TBP Balochi

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گوشتگ کہ مئے سرمچاراں ھاران ،کلات، نوشکی، شال ءُ شاھرگ ءِ یکجاھی کاروائی کنان ءَ زورگریں پاکستانی پوج ءِ چاریگ ءُ جوڑ کتگیں ڈیتھ اسکواڈ ءِ ھپت کارندہ کشتگ اَنت، وھدے ناشرکار پوجی ٹولی ءِ یک پُرکاریں اوتاک ءِ سر ءَ شورواں چہ سرجمی ءَ تباہ کتگ-

جارکش ءَ گوشتگ کہ بلوچ لبریشن آرمی ءِ سرمچاراں گوستگیں شپ ءَ ھاران ءِ دمگ برشونگی ءَ ڈیتھ اسکواڈ ءِ کارندہ حافظ ممتاز ءِ چیریں اوتاک تراکناکیں شورو پٹ کتگ ءُ تراکینتگ – اے اوتاک ریاستی سروکی ءَ برجاہ سلاہ بندیں ٹولیانی کارمرزی ءَ بیتگ، اود ءَ آ جتاجتائیں وھداں جھمنند بیتگ ءُ باھوٹی بیتگ اَنت-

جارکش ءَ گوشتگ کہ دگہ یک ٹارگٹڈ کاروائی ءِ میان ءَ، سرمچاراں چہ ھاران ءَ ڈیتھ اسکواڈ ءِ کارندہ سمیر ء رفیق، جھمنند برشونکی آوار جتگ ءُ ناشناسیں جاھے ءَ برتگ- بی ایل اے ءِ انٹیلیجنس ونگ ءِ نیمگ ءَ چہ جُست ءُ پُرس ءِ میان ءَ اے کارندہ منّ اِتگ کہ آ گوستگیں ماہ ءَ بی ایل اے ءِ سرمچار سنگت علی جان پنّام ءِ سدیس ءِ شھیدی ءِ وئیل ءَ تچکی ءَ ھوار بیتگ- سمیر ءَ دیمتر ءَ منّ اِتگ کہ ھاران شھر ءُ آئی ءِ کش گوراں دُزی ڈُنگی ءُ بازیں سنگین ءِ سلّکاریاں ھوار بیتگ- جست ءُ پُرس ءِ میان ءَ کارندہ ءَ وتی دگہ ھمراھانی نامانی دیگ ءَ ھوار بازیں رازے پچ کتگ-

جارکش ءَ گوشتگ دگہ یک گچین ءِ کاروائی ءَ، بی ایل اے ءِ سرمچاراں کلات ءِ دمگ چہ اسکلکو ءَ زورگریں پاکستانی پوج ءِ ملٹری انٹیلیجنس (ایم آئی) ءِ یک کارندھے طاھر ء چوھدری مبارک جھمنند ملتان ھما وھد ءَ آوار جتگ وھدے آئی ءَ دروشم مٹ کتگ چاریگی ءِ ھاتر ءَ سُر ءُ پُر ءَ بیتگ- گل ءِ جُست ءُ پُرس ءِ میان ءَ طاھر ءَ منّ اِتگ کہ آ پاکستانی پوج ءِ ھازریں سروس کارندھے ءُ اے وھد ءَ تچکی ءَ ملٹری انٹیلیجنس ءِ واستا کار ءَ بیتگ- طاھر چوھدری ءَ منّ اِتگ کہ گوستگیں ماہ ءَ آ کلات آرگ بیتگ، اود ءَ کلات شھر ءَ پد آ کش ءُ گوراں دگہ دمگاں ھم دروشم مَٹ کتگ چاریگی نیٹ ورک ءَ چلائینگ ءَ بیتگ-

جارکش ءَ گوشتگ بلوچ لبریشن آرمی ءِ سرمچاراں نوشکی ءَ زورگریں پاکستانی پوج ءِ دگہ یک کارندھے شعیب ء اختر محمد مینگل ھما وھد ءَ تیرگواری کتگ کشتگ وھدے آ سرمچارانی دست ءَ تچگ ءِ جُھد ءَ بیتگ- اے کارندہ زورگریں پوج ءَ بلوچ سرمچارانی لڑ ءَ ھوار کنگ آیاں تھی ھساب ءَ مزنیں تاوانے ءِ تچکی ءَ ٹاسک دیگ بیتگ ءُ راہ دیگ بیتگ، بلے بُنجل ءِ تُرندیں گلی راھبندانی، ڈسپلن ءُ پھازوکی وڑ ءُ پیم ءِ سوب ءَ آئی سرمچارانی تاوان دیگ ءِ پندل سازی سوبمند نہ بیتگ-

جارکش ءَ گوشتگ کہ شعیب ءِ شکی ئیں ھرکت ءَ گپ ءُ رپانی سوب ءَ سرمچاراں زوت آئی ءِ سُر ءُ پر گر ءُ دار کتگ اَنت ءُ سنگتانی نیمگ ءَ چہ آئی ءِ سر ءَ تُرندیں چیریں نگاہ دارگ برجاہ داشتگ- وتی بندیں پندل سازیانی بے سوبی ءَ پد شعیب چار جون ءَ بُنجل ءَ تچگ ءِ جُھد کتگ، ءُ بی ایل اے ءِ یک گوریلا یونٹ ءَ زوت کاروائی کنان ءَ آ نشانگ کتگ ءُ جاہ پہ جاھی کشتگ-

جارکش ءَ دیمتر ءَ گوشتگ کہ بلوچ لبریشن آرمی ءِ سرمچاراں شش جون ءَ نوشکی ءَ ڈیتھ اسکواڈ ءِ یک پُرکاریں کارندہ بابو گلستان مینگل تیرگواری کتگ کشتگ کہ ڈیتھ اسکواڈ ءِ گچین ءِ کارندہ معاویہ جمالدینی ھمراہ بیتگ کہ گوستگیں سال جولائی ءَ سرمچاراں کشتگ- بابو گلستان گوستگیں دراجیں مدتے ءَ چہ زورگریں پوج جوڑ کتگیں سلاہ بندیں ٹولی ءَ ھمگرنچ بیتگ کہ نوشکی شھر ءُ کش گوری دمگاں زورگریں پوج ءِ تچکی ءَ کمکاری ءُ پشت پناھی ءَ ھمگرنچ بیتگ- اے کارندہ دمگی کودکیں ورنایاں زورگریں پوج ءِ واستا چاریگی ءِ وڑیں ردیں کار ءَ ھم پُرکار بیتگ- بابو گلستان بی ایل اے ءِ نیمگ ءَ چہ اشی ءَ ساری ھم بلوچ کُشیں کار ءِ دزکشی ءِ کنگ ءِ ھاتر ءَ تُرندیں کڈنی دیگ بیتگ، بلے آ وتی مٹ کنگ ءِ جاہ ءَ یکشل ءَ ڈیتھ اسکواڈ ءَ گوں ھمگرنچ بیتگ، چریشی ءَ سرمچاراں کاروائی کنان ءَ آ گُڈی آسر ءَ سر کتگ-

جارکش ءَ گوشتگ کہ گوستگیں شپ ءَ سرمچاراں یک کاروائی ءَ پاکستانی پوج ءِ ملٹری انٹیلیجنس (ایم آئی) ءِ کارندہ احمد وال نوشکی ءَ یک کاروائی ءَ کشتگ-اے کارندہ زورگریں پوج ءِ گاڑی ءَ سوار بیگ گندگ بیتگ وھدے کہ گوستگیں بازیں روچاں اے کارندہ زالبول پوشاکانی تہ ءَ احمد وال ءُ آئی ءِ کش ءُ گوراں سُر ءُ پُر کنگ ءَ بیتگ-

جارکش ءَ گوشتگ کہ سرمچاراں گوستگیں ماہ چار مئی ءَ شال ءَ لنک بادینی دگ سر ءَ یک سوبمندیں کاروائی ءِ میان ءَ زورگریں پاکستانی پوج ءِ چاریگ فیروز مری ء لال محمد مزارانی تیرگواری کتگ کشتگ- اے کارندہ کاؤنٹر ٹیررازم ڈیپارنمنٹ ءِ واستا کار ءَ بیتگ، وھدے کہ آ آئی ایس آئی ءِ کارگس ءَ زورگریں ریاست ءِ چیریں ادارھانی افیسراں گوں تچکی ءَ گند ءُ نند کتگ- اے مرد زورگریں پوج ءِ دیر دراجیں پوسٹاں راشن ءُ تیل سر کنگ ءَ ھوار شال شھر ءِ دودمان ءِ لگتمال کنان ءَ لوگانی سر ءَ بیڑاں ءُ بلوچانی زورانسری آوار جنی پوجی ادارھاں تچکی ءَ کمکاری ءَ ھوار بیتگ-

جارکش ءَ گْوشتگ کہ ھمے وڑ گوستگیں ماہ ءَ سرمچاراں چہ شاھرگ ءِ دمگ ءَ دگہ چاریگی تاج محمد ء سلطان محمد سمالانی ،جھمنند مارگٹ دزگیر کتگ- جُست ءُ پُرس ءِ میان ءَ تاج محمد ءَ میارباری منّ اِتگ گوشتگ کہ آئی ءَ پاکستانی پوج ءِ ملٹری بُنجل ءَ کرنل شوکت ءَ گوں تچکی ءَ گند ءُ نند کتگ، چریشی ءَ پد آئی ءَ زورگریں پوج ءِ واستا چاریگی ءُ کمکاری ءَ تکچی ءَ بندات کتگ- اے چاریگ ءَ منّ اِتگ کہ آ وتی نزیکیں سیاد آصف ساتکزئی ءُ نجیب اللہ سمالانی زورگریں پوج ءِ دست ءَ زورانسری آوار جنی ءِ سنگین جرم ءَ تچکی ءَ ھمگرنچ بیتگ، چریشی ءَ بدل ءَ زورگریں پوج ءِ کرنل ءَ آ بیست ھزار کلدار سوگات داتگ-

جارکش ءَ گوشتگ کہ چاریگ تاج محمد ءَ دیمتر گوشتگ کہ آئی ءَ پوج نیمگ ءَ چہ شاھرگ ءِ دمگ ءَ دیم دیگ بیتگ، اود ءَ سر بیگ ءَ دگہ گیش دو چاریگ ھمراھانی نیٹ ورک جوڑ کتگ، آیانی تہ ءَ یکے زالبولے – اے چاریگ ءَ اے ھم منّ اِتگ کہ آ شاھرگ ءَ دگہ دو مردم پوج ءِ دست ءَ زورانسری آوار جنی ءِ نشانگ کنگ ءَ دلگوش بیتگ کہ اشی ءَ ساری بی ایل اے ءِ دست ءَ گرگ بیتگ- بلوچ راجی آمیدگس ءَ چاریگ تاج محمد سنگین ءِ راجی میاباری ءُ ڈیھ دُژمنی ءَ ھمگرنچ بیگ ءِ سر ءَ مرگ پرمان دیگ بیتگ، آئی ءِ سر ءَ سرمچاراں کار کتگ-

گُڈی ءَ بلوچ لبریشن آرمی ءَ اے گپ ءَ تچک کنگ وتی راھبندی درشان سرپد بیت کہ زورگریں ریاست ءِ چیریں پوجی ادارھانی واستا چاریگی کنگ، یا آیانی سروکی ءَ برجاہ ڈیتھ اسکواڈ ءِ بھر جوڑ بیگ بلوچ راجی زرمبشت ءِ ھلاپ ءَ پُرکار بیگ بلوچ، بلوچ سرڈگار ءُ شھیدانی ھوناں چہ دروھی ماپ نہ کنگ ءُ سنگین جرم اِنت- راجی آجوئی ءِ اے پیسلہ کنوکیں جنگے کجام ھما مردم مالی مپاد، زر ءُ زاتی دُژمنی ءِ ھاتر ءَ زورگریں پوج ءِ کارندہ جوڑ بیت ءُ وتی راج ءِ زورانسری آوار جنی، درکانودی کوش ءُ مُچی چُکچینی ءَ دُژمن ءِ کُمکار بیت، آئی ءَ بلوچ راج، راجدپتر ءُ زرمبشت ھچبر نہ بکش اِیت- بی ایل اے سرجمیں انٹیلیجنس نیٹ ورکس ءَ شھری گوریلا یونٹس ھرچ ھم چھرگ ءُ نیٹورک سر ءَ نگاہ ایر کتگ، ءُ اے وڑیں سرجمیں تھی ھترہ ءُ آستینکیں ماراں راجی پھاز ءِ ھاتر ءَ ھونڈلاں چہ گوجگ مئے اولی پوجی کار اِنت-

بلوچ یکجھتی کمیٹی ءِ سروک ڈاکٹر ماھرنگ بلوچ ءِ گھار ءُ آئی ءِ کانودی ٹیم ءَ اھوالکاراں گوں تران کنان ءَ گوشتگ ڈاکٹر ماھرنگ بلوچ ءُ آئی ءِ ھمراھانی بگیری ءَ آمیدگسی بے رھبندی انت بنکی رھبندانی بگیر انت ۔

اھوالکاراں گوں تران کنان ءَ کانودی ٹیم ءَ گوشتگ کہ چاردہ ماہ گوستگ بلے ھنگت ڈاکٹر ماھرگ ءُ آئی ءِ سنگتانی ، تچک ءُ پچیں آمیدگسی کاروائی کنگ نہ بوتگ ۔ آیانی رد ءَ مقدمہ آمیدگیسی کار ھر وھد ءَ مٹ کنگ بوتگ کہ آیانی تہ ءَ واکداری ھراست ، بازیں ارزیانی نبشتہ ، یکشل ءَ جانی ریمانڈ جیل ٹرائل ، ءُ نوں تامری ٹرائل ھوار انت ۔

کانودی ٹیم ءِ گوشگ ات کہ انساپ ءِ بنکی لوٹ ھمیش انت آمیدگسی کاروائی ایوک ءَ منصفانہ مہ بنت منصفانہ گندگ ھم بہ بنت ویڈیو لنک ءَ ٹرائل کنگ منصفانہ ٹرائل درگتئےءَ سنگینیں جست پیداک کن انت ۔

وکیلاں گوشتگ کہ جیل ٹرائل ءِ میان ءَ آمیدگسی ماھول ءُ رویشت ھنچوش بوتگ ءُ جج ءِ بدلی ءِ ھاتر ءَ ھم گوشتگ بلے پدا ھم چار ماہ گوستگ ھچ وڈیں پیسلہ کنگ نہ بوتگ ۔

اھوالکاراں تران کنان ءَ اے ھم گوشتگ کہ گوستگیں پیشی ءَ پراسکیوٹر جنرل آمیدگسی کارانی وھد ءَ ترندیں رویشت داشتگ ۔

آیاں لوٹ کتگ کہ آن لائن ءُ جیل ٹرائل سرجمی ءَ ھلاس کنگ بہ بنت ءُ پیشی پچیں آمیدگس ءَ کنگ بہ بیت ، جج بدل بہ بیت ءُ ڈاکٹر ماھرنگ ءُ آئی ءِ ھمراھاں کانودی ھک ءُ وکیلاں گوں ھال اھوال سھولت دیگ بہ بنت ۔

کانودی ٹیم ءَ پاکستانی وکیل ، انسانی ھکانی گل ، سول سوسائٹی ، سیاسی گل ، اھوالکاریب ادارہ ءُ میان استمانی انسانی ھکانی ادارھاں چہ لوٹ کتگ کہ اے جیڑہ ءِ سرا گامگیج بہ زور انت ءُ توار چست بہ کن انت ۔

ھمے درگت بلوچ یکجھتی کمیٹی ءَ وتی درشان ءِ تہ ءَ گوشتگ کہ بلوچ یکجھتی کمیٹی ءِ دزگیریں رھشون اے وھدی جیل ءِ تہ ءَ فیس لیس کورٹ ٹرائیل بگیری ءَ زھرشانی کنگ ءَ انت ۔ آیانی گپ تچک انت کہ آیانی ارزی پیشی کانود ءُ رھبندانی رد ءَ بہ بنت ۔ آ وتی وکیل ، کھول ءُ ھک ءَ زبھر کنگ مہ بنت ۔

درشان ءِ تہ ءَ گوشگ بوتگ کہ فیس لیس کورٹ ٹرائیل سرجمی ءَ ھلاس کنگ بہ بیت ۔

بلوچستان ءِ دمگ تمپ گومازی ءَ پاکستانی پوج ءَ گوستگیں روچ ءَ آپریشن ءِ وھد ءَ یک ورنایے آوار جتگ ءُ گون وت برتگ-

گیشیں ھالانی رد ءَ تمپ گومازی ءَ گوستگیں روچ ءَ پاکستانی پوج ءَ معراج ء عبداللہ آوار جتگ ءُ گون وت برتگ-

اھوالانی رد ءَ پوج ءِ آوار جنگ ءَ پد آئی ءِ بارو ءَ دگہ گیشیں اھوال دیم ءَ نیتکگ انت-

زانگ بہ بیت گوستگیں روچ ءَ پوج ءَ گومازی ءَ آپریشن ءِ وھد ءَ بازیں مردمانی لوگ مانداشتگ ءُ کروتکگ انت-

بلوچستان ءِ جتاجتائیں دمگاں چاردہ سالی ئیں گونڈوے ءَ ھوار چار مردم آوار جتگ ءُ بیگواہ کتگ اَنت-

گیشیں ھالانی رِد ءَ یازدہ جون 2026 ءَ شال ءِ ھند کلی کمبرانی ، کمبرانی دگ ءَ سی ٹی ڈی ءُ ایپ سی کارندھاں بیڑبرتگ چاردہ سالی ئیں نُھمی کلاس ءِ نودربر احمد عقیب ء فضل الرحمان جھمنند کلی قمبرانی، قمبرانی دگ شال آوار جتگ ءُ بیگواہ کتگ –

ھمے وڑ چار جون 2026 چاگی ءِ ھند دالبندین ایئرپورٹ دگ چیریں ادارہ آئی ایس آئی ءُ ایم آئی ءِ کارندھاں دو ورنا شکراللہ ء عبدالحالق نوتزئی ءُ زبیر بلوچ ء خدا بخش جھمنند چاگی دالبندین نام ءَ چہ بیتگ اَنت-

ھمے وڑ چار جون 2026 ءَ پنجگور ءِ دمگ وشبود ءِ ھند چاکر آباد ءَ اسحاق ء عبدالکریم جھمنند وشبود پنجگور آوار جتگ ءُ بیگواہ کتگ-

زانگ بہ بیت بلوچستان ءَ ھمکروچ زورانسری آوار جنی ءِ وئیل دیم ءَ آیگ ءَ اَنت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ بنجاھی شھدگ ءِ سر ءَ کنٹرول برجاہ بیتگ – اود ءَ سرمچاراں 12 روچانی 11 اُرش کتگ انت۔ اے اُرشانی تہ ءَ سیندک ءِ پُلپھانچی منسوبگ ءَ گوں سیادی داروکیں گاڑیانی کاروان، تیل ءُ گیس ءِ سر کنگ ءَ ھواریں گاڑی ءُ دگہ گاڑی کہ زورگیریں ریاست ءَ را زرکاری نپ ءُ سیت دیگ ءَ بیتگ انت، نشانگ جوڑ کنگ بوتگ اَنت۔ اُرشانی تہ ءَ 36 ءَ چہ گیش گاڑی تباہ بوتگ اَنت وھدے کہ سی پیک ءِ راہ ءِ سر ءَ دو مزنیں پُل ھم تراک ءِ سبب ءَ تباہ بوتگ اَنت۔

یکم جون: سرمچاراں پنجگور ءُ چیدگی ءِ راہ سرجمیں کنٹرول زرت کہ دو روچ ءَ برجاہ بوتگ۔ اے وھد ءَ سرمچاراں شش مزنیں گاڑی ءِ سر ءَ تیرگواری کتگ ءُ سوتکگ ءُ تباہ کتگ اَنت۔

پنچ جون: سرمچاراں لسبیلہ ءِ والپٹ ءَ چیک پوائنٹ جوڑ کنان ءَ شال ءُ کراچی ءِ مستریں شاھدگ ءِ سر ءَ کنٹرول ءُ یک کلاکے ءَ گیش چیکنگ برجاہ داشتگ۔ اے میان ءَ سرمچارانی دگہ گلاں ایکسائز پوسٹ ءُ لُٹ ءُ پلی کمپنی ءِ جاہ ءِ سر ءَ دستیگ کتگ۔ سرمچاراں لُٹ ءُ پلی کمپنی ءِ مزنیں مشینری ءُ دہ گاڑی سوتکگ تباہ کتگ ءُ ایکسائز ءِ کارندھاں چہ سلاہ دست کپتگ اَنت ءُ اے اُرش ءَ یک کانسٹیبلے ٹپیگ بوتگ۔ سرمچاراں سئے مردم دزگیر کتگ کہ آھانی تہ ءَ یک پولیس کارندھے ھم ھوار اِنت بلے رند ءَ آ گل ءِ پالیسی ءِ رد ءَ یل کنگ بوتگ اَنت۔

ھمے روچ ءَ سرمچاراں چمالنگ ءُ کوھلو روڈ ءِ سر ءَ وتی کنٹرول ءُ اسنیپ چیکنگ کتگ۔ پد ءَ نوشکی ءِ دو جاہ ’’سرمل‘‘ ءُ ’’رحمانزئی‘‘ ءَ شال ءُ تپتان شاھدگ ءِ سر ءَ کلاکانی کلاک دستیگ کتگ ءُ پنچ گاڑی نشانگ جوڑ کتگ انت۔

ھپت جون: مستونگ ءِ کردگاپ ءِ دمگ ءَ سرمچاراں لُٹ ءُ پلی کمپنی ءِ دوازدھیں گاڑیانی کاروان نشانگ جوڑ کتگ کہ چہ سیندک ءَ مڈی لٹ ءُ پُل کنگ ءَ بیتگ انت۔ اے اُرش ءَ سئے گاڑی سرجم ءَ تباہ کتگ انت، وھدے کہ زورگیریں لشکر ءِ یک گاڑی یے راکٹ ءَ تباہ کتگ، زورگیریں لشکر ءِ شش کارندہ اے اُرش ءَ مرتگ ءُ ٹپیگ بوتگ انت۔

نُھ جون: مستونگ ءَ سرمچاراں پاکستان اسٹیٹ آئل ءِ گاڑی ءِ سر ءَ تیرگواری کتگ ءُ ناکارہ کتگ۔

10جون: نوشکی مَل ءَ سرمچاراں رحمانزئی ءِ شاھدگ ءِ سر ءَ مادی ءِ برگ ءِ گاڑیانی کاروان نشانگ جوڑ کتگ۔ سرمچاراں دہ گاڑی سوتکگ ءُ تباہ کتگ انت ءُ بازیں گاڑیانی ٹائر تیرگواری ءَ چہ تاوان بوتگ انت۔

11جون: خاران ءِ نزیک ءَ ارماگے واشک ءَ سرمچاراں تراکناکیں چیز ایر کتگ ءُ لُٹ ءُ پُلی ءِ منسوبگ (سی پیک روڈ) ءِ دو مستریں پُل تباہ کتگ اَنت۔

بلوچستان ءَ برجاھیں راجی آجوئی جنگ ءِ اسٹریٹجک لوٹ زورگیریں ریاست ءِ زرکاری جُگولر ءَ را پیسلہ کنوکیں ٹپّے ءِ دیم ءَ آرگ ءِ زلورت ءِ سر ءَ زور دیگ ءَ اَنت۔ نوآبادیاتی مانشت ءِ ھلاپ ءَ سلاہ بندیں راجی گھگیری ءِ یک جوانیں رھبندے کہ زورگیریں تاکت ءِ زرکاری لوٹ انچو بے ایمنی، بے مھکم ءُ تاوان ءِ کاروبار جوڑ کنگ بہ بنت کہ زورگیریں سرزمین ءِ زوراکی ءِ برجاہ دارگ ءِ ھرچ ءُ درچ پہ آئی ءَ چہ نَپ ءَ باز گیشتر اِنت کہ نَپ ءَ گیشتر اِنت۔ داں کہ بلوچستان پہ زورگیریں ریاست ءَ اژداریں ریاست ءَ زرکاری بارے ءَ بدل کنگ نہ بیت، آئی ءِ کوریں فوجی مزن مَری ءُ بلوچ نسل کشی ءَ دزکش نہ انت ، پرچا کہ مئے گران بھائیں راجی وسیلھانی بے سریں دُزی چو کہ سیندک، ریکوڈیک، گوادر، سوئی ءُ اشکرانی گرانکدریں مڈیانی لُٹ ءُ پُلاں پاکستان ءَ اے زلم ءُ زوراکی ءِ دیم ءَ آرگ ءَ اِنت۔

اے درگت ءَ بلوچستان ءَ چہ گوزوکیں مستریں شاھدگ ایوک ءَ لس رھوگوزی یا سپری رھوتی نہ انت بلکیں آ نوآبادیاتی تجارتی شریان انت کہ آہانی بندر ءَ مئے سرڈگار ءِ مال ءُ مڈی بے رھمی ءَ چہ کشگ ءُ پنجاب ءَ دیم دیگ بوگ ءَ انت۔ ءُ دپاوار بے لگامیں دشمن ھرچ زیردستیں بندراں چہ ھچبر اود ءَ دمگی مردمانی گیشتریں ھب ءُ واھگ ءَ بوت نہ کنت۔ بلوچ لبریشن آرمی اے لُٹماری بندش ءِ سر ءَ زورگیر ءِ کش ءُ گور ءَ ءُ لُٹ ءُ پُلی کمپنیانی گاڑیانی نشانگ جوڑ کنگ راج ءِ ھلاپ ءَ ھچ وریں دژمنی ءِ درشان نہ اِنت بلکیں اے یک جائز، کانونی ءُ بے کچو داریں املے کہ بلوچ راجی پجار، بنچکی ءُ زر ءِ رکھینگ ءُ زوراکیں ریاست، کہ گوں ترندی ءَ برجاہ بیت۔

چہ میان استمانی کانود، اقوام متحدہ ءِ منشور ءُ راجی دفاع ءِ ٹھینگ بوتگیں رھبندانی رد ءَ ھرچ زیردستین دمگ ءِ مزلوم ءُ بزگریں راج ءَ اے بنیاتی ءُ ناسگوکیں ھست کہ آ وتی زمین ءِ سر ءَ زوراکی ءَ ایر کنگ بوتگیں ھر وڑیں زوراکی ءِ منسوبگاں رد بہ کن اَنت۔ زورگیریں تاکت ءِ نیمگ ءَ چہ دمگی بلوچ آبادی ءِ واھگ ءُ ھاکمیت ءِ لگتمال کنگ ءَ چہ دیم ءَ برگ بوگ ءَ اِنت کہ آ وتگڑیں دیمروئی منسوبگ اَنت کہ آ راستی نوآبادیاتی زورگر ءِ دراج کش کنگ ءُ بلوچ راج ءَ وتی راجدپتری سرڈگار ءِ سر ءَ یک زرکاری، سیاسی ءُ جغرافیائی مٹینگ ءِ جوڑ کنگ ءِ ھاترا یک جھلانک ءُ شیتانیں پندلے۔ سی پیک ءَ ھوار دگہ درستیں درملکی ءُ دمگی سرمایہ کاری منسوبگ پہ بلوچ راج ءِ وشھالی ءَ نہ بلکیں پہ وتی نسل کشی ءَ گوں بندوکیں ریاستی فوجی مشینری ءِ مھکم کنگ ءَ جوڑ کنگ بوتگ اَنت۔ پمیشکا اے پُلپھانچی ءَ رسد ءِ سپلائی لائنز، کمیونیکیشن نیٹ ورک ءُ انفراسٹرکچر ءِ پروشگ میان استمانی کانود ءِ رد ءَ راجی آجوئی ءِ جھد ءِ یک نااوپار ءُ منّگ بوتگیں بھرے ۔

بلوچ لبریشن آرمی ءِ نیمگ ءَ چہ دراھیں ٹرانسپورٹانی واھند، ڈرائیور ءُ لس مھلوک ءَ گوں کڈنی اِنت کہ چہ اے پلپھانچی نوآبادیاتی نزام ءِ بھر بوھگ ءَ زوت وت ءَ جتا بہ کن اَنت۔ مالکان ءُ ڈرائیوراں لُٹمار کنوکیں کمپنیانی واستا راجی مال ءُ مڈی ءُ ایندھن، سامان یا ھرچ وڑیں رسد ءِ ترسیل ءِ مھکمیں دزی ءِ بھر بوگ ءَ چہ سرجمی ءَ رکّینگ بہ بیت، وھدے کہ لس مساپر ءُ شھری پلپھانچی کمپنیانی واستا فوجی کاروان ءِ نزیک بوھگ ءَ پھریز بہ کن انت،۔ مئے اے جنگ بلوچ راج ءِ سرجمیں ھاکمیت، راجی شان ءُ آجوئی ءِ واستا جنگ اِنت ءُ داں بلوچ سرڈگار ءَ چہ درملکی ھاکمی، زورگریں لٹ ءُ پُل ءُ نوآبادیاتی زلم ءُ زوراکی سرجمی ءَ ھلاس نہ بنت مئے زرکاری بندش ءُ جنگی گھگیری گوں سرجمیں ترندی ءَ برجاہ مان اَنت۔

بلوچستان ءِ دمگ تمپ گومازی ءَ مروچی سھب ءَ پاکستانی لشکر ءَ بیڑ برتگ ءُ اود ءَ بازیں لوگے مانداشتگ ءُ ڈوزر کتگ انت-

اھوالانی رد ءَ مروچی سھب ءَ گومازی ءِ جتا جتائیں بازاراں پاکستانی پوج ءَ بیڑ برتگ ءُ لوگ ماندارگ ءِ ھواری ءَ کروتکگ انت-

دمگی اھوالانی رد ءَ پاکستانی پوج ءَ آصف نزیر ءِ لوگ مانداشتگ انت، حاجی خدا داد حبیب اللہ ءِ لوگ ءَ پرپٹے برتگ ، مجید عیسیٰ ءِ لوگ ءِ ساز ءُ سامان برتگ انت، وارث رشید ءِ لوگاں یک لینڈ کروزر گاڑی یے برتگ، اختر عمر ، خلیل نیکی ءُ سیٹھ علی ءِ لوگانی ساز ءُ سامان برتگ انت –

اھوالانی رد ءَ بازار ءَ گستہ مھلوک ءِ پس ءُ دلوتانی بنجل مانداشتگ ءُ تاوان داتگ انت-

بلوچستان ءِ دمگ واشک ءَ پجّار نہ بوتگیں مردماں سی پیک دگ ءِ دو بُنجاھی پُھل گوں تراکناکیں شووراں تباہ کتگ اَنت-

چہ چاگی ءَ دراؤکیں سی پیک لنک دگ ءِ دو بُنجاھی پُھل گوستگیں شپ ءَ ناشناسیں مردماں مزنیں کچے ءَ شورو پٹ کتگ ءُ تراکینتگ اَنت-

اِھوالکار ءِ رِد ءَ پُھل ارماگئے ءِ دمگ ءَ تباہ کتگ اَنت- اے وھد ءَ دیر دراجیں دمگ ءَ تراک ءِ توار اش کنگ بیتگ-

گوستگیں روچاں شال تفتان شھدگ سر ءَ دالبندین ءُ کردگاپ ءَ ھوار ھاران ءَ بلوچ لبریشن آرمی ءَ پُھل تراکاں چہ تباہ کنگ ءِ زمہ واری منّ اِتگ اَنت-

زانگ بہ بیت کہ شال تفتان شھدگ بلوچ لبریشن آرمی ءِ دستیگ اِنت اود ءَ مڈی بروکیں گاڑیاں یکشل ءَ اُرشانی نشانگ کنگ ءَ اَنت چریشی ءِ سوب ءَ مڈی ءُ مزنیں گاڑیاں لوڈنگ بند کتگ-

شھدگانی سر ءَ بے پھازی ءِ سوب ءَ گوستگیں روچ ءَ سرجمیں بلوچستان ءَ ٹرک یونین ایسوسی ایشنز نیمگ ءَ چہ تھتگ بندیں ھڑتال ءَ ھوار شٹرڈاؤن ھڑتال کنگ بیتگ-

بلوچستان ءِ دمگ نصیر آباد ءَ نامالومیں مردماں پلانٹ ءِ بنجاھی ٹاور گوں تراک ءَ تباہ کتگ کہ ایشی ءَ پد بازیں دمگاں بجلی بند بوتگ۔

گوستگیں شپ ءَ نامالومیں مردماں تراکناکیں شورواں گوں اوچ پاور پلانٹ ءَ چہ درکپوکیں دو مزنیں ٹاور تباہ کتگ اَنت کہ ایشی ءِ سبب ءَ ٹاور کپتگ اَنت۔ دومی نیمگ ءَ بجلی ءِ بنجل ءَ آس کپتگ وھدے کہ پلانٹ ءِ تہ ءَ یک مردمے ءِ بے ھوش بوھگ ءِ ھال ھست۔

ٹاورانی تباھی ءَ پاور پلانٹانی ھرابی ءِ سبب ءَ بلوچستان ءِ بازیں دمگاں بجلی ءِ سپلائی بند بوتگ۔

انگت ءَ اے اُرش ءِ زمہ واری کس ءَ نہ زرتگ بلے گوستگیں وھداں ھم اے وڑیں کارانی ذزمہ واری بلوچ سلاہ بندیں گلاں زرتگ انت۔

آمریکہ ءَ آبنائے ھرمز ءَ چیریں ریسکیو آپریشن ءِ میان ءَ امریکی پوج ءِ دو پائلٹ بے ناھدائیں ڈرون لانچ ءِ سرا چہ رکینتگ ءُ آؤرتگ انت ۔ اے اولی رند انت کہ امریکی پوج ءَ زر ءَ کپتگیں پوجی کارمندانی رکینگ ءِ ھاتر ءَ وتکاریں ڈرون لانچ کارمرز کتگ ءُ سوبمند بوتگ ۔

گیشیں ھالانی رد ءَھمے ماہ بزاں جون 2026 ءَ امریکہ ءِ AH 64 اپاچی بالگرد کہ آبنائے ھرمزءِ سرا ترءُ گرد ءِ میان ءَ وئیل ءِ آماچ بوتگ ۔ بالگرد ءَ سواریں ھردو کارمند زر ءَ کپتگ انت ءُ بازیں ادارے ءَ تاں آ زر ءِ تہ ءَ بوتگ انت ۔ نگیگیں جاورانی سوب ءَ سرجمیں مردمی ریسکیو آپریشن کنگ نہ بوتگ کہ پدا رند ءَ امریکی بحریہ ءَ نوکتریں وتکاریں ”زری ڈرون “ کورسئیر آورتگ ۔

اے ڈرون لانچ اے آئی ، نوکتریں سنسر ءُ وتکاریں نیوگیشن سسٹم ءَ پُر انت ۔ ڈرون ءَ کسانیں وھدے ءَ وئیل جاہ ٹپاستگ ءُ وت ءَ وئیل جاہ ءَ سر کتگ ءُ ھردو پائیلٹ چہ آودا در کتگ انت ءُ پدا ریسکیو بالگرد ءَ چہ آودا چست کتگ ءُ ڈن ءَ آورتگ انت ۔

امریکی پوج ءِ رد ءَ ھردو پائلٹ نوں وش ءُ سلامت انت ۔ پوجی زانتکاراں اے یک جنگی ءُ کمکی ٹیکنالوجی ءِ تہ ءَ جوانیں ءُ مزنیں گامگیج گوشتگ ۔

آیانی رد ءَ اے وڈیں وتکاریں زری ءُ برزی نزام ایوک ءَ پہ چارگ ءَ ناں بلکیں جان ءِ رکینگ ءَ ھم جوانیں کرد ءِ پیلو کن انت ۔ اے وئیل ءَ پد اے گپ پدر بوتگ کہ اے آئی ءُ ربوٹک نزام نوں جنگ ءِ میدان ھمراھی ءَ انسانی جانانی رکینگ ءَ ھم جوانیں کرد ءِ پیلو کنت ۔

امریکہ بحریہ ”ٹاسک فورس 59 “ ءِ چیردستی کارمرز بوکیں اے ڈرون باندات ءِ جنگی شوربندیانی جوانیں بھر ءِ زانگ بوگ ءَ انت کہ چریشی ءَ انسانی جان کم ءَ کم کار گرگ بیت ءُ چہ ھمیشاں آپریشن کنگ بیت انت ۔

بلوچ زالبول نرگس بلوچ پاکستانی پوج ءَ آوار جتگ ءُ بیگواہ کتگ-

ھالانی رِد ءَ نرگس بلوچ گوستگیں شپ ءَ کراچی ءِ دمگ چہ گلستان جوھر ءَ آوار جتگ- اِھوالکار ءِ رِد ءَ نرگس بلوچ وتی لوگ واجہ ءَ معیار ءُ چُکانی ھمراھی ءَ گلستان جوھر ءَ وسرک ءَ لوگ ءَ جھمنند بیتگ اَنت-

کھول ءِ گوشگ اِنت کہ گوستگیں شپ ءَ آ اود ءَ چہ زورانسری برتگ، وھدے کہ آئی ءِ درگت ءَ سرکاری ھساب ءَ ھچ وڑیں درشان دیم ءَ نیتکگ-

زانگ بہ بیت کہ نرگس بلوچ ءِ نام اشی ءَ ساری ھم ھالانی تہ ءَ اَتکگ- ھمے سال 28 جنوری ءَ ریاستی پلامرزی کنوکیں ٹولی ءِ سوشل رسانکدر اکاؤنٹس نیمگ ءَ چہ ٹاہ دیگ بیتگ کہ آ وتی بُنکی دمگ ءَ چہ سلاہ بندیں مردمانی ھمراھی ءَ شتگ- اشی ءَ پد آئی ءِ لوگ واجہ معیار رسانکدر ءِ دیم ءَ آرگ بیتگ، اود ءَ آئی ءَ گپ راست کتگ اَت-

بلے نوکیں ھالانی رِد ءَ نرگس بلوچ اے وھد ءَ وتی لوگ واجہ ءُ چکانی ھمراھی ءَ کراچی ءَ جھمنند بیتگ- آئی ءِ زورانسری آوار جنی گوستگیں ٹاھانی ءُ ھنگیں جاورانی درگت ءَ چہ بازیں جستاں ودی کنت-