سبی : سلاہ بندیں مردماں شھدگ سر ءَ ناکہ بندی، پوج ءِ گوما میڑ

سلاہ بندیں مردماں سبی ءِ نزیک ءَ ناکہ بندی برجاہ داشتگ مڈی بروکیں گاڑی نشانگ کتگ اَنت-

بلوچستان ءِ دمگ سبی ءِ ھند ڈنگرا ءِ نزیک ءَ حاجی شھر تھانہ ءَ ناشناسیں سلاہ بندیں مردماں چہ شال ءَ سندھ ءُ پنجاب ءَ رؤکیں راجی شھدگ سر ءَ ناکہ بندی جوڑ کنان ءَ آؤکیں ءُ رؤکیں گاڑی پٹ ءُ پل کتگ اَنت-

اے میان ءَ سلاہ بندیں مردماں شھدگ سرجمی ءَ دستیگ کتگ چہ بلوچستان ءَ مڈی بروکیں دو گاڑی ھم تیرگواری کتگ ءُ تاوان داتگ اَنت-

ھالانی رِد ءَ ناکہ بندی ءِ میان ءَ سلاہ بندیں مردماں پاکستانی پوج ءِ میان ءَ میڑ ھم بیتگ، داں دیراں برجاہ بیتگ، بلے اے میڑاں تنی وھدے ھچ وڑیں جانی ءُ مالی تاوان ھال سر نہ بیتگ-

زانگ بہ بیت کہ بلوچستان ءِ جتاجتائیں شھدگانی سر ءَ گوستگیں بازیں روچاں چہ مڈی برؤکیں ٹرک ءُ دگہ گاڑی بلوچ آجوئی لوٹوکیں سلاہ بندیں گلانی اُرشانی نشانگ بیگ ءَ اَنت-

بلوچ آجوئی لوٹوکیں سلاہ بندیں گلاں اے میان ءَ ھمے گاڑیانی سکیورٹی دیوکیں پاکستانی پوج ءِ کارندھانی سر ءَ ھم اُرشانی نشانگ کتگ چ چریشی ءِ آسر ءَ پاکستانی پوج ءَ جانی ءُ مالی تاوان چست کنگ کپتگ-

دومی نیمگ ءَ بلوچ ریپبلکن گارڈز ءِ جارکش دوستین بلوچ ءَ وتی درشانے ءَ گوشتگ کہ مرچی بی آر جی ءِ سرمچاراں سبی ءِ ھند ڈنگڑا ءِ نزیک ءَ ھاجی شھر تانہ ءِ کرءَ چہ شال ءَ سندھ ءُ پنجاپ ءَ روکیں شھدگ بستگ ءُ گاڑی پٹ ءُ پول کرتگ اَنت۔سرمچاراں سرجم ءَ شھدگ ءِ بندگ ءَ پد چہ بلوچستان ءَ پنجاپ ءَ مادن بروکیں دو مزنیں ایل پی جی گاڑیانی سر ءَ تیرگواری کرتگ ءُ تباہ کتگ اَنت۔

جارکش ءَ گوشتگ کہ ھمے وڑ ءَ دگ بندی ءِ میان ءَ ایف سی ءَ دیم ءَ آھگ ءِ کوشست کتگ سرمچار ءُ پوج ءِ میان ءَ داں دیر ءَ میڑ برجاہ بوتگ۔ اے میڑ ءَ پوج ءِ باز کارمند مرتگ ءُ ٹپی بوتگ۔

دوستین بلوچ ءَ درشان ءِ گڈی ءَ اُرشانی زمہ واری من اتگ ءُ گوشتگ کہ مئے اے وڑیں کاروائی داں بلوچستان ءِ آجوئی ءَ برجاہ بنت۔