دودمان ربیدگی پتر ءِ نیمگ ءَ شنگ بوتگیں جار ءِ تہ ءَ گوشگ بوتگ کہ بلوچی زبان ءِ لچہ کار میاء بلوچ ءِ نوکتریں لچھانی تاک ” پرداچ“ زوت چہ دودمان ءِ نیمگ ءَ شنگ بیت ۔
کتاب ءِ درگت ءَ نبشتہ کار میاء بلوچ گوں ٹی بی پی ءَ تران کنان ءَ گوشتگ کہ منی کتاب ءِ درگت ءَ اولی گپ ایش اِنت کہ یک روچے شاہ میر دیدگ ءَ من ءَ گْوشتگ اَت کہ ما یک ءُ دو سنگت نشتگ ایں ۔ تو وتی شئیرے کارے روان بدے ۔ ما سنگت تئی شئیراں وان ایں ۔ من گڑا شاہ میر ءَ پہ گپڑے شئیر روان دات ءُ شاہ میر دیدگ ءَ گْوشت کہ مروچیگیں روچ گوں تئی شئیراں وش گْوز ایت ۔ پد ءَ گْوشت ئِے کہ تئی دستونک سک شوک اَنت ۔ ایشاں کتابی دروشمے بدئے ۔من گْوشت تو دستونکاں گچین کن ءُ دیم بدئے ۔ شاہ میر ءَ دستونک ءُ کار گچین کت اَنت ۔ پد ءَ تارک پیشوکانی ءَ گْوشت کتاب چاپگ ءِ زراں من دے آں ۔ اِے کتاب ءِ کسّہ ھمیش اِنت ۔
نبشتہ کار ءَ درائینت کہ اِے کتاب لبزانک ءَ یاکہ لبزانک ءِ وانوک ءَ چی سیت ءُ نپ دات اِنت ۔ یاکہ اِے کتاب وت ءَ لبزانک ءِ دامن ءَ جاگہ دات کنت کہ نہ کنت ۔ اِے منی جیڑہ نہ اِنت ءُ نئیکہ من چوش جیڑ اِتگ ۔ وتی جند ءِ کتاباں ابید دگہ شوکیں کتاب ءِ وانگ من ءَ وش بی ۔باکی منی نبشتہ کنگ ءِ پشت ءَ دگہ مزنیں مول ءُ مکسدے نیست ۔ ھما بنداتی زمانگ ءَ کہ شئیرے شئیرے نبشتہ کتگ ۔ آزمانگ ءَ نبشتہ کنگ منی شوک بیتگ ءُ انی من نبشتہ کنگ آدت کتگ ۔ من پہ کس ءَ نبشتہ کنگ ءَ نہ آں ۔ بگندئے باندا منی ھمے آدت پرشت من نبشتہ کنگ ءَ یل دے آں ۔ من نئیکہ شائرے آں ، نئیکہ ادیبے آں ، من یکیں چیز ءِ بابت ءَ مرچی دگہ گپے جن آں ، باندا دگہ گپے جن آں ۔ من ھچ چیز ءَ سیریس نہ آں ۔
اگاں ھمے نبشتہ کنگ ءِ آدت ءَ من ءَ نہ دروھ اِت من دیمتر ءَ نبشتہ کن آں ۔تارک ءَ کتاب چاپگ ءِ زر دات اَنت ۔ من کتاب چاپ کن آں۔
آئی ءَ گشت کہ چوناھا ھرچ چاگرد ءَ شائری ءُ ردانک ھمراہ ءُ ھمگام اَنت ،بلے ھما چاگرد ءِ تہ ءَ کہ من ردوم زرتگ ، گْوشے زاناں من پیسر ءَ شائری ءَ گوں ڈیک وارتگ ، اسل ءَ چوش بیتگ کہ کسانی ءَ پیرینانی کِر ءَ کسّہ کسّھے اشکتگ یاکہ اسکول ءِ کتابانی تہ ءَ کرگشک ءُ کپیس ءِ کسّہ بہ بنت کہ دگہ کِسّہ ، من ھمے سما کتگ کہ کسّہ انٹرٹینمٹ ءِ چیزے ۔ بلے ھمے اُمبر ءَ سوتے اشکتگ کہ شئیرے ونتگ کہ گوش داشتگ ، گڑا سما کتگ کہ شئیر گْوشے منی مارشتانی زبان انت۔
پرداچ ءِ ندکار ءَ گشت کہ من کہ ھردیں شئیرے رجانک کن آں ، گڑا ھمے وھد ءَ من ءَ ھمے سما بیت کہ من رجانکے کنگ ءَ نیاں ، بلکیں وت شئیرے نبشتہ کنگ ءَ آں ، پرچا کہ شائری ، گم ، وشی ، نفسیات ، مِھر ، کینگ بزاں کہ انسان ءِ ھما زبان انت کہ آئی ءِ وجود ءَ سرجم کنت ۔ من اگاں انی ردانک ءِ گپ ءَ بکن آں ، گڑا من سرپد باں کہ ردانک یک زمہ داری یے ، چوش بل کہ ردانک سرجم ءَ مارشت ءُ زیبائی ءِ زبان نہ انت ، بلے ردانک یک راجی ءِ دود ءُ ربیدگانی زبان انت ءُ ھرچ راج ءِ دود ءُ ربیدگ زیبا اَنت ءُ آیاں گوں یک راجی مارشتے بندوک انت ۔
آئی ءَ گشت کہ ردانک ءِ رجانک ءِ بابت ءَ چوش گْوشاں کہ من ھردیں گدارے ، یاکہ آزمانکے رجانک کنگ ءَ باں ، گڑا اِے وھد ءَ من ناں رجانکارے باں ءُ نئیکہ گدار نویس ءُ آزمانکارے باں ، اِے وھد ءَ من تھنا یک گدار ءُ
دودمان ربیدگی پتر ءِ رد ءَ میا بلوچ ، بلوچی زبان ءِ نامی ئیں لچہ کار ءُ نبشتہ کارے ، چد ءُ پیش آئی ءِ کتاب ’ تئی جدائی کسہ کنت ‘ شنگ بیتگ کہ وانوکاں سک دوست داشتگ۔ آئی ءَ گوشتگ کہ ما لوٹ ایں بلوچی نبشتہ کارانی کتاب وانوکاں ارزانیں نھادے ءَ دست بہ کپ اَنت ءُ نبشتہ کارانی سر ءَ پہ کتاب ءِ چاپ ءُ شنگ ءَ زور مئیت۔
جار ءِ تہ گوشگ بوتگ کہ انیگیں کتاب ءِ نھاد چہ ادارہ ءِ نیمگ ءَ پاکستانی 250 کلدار ایر کنگ بیتگ ۔ کتاب ءِ بھا زیروک ءُ دکاندار چہ اے واٹساپ نمبر ( 00447346916900 ) ءَ کتاب ءَ بھا زرت کن اَنت۔
دودمان ربیدگی پتر ، بلوچ دود ءُ ربیدگ ءِ دیمروئی ءَ جھانی تک ءَ کارکنوکیں درسیاسی گلے کہ بلوچستان ءَ ابید دری ڈیھاں ھم ربیدگی مراگش ایر کنت۔
