنت۔ اے اُرش ءَ زورگیریں لشکر ءِ دو گاڑی دیم پہ دیم اُرش ءِ آماچ بوتگ اَنت ءُ زورگیریں لشکر ءَ کواڈ کاپٹر کارمرز کتگ کہ یکے سرمچاراں تیر گواری کتگ۔ اے اُرش ءَ کم چہ کم شش زورگیریں لشکر ءِ کارندہ مرتگ ءُ بازینے ٹپیگ بوتگ اَنت۔
دوشمبے ءِ شپ ءَ تربت شھر ءِ تربت ءِ میان استمانی بالی پٹ ءِ نزیک ءَ دژمن ءِ بالی پٹ سیکورٹی فورس ءِ کیمپ گوں راکٹ ءُ گرنیڈ لانچرانی نشانگ جوڑ کتگ ءُ اے ایس ایف ءِ یک کارندہے مرتگ ءُ دو ٹپیگ بوتگ انت۔ پنچ جون ءَ تربت ءِ دمگ دھات ءَ زورگیریں لشکر ءِ پوسٹ ءِ سر ءَ سرمچاراں بازیں گرنیڈ لانچر آس داتگ ءُ پوسٹ ءِ سر ءَ ھستیں کیمرہ تاوان داتگ ءُ تباہ کتگ اَنت۔
مستونگ ءِ دمگ کھڈکوچہ ءِ دمگ زدغلام جان ءَ سرمچاراں زورگیریں لشکر ءِ گاڑی نشانگ جوڑ کتگ ءُ دو کارندہ مرتگ انت۔
شانزدہ جون: سوراب ءَ شال ءُ کراچی ءِ مزن شھدگ ءِ سر ءَ یک مزنیں پُھلے سر ءَ ءُ نوشکی ءِ دمگ کشنگی ءَ لنک روڈ ءِ سر ءَ یک پُھلے سر ءَ سرمچاراں تراکناکیں شورواں گوں تباہ کتگ اَنت۔ سئے شمبے ءِ شپ ءَ پنجگور چیدگی ءِ راہ ءَ سرمچاراں 7 مزنیں گاڑی نشانگ جوڑ کتگ ءُ ناکارہ کتگ انت۔
ھبدہ جون: ھزدار ءِ دمگ زھری ءِ کوچو ءِ جاہ ءَ سرمچاراں زورگیریں لشکر ءِ بمب ڈسپوزل اسکواڈ ءِ پیادگیں لشکر ءِ کارندہ ءُ آھانی ھمراھیں فوجی گاڑیانی سر بستگ ءُ اُرش کتگ ءُ تاوانانی دیمپان کتگ انت-
ھژدہ جون: نوشکی بازار ءَ سلاہ بندیں اُرش ءَ بلوچ لبریشن آرمی ءِ سرمچاراں ڈپٹی سپرنٹنڈنٹ پولیس ءُ سی ٹی ڈی ءِ افسر افضل محمد حسنی کشتگ۔ اے آپریشن بی ایل اے ءِ اسپیشل ٹیکٹیکل آپریشن اسکواڈ ءِ نیمگ ءَ کنگ بوتگ۔ اے کارندہ بلوچ نسل کشی ءِ پالیسیانی تہ ءَ تچک ءَ ھوار بوتگ۔ افضل محمد حسنی نوشکی شھر ءُ آئی ءِ کش ءُ گوراں پہ زورگیریں لشکر ءِ ھاتر ءَ ھال رسانی کنوک ءِ بھرتی ءُ آسراتی ءِ کار ءَ ءُ ھمے رنگ ءَ لوگانی چاردر ءُ چار دیوالانی پامال کنگ ءُ ورنایانی زورانسری ءَ بیگواہ کنگ ءُ نشانگ جوڑ کنگ ءَ ھوار بوتگ۔ اے کارندہ فوجی زوراکیانی زورگیریں لشکر ءِ آسراتی ءِ تہ ءَ ھوار بوتگ ءُ افضل محمد حسنی نوشکی ءِ ’’ڈیتھ ءِ اسکواڈ‘‘ ءِ مالی کمک ءِ تہ ءَ ھم ھوار بوتگ۔
ھبدہ جون: نوشکی ءِ شھر امین الدین روڈ ءِ نزیک ءَ سلاہ بندیں اُرش ءَ کارندھاں ملٹری انٹیلی جنس ءِ کارندہ محمد قاسم بادینی کُشتگ۔ اے کارندہ نوشکی شھر ءُ کش ءُ گوراں زوراکیانی آسراتی ءِ تہ ءَ ھوار بوتگ ءُ زورگیریں لشکر ءِ ھاتر ءَ سرشونی ءِ بستار ءَ کار کنگ ءَ بوتگ کہ ایشی ءِ بدل ءَ زورگیریں لشکر ءَ اے کارندہ ءَ ملامگری ءِ گرگ ءَ آزاتیں دست داتگ ات۔ ایشی ءَ ابید اے کارندہ ءَ کسانیں بچکاں بلیک میلنگ ءُ ھرابکاری کنگ ءَ ھم ھوار بوتگ۔
پانزدہ جون: سرمچاراں نوشکی شھر ءِ نیشنل بینک ءِ نزیک ءَ انٹر سروسز انٹیلی جنس ءِ کارندہ تاؤس خان کُشتگ۔ اے کارندہ ءَ بازیں وھدے ءَ چہ زورگیریں لشکر ءِ انٹیلی جنس ایجنسی ءِ واستا کار کنگ ءَ بوتگ۔ تاؤس خان ءَ پہ زورگیریں لشکر ءَ ھال رسانی کنوک بھرتی کتگ، لوگانی سر ءَ اُرش کنگ ءِ آسراتی داتگ ءُ زورگیریں لشکر ءِ واستا ھال رسانی داتگ۔ گوستگیں سال ءَ سمیع سرپرہ ، دزگیری ءِ وھد ءَ ، آئی ءَ اے گپ پدر کتگ ات کہ تاؤس خان ءَ 2024 ءَ بی ایل اے ءِ اُرش ءَ مرتگین یاسر جمالدینی ، کہ ، ءُ آئی ءَ را آئی ایس آئی ءِ کارگس ءَ بستار ءِ چاریگری ءَ بھرتی کتگ ، ءُ پد ءَ آ ءُ تاؤس خان ءَ زورگیریں لشکر ءِ ھمراھی ءَ لوگانی سر ءَ اُرش کتگ ۔ زورگیریں لشکر ءَ تاؤس خان ءَ دُزی ءُ لٹ ءُ کُٹ ءَ مھار گٹ ءَ داتگ۔
نوزدہ جون: شال ءِ میان گھنڈی ءِ نزیک ءَ پُھل ءِ سر ءَ ریموٹ کنٹرول آئی ای ڈی ءِ اُرش ءَ سی ٹی ڈی ءِ کارندہ موٹر سائیکل ءِ سر ءَ سفر کنگ ءَ نشانگ جوڑ کنگ بوتگ اَنت ءُ دو کارندہ ٹپیگ بوتگ اَنت۔
اورناچ ءِ علی کوہ ءِ دمگ ءَ سرمچاراں شال ءُ کراچی ءِ مزنیں شھدگ ءِ کنٹرول کتگ ءُ کلاکانی کلاک چیکنگ برجاہ داشتگ۔
بیست جون: نوشکی ءِ اسٹیشن ءَ سرمچاراں سلاہ بندیں اُرش ءَ سئے بوزر گاڑی نشانگ جوڑ کتگ ءُ آیانی ٹائر ناکارہ کتگ اَنت۔
مستونگ بائی پاس ءَ ریموٹ کنٹرول آئی ای ڈی اُرش ءَ زورگیریں فوج ءِ کاروان ءِ گاڑی نشانگ جوڑ کنگ بوتگ ءُ تاوانانی دیمپان کتگ ءُ ھمے روچ ءَ پنجگور ءِ پروم ءِ دمگ ءَ ‘ڈیتھ اسکواڈ’ ءِ گاڑی سرمچاراں نشانگ جوڑ کتگ ءُ تاوان داتگ۔ چہ ایشی ءَ ابید سرمچاراں زراعت ءِ دمگ ءَ پنجگور ءُ چیدگی ءِ راہ کنٹرول کتگ ءُ ٹریلر گاڑی ءِ ٹائر ھم ناکارہ کتگ اَنت۔
جارکش جیئند بلوچ ءَ گوشتگ بلوچ لبریشن آرمی وتی جزم ءَ پد ءَ پدر کنت کہ مئے مھکمیں کاروائی ءُ زرکاری بندش داں بلوچ سرڈگار ءَ زورگیریں لشکر ءِ سرجمی ءَ درکپگ ءُ راجی آجوئی ءِ رسگ ءَ گوں گیشیں ترندی ءَ برجاہ مان انت۔ دژمنیں ریاست ءَ زرکاری ءُ فوجی تک ءَ لنگڑ کنگ مئے ھکمت املی ءِ یک بنیاتی بھرے ءُ مئے بھادریں سرمچار ءُ ھاسیں رنگے ءَ سنگت سفر خان ءِ اے راجی پرز داریں راہ ءَ ابدی کربانی مئے آشوبی تک ءَ گیشتر مھکمی دنت۔ ما یک رندے پد ءَ اے گپ ءَ پدر کنگ لوٹیں کہ بلوچ وتن ءِ سر ءَ زورگری ءَ دراج کنگ ءِ فوجی ادارہ بہ بنت، آہانی لوکل نیٹ ورک ءُ ڈیتھ اسکواڈ بہ بنت یا ھاک ءِ وسیلگاں لٹ ءُ پُل کنوکیں لٹ ءُ پل کنوکیں شریدار بہ بنت، درست بی ایل اے ءِ نشانگ ءِ تہ ءَ انت۔
