TBP Balochi

گوستگیں سال ءَ زورانسری آوار جنی ءِ نشانگ کنگ بیتگیں ورنایے لاش دزکپتگ-

گیشیں ھالانی رِد ءَ بلوچستان ءِ دمگ کیچ ءِ ھند چہ دشت ءَ یک مردمے ءِ لاش دزکپتگ، ءُ نادُراھجاہ ءَ برگ ءَ پد آئی ءِ پجّار یونین کونسل جمک گورکوپ ءِ جھمنند فقیر علی ء علی بخش نام ءَ چہ بیتگ-

کھول ءِ رِد ءَ فقیر علی گوستگیں سال ءَ آبسر ءِ دمگ چہ شاہ آباد ءَ پاکستانی پوج ءَ آوار جتگ ءُ وتی ھمراھی ءَ برتگ، چریشی ءَ پد آ دیم ءَ آرگ نہ بیتگ-

پاکستانی پوج ءِ دست ءَ کُشگ بوتگیں فقیر علی ءِ کھول ءَ گْوشتگ کہ آئی ءَ فقیر علی ءِ زورانسری آوار جنی ءِ درگت ءَ چہ باز رند ءَ گوستگیں ڈپٹی کمشنر کیچ بشیر احمد بڑیچ ءَ گوں گند ءُ نند کتگ، بلے آ یکشل ءَ دلجمی دیگ بیتگ-

زانگ بہ بیت لہ ڈپٹی کمشنر کیچ بشیر احمد بڑیچ ءَ باز رند ءَ بیگواھیں مردمانی کھول دلجمی داتگ اَنت کہ اگاں آ زورانسری آوار جنی ءِ ھلاپ ءَ نندانک ءُ زھرشانی راہ گچین نہ کن ئے گُڑا آیانی دوستناکانی یل بیگ ممکن کنگ بہ بیت مروچی فقیر علی ءِ لاش دزکپتگ-

بلوچستان ءَ اشی ءَ ساری ھم آوار جنگ بیتگیں مردم لَٹ ءُ کُٹ ءَ پد کشتگ ءُ لاش دور دیگ بیتگ اَنت، بلے سیکیورٹی واکدار اے وئیلاں گوں سیادی ندارگ ءِ درشان کتگ-

ناشناسیں سلاہ بندیں مردماں ٹولی ءِ گاڑی اُرش ءِ نشانگ کتگ-

بلوچستان ءِ دمگ چہ ڈیرہ بگٹی ءَ ھالانی رِد ءَ پیرکوہ دگ ءِ چڑھائی ءِ ھند سر ءَ ناشناسیں سلاہ بندیں مردمانی نیمگ ءَ چہ یک بوزر گاڑی ءِ سر ءَ تیرگواری وئیل دیم ءَ اَتکگ-

اِھوالکار ءِ رِد ءَ گاڑی یک گیس شوھاز کنوکیں شرکتے ءَ چہ سیادی داروک بوتگ ءُ آئی ءِ ھمراھی ءَ چار ءُ ٹپاس کنگ ھم ساڑی بوتگ-

ڈیرہ بگٹی پولیس ءِ رِد ءَ سلاہ مردماں تیرگواری ءِ آسر ءَ گاڑی ءِ ڈرائیو ءُ کمکار بیران بوتگ، پولیس وئیلجاہ ءَ سر بیتگ لاش نادُراھجاہ برتگ-

زانگ بہ بیت کہ دوئیں بلوچستان ءِ جتاجتائیں دمگاں ھاسکار شال، مستونگ ءُ نوشکی ءِ بازیں ھندانی سر ءَ بلوچ آجوئی لوٹوکانی نیمگ ءَ چہ مڈی شوھاز کنگ ءَ دلگوش ءُ مڈی کراچی ءُ پنجاب ءَ بروکیں گاڑیانی سر ءَ یکشل ءَ اُرشانی نشانگ کنگ بیگ ءَ اِنت-

اے کاروائی ءَ ھمگرنچیں مردمانی درگت ءَ تنی وھدے پولیس ءَ ھوار ھچ ھم ادارہ ءِ نیمگ ءَ ھچ وڑیں سرپدی دیگ نہ بوتگ-

بلوچستان ءِ دمگ ھزدار ءُ نوشکی ءَ دو جتا جتائیں تیر گواری ءِ وئیلاں سئے مردم بیران ءُ یک مردمے سک ٹپیگ بوتگ۔

ھزدار ءَ ارباب کمپلیکس ءِ نزیک ءَ ناشناسیں سلاہ بندیں مردماں تیرگواری کتگ ءُ دو مردم کشتگ انت ۔ پولیس ءِ رد ءَ بیران بوتگیں مردمانی پجار شاھجھان ء عبداللہ پندرانی ءُ عبدالستار ء نائب فتح محمد شاھوزئی ءِ ناماں بوتگ اَنت۔

پولیس ءِ بنشون ءَ گْوشتگ کہ ھر دوئیں مردم مزممل ھوٹل ءَ جاڑیگ بوتگ اَنت کہ گاڑی ءِ تہ ءَ سواریں سلاہ بندیں مردماں بے رھبندیں تیرگواری کتگ ءُ ایشی ءِ آسر ءَ ھر دوئیں مردم جاہ ءَ بیران بوتگ اَنت۔

دومی نیمگ ءَ نوشکی ءَ ناشناسیں سلاہ بندیں مردمانی تیرگواری ءَ چہ دو مردم ٹپیگ بوتگ اَنت کہ زوت سول اسپتال ءَ سر کنگ بوتگ اَنت۔

نادراھجاہ ءِ بنشون ءِ رد ءَ ٹپیانی تہ ءَ تاؤس خان ھم درمان ءِ وھد ءَ بیران بوتگ ءُ غلام مرتضی ء عبدالرشید ٹپیگ اِنت۔

کیچ ءُ نوشکی ءَ سلاہ بندیں مردماں پاکستانی پوج اُرشانی نشانگ کتگ کہ اود ءَ پوج ءِ گاڑی یے تباہ بیتگ-

ھالانی رد ءَ کیچ ءَ اُرش ءَ پاکستانی لشکر ءِ کاروان نشانگ جوڑ کنگ بوتگ ایشی ءِ آسر ءَ یک گاڑی یے تباہ بیتگ-

مروچی سھب ءَ کیچ ءِ دمگ بلنگور ءَ ٹالویگ بازار ءَ فوج ءِ کیمپ ءِ نزیک ءَ پاکستانی فوج ءِ بازیں گاڑیانی کاروان اُرش ءَ نشانگ جوڑ کنگ بوتگ۔

دمگی مردمانی رد ءَ مزنیں کساسے ءَ سلاہ بندیں مردماں کاروان ءِ سر بستگ ءُ جتا جتائیں سلاھاں گوں اُرش کتگ ءُ کاروان ءِ تہ ءَ ھواریں گاڑی راکٹانی زد ءَ تباہ بیتگ۔ بیست منٹ ءَ گیش دمگ ءَ مزنیں تیر گواری ءُ تراکانی توار بوتگ ءُ برز ءَ ڈرون ءِ بالی ھم گندگ بوتگ۔

دمگی مردمانی رد ءَ دمگ ءَ ایمبولینس ھم رھادگ بوھگ ءَ گندگ بوتگ اَنت۔ انگت ءَ واکداراں اے تاوان ءِ بابت ءَ ھچ وڑیں ھال ءُ اھوال نہ داتگ۔

اے دمگ ءَ بلوچ سلاھ بندیں آجوئی گل پرکار اَنت بلے انگت ءَ کس ءَ اے اُرش ءِ زمہ واری نہ زرتگ۔

ھمے وڑ ءَ سیزدہ جون ءَ نوشکی ءَ ھواریں دمگ گلنگور ءَ یک پوجی چیک پوسٹے ءِ سر ءَ مزن ءُ نوکیں سلاھاں اُرش کنگ بیتگ- ھمے وھد ءَ کساس سَے گاڑیانی کاروان گلنگور چیک پوسٹ ءِ نزیک ءَ گوزگ ءَ بوتگ کہ سلاہ بنداں آ اُرش ءِ زد ءَ آورتگ ءُ جتا جتائیں نیمگاں اُرش کتگ-

سوشل میڈیا ءُ بلوچ جھد

نبشتہ کار: بھار بلوچ

دی بلوچستان پوسٹ

سوشل میڈیا یک پر ارزشتیں چیزے پہ جھان ءِ کُلیں پڑاں کار ءُبار بہ بیت یا وانگ ءُ مذھب بلے ایشی ءِ مستریں ارزشت جنگانی تہ ءَ اِنت، اے جاور ھال ءِ تہ ءَ دنیا یک نہ کٹوکیں جنگے ءِ نیمگ ءَ جنزان اِنت، ایران اسرائیلءُ امریکہ بہ بنت یاکہ ھر ھما ملک کہ امریکہ ءِ گپ ءَ نہ زور اَنت، گڑا الم یک مسیبتے ءِ دیمپان اِنت۔

ما دنیا ءِ جنگ ءَ برے یکر کنیں وتی جنگ ءَ چاریں مئے جیڑہ پاکستان ءَ اِنت مئے جنگ چینچو دیم ءَ روان اِنت گڑا ما بلوچ سوشل میڈیا ءِ ارزشت ءَ بزانیں، اسل ءَ اگاں ما بچاریں ما سوشل میڈیا ءِ پیلٹ پارم ءَ سک نزوریں انی کہ جنگ ترند بیتگ گڑا پاکستان گیشتر بلوچ بیگواہ کنگ ءَ اِنت، گیشتر بلوچ دروگیں میڑاں شھید کنگ ءَ اِنت، مئے سوشل میڈیا ءِ بیانیہ سک نزور اِنت ایشی ءِ مستریں سوب چی اَنت ؟ ما یک برے لس مھلوک ءَ یلہ بکنیں ما جھد کار تھنا وتارا بچاریں مئے کھولانی تہ ءَ چینچو مھلوک چہ مُلک ءَ در کپتگ گیشتریں مردم وانندگ اَنت کلیں سنگتانی کھول ءِ تہ ءَ الم یک ءُ دو وانندگ در کپ اِییت اے کل ھمے جھد ءِ مردم اَنت گڑا ما پرچا سوشل میڈیا ءَ جاڑیگ نہ ایں ؟ ما سوشل میڈیا ءَ کارمرز کنگ ءَ ایں ھر گس ءِ تہ ءَ کم چہ کم چار موبائل در کپ اِیت ایشانی انٹرنیٹ ھم پچ اَنت ٹک ٹوک چار اَنت پیسبک کارمرز کن اَنت ڈرامہ ءُ تامر چار اَنت بلے ھما کہ مئے اسل مکسد اِنت بلے ما ھما مکسد ءِ نیمگ ءَ نہ چاریں۔

گار ءُ بیگواھیں مردمانی جیڑھاں ما بچاریں اگاں پاکستانی لشکر یک جاگھے سرمچارے شھید کنت ھمائی ءِ ھمرائی ءَ دگہ یک ءُ دو بیگواھیں مردم ھم شھید کنت پد ءَ سوشل میڈیا ءَ پاکستان ءِ بیانیہ ءَ چینچو توانگر اِنت ایشی ءَ ما کل گندگ ءَ ایں، گڑا مئے زمہ واری بیت ما بیا ایں سوشل میڈیا ءِ ارزشت ءَ بزانیں ایشی ءِ سر ءَ کار بکنیں کمپین کارمرز بکن ایں گپ بجنیں ما وتی درملکی سپارتکاری ءَ گندگ ءَ ایں۔
یورپ ءُ امریکہ ءِ تہ ءَ مئے مردم نشتگ اَنت بلے کار ھچ نہ بوگ ءَ اِنت، اگاں ما جنجال ءُ جیڑھانی سر ءَ نبشتہ بکنیں ھم ملامت ایں مرچی ما اگاں یورپ ءُ امریکہ ءَ نشتگیں مردماں بچاریں آ چے کار کنگ ءَ اَنت گال ء امل کہ کیت گڑا مئے کار سِپر اِنت سوشل میڈیا ءِ کار استاں کلانی دیم ءَ زاھر اَنت ناں کہ اے بلوچ جنز ءِ راز اَنت اے کُل پدّریں چیز اَنت درملکاں چینچو بلوچ آباد اِنت اے ھم جھد ءِ پُشت ءَ آباد اَنت ایشانی منی جند ءِ کھول ءِ مردم ھم ھوار اَنت۔ اگاں سوشل میڈیا ءِ کارانی سر ءَ نزوری ھست اَنت ایشانی منی زات ھم ھوار اِنت، گڑا ما باید اِنت بیا ایں میدان ءَ کار بکنیں ریاست ءَ پیش بداریں ، وتی بیانیہ ءَ توانگر بکنیں ، ما یک نگاھے ملک ءِ تہ ءَ چاریں ڈاکٹر ماہ رنگ بلوچ ءِ توار بند اِنت زاندانی اِنت گوں سرپرستیں ھمراھاں اگاں مئے بیانیہ توانگر بیتیں ما یو این او ءِ تہ ءَ وتی کیس کٹ اِتگ اَت جھانی سیاست ءِ دیم ءَ مئے کیس نزور اَنت ایشی ءِ سوب یکے ھمیش اِنت مئے سوشل میڈیا ءِ پلیٹ پارم سک ءَ باز نزور اِنت ۔ایشی ءِ توانگر کنگ ءِ مارا جھد کاراں یک گامے چست کنگی اِنت، کلیں راج وڑے ناں وڑے ءَ وتی ھمراہ کنگی اِنت۔

مئے زمہ واری بیت کہ ما سوشل میڈیا ءِ پلیٹ پارم ءَ وتی ٹیم ورک جوڑ بکنیں، جنگی کارے بیت یاکہ ملک ءِ تہ ءَ بیگواھی یے جیڑھے بیت ھر کجام ھم وڑیں سلکاری یے بیت دژمن ءِ نیمگ ءَ ما آئی ءِ دروگ ءُ پندلاں داشت بکنیں ، انی ما بچاریں دژمن ءَ یک نوکیں کارے دیم ءَ آؤرت ھر سرمچارے کہ ھست اِنت ایشانی گس والاھانی تامر جوڑ کت اَنت کہ مارا گوں وتی زھگاں کار نیست دستکشی ءِ جار اِش جت بلے بیا کہ اد ءَ ریاست ءَ بازیں جاھاں بیگواھیں مردمانی ھم انچیں تامر جوڑ کتگ ، مئے املی زمہ واری بیت کہ ما ریاست ءِ کلیں پندالانی پسہ ءَ دات بکنیں، اد ءَ مارا سوشل میڈیا ءِ واستا زیت ءَ چہ زیت توانگریں گلے جوڑ کنگی اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچ آجوئی لوٹوکیں راجکاریں گل بلوچ راجی زْرمبشت ( بی این ایم ) ءِ جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ ڈاکٹر ماہ رنگ ءُ آئی ءِ ھمراھانی نمائشی آمیدگس ءِ پارست ءَ سزا دیگ ءِ مھترھندی کوشستانی سر ءَ بے تاھیری درشانتگ ۔ آئی ءَ وتی درشانے ءَ گْوشتگ بلوچ یکجھتی پتر ( بی وائی سی ) ءِ زندانی ئیں راھشون ڈاکٹر ماہ رنگ ءُ آئی ءِ ھمراھاں پاکستان نمائشی آمیدگس ءِ پارست ءَ سزا دیگ ءِ کوشست کنگ ءَ اِنت۔ پاکستان ءِ آمیدگس ھم پاکستانی لشکر ءِ دست ءِ لیبوک اَنت۔ماہ رنگ ءُ آئی ءِ ھمراھانی کیس ماں ھدا جیل ( شال ) ءَ برجاھیں ناراھیں ’ فیس لیس کورٹ ‘ بزاں کور چھرگیں آمیدگس ءِ پارست ءَ گوش دارگ بیگ ءَ اَنت ، اے آمیدگس ءِ نام ءَ مھترھند ءِ گوں مردماں سکا بدڈولیں ملنڈے۔

جارکش ءَ اے رد ءَ درائینتگ بلوچستان ءَ مردمی اگبالانی سرسبزینگ ءِ لوٹ ءِ سر ءَ بلوچ یکجھتی پتر ءِ راھشون ڈاکٹر ماہ رنگ ، صبغت اللہ ، بیبگر ، بیبو ءُ گلزادی ءِ سر ءَ 51 دروگیں کیس جوڑ کنگ بیتگ ، کہ آیانی پرایمنیں سیاسی سرگرمی ءُ گپ ءُ تْران کنگ ءِ سر ءَ بندش جنگ ءِ کوشست اَنت۔ اے راھشون 22 مارچ 2025 ءَ دزگیر کنگ بیتگ اَنت ءُ مروچی ( 14 جون ) ءَ آیاں ماں زندان ءَ سالے ، دو ماہ ءُ 23 روچ سرجم اِنت۔ اے دزگیری چہ بلوچ راجی اگبالاں پاکستانی مھترھند ءِ یکشلیں انکار ءُ زوراکیانی دْرچ ءِ بھر اَنت۔ بلوچ سیاسی کارکناں بدتریں جاور ءُ مھترھند ءِ یکشلیں زوراکیاں پد ھم پرایمن ءُ سیاسی راہ گچینتگ ، بلے مھترھند وتی زوراکیں تْرام ءِ برپشت ءَ درسیں تْرامگیجاں بلوچ راج ءِ سیاسی توار ءِ نگٹ کنگ ءَ کارمرد کنگ ءَ اِنت۔

بی این ایم ءِ جارکش ءَ چد ءُ دیم گْوشتگ ماں جھان ءَ آمیدگس مزدانک ءِ برجاھی ، دلجمی ءُ چہ زوراکانی نیمگ ءَ راھبندانی ناراھیں کارمرد ءِ دارگ ءَ جوڑ کنگ بی اَنت۔ بلے پاکستان ءَ مزدانک ءِ نام ءَ ’ کورچھرگیں آمیدگس ‘ جوڑ کرتگ ءُ گوں راھبند ءُ مردماں ملنڈ کنگ ءَ اِنت۔ اے سیاھیں راھبند ءِ رد ءَ ھمایانی سر ءَ کہ بھتام جنگ بیت چہ آیاں آمیدکار ، وکیل ، گواہ ءُ داں پٹ ءُ پول کنوکیں سروگانانی نام ءُ پجار ھم چیر دیگ بی اَنت۔ اے ناراھیں کارپد ءِ بگیری ءَ ڈاکٹر ماہ رنگ ءُ آئی ءِ ھمراہ ءُ وکیلانی زھرشانی پہ راست ءُ راہ اِنت ۔ میان راجی تْرامگیج باید پاکستانی واکداراں بہ دار اَنت کہ مھترھندی تْرامگیجاں زوراکی ءِ ابزارانی رنگ ءَ کارمرد مہ کن اَنت۔ بی وائی سی ءِ زندانی ئیں راھشون ناشرکار نہ اَنت بلکیں پرایمنیں سیاسی کارکن اَنت ، کہ پاکستانی مھترھند آیاں ناراھی ءُ نامزدانکی ءِ نشانگ کنگ ءَ اِنت ءُ چہ آیاں بیرگرگ ءَ اِنت۔

آئی ءَ وتی درشان ءِ گڈ سر ءَ گْوشتگ بلوچ راج ءِ گْور ءَ پاکستان ءَ تشے ھم مھترھندی بستار نیست ۔ مارا آمیدگسانی پجیگ ءَ چہ پاکستان ءِ ھچ رنگیں تْرامگیجاں ھچ وڑیں اوست نیست ، پرچا کہ بلوچستان ءَ درسیں تْرامگیج پاکستانی لشکر ءِ چیردست اَنت ءُ ھمایانی گْوشگ ءِ سر ءَ کار کن اَنت۔ مھترھندی شونداتانی تہ ءَ ھچ رنگیں گڑ ءُ منج پشت نہ کپتگ ، تچک اِنت کہ پاکستان بلوچ راج ءَ چکچین کنگ ءَ اِنت۔ مارا ترس اِنت گوں ڈاکٹر ماہ رنگ ءَ ھم ھما رنگیں درانسانی کردگار کنگ بیت کہ گْوست ءَ گوں دگہ بلوچ راھشوناں بیتگ۔ ڈاکٹر ماہ رنگ ءُ آئی ءِ ھمراھانی سیاسی ءُ مردمی اگبالانی پھریزگ ءُ ماں بلوچستان ءَ مردمی اگبالانی سرسبزینگ ءَ بلوچ راج چہ میان راج ءَ زیت ءُ پرسانیں دزمانجنی ءِ لوٹ کنت۔

بلوچستان لبریشن فرنٹ ءِ جارکش میجر گْوھرام بلوچ ءَ یک کاروائی ءَ دوازدہ جون 2026 ءَ نوشکی ءِ دمگ مَل ءَ پرنٹیر کور (ایف سی) ءِ گاڑی آئی ای ڈی اُرش ءِ نشانگ کتگ چریشی ءِ آسر ءَ دو کارندہ مرتگ ءُ بازین ئِے ٹپی بوتگ-

جارکش ءَ گوشتگ اشی ءَ ساری دہ جون 2026 ءَ بی ایل ایپ ءِ سرمچاراں یک اُرشے ءَ پنجگور ءِ دمگ سری کوران ءِ جھمنند ءُ ڈیتھ اسکواڈ ءِ سروک حاتم ء پیر جان، ءُ حلیم ء محمد عظم جاہ پہ جاھی مرتگ اَنت، وھدے کہ آیانی یک ھمراھی مھروز سک ٹپی بوتگ- بی ایل ایف ءِ سرمچاراں ڈیتھ اسکواڈ ءِ سئیں کارندہ ھما وھد ءَ نشانگ کتگ اَنت وھدے آ بازار ءِ راہ ءَ ایف سی ءِ بُنجل نیمگ ءَ روگ ءَ بیتگ- اے سئیں بریگیڈیئر ظفر اقبال ءِ سکیں نزیکیں کارندہ بوتگ اَنت-

آئی ءَ گوشتگ کہ ھاتم گوستناک ءَ لشکر بلوچستان ءِ باسکے بوتگ- سلاھانی دور دیگ ءَ پد آئی ءَ نُھ سال ءَ تاں مشکے ءَ پوج ءِ چریک مھراللہ محمد حسنی ءِ چردستی ءَ زورگریں پوج ءِ واستا کار کتگ- پد ءَ آئی ءَ ڈیتھ اسکواڈ ءِ دگہ باسکانی ھمراھی ءَ یک نوکیں ٹولی ءِ سروکی زرتگ- کمانڈنٹ پنجگور، بریگیڈیٹر ظفر اقبال اے ٹولی ءِ سروک اِنت- آئی ءِ گوشگ پد سوردو، سری کوران، وشاپ ءُ وشبود ءِ دمگاں زرمبشت آجوئی ءُ بلوچ راج ءِ ھلاپ ءَ کار کنگ زمہ واری ھاتم ءَ دیگ بیتگ، اود ءَ آ وتی ٹولی ءِ ھمراھی ءَ پُرکار بوتگ- بلوچ ورنایانی ءُ زالبولانی ھلاپ ءَ جتاجتائیں کاروائیاں ھاتم تچکی ءَ ھوار بوتگ-

آئی ءَ گْوشتگ پنجگور، سگار ،سوراپ سبزاب، وشبود، پاردان ءُ نِوان ءِ دمگاں بلوچ سرمچاراں راھانی ناکہ بندی، پوجی لشکر کشی ءَ دُژمن ءِ واستا کمکاری، سرمچارانی سیادانی لوگانی سر ءَ بیڑ، دستی بمب اُرشاں، آوار جنگ کوش ءُ زورانسری آوار جنی ءَ ھاتم ءَ یک بلاھیں کردے پیلو کتگ-

آئی ءَ دیمتر ءَ گْوشتگ کہ آ زرمبشت ءَ چہ ھمگرنچیں باسکانی کھول ءُ زالبول زور داتگ زورانسری پریس کانفرنس ءُ دستکشی ءِ جار جنگ ءِ وڑیں پُرکاریاں ھم ھمگرنچ بوتگ اَنت- بریگیڈیئر ظفر اقبال ءَ حاتم ءَ جتاجتائیں کاروائیانی ھاتر ءَ مزنیں کچے ءَ سلاہ، گاڑی ءُ دگہ زر ءُ کمکاری ھم داتگ-

جارکش ءَ گْوشتگ کہ بیران بوتگیں دومی کارندہ، حلیم ء محمد عظم جھمنند سری کوران 2017 ءَ چہ ملٹری انٹیلیجنس (MI) ءِ واستا کار کنگ ءَ بوتگ- آ آوار جنی، کوش، زورانسری آوار جنی ،راھانی بندگ، تیرانی نشانگ کنگ ،دُزی ،بلوچ زالبولاں چمپروشی کنگ ءُ زور پریس کانفرنس کنگ ءَ ھوار بازیں سلّکاریاں ھمگرنچ بیتگ- آ ھاتم ءِ نزیکیں ھمراہ بیتگ ،بلے اے دوئیں جتاجتائیں ٹولیانی سروکی کتگ- تسپ ءِ جھمنند مھروز ھم اے دوئینانی نزیکیں ھمراہ بیتگ کہ اُرش ءِ وھد ءَ آئی ءِ گاڑی ءَ سوار بیگ ءِ سوب ءَ ٹپی بوتگ-

جارکش ءَ گوشتگ کہ نُھ جون 2026 ءِ سرمچاراں نوشکی ءِ دمگ کُچکّی ءِ ھند سر ءَ ناکہ بندی کتگ سرجمیں گاڑی پٹ ءُ پول کتگ اَنت- اے میان ءَ سرمچاراں کُچکّی پولیس چوکی مانداشتگ- اے ناکہ بندی دو کلاکاں تاں برجاہ بیتگ، آئی ءِ مول ءُ مراد دمگ ءَ وتی دستیگ برجاہ دارگ ءُ پوج ءُ آئی ءِ کمکارانی سُر ءُ پُراں بے مُھری کنگی بوتگ-

جارکش ءَ گْوشتگ کہ ھپت جون 2026 ءَ سرمچاراں گوادر ءِ دمگ گبد کلاتو ءَ دوبیست پنجاہ دگ سر ءَ جتاجتائیں ھندانی سر ءَ ناکہ بندی کتگ دمگ دستیگ کتگ- اے کاروائی ءِ میان ءَ سرمچاراں نزیکیں دو پولیس چیک پوسٹانی سر دستیگ کنگ اود ءَ سرکاری سلاہ ءُ دگہ پوجی سامان دستیگ کتگ اَنت، آیانی تہ ءَ ایم – 16 رائفل، سے کلانشکوف رائپل گوں میگزین، یک گاڑی یے ءُ دگہ پوجی سامان ھوار بوتگ اَنت- اشی ءَ اَبید سرمچاراں چیک پوسٹ ءِ سر ءَ مکّیں پوجی چاروگی ءِ کیمرہ ھم تباہ کتگ – پد ءَ سرمچاراں وئیلجاہ ءِ نیمگ ءَ پیشگامی کنوکیں پوجی کارندہ سنگر گپتگ ءُ اُرش ءِ نشانگ کتگ اَنت چریشی ءِ آسر ءَ پوجی ٹولی پُشتکنزی ءَ لاچار بوتگ اَنت-

گُڈی ءَ جارکش ءَ سرجمیں اُرشانی زمہ واری منّ اِتگ اَنت-

پاکستانی پوج ءِ بُنجل ءِ سر ءَ اُرش ءَ پد لَس آبادی نشانگ کنگ بیتگ-

بلوچستان ءِ دمگ چہ مستونگ ءَ ھالانی رِد ءَ ناشناسیں سلاہ بندیں مردماں کردگاپ ءِ دمگ ءَ برجاہ پاکستانی پوج ءِ یک بُنجلے ءِ سر ءَ اُرش کنگ بیتگ-

اُرش ءِ میان ءَ بازیں تراک ءُ تیرگواری ءِ توار اش کنگ بیتگ، وھدے کہ پاکستانی پوج ءِ اشی ءِ پُشدر ءَ آبادی ءِ سر ءَ مارٹر گولہ آس داتگ-

ھالانی رِد ءَ پوج ءَ بُنجل ءَ چہ آس داتگیں گولہ بازیں لوگانی سر ءَ کپتگ اَنت، چریشی ءِ آسر ءَ تنی وھدے یک زالبولے بیران بیتگ ءُ یک چکے سک ٹپی بیگ ءِ ھال اِنت-

زانگ بہ بیت کہ اولی وئیل نہ اِنت کہ وھدے پاکستانی پوج ءَ سلاہ بنداں اُرشانی نشانگ کنگ ءَ پد دمگی آبادی سر ءَ اُرچ کتگ، اشی ءَ ساری ھم بلوچستان ءِ دمگ کیچ ءَ بازیں وئیلاں پاکستانی پوج ءِ نیمگ ءَ چہ دمگی آبادی نشانگ کنگ ھال دیم ءَ اَتکگ-

اے دمگ ءَ بلوچ آجوئی لوٹوکیں سلاہ بندیں گل پُرکار اَنت، پاکستانی پوج ءِ سر ءَ اُرشاں ھمگرنچ بیتگ اَنت، مروچی بیتگیں اُرشانی زمہ واری ھچ وڑیں گل ءَ نہ زرتگ-

کیچ ءِ دمگ تمپ ءَ چہ یک ورنایے زورانسری بیگواہ کنگ ءِ ھال دیم ءَ اتکگ۔

گیشیں ھالانی رد ءَ کمبر ء ماسٹر عثمان کہ آ یک مزدورے ءُ آسیا آباد کورجو تمپ ءِ نندوک اِنت 12 جون 2026 ءِ شپ ءَ پاکستانی لشکر ءَ چہ آئی ءِ لوگ ءَ آوار جتگ ءُ ناشناسیں جاھے ءَ برتگ۔

کھول ءِ مردمانی گشگ اِنت کہ آوار جنگ ءَ ایف سی ءُ ایم آئی ءِ کارندہ ھوار بوتگ اَنت۔

کھول ءِ گشگ ءِ رد ءَ چہ لوگ ءَ برگ ءَ پد کمبر ءِ بابت ءَ ھچ وڑیں ھال ءُ اھوال نہ رس اتگ کہ ایشی ءِ سبب ءَ کھول سکیں زھنی جیڑھانی دیمپان انت-

جھانی رسانکدر بی بی سی ءِ رد ءَ ایران ءِ ھال رسانکی ادارگ فارس ءَ ”.گپ ءُ ترانی ٹیم ءِ نزیکیں سرپدیں وسیلگ“ ءِ رد ءَ گْوشتگ کہ ”ایران ءَ انگت ءَ پیش کرتگیں تپاک نامہ ءِ سر ءَ وتی گڈی پیسلہ ءِ جار نہ جتگ“۔

رپورٹ ءِ رد ءَ “پیش کنگ بوتگیں پیشکشانی سیاسی، کانونی ءُ تکنیکی تک انگت ءَ چار ءُ تپاسی کنگ بوگ ءَ اِنت۔”

ھال رسانکی ادارہ لشکری ​​ءُ سیکورٹی ادارھانی نزیک ءَ زانگ بیت۔ ایشی ءِ رد ءَ ” ھما پیشکش کہ پیش کنگ بوتگ اَنت آھانی سر ءَ زانتکار ءُ پیسلہ کنوکیں تک ءَ چار ءُ تپاسی کنگ بوھگ ءَ اِنت۔“

اے درگت ءَ تھران ءُ واشنگٹن ءِ میان ءَ پیام ءُ میان استمانی برجاہ دارگ ءِ واستا قطری ڈل ھم ایران ءَ سر بوتگ انت ۔