شال ءَ سلاہ بندیں مردماں پاکستانی لشکر ءِ راشن ءِ گاڑی دستیگ کتگ ۔
شال ءَ ھواریں دمگ دغاری کراس ءَ شاھدگ ءِ سر ءَ ناکہ ءِ وھد ءَ پاکستانی فورسز ءِ پوسٹ ءَ راشن برگ ءِ پک اپ ٹرک راشنانی ھمراھی ءَ سلاہ بندیں مردماں دستیگ کتگ۔
اھولانی رد ءَ سلاہ بندیں مردماں پد ءَ ڈرائیور یلہ داتگ اَنت بلے گاڑی ءُ فورسز ءِ راشن گون وت برتگ اَنت۔
بلوچستان ءِ دگہ دمگانی وڑ ءَ شال ءُ آئی ءِ کش ءُ گور ءِ دمگ ءُ شاھدگانی سر ءَ ھم بلوچ سلاہ بندیں آجوئی ءِ گل پرکار انت کہ آ شھدگانی سر ءَ ناکہ بندی ءَ ھوار فورسز نشانگ جوڑ کنگ ءَ انت۔
گوستگیں لھتیں روچاں بلوچ لبریشن آرمی ءَ شال ءِ دمگ میان گھنڈی ءَ مستریں شھدگ بند کتگ ءُ اُرشانی تہ ءَ فورسز نشانگ کتگ اَنت۔ ایشی ءَ ابید گوستگیں ماہ ءَ بلوچ لبریشن آرمی ءَ شال ءَ گوں ھمگرنچیں پنجپائی دمگ ءِ مستریں شاھدگ ءِ سر ءَ سی ٹی ڈی ءُ فرنٹیئر کور ءَ گوں بمب تراک ءُ سلاہ بندیں اُرشاں نشانگ جوڑ کتگ۔
انگت ءَ مروچی ءِ وئیل ءِ زمہ واری کس ءَ نہ زرتگ۔