TBP Balochi

نوشکی ءِ دمگ احمد وال اسٹاپ ءِ نزیک ءَ پجّار نہ بوتگیں سلاہ مردمانی تیرگواری ءِ آسر ءَ مھکمہ انسداد ناشرکاری (سی ٹی ڈی ) ءِ سروک ماما افضل سک ٹپی بیتگ اَنت کہ پد ءَ ٹپّانی درد نہ سگ اِتگ ءُ بیران بیتگ-

پولیس ءِ رِد ءَ ماما افضل سی ٹی ڈی ءَ ڈپٹی سپرنٹنڈنٹ پولیس (ڈی ایس پی) ءِ اوھد ءِ سر ءَ کار ءَ بیتگ- وئیل ھما وھد ءَ دیم ءَ اتکگ وھدے ناشناسیں اُرشکاراں نوشکی شھر ءَ احمد وال اسٹاپ ءَ آئی ءِ سر ءَ تیرگواری کتگ، چریشی ءِ آسر ءَ آ سک ٹپی بیتگ-

اِھوالکار ءِ گوشگ اِنت کہ ٹپی ئیں افسر زوت نزیکیں نادُراھجاہ ءَ برگ بیتگ، بلے اود ءَ آ نہ رکّ اِتگ ءُ الاج ءِ میان ءَ بیران بیتگ-

وئیل ءِ سوب تنی وھدے زانگ نہ بیتگ، نانکہ اُرش ءِ زمہ واری دگہ گلے ءَ منّ اِتگ-

زانگ بہ بیت کہ بلوچستان ءَ مھکمہ انسداد ناشرکاری (سی ٹی ڈی ) سر ءَ جتاجتائیں بھتام ءِ سوب ءَ ایرجنی ءِ نشانگ اِنت- انسانی ھکانی گلاں، سیاسی پارٹیاں ءُ بلوچ چاگردی پارٹیانی نیمگ ءَ چہ سی ٹی ڈی سر ءَ دروگیں میڑ ءُ زورانسری آوار جنی ءَ ھمگرنچ ءِ بھتام جنگ بیتگ-

پنجگور ءِ دمگ چہ چککول ءَ یک ورنایے لاش دزکپتگ- پولیس ءِ رِد ءَ کشگ بیتگیں تیرجتگ ءُ کشتگ، وھدے کہ لاش ءِ پجّار ءِ ھاتر ءَ پنجگور ءِ نادُراھجاہ ءَ برگ بیتگ-

لاش ءِ پجّار مجاھد ء حبیب نام ءَ چہ بیتگ کہ تھسیل پروم ءِ جھمنند اِنت ءُ یک ڈرائیورے-

کھول ءِ رِد ءَ بیست ءُ دو سالی ئیں مجاھد ھپت جون 2026 ءِ شپ ءَ سی پیک دگ ءَ سرسانڈ، چہ پنجگور ءَ بیگواہ کتگ- کھول ءِ ٹاہ داتگ کہ آ پاکستانی پوج ءَ وتی دستیگ کتگ، چریشی ءَ پد آئی ءِ درگت ءَ ھچ وڑیں ھال نیست-

بلوچستان ءِ دمگ کیچ ءَ پاکستانی لشکر ءِ کاروان ءِ سر ءَ تراک بیتگ یک مردمے ٹپیگ بوتگ-

گوستگیں روچ ءَ کیچ ءِ دمگ زامران ءِ سابونی ءَ تراک ءَ یک مردمے ٹپیگ بوتگ کہ آ ٹپیگیں جاوراں نادراھجاہ ءَ سر کنگ بوتگ۔

ھالانی رد ءَ اے مردم ھما وھد ءَ تراک ءَ زدگ بیتگ کہ آ پاکستانی پوج ءِ پوسڑ ءِ نزیک ءَ وتی گاڑی ءِ ھمراھی ءَ سر بیتگ-

دمگی مردمانی رد ءَ اے مردم پاکستانی لشکر ءَ سامان سر کنگ ءَ بوتگ کہ تراک ءَ آ نشانگ جوڑ کنگ بوتگ اَنت۔

انگت ءَ اے اُرش ءِ زمہ واری کس ءَ نہ زرتگ، بلے گوستگیں روچاں گْوشگ بیتگیں دمگ ءَ لشکر ءِ کاروانانی سر ءَ گیشتریں اُرشانی زمہ واری بلوچ لبریشن آرمی ءَ زرتگ انت۔ جارکش جیئند بلوچ ءَ وتی یک بیانے ءِ تہ ءَ گْوشتگ کہ دمگ ءَ پوج ءِ واستا سامان بروک داشتگ ءُ گاڑی ءِ ڈرائیور ءُ واھند سرپد کتگ انت۔

بلوچ ریپبلکن آرمی ءِ جارکش سرباز بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں گوستگیں شپ ءَ سندھ ءِ دمگ کشمور ءِ ڈیرہ موڑ چوک ءِ سر ءَ اوشتوکیں پُلپانچیں شرکت ءِ ٹرالرز ، مشینری ءُ کاردارانی سر ءَ وتکاریں سلاہ ءُ دستی بمب اُرشانی نشانگ کتگ اَنت چریشی ءِ آسر ءَ بازیں کاردار ءُ پولیس کارندہ ٹپی بوتگ اَنت وھدے کہ شرکت ءِ مشینری تاوان داتگ-

جارکش ءَ گْوشتگ کہ مروچی سُھب ءَ ھمے ھند سر ءَ او جی ڈی سی ایل ءِ کاروان ڈیرہ موڑ ءِ نزیک ءَ ریموٹ کنٹرول بمب اُرش ءِ نشانگ کتگ وھدے ڈیرہ بگٹی نیمگ ءَ درتکگ اَنت-

جارکش ءَ گْوشتگ کہ او جی ڈی سی ایل ءَ بلوچستان ءِ دمگ ڈیرہ بگٹی ءَ بلوچ راجی مڈی لُٹ ءُ پُل ءِ ھاتر ءَ جتاجتائیں ھندانی سر ءَ پٹ ءُ پول بندات کتگ کہ اشی ءِ ھچ وڑ موکل ندے ایں-

جارکش ءَ دیمتر ءَ گْوشتگ کہ بی آر اے ھمے شرکتاں تچکیں کلوہ دے ایں کہ ڈیرہ بگٹی ءَ سرجمی ءَ کار ءَ بند بہ کن اَنت ءُ چہ دمگ در بیا اَنت اگاں ناں آ وتی جانی ءُ مالی تاوان ءِ زمہ وار وت بنت پرچاکہ راجی مڈی ءِ پھاز ءِ ھاتر ءَ گل وتی کاروائیاں تُرند کن ایں-

جارکش ءَ گُڈی ءَ گْوشتگ کہ یازدہ جون ءَ کلات ءِ دمگ نرمک ءَ بی آر اے ءِ سرمچاراں مصطفی ء باھر کلوھی رند تیرگواری کتگ کشتگ- اے مرد لھتے ءَ وھد ءَ ساری دزگیر کتگ اے میان ءَ آئی ءَ ریاستی پوج ءِ ھمراھی ءَ کمکاری ءَ ھوار پوجی آپریشن ءَ ھمگرنچ بیگ ءَ منّ اِتگ- کلات ءِ دمگ نرمک ءَ اکتوبر 2016 ءَ گل ءِ بُنجل سر ءَ پوج ءِ نیمگ ءَ اُرش کتگ ءُ چریشی ءَ مصطفیٰ تچکی ءَ ھوار بیتگ- اے میان ءَ پوج ءَ مبارک ء جانا بگٹی نامیں مردمے شھید کتگ وھدے کہ زالبول ءُ چُکاں ھوار بازیں مردمے زورانسری آوار جنی ءِ نشانگ کتگ اَنت-

بلوچستان ءِ دمگ پنجگور ءَ شھدگ ءِ سر ءَ سلاہ بندیں مردماں وتی کنٹرول کتگ ءُ ٹرالر ءُ پورسز نشانگ جوڑ کتگ۔

پنجگور چیدگی راہ ءِ سر ءَ سلاہ بندیں مردماں ٹرالرانی سر ءَ اُرش کتگ کہ ھمے فورسز ھم نشانگ جوڑ کنگ بوتگ اَنت۔

اھوالانی رد ءَ 7 ٹرالر تیرگواری ءُ سوچگ ءُ تباہ کنگ بوتگ اَنت وھدے کہ گوں لشکر ءَ تیرگواری بوتگ بلے ھچ وڑیں تاوان ءِ ھال نیست۔

زانگ بہ بیت کہ بلوچستان ءِ ایندگہ شاھدگامی وڑ ءَ پنجگور چیدگی راہ ءِ سر ءَ مڈی ءُ اے دگہ مزنیں گاڑیانی سر ءَ یکشل ءَ اُرشانی دیمپانی انت۔

چہ ایشی ءَ پیش بلوچ لبریشن آرمی ءَ چیدگی راہ سر ءَ گاڑیانی سر ءَ اُرشانی زمہ واری ءَ زرتگ اَنت ۔ اے ماہ ءِ بندات ءَ بی ایل اے ءَ دو روچ ءَ یکشل ءَ راہ بند کتگ ات کہ ایشی ءِ تہ ءَ شش گاڑی نشانگ جوڑ کنگ بوتگ انت۔

مروچی بلوچستان ءِ وکیلاں سیشن کورٹ شال ، کچہری شال ، ءُ انسداد دہشتگردی آمیدگس ( ATC) شال ءِ دیم فیس لیس غیر شفاف ٹرائلز بگیری ءَ زھرشانی کتگ وکیلاں اے گپ پدر کتگ کہ بلوچ یکجھتی کمیٹی ءِ رھشونانی بگیری ءَ برجاھیں کاروائی انساپ ، کانود فیر ٹرئل بنکی رھبندانی بگیری ئے.

زھرشانی ءِ میان ءَ وکیلاں ججانی دیم فیس لیس ٹرائلز نہ من اتگ ۔ آیانی گوشگ ات کہ سیاسی باسک انسانی ھکانی رکینوکاں چہ کانودی ھکاں زبھر کنگ انساپ ءِ نزام ءَ نزور کنگ ءُ کانود ءِ ھاکماں تاوان کنگ انت۔

وکیلاں لوٹ کتگ ءُ گوشتگ کہ اے بس لھتے سیاسی بندیگانی ارزی ءِ جیڑہ نہ ایں بلکنہ سرجمیں آمیدگای نزام شھری آزادی ءُ کانودی بالادستی ءِ سوال ایں ۔ اگاں مروچی انساپ ءِ بنکی رھبندانی لگتمالی ءِ سرا ھاموش بہ بہ ایں گڈا باندا ھر یک مردمے لاقانونیت ءِ زد ءَ انت ۔

وکیلاں گوشتگ کہ اے گامگیج یک سنگینیں آئینی ءُ کانودی بھران ءِ گوشتگ ءُ لوٹ کتگ کہ فیس لیس ٹرائلز سرجمی ءَ واپس زورگ بہ بنت ءُ آمیدگسی نزام تچک کنگ بہ بیت ۔

دیمتر ءَ گوشگ بوتگ کہ بلوچستان ءُ پاکستان ءِ سرجمیں وکیلاں اے جھد ءِ بھر جوڈ بوگی انت تانکہ انساپ ، رھبند، انسانی ھکانی پھریز ممکن بہ بیت ۔

بلوچ یکجھتی کمیٹی ءِ سروک ڈاکٹر ماہ رنگ بلوچ ءِ گوھار نادیہ بلوچ ءَ گوشتگ گوستگیں سئے روچ انت کہ جیل ءِ انتزامیہ آہانی لوگ ءِ مردماں گوں آھاں گند ءُ نند کنگ ءِ اجازت نہ داتگ۔ مرچی مئے کانودی ٹیم ءِ ھواری ءَ ھم جیل ءَ سر بوتگ انت بلے آھاں ھم گوں آھاں گند ءُ نند کنگ ءِ اجازت نہ بوتگ۔ جیل انتزامیہ ءِ گشگ انت کہ داں زھرشانی برجاہ بیت کس ءَ گوں آھاں گند ءُ نند کنگ ءِ موہ نہ بیت۔

آئی ءَ گوشتگ ایشی ءَ ابید جیل ءِ انتزامیہ ءَ مارا گشتگ کہ ما چہ بُرز ءَ پرمان ھست ءُ آیاں اے شرت ھم ایر کتگ کہ داں ڈاکٹر ماہ رنگ ءُ آئی ءِ ھمراھاں نبشتھی نبشتہ مہ کن اَنت کہ ما پد ءَ ھچبر جیل ءِ تہ ءَ دھرنا نہ کن ایں گڑا لوگ ءِ مردم ءُ وکیلاں گوں آھاں گند ءُ نند کنگ ءِ اجازت نہ بیت۔

آئی ءَ گوشتگ اے ھیال ءُ لیکہ نہ ایوک ءَ جیل ءِ تہ ءَ ھمکاراں بلکیں در ءَ اوشتاتگیں ودار کنوکیں کھول ھم سکیں زھنی درناکی ءُ پُرزوی ءِ سوب جوڑ بوگ ءَ اِنت۔

ما چہ ڈاکٹر ماہ رنگ ءُ آئی ءِ ھمکارانی جان سلامتی ءَ سکا ترسگ ءَ این کہ آ ترندیں گرم ءَ زندان ءِ پچیں سرپٹ ءَ زھرشانی ءَ نشتگ انت-

نادیہ بلوچ ءَ گوشتگ من چہ درستیں تک ءُ پھناتاں بندوکیں مھلوک، انسانی ھکانی گل، کانودی باسک، اھوالکار ءُ زانتکاریں شھریاں دزبندی کناں کہ اے ناانساپی ءِ ھلاپ ءَ وتی توار ءَ چست بہ کن اَنت ءُ اے جیڑہ ءِ سر ءَ ترندیں دلگوش ءِ آرگ ءَ وتی کرد ءَ پیلو بہ کن اَنت۔

نامالومیں مردماں تراکناکیں شورو ایر کتگ ءُ پھل تاوان داتگ ءُ چریشی ءُ روانی مھتل بیتگ۔

ھالانی رد ءَ سوراب شگر ءِ نزیک ءَ شال ءُ کراچی مزن شھدگ ءِ سر ءَ یک پُھلے ناشناسیں مردماں تراکناکیں موادانی گون ءَ نشانگ جوڑ کتگ۔

ھالانی رد یَ تراک ءِ آسر ءَ پھل ءَ را سک باز تاوان بوتگ،شال ءُ کراچی شھدگ ءِ سر ءَ ٹریپک ءِ روانی بند بوتگ۔

وئیل ءَ پد پولیس ءُ فورسز ءِ مزنیں کچے ءَ وئیل جاہ ءَ سر بوتگ ءُ وئیل ءِ پٹ ءُ پول بنداتے کتگ ۔

یات بہ بیت کہ بولان ءِ نزیک ءَ یک پُھلے ءِ سر ءَ گْوستگیں روچ ءَ بلوچ آجوئی ءِ سلاھبندیں گلے ءَ اُرش کُتگ۔ ایشی ءَ چہ پیسر بلوچستان ءِ زِلہ ھاران، دالبندین ءُ نوشکی ءَ پُھلانی سر ءَ اُرش ءِ بازیں وئیل ھم بوتگ اَنت۔

گوستگیں روچ ءَ بولان ءَ اُرش ءِ زمہ واری بی آر جی ءَ کبول کتگ ءُ دمگاں مستریں پُھلانی تباہ کنگ ءِ زمہ واری بلوچ لبریشن آرمی ءَ زرتگ۔

بلوچستان ءِ جتا جتائیں جاھاں گوستگیں شپ ءَ پاکستانی پوج ءُ آئی ءُ بندوکیں جاھانی سر ءَ سلاہ بنداں اُرش کتگ انت-

ناشناسیں مردماں بالی پٹ ءُ اود ءَ ھستیں پورسز ءِ کیمپ نشانگ جوڑ کتگ۔

تربت پولیس ءِ بنشون ءِ رد ءَ یو بی ایل جی ءِ گولہ ناشناسیں نیمگ ءَ چہ تربت ءِ میان اُستمانی بالی پٹ ءَ نشانگ جوڑ کنگ بوتگ اَنت۔

بنشون ءِ رد ءَ آس دیگ بوتگیں گولھانی تہ ءَ یکے بالی پٹ ءِ سیکورٹی فورس ءِ کیمپ ءِ تہ ءَ کپتگ۔

اے اُرش ءِ تہ ءَ جانی تاوان ءُ مالی تاوان ءِ ھال رس اِتگ اَنت ۔

پولیس ءِ ردا وئیل ءَ پد سیکورٹی فورسز ءُ دگہ کانود سازگاریں کنوکیں ادارحاں دمگ انگیر کتگ ءُ پٹ ءُ پول بندات کتگ۔

دومی نیمگ ءَ بلوچستان ءِ دمگ نوشکی ءَ ناشناسیں مردماں پاکستانی پوج کاروان ءِ یک گاڑی ءِ تراک ءِ نشانگ کتگ ءُ چریشی ءَ گاڑی سرجم ءَ تباہ بوتگ-

اھوالانی رد ءَ ھمے وڑ ءَ سلاہ بنداں کاروان ءَ ھواریں دگہ سَے گاڑی اُرش ءِ نشانگ کتگ ءُ تاوان داتگ انت-

ھمے وڑ ءَ مستونگ کردگاپ ءَ ناشناسیں مردماں پاکستانی پوج ءِ یک کاروانے ھما وھد ءَ نشانگ کتگ کہ آ مزنیں آپسرے ءِ کاروان ءِ پھزداری ءَ بیتگ-

گوستگیں شپ ءَ بیتگیں وئیلانی زمہ واری انگت ءَ کس ءَ پہ وت نہ زرتگ انت البت اے دمگاں بلوچ سلاہ بندین گل پرکار انت-