بلوچ نودربر گل ( بی ایس او ) آزاد ءِ راجکاری تاک سگار ءِ بیست ءُ ھپتمی تاک چاپ ءُ شنگ کنگ بوتگ۔ اے تاک دو بھر انت بلوچی ءُ براھوی کہ آئی ءِ تہ جتا جتائیں ندکارانی نوشتانک ھوار انت۔ اے تاک بلوچ سرمچارانی نام ءَ ایر کنگ بوتگ ۔
تاک ءِ پیشگال ءَ نبشتہ انت کہ بلوچ راجمان ءِ علمی کد ءُ بالاد چون انت۔ بلوچ راجی جنز ءَ علمی بود چنکسیں تاکت ءِ دار ایت؟ بلوچ جنز ءِ پارٹی ءُ گلانی تہ ءَ علمی تاکتور کجا اوشتاتگ۔
آئی ءَ نبشتہ انت کہ بلوچ راجی آجوئی جنز ءَ گل ءُ راجمانی پلو ءَ علم ءِ تاکتوری تھریکی علمی آپروچ ءَ پدر کنت ۔ کوزہ گیری ءِ میان ءَ بلوچ راجمان ءِ علم ءِ ارتقائی عمل اوشت آماچ انت، زوراک ءَ بلوچ راجمان ءِ کلیں زانشتی در ءُ وسیلگ ھم کوزہ کتگ انت ۔ لٹریچر ءِ سنسرشپ اسکولانی پوجی بنجلانی تہ ءَ مٹی راجمان ءِ زانت ءِ کبزہ انت ۔ ھیالانی کوشگ انت ۔ بلوچ راجمان ءِ ھمک متبادل چہ تھریک ءَ پیداک بہ بیت ۔
دیمتر ءَ نبشتہ کنگ بوتگ کہ اگاں مروچی تیوگیں بلوچ راجمان ءِ ارتقائی عمل کوزہ گیر ءِ چیردستی ءَ جمود ءِ شکار انت۔ گڈا اشی ءِ ھاتر ءَ بلوچ تھریکی آپروچ ءِ میان ءَ پیداک بوتگیں پروگرام ءُ دوراندیشی پالیسی بلوچ راجمان ءُ سیاسی گل ءُ پارٹیانی علمی ردوم ءَ چہ اوشت ءِ آماچی ءَ کش ایت کن اَنت۔