بی این ایم ءَ بی وائی سی ءِ رھشونانی ابدی زندان سزا ترندی ءَ ایرجتگ ، بی وائی سی ءَ تھتگ بند ھرتال ءِ جار جتگ ۔

بلوچستان ءِ ورنائیں رھشوناں ابدی زندان ءِ سزا ریاستی ناشرکاری اِنت ۔ بی این ایم

بلوچ آجوئی لوٹوکیں راجکاریں گل بلوچ راجی زْرمبشت ( بی این ایم ) ءِ جارکش ءَ رسانکدراں وتی شنگ کرتگیں درشان ءِ تہ ءَ بی وائی سی ءِ رھشون ڈاکٹر ماہ رنگ ، صبغت اللہ ءُ بلوچ نودربر گل ( بی ایس او ) ءِ چیئرمین ءُ ایم فل ءِ زانتکار بالاچ قادر ءَ داں ابد زندانی ءِ سزا گوں ترندی ءَ ایرجتگ ءُ گْوشتگ کہ پاکستان ناشرکاریں مھترھندے کہ وتی مھترھندی واک ءُ ترامگیجاں پہ بلوچستان ءِ مردمانی بیم دیگ ءَ کارمرد کنگ ءَ اِنت۔

جارکش ءَ گوشتگ کہ بلوچستان ءِ ورنائیں رھشوناں داں ابد زندان ءِ سزا گھگیری سیاست ءِ نگٹ کنگ ءِ کوشست اِنت۔ ڈاکٹر ماہ رنگ ، صبغت اللہ ءُ بالاچ قادر پر ایمنیں سیاسی گھگیری ءِ پارست ءَ بلوچ راج ءِ بگیری ءَ مھترھندی زوراکی ءُ مردمی اگبالانی لگتمالی ءِ سر ءَ توار چست کنگ ءَ اَنت۔ آیاں سزا دیگ بیتگ داں بلوچ راجی جھدکار بہ ترس اَنت۔

آئی ءَ گْوشتگ بلوچ راج کور دیمگیں آمیدگس ءُ پاکستان ءِ آئین ءُ راھبندانی سر ءَ سرجم ءَ نادلجمی درشان کنت۔ اے سزا ایوک ءَ لھتے مردم یا بلوچ راج ءِ باندات ءِ راھشونانی بگیری ءَ نہ اِنت بلکیں سرجمیں بلوچ راج ءِ بگیری ءَ پاکستان ءِ شور اِنت ، ایشی ءِ بگیری ءَ ھرچ تک ءَ توار چست کنگ بیت۔ ما پاکستانی آمیدگس ءِ اے شور ءَ رد کن ایں ؛ پاکستان ءِ اے آمیدگسی ناشرکاری بلوچ راجی زْرمبشت ءُ گھگیری سیاست ءِ راہ ءَ داشت نہ کنت۔

دومی نیمگ ءَ بلوچ یکجھتی کمیٹی ءَ ڈاکٹر ماھرنگ بلوچ ءُ سبگت اللہ شاہ جی ءِ بگیری ءَ داتگیں پیسلہ ءِ بگیری ءَ سرجمیں بلوچستان ءَ تھتگ بند ھرتال ءِ جار جتگ ۔

جارکش ءَ گوشتگ کہ ما چہ باپاری ، ٹرانسپورٹر ، نودربر ، راجکاریں باسک ءُ بلوچ راج ءَ لوٹ کن ایں کہ اے ھرتال ءَ بھر بہ زور انت ءُ ناھکیانی بگیری ءَ وتی یکجاھیں توار ءَ چست بہ کن انت ۔