ھدہ جیل ءَ فیس لیس ٹرائل ءِ ھلاپ ءَ بلوچ یکجھتی کمیٹی ءِ رھشونانی دھرنا ششمی روچ ءَ برجاہ اِنت۔ گل ءِ رد ءَ اے زھرشانی ءِ ھلاپ ءَ آمیدگس ءِ کارروائی ءِ رھبند اِنت کہ آئی ءَ را درکانودی انت۔
گیشیں ھالانی رد ءَ پنچ روچ پیسر بی وائی سی ءِ رھشوناں فیس لیس آمید گس ءِ پیسلہ رد کنگ ءَ جیل ءِ تہ ءَ زھرشانی ءِ دھرنا بندات کتگ ات کہ نوں آمید گس وتی ششمی روچ ءَ سر بوتگ۔ اے سازمان ءِ گشگ اِنت کہ آمیدگس ءِ پچیں دادگاہ یک بنیاتی قانونی ءُ آئینی ھکے ءُ ایشی ءِ انکار تچکیں آمیدگس ءِ رھبندانی ھلاپ اِنت۔
اے زھرشانی ءِ ھمراھی ءَ گل ءَ سئے روچی آن لائن کمپینے ھم بندات کتگ کہ ایشی ءِ تہ ءَ زند ءِ جتا جتائیں پڑاں چہ مردماں ھوار سیاسی جھدکار، نودربر، وکیل ءُ انسانی ھکانی جھدکار ھوار بوتگ اَنت۔
ماہ رنگ بلوچ ءِ گوھار ءَ وتی بیان ءَ گشتگ شش روچ ءِ گوزگ ءَ پد ہم جیل ءِ توک ءَ گوں رھشونانی گند ءُ نند ءِ موہ دیگ بوگ ءَ نہ انت۔ آئی ءِ گشگ ءِ رد ءَ دزگیریں مردم چہ ترسناکیں گرم ءُ بنیاتی آسراتی ءِ نہ بوھگ ءَ ابید وتی کانونی ھک ءِ ھاتر ءَ وتی ایمنیں زھرشانی ءَ برجاہ دارگ ءَ اَنت۔
آئی ءَ گوشت کہ فیس لیس انساپی رھبندانی ھلاپ انت پرچا کہ ایشی ءَ چہ ملزماں وت پھریزگ ءِ ھک ءُُ الس ءِ نگرانی ءَ آمید گس ءِ کارروائی ءَ چہ زبھر کنت۔ آئی ءِ گشگ ءِ رد ءَ ھاندان ءِ نیمگ ءَ وتی نزیکیں مردمانی گور ءَ نہ رسگ ءِ سبب ءَ آھانی جیڑہ گیش بوھگ ءَ اِنت۔
بلوچ یکجھتی کمیٹی ءَ لوٹ کتگ کہ فیس لیس کیس ءِ امل ھلاس کنگ بہ بیت ءُ پچیں آمید گس ءِ کیس دلجم کنگ بہ بیت۔ گل ءَ چہ انسانی ھکانی جھدکار، وکیل، اھوالکار ءُ لس شھریاں اے جیڑہ ءِ سر ءَ توار چست کنگ ءِ لوٹ کتگ۔