TBP Balochi

زھری مشک سراپ ءِ جھمنندیں ورناہ شفیق جتک ءِ کھول ءَ چیف جسٹس آف سپریم کورٹ ، وفاقی ءُ صوبائی ھکومتاں ءُ انسانی ھکانی گلاں چہ دزبندی کتگ کہ شفیق جتک ء محمد حیات جتک ءِ یل کنائینگ ءِ ھاتر ءَ مئے کُمک ءَ بکن اَنت-

آئی ءَ گْوشتگ کہ شفیق جتک 31 اگست دوہزار بیست دو ءَ ھُزدار گدان ھوٹل ءَ چہ اود ءَ پوریاگری ءَ بیتگ سی ٹی ڈی ءُ چیریں ادارھاں آوار جتگ ءُ وتی ھمراھی ءَ برتگ، اشی ءَ پد مارا آئی ءِ درگت ءَ ھچ وڑیں ھال نہ رس اِتگ آ کجا اِنت ءُ کجام جاور تہ ءَ اَنت آ کجام جرم ءَ آوار جتگ ءُ بیگواہ کتگ-

آئی ءَ گْوشتگ کہ شفیق بے گناھے آئی ءَ چُشیں جرم نہ کتگ آ گوستگیں یک سالے بیت بیگواہ ءَ اِنت، اگاں آئی ءَ چُشیں جرمے کُتگ گُڑا مارا بگش اَنت اشی ءِ چی جرم کُتگ-

آئی ءَ دیمتر ءَ گْوشتگ کہ شفیق مھنت پوریاگری کتگ وتی کھول لاپ داتگ اَنت آئی ءِ زورانسری آوار جنی ءَ پد کھول گم ءُ رنجانی ھمراھی لوگ لاپی جنجلانی دیمپانی اِنت- ما دزبندی کن ایں انسان دوستی ءِ ھاتر ءَ آئی ءَ یل بکن اِت ءُ مارا مُچی سزاھاں چہ بہ رکین اِت-

کولواہ ءِ دمگ مادگ ءِ کلات ءَ پاکستانی لشکر ءِ گون ءَ دیم پہ دیمی میڑ ءَ نمیران بیتگیں سرمچار میجر اسد پنام ءِ باسد ءُ نمیرانیں آکل آزاب پنام ءِ ریاز ءِ نمیرانی ءِ دومی سالروچ ءِ درگت ءَ گوستگیں شپ آیانی اکسانی دیم ءَ ڈیوا بالینگ ءُ ستک شانی ندر کنگ بیتگ اَنت۔

دمگی مردمانی رد ءَ نمیرانیں میجر اسد پنام ءِ باسد ءُ نمیرانیں آکل ازاب پنام ءِ ریاز نُھ اکتوبر دوھزار ءُ بیست ءُ یک ءَ کولواہ ءَ مادگ ءِ کلات ءَ گوں دگہ جنگول نمیرانیں سکی بکش پنام ءِ مرید ءُ نمیرانیں پروزیر پنام ءِ ملوک ءَ ھواری ءَ نمیران بیتگ اَنت۔

زانگ بہ بیت ھردوکیں سرمچارانی درگت ءَ بلوچستان ءِ آجوئی ءِ واستا جنگ کنوکیں گل بلوچستان لبریشن فرنٹ ءَ وتی درشان ءِ تہ ءَ گوشتگ ات اسداللہ پنام ءِ میجر باسد 2011 ءَ گوں بی ایل ایف ءَ بلوچستان ءِ آجوئی ءِ سلاہ بندیں جُھد ءَ پاکستانی زورگری ءِ بگیری ءَ وتی کِرد ءَ پیلو کنگ ءَ بیتگ ءُ آکِل ازاب پنام ءِ ریاز 2012 ءَ بی ایل ایف ءَ بندوک بیتگ۔آ لیپٹیننٹ ءِ اُگدہ ءِ سر ءَ بیتگ ءُ نیٹورک ءِ کماندارے بیتگ۔

زانگ بہ بیت بلوچستان ءَ باز جنگ ءَ ھواریں مردمانی نمیرانی ءَ پد آیانی کھول مدام آیانی یاتگیری ءَ ستک شانی ندر کنگ ءَ گندگ بنت اِنت-

دی بلوچستان پوسٹ ءِ ڈیٹا ویژول اسٹوڈیو ءِ کچ ءُ کساسانی رد ءَ 2023 ءِ سیمی سَے ماھی ءَ سرجمیں بلوچستان ءَ دگ ءِ وئیلاں 826 کھول سانمند بیتگ اَنت سربیتگیں وئیلانی کساس 250 اِنت-

بلوچستان ءَ دگ ءِ وئیل یکشل ءَ برجاہ اَنت ھمک روچ جتا جتائیں دروشمانی وئیل ودی بوگ ءَ اَنت چریشی ءَ بازیں مردن زدگ بوگ ءَ اَنت ھمود ءَ بازیں کچے ءَ مردمانی جان ءُ ساہ زوال بوگ ءَ اَنت-

سیمی سَے ماھی اھوال ءِ رد ءَ گوستگیں سَے ماھانی توک ءَ دگ ءِ وئیل گیش بوتگ اَنت-

کچ ءُ کساسانی توک ءَ اے وئیلاں 224 ءَ گیش مردم مرگ ءِ ارجان بیتگ اَنت ءُ 602 ءَ گیش مردم زدگ بیتگ اَنت-

درستاں توک ءَ سانمند تریں دمگاں ھزدار ءَ 36 وئیل، شال ءَ 31 وئیل، مستونگ ءَ 29 وئیل، بولان ءَ 22 وئیل ءُ ھب ءَ 16 وئیلانی اھوال اتکگ اَنت ءُ ھمے وڑ ءَ گوادر ءَ 15 وئیل، ژوب ءَ 10 وئیل، لورالائی ءَ 9 وئیل ءُ واشک ءَ 6 دگ ءِ وئیلانی اھوال اتکگ اَنت-

بلوچستان ءَ ودی بوکہں وئیلانی سبب گاڑیانی پروشت ءُ پروش ،گیشیں بار جنگ، نیزور دابی، ڈرائیورانی سرجمی ءَ نا ھیلکاری ءُ ڈرائیونگ لائسنس ءِ نہ بوگ، ترند روگ ءُ بے پرواھی، دراج کشیں سپر ءَ واب ءِ کم کنگ ءَ نشہ ءِ کارمرد کنگ ھوار اَنت-

اے سببانی تہ ءَ پروشت ءُ پروشیں دگ، تنگ ءُ سنگلیں لائیں دگ، دگ ءِ پھریزی ءُ نیویگیشن اشارہ ءِ نہ بوگ ھوار اَنت ءُ بلوچستان ءَ دگ ءِ پھریزداری ءَ ھچ انجنیئر جاڑیگ نہ اِنت-

ٹی بی پی ڈیٹا ویژول اسٹوڈیو ءَ دگ ءِ وئیل انفوگرافکس ءِ دروشم ءَ دیم ءَ آورتگ انت-

جھل مگسی ءَ سلاہ بندیں مردماں لوگے ءَ دور کتگ ءُ مرد ءُ زال کشتگ اَنت ءُ سَے زھگ زدگ کتگ اَنت-

گیشیں اھوالانی رد ءَ جھل مگسی ءِ ھیڈکوارٹر گنداواہ ءَ بپڑ میتگ ءَ گوستگیں شپ ءَ ناشناسیں سلاہ بندیں مردماں لوگے ءَ دور کتگ ءُ تیرگواری کتگ چریشی ءِ آسر ءَ یک مردمے عبدالکریم لاشاری ءُ آئی ءِ لوگی بیران بیتگ اَنت ءُ سَے زھگ فرمان، سلیمان ءُ لاشار خان زدگ بیتگ اَنت-

وئیل ءَ پد جرمکار تتکگ اَنت ءُ سرجمی ءَ وئیل ءِ بارو ءَ سرپدی نہ بیتگ اَنت-

وئیل ءَ پد گنداواہ ءِ پولیس وئیل جاہ ءَ سر بیتگ ءُ لاش ءُ زدگ بیتگیں مردم ھسپتال ءَ برگ بیتگ اَنت ءُ جرمکارانی گرگ ءَ راہ بندگ بیتگ اَنت-

بلوچستان ءِ دمگ ژوب ءَ سر بستگیں سلاہ بندیں مردمانی اُرش ءَ پاکستانی پوج ءِ میجرے ءَ ھوار پنچ کارندہ مرتگ اَنت ءُ چار زدگ بیتگ اَنت-

گیشیں اھوالانی رد ءَ مروچی سھب ءَ بلوچستان ءِ دمگ ژوب ءَ پاکستانی پوج ءِ سر ءَ سلاہ بندانی اُرش ءَ اسپیشل سروسز ٹولی (ایس ایس جی) ءِ میجرے ءَ ھوار پنچ کارندہ کشگ بیتگ انت ءُ کیپٹنے ءَ ھوار چار زدگ بیتگ اَنت-

کُشگ بیتگیانی تہ ءَ میجر علی رضا ءُ حولدار راھو نثار ھوار اَنت ءُ زدگ بیتگینانی تہ ءَ کیپٹن نعمان، سپاھی یاسر ءُ سپاھی عمران ھوار اَنت-

زدگ بیتگینانی تہ ءَ کیپٹن نعمان ءُ سپاھی یاسر ءِ جاور ناگیگ گوشگ بیتگ اَنت-

زانگ بہ بیت ژوب ءَ ایشی ءَ پیسر پاکستانی پوج ءِ سر ءَ اُرش بیتگ اَنت کہ آیانی زمہ واری گیشتر تھریک تالبان پاکستان ءَ زرتگ انف بلے مروچی بیتگیں اُرش ءِ زمہ واری تنی وھدی کس ءَ پہ وت ءَ نہ زرتگ-

تربت ءَ پاکستانی پوج ءِ گون ءَ جنگ ءُ چوپ ءَ بیران بیتگیں مردمانی پجار بیتگ لاش داں انگت ءَ پوج ءِ دست ءَ اَنت-

سَے روچ ءَ پیش تربت ءَ پاکستانی پوج ءُ سلاہ بندیں مردمانی میان ءَ جنگ ھما وھد ءَ بندات بیتگ کہ پوج ءَ دمگ ءَ بیڑ بندات کتگ بیتگ – دمگی مردمانی رد ءَ بیڑ ءَ چیریں بالیگ ءُ ھیلی کاپٹراں بھر زرتگ-

جنگ ءُ چوپ ءَ ھردوکیں نیمگاں تاوان بیتگ اَنت بلے پاکستانی پوج ءِ جارکش ءَ بس دو مردمانی جنگ ءِ درشان داتگ بیتگ-

جنگ ءَ جنگ بیتگیں بیتگیں مردمانی پجار کامریڈ مقصود ء احمد جھمنند ھیرونک تربت ءُ مسلم ء رضائی جھمنند آپسر تربت ءِ ناماں زانگ بیتگ اَنت-

دمگی مردمانی رد ءَ جنگ بیتگیں ھردوکیں مردمانی لاش پوج ءِ گور ءَ اَنت ءُ داں انگت ءَ دمگی انتزامیہ یا کھولانی ھوالگ ءَ کنگ نہ بیتگ اَنت-

امریکہ ءَ جاڑیگیں اسرائیل ءِ سپیر ءَ گوشتگ کہ ھماس ءَ چہ گزہ ءَ اسرائیل ءِ سر ءَ اُرش ءِ وھد ءَ یرگمال کتگگیں مردمانی تہ ءَ بے کساس ءَ امریکہ ءِ جھمنند ھوار اَنت- امریکہ ءِ ٹی وی سی بی ایس ءَ گوں تران کنان ءَ جُستے ءِ پسہ ءَ گوشگ بیتگ یرگمال کتگینانی تہ ءَ امریکہ ءِ مردم ھوار اَنت؟

پسو ءَ اسرائیل ءِ سپارتکار مائیکل برزوگ ءَ گوشتگ من سرپدباں آیانی سرجمیں اھوال ھست بلے منی گور ءَ نیست اَنت-

اسرائیل ءِ سرکار ءِ پریس آفس ءِ گوشگ اِنت چہ سد ءَ گیش اسرائیل ءِ مردم یرگمال کنگ بیتگ اَنت-

ھمے وڑ ءَ امریکہ ءِ وزیر ھارجہ انتونی بلکن ءَ امریکہ ءِ ٹی وی ءَ گوں گوشتگ بائیڈن انتزامیہ اے اھوالانی پٹ ءُ پول ءَ کنگ ءَ اِنت ھماس ءِ اُرش ءَ بیران ءُ یرگمال کتگینانی توک ءَ امریکہ ءِ شھری ھوار اَنت یا ناں –

فرانس ءِ وزارت ھارجہ ءِ جارکش ءِ گوشگ اِنت اُرشاں بیران بیتگینانی توک ءَ یک فرانس ءِ شھری یے ھوار اِنت-

العربیہ ءِ رد ءَ ھماس ءِ سلاہ بندیں ونگ ءِ جارکش ابو عبیدہ ءَ یک ریکارڈ کرتگیں درشانے ءَ گوشتگ گمانی رنگ ءَ اُرش ءَ گرگ بیتگیں اسرائیلانی کساس اسرائیل ءِ سروزیر ءِ گوشگ ءَ گیش اَنت-

اسرائیل ءِ لشکر ءِ جارکش ءِ گوشگ اِنت اسرائیل ءِ لشکر ءَ گزہ ءَ ھشت سد جاہ نشانگ کتگ انت چریشی ءَ ھماس ءِ سدانی کچ ءَ جنگول بیران ءُ دزگیر کنگ بیتگ اَنت-

برتانیہ ءِ ھال سرکنوکیں ادارہ روئٹرز ءَ اسرائیل ءِ ٹی وی ءِ درور دیان ےَ گوشتگ ھماس ءِ اُرشاں بیران بیتگیں اسرائیلانی کساس ھپت سد ءَ سر بیتگ انت-

میان اُستمان ءِ ریلیف اینڈ ورکس ایجنسی (اونروا) ءِ واکدارے ءِ گوشگ اِنت اسرائیل ءِ اُرشاں پد چہ گزہ ءَ بیست ھزار ءَ گیش فلسطینی لڈ ءُ بار ءَ لاچار بیتگ اَنت-

اونروا ءِ ابلاگی مشیر عدنا ابو حسنہ ءَ گوشتگ 20300 فلسطین ءِ مھلوک اونروا ءِ وانگجاھاں پناہ گزین اَنت-

اونروا ءِ چیردستی ءَ چِل ءُ چار اسکول اَنت ایشانی توک ءُ بیست ءُ ھشت ھنچین اَنت کہ اود ءَ لڈ ءُ بار کتگین مردماں واستا جاڑیگ اَنت-

لڈ ءُ بار کرتگیں گیشتر فلسطین ءِ گزہ ءِ پٹی ءَ گوریچان ءُ زرباری کمشنریانی چہ اسکولاں سر بیتگ اَنت ءُ لڈ ءُ بار کنوکانی کساسانی توک ءَ گیشی ءِ گمان اِنت-

بلوچ لبریشن آرمی ءَ شال ءِ دمگ ولی تنگی ءَ پاکستانی پوج ءِ سر ءَ بوتگیں اُرش ءِ تامر شنگ کُتگ –

بلوچ آجوئی لوٹوکیں سلاہ بندیں گل بلوچ لبریشن آرمی ءَ وتی آفیشل ٹیلی گرام چینل ھکل ءَ بنام ءِ “چارہ منٹ، چاردہ سرمچارانی” اُرش ءِ تامر شنگ کرتگ – اے تامر ھمے سال ءِ چاردہ ستمبر ءَ شال ءِ دمگ ولی تنگی ءَ پاکستانی پوج ءِ بنجل ءِ سر ءَ بوتگیں اُرش ءِ تامر انت –

تامر ءِ تہ ءَ گندگ بیت کہ بی ایل اے فتح اسکواڈ ٹولی ءِ سرمچار نوک جوڈ بوتگیں بنجل ءُ آئی ءِ پھازگی سنگراں نشانگ کن انت ءُ آیانی سر ءَ کبزہ کن انت –

تامرے بندات ءَ بی ایل اے فتح اسکواڈ ءِ باسک پوجی پوشاکانی تہ ءَ زاھر کنگ بنت کہ آیاں بازیں نوکتریں سلاہ گون انت –

چاردہ سرمچارانی چاردہ منٹ ءِ اے تامر ءِ تہ ءَ گندگ بیت کہ بی ایل اے ءِ سرمچار پوجی کارمنداں تاچینگ انت ءُ آیانی سنگراں کبزہ کنگ ءَ انت وھدیکہ اشی ءِ تہ ءَ اے ھم گندگ بیت یک جاھے ءَ بلوچ سرمچار ءُ پاکستانی پوج نزیک ءَ دیم پہ دیم انت –

تامر ءِ تہ ءَ اے ھم گندگ بیت سرمچارانی نیمگ راکٹ گولہ ءِ آس دیگ بیت ءُ راکٹ گولہ پوجی مڈی جاہ ءَ تباہ کنت ھمے میان ءَ اے ھم گندگ بیت کہ پوجی کارمند وتی بنجل ءَ یل دیگ ءُ تچگ انت –

اے تامرے گڈسر ءَ بی ایل اے ءِ یک زدگ بوتگیں سرمچارے پیش دارگ بیت کہ آئی ءِ ٹپ درمان کنگ بوگ ءَ انت – بلے بلوچ سرمچار کندگ ءُ مسکرا ھم کنگ ءَ انت –

زانگ بہ بیت اے اُرش ءِ زمہ واری بلوچ لبریشن آرمی ءَ منّ اِتگ ءُ گوشتگ ات کہ ولی تنگی اُرش ءَ سرمچاراں یازدہ پوجی کارمند کُشتگ انت –

گل ءِ جارکش جیئند بلوچ ءَ وتی درشان ءِ تہ ءَ گوشتگ ات سرمچاراں زورگیریں پوج ءِ سر ءَ اُرش کتگ ءُ بنجل دستیگ کتگ – سرمچاراں ھر چاریں نیمگاں بنجل وتی انگر ءَ کتگ ءُ پدا آئی ءِ سر ءَ گوں راکٹ ءُ دگہ مزنیں سلاھاں گوں اُرش کتگ – چریشی ءَ دژمن ءَ وتی ترس ءَ سلاہ ءُ زدگ بوتگیں کارمند یل داتگ ءُ تتکگ انت –

جیئند ءَ گوشتگ ات کہ سرمچاراں زورگیریں پوج ءِ دو پوسٹانی سر ءَ سرجمی ءَ کبزہ کتگ وھدیکہ سیمی پوسٹ سلاھانی ڈپو بوتگ آ راکٹ گولہ ءَ چہ تباہ کتگ چریشی دژمن پوج ءِ سلاھانی ڈپو تباہ بوتگ وھدیکہ سرجمیں پوجی کارمند مرتگ انت –

اوگانستان ءِ صوبہ ہرات ءَ شمبے ءِ روچ ءَ بوتگیں زمین چنڈ ءَ تنی وھدی دوھزار ءَ گیش مردمانی بیرانی ھال انت – بازیں گِس ءِ لُمب اِتگ، اے زمین چنڈ ءَ ہرات ءِ سینزدہ دمگ سانمند بوتگ انت –

اوگانستان ءِ سرکاری واکدارانی رِد ءَ شمبے ءِ روچ ءَ ہرات ءَ بوتگیں زمین چنڈ ءَ دوھزار ءُ پنجاہ مردم بیران بوتگ انت –

تالبانی سرکار ءِ جارکش زبیح اللہ مجاہد ءَ ایکس ءِ تہ ءَ نشتگ کہ زمین ءَ چنڈ ءَ سرجمی ءَ سینزدہ میتگ سانمند بوتگ انت ءُ سرجمی ءَ دوھزار ءُ پنجاہ ءُ سَے مردم بیران بوتگ انت –

مجاہد ءِ رِد ءَ یک ھزار ءُ دوسد مردماں گیش زدگ انت ءُ یک ھزار ءُ سَے سد ءَ گیش گِس کپتگ انت –

دومی نیمگ ءَ دمگی اھوالکارانی رِد ءَ زمین چنڈ ءَ بیران بوتگیں مردمانی کچ کساس دوھزار ءُ پنچ سد انت –

ھالانی رِد ءَ زمین چنڈ چہ زندہ جان ءِ میتگ نائب رفیع، سیہ آب، وردگانو، کرنال، سربلند، تشک، چاہک ءُ سنجاب ءَ گیشتر جانی تاوان رستگ انت –

تالبانی سرکار ءِ ملا جانان صائق ءَ گوں اھوالکاراں تران کنان ءَ گوشتگ کہ زمین چنڈ ءَ کساس دوھزار ءُ پنچ سد مردم زدگ بوتگ انت –

واکدارانی گوشگ انت کہ پہ زدگ بوتگیں مردمانی کمک ءَ ڈاکٹر ءُ درمان سک کم انت ءُ کمکی ادارھانی ھاتر ءَ دوریں ھند ءُ دمگاں روگ سک گران انت پرچاکہ بازیں دگ ءِ بند انت – تالبان سرکار ءَ چہ پاکستان، ترکی، ءُ ایران ءَ ھوار دگہ ڈیھاں کمک ءِ لوٹ کتگ –

ایران ءِ سیمسراں نزیکیں روکپتی اوگانستان اتکگیں زمین چنڈ ءَ سدانی کچ ءَ مردم بیران بوتگ انت ھمے گوشگ بیت کہ کوچگی ھند ءُ دمگاں چدوگیشتر مردم بیران بوگ ءِ گمان انت –

اے زمین چنڈ ہرات ءَ چِل کلومیٹر گوریچانی روکپتی ءَ سھب ءِ ادار یازدہ ءَ اتکگ – اشی ءَ سانمند بوتگیں مردمانی گِس گیشتر ھاکی گِس بوتگ انت –

دمگی مردمانی گوشگ انت کہ زمین چنڈ ءِ آیگ ءَ گون بازیں مردمے گِساں چہ ڈن در اتکگ بلے ھر یکے کہ گسانی تہ ءَ بوتگ گڈا چیر تر اِتگ انت آیانی تہ ءَ بازیں کھول ھست کہ تنی وھدی در کنگ نہ بوتگ انت –

اے درگت ءَ ورلڈ ہیلتھ آرگنائزیشن ءِ گوشگ انت کہ کم چہ کم چار سد ءُ شست ءُ پنچ گِس لمب اِتگ انت –

اقوام متحدہ ءِ باھوٹیانی ادارہ یو این ایچ ایم او ءِ رِد ءَ آیاں زمین چنڈ ءَ سانمند بوتگیں مردمانی ھاتر ءَ دمگی نادراھجاھاں چار ایمولینس داتگ ءُ ہیلتھ ورکرانی سَے ٹولی ہرات ءِ دمگ زندہ جان ءَ دیم دیگ بوتگ –

بلوچ اسٹوڈنس ایکشن کمیٹی (بساک) ءِ نیمگ ءَ “بلوچستان کتاب کاروان” ءِ نام ءَ ماں بلوچستان ءِ دمگ ڈیرہ مراد جمالی ءُ تمپ ءِ دمگ بالیچہ ءَ کتاب میڑہ برجاہ دارگ بوتگ، وھدیکہ گوستگیں روچ ءَ ھشت ستمبر ءَ ماں آواران ءِ دمگ لباچ ءِ وانگجاہ ءَ زھگانی ھاتر ءَ مراگش ءِ برجم دارگ بوتگ –

بساک ءِ جارکش ءَ وتی شنگ کرتگیں درشانے ءِ تہ ءَ گوشتگ کہ گل ءِ نیمگ ءَ دو جتائیں جاھاں بالیچہ ءُ ڈیرہ مراد جمالی ءِ ھنداں کتاب میڑہ برجم دارگ بوتگ – جارکش ءِ رِد ءَ اولی کتاب میڑہ چہ نصیرآباد ھنکین ءِ نیمگ ءَ ماں ڈیرہ مراد جمالی ءِ شاہ دربرجاہ ءَ دو روچی کتاب میڑھے برجم دارگ بوتگ ءُ دومی چہ تربت ھنکین ءِ نیمگ ءَ ماں بالیچہ ءَ مبارک قاضی ءِ یات ءَ مزن وانگجاہ ءَ برجاھیں مراگش ءَ یک روچی کتاب میڑھے برجم دارگ بوتگ –

جارکش ءِ رِد ءَ ھر دوئیں کتابی میڑہ سوبمندی ءَ گوں آسر کنگ بوتگ انت ءُ اےکتاب میڑہ ءَ بلوچستان، راجکاری ، بن دپتر، لبزانک ءُ ایدگہ بنگپانی سر ءَ کتاب ایر کنگ بوتگ انت کہ ورنا، زھگ ءُ ماسٹراں اتکگ ءُ پہ وت کتاب درچِتگ ءُ زرتگ – جارکش ءِ رِد ءَ گل ءِ لبزانک گام ءُ نوْشت ءَ ھوار ھوار بلوچ لٹریسی کیمپئن ءِ کتابُک ہم ایر کنگ بوتگ ءُ ماسٹراں دیگ بوتگ –

جارکش ءَ دیمتر ءَ گوشتگ کہ بلوچستان کتاب کاروان ءِ نام ءَ کتاب میڑہ ءِ کاروان برجاہ اِنت ءُ سرجمیں بلوچستان ءَ پہ بلوچ نودربر ءُ ماسٹراں میڑہ اڈ دیگ بیت تانکہ آ بوان اَنت ءُ آیانی زانشتی رُدوم بہ بیت ءُ جھان ءِ لبزانک ءَ ھوار وتی جند ءِ لبزانک ءَ ونت بہ کن اَنت داں وتی جند ءَ پولیت بہ کن انت –

دومی نیمگ ءَ ماں آواران ءِ دمگ لباچ ءِ وانگ جاہ ءَ پہ زھگانی ھاتر ءَ بلوچ اسٹوڈنٹس ایکشن کمیٹی ءِ نیمگ ءَ مراگش ءِ برجاہ دارگ بوتگ کہ آ مراگش ءَ مزنیں کچے ءَ زھگ ءُ نودربراں بھر زرتگ –

اے درگت ءَ بساک ءِ جارکش ءَ گوشتگ کہ بلوچ اسٹوڈنٹس ایکشن کمیٹی ءِ سنگتانی نیمگ ءَ آواران ءِ وانگجاھے ءَ گونڈوانی ھاتر ءَ یک مراگشے برجم دارگ بوتگ ءُ اے مراگش آواران لباچ ءِ میتگ سرفراز بازار ءِ وانگجاہ ءَ ایر کنگ بوتگ –

جارکش ءِ رِد ءَ اے مراگش ءِ بنکی مول ءُ مراد آواران ءِ تہ ءَ نودربراں وانگ ءُ زانگ ءِ نیمگ ءَ آرگ، ءُ گل ءِ لبزانک گام ءِ وسیلہ ءَ آیاں وتی ماتی زباناں وانینگ ءُ دربرگ ءِ سکین بوتگ – آئی ءَ گوشتگ کہ مراگش ءَ گونڈو گام ءِ درگت ءَ سرپدی دیگ بوتگ انت ءُ گام کتاب پہ گونڈواں بھر کتگ –

جارکش ءِ رِد ءَ مراگش ءَ جتا جتائیں وانگی بنگپانی سر ءَ تران کنگ بوتگ ءُ مزنیں کچ ئے ءَ نودربراں بھر زرتگ-

آئی ءَگوشتگ کہ آواران ءِ وڈیں شھر ئے ءِ تہ ءَ گل ءِ مراگشے اڈ بیگ ءُ مزنیں کچ ئے ءَ نودربرانی بھر زورگ پہ گل ءَ یک مزنیں سوبمندی ئے – گل ءِ مستریں جھد ھمیش اِنت کہ ھما جاھاں کہ گل ءِ ھنکین نیست اَنت بلے اود ءَ کسان ءُ مزنیں مراگش ءُ چیست ءُ ایر کنگ بیت انت – گام ءُ بلوچ لٹریسی کیمپئن ءِ وسیلہ ءَ مراگش برجم دارگ بیت ءُ نودربراں وتی راجی کرد ءِ تہ ءَ آوار کنگ ءِ جھد بیت انت –